الموضوع: أي نوع من السياحة تفضل ؟

السلام عليكم


في موضوع ودي أطرحه للمناقشة العامة بين الاعضاء
يمكن إجاباتنا ومناقشتنا تفيدنا أو تفيد غيرنا
وهو عن أفضل أنواع السياحة


أي نوع من السياحة تفضل ؟؟؟




كل شخص وله اسلوبه الخاص وطريقته بالسياحة وأيضا له تفضيلاته بالنسبة لمن يسافر معاه


البعض يسافر فقط مع زوجته حتى لو كان عندهم أطفال يتركونهم بالبيت أو عند أهلهم ويسافرون
والبعض الآخر لازم ياخذ عياله معاه وما يتركهم حتى لو كانوا صغار بالعمر وممكن يتعبون من تغيير الجو


البعض منا يحب السفر مع اصدقائه سواء كان عزوربي أم متزوج
وفي قله قليله يحبون يسافرون بروحهم وأغلبهم يحبون اكتشاف المناطق والمدن الغير معروفة نسبيا


البعض منا يعتبر الذهاب لدول ذات طبيعة خلابه ( مثل اوروبا ) هي السياحة الحقيقة
مو مهم عنده الطلعات والرحلات والمغامرات المهم عنده الطبيعة والخضرة والشلالات والبحيرات


البعض منا يسافر ويعبر أميال ومسافات عشان يوصل بلد ما ويروح على طول إلى السوق والمجمعات ويتسوق
تلقاه كل يوم من سوق إلى آخر ومن مجمع إلى آخر ومن أوت لت إلى آخر أغلب فترة إقامته
وكأنه لا يوجد أسواق أو مجمعات في دولته !!!
أتوقع السياح من هذا النوع اغلبهم من النساء


البعض يتجنب الذهاب للدول الحارة أو الدافئة والرطبة ، مثل دول شرق آسيا
أهم شي عنده الجو البارد خصوصا لما تكون فترة إجازته وسفرته بفصل الصيف


البعض يبحث عن الثلج في عز الصيف ويذهب لأعلى جبال اوروبا عشان يحس بالبرد
ولما يعثر و يوصل إلى الثلج كأنه وصل إلى غايته واكتملت فرحته بزيارة تلك الدولة
وكل شيئ غير ذلك مو مهم عنده




البعض ما يحب يسافر لمسافات طويلة وطول مدة الرحلة مهم جدا جدا عنده
لذلك يصرف النظر عن كل الدول البعيدة مهما كانت جميلة
( مثل استراليا وأمريكا )


البعض يسافر عشان يرتاح ويغير جو وينام على كيفه بدون ما يلتزم بشي
يسهر على كيفه وينام لغاية الظهر ، مو مهم انه يطلع من الصبح ويستغل يومه بالكامل
المهم راحته الجسدية


والبعض الآخر يستغل كل وقته بالسفره ويطلع من الصبح إلى نهاية اليوم
ربما يجهد نفسه ومن معة في سبيل اكتشاف تلك المدينة واستغلال أماكنها السياحية على أكمل وجه




البعض تلقاه يكرر زياراته للدولة الي عجبته عدة مرات
مع انه زار اغلب معالمها السياحية لكنه لا يكل ولا يمل ويحب التكرار
والبعض الآخر إذا زار أحدى الدول فلا يكرر زيارته لها حتى لو كانت عاجبته 100% لأنه وبكل بساطة يحب أن يذهب إلى دول أخرى


حتى لو اتفق اثنان على نوع واحد من الأنواع سالفة الذكر ممكن أن يختلفون بنوعية السكن !!


البعض يحب أن يسكن بأفخم وأفضل وأكشخ الفنادق أو الشقق وتلقاه يصرف من ميزانية السفر المبلغ الكبير بس في سبيل السكن في فنادق ذات خمس نجوم
والبعض الآخر ما يهتم بفخامة الفندق نهائيا لأنه يعتبره للنوم فقط وباقي اليوم يكون بالخارج لذلك يوفر فلوس الفندق حق طلعاته ووناسته وسياحته على حساب سكنه المتواضع






يا ترى أي نوع من السياح أنتم ؟
وأي نوع من السياحة هي الأفضل ؟؟
ومع من تكون السياحة أحلى وأجمل وأفضل ؟؟؟
وهل ياترى في أنواع أخرى من السياحة ما تم ذكرها بالموضوع ؟؟؟

مواضيع عشوائيه ممكن تكون تعجبك اخترناها لك:

