نـغـم; هلا اختي
بغيت اسالك وياليت تجاوبين علي بسرعه الله يعافيك
بصراحه انا شفت تقاريرك الاربعة
وبصراحة سطلت انواااااااع التسطيل على الرحلة
وودي اروحها مع زوجي شهر عسل بأول شهر 8
فودي بسرعه ابدأ ارتب لها عشان يمديني
إن شاء الله أقدر أساعدك
بس ودي اعرف انتي كم جلستي من يوم في كل الجزر .. وكل جزيرة كم يوم جلستي فيها
جلست في الجزر 16 يوم 15 ليلة .....5 أيام سان ميغيل....3 أيام فلوريس...5 أيام فايال وتشمل يوم في جزيرة بيكو...3 أيام في تيرسيرا...
وكم كلفتك كل السفرة .. وكم كلفتك التذاكر للشخص
السفرة كلفتنا 74000 درهم تقريباً وتفاصيل التذاكر معروضة في المشاركة السابقة
والفنادق كم اسعارها تتراوح بين كم ؟؟
في الأزور هناك خيارات متعددة للسكن مثل الفنادق والأكواخ والقصور والقلاع القديمة وكل نوع يختلف سعره عن الآخر...
الفنادق عموماً اسعارها رخيصة ...لكن التكلفة في الطيران وكيفية الوصول والتنقل داخل الجزر...
هناك أجنحة في الفنادق مناسبة للعرسان وأسعارها تتراوح من 250 إلى 1000 يورو
الغرف العادية
الفندق في سان ميغيل 139 يورو...Hotel Royal Garden أربع نجوم ....
الفندق في فلوريس 95 يورو... Hotel Ocidentalنجمتين
الفندق في فايال 135 يورو Horta Hotel أربع نجوم
الفندق في تيرسيرا 120 يورو Hotel Angra ثلاث نجوم
الفنادق ما أخترناها بنفسنا لأن الحجز كان في ذروة الموسم السياحي وصعب نحصل حجوزات...
والمكتب السياحي اختاروا لنا هالفنادق علشان يطلع السعر مناسب للباكيج كامل...
والمواصلات لاحظت انك تتنقلين دوم بالسيارة .. واتوقع هالشئ كلفك اكيد ... ياليت اعرف كم ؟؟
الغالية أحنا أخذنا باكيج كامل وكان التنقل داخل الجزر من ضمنه ممكن تشوفين التفاصيل في المشاركة السابقة
أخذنا سيارة مع سايق ليوم واحد وكلفنا 70 يورو تقريباً مع الإكرامية
والصرف اليومي كم كلفكم ؟؟
يعتمد على طريقة صرف الشخص بالنسبة لنا تقريباً 150 يورو للأكل والمشتريات والتنقل داخل الجزر (غير الجولة السياحية)
يعني انا وهو بس شخصين وميزانيتنا تقريبا من 40 الى 50 الف
هل تكفينا لمدة اسبوعين مع التذاكر
أتوقع الميزانية كافية لو قللتوا عدد الجزر ولو قللتوا مدة إقامتكم في البرتغال..أو ما جلستوا أصلاً
هناك رحلات مباشرة للأزور على طيران SATA الأزوري من
معظم مدن البرتغال..لشبونة ...فارو..بورتو
وأيضاً من...
امستردام...كوبنهاغن..دابلن..فرانكفورت ...لندن..باريس ...وزيورخ....وأعتقد كانت هناك رحلة مباشرة تسير أيضاً من ميونخ(سابقاً)
لو ماكنتي حابة تجلسين في البرتغال ممكن توقفين ترانزيت في وحدة من هذي الدول لكن الرحلة أتوقع بتكون متعبة فأنصح بالتوقف كم يوم في وحدة من هذي الدول..
وعموماً البرتغال هي الخيار الأمثل من وجهة نظري لأنها دولة رخيصة مقارنة بالدول الأوروبية الأخرى من ناحية السكن والأكل..ومثالية للتسوق وبهالطريقة تدمجين رحلة الطبيعة مع رحلة التسوق في رحلة واحدة
هناك رحلات مباشرة من أمريكا وكندا للي حاب يزور الأزور من تلك الدول...
ياليت القى جوابك بأسرع وقت ممكن عشان يمدينا نرتب لها مع الفيزا وكل شئ
وصح الفيزا بكم طلعتوها ؟؟
عزيزتي الفيزا كانت عندي من قبل لأننا كنا مسافرين في نفس السنة أيطاليا وألمانيا ...
فطلعتها من السفارة الإيطالية في أبوظبي وكان سعرها جداً معقول بصراحة ما أذكر بالضبط من 300 إلى 400 درهم إماراتي...
أما زوجي فهو عنده فيزا (عمل) شنغن ومدتها ثلاث سنوات من السفارة الألمانية...
في الواقع ما طلعنا فيزا خاصة بالبرتغال...وعلى كل حال ماواجهتنا أي صعوبات في دخول البرتغال بالتأشيرات المستخرجة من السفارات الألمانية والإيطالية...
ومررررره شكرا
رحلتك خيال واتوقع تصويرك لها وكتابتك لكل تفاصيل الرحلة هو الي حلاها اكثر
والله يرزقني زيارة لها يارب
تسلمين حبيبتي هذا من ذوقج وإن شاء الله تزوريها وأي استفسار ثاني أنا في الخدمة