-
رحلتي الى وتيانغا بنيوزيلندا
https://www.otlaat.com/arabtravelers...6e7Momayaz.gifانا زي ماوعدت اني راح اكتب عن رحلتي الى نيوزيلندا ، والفتره ماكانت طويلة 8 اسابيع بس كانت مفيده ليه من كل النواحي ، وانا حبيت اكتب عن رحلتي لاني مالقيت احد كاتب عن المنطقه اللى انا كنت فيها ، او المعهد اللى درست فيه ويمكن كل فتره بيسألوا بعض الاعضاء عن هذا المعهد فانشاء الله تلاقوا كل اللى يهمكم عن المعهد وطريقه دراسته ، وانا في الاخير راح اقول رايي عن المعهد وهل هو ينفع ولا ماينفع ، وزي ماانا قبل السفر كنت محتاج معلومات عن هذى المنطقه والمعهد يمكن في المستقبل احد يحتاج لاي معلومة فاتمني انه يستفيد من الشي اللى راح اكتبه واتمني تكون رحلتي فيها شي جديد واضافة لهذا المنتدي .
اعتقد ان أي شخص لما يحب يختار مكان للدراسة فبالتأكيد راح يختار مكان متوفر فيه كل شي ، خصوصا دولة مثل نيوزيلندا لان المدن الكبيره فيها لايوجد بها قطارات سريعة داخل المدن كباقي الدول المتطوره ، فكيف لو فكرت تعيش في منطقه صغيره في نيوزيلندا اكيد راح يكون اختيار صعب ، ويمكن كثير راح يستبعد المناطق الصغيره لعدم توفر عوامل الترفيه فيها ، ولهدوئها الدائم ، واللي زاد من صعوبه الاختيار بالنسبه ليه فوق ان المنطقه صغيرة هو ارتفاع تكاليف المعهد الذي كنت فيه فهو يعتبر من اغلي المعاهد في نيوزيلندا ، لكن انا اخترت وسافرت وما ندمت على اختياري بالعكس ارتحت جدا وانبسطت كثير واستمتعت اكثر واكتشفت اشياء جديده واتعلمت اشياء اكثر ، وانا اكيد مني اول واحد يروح هذا المكان ، لكن اكيد ان أي احد راح يختار هذا المكان راح يكون الخيار الصعب .
انا راح اقسم موضوعي الى ثلاثة اقسام :
اولا : رحلتي الى وتيانغا .
ثانيا: منطقة وتيانغا سلبياتها وايجابياتها .
ثالثا : معهد cormandel outdoor ******** center ايجابياته وسلبياته .
وانا ماراح اقدر اكتب كل شي يعني راح اكتب الاشياء المهمة ويمكن احكي بشويه من التفصيل في البداية لانه تقريبا بيكون فيها كل شي جديد وبعد كده بيكون روتين الحياه الطبيعيه لكن اتمني لو أي شخص عنده أي استفسار انا حاضر .
اولا : رحلتي الى وتيانغا
انا من فتره طويلة ونفسي اسافر في دولة تتحدث الانجليزية لتطوير لغتي وكل مره تتأجل الفكره لغايه ماتحمست جدا للفكره وقررت اسافر ، بصراحة ماعمري خطرت على بالي نيوزيلندا لاني ماكنت اعرف ان لغتهم الرسمية الانجليزية ، ولما بدأت البحث وجدت اكثر المكاتب لديها نيوزيلندا لتعليم اللغة الانجليزية ، ولما سألت عرفت ان نيوزيلندا لغتهم الرسمية الانجليزية ، فبدأت في البحث في الانترنت عن كل شي يتكلم عن اللغه الانجليزية في نيوزيلندا واكتشفت المنتدي الرائع العرب المسافرون اللى اعطاني فكره كبيره عن الدراسة في نيوزيلندا فاستقريت على اني اسافر نيوزيلندا خصوصا لما عرفت انها لاتحتاج فيزا ، ومن المنتدي عرفت ان اكثر العرب متمركزين في اوكلاند او كرايستشريش فقررت اختار مكان مختلف لاني كنت ابغي ابعد عن العرب قدر المستطاع ، فقررت اني ابحث اولا عن المعهد عن طريق المعاهد المعترف فيها من NZQA فوجدت معهد CORMANDEL OUTDOOR ******** CENTER وعجبني انه في نشاطات داخل المعهد ولقيت انه ليه فرعين واحد في منطقه وتيانغا والاخر في منطقه ونغماتا دخلت على موقع المنطقتين وحسيت من الصور ان منطقه وتيانغا اجمل فقررت اني اسجل في هذا المعهد وفي هذي المنطقة ، وكنت افضل التسجيل عن طريق احد المكاتب في السعودية لاني ماعندي خلفيه في مسألة التسجيل بالانترنت ولان لغتي ضعيفة فبدات ابحث عن المكاتب اللى تتعامل مع هذا المعهد ، يعني كنت اتصل علي المكاتب واسألهم هل يتعاملوا مع هذا المعهد لغاية مالقيت مكتب ورتبت معاه على اني ابدأ الدراسة في اول اسبوع من شهر يناير وسجلت لمده اسبوعين لاجرب المعهد والمكان وعملت كل شي عن طريق التلفون لاني من مدينة جدة والمكتب في مدينة الرياض ، وبصراحة كان المكتب اكثر من رائع في تعاملة ومااخذ مني ريال زيادة لانه بيأخذ عمولتة من المعهد .
بدايت ارتب لمسالة الحجز ولقيت ان الحجز صعب لنيوزيلندا يعني لازم تأخذ قرارك من بدري عشن الرحلات قليلة ودايما مليانة . اخترت الخطوط السنغافورية لانها توصل اوكلاند قبل بداية الدراسة بيومين وحسيت انه افضل عشن ارتاح وقطعت التذكره 5400 ريال وطلبت من المكتب السياحي انه يحجز لي فندق في سنغافورة لان الترانزيت 9 ساعات ، قالي المكتب السياحي ان الغرف اللى في فندق المطار كلها مشغولة ، لكن روح للخطوط السنغافورية اكيد راح يلاقوا لك حل ، رحت للخطوط السنغافورية ولما شرحت لهم الموضوع قالولي مافي حل الا اننا نعطيك فندق خارج المطار لكن في هذه الحالة تحتاج تعمل فيزا ، ولما سألته مين اللي راح يتحمل قيمة الفيزا قالي انت طبعا احنا بنوفر لك الفندق بس ولو ماتبغاه هذا شي راجعلك ولما سألته كم قيمة الفيزا قالي 50 ريال وتحتاج 10 ايام حتى تخلص ، لما فكرت قلت مو مشكلة 50 ريال بس الاقي مكان ارتاح فيه من الرحلة الطويلة ، اتأخرت الفيزا وماخلصت الا بعد 17يوم يعني مااعطوني هي الا قبل السفر بيوم واحد واعطاني الفاوتشر حق الفندق .
رتبت الشنطة وحطيت كل حاجه خطرت على بالي وممكن احتاجها ولما جيت اقفل الشنطه ماهي راضيه تنقفل فاشتريت شنطة ثانيه عشن اوزع العفش على شنطتين ، وانا رايح المطار حسيت ان الشنط ثقيله وطالعت في التذكره لقيت ان الوزن المسموح بيه 20 كيلو بس ، وصلت المطار وعند وزن العفش قالي الموظف حط الشنط ولما حطيتها العداد بداء يحسب ابغاه يوقف مو راضي لغاية ماوصل 49 كيلو انا اتفاجأت قالي الموظف عندك وزن زايد ، قلتله انا لسه رايح اجل لما ارجع ايش راح اعمل ، وقلتله طيب خليني اخفف منها مع اني ماادري فين اودي العفش اللى راح اخرجة قالي طيب انت ايش حتشيل في يدك قلتله ماعندي الا الكمبيوتر المحمول قالي خلاص انا راح امشيها ليك قلتله جزاك الله خير مع اني مني عارف ايش راح اعمل في الرجعة ، رحت عند موظف الجوازات وهو جالس يختم سألني ليه رايح نيوزيلندا قلتله رايح ادرس انجليزي قالي انت موظف قلتله ايوة طالع فيه بنظره استغراب وقالي بالتوفيق .:x1:
والبقيه تاتيكم غدا
-
رد: رحلتي الى وتيانغا بنيوزيلندا
مشكور على طرح هذه القصه الجميله ونحن في انتظار ما تبقى
-
رد: رحلتي الى وتيانغا بنيوزيلندا
بداية موفقه ، بأنتظارك عزيزي .
-
رد: رحلتي الى وتيانغا بنيوزيلندا
العندلييب
بدايه موفقه .. وفي إنتظار التفاصيل والصور اذا امكن :114:
-
رد: رحلتي الى وتيانغا بنيوزيلندا
تسلم أخوي وفي انتظار الباقي مع الصور
تحياتي
-
رد: رحلتي الى وتيانغا بنيوزيلندا
يا طيب عندليب ممكن تكتبلي عنوان المكتب الي رتبلك معه لاني محتاج مكتب الله يسلمك ولا رقمه أو ارسلي في عنواني الايميل cafy700وكمل الباقي انت هوت ميل.
ضروري جدا محتاجه اوكي لاني بمشي الاجازه الكبيره وانا مثلك لغتي ضعيفه.
الله يوفقك
-
رد: رحلتي الى وتيانغا بنيوزيلندا
شكرا اخواني الصحافي و yazeed و صعب المنال و المايستروا وشارع التحليه وانشاء الله مع البقيه هناك صور وكلامكم حمسني اكمل خصوصا الموقف اللى حصلي وانا راجع ضروري الكثير يستفيد منه عشن مايحصل معاه .
اخوي وده نيوزيلندا استني مني ايميل راح اعطيك كل اللى تبغاه وراح اساعد قدر المستطاع .
