مقابلتي من طق طق إلى سلام عليكم

هلا بالحبايب كلهم
مبروووووووووووووووووووووووووووووووووووووووووووووك

لكل المرشحين مقدماً قرار الابتعاث !!!! وراح أقولكم في سياق الكلام ليش ؟؟
أولاً لا تشيلوا هم مررررررة .. ترى الأمور أسهل مما تتوقعون شي رووووووعة ..
وأقولكم القصة من طق طق إلى سلام عليكم ..

توجهت بسيارتي المصون قاصداً الفندق الساعة 8:30 ووصلت عندهم 8:45 .. علماً أن مقابلتي
الساعة (9) .. يعني إحتياطاً لأي عارض قد يطرأ بكرت شوي ، المهم دخلت من بوابة الفندق اللي
بالزاوية ما فيه غيرها .. ولا هذا د/ المعجل وكيل الوزارة في وجهي واقف مع مسؤولين الوزارة
وكبار موظفي الفندق يشرف ويتابع .. مباشرة التفت يمين يسار أدور المكان اللي يُـستقبل فيه الطلاب ويوجهون للخطوة التالية .. لقيت كاونتر إستقبال على يسار الداخل من بوابة الفندق .. وفيه مجموعة موظفين سعوديين تابعين للوزارة .. جيت لواحد منهم بشوش مرررة ويرحب ويهلي قلت له وين أروح ؟ قال لي تعرف رقم ترشيحك ؟ المهم أعطيته رقمي .. ودور عليه في بيان معه مقيد فيه أسماء الطلبة ، وحصله وقال أنت فلان الفلاني ؟ نعم وصلت خير ..
قال ممكن الهوية ؟ سم تفضل .. وطلع ملف علاقي مش الأخضر البايخ ذاك
وإنما واحد ملون ومرتب وعليه شعار البعثة وحركات فلللة .. سجّـل حبيبنا رقم ترشيحي
في المكان المخصص على غلاف الملف .. وقال لي خلاص روح للشباب هناك الموجودين على اليسار ، يتأكدون من وجود كافة المستندات .. سألته هاه بشر ما عندك خبر عن مضمون المقابلة ؟
قال لي: "تطمن أنت من تتعدى الخط هذا وأشر عليه ..
((يقصد منطقة بين عامودين بعدها فيه الجلسات المخصصة للإنتظار ومكان تواجد لجان المقابلة))
من تتعداه خلاص رح للديرة اللي أنت مختارها .. تراكم مقبولين بشكل نهائي ، ولا فيه قوائم جديدة للأسماء .. يعني يبون يرسلونكم أنتم .. وكلها أسئلة تربوية الهدف منها التأكد من الطلبة ومدى جديتهم وإستعدادهم للدراسة خارج السعودية والعيش في بيئة مختلفة ؟ " أ.هــ

شكرته وتوجهت لأحد الموظفين اللي جالسين على المكاتب على اليسار .. وصراحة الموظفين
الموجودين تبع الوزارة رايقييييييييين .. وزي العسلللللل .. شباب متفهمين وروحهم عال العال
والدليل .. الموظف اللي أخذ يدقق في إكتمال الوثائق .. راجل حبيب ومبتسم ، وقعد يطمني ويقول:
" لا تشيل هم والله راح تستانس إذا طلعت من المقابلة .. لأن الدكاترة الموجودين في عضوية اللجان محترمين جداً .. وفيهم حبابة ما تتصور وبتشوف الحين بنفسك " وأكد كلام زميله السابق بأن الأغلبية سيبتعثون والهدف من المقابلة تربوي لا أكثر ..
وقال: "ما شاء الله أوراقك كاملة وتمام عليك" وأردف يقول: "والله لو تشوف بعض الطلبة
ما يدرون وش السالفة ؟!! أوراق ناقصة .. ومستندات أصلية ما فيه"
ثم كتب على الملف مُجاز ، ودعا لي بالتوفيق .. وكم كلمة مشجعة وحلوة .. بعدها شكرت الأخ الفاضل وتوجهت بناءً على كلامه إلى موظف عند الجهاز الخاص بإصدار أرقام الإنتظار ..

