في ليلة واحدة نمبر ؟؟؟؟؟؟؟؟؟؟؟

وين وقفنا.. الا والله يوم خلصنا من البيت طلعنا على جاموستنا وطق طق طق طق ومعنا واحد يعوي ويعزف على (عود فلبيني) قالوا لنا حولوا هذا مكان الاكل. الصراحة كنت جويعان ولاحقن(فيني) تعب وانا افر (مشي سريع اقرب للهرولة) من عندهم مابين عيوني الا السميكات والرز.. والحق يقال سفرتهم تقود وجيههم لو بس سالمة من لحم المروح الله يعزكم. والله واضررررب ياما تنفخت شواكلي(جانبي الخصر) قلت يالله ياكبيان نبي نصور,وبالي ماهداني وقفت شزر(بعسر) على بالي ابي اخذ لقطة خيالية وانا الله يجيركم اللبط (اسقط) على هامتي( مؤخرة الرأس) :110: وعندك يادم.. وعندك يا دم.. الا دماني صبيب والكشخة ولة وغديت(صرت) مثل شوشة عبسي. ويفزعون الكبيانات بالفوط والشاش ويعصبون رأسي وكأن لسان حالهم يقول ( يا مل البلأ ضاقت الا تأقف على هالحافة) المهم خذاني راعي (صاحب) التكسي لسيارة وقال ار يو اوكي سير قلت لو ( يا ليتنا من فليا سالمينا ويليتنا من مانيلا ما تعدينا). الوكاد جينا فندقي يمار وش جيت مشيت منهم (سير) ونكست(رجعت) لهم( طير) :mf_depres .... بس طلع راعي التاكسي سنافي تصدقون ما خذا لو انه بيسو.
اليوم الثالث تنعوشت وفتحت عيوني لأن الله فكني من الشمم (الالتهاب) لأن العجوز الله يطول بعمرها زبنتلي مرة وعنزروة, والله و اكلم على أم مايكل واقول لها السالفة وقالت (أنو بيان) بس ماقلت اني اصور قلت زلقت بالغضرم (طحلب). قالت وانا أم مايكل الا انسيك هالي صار يالله يالله ولم (جهز) عفشك لبروكاي الي لامنك خبطت تخبط على رمل (ولاهو لوجيهكم) قلت يا لله وانا طول الله عمركم امر على ال اس ام وشورتين ونظارة شمسية لانها تكسرة بالخبطة ولوشن واقي للشمس (قل اخس يا راغب علامه) وانكس (ارجع) للفندق واقعد اتقوس شورتاتي الا لا اله الا الله ما ودك العدو يشوفني( مو حسد لانه يبي يضحك الين يفطس) وعندك يانوم لاما جاء الصبح واقوم اصلي وانحدر (انزل) وافطر الا هذي أم مايكل يوم جت,, ويا هلا ياهلاا بأم مايكل وش تشربين قالت خل عنك المراجل :112: وقم للمطار خلنا نمكن الرحلة قلت وبراسك.. واكفخ على طيران سيبو,(عند الكونتر قلت ابي وندو قالوا اذا تصبر شوي نحطك قلت اجل خلاص بس عطوني البوردنج ويوم طلعت الا الي بالطيارة مايجون 15 راكب!!!!!!!! الظاهر لو قايل ابي اصير طيار قالوا لي تفضل سير)... المهم وحنا بالجو كنت اويق(اناظر) للجزر والبحر الا وسمعتهم يقولون من معه واقي لشمس الا جتك يامهنا على ماتمنى قلت انا وياليتني سلمت من هالسالفة نفلت كل الشنطة وطلعت الفضايح ( من قدي ابي اخذ جايزة) المهم عطوني حافظة مياه الظاهر ان العشر منها بريال. والله ونوصل مطار كاليبو الا هكا الوجه الودر(قبيح) ينتظرن قال انت بعد حيي قلت لا...الا الرجال متوكد قال لوكو لوكو كا تلاقا. مشينا على هاكا الفان الاما جينا الشاطي وخذوني بقارب الى فندق اسمه رد كوكنت هوتيل والله والبس شورتي وسيدي (طوالي) للبحر وشوي على ظهري و شوي سمكه الا ما صقطت (غابت) الشمس (حوالي اربع ساعات) وارجع واخذ دش وانزل لسوقهم (مافيه شي زين وناااااااااار) وادوج شوي الا النشاما يوم فلوا سفرهم كلن قدام مطعمه والله واتعشى وارجع للشاطي واغمس لي شوي وبعده يم هل المساج. واروح لغريفتي وعندك يا نوم واقوم