الرد على الموضوع

التنقل بين المدن الرئيسة بسوريا يكون بواسطة البولمانات التي تغطي كل مدينة أو بلدة بسوريا واسعارها معقولة جدا بحدود 250 - 300 ليرة من دمشق للاذقية كمثال . كما تغطي سيارات النقل المتوسطة للبلدات الصغيرة والقرى واسعارها رخيصة جدا .

حيث انكم 4 اشخاص الافضل لكم استئجار سيارة صغيرة ب 1500-2000ليرة باليوم ولا تخافوا راح تندلون وتنبسطون اكثر بوجود السيارة وراح توفر عليكم المال والوقت .

طبعا التكاسي منتشرة بكل مكان بالمصايف ولا مشكلة مع المواصلات وهناك رحلات كثيرة من دمشق الى المصايف بشكل شبه يومي .

اسعار التكاسي رخيصة ولكن نحن ندفع زيادة على العداد لاننا نعلم أنه غير منصف بحق السائقين .




...............تحياتي

مشكوووووور اخوي المسافر على الرد والتفاعل ،،،

قريت تقارير ومواضيع كثيرة ... بس باقي لي هالإستفسار البسيط :


التنقل من دمشق للمصايف الشمالية شنو أفضل وسيلة ؟؟؟ يعني مانبغي سيارة أجار لأنه ماندلي ! فلو كان تاكسي كم بيكون السعر وشنو تنصحونه ؟؟؟

ولو إفترضنه أنه سكنا في مشتى الحلو أو صلنفة وووالخ ... هل تتوافر في كل منهم تكاسي كثيرة مثلاً تنقلنا من الشقة أو الفندق إلى الأماكن السياحية والمطاعم والأسواق ؟؟؟ .... أو راح نتورط ؟؟؟

ولو عندكم معلومات عن أسعار التنقلات بالتكاسي أو غيرها في مختلف المناطق ياريت تخبرونا !!!

وعليك السلام
انصحك تدخل على المواضيع وتقارير الأعضاء وصدقني انك بتستفيد منها كثير وانت راح تكتب برنامج رحلتك
بالشام رح لمكاتب التأجير السيارات وعندهم تلاقي طلبك واذا تبي سيارة بالسواق او بدون سواق
ممكن من الشام تروح طيران إلى اللاذقية او بالباص ارخص وهناك اسكنوا بفندق او شاليه
ورح استأجر سيارة وخذ عائلتك وتمشوا وروحوا لكل المصايف
وممكن من الشام تتفق مع سواق يوديكم وين ما تبون بس بحسابه
وانتظر الأعضاء يمكن يعطونك ويفيدونك
بالتوفيق

سوريا يوم نحتاج جدول ، وبغينا رد للإستفسارات ؟؟؟

السلام

بعد جدال ومناقشات حول طريقة الذهاب لسوريا ( سيارة أو طيران ) ... تم الإتفاق على الطيران ...

إن شاء الله بتكون المدة 15 يوم ، و العائلة مكونة من 4 أشخاص !


- مبدئياً حابين نقضي :


* بعض الأيام تقريباً 4-5 أيام في دمشق وبعدها ، يوم في الزبداني

* ننتقل لمشتى الحلو ونقيم فيه يومين ومنه ننتقل للمصايف القريبة

* ننتقل لصلنفة 4 أيام وماحولها من مصايف كالاذقية وكسب

* ولو ممكن نروح لبنان يومين

* لو تبقت أيام بنقضيها في دمشق للتسوق


- أول خيار للسكن في دمشق هو فندق العباسيين ، سمعت ناس تمدحه ويقولون نظيف بس مادري بعده عن الأسواق والمرافق الثانية !

- لو فكرنه نروح لبنان يقولون أفضل شي نحجز بكج سياحي ، يعني تقريباً 7000 ل.س للشخص لمدة ( 3 أيام - ليلتين ) مع السكن في فندق راقي والأكل والجولات السياحية .

- مثل ماتعرفون رايحين مع الطيران يعني راح نعتمد على التكاسي ولاندري كم أسعارهم في المشاوير الداخلية
وهل نستخدمهم مثل الشي للإنتقال من دمشق للمصايف الثانية وللتنقلات مابين المصايف ، شنو نصايحكم وشنو الأسعار ؟ فكرنا في تاكسي يومي أو إستئجار سيارة فما في فايدة لأنه ماعندنه خبرة في مناطق سوريا ومانحب ناخد سايق ؟

- فكرنه ناخذ باكج للشمال السوري بس أحسه بكون جداً مكلف مادري نروح بروحنه ؟ ،،، ولو ما أخذنه بكج سياحي وإنتقلنا لهذه المناطق هل تتوافر فيها التكاسي بكثرة والسكن شلون نخلي التاكسي يدور ويانا ،،، يعني خبركم عائلة وبنحتاج ننتقل يومياً للمطاعم والأماكن السياحية ؟

- خايفين نروح للشمال ونتوهق في المواصلات والسكن ،،، فشنو أفضل إقتراح تقدمونه لنا ؟


- أدري إنه الموضوع معفس بس المشكلة مادري شلون أبدي وأرتب ، مع العلم صار لي فترة أجمع أشهر المطاعم والأماكن السياحية في مختلف مناطق سوريا ،،، ياريت تخبرونا بالسكن المناسب في مختلف المناطق يعني مايكون كثير عن 2000 ل.س ، ماتهم الفخامة قد ماتهم النظافة والإتساع للعائلة !


- في النهاية ياريت تعطوني جدول مرتب وحلو لهالأيام مع ملاحظاتكم القيمة اللي محد يستغني عنها

ولو بتم أشكر فيكم ما بوفي حقكم ،،، يعطيكم ربي ألف عافيه !


تحياتي