ايها الاحبه اسف على التأخير ...وابشركم زانت الامور وقمت برفع الصور
سوف اضع حلقات لكل موقف او رحله او زيارة بالتصوير الممل ان شاء الله
-----------------------------------------------------------
هذي حلقة : رحلة الجليد الى تابو
بسم الله
انا طبعا في تاورنقا المدينه الساحليه في شرق الجزيرة الشماليه وهذي صورة:
--
--
طبعا انا قلت لكم السياحة في عطلة نهاية الاسبوع ... فكرت وفكرت في مكان سياحي اروح له لقيت اماكن كثيره ، بس احيانا يحكمك المسافة ،،، بعد ما اخترت اني اروح للثلوج واشوف الثلج على الطبيعه والمسه بيدي وامشي عليه ( زي الغرب يتمنون يمشون على النفود )ههههههههههههه
سألت كل من : مركزمعلومات المدينه ، العائله ، المعهد . كلهم ما قصروا قالوا ان اقرب مكان هو تابو
المهم ، الآن ابي اروح ابي احجز كيف؟؟ رحت للستي سنتر أو مركز المعلومات وجلست وقلت ابي اروح يم الـــ (سكي) اللي هو التزلج على الثلج قال : متى قلت: الويك اند الجاي قال :كم شخص قلت : شخصين انا وزميلي ، وهو يقوم ويجيب هاك المنشورات ويقعد يفرجني عليهن وقال تبي هذا والا هذا والا هذا اثر الدعوة عويصة يبي له اختيار وتحديد مكان وتحديد هل انت تعرف تتزلج على الثلج والا لا؟ وتحديد الرحلة هي تدريب والا سياحة عائليه والا ..... والا ..... والا ........ .
قلت : وش الفرق قال هذي رحلة مستوى عادي ( يعني تصعد سفح الجبل وتتفرج وعندك مطاعم وايجار زلا جات صغيره تعليميه وتنزل ،،،، والثانيه مستوى متوسط يصعد نص الجبل ويعرف يستخدم الزلاجات ( بورد ) يسمونه اللوح ، ،،، والثالث يكون محترف تزلج ويصعد اعلى الجبل القمه ، ويجيك منحدر الى الارض واذا بغى يصعد يستخدم( التيل فريك) الخاص باللاعبين.
-- سألته عن الاسعار طلعت غاليه يومين (السكن ، والنقل ، والاكل والشرب ، وايجار الملابس والزلاجات والكنادر ) ---- حوالي 3500 ريال سعودي للشخص ---
طبعا المستوى العادي يعني أرخص شئ .
المهم ابتسمت له ابتسامة المتوهق بالاسعار وطلعت ومعي منشورات واوراق دعائية وبروشورات لمواقع الثلوج واسعارها .. ورحت للبيت وسألت ابو العائله وش رأيك بهالرحلة ، ، قام والتفت يمي وهو ما هو فاهم ( كأنه ما هو مصدق اني ابي اروح ،) وش أقول ، شاف الاوراق والاعلانات عن الرحلات الى الجليد والتزلج وقال اماكن حلوه ... وسألني انت تعرف تتزلج ؟ قلت : لا بس ابي اروح سياحه واتفرج على الثلج .
قال : متى تروح ؟ قلت : في عطلة نهاية الاسبوع .
قال : اسمع وانا ابوك ، انت دعواك غويطه يبي لها مخمخه . ههههههههه ،،،، وهو يوقوم ويجيب دليل الصفحة الصفراء ، وهو يفل الاوراق اللي جبت ويقعد يسألني كم سؤال ، واتصل على كم شركة سياحية ، وقال خلاص راح يتصلون علينا ، ونشوف العرض الافضل ( قلت تمام اغديه يجيب لي سعر زين ) ، المهم يوم جاء من باكر : بالمعهد سألت المدرس عن الثلج وقلت له قصتي ، واني ودي اروح بس اشوف الثلج والمسه بيدي ، ضحك وقال : الامر سهل عندي الحل ..