الفجر وانزل للشاطي واتمرغ لي شوي لياما قاموا العالم وفتح المطعم واسج عليهم وافطر واتقهوا الا هذاك الولد الي كله مشالخ(خدوش بالوجه) سلامات يالبناخي من دابك(ضاربك) ياعله ان شاالله مايجي النار,قال لا ياسير بس طحت من الدباب قلت حلو هالطيحة.. وش عندك اجل,,قال كان تبي جتس كي (دباب بحري) قلت يالله دباب دباب بكم ياللحية الغانمة قال (والله مادري هو قال1500 او الفين النصف ساعة) قلت تستاهل. والله ويشقعوني (يشيلوني) بالقارب يم لهم عشة وسط البحر قالوا وقع على هالورقة أما تموت او يجري لك بلا مالنا دخل قلت مايخالف واركب وادوج وافحط وانزل كل الي براسي واسلم لهم دبابهم. قلت هذاك الي بالسماء هو ما يحصل قالوا الا والله عساك تبيه,,قلت بكم قال بخمسين دولار الربع ساعة قلت يالله... والله ونفس الطريقة وقع قلت نوقع وهم يربطوني قالوا لي اجلس يوم جلست قالوا لي جاهز قلت من أمس وانا جاهز قالوا لي (انجوي سير) وعلمي بروحي هكا الساعة والله واخذ لي دهوة( فترة من الزمن) الا انا حوالي مية متر او اكثر بالسماء واللنش يسحب. والربع ساعة صارت ثلاث ايام المهم نزلوني ورجعت للشاطي.. الا فيه نفيخة (بالون) مطاولة ويسمونه بنانا رايد وفيها يابانيين قالوا لي كم برذر وكنت مستحي منهم لاني ما اعرفهم وقبل ما قول لا..لا تذكرت اني ماني بحايل... قلت معكم واركب قبل الاخير ويسحبون بنا واول الامر ضحك وتعليقات ما فهمت منها شي,يوم خذينا لنا مشوار الا خوياي تغيروا والله ويلبط الاول والثاني واراعي (اطالع) وراي الا الشويب هف مهف الاولين وانا طال عمرك تخدر يديي والبط معهم بس الصراحة ممممممتع وخاصة لما تكونون واجدين.. رجعت للفندق وترويشة وشوي اروح اتغدى ببوفية مسلمين ماهو بعيد عن الفندق. وارجع لغرفتي الا كلي متملع(متفكك) وانام حوالي الساعة 6 المغرب ولا اقوم الا من بكرة الساعة 8 الصبح.وافطر فطرة يحبه قلبك وللقارب ومنه نفس الجيه للمطار. واخبط في مانيلا مهل كيتا القايلة وسيدي للفندق واكمل النومة الساعة 7 باليل واطلع للسينما واشوف فلم جيم كيري بس عجزة لا اضحك من بطني ( متملع) واكتفي بس بضحك الكبيانات والمقندات. والله يوم خلص الفلم واخذ تكسي واروح لليونتا بارك و يتحاشكوني (تجمعوا علي) الي يبي دراهم والي يقول ابي فيزا......... المهم دنجلت لي شوي ليما طاب خاطري ورجعت للفندق ونمت الا الصبح وبعده رحت اسوي غيار على الفلقه الي براسي. والله ومن بكرة اسير (ازور) وحدة استقالت من عندنا بتقي تاي الا هذي الحياة الي اعرف.... كبسة تويس يحبه قلبك ومع روبيان وسميكات لانها هي وزوجها مسلمين من زمان وصار لهم حوالي 15 سنه بحايل.... المفاجأة يالربع يوم خلصنا من الغدى جابوا قهوة مهيلة ومزعفرة بدلة وبريق نعناع وما بقى الا يقولون وهم يقهووني ( يا حيا الله راعي حايل) :11ight: المهم تقهوينا وتعللنا ونشدوني وصار على فلان وفلان وانت ماتزوجة ومن هالكلام.. خذوني يم بحيرة (الظاهر ماهي بحر لأنها صغيرة) وصلنا الشاطي وركبنا على قارب لجزيرة فيها بركان صغير.. ونركب على خيول الاما وصلنا فوهة بركان تشوف وانت عنده دخاخيين. والله واودعهم وويودعوني واجلس بمانيلا عقبهم 4 ايام واجيك عاصب(رابط) رأسي لحايل... ااااااااااااااااااااااااااه ياربييييييي لك الحمد خلصت الواجب. :109:

بعد حيي هلا و الله و غلا و الحمد لله على السلامة عقب الطيحه ،،،

تابعت كل كلمة ماشاء الله عليك فليتها ،،،لكن حرام ما طولت في بوراكاي ،،

شكلك يوم تروح لهذي الجزيرة ما قريت شي عنها من اللي أنكتب هنا ،،،

وأجل رحت يم تال فولكينو و ركبت على الخيول اللي تقرف من ريحتها ( يابخل هالفلبينيين كادينها ولا عمرهم نظفوها ) بس ما قلت لي كم أخذت القارب و بكم ركبت الخيول ،،،


وباقي آخر شي وهي لو جامع موضوعك هذا و الموضوع السابق في مشاركة وحدة كان صارت أكثر فائدة ولكن كثر الله خيرك وما تشوف شر ،،،

و في أنتظار ابداعاتك ،،،

هلا وغلا حبيبي كبيان وشرف عظيم لي انك تمر و تعلق على موضوعي.
بالنسبة للقارب و البغول دفعوها المعازيب الي كنت عندهم في تقي تاي.
وترى يا كبيان بناخيك عليمي منتديات ولا ادري وشلون اجمع الموضوعين فقلت يالله بس نسميها (نمبر 2).
وشكراااااااااااااااااااااان لك كبيان كو.

ها بعد حيي

تسجيل متابعة والف حمد لله على السلامة

واهنيك على جرأتك كل شي بتجربه مشاء الله عليك

وننتظر بقية التفاصيل واذا فيه صور بعد

الصور واجد بالكوم... بس وين الي يعرف يحطهن.. انا زين اعرف احط ابتسامات وتكشيرة...

قلت هذاك الي بالسماء هو ما يحصل قالوا الا والله عساك تبيه



كاكاكاكاكاكا هلووووووووووه

الحمدلله على السلامة وشووكورن لا ايلك ماقصرت على سرد المغامرات الجميلة

بعد حيي وهلي كلهم ..................................... حفظك الله

والحمد لله على السلامة ..... تصدق عاد فضخت الراس هي تبقى معك ذكرا للابد .... ياهنيك على الطيحة . هههههههه

تقرير مزبوط مثل الطيحة والفلقه .. .. وفكاهي وفيه بعض المصطلحات الغوية الطريفة والمفيدة قاموس مصغر ... ههههههههههههه

مالوم الربع لو سوو لك مهيله 15 سنة بحايل والله العزيز قطاع الارقاب أن يتعلمون عصب .... 15 سنة وسط أهل الكرم والجود وشبت النار والترحيب بالظيف ..... يابعدي ياهل حايل .

تقبل خالص سلامي
أسير الصمت

مرحبا
اخوي بعد حيي
الحمد لله على السلامه ..ماتشوف شر بأذن الله والطيحه تكفير ذنوب ان شاء الله وتقرير رائع ، وزين انك مترجم بعض الكلمات لان بعض الكلمات لم اسمع بها رغم تقارب اللهجات الي بيننا .
والاخ اسير الصمت صدق في كل الي قال ،،
عودا حميدا

الحمدلله على السلامه " بعد حيي "

التقرير جداً جميل وممتعه قرائته وأسلوب رائع وفكاهي في السرد

اخوي يزيد: مايجيك الشر ولا ترى مكروه انشاءالله.

اخوي مهاجر: هذا من ذوكك. وتسلم يا الغالي..
وشكرا على مروركم,,,,