• خبر جميل من الخطوط الجوية السعودية ولكن هل يطبق ؟
• الرجاء الإفادة
• هل توجد مشكلة تقنية في موقع
• طيران العربية وطيران فلاي دبي
• بخصوص طيران نااس
• حقائب سفر مناسبة .. أين أجدها
• السفر الى تركيا
• الي عنده خبرة في لبنان ابي مساعدته
• ابي نصيحتكم
• صيف ه الى اين تتجه الانظار
• طيران ناس ، الحذر من ما حصل لي
• هل استطيع ان اعمل لجوء في السويد و انا قادم من فرنسا بالقطار و ختمت جوازي في عدة مدن؟
• استقطاع اجره فندق أنتركونتننتال هونج كونج
• طلب مساعدة في تخطيط رحلة للصيف
• استفسار
• محتار يا شاباب ممكن تساعدوني
• زيادة في طلبات القطريين للحصول على تأشيرة لأمريكا
• ومااا ادراك ماالعباه
• فلاي دبي تسيّر رحلاتها إلى القصيم يناير المقبل
• دولة إسلامية طبيعة خلابة أجواء باردة

أنا من النوع الدي يحب يسافر مع الاصدقاء لأني عزابي و نوعي نحب نشوف البلد بأكمله يعني اتمشى في المدن و احب ايضا اشوف الاثار و المتاحف و احب ايضا ان اشوف اسواقهم و ايضا احب انني اخصص وقت للطبيعه و احب اني اخصص وقت للمتعه كالسباحه و مدن الالعاب

بالنسبة للفندق فيكون اختياري الفندق الوسط يعني ما اصرف اموالي في فندق 5 نجوم مثلا فندق 4 نجوم يكون ارخص بكثير و تجده مريح

اذا في بلد اعجبني و جاءتني فرصه لزيارته مع احد اصدقائي فلا مشكلة في دلك

تحياتي لك

بصراحه كثرة الخيارات مُحيره ...

عموماً فيه خطوط عريضه أكيد مهمه عند الاغلبيه :

الطيران : طبعاً دايركت , و ان غلا ثمنه ..

الفنادق : مش اقل من 4 نجوم , نعم مهم يكون راقي , وهو جزء ضروري لنجاح الرحله .
و الاهم يكون في منطقه حيويه - قريب من مطاعم , مغسله , محطة قطار او مترو ..


الطبيعه : بما ان بلادنا صحراويه
أكيد تهمنا الطبيعه بالمقام الاول ..


الامان : ان لا تكون البلد مهدده بالزلازل او البراكين
او مهدد بمشكله سياسيه معينه ,
(اصلاً شرعاً ما يجوز لها السفر )..



انا احب و اعشق وجود اسرتي الحبيبه في السفر
ولا تحلو الحياه الا بهم ..
و مهما كان التعب في التنقل و اجراءات السفر , تهون عند ابتساماتهم



يعطيك العافيه , موضوع شيق

فعلا موضوع شيق , انا اكثر سفراتي مع العائلة , طبعا عند السفر احاول اكتشاف عادات وتقاليد الشعوب , واحب السفر لمدن بعيدة عن العاصمة او دول غريبة ايضا , وطبعا رؤية الثلوج شيء جيد بالنسبة لي

يعطيك العافية اخوي ابو سعود على الموضوع الجديد ,,,

و عليكم السلام

طرح متميز يا بو سعود

اهتمامات الناس بالسفر تختلف و لابد أن يحدد كل شخص اهتماماته
لاحظت ان البعض يقرأ تقريراً متميزاً فيقرر السفر لنفس المكان و يتفاجأ
بان المكان ليس كما قرأ و السبب بالطبع اختلاف الاهتمامات

قرر ماذا تريد و حدد و جهتك بناءً على اهتماماتك لا اهتمامات غيرك

افضل السفر و حيداً أو مع زوجتي فقط ما أخذ الاولاد أبداً
لأن الهدف من السفر الراحة و بصراحة اذا اخذتهم تحتاج اجازة من الاجازة

اذا كنت لوحدي أركز على وجهات غريبة و جديدة فيها روح المغامرة
و اذا كنت مع زوجتي اركز على الطبيعة الهدوء و الاسترخاء

في كل الاحوال اختار سكن متميز لأن السكن برأيي سر من أسرار
نجاح الرحلة فغالبية السلبيات تبدأ من هنا ان لم تحسن الاختيار

من الصعب أن تجد شخصاً يشاركك الاهتمامات نفسها
لذا كن انانياً في سفرك و اختار ما يناسبك

المشاركة الأصلية كتبت بواسطة آخـــرفـــرصــة
http://www.arabtravelersforum.com/tr...8/#post8136808

من الصعب أن تجد شخصاً يشاركك الاهتمامات نفسها
لذا كن انانياً في سفرك و اختار ما يناسبك

