رد: رحلة يوم بالمانيا والنمسا سبتمبر
اهلا اخوي قلب سيف
طريقة حجز القطار سهله جدا ، وانا راح اشرح لك هي بالصور عشن تكون واضحة ويستفيد الجميع
بعد ماتدخل الموقع راح تجيك هذي الصورة
تختار الاختيار اللى عليه السهم وهي دول اخرى ، وراح تجي الصفحة التالية
راح تختار المكان اللى راح تغادر منه والمكان اللى تبغى توصله ، ولنفترض اننا نبغى نروح من ميونخ الى فرانكفورت ، فراح نختار الاختيارات اللى واضحه في الصور
ونختار مكان الوصول
وبعدين نختار هل ذهاب فقط اما ذهاب وعودة ، ولنفترض انه ذهاب فقط وندخل التاريخ
بعدين تحدد عدد الاشخاص البالغين والرضع والاطفال
بعدين تضغط بحث راح تظهر الصفحه اللى بعدها وهذي شكلها
ولاننا حددنا في الخطوه السابقه وقت الرحلة الساعه 10 فاعطانا خيارات من الساعه 10 ، لكن ممكن تشوف موعد الرحلات اللى قبلها والرحلات اللى بعدها بالضغط على اماكن الاسهم اللى محددها في الصوره ، وراح تلاقي جنب الرحله سهم برتقالي لو ضغطت عليه راح يعطيك تفاصيل اكثر عن الرحلة زي ماهو ظاهر في الصورة.
الان راح نشرح تفاصيل المعلومات اللى ظهرت لنا بعد ماضغطنا على السهم البرتقالي
1 = محطه انطلاق الرحلة ومحطه وصولها
2 = تاريخ انطلاق الرحلة وتاريخ وصولها
3 = وقت مغادرة الرحلة ووقت وصولها
4 = مده الرحلة
5 = عدد مرات تغيير القطار وواضح في مثالنا انه صفر ، يعني ان القطار اللى تركبه من ميونخ ما تخرج منه الا في فرانكفورت وما في اي تغيير خلال الرحلة.
6 = نوع القطار
7 = سعر الرحلة وفيه نوعين من التذاكر واحد Savings fares وهو اقل سعر ولو حجزت فيه لازم تطلع على نفس القطار واذا فاتك القطار عندك يوم واحد للتغيير وتدفع 15 يورو على التذكرة ، الخيار الثاني Standard fares وهو الاغلى وتقدر تغير في اي وقت بدون ماتدفع اي رسوم. طبعا في حالتنا نختار الارخص لانه عندنا برنامج محدد في السفر من فنادق الخ وطبيعي فيه التزام بالمواعيد مننا
8 = الرصيف اللى راح ينطلق منه القطار
9 = معلومات اكثر عن محطات التوقف ولو ضغطنا عليها راح تعطينا تفاصيل اكثر واللى حتظهر في الصوره التالية
1 = محطات التوقف في كل محطه وتلاحظ انه في كل مدينه كاتبين في اي رصيف راح يوقف القطار ، لكن الموضوع هذا مايهمك لانك ماراح تغير قطار ، لكن في حاله انه فيه تغيير في القطارات مهم انك تعرف الرصيف اللى منه راح تركب القطار التالي
2 = الخدمات اللى موجوده في محطة القطار
3 = خريطه توضح محطه الانطلاق ومحطه الوصول
ولو ضغطنا على رقم 2 راح تطلع لنا التفاصيل اللى حتظهر في الصوره التاليه
وراح تشوف الخدمات اللى في المحطه ، ولو ضغطت على ميونخ زي مني عامل سهم في اليمين ، راح يطلع لك عنوان المحطه على اليسار عشن تتأكد من ان المحطه اللى حاجز عليها هي الصحيحه
ونفس الشي لو تبغى تتاكد من عنوان محطه فرانكفورت اللى راح تنزل فيها
ولو ضغطت على عرض الخريطة راح يطلع الخريطه وتشوف خط السير
والان نقفل التفاصيل اللى احنا فتحناها ونرجع للمعلومات الاساسية اللى اعطانا هي في البدايه ، لو حبينا نغير المكان او التاريخ ، نضغط زي ماهو ظاهر بالصوره
وراح يظهر لك هذي الصفحة وممكن تغير منها كل شي
وبعدين تضغط بحث وتجيك زي الصفحة اللى معروضه ولو ماتبغي تغير شي خليك في الصفحة السابقه وهي اللى كانت زي كده
خلاص اخترنا اول رحلة اللى بسعر 39 يورو ، الان نضغط شراء
وراح تجيك الصفحة التالية اللى توضح لك الخيارات مره ثانية
وراح تلاقي فيه خيار ثالث ضافوه 49 يورو وهو نفس مواصفات الحجز اللى اخترناه ولكن درجة اولى ، ولنفترض اننا في مثالنا راح نستمر على الدرجة الثانية اللى 39 يورو ، وراح نضغط استمرار زي الصوره
في هذي الصوره فيه عروض توفير وهي ما تهمنا لانها مفيده اكثر للناس المقيمين ، المهم نختار زي ماهو ظاهر بالصوره ونضغط استمرار ، وراح تجينا الصفحة التاليه
وهنا يطلب منك تسجل دخول اذا كان عندك اسم مستخدم ، او تعمل واحد اذا ما عندك او تحجز بدون ما تعمل اسم مستخدم ، وانا انصح ان اي شخص يحجز بالنت انه يعمل يوزر لانك تقدر ترجع لتذكرتك في اي وقت ، وثاني شي يبلغوك اذا فيه تاخير في الرحلة عن طريق الايميل ، وهذا اللى حصل معايا انه تأخرت الرحلة وجاني ايميل ورحت على طول المحطه ونسقت على الرحلة اللى بعدها
المهم نختار تسجيل كعميل جديد ، وراح تظهر الصوره التالية
وراح تعبي البيانات زي ماهو ظاهر بالصوره ، والصوره التالية هو الجزء الباقي من الصفحة
تم تضغط استمرار راح تظهر الصفحه التالية
طبعا تختار الخيار الاول اللى هو التذكرة اون لاين
وتضغط استمرار وراح تجيك الصوره التالية
تجاوز هذه الصفحة لان كلها عروض ما تحتاجها واضغط استمرار راح تجيك الصوره التاليه
وفيها معلومات اثبات الهويه ، لان فيه انواع هما حاطينها عشن يتأكدوا ان انت الشخص اللى اشترى التذكرة ، واحنا كسياح ماعندنا غير البطاقه الائتمانية ، و لازم يكون صاحب البطاقه احد المسافرين ولو حتى انتهت صلاحيه البطاقه لازم تجيبها معاك عشن يطابق
وهذي صوره الجزء السفلي من الصفحة ولازم تعبيها وتحط صح امام المربع الفاضي وتضغط استمرار
بعد هذي الخطوه باقي هناك خطوتين ، الخطوه التالية راح يطلبوا منك وضع تفاصيل بطاقة الائتمان اللى راح يخصموا منها المبلغ ، ولما تضغط استمرار راح يرسلولك على الايميل التذكرة ويعرضولك هي لو حابب تطبعها
هذي هي الخطوات ببساطه ، واخر خطوتين ما نزلت لها صور لاني ما ابغى احجز فعليا ، لكن حتلاقيها واضحة جدا
واذا عندك استفسار انا في الخدمة
وتحياتي لك