-
رد: رحلتي الى وتيانغا بنيوزيلندا
-
رد: رحلتي الى وتيانغا بنيوزيلندا
مساء الخير انا اليوم راح اكمل موضوعي بس عندي مشكلة مع الصور لاني لما جيت احملها حجمها فوق 600 ك بايت وانتوا عارفين اكثر شي اقدر احمل للصورة 350 ك بايت فلو في طريقه اصغر بيها حجم الصور عشن انزل الصور اللى عندي اكون شاكر ليكم. والان نكمل الموضوع :
طلعت الطياره ولقيت كل اللى معايا في الطياره من تايلاند ولما سألت التايلندي اللى جنبي قالي انه اكثر اللى في الطيارة راح يأخذوا طياره من سنغافورة الى تايلاند ، بصراحة المقاعد في الخطوط السنغافورية مره ماعجبتني حسيتها مره ضيقه وصغيره وخدمتهم مره عادية ، بس الحلو ان كل معقد امامه تلفزيون يقلب في القنوات على كيفه ، قبل مانوصل سنغافورة بدأو يوزعوا كرت الدخول لسنغافورة انا مني عارف اخذ واحد ولا اللى ترانزيت مايحتاجوه ، المهم قررت اني مااعبي كرت واستني بعدين ايش راح يقولولي ، وصلت سنغافورة ولما وصلت عند موظف الجوازات قالي فين الكرت قلتله انا ترانزيت قالي لازم تعبي واحد واشرلي على كونتر مليان كروت انا رحت عبيت واحد ولما رجعتله ختملي الجواز واشرلي على مكتب الخطوط السنغافورية الخاص بحجز الفنادق وقالي اعطيه الفاوتشر اللى معاك عشن يعطوك الفندق ، رحت هناك واعطيتهم الفاوتشر وقالولي استني شويه راح يجي باص يوديك للفندق واعطوني ورقه فيها اسم الفندق ومختومة عشن اعطيها الفندق وورقتين للباص ورقه للروحه وورقه للرجعة ، وانا جالس استني لمحت شاب حسيت من ملامحة انه سعودي ومعاه سيده سنغافوريه اتكلمت شويه مع موظفه المكتب وبعدين اعطته نفس الورقه اللى معايا وقالتله استني الباص ولما شافت اني انا في نفس الفندق ورجعتي الى المطار في نفس وقته قالتله خلاص خليك مع هذا روح وارجع معاه ، راحت السيده السنغافوريه وجلس الشاب جنبي سالته مين هذى قالي انه طلب من المكتب اللى حجز له في السعوديه احد يستقبله في سنغافورة عشن مايعرف انجليزيه ويخاف مايعرف يتصرف لوحده ، ولما سالته انت رايح على فين قالي رايح على كرايتشريش وحيجلس هناك شهرين عشن يدرس انجليزي . وسألته في أي معهد رايح تدرس ؟ قالي ماادري ؟؟؟؟؟ انا اتفاجأت قلتله معقوله رايح تدرس ومنت عارف المعهد اللى مسجل فيه ؟ قالي معايا الاوراق بس لغتي ضعيفه مااعرف اقراها . قلتله اسم المعهد مو محتاج انك تعرف انجليزي ولما طلبت منه يوريني اوراق المعهد لقيته مسجل في معهد ASPECT . وسألته مسجل بارت تايم ولا فل تايم قالي ماادري ؟؟؟؟ قلتلة طيب كم دفعت للمعهد على الشهرين ؟؟؟ قالي ماادري ابويا اللى دفع . ولما سألته كم عمرك؟ قالي 19 سنه قلتله كويس انك بتعرف حاجة .
اخدنا الباص وكان الفندق في وسط المدينة وكانت فرصة اني اشوف سنغافورة واخذ فكره عنها ، اخذ مشوار الباص للفندق20 دقيقة ، اعطوني غرفه ريحت فيها ثلاثه ساعات وبعدين جاء الباص اخدنا الى المطار وفي المطار ودعت الشاب السعودي ، ولو احد سألني لو عندك ترنزيت بعد كده تأخذ فندق ولا تجلس في المطار اقولة لو لقيت فندق في المطار كويس لكن لو قالولي فندق بره المطار اقولهم اجلس في المطار احسن لاني حسيت الاجراءات اللى عملتها كثيرة والروحه والرجعه تعبتني اكثر من انها ريحتني ، المهم ركبت الطيارة وهنا الوجوة اختلفت عليه كل الركاب اشكالهم اوروبية وعدد لاباس به من الهنود ، والطيارة كانت نفس الشي الكراسي ضيقه وصغيرة والخدمة جدا عادية يعني لو فكرت اسافر مرة ثانية راح اجرب خطوط ثانية . وصلت اوكلاند الساعة 12 ظهرا يوم السبت وكان المطار زحمة رحت لموظف الجوازات ولما سالني جاي ليه وريته ورقه القبول اللى من المعهد على طول لختم على الجواز . مشيت ووصلت للتفتيش قالي افتح الشنطة فتحتها قلب فيها وسالني مامعاك اكل قلتله لا قالي كويس خلاص امشي يعني التفتيش كان اقل من دقيقتين . خرجت من الصالة ومعايا الشنطتين اللى وزنها 49 كيلو ولقيت ناس كثير معاهم لوحات عليها اسامي حاولت الاقي اللوحة اللى عليها اسمي لكن مني قادر الاقيها من الزحمه وبعدين لقيت سيدة عجوزة تجري عليه وتقولي مو انت (.....) قلتلها ايوه قالتلي روح عند السيده اللى هناك واشرت لي على وحده لقيت معاها ورقه فيها اسمي ، بس عجبتني فراسه السيده العجوز ماادري كيف عرفتني يمكن ملامحي واضحه اني عربي ، رحت للسيده اللى ماسكه ورقه فيها اسمي واشرت لي على مجموعه بنات واولاد اوروبيين جالسين قالتلي اجلس معاهم شويه عشن في واحد باقي مستنينه يوصل ، رحت هناك وجلسنا يمكن ساعه ننتظر استغليت هذي الساعه ورحت اشتريت شريحه فودافون 45 دولار وبطاقه شحن 20 دولار بس ماعرفت كيف اشحنها الا بعدين ، بس اللي يبغي يشتري شريحه يأخذها من بره ارخص لانه واحد من زملائي في المعهد اشتراها 35 دولار من وتيانغا . ملاحظة ( الشريحة السعودية شغاله هناك وجربتها اول ماوصلت ورسلت منها لاهلي وطمنتهم اني وصلت بالسلامة) ، المهم شويه ونادتنا السيده وقالتلنا يالله خلونا نمشي كل واحد بدأ يشيل شنطته ولقيت كل واحد شايل شنطه على ظهره الا انا معايا شنطتين كبيره زي الحجر حسيت اني شكلي بايخ بينهم وحطينا الشنط في السيارة وشنطي حاسوا فيها عملتلهم زحمة وبعد التحشير انتهينا ، وانطلقنا الى وتيانغا ، و جلست اتفرج على الطريق وبعد 4 ساعات وصلنا وتيانغا الجميلة.
والسائق بدأ يوصل كل واحد للبيت اللى راح يسكن فيه وانا كنت اخر واحد فيهم .اول ماوصلت البيت لقيت البحر امام البيت مباشره انبسطت كثير لان مكان البيت كان مره جميل واستقبلني صاحب البيت كان رجل كبير 73 سنه بس ماشاء الله انشط مني واول ماشافني سلم عليه وعرفني على نفسه واخذ وحده من الشنط وشالها انا في الاول مني راضي اخليه يشيل الشنطه قلت حرام الشنطة ثقيله عليه لكن هو اصر وشالها وطلعها فوق وقتها عرفت انه العجايز عندهم مو زي عندنا . ولما دخلت البيت استقبلتني زوجه صاحب البيت وكانت سيده كبيره 68 سنه بس نشاطها لايختلف عن زوجها وعرفتني على نفسها وطلعتني فوق وعرفتني على بنات بنتها الا كانوا عايشين معاهم وكانوا توأم واعمارهم 15 سنه ، ورتني غرفتي وقالتلي ارتاح شوية وبعد نص ساعه راح نحط العشاء ، انا اخدت بطاقه شحن الجوال ورحت لوحده من البنات وقلتلها مني عارف اشحن البطاقه واعطيتها التلفون على طول اتصلت ودخلت الارقام وقالتلي خلاص صار جاهز وجلست ارسل رقمي الجديد لاهلي واصحابي لغايه ماجاء موعد العشاء ، لما جاء موعد العشاء نادوني ولما نزلت لقيت في واحد ياباني جالس على طاوله الطعام عرفتني السيده عليه وقالتلي هذا طالب ياباني وصل قبلك بساعتين وراح يدرس في نفس المعهد اللى انت فيه ، بعد العشاء اخذت دوش وحطيت راسي ونمت لاني كنت مره تعبان.
صحيت الصباح ونزلت افطر وجلس معايا الطالب الياباني وقالتلنا السيده اليوم اكيد راح تخرجوا وتتعرفوا على الاماكن وتعرفوا مكان المعهد عشن بكره تعرفوا تروحوا ، ولما سالتها كيف نقدر نروح ونجي قالتلي ان وتيانغا مافيها باصات لان سكانها قليل وكل اللى ساكنين فيها عندهم سياره اواثنين ، قلتلها والمعهد قريب ولا بعيد قالتلي على رجلك يمكن راح يأخذ منك ساعه ، قلتلها طيب كيف نروح ونرجع كل يوم قالت ان عندها دراجات كل الطلاب اللى بيجوا عندهم بيستعملوها ، قلتلها دراجه انا من زمان ماسقت دراجة ، وسألت الياباني ايش رايك قالي انا الموضوع عادي بالنسبة ليه ، قلتها امرنا لله نسوق دراجه ، واعطت كل واحد دراجه وخودة عشن نلبسها وقالت لازم تلبسوا الخوده عشن لو شافوكم الشرطه بدونها يعطوكم غرامه ، وماسألتها كم الغرامة بس عرفت بعدين انها من 200 الى 300 دولار نيوزيلندي ، اخذت الدراجه ومشيت بيها وبعد 5 دقايق من تركنا البيت لقينا السيده تمشي ورانا بالسياره وتنادينا انا ماسمعتها مندمج مع الدراجه لكن الياباني لانه كان ورايا سمعها وناداني لما وقفت لقيتها قربت جنبا وقالت لنا انتوا ماشيين غلط وعاكسين الخط يعني وانتوا رايحين تمشوا في الجهه الشمال وانتوا راجعين تمشوا في الخط اليمين زي السيارات keep left ، شكرناها وانتقلنا للطريق الصحيح وكملنا الطريق ، بس حسيت اني مستمتع لاني شعرت اني باعمل رياضه والبحر طول الطريق على شمالي وكثير كانوا بيمشوا من جنبي بالدراجات بيعملوا رياضه الصباح فبديت احس ان الموضوع عادي ، بس كنت كل شويه اوقف الياباني واقوله خلينا نمشي على رجولنا شويه مقعده الدراجه تعبتني مره قاسيه وماهي مريحة ، ولقيتة بيشتكيلي من المقعده بس من اول مستحمل وساكت ، اخدنا لفه بالدراجة وتقريبا عرفنا كل حاجه مهمه المعهد والمطاعم والسوبر ماركت والبنك والصرافات ، واكتشفت ان المدينه مافيها ولا مسجد وانه اقرب مدينه فيها مسجد اوكلاند وتبعد 200 كيلو حتى المطاعم مافي ولا مطعم اسلامي او اكل حلال. والمره الجايه راح اكلمكم عن اول يوم دراسي .
