-
مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
https://www.otlaat.com/arabtravelers...e48Momayaz.gif
بسم الله الرحمن الرحيم
والصلاة والسلام على اشرف الانبياء والمرسلين نبينا محمد وعلى اله وصحبه اجمعين....
في البدايه احب اشكر القائمين على منتدى العرب المسافرون على مجهودهم الرائع في سبيل خدمةالمسافرين....
وشكر خاص للرائع دوراك :smile105: واللي بفضله اتخذت قراري بالسفر لجنوب افريقيا.
الجزء الاول
طبعا مع بداية الصيف وانا محتار وين اسافر....لين جاني اقتراح من صديق وهذا الاقتراح كان (( جنوب افريقيا)) طبعا انا كانت معلوماتي قليله عن جنوب افريقيا.. كل اللي اعرفه :
- نيلسون مانديلا اللي هو انا :D
- استضافة كاس العالم 2010
- كانت مستعمرة بريطانيه
- وجود مواطنين بيض من اصل اوروبي
هذا اللي كنت اعرفه فقط ...فلما قال لي الاقتراح قلت انا مايمنع نروح النت ونسأل عن الديرة....
طبعا لو انتوا مكاني وحبيتوا تعرفوا عن الديرة ...وش اول موقع على النت يخطر في بالكم؟؟؟
صح ادري كلكم شطار و 100% :D
دخلت على منتدى العرب المسافرون بوابة الدول الافريقيه
اول موضوع قريته كان موضوع دوراك وبعده نزلت تقريره... طبعا بعد ماخلصت من القراءه ....
كنت متخذ القرار النهائي واللي مافيه رجعه... اني رايح حتى لو سباحه :surf
طبعا كنا احنا اثنين اللي بنروح فيه اثنين عزموا على اخر رمق.... وصرنا اربعه...
المهم انا رحت حجزت طيران على الاماراتيه حجز مبدأي ... وانا اخترت هذا الطيران لاني كنت مجربه العام الماضي على اوروبا .... وبصراحه جدا ممتع السفر على الخطوط الاماراتيه...يكفيك كل راكب له شاشه وفيها اغلب الافلام العالميه والعربيه الجديده والقديمه وغيره من القنوات.... وانا من متابعي الافلام... هذا بالاضافه الى ان انتظارك لو فيه انتظار طويل بيكون في مطار دبي ... مطار غاية في الروعه والتطور..
كان قيمة التذكرة ((4036)) ريال.. وخط سيرها كالاتي:
48 الدمام دبي الساعه 11,15 مساء بتوقيت السعوديه
58 دبي جوهانسبرغ الساعه 4,10 فجرا بتوقيت الامارات
208 جوهانسبرغ دبي الساعه 2,10 ظهرا بتوقيت جنوب افريقيا
218 دبي الدمام الساعه 4,30 عصرا بتوقيت دبي
قدمت على الفيزا من مكتب الطيار في الخبر... والطيار اللي في الخبر على فكرة موقف استخراج الفيز لكن انا كنت اعرف بعض الموظفين هناك لانهم كانوا مرتبين لسفرتي العام الماضي فقالوا خلاص بنرسلها لمكتبنا في الرياض ويخلصوها... طبعا احنا اثنين اللي قدمنا على الفيزا قبل الرحله ب8 ايام تقريبا....
الثنين الللي عزموا على اخر رمق ارسلوهم على يوم الاحداو السبت ماي فاكر بالضبط.... والجمعه كان موعد سفرنا.... وطبعا اي تأخير راح تصير في مشاكل لان الكل كانت اجازاتهم محدوده بعدد ايام السفرة وكانوا مقدمين عليها وجت الموافقه خلاص....
المهم رحت للطيار يوم الثلاثاء قلت لهم وش صار على الجوازات قالوا والله ماندري :eek: .. شلون يعني ماباقي الا بكرة الاربعاء وبعدها يكون عطله في السفارة واذا ماخلص بكره يعني راح يخترب جدول الرحله والاجازات.....
قلت تدري مالك الا تروح الرياض وتشوف وش الوضع... والله وطلعت مع اثنين من ربعي الساعه 3 الفجر وكنا مواصلين.... المهم وصلنا الرياض ..ورحنا على مكتب الطيار طبعا المكتب هناك 24 ساعه مايسكر المهم سألت عن مكتب التأشيرات قالوا الساعه 8 يداومون...قلنا اوكي باقي ساعه نروح نفطر وناخذ جوله على ربوع الرياض :biggrin: ...
على فكرة انا رحت الرياض وكنت معتقد 100% ان جوازي انا وخويي الثاني خالصين بس باقي الثنين اللي رسلوهم متأخرين...رجعنا لهم على الساعه 8 ودخلنا على المكتب ... سلمنا عليهم ...قلنا لهم في جوازات مرسوله لكم من الشرقيه لسفارة جنوب افريقيا وش صار عليها... قام الموظف يدور ويدور لين في الاخير طلع الجوازات....وهنا كانت الصدمه :eek:
ماارسلوا ولا جواز الى السفارة...أنا قلت في نفسي راحت عليك جنوب افريقيا ياولد ...طبعا قعدت اهيء روحي لرطوبة الدمام:( .... ماعلينا.. دخلنا على المسؤول عن قسم التأشيرات وكان سوداني.. قلنا له احنا بنسافر يوم الجمعه وراسلين الجوازات من فترة... الزبده الجوازات يمديها تخلص اليوم والا لا...