استقبلني بابتسامة حلوة وتأكد إن الكلمة السحرية ((مُجاز)) موجودة على ملفي وأعطاني رقم ..
وقال لي: "انتظر في الجلسات هذي حتى يجي دورك .. وشف اللوحة الإلكترونية ، إذا طلع
رقمك عليها .. تلقى موضح بجانبه رقم اللجنة اللي أنت عندها .. إذا كانت من (1-15)
تروح للجهة الثانية وإذا (16-24) من هنا "
يقصد جهة معينة وأشر عليها .. المهم كررت السؤال اللي طرحته قبل على زملائه الموظفين
هاه وشلون المقابلة ؟؟ قال: " شف اللجنة الواحدة مكونة من دكتورين ، و د/ المعجل و
د/ الحميضي .. مدير عام الإبتعاث ، اجتمعوا بأعضاء هيئة التدريس يوم الخميس وأكدوا عليهم
الرفق بالطلبة ومحاولة تمشية الغالبية .. إلا من كانت لديه مشكلة كبيرة " أ.هــ
وأنا واقف معاه ندردش حول المقابلة والسوالف هذي .. إلا هذا مصور ما أدري يتبع أي جريدة ..
يطلب صورة لنا ، شخصت وابتسمت ابتسامة الموناليزا اللي في اللوحة الشهيرة .. بس ما طـلّعت
سنوني (أسناني) ، لقط الصورة خوينا .. وحتى من سرحاني وتفكيري بالمقابلة .. نسيت أسأله تبع
أي جريدة .. ومتى بينزل هذا الخبر والصور اللي معاه .. عشان أشوف نفسي بالصورة ..
لأني مسكيييييييين ما عمري شفت نفسي إلا بالمراية !! بس لا تنسون تدوروا الخبر ..
وإذا لقيتوه جيبوا لي نسخة معاكم بس وشلون بتعرفوني ؟؟ يالله بقرب لكم وأعطيكم علامة ..
واحد لابس شماغ وعليه نظارة .. بس كفاية أحسن ما تعرفونيش
المهم دعا لي الموظف .. مش المصور بالتوفيق .. تشكرته حيييل .. وكنت مستانس على الآخر
من حسن الإستقبال والأخوية اللي عاملوني بها جميع الموظفين الذين قابلتهم ..
جلست على الكنب أنتظر دوري .. تأملت الوجوه الجالسة وما أدري ليش سرح بالي بعيييييد
وتخيلت نفسي في أمريكا وأبحرت طويلاً في التفكير .. لكن لفت انتباهي ملاحظة غير مُـنتظرة
كنت متوقع إني ألاقي بهو الفندق مليان طلاب وزحمة وطول إنتظار .. لكن على العكس تماماً
تخيلوا إن اللي جالسين في الإنتظار ما يتجاوز عددهم (15) واحد !!!
والله استغربت مرررة .. بس قلت يمكن طريقة الوزارة ساعدت على إزالة الفوضى والعشوائية ..
من خلال تحديد وقت معين لكل طالب .. وأنا جالس حصلت اثنين شباب من جدة واضح إنهم يعرفوا بعض .. وكل واحد يسأل الثاني: فين ساكن ؟؟ واحد قال في الشيراتون والثاني في صحارى المطار ..
وإنه حاول يحجز في الفهد كراون بس كله مليان طلبة .. وبينما نحن كذلك إذ أقبل واحد
مهندم (أي متشيك.. والحقيقة إن جميع الموجودين في أبهى حلة وآخر شياكة ) لكنه يجرجر رجليه
كأنما حلت به مصيبة .. وأقبل إليهم يبتسم إبتسامة صفراء
وعرفت لاحقاً من سواليفهم أنه خرج لتوه من المقابلة .. مباشرة طبيت عليه أسأل:
وش سألوك ؟؟ ولا الرجال مضيييييييييع ما يذكر إلا .. ليش تبغى أمريكا ؟ وعلى أي جامعة قدمت
داخل السعودية ؟؟
ناظرت ساعتي ولا كل الوقت اللي انتظرته من أخذت الرقم ما يتجاوز ربع ساعة .. يعني حاجة
كويسة جداً يشكرون عليها
وحانت ساعة الصفر .. طن طن صوت اللوحة الإلكترونية يعلن رقمي ولجنة (22)
قمت من مكاني وقابلت موظف الجهاز .. قال لي: الغرفة ما قبل الأخيرة وعلى يدك اليسار
مقر لجنتك .. مشيت في الممر ذو الإضاءة الصفراء الخافتة .. وأنا أتخيل نفسي رايح لغرفة
تحقيق رغم كل التطمينات التي سمعتها من قبل .. إلا أن حداثة الحالة بالنسبة لي .. وكوني لأول مرة أتعرض لمثل هذا الموقف .. جعلني أشعر بهذا الشعور .. رغم محاولتي التظاهر بالتماسك ورباطة الجأش .. المهم قبل ما أوصل لمقر اللجنة .. ولا هذي مراية على يميني .. قلت زييييين .. وأنا أتشخص وأتضبط .. وأطق الباب وأُذن لصاحبكم بالدخول .. وكنت مبتسماً دون مبالغة .. سلمت مصافحةً ..
واحد منهم قام لي والثاني جالس .. أنا كنت متوقع إنهم راح يجلسون ورى طاولة وأنا قدامهم ..
زي شغل المحققين في الأفلام .. لكن كانت جلسة أشبه ما تكون ودية حبية كأنك مع ربعك في (كافي شوب) وهيئتها على شكل حرف (u).. وبدأ الشغل .. أخذ واحد منهم الملف وقعد يقلب في الأوراق والثاني بدأ يسأل .. وراح أسردها لكم بدون ذكر إجاباتي .. بلاش فضايح !!!
قال لي: أوووه أنت متخرج من سنتين يا أخ ...... وين رحت فيها ؟؟
وجاوبته عن وضعي
ثم قال: ليش اخترت البعثة ؟؟ تكلمت بما فتح الله علي .. وبما قد أعددته مسبقاً
حيث كنت متوقع هذا السؤال بالذات ..
وأردف يقول : لكن تعرف وضع البلد هناك والأزمة اللي صايرة والتمييز والعنصرية ..
يعني عندك مقدرة تعيش في هالبيئة ؟؟
وسألني مباشرة وبدون تلميح بل بصراحة: يا أخ ...... هل سبق وصارت لك مشكلة في حياتك؟
أو تحولات فكرية تعرضت لها وأوصلتك للوضع اللي أنت عليه الآن ؟؟!!!
يا لهوي !! يا ستييييير !!! وأنا عملت حاقة يا أخوانا ؟؟!؟!؟
ثم بدأ الثاني يسأل: يعني أنت متضايق من المجتمع والكبت والإنغلاق وودك تروح لأمريكا
تعيش حياتك وتدور الحرية ؟؟!!!
وأنا قلت إني متضايق .. أبداً والله
طيب أبوك يشتغل وين ؟
هو راضي عن ذهابك إلى هناك ؟
وكيف تعامله معك ؟
يفرض رأيه ؟
وسأل الآخر: وش رأيك في الأزمة الحاصلة هذي اليومين في لبنان ؟
وجاء من ضمن إجابتي أن بداية المشكلة كانت حماقة .. والأمة في غنى عن مثل هذا .. ويكفينا
حماقة (11) سبتمبر .. قال وهو يناظر بخبث: من تعتقد وراء تنفيذها ؟
قلت: ما فيه شك زعيم القاعدة طلع في قناة الجزيرة وأعلن مسؤوليته .. قطع علي الحديث
وأنا ودي أكمّـل .. وسأل سؤال غبي وما أدري وش يبي !!
قال: يعني كل من طلع وأعلن نؤيده على أعماله ؟؟!!!
الله من زين السؤال .. يقال له يبغى يحجرني ويقّـولني ما لم أقل ..
قلت: كيف نؤيده وأنا أقول عنها تو إنها حماقة !!!
وأكملت إجابتي .. ثم سأل استكمالاً لتحقيقه: وش رأيك في حزب الله ؟؟!!!
وجاوبت .. وشكيت إني قاعد أمام محقق أمريكي في السجن الشهير (أبو غريب) !!!
وإحقاقاً للحق: ما أدري وين الأسئلة التربوية اللي يقولون عنها ؟؟
اللهم عند سؤالهم عن تعامل والدي .. يبغون يتحققون من مدى إعتمادي على نفسي

