رد: رحلتي إلى كوريآ الجنوبية
اولاً اتمنى لك رحلة سعيدة
- انا ناودي اقضي الاجازة في سيئول وجيجو حجزت التذاكر والفنادق بس التذكرة من سئيول الى جيجو حصلتها في موقع اكسبيديا بـ 3000 ريال لشخصين ..! وكما سمعت من الاعضاء ان سعرها للشخص الواحد 600 ريال ..
غير صحيح تأكد من الموقع
ربما وضعت مطار خارج كوريا
عليك بطيران جيجو اير هو الارخص
انا حجزت قبل الرحلة بيومين بـ 1200 للشخصين ذهاب وعودة
ولو حجزت قبل لكان بـ 700 للشخصين تقريبا
انا الان دخلت الموقع واستفسرت الارخص 870 ريال للشخصين ذهاب وعودة
والاغلى 1300 ريال
2- انا استخدم فيزآ من بنك البلاد والمبلغ اللي فيها بالريال هل احتاج لتغيير العملة او بامكاني استعمل الفيزا بكوريآ ..!
اللي اعرفه انها تخصم بعملة نفس الدولة
3- انا حجزت في فريزر سويتس هل هو قريب من المطاعم الاسلامية ..؟
الان انا مستعجل
وغداً ان شاء الله افيدك
4- بالنسبة للملاهي اللي في كوريا هل يكون الدفع كاش او عن طريق الشبكة ..؟
عادي تقدر كاش
او عن طريق بطاقة تشتريها وتشحنها بمبلغ وتستخدمها بكل شيء
بالباصات والمترو والبقالات والمطاعم
انصحك بها
5- افضل مطار احجز منه لجيجو هو مطار انشون او قومبو ..؟
اكيد جيمبو لانه داخلي
6- هل 20 الف لشخصين تكون كافيه لمدة 9 ايام غير شاملة للتذاكر والفنادق ..؟
اذا قصدك سبق ودفعت تذاكر الطيران والفنادق
فهي كثيرة
انا جلست 14 يوم بميزانية 15000 الف
وكفتني مع الهدايا ومع تذاكر لجيجو وبوسان لان التذاكر كلفت 1600 ريال
وان شاء الله يجون الخبراء يفيدونك اكثر مني
بالتوفيق لك
رد: رحلتي إلى كوريآ الجنوبية
3- انا حجزت في فريزر سويتس هل هو قريب من المطاعم الاسلامية ..؟
المطاعم الاسلامية اغلبها او كلها بشارع itaewon المعروف بايتوان
والفندق اللي ذكرت في nakwon - dong
المسافة بعيدة نوعاً ما
اقرب فندق للمطاعم الاسلامية هو فندق هميلتون hamilton
وخذ مني نصيحة
لا تسافر إلا ومعك اغراض ومواد الطبخ
لان بكوريا المعيشة صعبة
اقصد الاكل الحلال ما تحصله إلا بشارع ايتوان
اتمنى اني افدتك رغم ان خبرتي قليلة
رد: رحلتي إلى كوريآ الجنوبية
الله يعطيك العافية اخوي بس عندي سؤالين اذا امكن
البطاقات اللي تكلمت عليها من وين احصلها ..؟ وبكم سعرهآ تقريبا
بالنسبة للموقع ممكن تعطيني الموقع حق الطيران مع طريقة الحجز ..
رد: رحلتي إلى كوريآ الجنوبية
البطاقات اللي تكلمت عليها من وين احصلها ..؟ وبكم سعرهآ تقريبا
تحصلها وانا اخوك بالسوبر ماركت GS25
او بمنافذ المترو تحت الارض ولونها رصاصي على اسود تحصلها بمكائن خاصة لها كمكائن البيبسي
واللي بالمترو هي الافضل تستخدمها بجميع المدن هناك
سعرها 2000ون يعني 1.7 دولار بالريال يعادل 6.5 حسب سعر الصرف اليوم بعد ما تطلع لك تشحنها بنفس المكينة بالمبلغ اللي تبيه
بالنسبة للموقع ممكن تعطيني الموقع حق الطيران مع طريقة الحجز ..
جيجو اير ادخل موقعهم اكتب بقوقل JEJU AIR
اول ما تدخل للموقع شف عندك فوق مكتوب intemational Flight اللي باللون البرتقالي بجانبها على اليمين Domestic Flight
اختر Domestic Flight
على طول تشوف مكتوب من Gimpo الى Jeju
ما عليك الا تحدد التاريخ وعدد الركاب ثم تضغط على Book NOW
بيطلع لك جدول الرحلات اختر الوقت اللي يناسبك بالذهاب والجدول الثاني الاياب وكمل الاجراءات
واي شيء تحتاجة احنا ان شاء الله موجودين
رد: رحلتي إلى كوريآ الجنوبية
عسى الله يسهل امورك
اما من ناحية البطاقات
من رأيي لما تنزل لمكان المترو اطلب من موظفي خدمات المترو المساعدة
اما طريقة شحنها سهلة جدا
اما استخدامها اسهل واسهل هناك اجهزة بالمترو او بالباصات او التكاسي تمرر البطاقة على الجهاز ثم يخصم المبلغ
اول مرة بيكون الشيء صعب لكن بعد التجربة بيكون كل شيء سهل
سهلها وتسهل عليك https://www.otlaat.com/arabtravelers...22150bc004.gif
رد: رحلتي إلى كوريآ الجنوبية
هلا فيك اخوي ،
بس عندي سؤال بالنسبة للاتصالات هل الشريحة السعودية تشتغل هناك او كيف الطريقه للاتصال من كوريا للسعودية
رد: رحلتي إلى كوريآ الجنوبية
من ناحية شريحة الاتصالات
نعم تشتغل اذا كنت فاتح التجوال الدولي وعليك اختيار شبكتهم اسمها sk telecom
وسعر استقبال المكالمات 1.6 ريال للدقيقة وبالسابق كان مجاني
اما الاتصال على السعودية سعر الدقيقة 6ريال
وكيفية الاتصال للسعودية ما عليك إلا تضيف مفتاح السعودية 00966 قبل اي رقم
رد: رحلتي إلى كوريآ الجنوبية
تحملني اخوي الزنون على كثرر الاسئلة بس عندي كمان سؤال
هل اقدر استئجر سائق في سيئول لتنقلاتي كلهآ وكم ياخذ باليوم لو اخذه 6 ساعات او 4 ساعات ..