-
رد: رحلتي الى وتيانغا بنيوزيلندا
ياسلام عليك
والله اني حسيت اني معكم
الله يرحم والديك واصل
مشكور
-
رد: رحلتي الى وتيانغا بنيوزيلندا
بدايه موفقه ، مع اني رحت لنيوزيلندا لكن ماسمعت بالمدينه هذي ارجوك ارفق الصور وشكرا
-
رد: رحلتي الى وتيانغا بنيوزيلندا
انا حاولت اسرع في تنزيل باقي الموضوع كامل عشن تعم الفائده للجميع وانشاء الله المره هذي راح يكون فيه صور واتمني ان التقرير باقي التقرير يعجبكم وانا كتبت كل حاجه حسيتها مهمه واتمني الفايده للجميع.
والان خليني اكلمكم عن اول يوم دراسي .
بس هذي اولا صوره اخدتها من شباك المنزل اللى ساكن فيه للبحر اللي امام البيت
https://www.otlaat.com/arabtravelers...2858e17055.jpg
وهذي صورة ثانيه للشاطي امام المنزل بس للجهة الجنوبيه
https://www.otlaat.com/arabtravelers...2858e17056.jpg
صحيت الصباح ورتبت شنطتي وبعد الافطار حطيت الشنطة على ظهري والخوذه على راسي وانطلقت الى المدرسة ، المشوار اخذ مني 25 دقيقة والياباني طبعا معايا ، وعند المدرسة لقيناهم عاملين مواقف للدراجات لكن المواقف كلها مليانة قلت شكله كل الطلاب بيجوا بالدراجات يعني بعد كده يبغالوا الواحد يجي بدري شويه عشن يلاقي موقف للدراجة حشرت الدراجه بين الدراجات ودخلت المعهد هو شكله من بره بيت زي البيوت الباقيه يعني ماتقدر تفرقوا الا باللوحه اللى موجوده علية استقبلنا مدير المعهد وقالي اهلا (.....) وناداني باسمي انا استغربت كيف عرفني شكلي مشهور في نيوزيلندا وسلم على الياباني وناداه باسموا برضوا واعطانا كل واحد ظرف مكتوب عليه اسمه وهذا الظرف فيه كل المعلومات اللى تحتاجها عن المعهد او عن وتيانغا وحط على صدرنا ورقه مكتوب عليها اسمنا عشن كل واحد يقابلنا في المعهد ينادينا باسمنا ومن اول ماتدخل تحس ان الجميع يعرفك كل واحد يجي يسلم عليك ويناديك باسمك المهم جاءت الساعه 9 ومدير المعهد قال للطلاب الجدد روحوا في الجهه الثانيه عشن المعهد ليه تحيه خاصه لكل الطلاب الجدد ولما رحت الجهه الثانية لقيت كثير جوا معايا يمكن كنا 25 طالب جديد والجهه الثانيه كانوا تقريبا 10 طلاب والمدرسين واقفين معاهم ، وبداوا يغنوا انا مافهمت حاجه لان اللغه اللى بيغنوا بيها اول مره اسمعها ، سألت اللى جنبي هما بيقولوا ايه قالي ماادري ، بعدين عرفت انهم بيغنوا باللغه الماروية وانه هذا تقليد في المعهد أي طالب يجي اول يغادر المعهد يغنوا له هذى الاغنية عن مدينه وتيانغا وباللغه الماروية وطبعا بعد اسبوع كنت عارف الاغنية وباغنيها معاهم للطلاب الجدد .
وهذا صورة واحنا بنغني مره من المرات اغنيه وتيانغا
https://www.otlaat.com/arabtravelers...2858e17042.jpg
بعض ماخلصت الاغنيه وزعونا على الفصول توزيع عشوائي وقالولنا راح نعمل اختبار تحديد مستوي ووزعولنا ورقتين فيها اسئله وقالولنا حلوها وبعد 20 دقيقه راح نسحب الورقه ، بالنسبه ليه خلص الوقت وانا ماخلصت الاجابه على كل الاسئلة قالولي مو مشكله مو لازم تخلصها وبعدين جأءت مدرسة تتكلم معايا شويه عشن تعرف مستوايا ولما خلصوا قالولنا بعد شويه حتتعلق ورقه فيها الاسامي وفصل كل واحد .
استغليت انا الفتره اللى باستني فيها ورحت لمدير المعهد وكلمته اني ابغي افتح حساب في البنك فقالي بعد ماتخلص اليوم الدراسي راح اخدك بسيارتي ونروح البنك لانه لازم اعمل موعد قبل مانروح .
المعهد انا الوحيد العربي فيه وعرفت من مدير المعهد انه نادرا مايجوا عرب واللى جوا قبلي يمكن 3 او اربعه بس ، ومو بس انا الوحيد في المعهد حتى في وتيانغا مافيها عرب ابدا .
علقوا الاسامي وكل واحد عرف فصله ووزعوا علينا الكتب ، كان كتاب واحد وبدأنا الدراسة كان التدريس عادي جدا ، بعد ماخلصنا كانت الساعه 12 وقالوا اللى يبغي يروح وسط البلد عشن يتغذي يطلع الباص وكان فيه باصين واقفين طلعوا الطلاب اللى يبغوا يتغذوا برا عشن في طلاب يجيبوا اكلهم معاهم ويتغذوا في المعهد عشن يوفروا ، رحنا في وسط البلد مع انه مايبعد عن المعهد الا 15 دقيقه مشي على الارجل يعني بالسياره يمكن 3 دقايق وبعدين نزلونا في مكان اتفقنا عليه عشن راح يرجع الباص ياخدنا بعد ساعه اتوزعوا الطلاب وكل واحد راح المطعم اللى عجبه وبعد ساعه رجع الباص اخذنا وكملنا دراسه حصه بعد الظهر.
بعد ماخلصت الحصه ناداني المدير عشن نروح البنك اخذني بسيارته ورحنا new Zealand bank ولما سالوني عن الفتره اللى ابغي اجلسها قلتلهم شهرين او ثلاثه قالوا اسفين اقل من سته شهور مانقدر نفتح حساب ، خرجنا ورحنا kiwi bank ورحبوا بينا وقالولنا مو مهم الفتره بس اقل شي يكون المبلغ مو اقل من 5000 دولار ، انا كان معايا دولارات امريكيه ولما رحت صرفتها كان الدولار النيوزيلندي مرتفع يعني لما حسبتها لقيت سعر صرف الدولار النيوزيلندي 2.8 ريال سعودي وهذا ماكان في صالحي عشن كده انا في رايي اللى يبغي يجلس من شهرين الى ثلاثه مايحتاج يفتح حساب يعني انا اشوف اكثر الطلاب مع انهم جلسوا نفس فترتي مافتحوا حسابات وكنت اشوف معاهم شيكات سياحيه لما يحتاج فلوس يروح يصرف على قد مايحتاج وكنا لما نروح نصرف شيكات سياحيه ماكان ياخذ مننا وقت اكثر من 3 دقايق في البنك لان البنك مافيه زحمه وعشن تستفيد من سعر الصرف عشن اوقات بيرتفع واوقات ينزل ، وغير كده لو فرضا فتحت حساب وتبغي تغير المكان لازم تقفل حسابك عشن صعب ترجع المكان ثاني لو نقلت لمدينه ثانيه يعني انا في رايي من شهرين الا ثلاثه مايحتاج تفتح حساب شيكات سياحيه تؤدي الغرض . بعد مافتحت الحساب قالولي بعد اسبوع راح تجيك بطاقه الصراف لانها تصدر من ولينغتون طبعا عندهم عنوان العائلة بعد اسبوع لقيت البطاقه وصلت للبيت وبدأت استخدمها بس هناك على كل عمليه سحب سواء من البنك اللى فاتح فيه او غيره ياخذوا رسوم ويوضحوها في الكشف اللى يرسلوه كل شهر يعني تقريبا كل 10 مرات تسحب فيها ياخذوا 3 دولار .
انا طبعا مسجل في المعهد اسبوعين بس فقررت اني اروح في الويك اند هاميلتون واوكلاند عشن اشوف كيف الوضع هناك خصوصا اني حسيت ان المعهد اللى انا فيه غالي وتدريسه عادي جدا ويهتم بالانشطه والترفيه اكثر من الدراسه يعني حسيت انه مايستاهل سعره .
كلمت الياباني اللى معايا اني افكر اروح اوكلاند وهاملتون في الويك اند وطلب انه يروح معايا فرحنا محل استئجار سيارات وحجزنا سياره وللمعلوميه لو تبغي تستأجر سياره لازم تروح قبل الويك اند بيومين عشن في الويك اند تقريبا كل السيارات بتكون مستاجره واسعار السيارات في اليوم حسب نوع السياره يعني فيه سيارات صغيره وبدون تكييف من نوع فيات 33 دولار اما لو تبغي سياره مكيفه من نوع صني 50 دولار ، راح يطلبوا منك رخصه القياده وانا كنت عامل حسابي وجايب معايا رخصه دوليه وهذي تطلعها من أي مكتب سياحي 100 ريال .