قال دقيقه بتصل على واحد سوداني يشتغل في السفارة وبسأله....اتصل عليه وكانت المفاجأه الساره :8888: قال ايه نخلصها لهم اليوم... والله رتبنا الاوراق وطلعنا مع المندوب الى السفاره... و دخلناهم ...قال تعالوا على الساعه 3 او 4 واستلموهم من المكتب... وعدت سالفة الفيزا على خير ولله الحمد... وبعد مااستلمنا الجوازات رحت ودفعت فلوس حجز الطيران... ورجعنا الى ديارنا ولله الحمد سالمين لانه صار علينا بنشر واحنا نسوق 160 وربك سترها...
بالنسبه لحجوزات الفنادق و ترتيب خط سير الرحله في جنوب افريقيا....
طبعا انا رتبت الرحله كالتالي : جوهانسبرغ (1) .. سن سيتي (1) .. كيب تاون (6) .. وايلدرنس (2) .. كيب تاون (6)
هذا كان اول ترتيب للرحله... وبالنسبه للفنادق اانا كنت بسكن الفنادق اللي ذكرها دوراك في تقريره... بس كان عندي مشكله...ماني عارف كم شخص بيروح معاي... فأجلت الحجز الى وقت لاحق...
بالنسبه لحجز الطيران الداخلي ...انا دخلت على موقع nation wide وشفت اسعارهم تقريبا كانت التذكره 1200 راند ماني فاكر بالضبط... قلت تدري خلني اتصل عليهم واشوف يمكن الاقي ارخص... والله اتصلت عليهم وتقريبا التذكره تطلع ب 1900 راند ... المهم اني اجلت موضوع التذكره الداخليه...
كل هذا الترتيب اللي فوق للرحله والسكن والحجز.... قبل مااتصل على الخبير دوراااااك...
قررت اتصل على دوراك... ارسلت له رساله وماقصر بسرعه اتصل علي.... حكيت له بالحكايه كلها... طبعا يوم اكلمه كنت خلاص عرفت مين اللي بيروح معاي....
دار بينا كلام طويل والصراحه كلامه اختصر علي اشياء واجد كنت شايل همها ....
فبعد كلامي معاه تغير تخطيط الرحله كالتالي :
كيب تاون(7) .. وايلدرنس (2) .. كيب تاون (3) .. محمية بيلانسبرغ (1) .. سن سيتي (2)..
وبالنسبه للسكن انا كنت افضل شقه تجمعنا اربعتنا افضل من الغرف... فكان اختيار دوراك لي
( ashby manor ) طبعا قررت اني احجز السكن من هناك لكن احتياطا قلت بحجز ليله في فندق
( protea sea point) لكن للاسف كان فل... وقلت على البينينسولا ونفس الشي مالقيت حجز... قلت تدري مالك الا تحجز هناك.. حنا شباب وماعندك اي مشكله لو ننام في الشارع ...
هذا بالنسبه لكيب تاون... وايلدرنس انا قررت اسكن في mis amis وهم قلت بخلي الحجز من هناك...ومحمية بيلانسبيرغ كذلك اجلتها الى هناك...
بالنسبه الى صن سيتي حجزته من النت طبعا على فندق كابانس..لاني رحت بحجز عليه من عند مكتب عبدالله فؤاد وقال لي الغرفه ب 1100 وانا لما دخلت على موقع http://www.cybercapetown.com ولقيته تقريبا ب 800 ريال بالضبط 1405 راند... (( وعلى فكرة اسعار الصن سيتي من هذا الموقع هي بالضبط نفس الاسعار من الفنادق نفسها )) ... لاني شفت منشور بجميع اسعار فنادق الصن سيتي وكانت جميعها مشابهه لنفس الموقع المذكور...
الحين باقي الطيران الداخلي...دوراك نصحني بطيران south africa عن طريق النت وهذا موقعهم http://www.flysaa.com... ووفعلا دخلت على موقعهم وحجزت وكانت التذكرة ب 962 راند للشخص الواحد بالضبط 540 ريال لاني شفت الخصم من كشف حساب الفيزا....
وصولنا لجوهانسبرغ كان الساعه 11 ظهرا وانا حجزت على الساعه 5 العصر طبعا بتاريخ 58 ... طيران جنوب افريقيا تقريبا كل ساعه يمشي رحله الى كيب تاون من الصبح الى الساعه 12 الليل... عموما انا حجزت على 5 لانها اقرب رحله كانت بالسعر الارخص...لأن كل رحله فيها اسعار وكل ماحجزت بدري قدرت تحصل على السعر الارخص....
وكان حجز العوده بتاريخ 178 الساعه 7 الصبح... مدة الرحله من جوهانسبرغ الى كيب تاون ساعتين...
وانت تحجز عن طريق النت من ضمن الخيارات اللي تعبيها نوع الوجبه... طبعا انت تحط moslem ...
