بعد زيارتي لموريشيوس هذه انطباعاتي
السلام عليكم ورحمة الله وبركاته
كيف الأعضاء الكرام ان شاء الله الكل بخير
الحمد لله عدت من موريشيوس من رحلة شهر العسل قبل اسبوعين وهذه بعض انطباعاتي عن شهر العسل في موريشيوس
في البداية كل الشكر والتقدير لأبو عزيز و فتى الشرقية و جديد الأسفار لأنه فعلا استفدت كثيرا من تقاريرهم ومشاركاتهم وردودهم في هذا المنتدى الرائع
أحب انوه لثلاثة مواقف حصلت لي في موريشيوس
الأول \ طبعا الأقامة كانت في الهيلتون رائع بكل المقاييس اول ليلة نزلنا لبوفيه العشاء انا والعروس طبعا الباكج يشمل العشاء فقط وانت عليك دفع قيمة المشروبات اللي تطلبها طلبنا عصيرات وبعد العشاء جابوا لنا الفاتورة بقيمة المشروبات وكان فيها خانة لرقم الغرفة واسم النزيل وتوقيعه طبعا دفعت كاش وكتبت المعلومات الليلة الثانية جيت اسوي نفس الشيء نبهني الموظف انه اذا ابغى ادفع كاش ما يحتاج اكتب البيانات لأنه هذه بس للي بيدفع بالفيزا عند المغادرة طبعا لمن جينا مغادرين صدروا لي فاتورة بقيمة المشروبات حقت اول ليلة نبهت الموظفة انه دفعت كاش ولجهلي وقعت على الفاتورة قالت اوكيه و اتأسفت واعتذرت وحذفت المبلغ دون تأخير ...... قمة التعامل بدون تشكيك :24:
الثاني \ في احد الأيام نزلنا للفطور و وتعرفون عروس لازم من الزينة خواتم ذهب وسلاسل والى اخره طبعا المدام ضايقتها الخواتم في الأكل خلعت خواتمها ووضعتها على الطاولة 4 خواتم ذهب وبعد الفطور قمنا نتجول في المنتجع ونستمتع مع العصافير والأسماك وافتكرت المدام الخواتم بعد ساعة ونص تقريبا طبعا رجعنا للمطعم وانا فاقد الأملفي انه نلقاها رحنا لطاولتنا ما حصلنا شيء قلت بس راحت سألت مديرة المطعم قالت لي لحظة ودخلت المكتب و جابت لي مظروف مكتوب عليه رقم غرفتنا وفيه الخواتم كلها ( طبعا هم يأخذون رقم الغرفة اذا جيت داخل المطعم ) وشكرتها وكأفاتها لو في بلد ثاني راحت الخواتم في خبر كان:110:
الثالث\ طلبنا مرة وجبة سناك قبل المغرب ساندوتشات دجاج وسلطة ورحنا جلسنا على الشاطئ ننتظر الطلب دقائق واذا الموظف يرجع لنا ويقول ترى السلطة فيها لحم خنزير وشكلكم ما تأكلونه طبعا شاف المدام متحجبة وغيرنا الطلب
هذه المواقف الثلاثة تدل على نبل الشعب الموريشيسي واخلاقهم الراقية وتعاملهم الرائع :113:
باختصار شهر عسل بدون موريشيوس ............ ما ينفع
تحاتي للجميع