جاء اول ويك اند واخدنا السياره وطبعا معانا خريطه للجزيرة الشماليه عشن نعرف الطريق اللى يودي الى هاميلتون والخرايط واضحه يعني كل طريق مرقمينه بارقام وكاتبين الاسامي انت بس تمشي حسب الخريطة راح توصل ، طبعا الطريق كله سحر وخيال يعني المزارع والمناظر الرائعة يعني تحس فيه اماكن انك منت مصدق انها حقيقيه من طبيعتها وفيه اماكن فكرتني بدعايه جبنه بوك واماكن بفلم كرتون هايدي، وكانت اول مره اجرب اسوق دركسون في الجنب اليمين بس مهي صعبه يعني اول 5 دقايق تحس انه شي جديد عليك وبعد كده عادي وغير كده الطريق مو زحمه يعني هذا يساعدك انك تتعود على الطريق بس كنت كل شويه اخربط لما ابغي اعطي اشاره الاقي المساحات تشتغل عشن حتي اماكن الاشارات والمساحات تختلف عننا ، المهم قضينا يوم في هاملتون ويوم في اوكلاند وبعدها قررت اني استمر في وتيانغا للاسباب التاليه :
هاملتون واوكلاند حسيت انها مجرد مدن يعني مافيها ولاشي من متعه الطبيعه كلها اسواق ومباني بعكس وتيانغا اللى فيها الشواطي الرائعه والطبيعه الخلابه.
هاملتون واوكلاند مليانه اجانب يعني وانا ماشي مااشوف الا كوريين او هنود اوعرب خصوصا اوكلاند يعني النيوزيلنديين ضايعين في وسط الاجانب بعكس وتيانغا البلده كلها نيوزيلنديين وتتعامل معاهم مباشره في كل شي تعمله في المطاعم والمحلات والاسواق والشوارع ماتشوف الا نيوزيلنديين والاجانب نادرا ماتشوفهم ولو شفتهم يكونوا من الاوربيين.
مع ان نيوزيلندا كلها امنه بس في وتيانغا تحس امان بزياده وماحسيت انه فيه حاجه ممكن انها تضايقك او تفكر فيها لو حتي مشيت في نص الليل لوحدك الوضع جدا امان.
عجبني تنوع الطلاب اللى في المعهد اللى في وتيانغا صحيح ان 50% من الطلاب من سويسرا بس فيه من المانيه وهولندا وايطاليا وتشيكواليابان يعني تشكيله حلوه .
هاملتون واوكلاند حسيت ان ممكن اصرف كثير خصوصا اوكلاند مررره الاسعار نار لكن في وتيانغا اذا كان فيه تبدير اصرف 15 دولار في اليوم .
الشي المهم بالنسبه ليه اني انا العربي الوحيد في وتيانغا وهذا كان مريحني من مسأله اني ابعد عن العرب .
العيله اللى انا عندها جدا رائعه واكلهم جدا ممتاز وملابسي كل يوم يأخذوها ويغسلوها ويكوها هذا شي كان مهم بالنسبه ليه .
رجعت وتيانغا وحسيت اني مبسوط بالمكان هذا لانه هادي ومريح .
في اشياء عجبتني في نيوزيلندا وفي اشياء لاحظتها وهي كالتالي :
من الاشياء اللى عجبتني في نيوزيلندا الامان الموجود في كل مكان وتعامل رجال الشرطه الراقي وانا راح احكي عن موقف حصلي انا تقريبا كل اسبوع في الويك اند باخرج من وتيانغا وباروح مناطق ثانيه وكل مره باأخذ جواز السفر احتياطا يمكن احتاجه في شي ، ومره كنت رايح مدينه ونقاري وتبعد عن اوكلاند 450 كيلووهي شمال اوكلاند وفي نص الطريق افتكر اني نسيت الجواز لكن مااهتميت لان عارف انه مافي تفتيش ابدا ، واحنا راجعين يوم الاحد كان زميلي هو اللى بيسوق وكان مسرع وكنت انبهه ان لايسرع عشن الشرطه ماتوقفنا وفكرته اني نسيت الجواز لكن هو استمر في سرعته بعد شويه لقينا ونان الشرطه ورانا ويأشرلنا اننا نوقف ، انا قلت شكلي راح تجي سياره الجوازات وتشيلني لاني ماعندي أي اثبات . جاء الشرطي من جهتي وما وجهلي أي سؤال كل كلامه كان مع زميلي اللى بيسوق ، النظام في نيوزيلندا انك ماتزيد السرعه عن 110 ولو زدت عن 130 يصادروا رخصتك احنا كنا ماشيين اكثر من 140 لكن الشرطي لما عرف اننا طلاب وبندرس في معهد كتب في المخالفه السرعه 127 عشن مايصادر رخصتنا واعطانا القسيمه قيمتها 230 دولار وخلانا نمشي بس طول الوقت كلامه كان مع السائق وماوجهلي أي سؤال مو زي عندنا يتلبشوا حتي اللى معاها ويقولو له (هويتك).
بس بصراحه طول الشهرين اللى جلستها ماصادفني أي تفتيش ولا احد قالي فين هويتك او جوازك .
مع ان الديانه الرسميه في نيوزيلندا النصرانيه بس الشي اللى لاحظته في وتيانغا ان كل النيوزيلنديين مايروحوا كنايس مع انه فيها 5 كنايس بس طول وقتها الكنايس مقفله ولما سألت مدرس نيوزيلندي عن ديانته قالي ماعندي ديانه ، وهذا مو شي غريب لاني لما سألت العيله عن هذا الموضوع قالتلي كثير هنا بدون ديانات وحتي اللى عندهم ديانه مهم فاضيين يروحوا كنايس ووقتها عرفت ان حتي العيله اللى انا عندها بدون ديانه وليهم اسم اللى بدون ديانات بس نسيت ايش هو .
من الاشياء اللى دايما بتصادفني اني لما اقابل احد نيوزيلندي ويعرف اني من السعوديه يستغرب اني موجود هنا وبيسألني ليه اخترت هنا ، ودايما اكون موضع اسئله حتى في المعهد لما نجيب موضوع أي حاجه يسألوني كيف عندكم في السعوديه ودايما يعملوا مقارنه .
لاحظت ان الشعب النيوزيلندي شعب مرفه فكل الشعب تقريبا يمتلكوا بيوتهم وكل بيت عنده سارتين او ثلاثة ، لكن تقريبا يشتركوا في شي واحد وهو ان كل النيوزيلنديين عيونهم خضر او زرق وماافتكر شفت نيوزيلندي عينه مهي ملونة ويشتركوا كمان في انهم بشوشين دايما ويحبوا مساعده الغريب ، وانا من يوم ماوصلت لغايه ماسافرت وانا ماحسيت بالغربه ابدا يمكن للمعامله الراقيه من الشعب النيوزيلنديين .
من الاشياء اللى لاحظتها اني اول ثلاثه اسابيع تعبت كثير من ناحيه اللغه لان لغتي تعبانه وماحاولت اطورها قبل مااسافر فصادفتني مواقف كثيره ماكنت فاهم الكلام والمشكله انه مافي احد ممكن يفهمني يعني ياتفهم يا لا بس هذا نفعني كثير وخلاني احاول اعرف كلمات كثير واوقات كثير كنت احس اني راسي مصدع من كثر الكلام اللى اسمعوا وماافهموا بس هذا كله راح بعد شهر مع ان فتره شهر قصيره بس السبب انه مافي عرب ابدا معايا فحسيت انه ادني من كثر ماتسمع الانجليزي بس اتبرمجت بسرعه على فهم اللغه يعني لو كنت في مكان في عرب واتكلم لو قليل عربي ماراح تكون ادنك حساسه في الانجليزي بسرعه راح تحتاج وقت اطول لكن انا بعد شهر صرت افهم اكثر الكلام ولساني صار سريع في الرد واخر اسبوعيين صار ماعندي أي مشكله في اني ادخل أي حوار واتكلم وهذا كله لانه مافي عرب معايا عشن كده انا اقول انه اهم شي في المكان اللى تختاروا انه مايكون فيه عرب ، ويمكن كثير يقولوا مو مشكله لو حتي فيه عرب نتكلم مع بعض انجليزي ، وانا اقول هذا الشي ماتظمنه لان اخر اسبوع ليه في وتيانغا جاء طالب سعودي المعهد بس كان مره مايعرف شي يعني انا لما احد كان يقولي انه فيه ناس ماتعرف من الانجليزي غير yes و No انا ماكنت اصدق لكن السعودي اللى جاء هناك عن جد مايعرف غير الكلمتين زي هذا مستحيل تتكلم معاه انجليزي لانه ماحيعرف يقول أي شي ، بس انا حمدت الله انا كان باقي اسبوع وبعدها مشيت .
من الاشياء اللى مهم تكون معاك في وتيانغا بوصله الصلاه عشن تعرف القبلة والكمبيوتر المحمول لان الكمبيوتر اللى في المعهد النظام مختلف واي شي عربي بيطلعوا اكسات يعني مايفهم الكتابه العربي فالمعهد اعطوني كيبل عشن استخدم الكمبيوتر المحمول اللى جبته معايا . وماادري لو مقاهي النت نفس الشي لاني حتي في المقاهي كنت استخدم الكمبيوتر المحمول بس المشكله ان المقاهي غاليه يعني ساعه الانترنت 7 دولار وفي اماكن 9 دولار .
مرت علينا اسبوعين كان طول الوقت مطر وكنا مانقدر نروح المعهد بالدراجات فكانت العيله يودونا بالسياره ولما نخلص نتصل عليهم ويجوا يأخذونا .
كل العوائل اللى ساكنين عندهم طلاب ممتازين يعني انا دايما اسأل الطلاب كيف العيله اللى ساكن عندها يمدح فيهم بشده ، فكل سكان وتيانغا جدا ممتازين وتعاملهم راقي .
من اختلاطي باليابانين والاوربيين عرفت ان الشعب الياباني منظم جدا وطيب بس فيهم التسرع في اخذ القرارات ومزاجيين يعني ممكن يضحك معاك وبعد شويه يتغير يعني افضل لاتشيل الكلفه بينكم اما الاورببين فناس تحب الحياه ويحبوا الرحلات والخرجات ومعاك في أي مكان ممكن تروحوا بس مايحبوا تقيد حرياتهم يعني لا يتدخل في حياتك ولا تتدخل في حياتهم بس اللي استفدتوا اني اتعلمت اتكلم شويه ياباني وتعلمت شويه سويسري فاي طالب سويسري اوياباني جديد اتكلم معاه بلغته فيتفأجاء ويفرح كثير اني اعرف لغتهم وانا ماعملت كده الا عشن ارفع الكلفه بيننا ونتقرب من بعض كثير لان العرب بالنسبه ليهم شعب غريب عليهم وما يعرفوا كيف تصرفاتهم او تفكيرهم لكن انت لازم تكسر الحاجز هذا عشن تستفيد منهم وتتكلم كثير .
