رجاء المساعدة من المصريين خصوصا ومن خبراء السفر لتايلاند عموماً
بسم الله
بداية شكراً جزيلاً لكل اللي هيدخل الموضوع وفي نيته المساعدة
أنا مصري ، 24 سنة ، في سنة الامتياز في كلية الطب
طبعا كغالبية الشباب المصري مكنش عندي القدرة المادية اني أسافر برا مصر أثناء الدراسة ( ولا حتى جوا مصر )
فكانت النتيجة اني وصلت لسن 24 سنة وانا ما اعرفش ازاي أروح مطار القاهرة اصلا ( مابالك بالاجراءات اللي جواه ) ، ومصطلحات زي جواز السفر والتأشيرة وتصريح السفر و البوردنج والتشك إن ....... كانت لفترة قريبة جدا جدا طلاسم بالنسبة ليا
دلوقتي انا قررت أسافر ولأول مرة في حياتي برا مصر ، واخترت ان السفرية تكون لتايلاند نظرا لطبيعتها الساحرة ولأن فيه ناس تايلانديين كتير أعرفهم على الانترنت .
فأنا ماكانتش مشكلتي أبدا إني اعمل برنامج للرحلة او اعيش هناك ازاي ، انا محتاج بس اوصل تايلاند ومعايا حجز لأول ليلة في الفندق وبعد كدا كله هيبقا تمــــــــــــــــــــام .
وانا الانجليزي بتاعي كويس ، وكمان بعرف كلمات وجمل كتير بالتايلاندي ^_^
مشكلتي تتلخص فيما قبل الوصول لتايلاند .
وانا بقالي حوالي اسبوعين ليل نهار قاعد اقرا في المنتدي هنا والمنتديات التانية عربية واجنبية عن ( السفر عموما ومصطلحاته ) وعن تجارب الناس وانطباعاتها عن تايلاند تحديدا ( شكرا لكل عضو كتب كلمة او نصيحة لاني بجد استفدت جدا )
لكن رغم كدا انا لسه عندي مجموعة من الاستفسارات المهمة ( والقابلة للزيادة مع اقتراب معاد الرحلة )
هبدأ بشرح وضعي في اللحظة دي وبعدين هسرد استفساراتي في انتظار مشاركات حضراتكم
أنا خلصت مرحلة استخراج جواز السفر الحمد لله ، واللي كانت مرحلة ضبابية بالنسبة ليا وخصوصا كوني طبيب امتياز Intern لان المرحلة دي بالنسبة للتجنيد ( انتقالية ) ، لاني كأي طالب جامعي بيتأجل تجنيدي 6 سنوات ( مدة دراستي ) وأول ما اخلص بيرجعوا في إدارة الكلية ياجلوا ليا مرة تانية مدة سنة الامتياز ، فأنا بالنسبة للجوازات ( في سن التجنيد ) زي الطالب ، وفي نفس الوقت المفروض إني دكتور !
المهم ( عشان لو حد مر بموقفي تاني يستفيد ) انا احتجت ورقتين مهمين مش شئون الاطباء في المستشفى الجامعي اللي واخد فيها امتيازي :
1. خطاب موجه لمدير الجوازات يفيد بإني بقضي فترة امتيازي في المستشفي الجامعي دا ، ومختوم بختم النسر وممضي من مدير شئون الاطباء
2. صورة طبق الاصل ( مختومة بختم النسر ) من الموقف من التجنيد اللي موجود في شئون الأطباء ، واللي بيقول في حالتي ( مؤجل تجنيده حتى 31 أغسطس 2013 )
وتاخدهم مع 3 صور بخلفية بيضا مع بطاقة رقم قومي ( ساري ) وتروح مكتب الجوازات اللي انتا تابع ليه
والحمد لله جبت الجواز ومكتوبلي فيه الموقف التجنيدي ( في سن التجنيد ) ومكتوبلي الوظيفة Physician
ودلوقتي انا لسه داخل في خطوة استخراج التأشيرة و تصريح السفر من التنظيم والإدارة في العباسية
______________________________________
استفساراتي :
1. انا ماعنديش حساب في البنك ، لكن أنا معايا حوالي 15000 جنيه حوشتهم عشان السفرية دي ، ومطلوب في ورق التأشيرة في صفحة سفارة تايلاند على الفيس بوك :
Required Documents:
1. A Passport with validity not less than 6 months
2. Two ID photographs (not less than 6 months
3. Return ticket reservations
4. Bank statement to show sufficient funds of at least LE 10,000.-
5. Administration fee for one entry LE 220.-
يعني هما مااشترطوش كشف حساب جديد ولا قديم ، المهم يكون معاك مايثبت انك تملك 10.000 جنيه
ولما بحثت لقيت في شروط استخراج كشف الحساب من البنك ان يعدي 3 شهور على فتح الحساب ، وانا اصلا عايز أسافر يوم 20 مايو مثلا ! فهعمل ايه في الموضوع دا ؟
انا اعرف حد في فرع البنك الاهلي اللي عندنا وقلتله ممكن تطلعي كشف حساب بعد اسبوع من فتح الحساب قال اه اطلعلك !