وفعلا من خلال رحلتي الذهاب والعوده كان يجيبون لنا الوجبات مغلفه ومذكور فيها اسامينا حتى قبل توزيع الوجبات على باقي المسافرين....
الحين نقدر نقول ان احنا خلاص رتبنا كل شي تقريبا.... ماباقي الا نرتب اغراضنا ونسافر والله حسيت بحماس وانا قاعد اكتب الحين ودي الايام ترجع واعيشها مرة ثانيه... فعلا السفر ممتع في كل شي حتى في تعبه...
انتهى الجزء الاول من التقرير....وانتظرونا في الجزء المقبل.. ان شاء الله بس ما مللناكم بكثر الكلام:biggrin: ...
واذا عندكم اي ملاحظات ...أتمنى انكم ماتبخلون علي بتوجيهاتكم...
تحياتي لكم
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
الاخ ما نديلا
وصفك للجزء الاول خلاني الا احاكم الاخ دوراك و بخليه عميد جنوب افريقيا لاننا لو تمنينا مواضيع عن جنوب افريقيا ما حصلناها بهذي الكثرة و السبب بعد الله للاخ دوراك
عموما لي تجارب رائعة قبل سنين هناك ربما يحين الوقت لذكرها
في انتظار الجزء الثاني اخي
السندباد
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
مشكور أخوي وبانتظار الجزء الثاني ... ولوكبّرت الخط لكان أفضل
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
مانديلا من المعرف مالك ومن الجزء الاول للموضوع يوحي انه الموضوع راح يكون ممتاز
بانتظار الاجزاء القادمه اخى الكريم وبالتوفيق
لا تنسي الصور
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
أخي مانديلا
أسمح لي أهنئك وأهنئ نفسي وأعضاء المنتدى بنزول أول حلقة لأول تقرير شبابي عن جنوب افريقيا
وأشكر لك اطرائي اللي كان زيادة عن اللزوم لأني أشعر اني ما قمت بالواجب معاك. عموما أتكلم عن نفسي وأقول التفصيل عن جنوب افريقيا بالنسبة لي عمره ما يكون ممل فخذ راحتك وفصل ياسيدي زي ماتبغى (ما أدري عن رأي الآخرين) وأهم شيء حماسك ما يخف وتنزل حلقاتك ترف
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
يا هلا وسهلا بالسندباد
وياريت تطربنا بتجاربك عن جنوب افريقيا
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
ما شاء الله
بداية قوية مفصلة ارجوا ان تستمر للنهاية .
بس قهرمن هالمكاتب ما عندها احترام للعميل المفروض يتفق الاعضاء على مقاطعة المكاتب المخلة
بالتزامتها مع العملاء ويشهر بها لان ما فيه حل غير كذا .
سجلني متابع للنهاية ان شاء الله
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
traveler .... الف شكر على مرورك الكريم...وفعلا كلامك سليم عن الاخ دوراك
دهميد.... والله اانا تفاجأت من تنسيق الموضوع..انا كان تنسيقي مختلف...على العموم ان شاء الله نتلافها في الجزء القادم...تحياتي لك
ياخي افهم... ان شاء الله الموضوع يبيض الوجه ويعجبك.. ومن ناحية الصور ابشر بسعدك..بس انت خلك متابع... تحياتي لك
دوراك...ياهلا وغلا فيك.. يعجبني فيك انك متواضع رغم مجهودك الجبار في المنتدى...عموما بالنسبه للتفصيل تراه مفصل وخالص..بس باقي اللمسات الاخيرة.. تحياتي لك
مصعب.... لا تخاف تراك ماشفت شي التفصيل كله في الاجزاء القادمه.. تحياتي لك
على العموم الموضوع تقريبا جاهز...ان شاء الله على اليوم او بكرة بيكون جاهز للطرح...
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
https://www.otlaat.com/arabtravelers...quote_icon.png المشاركة الأصلية كتبت بواسطة مصعب
ما شاء الله
بداية قوية مفصلة ارجوا ان تستمر للنهاية .
بس قهرمن هالمكاتب ما عندها احترام للعميل المفروض يتفق الاعضاء على مقاطعة المكاتب المخلة
بالتزامتها مع العملاء ويشهر بها لان ما فيه حل غير كذا .سجلني متابع للنهاية ان شاء الله
معاك 100% وأبدأ بامكتب الجماز للسفريات في جده ضحك علي وسوالي حجوزات وقال لي انها مؤكدة وما طلعت مؤكدة وغير انه سوالي حجز احد الفنادق غير مطابق لحجز الرحلة الداخلية
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
يعطيك الف عافية أخوي مانديلا على التفاصيل الحلوة
سجلني متابع لك في تقريرك الجميل
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
وصف ممتع جدا ومفصل.. في انتظار الباقي :)
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
سلوم.... اماراتيه.نت
الف شكر على مروركم...وان شاء الله القادم احلى...