قال لي : هذا عنوان وتلفون وحده اسمها ساره صاحبة باك بيكرز ( فندق صغير) وتنظم رحلات على قدها .مر عليها وقلها ابي اروح معكم ، واعطاني ورقة منشورات عن رحلاتها اللي تنظمها وكانت مسويه دعاية لرحلة الى تابو ( الثلج ) مع حظور حفلة سنويه تقام هناك يسمونها ( بيق كارّيت ) الجزرة الكبيره ،،، الظاهر ان الديره مشهورة بزراعة الجزر ،،،،
المهم مريت زميلي وقلت له الوضع كيت وكيت وكيت ... من .. الى ،،، وهالحين انا ابي اروح يم ساره واشوف وضعه واسألها عن الاسعار والتفاصيل ( تخاوي ؟ قال : قدام والريوس حرام ، بس متى قلت بالويك اند قال معك .
وحنا والله نمر مطعم ونتغدى ونريح شوي وحنا نروح يم ساره ( العنوان سهل وقريب ، في السنتر ) ، دخلنا والا هاك الاستقبال اللي كله ملصقات واعلانات ، وفيه اربع 4 اجهزة كمبيوتر على اليمين من الكاونتر وحنا نتوجه للكاونتر الا هاك المزيونه ،،، وانا اقول : انت ساره ؟ قالت: انت الشمري ؟ قلت: ايه ويلكم ويلكم ، اثر المدرس متصل عليها ومضبط وضعي،
المهم قالت : هذي رحلة العمر ، فيه باص خمس نجوم ينقلنا الى تابو ( الثلج ) ،، الباص كبيرجداً ((( مثل حق النقل الجماعي بالسعودية ))) بس عدد الركاب فيه احدعشر 11 راكب فقط عشان فيه غرفة نوم ومطبخ ودورة مياه ، والمقاعد نظام جلسه كنب ،
بعد ما نوصل فيه بيت على سفح الجبل فيه غرف مجهزة بأسرة نوم دافيه وأكل مجاني الوجبات الرئيسية طبعا .
وكل هذا بسعر 180 دولار نيوزلندي = 468 ريال سعودي تقريبا للشخص الواحد
-- جازلنا السعر وحسبناها لقيت انه الف 1000 ريال كافيه للشخص تخليه يعيش لحظات حلوه بالثلج وتدخله جو ما بعمره عاشه وهي سفرة عمر--
المهم : حجزنا ودفعنا ، وقالت الوعد يوم الجمعة الساعة اربع 4 العصر.
يوم رجعت للبيت ، قلت لهم انا حجزت مع رحلة المغامرات الى تابو ( الثلج) ، فرحوا العائلة وقالوا ممتازه اسعارهم وقامت الام على طول وقالت تعال معي وهي تفتح هاك الدولاب وتطلع من هالملابس والاكوات والقبعات والدسوس والشرابات وقالت تقوس ( خذ اللي يجي على مقاسك ، شكرتها وقلت لا ما يحتاج انا معي ملابس ، ضحكت وقالت ادري بس هذي ملابس خاصة للثلج ضد الهواء والماء وبعدين زي ماتشوف هذي ملابس خاصة للموسم فقط يعني ماهي لأحد، المهم وهي تجيب هاك الدهون وتعطيني اياه وقالت : هذا علشان الحرو الجلديه من الشمس ( انا ابتسمت وقلت وشلون حروق شمسيه وحنا بعز البرد والثلوج ودرجة حرارة تصل 20 تحت الصفر، )
وهي تقعد تشرحلي التالي :
(( نيوزلندا تعاني من ثقب الاوزون يعني اشعة الشمس حارقة ،،، هذا أولاً .
ثانيا عندما تصعد جبال الثلوج تكون عالية جدا تصل 3000 متر فوق مستوى سطح البحر يعني تقرب من الشمس باشعاعاتها البنفسجيه والحمراء وتحت الحمراء والألفا والجاما وغيرها،
ثالثا : اللون الابيض السائد في الجبال الثلجيه يعكس اشعة الشمس على بشرتك ويخليها سوداء يعني حتى لو تكون في ظل يجيك اشعاع ابيض كأنه مرايه .)))