الياباني اللى معايا بعد 3 اسابيع اشتري سياره عشن هو يبغي يدرس في كليه طيران لمده سنه ونص وكلفته السياره 5000 دولار نيوزيلندي وكانت السياره متسوبيشي لاغايسي موديل 1988 والموضوع هذا ريحني كثير من استخدام الدراجه واستئجار سياره كل ويك اند بس طبعا صار يكلفنا قيمه البنزين لان اللتر 1.5 دولار تقريبا 4 ريال سعودي .
انا لما جيت الا نيوزيلندا كنت جايب معايا شنطتين كبيره وزنها 49 كيلو وطبعا ماينفع ارجع بهذا الوزن لاني راح ادفع كثير على الوزن الزايد فكلمت العيله اللى كنت عندهم اني ابغي اخذ شنطة وحده وابغي اسيب شنطة ولما سألوني عن ملابسي قلتلهم مو مشكله انا استهلكتها ولبستها لغايه شهرين كفايه وكويس ان ملابسي مهي غاليه حتي اندم عليها ، فهما قالوا لي على كيفك وحطيت كل الملابس اللى ماابغاها واللى دهكتها في وحده من الشنط وحطيتها في المستودع لانهم حيودوها لمحل بيع الملابس المستعمله وحيبيعوها .
في موقف حصلي وانا راجع والمفروض كل واحد يأخذ باله منها . لما رحت ابغي احجز باص عشن يوديني من وتيانغا الا المطار لقيت ان فيه باصين واحد الساعه 7 صباحا والثاني الساعه 1.30 بعد الظهر والمشكله انه رحلتي كانت مره متأخره الساعه 1 بعد منتصف الليل ، فما كان قدامي الا اني اخذ باص الساعه 1.30 بعد الظهر ووصلت المطار الساعه 4 عصر وكان عندي وقت طويل حتي موعد الرحله يمكن 9 ساعات ، اول مادخلت المطار لقيت فيه ميزان عند الباب عشن كل واحد يوزن شنطة ويعرف كم وزنها لما وزنت الشنطة اللى معايا لقيتها 33 كيلو قلت خلاص اعمل ايه لو قالوا لي ادفع وزن زايد راح ادفع كفايه سيبت شنطة كامله ، المهم وجيت ابغي اروح أي مكان امشي فيه الا لقيت وحده بتناديني ولما طالعت لقيتها وحده من الطالبات السويسريات اللى كانوا معايا في المعهد وكان موعد رحلتها بعد ساعتين ، فقالتلي ايش رايك نطلع الدور الثاني ونشرب قهوة فقلتلها فين شنطك قالتلي انا دخلتها عشن مايبقي كثير على موعد رحلتي ، قفلتلها انا معايا شنطة كبيره ايش اسوي فيها ، قالتلي انتى مقفلها قولتلها ايوه قالتلي خلاص خليها على جنب ماراح يصير فيها شي ، حطيت الشنطه على جنب وطلعنا نشرب قهوه وجلسنا نتكلم تقريبا ساعه وبعدين سابتني عشن موعد رحلتها ، انا قلت خليني انزل واخذ شنطتي ، لكن لما نزلت ادور على الشنطة مني لاقيها لفيت المطار كله قلت يمكن الاقيها بس مافي فايده قلت ماليه الا اني استعين بالموظفين اللى يساعدوا المسافرين ، ولما ناديتهم وقلتلهم انا تركت شنطتي هنا قبل ساعه وماادري فين راح قام شغل الجهاز وعمل نداء وقالي تعال معايا وخرجني من المطار ودخلني صاله ثانيه وتركني وخرج ، الا جاء اثنين من موظفي الجمارك وبدأ يسالوني ايش لونها وكيف حجمها وبعد شويه جابولي الشنطة وسألوني هي هذي ولما قلتلهم ايوه بدأوا معايا سين وجين ؟ كيف تترك شنطه بدون اسم او رقم عليها وانه ممنوع تترك أي حاجه في المطار للاجراءات الامنيه المهم فهمتهم ان الشنطه ثقيله وانا طلعت اشرب قهوه بس ،فقالوا أي مكان تروحوا لازم تأخذ الشنطة معاك فيه اصنصير تقدر تطلع الشنطه، كلمه مني وكلمه منهم كتبوا محضر وخلوني اوقع عليه واعطوني الشنطه ، وجلست الف بالشنطه لغايه ماجاء موعد دخول العفش وقطع البوردينق ولما شافت الموظفه انه عفشي 33 كيلو ماتكلمت ومشتوا ليه .
انا طبعا ماكتبك كل حاجه في الشهرين بس كتبيت الاشياء اللى شايفها مهمه وسامحونا لو نسينا شي ، اما الان فراح اكتب عن وتيانغا ايجابياتها وسلبياتها مع وضع بعض الصور وبعدها راح اكتب عن المعهد ايجابياته وسلبياته .
ثانيا : منطقه وتيانغا ايجابياتها وسلبياتها .
وهي توجد في منطقه كرومنديل في الجزيره الشماليه ولو نظرت للخريطه تجد في يمين الجزيرة الشماليه جزء خارج من الخريطه هذه هي كرومنديل وللتعرف على المكان بشكل اوضح ادخل موقع المنطقه.
وهذا خريطه لمنطقه كرومنديل
https://www.otlaat.com/arabtravelers...coromandel.gif
وهذا موقع وتيانغا على الانترنت http://www.whitianga.co.nz/index.html
وهذه صورة لمنطقه وتيانغا
https://www.otlaat.com/arabtravelers...84ec333934.jpg
تعتبر منطقه وتيانغا من اجمل المناطق في الجزيره الشمالية وهي تعتبر منتجع من الضروري كل السياح يمروا عليها ، كمان ان معظم تجار نيوزيلندا يمتلكون بيوت في وتيانغا لقضاء الاجازات هناك ، لوتيانغا اهميه تاريخيه في تاريخ نيوزيلندا فيوجد فيها منطقه شكسبير كليف وهي المنطقه التى نزل فيها كابتن جيمس كوك عندما وصل نيوزيلندا .
عدد سكانها تقريبا 1500 ويزيد العدد قليل في الويك اند ، واغلب سكانها اصولهم انجليزيه يعني انا لما اسأل احد عن اصله يايكون مولد في انجلترا ياابوه او جدوده من انجلترا ، ويوجد فيها مدارس ابتدائي ومتوسط وثانوي لكن ابناء سكانها بعد ان ينهوا تعليمهم الاساسي يتجهوا الا المدن الكبير لدخول الجامعات والجامعات ليست مجانيه كالسعوديه .
وتيانغا فيها كل الخدمات وانا كنت ارفض اقول عنها ريف الا اني لما سالت سكانها ماذا تعتبر وتيانغا فقالوا Rural Town ، وانا استغربت ذلك ففيها كل شي يمكن الشخص يحتاجه المطعم متوفره بس لا تدور على المطاعم العالميه زي كنتاكي وبرجر كنج وماكدونالذز ويوجد ثلاثه بنوك وملاعب تنس ارضي مجانا وثلاثه انديه للحديد واشتراكها الشهري 33 دولار وفيها سينما ومكان للسهر شبيه بالديسكو وفيها محلات واسواق ولكنها صغيره وفيها سوبر ماركت كبير اسمه NEW WORLD وفيها مكتبه عامه كبيره يعني كل شي تحتاجه موجود .
وهذه صور لاحد المطاعم
https://www.otlaat.com/arabtravelers...4ec3339112.jpg
وهذا مطعم اخر
https://www.otlaat.com/arabtravelers...8d7dabc212.jpg
هناك رحلات يوميه بالباصات من وتيانغا الا باقي المدن في نيوزيلندا وهذا جدول يبين المسافات بين وتيانغا وبعض المناطق والمدن .
TRAVELTIMES FROM WHITIANGA time distance
AUCKLAND 3 h 202 km
COOKS BEACH 45 m 40 km
COLVILLE 1hr 30 m 60 km
COROGLEN 20 m 18 km
COROMANDEL via Kuaotunu 1 hr 15 m 46 km
COROMANDEL via 309 Road 50 m 32 km
FERRY LANDING 45 m 45 km
HAHEI 45 m 38 km
HAMILTON 3 h 194 km
HOT WATER BEACH 45 m 37 kin
KENNEDY BAY 1 hr 15 m 46 km
KUAOTUNU 20 m 16 km
OPITO BEACH 40 m 26 km
OTAMA BEACH 30 m 20 km
MATARANGI 40 in 26 km
PAEROA 1 hr 45 m 113 km
PAUANUI 1 hr 15 m 74 km
PORT JACKSON 3 h 95 km
ROTORUA 3 h 30 m 240 km
TAIRUA 40 m 42 km
TAPU 1 hr 15 m 47 km
TAURANGA 3 h 194 km
THAMES via Tapu I hr 30 m 66 km
THAMES via Kopu-Hikuai 1 hr 30 m 85 km
WAIHI 2 h 15 m 112 km
WAIKAWAU BAY 1 hr 45 m 60 kin
WHANGAMATA 1 hr 30 m 83 km
WHANGAPOUA 50 m 36 km
WHENUAKITE 30 m 26 km
جميع سكانها لديهم اكثر من سياره ولذلك لايوجد باصات داخل المنطقه وهذا من عيوبها لكن يوجد تكاسي وممكن بالاتصال هاتفيا يجيوا للمكان اللى تبغاه واسعارها تختلف حسب المشوار لكن انا مرتين ركبتها من وسط البلد الا البيت وكنت ادفع 5 دولار ، اما الطلاب عشن التاكسي بيكون مكلف فيستخدموا الدراجات للتنقل بين وسط البلد والمعهد والبيت.