تحياتي لكم
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
اليوم الثالث
هذا اليوم كان الجو بعده مغيم وبارد وكان فيه مطر خفيف... قررنا ان احنا ناخذ جولة بالباص السياحي
citysightseeing cape town وهذا الباص يمر على 13 موقع... سعر التذكرة 90 راند..وتاخذها من الباص نفسه... والمواقع اللي يتوقف فيها كالتالي :
1- ferrymanswater front
2- clock towerwater front
3- convention center
4- cape town tourism
5- sa museum
6- sa jewish museum
7- district 6 museum
8- castle
9- gold museum
10- jewel africa
11- cableway table mountain
12- camps bay
13- sea point
طبعا كل محطه يوقف فيها بتحصل لوحه مكتوب فيها مواعيد وصول الباص لهذا المكان..والباص اذا قصيت منه التذكره يعطيك مواعيد الباص في جميع المحطات..
حنا اول ماطلعنا من السكن ركبنا الباصات الصغيره وقلنا له ودنا اي محطه يتوقف فيها الباص..وودانا الى المحطه رقم 8 اللي هي castle ... ركبنا الباص ورحنا على فوق و جلسنا في اخر المقاعد مثل الطلاب المشاغبين :biggrin: رغم ان الجو كان بارد...وكان موجود مرشده سياحيه في الباص تتكلم عن المناطق اللي نمر عليها ... بس مسكينه تأذت منا :biggrin: هي تتكلم واحنا ورا مسوين لنا جو لحالنا ضحك وتصوير... كم مرة قالت لنا اجلسوا ياجماعه بس ماحد حولك ... تحصلها سبت هذاك اليوم :biggrin:
وصلنا الى table mountain بس ماكان فيه زحمه العدد قليل جدا بسبب الجو لانه كان مغيم وبارد ومثل هالاماكن تحتاج الى جو صافي علشان تستمتع فيها... وقف الباص وقال ربع ساعه وبيتحرك.. احنا نزلنا واخذنا كم صورة...
بعض الصور للامكن اللي مرينا جنبها
[size="4"]بعدها نزلنا في الواتر فرونت... تغدينا هناك ورجعنا ركبنا الباص بعدها... واتجهنا الى sa museum طبعا احنا ماكنا نعرف شي عن هالمكان ... بس قلنا يالله ننزل ونشوف... رحنا هناك وكان فيه طلاب طالعين رحله الى هذا المتحف
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
اليوم الخامس
كان الجو مشمس ورائع...فقررنا هذا اليوم نروح الى boulders beach مستعمرة البطاريق.. و الى cape of good hope رأس الرجاء الصالح وتمسى هذيك المنطقه ب cape point ..
جانا سواقنا الخاص تي يو... واتنفقنا معاه ب 500 راند على مااعتقد.. لان هالمنطقتين بعيدتين عن كيب تاون... المهم رحنا اولا الى مستعمرة البطاريق... وكان سعر الدخول ب 20 راند..
صور ل boulders beach
بعدها اتجهنا الى رأس الرجاء الصالح.. ودفعنا على دخول السيارة مع الاشخاص الموجودين فيها تقريبا 190 راند ماني فاكر بالضبط...
وهناك فيه طريقتين للصعود الى رأس الرجاء الصالح اما بالعربه او مشي... احنا قررنا الصعود بالعربه والنزول مشيا.. وسعر العربه اتجاه واحد ب 24 راند...
صور لرأس الرجاء الصالح
بعد ماخلصنا رحنا الى سوق كان على الطريق عبارة محلات صغيرة متلاصقه وكان فيها بعض الماراكات العالميه... بعدها رحنا الى مجمع مااعرف اسمه.. واكلنا في مطعم dodge .. وبصراحه اكلهم حلوووو....
وربعدها رجعنا الى السكن ...
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
بارك الله فيك اخوى مانديلا على التقرير الرائع والصور الاروع
وكلمت مشكور قليله بحقك
استمر اخى مانديلا وحنا متابعين لى تقريرك واسلوبك الشيق والصور الجميله
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
اتعب انا:110:
الجو روعه
والطبيعه خياااااال
بس مااتخيل اروح احسها تخوف:cool:
شايلتها من بالي نهائيا بس التقارير تحسر:110:
وهالصوره لفت انتباهي المحجبات00 مايستنكرون الحجاب@@!يعني مايضايقون المحجبات
https://www.otlaat.com/arabtravelers...Image00504.jpg
ويسلمو خيي على التقرير الرائع:24:
كفيت وفيت
ومتابعين00
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
عوافي يامانديلا على التقرير الحلو
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
https://www.otlaat.com/arabtravelers...quote_icon.png المشاركة الأصلية كتبت بواسطة قلب طفله
اتعب انا:110:
الجو روعه
والطبيعه خياااااال
بس مااتخيل اروح احسها تخوف:cool:
شايلتها من بالي نهائيا بس التقارير تحسر:110:
وهالصوره لفت انتباهي المحجبات00 مايستنكرون الحجاب@@!يعني مايضايقون المحجبات
https://www.otlaat.com/arabtravelers...Image00504.jpg
ويسلمو خيي على التقرير الرائع:24:
كفيت وفيت
ومتابعين00
معليش أتوقع ان السبب وراء خوفك هو أن لكي قلب طفلة ولكن الحقيقة لا تدعو للخوف كما انه ليس هناك استنكار للحجاب واذا كنتي من المتابعين للتقارير عن جنوب افريقيا ستجدين التأكيد على هاتين النقطتين من أكثر من عضو.
