تجربتي اليوم للتقديم على شنغن عن طريق سفارة سويسرا
بسم الله الرحمن الرحمن
السلام عليكم ورحمة الله وبركاته
أولاً اشكر جميع القائمين على هذا المنتدى اللي بصراحة انا اعتبره موسوعة شاملة عن السفر وقضاء الاجازات وخلافه خارج المملكة العربية السعودية
ثانيا بما ان استفدت كثير من هذا المنتدى فقلت افيد كل شخص يبحث عن معلومة خاصة بالتقديم على سفارة سويسرا
موعدي كان اليوم وسبب اختيار هذا التاريخ انه وقت اختبارات وتوقعت انه ماراح يكون زحمة والحمدلله كان مثل ماتوقعت الساعة 7 صباحا تم التوجه إلى المكتب الموحد للتأشيرات بأم الحمام والوصول في تمام الساعة 8:15 ص
بداية رفضو يدخلوني بسبب ان فترة عمل المكتب يبدأ 8:30ص ولكن ابتسامة مع مزحة بسيطة كسرت حاجز بين الأمن وبيني وقلت ياليت تسمح ادخل لان معي زوجتي وصعبة ننتظر قال ولا يهمك تفضل
فدخلت وكان المكان فااااضي مافي الا كم شخص فرحت اخذ رقم شاف موعدي قال انتظر لين 8 ونص فجلست شوي انا والمدام إلى الساعة 9 الا ربع صفيت طابور كان قدامي نقريبا 10 اشخاص وكم مندوب
مع حسن الحظ كل الللي قدامي تأشيرات فرنسا او المانيا النمسا فاخذت الرقم وانطلقت داخل وخليت المدام تنتظر الين يجي وقت التبصيم
دخلت لقيت السفارات اشخاص ينعدون على الاصابع بحثت عن السفارة السويسرية فلقيت موظف وعنده شخصين واحد ينتظر وواحد عنده وريته الايصال قال انت عوائل رح داخل فدخلت مافيه الا عائلة عند السفارة الالمانية والفرنسية
والسويسرية مافيه احد عطيت الموظفة الرقم فجلست وطلبت الرقم والموعد تحتاج تدخل رقم الموعد في النظام
عطيتها كل الاوراق الخاصة بي وبعد ماخلصت منها عطيتها اوراق زوجتي
للامانه الموظفة جداً جداً متعاونة
جلستي عندها تقريبا 15 دقيقة بالكثير المفروض اقل بس كان في مشكلة بالنظام بعد ماخلصت رحت ناديت زوجتي ورحنا للبصمة
بعد التصوير والبصمة قالت الموظفة تخلص التأشيرة من 5 ايام إلى 7 أيام بالكثير التأشيرة تكون جاهزة فطلبتها تكون بالارامكس افضل لان ماعندي وقت اروح للسفارة استلم الجواز فقالت يمكن تطول 3 ايام قلت مو مشكلة
باختصار اخذت رقم الساعة الساعة 9 الا 5 تقريبا وطلعت من المكتب الموحد الساعة 9:25 ص
يعني كلها على بعضها ماكملت نص ساعة
بعد ماطلعت من التبصيم وشفنا الصالة اللي برى عند الارقام امتلت فللللل والمواقف كلها فلللل مع انه لما جيت كانت فاضية
عشان كذا انصح اللي بيحجز موعد ياخذ الصباح او يجي بدري الصباح يعني 8 تكون هناك كوييس على الاقل تلقى موقف
للمعلومية والله ان اللي قدم بنفسه اهون بكثير يروح لمكتب لان مندوب المكتب معه مجموعة جوازات فيلطعونه
فتعبئة النموذج بنفسك اسهل وافضل واختصار للوقت وأوفر لك
التقديم جداً سهل انا كنت متخوف من كثرة الطلبات وفيه ناس بصراحة يبالغون
ولكن اختصار للوقت كل واحد بيروح لموعده عشان ما يضيع وقته هناك يجهز اوراقه واذا كان معه مرافق لازم يرفق اوراق المرافق مع نموذج الطلب للمرافق
الأوراق المطلوبة
-تعبئة نموذج الشنغن لكل شخص
-تأمين طبي (يغطي فترة السفر واسمه تأمين سفر) لكل شخص يرفق مع النموذج
-صورة شمسية
-نسخة من حجوزات كل الفنادق لكل شخص نسخة يرفق مع نموذج الطلب لكل شخص
-تذكرة الطيران الالكترونية لكل شخص مرفق معه نموذج طلبه
-صورة من الجواز (في ناس يبالغون يقولون لازم اول اربع صفحات مع صفحة التوقيع) وهي ما اخذت الا صورة الجواز واول صفحة بس
-تعريف بالراتب مهم جداً جداً ويكون باللغة الانجليزية واذا كان معه مرافق يرفق مع نموذج طلب المرافق نسخة من التعريف تبعه
بالنسبة للتأمين ياجماعة الخير ترى مهم تصويره في حال كان لأكثر من شخص فيه وحده أخروها عشان مسوية تأمين ومعه مرافقين بالتأمين ولكن ماكان عندها نسخ فقالو لازم تصورينها فتأخرت وأخرت اللي وراها
