برنامج رحلتي الى الاردن سوريا وتركيا
بسم الله الرحمن الرحيم
والصلاة والسلام على اشرف الانبياء والمرسلين
طبعا في البداية احب اركز على الامور اللي يحتاجها المسافر وخصوصا الماليه بدون صور لان الصور والمواقع اتوقع المنتدى والاعضاء الكرام ماقصروا وطبعا الرحلة عائلية
اولا :- التجهيز قبل الرحلة من جوازات واوراق السياره الخ والصرف كان من السعوديه يعني ماصرفت شي من اي صراف لا بسوريا ولا الاردن وصرفت 85000 الف ليره سوري و500 دولار و 192 دينار اردني
المحطه الاولى (السفر والمبيت ليوم في عمان)
بتاريخ 3-8-1431هـ تحركنا ظهرا من تبوك باتجاه منفذ حالة عمار ومنه استمرينا الى معان استراحة لتناول وجبة الغداء وكان الوقت عصرا وبعدها تحركنا باتجاه عمان وخلي بالك للسرعة لاتتجاوز 110 وصلنا قرب العشا مباشرة باتجاه الجامعة الاردنيه كون الموقع تتوفر حلوه الشقق المفروشه وجدنا شقه مناسبه استاجرناها ب 35 دينار وبيتنا
المحطه الثانية(دخول سوريا والاقامه بمضايا ليومين)
صباحا توجهنا باتجاه منفذ الرمثا درعا عن طريق جرش هربا من زحتم منفذ نصيب جابر ولكن صادف يوم عطلة للاخوان الاردنيين وكان في شوي زحمه خلصنا ولله الحمد والحد السوري كانت اجراءاته اسرع بكثير ما طولنا فيه وبعدها مباشره على منطقة مضايا وتقع على طريق الزبداني قبل توصل الزبداني يمين المهم بحثنا عن شقه ووجدنا شقه حلوهوبها مكيف سبلت ب 3000 ليره واخذناها يومين
باليوم الاول ما رحنا بعيد بالزبداني وبلودان ملاهي اطفال اسواق وعشا
اليوم الثاني من بعد العصر طلعنا باتجاه طريق المطار ومرينا على الحدائق والمتزهات والقرية الشاميه حتى قرب العشا ومنها رجعنا للشقه
المحطه الثالثه(وصول مشتى الحلو والاقامه لثلاث ايام)
بعدما افطرنا وعينا من الله خير وضبطنا القهوه وتوجهنا باتجاه مشتى الحلو وصلنا بعد الظهر ودورنا على سكن ورحنا وجينا واستقرينا على شقه كبيره في منطقة الجويخات قبل المشتى مباشره ومو بعيده عنه بس حلوه وجوها ريفي ممتع وهادئ المهم الشقه اخذناها برضو ب 3000 ليره لانها كبيره بالرغم من انها اكبر من الاحتياج بس اختصارا للجهد والوقت والاطفال يجبروك احيانا ولمدة ثلاث ايام المهم بعدها مباشره على ابو محمد قبل الجويخات بشوي اخذنا من عنده ما يسمى( ابو انتل) لمن يجهل التسميه يعني تيس بقيمة 5500 ليره المهم ابو محمد ذبح التيس وام محمد والشغيل يقطعون وقريب منهم خبز التنور شي ثاني يا جماعه خذينا تيسنا و خبزنا ورجعنا للشقه وقمنا باللازم وهذا اليوم كملناه رياحه بالشقه بعد السفر
اليوم الثاني توجهنا الى طرطوس ومباشرة على المرسى اخذنا قارب خاص بالف ليره رحله بحريه لجزيرة ارواد وبعدها رجعنا الى المشتى واليوم التالي كان بالنهار زيارات لمغارة الضوايات وحصن سليمان وجوله بالقرى المجاوره
وبالمسا فيه مطاعم بالبلد ومدينة ملاهي صغيرونه حليله للصغار جلساتها حلوه والاحلى الممشى المطل على الوادي
المحطه الرابعة(وصول كسب والاقامه ليومين)
وبعد ما كملنا اليوم الثالث بالمشتى وبعد الفطور والقهوه توكلنا على الكريم وتوجهنا باتجاه كسب وسلكنا طريق جبلي حتى وصلنا صافيتا ومن بعدها يبدا يتحسن الطريق حتى توصل للطريق الدولي وكملنا حتى اللذقيه واخذنا لفه سريعه على الشاطئ وصولا الى كسب المهم بحثنا عن شقه وجدنا الشقه ب 2000 ليره لليوم واخذناها يومين
مباشره سوينا الغذا وتغدينا وبعدها على السيرك الاوكراني دخولية الشخص 300 ليره وكان عندهم من 8-10 مساء ومن
10-12 وباليوم الثاني طلعنا الظهر على راس البسيط جلسنا على البحر وسبحنا الصغارشوي ورجعنا على الطريق تحصل مطاعم جميله طابعها ريفي واكلهم طيب تغدينا وبعدها رجعنا وكملنا يوم بكسب
المحطه الخامسه(السفر لتركيا)
وبعدهالوقت اخوكم جالس يفكر ويحسبها بمخه تركيا او لبنان لكن قلت فرصه تركيا قريبه خلني اشوف تركيا كاستكشاف مو اكثر المهم افطرنا وظبطنا القهوه والمنفذ قريب واحسن شي فيه محطة البنزين جنبه على طول يعني فلل ولاتفكر تعنبي من تركيا لين ترجع لانها يومين والبنزبن عندهم غالي سعر اللتر ب9 ريال تقريبا المهم معي لاندكروزر فللت التانكيين وتوكت على الله خلصنا الحدود السوريه بكل اريحيه وفعلا كان تعالملهم لطيف والطف من غيرهم وخشينا على الاتراك برضو نفس الشي طلبو منا تامين على السياره ب 4000 ليره سوري