وطول ما انتي شايلاها من بالك , طول ما حتتحسري أكثر.
عموما أهلا وسهلا بك في بوابتنا
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
ياخي افهم...سلوم ..دوراك
الله عطيكم العافيه على مروركم...وان شاء الله التقرير عجبكم بس...وانتظروا القادم
قلب طفلة... بالعكس اختي البلد جدا ممتازة للعوايل وامااااان... يعني انتي اذا بعدتي عن جوهانسبرغ فأنتي بخير...بالنسبه لكيب تاون...المدينه سياحيه من الدرجه الاولى وراح تكوني بامان لا تخافي...
اما بالنسبه للحجاب فمافي اي مشكلة بتاتا...حتى انا ششفت ناس يمشون بالنقاب وماكان احد يضايقهم...
تحياتي لكم
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
اليوم السادس
الجو هذا اليوم كان مغيم وماطر وبارد.. فقررنا ان احنا نروح الى tow oceans aquarium الحديقه المائيه.. وهي موجوده في منطقة الواتر فرونت..
كان سعر الدخول ب 65 راند ... والحديقه ممتعه الصراحه وفيها انواع كثيرة من الكائنات البحريه...
صور للحديقه المائيه (( tow oceans aquarium ))
بعدها رحنا مكان جنب الحديقه مغطى وهو عباره عن سوق مثل نظام المعارض... شرينا منه بعض الاغراض...
بعدها رحنا الى clock tower في الواتر فرونت... وهو عبارة عن مجمع.. موجود فيه في الدور الثاني.. مكان للاستعلامات عن كيب تاون.... من هذا المكان تقدر تحجز فنادق وسيارات وكل شي...حتى الرحلات البحريه والسفاري من هناك..مو بس في كيب تاون .. المهم رحنا نسأل عن احسن طريقه الى وايلدرنس... فقالوا لنا فيه باصات والله ماني فاكر السعر ..بس ان مدة الرحله 7 ساعات وتطلع من هنا في وقت متأخر...
واحنا سألنا التكاسي .. ومنهم حسين وقال لنا مبلغ خيالي لانه بيودينا وبيجلس معانا لمدة يومين...
احنا الصراحه المسافه ومدة الرحله خلتنا نكنسل وايلدرنس 7 ساعات رايح و7 ساعات جاي واجد شوي... فقررنا نقضي هاليومين في كيب تاون...
واحنا موجودين هناك...رحنا حجزنا على رحلة اسماك القرش عن طريق شركة
(( white shark projects )) وكان سعر الرحله ب 1000 راند... اتفقنا معاهم على اليوم التاسع ..بس الدفع قالت لنا بيكون هناك يوم الرحله... وهذا موقعهم على النت http://www.whitesharkprojects.co.za
طبعا الرحله تطلع من الصبح الساعه 7.10 الصبح طبعا يمروا عليك الى مكان السكن اللي انت فيه...وبعدها ياخذوك الى منطقة خانس باي gansbaai وتبعد ساعتين .. والرحله تشمل الفطور والغداء..والوجبه راح تكون حلال على حسب طلبك... والرجعه الى السكن بتتكون على الساعه 4,30 العصر..
بعدها رحنا الى المجمع وشفنا لنا فيلم cars ... بصراحه خطير هالفلم :107: ..
وسعر التذكرة ب 38 راند...
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
الله يعطيك العافية
في إنتظار البقية
تحياتي
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
حلو حلو يا عم مانديلا اليوم أحلى من أمس واحنا بانتظار رحلة أسماك القرش نبغى تفصيل وصور لو سمحت
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
انا كنت متوقع بما انه الرحله شبابيه وليست عائليه توقعت انه راح يكون فيها بعض الرحلات المشوقه
مثل رحلت white shark او السفارى
فياليت تعطينا معلومات اكثر عنها
وكل الشكر لك ومتابعين معاك
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
يعطيك العافية مانديلا استمر في إبداعاتك
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
alwanahmed...سلوم
مشكورين على متابعتكم
ياخي افهم...دوراك..
اول شي اشكركم على متابعتكم الدائمه...وبالنسبه للمغامرات لا تستعجلوا عليها.. جايكم في الطريق
تحياتي لكم
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
الله عليك يا مانديلا
تقريرك جداً جداً مميز
أبدعت فعلاً في نقل صوره جيدة جداً عن هذا البلد
والتصوير ممتاز :24: :24: أهنيك على تقريرك مشاء الله
تحياتي لك
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
اليوم السابع
كان الجو جميل... وقررنا الذهاب الى west coast ostrich ranch حديقة النعام... جانا السواق تي يو .. واتفقنا معاه على 350 راند... لان الحديقه بعيده نوعا ما...
والله رحنا واستانسنا اخر وناسه مع النعام... كان سعر الدخول ب 35 راند... طبعا اول ماتدخل يكون معاك مرشد ويشرح لك .. ويخليك تأكل النعام .. واخر شي تركب على النعامه ...
بعها دخلنا محل موجود في نفس المزرعه... واخذنا بعض الشغلات... وبعدين رحنا الى المطعم..