تتميز بشواطئها الرائعه وطبيعهتها الخلابه وهذه بعض الصور
هذه صوره لمنطقه نروح ليها بالعباره لانها في المنطقه المقابله للبلد
https://www.otlaat.com/arabtravelers...78d7dabc36.jpg
وهذا منظر لاحد شواطي وتيانغا
https://www.otlaat.com/arabtravelers...f065dc2110.jpg
وهذا منظر اخر للشاطي
https://www.otlaat.com/arabtravelers...f065dc2210.jpg
وهذه صورة لمنطقه لشكسيبير كليف وهي مقابله لوتيانغا
https://www.otlaat.com/arabtravelers...df065dc238.jpg
ومنظر اخر لشاطي شكسيبير كليف
https://www.otlaat.com/arabtravelers...a5bdaaf043.jpg
وهذه صوره للمكان الذي نزل به كابتن جيمس كوك عندما وصل نيوزيلندا
https://www.otlaat.com/arabtravelers...5bdaaf0331.jpg
وهذا منظر اخر لمكان جيمس كوك
https://www.otlaat.com/arabtravelers...a5bdaaf044.jpg
وهذه صورة لونقاري
https://www.otlaat.com/arabtravelers...6ee4471d45.jpg
اعتقد كفايه الجلوس فيها شهر اوشهرين ولكن اقصي شي ثلاثه شهور عشن بعد كده حتحس بالملل لان حتكون لفيت كل المناطق يعني في الاول راح تحس بالاستمتاع من الطبيعه والناس الطيبه والشواطي الرائعه لكن مع الوقت حيصير كل المناظر بالنسبه ليكي عاديه وغير كده متعب استخدام الدراجه لفتره طويلة يعني انا في رايي شهرين كفايه وثلاثه شهور اقصي شي مع ان في طلاب يجلسوا اكثر من كده بس هذا رايي الشخصي.
ثالثا : معهد cormandel outdoor language center ايجابياته وسلبياته .
وهذا موقع المعهد على الانترنت http://www.activity.co.nz/
هذه صورة لواجهه للمعهد
https://www.otlaat.com/arabtravelers...6ee4471d46.jpg
وهذه صورة ويظهر الشاطي امام المعهد
https://www.otlaat.com/arabtravelers...6ee4471d47.jpg
المعهد جدا صغير واقصي عدد طلاب ممكن يكونوا في المعهد 40 او 45 طالب ويتكون من خمسه فصول وغرفه فيها كمبيوترين فقط للطلاب وصاله صغيره ومطبخ والحمامات طبعا .
وهذه صورة لاحد الفصول
https://www.otlaat.com/arabtravelers...6ee4471d48.jpg
اكثر مايميز المعهد الجو العائلي اللى تحسه فيه يعني مافي هذا في فصل وهذا في فصل لا كل الطلاب كانهم في فصل واحد من اعلي الفصول الا اقل الفصولوانا اعتبر الجو اللى فيه جو ستار اكاديمي لانك طول فتره دراستك لن تحس بانك في معهد فطوال الوقت مرح وترفيه عشن كده اكثر طلابها من اوروبا لان الاوربيين يحبوا الرحلات والتماشي .
حسيت ان المعهد يهتم بتعلميك الكلام فقط يعني يعلمك لغه السياحه والتماشي اما كدراسه اكاديميه فهو بعيد كل البعد ، المعهد يعتبر من اغلي المعاهد في نيوزيلندا والسبب في رايي انه هو في منطقه سياحيه وكل اللى يجوا راغبين في الترفيه اكثر من التعليم فهو بيستغل النقطه هذي ويرفع اسعاره واللي يبغي ينبسط يدفع وغير كده الطلاب اللى فيه قليل فاكيد السعر غالي عشن يغطي تكاليفة .
كل اسبوع يجوا طلاب جدد ويروحوا طلاب والطلاب اللى كانوا موجودين خلال فتره دراستي من : سويسرا والمانيه وهولندا وايطاليا و نيو كالدونيا و النمسا وتايون والفيتنام واليابان وطبعا انا العربي الوحيد.
اكثر الطلاب من سويسرا ويمثلوا 50% اليابانيين 20% واكثرهم بيكونوا جايين عن طريق شركه طيران يابانيه لان السيد موريس مدير المعهد كان يدرس انجليزي لفتره في اليابان وكون علاقات مع يابانيين وعمل بيزنس معاهم فصاروا يرسلولوا طلاب 8% من المانيا 5% من ايطاليا والباقي من باقي الدول .
اعمار الطلاب : لايوجد عمر محدد بس اقل شي يكونوا 17 سنه لكن ختلاقي طلاب اعمارهم فوق الستين وفيه فوق الخمسين وفوق الاربعين بس اكثر الطلاب من 25 الى 35 سنه .
تعتبر فتره الصيف من اكثر الفترات اللى يكون فيها المعهد مزدحم يعني اوقات بيكون في بعض الفصول 10 طلاب وانا اشوف العدد هذا كثير لان الفصول صغيره بس طبعا مستحيل يزيدوا عن 10 .
انا كنت مسجل فل تايم وكان الفل تايم مقسم الا ثلاثه حصص في اليوم حصتين قبل الظهر وحصه بعد الظهر فيما عدا يوم الجمعه حصتين قبل الظهر فقط . الحصه الاوله تكون من الكتاب ويكون عادي يعني كله قرامر الحصه الثانيه يكون دردشه يعني المودرسه تجي وتكون متعمده تتكلم في موضوع معين وتجيب معاها اوراق عشن تساعد في الدردشه الحصه الثالثه ويكون تقريبا تعليم للقرأه السليمه وتدريب على الاستماع .
كل يوم اربعاء تتكنسل الحصه الثانيه ويحطوا بدلها حصه اغاني يعني يجي المدرس بالقيتار ويوزعوا علينا كتب مليانها اغاني وكل واحد يختار اغنيه ونجلس نغني وبيعملوا كده عشن نتمرن على الالفاظ . واوقات لو مانغني يخلوها مسابقات يعني نتقسم لاربعه مجموعات ونعمل مسابقات او مشاهد تمثيليه .
وكمان في يوم الاربعاء من كل اسبوع يعملوا عشاء في المعهد عشن يتجمعوا الطلاب ويتكلموا مع بعض كثير وعاده يطلبوا من الطلاب يعملوا العشاء بمبالغ رمزيه يعني اسبوع يعملوا السويسريين عشاء سويسري ولالمان زيهم واليابانيين وطلبوا مني اعمل ليله سعوديه واكل سعودي بس اعتذرت لاني مااعرف شي في الطبيخ ولو ماعملوا الطلاب عشاء يخلوها ليله مفتوحه وكل واحد يجيب معاه لحم ونجلس نشوي وهذا اليوم نكون مع بعض في المعهد لغايه الساعه 10 بالليل .
طبعا في عندهم نظاهم الاكتفتي وهذا تأخذ حصتين قبل الظهر وتتبدل حصه بعد الظهر الى نشاط انت تختاره وانا جربت الاكتفتي اسبوعين ، اسبوع في الشهر الاول واسبوع في الشهر الثاني . وهو ممتع ومسلي فقط بس انا شايف انه غالي جدا ومايستاهل السعر هذا لان يوم النشاط 50 دولار ومو كل النشاطات تستاهل السعر هذا خصوصا انه ايام يكون فيه مطر ويتكنسل النشاط اللى عاملينه ويحطوا أي شي بسيط كلعب تنس طاوله ، لكن في نشاطات حلوه كالجولف والسيرفينق والكياكي وركوب الخيول والصيد .
هذا صورة للاكتفتي واحنا بنلعب تنس ارضي
https://www.otlaat.com/arabtravelers...17338d0449.jpg
وهذا يوم الكياكي
https://www.otlaat.com/arabtravelers...17338d0450.JPG
وهذه في رحله الى مزرعه ويظهر مدرس النشاط وهو يشرح للطلاب
https://www.otlaat.com/arabtravelers...17338d0452.jpg
وهنا احد الطلاب وهو يحاول الحلب
https://www.otlaat.com/arabtravelers...53a9c4d353.JPG
الظريف انه لما جيب احلب نزل الحليب معايا على طول وكلهم جلسوا يصفقوا يفكروني محترف مهم دارين اني اول مره اعمل كده .
وهذا السيرفينق
https://www.otlaat.com/arabtravelers...53a9c4d354.jpg
المناهج التي تدرس كويسة وعلى فكره الكتب اللي يدرسوها لقيتها موجوده في مكتبه جرير في جده بس هي مناهج ممتازة بصراحة .
المدرسين احسهم أي كلام يعني فيه مدرس ومدرسه هما اللى احسهم ممتازين لكن الباقيين احس انهم تعبانين ولا تحس انهم متخصصين في التدريس بس أي ناس تجي تدرس وخلاص .
من عيوب المعهد انه طول فترت دراستك مايعملوا أي اختبار يعني اعتقد ان كل المعاهد يعملوا اختبار كل اسبوع ، لكن في المعهد هذا مافي اختبارات الا اول يوم تجي لما يحددوا مستواك ، عشن كده بتحس انك مابتدرس عشن الاختبارات هي اللى تخليك تدرس وتراجع وكل الدروس اللى بتدرسها بتتنسي مع الوقت .
اما الانتقال من مستوي الا مستوي اخر فيرجع الا تقدير المدرسين يعني انا قبل مااخلص باسبوع رفعوني للمستوي اللى بعده وكان هذا حسب تقدير المدرسين لانهم يجتمعوا مع المدير كل اسبوع ويحددوا مين اللي ينتقل لمستوي جديد .
اما بالنسبه للسكن الطلاب هنا ليهم خيارين اما السكن مع عائلة او السكن في مكان اسمة انترناشيونال لودج .بالنسبة للعائلة كل الطلاب اللى ساكنين عند عوائل مرتاحين جدا وانا اولهم والعوائل كلهم طيبين يعني انا كل مااسأل احد ساكن عند عيلة يمدحلي فيهم وماقد سمعت احد غير عيلة الا لان منزل العيلة بعيد عن المعهد ، والبيوت هنا كلها صغيره تقريبا يعني اغلب البيوت 3 غرف وصالة والغرف ماهي كبيرة ، الخيار الثاني انترناشيونال لودج وهذي مجموعة شقق كبيره وكل شقة فيها 10 غرف تقريبا وصالة كبيره فيها تلفزيون وديفيدي واستريو وفي مطبخ وطاولة طعام وغرفه فيها مكتب وانترنت مجانا وتجهيزاتها جدا ممتاز وعفشها جدا جميل ونظيفه جدا وانا اعتبرها مناسبه للي مايحب يسكن مع عائلة .