بس انا مش عايز افتح حساب في البنك الأهلى ، انا عايز افتح في بنك CIB ولما اتصلت عليهم قالوا لازم 3 شهور ومفيش أقل من كدا
فيه حل للموضوع دا ؟
انا قريت على النت عن كشف حساب وهمي ( مااعرفش بيتعمل ازاي ) ، وكمان اعرف واحد زميلي سافر تايلاند وما قدمش كشف حساب أصلا O.O !
انا خايف اقدم من غير كشف حساب واترفض ( كل الناس بتقول تايلاند ما بترفضش حد ، انا مش رايح أمريكا ههههه ) ، بس انا بردو قلقان من الموضوع دا وعايز حل ( كشف حساب ، وتكون الفلوس في بنك CIB ! )
2. ليه انا عايز في بنك CIB ? عشان النقطة الجاية دي :
انا عمري ما اتعاملت مع بنك ، اولا لان عمري ماكان معايا فلوس تستاهل انها تتحط في بنك ، وثانيا لان اسرتي شايفة ان التعامل مع البنوك حرام وربا .
فدا وصلني لاني دلوقتي قاعد بلف المواقع اتعلم الفرق بين Credit و Debit وفيزا الانترنت !
المهم اتصلت بالبنوك ، وقولتلهم انا فلوسي كذا ، وعايز انسب Option لحالتي بحيث يبقا معايا كارت اقدر احجز بيه فندق وطيران على النت ، واقدر اسحب بيه من تايلاند من أي ATM .
ولقيت في بنك CIB انهم هيعملولي كارت ديبيت وكارت جميل تاني اسمه Thomas Cook
ومن الكلام ومن بحثي على النت انا عجبني موضوع التوماس كوك دا ، ولقيت آراء ايجابية كتير عليه
فسؤالي هنا ، انا ماشي صح كدا ؟ ولا الاحسن اني يدوب احط 4500 في التوماس كوك دا ( مش محتاج حساب في البنك ) واسيب بقيت الفلوس كاش في جيبي وانا مسافر ؟
كمان موضوع تحويل العملة دا انا ما اعرفش عنه حاجة ( بقولك أبيض مارحتش حتى شرم الشيخ قبل كدا ههههه ) ، يعني المفروض انا دلوقتي اغير الفلوس لدولارات هنا وابقا اغيرها تاني لبات في تايلاند ؟ ولا ينفع احولها لبات هنا في مصر ؟ ولا ينفع احول الجنيه لبات في تايلاند ؟
3. في متطلبات التأشيرة مكتوب تذكرة طيران ذهاب وعودة ، طب الافضل اني احجز قبل التأشيرة فعلا ؟ ولا اخد التأشيرة ( بحجز طيران وهمي ) من أي مكتب طيران ؟
انا خايف اترفض في التأشيرة ( عارف والله انها اسهل تأشيرة في الدنيا https://www.otlaat.com/arabtravelers...85c726c004.gif ) او تحصل اي مشكلة في تصريح السفر وبعد كدا ألبس انا في تمن التذكرة !
فإيه رأيكم في الموضوع دا ؟
4. اهم سؤال واكتر حاجة قلقاني ويارب ألاقي جواب حاسم بناء عن تجربة ، موضوع تصريح السفر !