للاسف ان احنا كنا ماكلين قبل مانجي..بس قلنا لازم نجرب لحم النعام... والله طلبنا نوعين من لحم النعام مااذكر اساميهم.. وكان في واحد منا مايبي ياكل..المهم وصل الطلب..ماشفنا خوينا اللي مايبي ماقدر يقاوم :biggrin: ... بس بصراحه كان الاكل خياااااااااااااااااااالي ... وتندمنا على اكلنا قبل مانجي... بس بعد ايش...
رجعنا الى السكن ونزلنا الاغراض اللي عندنا ورحنا الى الواتر فرونت.. كان في بالنا نروح رحلة الغروب وكانت بتمشي بعد شوي..بس واحد قال خلونا نروح الهليكوبتر اليوم..قلنا اوكيه... ورحنا على مكتب الحجز.. وتكلمنا مع الموظف ...قال مافي مجال الحين مافي الا بكرة على الساعه 11 الصبح باخذ اساميكم وبكرة ان شاء الله اوكي....
طبعا لا احنا اللي رحنا رحله الغروب ولا ركبنا الهليكوبتر...
بعدها رحنا الى بوابة نيلسون مانديلا في نفس الواتر فرونت.. علشان بنحجز على رحلة روبن ايلند على يوم ثاني... بقينا نحجز على رحلات الصبح بس للاسف كانوا محجوزين الى بعد اسبوع...فحجزنا على الساعه 1 الظهر.. وكان سعر التذكرة 150 راند...
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
صعب المنال...
مشكوووور اخوي على مرورك ...وعلى كلامك الجميل..
تحياتي لك
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
مانديلا ...يعطيك العافية انت والشباب............
الحقيقة بيضتو وجيهنا..........نادر ماتلقى شباب ويستفيدون من السفر بفوائده الخمسة........واستغلال كل الوقت...........اشكرك بقوة
عندي كم سؤال ممكن والا لا؟؟؟ اوكيه مادامك قلت اوكيه..اوكيه
الشقة ماتكلمت كتير عنها:1- يعني كم نجمة ممكن تعطيها 5 او 4 نجوم
واذا في صور للشقة من الداخل ياليت تحطها.؟
واذا تصلح لعائلة والا لا
واذا تنصح بشقق اخرى مريت عليها
2-كيف الخطوط الافريقية ارخص من البريطانية والا في رحلات عليها خصم؟؟؟؟؟؟؟؟؟؟؟؟؟؟؟؟
3- بكم عملك الطيار الفيزا وليش ماعملتها في الفيفا خاصة الفيفا مشهور عندنا في الشرقية
يجي السؤااااااااااال الخطييييييييييييييييييير اللي بيزعل دوراك والشباب اللي راحو
وهو ان مطعم anat تقول مو حلووووووووووووو
يعطيك العافية مرة ثانية
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
nice voic ... اول شي اشكرك على مرورك وكلامك الجميل...
ثاني شي.. انا حاضر لأي استفسار وتامر امر اخوي...
بالنسبه للسؤال الاول بخصوص السكن... انا اعطي السكن 3نجمات ونص ... والصور للاسف والله مااخذنا صور لها من الداخل...
طبعا السكن اللي اخذناه عبارة عن غرفتين نوم والله يعزك دورتين مياه ومطبخ وصاله... وغرفة النوم غرفه كبيرة فيها 4 اسرة...وغرفه اصغر فيها سرير كبير...
والشقه جدا نظيفه وهناك عاملات يجون كل يوم وينظفوها... وموقعها جدا ممتاز في منطقة sea point وعلى شارع حيوي فيه جميع الخدمات..والمنطقه امان ..
وانا انصح فيها للعوايل...هذا غير انها اقتصاديه ...
وبالنسبه للشقق الاخرى...والله ماعندي اي فكرة..
بالنسبه للخطوط الانسب...انا من خلال بحثي على النت..وبعد ماسألت دوراك لقيت ان خطوط جنوب افريقيا هي الارخص تقريبا...واانا حتى لما رحت المطار سألت هناك .. والصراحه من خلال تجربتي لهم..مالقيت اي شي ضايقني منهم...
اما الخطوط البريطانيه على مااعتقد انها الاغلى حاليا...
الطيار عمل لي الفيزا ب 400 ريال... مع العلم ان سعر الفيزا من السفارة تغير كان سابقا ب 180 اما حاليا ب 220 ريال...
وانا استخرجتها من الطيار لاني اعرف شخص هناك وهو نفسه اللي عمل لي الفيزا الى باريس العام الماضي.... مع العلم انه قال لي استخرجها من مكتب فيفا..بس انا ماوافقت..
ومكتب فيفا مثل ماقلت يعتبر حاليا الاشهر في المنطقه الشرقيه...
ااما مطعم anat ...انا الصراحه جربته في مطار جوهانسبرغ..جدا كان تعبان...انا ماادري بالنسبه لفروعه في كيب تاون يمكن تكون افضل...
اتمنى اني افدتك من خلال اجابتي....واذا في اي شي مو واضح او اي استفسار ثاني تراني حاضر...