هذي صور للغرف في الانترناشيونال لودج
https://www.otlaat.com/arabtravelers...3a9c4d3191.jpg
وهذي صورة لغرفتي عند العائله المضيفه
https://www.otlaat.com/arabtravelers...3a9c4d3213.jpg
انا في رايي اللي يبغي يأخذ سفرته دراسه جديه مايفكر يجي هذا المعهد لانه فيه ارخص منه بكثير وافضل منه في مستوي التعليم لكن اللى يبغي يتعلم الكلام بسرعه ويرفه على نفسه اعتقد انه مناسب ليه .
انشاء الله اكون وفقت في اعطائكم فكره جيده عن رحلتي والمنطقه والمعهد واتمني يكون في الشي اللي كتبته حاجه جديده واضافه للمنتدي واي معلومه اضافيه انا في الخدمة.
-
رد: رحلتي الى وتيانغا بنيوزيلندا
مشكور العندليب على الموضوع الرائع الشيق
\
\
\
\
والله يزيك خير
-
رد: رحلتي الى وتيانغا بنيوزيلندا
شكرا لك اخوي العندليب على هذا الشرح الممتع
انا كان مخططي الذهاب لكرايست شيرش بس شكلك بتغيره
عندي كم سؤال واتمنى انك تجاوب عليه
1/غالبية الطلاب الي يجون للدراسه في المدينه يكونون من وين؟وهل الاغلبيه ذكور ام اناث؟
2/كم كلفتك الرحله كاااااااااااااامله ؟
3/ما هو اسم المكتب الذي يتعامل مع المدينه؟
4/ بالنسبه للسكن في الانترناشيونال لودج هل اغلبيته طلاب ؟وماهي الجنسيات التي عادة تسكن فيه؟وكم الفرق بينه وبين السكن مع الاعائله؟
5/لو رجع فيك الزمان حتختار نفس الاختيار ولا بتغيره؟
شاكرين لك
-
رد: رحلتي الى وتيانغا بنيوزيلندا
معليش نسيت سؤال اخر
بالنسبه للمعهد ما هو المعهد الي افضل من معهدك بالنسبه للدراسه والترفيه ؟فأنا من المحبين للنشاطات المدرسيه فيا ليت تقترح معهد يجمع ما بين الاثنين
-
رد: رحلتي الى وتيانغا بنيوزيلندا
مرحبا اخوي متردد
بالنسبة لغالبيه الطلاب اللى يجوا للدراسه زي ماانا كاتب اغلبهم من اوروبا بس اعتقد هذا في الصيف ، يعني الفتره اللى انا كنت فيها كان صيف في نيوزيلندا وشتاء في اوروبا فهما يبغوا يبعدوا عن البرد فيفضلوا انهم يجوا في الصيف هذا على كلام واحد من الطلاب السويسريين لكن لما يكون شتاء في نيوزيلندا مااعرف اغلبيه الطلاب يكونوا من فين .
اما اجناس الطلاب تقريبا متساويين يعني 50% اولاد و50% بنات
كم تكلفه الرحله بالضبط مااقدر احسبها تمام بس انا كنت ادفع في الاسبوع للمعهد اذا كنت مسجل اكتفتي (نشاط)500 دولار واذا بدون نشاط 370 دولار.
اسم المكتب اللى تعاملت معاه مااقدر اكتبه عشن مانعمل دعايه ليه لكن لو حابب تعرفه اكتبلي ايميلك عشن ارسلك مسج باسم المعهد وتلفونه .
بالنسبه للسكن في الانترناشيونال لودج مو بس طلاب اللى ساكنين فيه لكن اغلبيته طلاب واكثر الطلاب اللى يسكنوا فيه يكونوا اولاد يعني من البنات انا ماشفت غير بنتين وحده من المانيا ووحده من سويسرا ساكنين في اللودج والباقيين عند عوائل لكن اغلب اللى يسكنوا فيه من المانيا وسويسرا .
السكن في الانترنااشيونال لودج يكلف في الاسبوع 180 دولار نيوزيلندي بدون اي وجبات اكل .
اما السكن مع عائلة يكلف في الاسبوع 200 دولار شامل وجبتين كل يوم ماعدا الويك اند 3 وجبات .
لو رجع فيه الزمان راح ادور على معهد ارخص من كده ، بس على نفس المبدأ مكان مافيه عرب .
اما بالنسبه للمعاهد اللي فيها نشاطات اعتقد غير المعهد اللى درست فيه هناك معهدين واحد في الجزيره الشماليه والاخر في الجنوبية واعتقد اغلي من اللى درست فيه يعني يمكن الاسبوع بالنشاط يكلف 550 دولار والمعهدين في منطقه صغيره لان المدن الكبيره غير مناسبه للنشاطات لكن المعاهد اللى فيها نشاطات صحيحه تكون في المناطق الصغيره لانها مناسبة لذلك .
-
رد: رحلتي الى وتيانغا بنيوزيلندا
والله مبدع
تقرير رائع
اذا كان عندك صور زياده لاتبخل علينا
وكلمنا على العائله اكثر الله لايهينك
وماقصرت
-
رد: رحلتي الى وتيانغا بنيوزيلندا
هل ممكن اني احط ايميلي لاني محتاج مساعدتك
-
رد: رحلتي الى وتيانغا بنيوزيلندا
شكرا اخوي الخيال العربي وانا عشانك راح انزل مجموعه صور جديدة ،اما بخصوص العيله فراح اكتب شويه عنهم .
اخوي متردد اعتقد انه ممكن تحط ايميلك عملها قبلك العضو ودي نيوزيلندا واتراسلنا وصرنا نتقابل على الماسنجر ، او تقدر تسأل هنا وانا اجاوبك عشن الجميع يستفيد .
بالنسبة للعائلة اللى كنت عندها جدا رائعة وانا اعتقد ان العائلة مهمة في راحتك اكثر من استفادتك في اللغة بس طبعا ماانكر اننا بنتكلم مع العائلة في مواضيع مختلفه عن اللى بنتكلم فيها مع زملائي او في المعهد يعني اكيد في فايدة في اللغه اذا سكنت مع العائلة اكثر من لو سكنت لوحدك .
العيله اللى كنت عندها مكونه من رجل و زوجته طبعا كبار في السن متقاعدين وعايشين معاهم اثنين من البنات (احفادهم) وعشن المدام كبيره في السن كانت ماتخرج من البيت وعشن كده كانت بتهتم بيه كثير ، كانت كل يوم تسألني لو في ملابس محتاجه غسيل ولما اعطيها ملابس الصباح ارجع من المعهد الاقيها علي السرير مغسله ومكويه ، واوقات يمر 5 ايام مااعطيها ملابس للغسيل فتجي تسألني ليه مافي غسيل عندك ، انا طبعا محرج اعطيها كل يوم غسيل وهي عارفه الشي هذا فتقوم تأخذ اي ملابس تلاقيها قدامها وتغسلها .
كانوا لما يشوفوني بادرس في الغرفه يعملولي كبايه شاي ومعاه كيك اوبسكوت من دون مااطلب ، ودايما لما ارجع من المعهد يعملولي كبايه شاهي او حليب بدون مااطلب ، طبعا ماكانوا يرضوا يخلوني اغسل اي شي من مواعين الاكل اللى كنت اكل فيها .
لما كان ينزل مطر ماكانوا يخلوني اروح بالدراجه كانوا يودوني المعهد بالسياره واتصل عليهم لما اخلص يجوا يأخذوني .
مرة كان الياباني اللى معايا في البيت جالس في غرفتي يتفرج معايا تلفزيون وانا قمت اصلي لما بديت في الصلاة جاءت وحده من البنات معاه التلفون الاسيلكي وتعطيني التلفون وتقولي تلفون عشانك ، انا مارديت عليها ومني عارف ايش اعمل فهي قربت مني اكثر وبتقولي نفس الكلام وهي طبعا مهي عارفه انا ايش باعمل ، انا قلت الله واكبر وركعت الياباني انتبه قام اخذ منها التلفون وقالها انا راح اعطيه هو بعد مايخلص ، لما خلصت سألتني انت كنت بتعمل ايه وفهمتها اني كنت باصلي واني ماينفع اعمل اي حاجه وانا باصلي ، فهي انحرجت مره وجلست تتأسف وانها ماكانت بتعرف ، بصراحه شعب محترم .
الفتره اللى كنت هناك جاءت مشكله نشر الصور الساخره بالرسول صلي الله عليه وسلم ، وكنت اشوف في الاخبار مظاهرات في اوكلاند ، بصراحه الوضع في وتيانغا كان جدا عادي وماكانه في شي حصل ، حتي لما كنت اجلس مع العيله ونشوف الاخبار ماكانوا يفتحوا اي مواضيع ، لان مسأل العقيده والديانات مايحبوا يتدخلوا فيها .
الاكل عند العيله كان جدا لذيذ وفي انواع من الخضار كنت مااحب اكلها في السعوديه لكن لما كانت المدام تعملها كنت اكلها لانها بتعملها بطريقه مره لذيذه ، وكانوا لما يعملوا لحم خنزير يعملوا نوع ثاني من اللحم ويقولوا لي اي فيهم الخنزير عشن مااكل منه ، وكانوا كل يوم بعد العشاء بساعه يجيبولي صحن ايسكريم كبير .
كانت المدام تساعدني في الواجبات اللى كنت مااعرف احلها بصراحه خطها مره حلو .
لما كنت اتأخر بره البيت او ابغي اتعشي بره لازم اتصل عليهم عشن مايقلقوا عليه . وكنت باحسهم يخافوا عليه كاني واحد من اولادهم ونفس المعامله كانت للياباني اللى معايا .
طبعا لانهم كبار في السن ماكانوا يخرجوا حتي في الويك اند ماكانوا يتمشوا ابدا بس هذا ماكان مهم ليه لاني كنت انا باخرج مع اصحابي ولا فكرت اني اخرج مع العيله ابد.
يحبوا التلفزيون جدا يعني لما كنت اصحي الصباح الساعه 7 الاقيهم بتفرجوا تلفزيون اروح المعهد وارجع الاقيهم قدام التلفزيون بعد العشاء قدام التلفزيون يعشقوا شي اسمه تلفزيون وعندهم كتيب عن دليل البرامج ، بس طبعا يناموا بدري يعني 9.30 كلهم نايمين وانا بعدهم بساعه انام .
اخر يوم ليه كان يوم حزين بالنسبه ليه لاني راح اسيب وتيانغا رحت وسط البلد واشتريت هدية للعيله عباره عن ساعه حائط واعطيتها للمدام وقلتلها شكرا على حسن الضيافة ، وكانت مره فرحانه بيها وكل مايجي احد توريه هي .