المهم خذيت الدهون وكم من شراب يدين ( دسوس) وشكرتها وقالت الرحلة بالباص تأخذ 5 خمس ساعات يعني تحتاج أكل بالطريق ، فقالت انا اجهزلك أكل ساندويتشات وفواكه تأخذها معك .
قلت شكراً ، كانت معي كريمة (عموما هم يحبون الحركة)
جاء يوم الجمعة وبعد ما طلعت من المدرسة واجهة زميلي وتواعدنا الساعة 3:30 عند ساره ، رجعت للبيت ورتبت اغراضي وجهزتلي الام الأكل وعبيت شنطتي ( شنطة المدرسة حقت الظهر ، شلت الكتب وحطيت كل شئ فيها حتى الاكل )
وصلتني هي بسيارتها الى السنتر عند فندق ساره المتواضع نزلت الا هذا رفيقي واقف يتحراني ، يوم جت الساعة 4 اربع رحنا يم سارة وقالت الباص اتصل علي وقال راح يتأخر عشان يشيل ركاب ، وراح يغير الخطة (بدل ما يمر وسط المدينة راح نطلع له حنا على الطريق ) ما فهمت زين ، قالت لا تخافون (مدبرين ) روحوا وتعالو الساعة 5 خمس والا اقولكم انا اتصل عليكم جوال ... مشينا ورحنا يم ستار بكس وخذينا قهوه وتقهوينا وقمنا نشمت بهالعالم ، ونذاكر لغتنا العربيه لانه من زمان ما تكلمنا عربي من اسبوع لاسبوع تقريبا ، المهم جت خمس ونص 5:30 الا الجوال يدق قالت تعالوا يالله مشينا يوم جيناه الا مافيه باص ولا فيه احد ولا تاكسي ولاشي ،،، هاه وش الدبره ( التدبير ) قالت يالله اركبوا معي . قلت انا وين قالت يم الباص واقف برى المدينة على الطريق يتحرانا , قلت انا عطينا العنوان ناخذ تاكسي ما يحتاج نعنيك ، قالت لا اصلاً انا رايحه معكم بالرحله ، انا اللي منظمتها وانا المرشدة السياحية حقتكم ،
والله وهي تطلع وتوصي هاك الواحد باي باي ، وحنا نطلع وراها وهي تتوجه الى هاك البي ام دبليو هاك ال740 مدري750 المهم انه موتر سنع ومن الموديلات الجديدة قالت اركبوا تفضلوا ، وانا اجي ابركب قدام ، قالت : معليش فيه زلاجتي وانا اويق الا والله سادحه الزلاجة حقت الثلج (البورد) على المرتبه قدام ، قالت اركبوا ورا، قلت بقلبي ( والله والحلا والزين) صرنا شيوخ : وهذي الصورة وانا داخل البي ام دبليو ( لاحظ الزلاجه طالع طرفها الاحمر في مقعد الراكب الامامي
----
----
----
وهذا زميلي متكي معي ورا ........هههههههههههه
--------
-------
------
المهم مشينا حتى وصلنا بيت فيه واحد وننزل وهي تنزل الزلاجه حقته وتنزل شناطنا وعرفتنا على الشخص اللي كان في البيت رحب فينا وقال أول مره بحاتي اقابل عربي وجها لوجه وقال انا اروح كثير الى الثلوج ورياضة التزلج ما عمري سافرت مع عربي او شفت عربي . المهم وش السالفه يا سارة قالت الباص رايح يمر علينا وياخذنا بعد نص ساعة تقريبا
ومعة باقي الركاب ونبدأ الرحلة الى فاكابابا تابوو الثلج
-----------
صورة الباص والشباب اللي معنا بالرحلة قبل ساعة الاقلاع
-----
------------------------
للحديث بقية