تحياتي لك
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
اليوم الثاني عشر
جلسنااااااا من الفجر وكانت اغراضنا كلها جاهزة..جانا السواق وانطلقنا الى المطار....
وصلنا بالسلامه الى مطار جوهانسبرغ... واحنا ننتظر العفش...قالوا لي ربعي..انت روح اطلع وشوف اسعار التكاسي بكم قبل مانروح مع اللي اتفقنا معاها...والله طلعت قعدت ادور على اسمي ومالقيته..قلت وينها هذي ...قلت زين اجل خلني اسأل...والله سألت كم واحد وحصلت اخر سعر ب 800 راند انا الصراحه ولعت في هذيك اللي كلمتها علشان حجز السياره تقول صدقني ماراح تلاقي اقل من هالسعر وانا حصلت بفرق 400 راند..وعنده سيارة مرسيديس..بس المشكله اغراضنا واجد وماتشيل سيارته...قال مو مشكله انا عندي مقطوره اقدر اشبكها ورا ... قلت اوكي...طلعوا ربعي وهذيك مابعد تبين...والله قلنا زين انها مابينت...واتفقنا مع السواق ومشينا.... وطبعا اتفقنا معاه على انه يرجع لنا بعد 3 ايام ويرجعنا بنفس السعر بس قلنا له بنتصل عليك قبل علشان نأكد عليك..
اسم السواق كولن ورقمه 0823608558
وصلنا الى المحميه بعد 3 ساعات مشوار...وقابلت هذيك اللي كنت حاجز معاها بالتلفون...قالت ليش مشيتوا وهذيك تنتظر...قلت لها والله ماشفنها وزين ان احنا ماشفناها..حصلنا واحد بسعر اقل ...
المهم اخذنا مفتاح السكن وقبل مانروح...سألنا عن رحلات السفاري قالوا فيه رحلتين في اليوم الساعه 6 الصبح و4 العصر... حجزنا على الساعه 4 العصر...كان سعر التذكرة ب 200 راند..
رحنا للسكن وبصراحه السكن تصميمه جدا رائع.... جلسنا وريحنا الى موعد السفاري...
والله وطلعنا رحلة السفاري وكانت مدتها ساعتين ونص... كان الجو هذاك اليوم حلو مافيه بروده.. وكنا لابسين خفايف... بس الصراحه انكبنا..لأان الجو بعدين صار ثلللللللللللللللللللللللللللللللللللللللللللللج والله انا خلاص ماني قادر اتحمل البروده :36_1_26: ...زين الله رحمنا كان فيه بطانيات في السياره...
عموما رحلة السفاري نوعا ما حلوه..بس يعني مو مثل ماكنت انا متوقعها...
بعدها رجعنا وتعشينا في المطعم الوحيد الموجود هناك .... ورجعنا للسكن...
صور للسفاري والمحميه
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
اليوم الخامس عشر
جانا السواق على الساعه 7,30 الصبح وكانت رحلتنا الساعه 2,15 الظهر...
وصلنا المطار على الساعه 10 الصبح... رحنا اول شي الى مكان استرداد الضرايب شيكوا على الفواتير...طبعا الفاتورة اللي يكون فيها مبلغ الضريبه كبير يسألوا عن اغراضها..ختموا على الفواتير... وقالوا لنا خلاص روحوا داخل وخذوا المبلغ...
رحنا حطينا العفش طلع وزن زايد 15 كيلو تقريبا..قال الموظف على كل كيلو 100 راند..قلنا له غالي ... طبعا ماعجبنا الوضع... والله شرينا شنطه واخذنا بعض الاغراض وحطيناها فيها..ومشى الحال...
بعدها ختمنا الجوازات ...ورحنا الى مكتب الضرايب... وعطونا شيك تصرفه من بنك موجود في نفس المبنى...
حان وقت الطائره...الله يعينا خلاص راجعين للحر..
وصلنا بالسلامه الى دبي حوالي الساعه 12 في الليل وكانت رحلتنا يوم ثاني الساعه 4 العصر الى الدمام... استأجرنا سيارة ورحنا داخل دبي اجرنا فندق...
رجعنا للمطار على الساعه 2,30 الظهر... مشى الوقت وجات الساعه 4 وركبنا الطياره راجعين الى ديارنا..
وصلنا بالسلامه الساعه 5 الدمام...
وبذلك انتهت رحلتنا :8888:
على فكرة.. ابيكم تتوقعون كم كلفت الرحله على الشخص الواحد ... طبعا شامله كل شي من تذاكر وسكن وتنقل واماكن سياحيه واكل..كل شي ماعدى المشتريات الخاصه...
واللي بيقول السعر الصحيح له سفرة على حسابي :d خخخخخخ...لك محاولة واحده بس ...