مع ان العيله كان بيتها بعيد عن المعهد وكان ممكن اطلب من المعهد يغيرولي العيله لكن انا مافكرت اغير لاني كنت جدا مرتاح ، لكن اعتقد لو كانوا افراد العيله شباب ماراح يكون في هذا الاهتمام لانهم اكيد بيكونوا طول اليوم في العمل ويرجعوا تعبانين والاكل اكيد اي حاجه . هذا رايي .
والان اترككم مع بعض الصور وتقريبا كلها في وتيانغا واتمني انها تعجبكم
https://www.otlaat.com/arabtravelers...1eefcfcb57.jpg
وهذا منظر لاحد الشواطي
https://www.otlaat.com/arabtravelers...68ac2a3441.jpg
وهذا منظر لبيت عجبني مكانه بس هو في الجهه المقابله لوتيانغا
https://www.otlaat.com/arabtravelers...368ac2a358.jpg
هذا العنز عجبني شكله قلت لازم اصوره
https://www.otlaat.com/arabtravelers...368ac2a359.jpg
وهذا منظر لمزرعه زرناها
https://www.otlaat.com/arabtravelers...863808a671.jpg
وهذا منظر ثاني
https://www.otlaat.com/arabtravelers...863808a691.jpg
تعتبر نيوزيلندا من اكبر الدول بالعالم في تصدير الصوف فلازم نشوف كيف بيشيلوا الصوف وهذا الصور كانت بنشاط مع المعهد
https://www.otlaat.com/arabtravelers...863808a660.jpg
شوف كيف صار شكله حسيته المسكين بردان
https://www.otlaat.com/arabtravelers...1a74a68562.jpg
وهذا احد الشواطي
https://www.otlaat.com/arabtravelers...a74a685310.jpg
وهذا منظر في ونقاري
https://www.otlaat.com/arabtravelers...a74a685510.jpg
وهذا شاطي ونقاري
https://www.otlaat.com/arabtravelers...1a74a68563.jpg
وهذي ونقاري ايضا
https://www.otlaat.com/arabtravelers...af07a0c410.jpg
نرجع لوتيانغا ثاني وهذي في مزرعه زرناها
https://www.otlaat.com/arabtravelers...af07a0c101.jpg
وهذا منظر اخر
https://www.otlaat.com/arabtravelers...af07a0c113.jpg
وهذا منظر اخر
https://www.otlaat.com/arabtravelers...9af07a0c81.jpg
وهذا شاطي
https://www.otlaat.com/arabtravelers...07df590214.jpg
هذا قرش صادوه في الميناء
https://www.otlaat.com/arabtravelers...d07df59064.jpg
وهذا واحنا بنصيد في نشاط مع المعهد ولاتقلق لو اول مره بتصيد هما راح يعلموك كيف تمسك الصناره وكيف تصيد
https://www.otlaat.com/arabtravelers...d07df59065.jpg
في اخر اسبوع ليه في المعهد مدرسه اصرت انها تأخدنا بيتها عشن تضيفنا لاني انا راح اسيب المعهد وقليل السعوديين اللى يجوا وماقصرت ضيفتنا احسن ضيافه وهذا صورة لبيتها وكان مقابل البحر
https://www.otlaat.com/arabtravelers...02cf5e9566.jpg
وهذا صورة لداخل المنزل ويظهر منظر البحر
https://www.otlaat.com/arabtravelers...02cf5e9567.jpg
اعتقد كفايه صور واتمني تكون عجبتكم ، واذا فيه اي استفسار انا في الخدمة .
-
رد: رحلتي الى وتيانغا بنيوزيلندا
بلدة ممتازة لمن يريد الابتعاد عن ضوضاء الرياض و جدة . . أشعر أنك وفقت في اختيارها و التأقلم فيها و معها.
أفضل شيء في مدن كهذه أن تجد لك صديقا و رفيقا يؤنسك . .
مبروك عليك كباية الشاهي على قولتك، تذكرني بأيام ما كنت في الثانوية و المتوسطة لما امي تدخل علي بهدوء و تحط لي كاسه الشاهي على الطاولة و أنا أذاكر . . .
و يا زين شاهيك يا نيوزلندا
-
رد: رحلتي الى وتيانغا بنيوزيلندا
موضوع اكثر من رائع ،،،،،،،،،،،،مشكورررررررررررررررررررررررر.......... .......الى الامام
-
رد: رحلتي الى وتيانغا بنيوزيلندا
مشكور على الصور العندليب والله انك نافع هذا الطيبين ولا بلاش.............................................. ...............الله يعافيك
-
رد: رحلتي الى وتيانغا بنيوزيلندا
الله يسلمك يليتني امشي الحين زهقت من الجامعه هنا
-
رد: رحلتي الى وتيانغا بنيوزيلندا
والله تقرير روووووووووووووووعه
كمل الله يرحم والديك
تراك قعدت شهرين مو يومين
كمل الله لايهينك
-
رد: رحلتي الى وتيانغا بنيوزيلندا
شكرا ياعندليب على المعلومات الي اعطيتنا هي معلومات جدا مهمه الواحد كان محتاجها والصور جدا رائعه وانا اشوف انها مناسبه للدراسه لان مافيها عرب وتكون الاستفاده اكتر فانت احسنت الاختيار يعني فعلا بلاد حلوا ومفيده وانت شوقتني للسفر اليها وجزاك الله خير
-
رد: رحلتي الى وتيانغا بنيوزيلندا
اشكررررررررررررررررررررررك على الموضوع والصور الجميله
واتمنى لك التوفيق
-
رد: رحلتي الى وتيانغا بنيوزيلندا
اشكر الجميع على مروركم الكريم
-
رد: رحلتي الى وتيانغا بنيوزيلندا
السلام عليكم جميعا ......................
هذه أول مرة في حياتي أشارك فيها في أي منتدى.............
حبيت أقول رأيي في الموضوع بصراحة موضوع ولا أروووووووووووووووووووووع صح مريت يالعندليب بمصاعب بس الإستفادة كانت أهم ...........
مشكور أخوي العندليب على هذا الموضوع الجميل الشيق
والصور ولا أحلى منها بصراحة
وإن شاء الله تحكينا أكثر وأكثر عن بقية رحلاتك المقبلة............................[/i][/i]
-
رد: رحلتي الى وتيانغا بنيوزيلندا
الله يعطيك العافيه ومشكور والله على المعلومات الرائعه
-
رد: رحلتي الى وتيانغا بنيوزيلندا
هل هذا المعهد الوحيد الموجود في المدينة أم ان هناك معاهد اخرى ...؟
-
رد: رحلتي الى وتيانغا بنيوزيلندا
العندليب
فعلا تقرير مميز وجميل ..
والصور جدا :24: :24: ممتازة
تحياتي لك
-
رد: رحلتي الى وتيانغا بنيوزيلندا
اشكر الجميع على مشاركتكم الطيبة
اما بخصوص المعاهد اللى في المنطقه هناك فيه معهد ثاني غير اللى درست فيه اسمة English Voyage Acadamey (EVA) واختصاره ( ايفا )
وهذا موقعهم على النت http://www.e-v-a.co.nz
مناهج المعهد هذا نفس مناهج المعهد اللى درست فيه بس الفرق انه هذا المعهد اول مستوي فيه هو Beginner لكن المعهد اللى درست فيه اول مستوي عندهم elementary عشن كده راح تلاقي كثير من الطلاب اللى في المعهد هذا صغار في السن .
اتقابلنا مره مع طلاب هذا المعهد واتفاجأت ان كل الطلاب من اليابان ماادري ايش السبب بس مافي جنسيه في المعهد غير اليابانيين والمعهد صغير برضوا وفيه نشاطات .
-
رد: رحلتي الى وتيانغا بنيوزيلندا
اخوي العندليب اذا سمحتلي بس كم سؤال
كيف كان مستواك قبل السفر ؟ وكيف صار بعده؟
المهد الى درست فيه اول ماجيتهم حطوك في اي مستوى؟
كيف كنت تتعامل مع العائله والمعهد اذا كانت لغتك مي مره كويسه؟
اخوك
ابن المدينه
-
رد: رحلتي الى وتيانغا بنيوزيلندا
هلا اخوي كم تبعد لوتيانغا عن اوكلاند ان ناوي اروح لاوكلاند وكيف الجو في شهر جون
-
رد: رحلتي الى وتيانغا بنيوزيلندا
اهلا اخوي ابن المدينه اعتقد ان اسئلتك جاوبت عليها في موضوعي يعني لو ترجع تقرأه تلاقي فيه اجوبه عن اسئلتك.
اخوي عبدول وتيانغا تبعد عن اوكلاند 208 كيلو يعني تقريبا المشوار يأخذ ساعتين ونص وتروحلها اما بالباصات لان فيه رحلات يوميه بالباصات من اوكلاند الى كل مناطق كرومنديل ، اما اذا كنت تبغي تروح بالسياره فامسك الطريق اللى يخرجك من مدينه اوكلاند كانك تبغي تروح هاملتون والمناطق الثانيه وفي اول الطريق راح تلاقي مخرج على الشمال وفي لوحه مكتوب عليها كرومنديل ادخل منها وبعد 50 كيلو تقريبا راح تلاقي لوحه مكتوب عليها وتيانغا.
-
رد: رحلتي الى وتيانغا بنيوزيلندا
قصة حلوة ومعلومات مفيدة .
-
رد: رحلتي الى وتيانغا بنيوزيلندا
جميل جدا يعطيك العافيه منطقتها جميله ....يعنى انت ما تمدح المعهد ...يعنى في معاهد ممتازه ....صح
-
رد: رحلتي الى وتيانغا بنيوزيلندا
انت وين جالس فيه عندليب قاعد في قهوه تقصله قصه (يمين شمال فوق تحت) فله والله
-
رد: رحلتي الى وتيانغا بنيوزيلندا
دكرتنا الله يخليك
ايام جميله ...
-
رد: رحلتي الى وتيانغا بنيوزيلندا
اهلا اخواني اعتماد وابوثامر الشمري
اعتماد زي ماكتبت في الاول مافي في المنطقه غير معهد ثاني بس كل اللى فيه يابانيين
ابو ثامر الشمري شكرا على مرورك