انا دلوقتي متأجل ليا لغاية 31 أغسطس ، ولو ليا جيش هقدم في يناير 2014 لأني مواليد شهر يوليو
فانا عرفت ان ماينفعش يطلعلك تصريح سفر لو لسه ليك اقل من 6 شهور على معاد جيشك !
فأنا بالمعلومات اللي كتبتها فوق دي هينفع اسافر في آخر مايو وأرجع بعد اسبوعين ولا لا ؟
انا اعرف بردو ناس زمايلي سافرت في آخر امتيازها بس كانوا راحين على مؤتمرات مش سياحة !
فالموضوع دا مخليني قلقان ، ومش عارف لو حجزت تذاكر الطيران وماعرفتش اخد تصريح السفر هعمل ايه ؟!
5. انا شفت اسعار التذاكر لقيت تفاوت غريب ومريب !
مصر للطيران فوق الـ 4000 مباشر لبانجكوك
والباقي كله ترانزيت بس بردو في حدود 3800 ، 3600 ، 4000
إلا الخطوط القطرية واللي تذكرة الذهاب والعودة من القاهرة بـحوالي 3100 !!!!!
فرق شاسع في السعر ، والغريب ان معظم الناس بتقول القطرية أحسن خطوط طيران !
يمكن بيتكلموا على الدرجة الاولي ورجال الاعمال فيها ؟!
انا مش عارف وعايز حد يقوللي رأيه في التفاوت الكبير اوي في السعر دا وايه سببه ؟
....
دي كانت أهم الاستفسارات اللي بفكر فيها حاليا ، ولو فيه المزيد هكتبه هنا ان شاء الله
وانا حاليا بشوف موضوع كشف الحساب البنكي دا ، وغالبا هشوف مكتب شركة طيران يطلعلي حجز طيران وهمي واروح على السفارة ( فيه ناس قالتلي خد حجز فندق وحاجات كدا ! )
شكرا جزيلا مقدماً لحضراتكم https://www.otlaat.com/arabtravelers...85c726c012.gif
رد: رجاء المساعدة من المصريين خصوصا ومن خبراء السفر لتايلاند عموماً
اقتباس:
المشاركة الأصلية كتبت بواسطة Robot
السلام عليكم ورحمة الله وبركاته
عدى حوالي شهرين على آخر رد في الموضوع
بس وانا بدور في اللاب ، لقيت الموضوع دا في المفضلة
وانا كنت نسيته خالص في وسط اليأس اللي كنت حسيت بيه في آخر يومين تلاتة قبل سفري
انا الحمد لله يا جماعة سافرت
وانا كنت مقرر اقعد 18 يوم ، زودتهم وانا في في تايلاند لشهر وغيرت ميعاد رحلة العودة
اول مرة في حياتي اسافر برا مصر ، وكان اجمل شهر في حياتي
وبإذن الله لازم اروح تايلاند تاني وتالت ورابع
انا خلال الشهر دا كنت مقيم مع أسرة تايلاندية بالكامل ، وعايش الحياة كتايلاندي مش كسائح
حتى لم كنا بنروح السوق ، كانوا بيفاصلوا معايا هههههههه
عشان كدا خبرتي ممكن ماتكونش مفيدة 100 % لحد هيسافر لأول مرة ، لاني زي ماقلت كنت عايش كتايلاندي
وهما كانوا بيضبطولي التنقلات الداخلية وماكنتش بعرف اي تفاصيل
كنت بروح المحلات الشعبية والاسواق الشعبية اللي الناس فيها مابيعرفوش يتكلموا الا تايلاندي
حتى الفنادق كنت بروح لفنادق الطلبة اللي هيا بـ 60 جنيه في الليلة لشخصين
وكنت مستمتع بحياتي جدا
ماكنتش بروح لاماكن تجمع السياح ، وحتى لما رحتها حسيت بالفرق الشاسع في الاسعار " واللي هيا بردو لسه أرخص من دولة فقيرة زي مصر !! "
بس رغم كدا اكيد هيكون في تجربتي حاجات جديدة حتى للناس اللي بتسافر تايلاند كتير كسياح ، لاني شفت تايلاند الشعبية
نفسي اعمل تقرير وصور يوم بيوم لرحلتي ، بس مش عارف ازاي
محتاج اقرا شوية تقارير للاعضاء عشان اقلدها ^^
لو هتكلم على الايام العصيبة الاخيرة ، فانا اكتشفت ان حظي هوا اللي كان سيء لاني اليوم اللي رحت فيه اخد تصريح السفر من التنظيم والادارة كان نازل قرار جديد بان طلبة الامتياز يتطلب منهم " موافقة الوزير المختص "
ودي حاجة كانت استثنائية استمرت لاسابيع وتقريبا فيه ناس سافرت بعدي وماطلبوش منهم دا
و تقريبا دا كان بسبب خطف الجنود المصريين في سيناء - تخمين مني ومن زمايلي في امتياز في الجامعات التانية والي اتعذبوا معايا في الفترة دي - فكان الجيش مشدد جدا في الفترة دي على السفر
ولاني مش تبع اي وزير ، فوافقوا على " قرار موافقة " من رئيس الجامعة اللي بدرجة وزير !!