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
اخي الكريم مانديلا
:x1: :x1: :x1:
يعطيك الف عافية على التقرير و الصور الرائعة
بصراحة و بدون مجاملة، هذا افضل و اشمل تقرير مصور عن جنوب افريقيا، و لا يهونون بقية الاخوة في هذه البوابة
ما شاء الله عليك ابدعت في السرد و الترتيب و التفاصيل و انتقاء الصور الواضحة و المعبرة :24:
كفيت و وفيت عن جنوب افريقيا و ما قصرت
[line]
هذه الصورة استوقفتني كثيرا
https://www.otlaat.com/arabtravelers...icture_408.jpg
على اليمين المحيط الاطلسي و على اليسار المحيط الهندي
تذكرت رحلة ساحلية في استراليا (Great Ocean Road ) بالقرب من مدينة ملبورن و وصلنا الى نقطة تعتبر اقصى الجنوب الاسترالي و هي نقطة الالتقاء بين المحيط الهندي و المحيط الهادي
جميل ان يزور السائح اماكن لها اهمية تاريخيه او جغرافية فهي التي تبقى في الذاكرة
تحية عطرة اخي مانديلا
و مرحبا بك في منتدى العرب المسافرون
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
اخى مانديلا
يعجز اللسان عن شكرك الصراحه كفيت ووفيت بتقريرك الممتاز الاول بالمنتدى الى استفدت منه كثير
وان شاء الله نشوفلك مواضيع مميزه وجديده بالمستقبل مثل هالتقرير هذا وراح اكون ان شاء الله من المتابعين لك
وانا عندى بعض الاستفسارات وسوف اطرحها بوقت اخر
واخيرا جزاك الله خير و بارك الله فيك وتحياتى لك اخى العزيز
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
الأخ مانديلا
دعني اتقدم بالشكر اولا الى الأخ فتى الشرقية الذي نقل رابط موضوعك الى موضوع الخ نسيم نجد عن رحلات عام 2006 .
ومن ثم أشكرك على هذا التقرير الوافي والشافي لغليل كل من يبحث عن معلومة صغيرة كانت او كبيرة لجنوب افريقيا.
والحق يقال انك بذلت مجهودا كبيراً حين انزلته خلال ايام قليلة في حين نُصِر نحن القدامى على حلقة كل اسبوع (بالكثير:109: )
الصورة التالية بالأضافة الى الصورة التي نقلها الاخ فتى الشرقية ÷ما صورتين اثارتا احاسيس مختلفة .ففي صورة راس الرجاء الصالح لا بد ان اي واحد قد يشعر انه بلغ ما لم يبلغه احد .مكانا كثيرا ما سمعنا به ايام الدراسة وكانه في عالم غير عالمنا .
https://www.otlaat.com/arabtravelers...Image00430.jpg
أمّا هذه الصورة فقد ذكرتني بصورة مشابهة في صحراء سيناء وضعتها في موضوعي "سيناء على السيكل".
خلفية الجبال تبعث الاحساس بالسمو وفقدان الصلة بالعالم من تحتك!!!
الأخ دوراك: وخزة ضمير تؤنبني كلما اؤجل قراءة احد مواضيعك.
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
شكرا على اموضوع الرائع جداااا...
بس عندي سؤال هل صحيح ان رحلة الكهوف تبعد خمس ساعات عن كيب تاون؟؟؟
لاني سمعت ان رحلة الكهوف + حديقة النعام تبعد 200 كلم عن كيب تاون !! يعني ساعتين
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
فتى الشرقيه...
الصراحه اخجلتني بكلامك ... وبالنسبه لرأس الرجاء الصالح..فعلا هذا المكان يختلف عن باقي الاماكن السياحيه من حيث المعنى والاهميه..
الف شكر اخي على مرورك الكريم..
ياخي افهم...انا لي لك شكر خاص ...ألصراحه من بداية طرح موضوعي وانت من المتابعين والداعمين لي.... وبالنسبه لاستفساراتك انا حاضر لأي استفسار كان... تحياتي لك
نصراويه... مشكوووورة اختي على مرورك وكلامك الجميل.. تحياتي لك
حسين الشين... cango caves تبعد 5 ساعات عن كيب تاون...
الف شكر على مرورك...
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
:113: :113: :113:
استمتعنا معكم بالرحلة الله يعطيكم العافية .
تحياتي الحارة لمانديلا وربعه .
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
ما شاء الله عليك
رحلة ممتعة ومفصلة أما بالنسبة لكهوف كانغو من الأفضل زيارتها وانت في وبلدرنس أو في طريقك منها أو اليها أو زيارتها في نفس يوم زيارة مزرعة النعام.
ولا تحزن على رحلة القروش فالجايات أكثر من الرايحات عموما لسه باقي أشياء كثيرة ما شفتها.
-
رد: مانديلا يرحب بكم في رحلته الى جنوب افريقيا لمدة يوم تقرير مفصل وشامل بالصور
https://www.otlaat.com/arabtravelers...quote_icon.png المشاركة الأصلية كتبت بواسطة مانديلا
على فكرة.. ابيكم تتوقعون كم كلفت الرحله على الشخص الواحد ... طبعا شامله كل شي من تذاكر وسكن وتنقل واماكن سياحيه واكل..كل شي ماعدى المشتريات الخاصه...
واللي بيقول السعر الصحيح له سفرة على حسابي :d خخخخخخ...لك محاولة واحده بس ...
توني انتبه للعرض المغري هذا :109:
انا اتوقع تكلفة الرحلة 11000 ريال للشخص تزيد او تنقص الف ريال
ها... بشر... اخذت الجائزة :24: