رحلتي انا ودرتي
بسم الله الرحمن الرحيم
اقدم إليكم احبتي تقرير رحلتي لجنوب أفريقيا أنا ودرتي الغالية أم سعد
وان شاء الله أفيدكم ولو بالقليل كما أفادوني أخوتي من قبل (أبو العصافير، أم نوف، عبدالله محمد، واخي الغالي والعزيز علي قلبي fox)
راح اتطرق الى أخطاء وقعت فيها واحداث ومغامرات لا تنسى وبعض النصائح للمسافرين الجدد في أسلوب خفيف وان شاء الله يلقى استحسانكم ورضاكم
طبعا أم سعد قرت أغلب التقارير وشرت نوت صغير وسجلت فيه التالي:
1) ارقام مهمه: السفارة السعودية tel: (012)362 4230
Fax: (012)362 4249
الشرطة: 1101
هذا طبعا من حرصها الزايد ههههههههههههه طبعا هذا المكتوب بالنوت قبل الرحلة
بالبداية حبيت اوضح لكم بان الصور تم التقاطها عن طريق كاميرتين كانون وباناسونيك
وهذي الثانية
نستعد للرحلة وجهزنا الأدوية والمعقمات و وحطينا سعد عند جدته خفنا عليه من تقلبات الجو وهو لسى صغير عمره سنتين وهذي كانت اول غلطه ارتكبتها لان البلد من جد ممتع للأطفال قبل الكبار
رحنا مطار الملك خالد ومن ثم الى مطار الملك عبدالعزيز وانتظار 3 ساعات في المطار وكان المطار مزدحم بالحجاج وهنا بداء وسواس امراض الحجاج وجلسنا بعيد الى ان نادوا للرحلة اللي المفروض الاقلاع الساعة 4ونص الفجر و ما اقلعنا الا الساعة 5ونص والحمد لله كان حجز طيرانا الداخلي متأخر شوي وصلنا جوهانسبرغ الساعة 12ونص تقريبا وزحمه شنط حجاج ويالله اخذنا الشنط واول حمال مشورناه معانا ورحنا على خطوط kulula نشحن الشنط وهذي غلطتنا الثانية ما خذين شنطة وحده كبيرة ولا انتبهنا ان الخطوط الداخلية لازم 32 اقصى حمل وكان وزن شنطتنا 38 كيلو رحنا نفرغ منها الاب توب وشنطة الأدوية والكريمات والحمد لله الوزن صار 31 كيلو
وبعدها رحنا للصرافه وصرفنا الدولارات اللي معنا كلها مرة وحده صح مغامرة بس مالي خلق ادور صرافه فصرفت الكاش اللي معي كله وبعدها قلنا نبي شرايح نفعل البي بي ولا الاتصال فكان جوالي استقبال مجانا فودانا لمحل woolworths شرينا الشرايح وفعلتها لنا بدون مانروح لمكتب MTN بس مالقينا شريحه تركب على الاي فون يعني لازم المكتب واللي في المطار ماعندهم رحنا نقص بوردنق وهنا غلطتنا الثالثة سالناه كم تبي شكله شاف الفلوس وطمع قال قرب الكريمس وووو والمفروض نعطيه بدون ما نسأل وراح يكون راضي باللي تعطيه بس يالله مو مشكلة , الطيارة المفروض تقلع للقاردن روت 2ونص بس الاسف مااقلعت الا 3 ونص مادري قاصديني بالتاخير ((هههههههههههههه
وصلنا مطار جورج بحمد الله ومنته .
*ولاحظنا شي غريب على اطفال البيض منهم يمشون بدون جزم(اكرمكم الله) يمشون عادي وشفناهم في الكيب تاون بعد مدري وش الحكمه .
اخذت سيارة من هيرتز وكانت هيوندا سيفك
ولسه قايل بسم الله الا وعكست الخط والشاحنة قدامنا عصب علي شوي وانا اقول في نفسي هذي اولها يا ساتر فأعطتني أم سعد الطريقة السهلة في القيادة وهي تقول لي (انا على الرصيف لا تنسى انا على الرصيف)وصلنا الفندق الواقع في نايزنا بحمد الله وحنا تعبانين جوعانين على الساعه 5ونص
هذي صورة المكتب حقهم
وهذا منظر من البلكونة
وهذا اماكن خاصه للشوي وبامكانك استخدامها
صلينا وريحنا شوي وسألنا الاستقبال اقرب سوبر ماركت فدلنا على kwik spar سجلنا اسمه على القارمن ورحنا له واحنا جوعانين ونختار من هالسندوتشات ونتنقى الا هي تقول كله خنزير لحم ودهن (اجلكم الله) قلنا خلنا في السليم توست مكتوب حلال ومويه وجبن فيلادلفيا
وشويه تسالي وكيك واهم شي كولا
وبكذا انتهى اول يوم لنا في جنوب افرقيا
وترقبوني في الحلقة القادمة وعنوانها (توهان في احداثياتك ياأبو العصافير)