وبعد ما جبت " جواب موافقة " ورفضوه رحت عملت خناقة في مكتب رئيس الجامعة وعملولي بشكل استثنائي قرار موافقة قبل السفر بيومين
واخدت ورقة تصريح السفر " واللي هيا ورقة حقيرة شكلاً " وكنت هطير من الفرح
ورحت لاول مرة في حياتي المطار ، وسافرت ولما وصلت تايلاند لقيت العيلة التايلاندية مستنياني في المطار
ولو فيه كلمة هقولها عن تايلاند فهيا بلد الناس الطيبة " والأكل "
الناس دي بتاكل بشكل غريب ، وكل اللي مالوش شغل يفتح مشروع يا اما مطعم يا اما فندق
اما الطبيعة فهيا جنة
انا قضيت الشهر في
Bangkok , Nakhon Ratchasima , Mahasarakham , Chiang Mai
وتقريبا مادفعتش اي حاجة في المواصلات الداخلية لان " أهلي " في تايلاند كانوا بيدفعولي كل حاجة " رغم بساطتهم ودخلهم القليل "
والسكن كنت معظم الوقت ساكن معاهم او في فنادق رخيصة - اغلى فندق رحته كان ب 700 بات لشخصين -
اتعرفت على ناس كتير
اتعلمت كلمات تايلاندية " مش كتير "
اكلت " كتيـــــــــــــــــــــــــــــــــــر "
مشكلتي الوحيدة في تايلاند هيا الجو الاستوائي ، بس الحمد لله هيا مروحة صغيرة او تكييف وكله بيبقا تمام
شكراً على دعمكم المعنوي
واتمنى اقدر اعمل تقرير عن رحلتي بالصور
واي سؤال اقدر اجاوب عنه .. فانا مش هتأخر
من فضلك انا كنت محتاجة مساعدة حضرتك ﻻنس المفروض هسافر خﻻل شهر يناير ان شاءالله لكن لسة مابدأتش في اي اجراءات .. اتمنى التواصل لو مافيش عندك مانع عن طريق اﻻيميل او التليفون لو سمحت...
شكرا ليك على كل حال
رد: رجاء المساعدة من المصريين خصوصا ومن خبراء السفر لتايلاند عموماً
من فضلكم حاولت اعمل مشاركة او استفسار منفصل ماعرفتش
انا لسة جديدة في المنتدى ومحتاجة اعمل مشاركة مهمة بخصوص السفر لتايﻻند. . ياريت حد يفيدني ضروري في اقرب فرصة
شكرا ليكم
رد: رجاء المساعدة من المصريين خصوصا ومن خبراء السفر لتايلاند عموماً
أهلآ بيكم .. أنا عضو جديد هنا فى المنتدى .. ويسعدنى تقديم أى نصيحة أو رد على أى إستفسار خاص بالسفر إلى تايلاند ..
أنا أزور تايلاند كل عام منذ 15 عام مضت .. وعندى معلومات لمن يريد السفر أو يريد الأستفسار عن أى شئ بخصوصها .
رجاءآ مراسلتى على الخاص لطلب رقم الموبايل إذا أردت التحدث شخصيآ .. وتحياتى للجميع ..