ودك تسافر لأمريكا .. خلي في بالك هذه الأمور

السلام عليكم ورحمة الله

أول شي أتمنى من الإدارة تثبت موضوعي هذا لأن إن شاء الله الكل بيستفيد من هذه المعلومات.

بحكم دراستي في امريكا واللي استمرت قرابة 6 سنوات وبحكم زيارتي لكثير من الولايات والمدن السياحية , صار عندي خبرة بسيطة وراح اتكلم عنها في هذا الموضوع وراح أركز على السياحة فقط وإن شاء الله بتستفيدون من هذا الموضوع وأبي تفاعلكم عشان نتعلم من بعض.


أولا: لازم تسأل نفسك وتجاوب جواب مقنع " ليش اخترت أمريكا انها تكون وجهتك القادمة؟ "

لا تشيل هم ، بقول وجهة نظري وراح تفيدك في الجواب ع ذا السؤال: أمريكا بصراحة ما ينفع نشبها بأي بلد . أمريكا ممكن نشبها بقارة لأن كل شي يخطر في بالك موجود في امريكا : جبال ، أنهار ، ثلوج ، صحراء ، بحيرات ، طبيعة، حر ، برد ، تسوق ، أرياف ، بنيان ، باختصار كل شي في بالك راح تلاقيه في امريكا . أيضاً الأسعار في أمريكا صح إنها اغلى مقارنة بالسعودية لكن تعتبر معقولة مقارنةً بالدول الأوربية. برضوا لا تنسى أنه فيزا أمريكا تجلس معك 5 سنوات وهذه ميزة بصراحة. والشيء المهم هوا الحرية في أمريكا يعني مثلاً النساء يلبسون اللي يبون ومحد يقلهم شي أو مثلاً لو جا وقت الصلاة وحاب تصلي، ممكن تفرش سجادتك وتصلي ولا أحد يقلك شيء.



لا تخاف بكمل الموضوع إن شاء الله بس خليني اريح شوي :o

ثانياً: أهم شيء في زيارتك لأمريكا أنك تختار الوقت المناسب. وهذا شيء جداً مهم لأنك مثلاً لو بتروح في جانوري ما راح تستفيد شيء كبير لأنه أغلب الولايات اللي في الشمال والوسط تكون باردة جداً وورق الأشجار متساقط تماماً.

وجهة نظري ؛ أحلا وقت هوا في منتصف او أواخر شهر May اللي هوا شهر خمسة. وذلك لعدة أسباب

1) هذا بداية وقت الربيع والصيف وأغلب الولايات يكون الجو جداً جميل ومو حر .

2) مافي زحمة كثير لأنه المدارس تنتهي عندهم في جون

3) راح تلاقي أسعار حلوة ومغرية سواءً للتذاكر أو للفنادق


ثالثاً؛ إذا حددت الوقت اللي بتسافر فيه ، قدم على الفيزا الأمريكية قبل سفرك ب ثلاثة أشهر ع الأقل عشان بعد ما تصدر الفيزا، تقدر تحجز براحتك. بالنسبة للفيزا ما راح أتكلم عنها لأن الشباب ما قصروا غطوا هذا الموضوع في مواضيع أخرى.


لنا عودة لتكملة الموضوع إن شاء الله

مشكور اخوي ع المعلومات الرائعة

اكمل

ولا اتشرف بإنضمامي الى هذا المنتدى المتميز واتمنى التفاعل الكبير في الاتسفسارات اللي بطرحها لاني الله يخليكم اريد اجابات دقيقه وليست عامه بحكم اني اول مره اسافر امريكا وايضا لغتي الانجليزية ليست بالقوية..


من خلال قرائتي لمواضيع السفر الى امريكا شفت اللي يناسبني لظروف كثيره اني ازور فقط

نيويورك
نياجرا
اورلاندو
ميامي
اريد خطة لترتيب زيارة الاماكن

طبعا نية السفر في شهر 6 من عام 2019 لكن بحكم اني ما اسافر كثير اريد ارتب لكل شي وبالتفاصيل الصغيرة قبل وقت طويل عشان ايضا احجز تذاكر باسعار حلوه. مدة الزيارة تقريبا 15 الى 18 يوم


الاتسفسار الاول : بغيت مقترح توزيع للايام في هذه المدن

الاستفسار الثاني : الاماكن المهمه اللي اروحها في كل مدينة وفقا للايام والوقت اللي معي ( متاحف وامور تاريخيه ما كثير احب) لانه كل دوله فيها اماكن كثيره لكن من خلال خبراتكم اريد زبدة الاماكن مثل ما يقولوا والله يخليكم اريد نظير كل مكان تذكرة الدخول للبالغ كم ولطفله في عمر 7 سنوات كم وطفل عمر سنتين ونصف كم وايضا كيف اوصل لهذا المكان بأقل سعر ممكن لانه حقيقه ميزانيتي ما كبيرة .

الاستفسار الثالث : مثلا بالنسبة لاورلاندو قريت كثير عن ديزني وعن يونيفرسال والسي وورلد ..اريد افهم الحين ديزيني الحدائق الاربع اللي فيها كل حديقه بتذكرتها الخاصه او هي كديزني تكرة وحده لكل هذه الدائق الاربع اللي فيها.. بغيت توضيح شافي وايضا هل ديزني مناسبة لاعمار اطفالي؟؟ لاني سمعت انها صحيح للاطفال ولكن لاعمار 10 سنوات وفوق فأقول ويش فايده ادفع ماعرف فوق 150 دولار اعتقد ولا كم ما متأكد وف الآخر من 20 لعبه فقد 4 العاب تناسب اعمارهم!!! فاريد توضيح الله يخليكم واذا الاربع حدائق اللي ف ديزني كل حديقة بتذكرة خاصه وين منهم الانسب لعمر اطفالي.


الاستفسار الرابع: انا ما بتكون عندي سيارة ف كم اسعار التكاسي للمشاوير ف الاماكن الهامه ف اورلاندو؟ تقريبا يعني
ووين مكان مناسب للسكن وما يزيد سعر الفندق عن 120دولار وف نفس الوقت يكون مناسب ما مهم راقي

الاستفسار الخامس: بالنسبة لنيويورك شو اسهل وسيلة لزيارة الاماكن السياحيه فيها مع ذكر الاسعار .

الاستفسار السادس : نياجرا كيف اوصلها من نيويورك وراجع مره ثانيه نيويورك.

لانه النيه من اوصل ليلة نيويورك وف البكره اورلاندو وراجع نيويورك وبعدها نياجرا ليلتين وارجع نيوريورك مره ثانيه

والسموحه على الاطاله لاني جديد ف السفر واريد اجابات دقيقه وواضحه، يعني ما افضل تسوو لي نسخ لمواضيع ذاكره شي عام عن اورلاندو او نيويورك لاني اريد بداية اجوبة دقيقه ع اسالتي وبعدها بقرا اكيد المواضيع بشكل عام عشان استفيد



لو سمحت اذا عندك فكره عن استفساراتي رد علي