وفيزا 1000 ليره سوري على كل جواز سفر خلصنا وخشينا و مشينا بعد 40 كلم وصلنا على مدينة حربيات بيني وبينكم ما حسيت اني رحت تركيا لسا هماهو اسكشاف كملنا حتى وصلنا اسكندرون تقريبا 170 كلم من كسب ومنها رجعنا 40 كلم على الساحل حتى وصلنا مدينه على البحر اسمها ارسوز دورت فيها فنادق او شاليهات قالو فل ما يمديك طبعا طحت بمشكلة اللغه لكن ربك يسهلها كل ما بلشت لقيت لك واحد يتكلم عربي ومشي معهم شعب حبوب لابعد الحدود فعلا تحسهم الواحد يبي يساعدك باي شي رجعت باتجاه اسكندرون وكل شوي تجي فندق يقول لك مليان حتى وصلت فندق حلو على البحر وفيه خدمات ومرافق حلوه وكان سعره 100 دولار للغرفه المزدوجه هو احنا لقينا فندق نزل البزوره اللي نايم واللي يبي واللي يبي المهم ريحنا شوي وبعدها رحنا على اسكندرون قريبه تمشينافي البلد لفينا يمين يسار يا ولد وين الناس وين العالم المحلات كلها قافله الا كم بقاله المهم اكتشفنا نظام البلد غير عنا يعني من الصبح لين المغرب بعدها خلاص تخف الحركه والاسواق تقفل المهم تمشينا شوي ومرينا على محل بقلاوه وياعيني على البقلاوه ياناس شي ثاني طعم خيال بس الكيلو بمايقارب 80 ريال ورجعنا قالو نبي عشا قلت الشور عندي المهم كان فيه موقع مجاور للفندق بخشات وشبه حديقه على البحر جدعنا فيه ونزلت العزبه وبدينا نجهز المشاوي باقي خوينا ابو انتل حطيته بمطبخ الفندق وشوي معنا تعشينا منه وبراد شاهي على المتوسط يحبه قلبك بعدها رجعنا للفندق واليوم الثاني طلعنا من الظهر وتمشينا واخذنا اغراض ومشتروات وتغدينا بمطعم تحسه عادي من برا بس تذوق اكله تحس انك (تسمع بالمشاوي من اول) بابسط تعبير
رجعنا بعدها للفندق رياحه وسباحه واسترخاء وبالمسا رحنا لمدينة ارسوز كان فيها حركه بالليل وزحمه واسواق شعبيه وزحمة عالم وتعشينا ورجعنا للفندق وباليوم الثاني افطرنا وخساره مافيه قهوه الاتركي المهم تحركنا باتجاه حربيات عرفت انو فيها شلالت قلت خل نزورها المهم رحنا وزرناها وش روعه ووش جمال بلا مبالغه وكان حولها اسواق شعبيه فيها يبيعون هدايا وتذكارات جميله ورخيصه
المحطة السادسة(الوصول لحمص والاقامه ليومين)
وبعدها حركنا على كسب وصلنا كسب وكانت اجراءات الحدود مسهله ولله الحمد دخلنا كسب وتغدينا وعبينا بنزين وطلعنا قرب العصر وبعدها على حمص وصلنا قرب العشا وجلست الف حتى الساعة 11 بالليل ندور سكن ويالله لقينا فندق بعد مرور اكثر من شقه ومزرعه لكن للاسف كان السكن في حمص مشكله واخذنا الفندق ب2200 ليره لليوم غرفه مزدوجه مباشره عشا ونوم مافيك حيل بعد السفر وباليوم الثاني مرينا على اسواق حمص وخصوصا الشعبيه منها كانت جميله وبالنسبة لحمص كانت جميله لولا السكن وجوها لطيف جدا وهواها عليل خلصنا من الاسواق واليوم التالي فطور وقهوه وامسك الخط باتجاه العوده مرورا بدمشق وصولا الى درعا ودخولا الى الاردن ومرورا بعمان ومن ثم الاستراحه للغداء في معان وبعدصلاة العشا تحركنا باتجاه الوطن الحبيب وصلنا ولله الحمد بالسلامه
وبالختام اتمنى ان اكون قد قدمت الفائده لكم احبتي وربما يكون في موضوعي تداخل بين بوابات السفر لكني فضلت ان اعرض تجربتي هنا لانها هي الوجهه
رد: برنامج رحلتي الى الاردن سوريا وتركيا
الحمدلله على السلامه
وتقرير اكثر من رايع ولكن ليتك مكمله بعص الصور من هالسفره
رد: برنامج رحلتي الى الاردن سوريا وتركيا
يعطيك العافية ومشكور على التقرير الرائع
رد: برنامج رحلتي الى الاردن سوريا وتركيا
الحمدالله على السلامه
فين الصوراخوي
رد: برنامج رحلتي الى الاردن سوريا وتركيا
بارك الله فيك اخوي ما قصررت
انا مع الاعضاء لو تكرمت علينا بصور ترى متعت التقارير بصور خاصة من الاعضاء
تحياتي
رد: برنامج رحلتي الى الاردن سوريا وتركيا
بسم الله وعلى بركة الله نلبي رغبة الاخوه ونقوم بتنزيل ما تيسر من صور لهذه الرحله ونشكر الجميع
في البدايه صور منوعه من المحطة الاولى مضايا وزيارة القرية الشاميه
المحطة الثانيه
هذي جزيرة ارواد طبعا لافيها سيارات ولا يحزنون ريح راسك من التفحيط والدوشه
رد: برنامج رحلتي الى الاردن سوريا وتركيا
الله يعطيك العافية
التقرير والصور شئ جميل
..................تحياتي
