زيارتي للكاميرون

السلام عليكم ورحمة الله وبركاته

افردت موضوع خاص عن هذه الزياره لطلب حبيبنا الشاب واعتذر عن التأخير بكتابة الموضوع

عام 2000 قررت زيارة الكاميرون لبعض الاعمال ورحت للسفاره بالرياض وطلعت فيزه منهم بميه وخمسين

ريال +صورتين وخطاب تعريف من العمل

وحجزت على الخطوط السعوديه الى كينيا ومن كينيا على الخطوط الكينيه الى الكاميرون وصلت لكينيا بعد العصر

وانتظرت بالمطار حوالي اربع ساعات مطار مقرف جدا وضيق جدا وسرقو جوالي حسبي الله عليهم

الرحله من جده الى نيروبي حوالي اربع ساعات ونص ومن نيروبي الى دوالا تقريبا اربع ساعات

وصلت الى مطار دوالا العاصمة الاقتصاديه للبلاد وكنت منسق مع واحد يستقبلني بالمطار

المهم اول ما نزلت من الطياره وجيت الجوازات قعدت تفلسف علي الموظفة بالفرنسي واخوكم بالله

ما يدري وش تقول وبعد ااخذ ورد وفزعت اللي جنبها فهمت انهم يطلبون شهاده صحيه ؟؟؟؟؟

والا ارجع لديرتي مستحيل اخش البلد الا بها الشهاده وبعد اخذ ورد الا الشخص اللي ينتظرني

يصوت لي بالعربي يالله كنه نازل من السما تعال افزع جا عند الكاونتر وحاول يقنعهم ورفضوا

قال تدري بخير ابا اعطيهم 100 فرنك ونخلص وعطاهم وتساوينص ريال ما درينا الا بصوت دوي هائل

الا وهو الختم على الجواز وابتسامه تسد النفس من ذاك الوجه المهم دخلنا وركبنا السياره قلت له

لا توقف الا عند السفاره ومشينا حوالي 300 كم ووصلنا اخر الليل الى العاصمه ياوندي قلت فندق

قال ما فيه شي زين لكن فيه بيت اخ مسلم وثقه نبي نروح له قلت قدام رحنا دقينا عليه الباب

فتح واستقبلنا استقبال حار الله يجزاه عنا خير وفرح يوم درا اني من السعوديه بغى يغمى عليه

وفتح لي غرفة نوم عنده للضيوف وهات يانوم ما دريت الا ذاك الصوت اللي يدخل مع الشباك

لان جو العاصمه بارد واحلى من دوالا واذا صوت اذان الفجر صحيح نمت تقريبا ساعتين

لكن تسوى نوم اسبوع تحت المكيف لطبيعة الجو ونقاوة الهواء الهم توضيت وطلعت برا ادور المسجد

ما اشوف مناره او شيء يدل على المسجد واذا صاحب البيت يصوت لي ويشر على غرفه

ورحت واذا هي المسجد صلينا ورجعت نمت حوالي ساعتين زياده وصحينا الا صاحب البيت

مجهز فطور وعازم جيرانه وبعد الفطور جيت احاسبه ورفض وزعل ما قصر ابن الحلال

اكرمنا واحرجنا وطلعنا للسفاره ودخلت عندهم تفاجاو واستقبلوني استقبال حار الله يجزاهم خير

وما قصرو بشي ولزمو بالعزيمه لكن المكان اللي بنروح له بعيد المهم خلصنا امورنا من السفاره ومشينا باتجاه

مدينه ثانيه نسيت اسمها المهم الطريق اخضر تمر بغابات واحراش خياليه وعلىالطرق عندهم لوحات تحذيريه

عن الابقار مثل اللي عندنا عن الجمال عندهم الابقار باعداد خياليه وصلنا للمدينه هذي الظاهر اسمها فمبان

وتبعد عن العاصمه 300 كم تقريبا مدينه صغيره وحليوه فيها فندق ** لكن سكنا في بيت وصرت اطلع اخلص

بعض الاعمال واتمشى بالبد على رجولي وسكان هالمدينه مسلمين بنسبة حوالي 90% وزرنا ملك هالمنطقه

واستقبلنا بالمجلس الخاص واخذت معه صور تذكاريه بس للاسف اللي عنده ما عرف يصورنا فطلعت الصور

مايله ورايحه فيها وطلعنا لزيارة منطقه اخرى والله نسيت اسمها ويوم جينا الملك ضيفنا بسفن اب وعصير

واصر الا يفرجنا على مملكته بسيارته الخاصه وكانت هوندا موديل 80 تقريبا وقعدنا ندفها انا وخدامه عشان

تشتغل واخذنا فره ببملكته وهي عباره عن احراش وغابات كثيره وفيها كم كوخ وكم بيت طين .

وقلطنا عنده ببيته وورانا جماجم وجلود اسود صادوها اجداده وعاج افيال باحجام كبيره وبعدها ودعناه ومشينا

وبنص الطريق تعطلت سيارتنا جمب قريه واول ما وقفنا ونزلنا من السياره تجمعو حوالينا ومستغربين شكلي

وكان الاديتر يهرب مويه وقال لهم صاحبنا نبغى مويه شوي والا عيالهم يركضون للنهر يعبون مويه

ويجيوبنها لنا عند السياره بسطولهم عبينا الاديتر واخذنا معنا علبة احتياط .

مقتطفات :

الامان لك عليه

60 % من الشعب مسلمين ولله الحمد

السحر والشعوذه حدث ولا حرج

جهود الندوه العالميه وللجان الخيريه لاحظتها من بناء المساجد وحفر الابار وقريت لوحاتهم

الشعب قبلي يعني تجي لمنطقه يقولك هذولا قبيلة كذا وهذي حدودهم ومرينا كذا ملك وضيفونا

الزراعه غير طبيعيه مزارع الموز مد نظرك شي خيالي اشجار الكاكاو مد نظرك الاناناس بالهبل

اذكر اشتريت حبتين بطيخ وحبتين شمام وخمس قطع اناناس وموز وافندي وضاحكين علي بخمسه ريال

الانهار كثيره

الشعب تحس انه كسول ويضحكون واجد

التنصير عندهم واجد

هذا اللي اسعفتني به الذاكره
كانت الرحله عام 2000

ادعو اخواني بدعم المؤسسات الخيريه مثل لجنة مسلمي افريقيا والندوه العالميه ومؤسسة الحرمين

ولو باستقطاع شهري بمبلغ بسيط ما تحس بنقصه من حسابك ويفيدك في يوم لاينفع فيه مال ولابنون


اعتذر مره ثانيه على التاخر بالموضوع لاني ادور الصور وما حصلت الا وحده رايح اضيفها ان شاء الله

بعد ما اصلح السكانر والباقي مسجله بشريط فيديو .

تسلم اخوي مصعب

سرد رائع ومواقف ولا اروع .

اشكر لك دعوتك الخيره في الاستقطاع الشهري الذي له ثمار طيبه ...تحياتي لك

الصراحة مثل هذي الديار تخوف

لكن اكيد بتكون لها ذكرى ما تنسي

والله يكون بعون المسلمين بكل مكان

السلام عليكم ورحمة الله وبركاته

اخوي AlSahab شكرا لمرورك الكريم جزاك الله خير

سعودي مفلس صحيح تخوف لكن اذا صار معك احد يعرف الديره تتيسر الامور باذن الله شكرا لمرورك

الله يجزاك خير أخوي على هذا السرد الرائع

حسيت إني أنا اللي مسافر(خشيت جو مع السالفة )

بس أكثر شي عاجبني قصة هالملوك

شكرا لك أخوي على هذه الإضافة للمنتدى

السلام عليكم ورحمة الله وبركاته

حياك الله اخوي الشاب ووالله اني منحرج منك لعدم انزال الصور والتاخر بالموضوع لكن العذر من الله ثم منك وانا

اخوك .

عالم الملوك عندهم عالم عجيب وقبائلهم كثيرة ، وان الله يسر لي روحه ثانيه بالمستقبل اوعدكم باحلى الصور

ماشاء الله لك نية تروح مرة ثانية للكاميرون

هلا بك والله

حسب الظروف والنيه موجوده ان شاء الله