وأشياء أخرى .. أتمنى إني أتذكرها في أقرب فرصة .. لكن إجمالاً ما قلته هو الأبرز
وأخيراً: ودّعاني وقال لي أحدهم: يا أخ....... بالتوفيق وإن شاء الله تتحقق أمانيك
شكرتهم وأنا مبتسم .. وكان ودي لو حصل .. أخلي خويه الثاني شاورما ..
وكانت مدة المقابلة تتراوح تقريباً بين (8-10) دقائق

والله يعينكم
ما أطلب منكم سوى الدعاء لي بالتوفيق دنيا وآخرة ،،،،،

مقابلة يغلب عليها الطابع السياسي :109:

وأنت الصادق الطابع الهتلري
يعني بنطلع ريحك ونخلي نخلة تنبت في راسك

شكرا اخوى على موضوعك وسوالفيك الحلوه والله يوافقك

العزيز "t o t o "
اللهم آميييييييييين
لا شكر على واجب يا صاحبي
.................................................. ...................
العزيز " مسافر الروح "
اللهم آميـــــــــــــــــــــــــــــــــن
وكلامك صحيح .. لكن قابلت ذلك بابتسامة هادئة وواثقة .. رغم الغيض الذي ملأني حينها

لكن قابلت ذلك بابتسامة هادئة



ماشاء الله عليك وترى هذا هو المطلوب

مبروك تعديك مرحلة المقابله.. عقبال قرار الابتعاث


ياارب استر

ما قالوا لك متى موعد اعلان النتائج النهائية وصدور الضمان المالي ؟

الله يوفقكم جميعا إخواني و لا تنسونا من دعائكم...

الله يوفقنا اجمعين

.. ما شاء الله عليك أخوي طموح .. أغلقت المنافذ عليهم شكلهم يرفعون خطاب توصية للملحقية السعودية بواشنطن يطلبون فيها توظيفك عندهم .. هههههه
.. الحمد لله عدت المقابلة على خير و عقبال قرار الابتعاث ..

" مسافر الروح "
شكـــــــــــــــــــراً جزيلاً
.................................................. .............................................
" MSH3AL "
الله يبارك فيك .. وصدقني هونها وتهون
.................................................. ............................................
" أبو أنس النهدي "
جاء في بالي سؤالك بعد ما طلعت من المقابلة .. ومباشرة سألت موظفي الوزارة اللي قابلتهم قبل
قالوا: إحنا ما عندنا خبر .. لكن ممكن تروح لمكتب د/ المعجل أو د/ الحميضي في ذيك الجهة
يقصدون المنطقة اللي عند بوابة الفندق .. ورحت فعلاً وجلست أنتظر عند المكتب .. بس ما فيش حد
توكلت على الله ومشيت .. وقلت بالطقاق متى ما طلعت
.................................................. .........................................
الأخوين " Aloosh " و " smilewolf "
اللهم آميــــــــــــــــــــــــــن يا رب العالمين
.................................................. ........................................
" جوليــانــو "
بداية: كدرت خاطري بالأخبار اللي قريتها عنك .. والله واحد مثلك ما يستاهل اللي جاه
لكن هو القدر .. آمنا ولا اعتراض .. حاول بكل طريقة تقدر عليها .. وإن شاء الله تبشرنا بقرار إبتعاثك

وشكراً لإشادتك .. وهيدا من لطفك حبيب ألبي
وخله يصدر قرار الابتعاث .. وإن بغوا وقتها يحطوني الرئيس الأمريكي .. ما عندي مشكلة

انا جامعي حاليا اقولهم اني جامعي ولا لا؟؟؟؟؟؟؟؟؟؟؟؟؟؟؟؟

شف أخوي
اللي فهمته من كلامك .. إنك ما زلت تدرس في أحد الجامعات ، وإذا كان كذا ..
راح أقولك اللي صار معي في المقابلة .. أنا كنت مثلك محتار ..
أقولهم إني أدرس في الجامعة حالياً أو لا ؟؟
لو كذبت وقلت مثلاً أنا موظف .. راح أطيح في مصيبة !! وهي مخالفة أحد شروطهم
((بألا يكون المتقدم موظفاً في القطاع العام أوالأهلي))
ولو قلت إني عاطل طول المدة .. أكيد يقولون: هذا مو وجه ابتعاث
وعليه: قررت أقول الحقيقة .. وهذا اللي صار بالفعل
لما شاف سنة تخرجي قبل سنتين .. سأل: وش جالس تسوي من يوم تخرجت ؟
قلت: التحقت بالجامعة الفلانية .. وجت الفرصة وحبيت إستغلالها لو راح سنتين
عموماً خلاصة البربرة .. قل لهم الحقيقة وارتاح
ما أظن فيه حل ثاني .. وبالتوفيق للجميع

الف شكر لك اخ طموح
افدتنا بمعلوماتك

" كاش ويتابع طاش "
الله يخليك يا رب
.................................................. ...................
راح أقول للشباب نكتة .. إنما أيه .. ولها علاقة بالموضوع
الوزارة اليوم أرسلوا لي مسج على الجوال .. وتحديداً بعد صلاة العصر الساعة 3:58
يقولون فيه: ((فلان الفلاني ..... المقابلة 11/7/1427 (9:00) صباحاً .. فندق الفهد كراون))
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!
صراحة قعدت أضــــــــــــحك عليهم .. وقلت في نفسي
بدري .. صباح الخير .. صار لي منتهي من التحقيق في عنبر (22) أكثر من (24) ساعة
وتوكم ترسلون .. مش معقول مرسلين من أمس .. وتوها توصل رسالتكم !!!!!

يُـرفع للفائدة
ومعذرة على تكرار الموضوع مرتين .. في هذا المنتدى
كان هذا عن طريق الخطأ

بالتوفيق والله يعينك وجميع المسلمين على الوفاء لدينهم ووطنهم

https://www.otlaat.com/arabtravelers...quote_icon.png المشاركة الأصلية كتبت بواسطة alhamoor555


بالتوفيق والله يعينك وجميع المسلمين على الوفاء لدينهم ووطنهم



آميـــــــــــــــــــــــــــــــــن يا رب العالمين
وأتمنى وأرجوا من الله .. أن يعينني على نفسي والهوى والشيطان
وأن يوفقني لأكون خير سفير لديني أولاً .. وبلادي ومجتمعي ثانياً

وأعتذر منك عزيزي .. على تأخري في التعقيب على ما قلت .. لإنشغالي مع أهلي
لك تحياتي وتقديري