رد: رحلتي إلى كوريآ الجنوبية
وش دعوة حبيب قلبي
انت امر وحنا لك نطامر
من ناحية سيول كلها مربوطة بخطوط المترو
فيها تقريباً 9 خطوط وكل خط له لون
فما انصحك تستاجر سائق لانه بياخذ عليك باليومية مو بالساعات واقل شيء بياخذ 500 ريال
كل ما عليك انك تاخذ من المطار خريطة للمترو
واذا حبيت تروح لمكان تسأل استقبال الفندق عن موقع المكان اللي تبيه ويحدده لك بالخريطة
لان الخريطة مذكور فيها اسم ورقم المحطات اللي يمر بها المترو
انا كنت اسوي كذا
صدقني وجدت المترو مريح واقتصادي
ولا تنس انك باليوم تروح لاكثر من 4 مشاوير
يعني مشوار طويل يكلف بالمترو 2000 ون كوري تقريبا 7 ريال
بالتكسي يكلف من 40 الى 50 ريال
اذكر اني اشحن البطاقة بـ 10000 ون يعادل 33 ريال تقريباً
وتجلس يومين وانا من مكان لمكان
يعني لو مهما كانت كثرة مشاويرك باليوم ما راح يكلف 50 ريال بالمترو
لكن بالتكاسي اقل شيء 200 ريال
وبعطيك معلومة عداد التكسي وهو واقف عند الاشارة يحسب عليك
رد: رحلتي إلى كوريآ الجنوبية
هلا فيك اخوي ،،
يعني اللي افهم من كلامك ان خريطة المترو توضح اي مترو بيوصل للمحطة اللي انا ابغى اروح لهآ مثل اللون الازرق بيروح للمنطقة اللي انا ابغاها صح كذا ؟
وبالنسبة للعودة استخدم نفس المترو او بيكون لون مختلف ..؟
واتمنى انك تفيدني افضل الاماكن السياحية في سيول
الله يوفقك على مسآعدتك واجابتك للاسئلة ..
رد: رحلتي إلى كوريآ الجنوبية
حياك ربي
خريطة المترو فيها جميع خطوط المترو بالالوان
وفيها جميع محطات الوقوف
هذي صورة خريطة المترو
فمثلا انت ساكن بفندق خط المترو اللي عنده لونه ازرق وبتروح لمكان بعيد شوي
والمكان اللي بتروح له المترو اللي عنده لونه اصفر
تطلع بالازرق ثم تنزل عند الاحمر ثم تركب الاصفر ثم تنزل عند المحطة اللي تبيها
وبالرجعة ترجع عكس اللي جيت معه من الاصفر للاحمر للازرق
هذا مثال
واحسن ما بخريطة المترو اللي تاخذها من المطار فيها اسم محطات التوقف وارقامها
اتمنى وضحت لك الصورة
اما من ناحية الاماكن السياحية بسيول
عندك برج سيول وحوله اسواق شعبية
عندك النهر الصناعي «تشونغ جي تشون» واظن انه قريب من البرج لاني ما رحت له
عندك نافورة نهر الهان بخط المترو البنفسجي اسم المحطة yeouinaru او اللي بعدها واسمها yeouido
عندك القصور القديمة اسمها gyeongbok palace وهي على خط المترو باللون البرتقالي واسم المحطة gyeong bokgung ولو تطالع بالخريطة بتشوف صورة قصر
عندك مدينة الملاهي ايفر لاند يوم كامل وبوسطها حديقة حيوانات اسمها سفاري
اذا بتروح لايفر لاند الخط الاخضر تنزل عند المحطة رقم 222 وتركب الباص اهم شيء قبل تطلع تطلب من الفندق يكتبون لك ايفرلاند بالكوري ورقم الباص اللي بيوديك
عندك عالم لوتي ملاهي ومحلات تسوق بس ما رحت لها
عندك شارع ايتوان فيه مطاعم حلال واذا حنيت للعرب تروح هناك https://www.otlaat.com/arabtravelers...7723f0b004.gif عموما انا الحين بالعمل وجاوبت عليك باختصار لاني مشغول مرة ولا حبيت اتجاهل اسئلتك اخاف اتأخر عليك
و عندي بالبيت خريطة المترو اللي فيها ارقام المحطات بحاول ارسل لك رقمي حتى تتواصل معي بالوتس واذا اشكل عليك اي شيء تسألني مباشرة
وحنا بخدمتك وبخدمة جميع اعضاء هالمنتدى اللي استفدنا منه معلومات قيمة
رد: رحلتي إلى كوريآ الجنوبية
والله ماقصر الزنزن ماشاء الله عليه