اتوقع ان الموضوع مو انانيه , بقدر ما نشوف انه " لنفسك عليك حق " ..
و هذا بنظري انه حق مشروع لـ الاب , و غير مشروع اطلاقاً لـ الام ..
باختصار نغبطكم عليه
الاب ممكن يسافر بروحه و يستااااااااااانس
و الام اذا اضطرت تسافر بدون الابناء تستوي من التفكير - اذاً توفر اعصابها و تاخذهم

ياحلو تقاريرك وياحلو مواضيعك يابو سعود الله يحفظلك ذريتك والسامعين اجمعين...
انا من النوع اللي يحب ويعشق بجنون السفر مع العائله ولازم اخذ ولدي الله يحفظه مستحيل اسافر دون عيالي
السفر بالعايله وبشريكة حياتك فقط انا راح اتعب بالسفره بحجز تذاكر وفنادق وتكاليف مصروفات كل هذا اصرفه ع زوجتي وولدي
اشوف انه افضل بكثير من اني اروح مع الشباب
الفنادق اذا ماهي 5 نجوووم ما احجز نهائيا اهم شي عندي الفندق يكون فخم وراقي وموقعه استراتيجي
شرق اسيا ماليزيا وسنغافورة
لو اكرر الزياره لها مليون مره ما امل منها
تقبل مرور
اخوك ... ابوفيصل

موضوع جميل يا ابو سعود....

انا ما احب القولبة في السفر ( مصطلح جديد ) يعني ما احب اكون في قالب معين في كل سفراتي ، فكل سفرة لها ظروفها وتخطيطها الخاص حسب ما تمتاز به تلك الدولة ، ولكن هناك خطوط عريضة لا يمكن تجاوزها ( مثل ما قالت اختي ام عزيز ) مثل السكن القرب من الاماكن المهمة وسيلة النقل عدد ساعات الترانزيت اذا كان ولابد

موضوع جميل
وهذه الفئات من المسافرين موجودة وفي النهاية لكل شخص وجهة نظر وطبيعة
وذوق يختلف عن الأخرين وأتفق مع الأخت أم عزيز
بالنسبة لي السفر مع العائلة بالمقام الأول وزيارة الطبيعة والأماكن الجميلة رغبة ملحة
وأعتبر نظافة البلد والأمان وممن تتعامل معهم تكون مهمة
أما البحث عن وجود أسواق ومطاعم ومقاهي مميزة فهي ليست من إهتماماتي ولا مطلب اساسي
الأكل مطلوب لسد الجوع بالسفر بحيث يكون المطعم نظيف وحلال وإلا البحث عن بدائل كالطبخ السريع وغيره
الأسواق البعض يعتبرها من مسلتزمات السفر ولكن لا أعتبرها ضرورية

هلا ابو سعود، موضوع حلو جداً

اهم شي عندي في السفر ان بناتي ينبسطون، الله يحفظهم، وهم يحبون السباحة كثييييير يعني لازم يكون الجو معتدل


اتوقع جنوب شرق اسيا بتعجبني ، ان شاء الله اجربها قريب

السفر مع الزوجة أو الأصدقاء

موضوعك حلوووو
الفندق مايقل عن 4 نجوم لان السكن ومكانه مهمين جدا جدا

قبل كنت استمتع وانا اسافر مع امي وابوي الله لايحرمني منهم لاني وحيدة هلي من البنات وكنا دايما الثلاثي مع بعض في كل سفراتنا كثير متعوده على الهدوء وماحب الازعاج والصخب بحكم حياتي الهاديه كنت كل يوم سوق سوق سوق خخخخ بس الحين انا غير وتغيرت اهتماتي الانسان كل مايكبر يتغير .. الحين سفراتي كلها مع زوجي الله يخليه لي يارب ولحد الان ماجربت اسافر مع اعيالي الا دبي في عيد الفطر اللي راح وجد استانسنا معاهم وااااايد وفديتهم اعيالي اصلا الحمدالله هادين ومؤدبين بشهادة الكل بس لحد الان ماجربت اسافر معاهم اوروبا انا وابوهم كثير حابين السفره الجايه يكونون معانا اتوقع عمرهم الحين حلووو للسفر وبيحلون السفره اكيد

كل سفراتنا اخليهم عند امي الله يحفظها مع شغالاتهم ونسافر وابدا ماحاتيهم وهم عند هلي

يهمني الجو البارد قبل كل شي لاني اكره الحر كره مب طبيعي ينرفزني لان احنا طول اليوم برى م مثل بلادنا في مكيفات .. في شرق اسيا مارحت الا تايلاند وبصراحه كرهت جوها لانه حار ومرات رطب اشوف وش الفايده اذا خضار بس والجو حار ماتحسون بمتعة الخضار بس ماانكر ان تايلاند فيها وناسه

والشي المهم عندي اني ماذبح عمري من الساعه 8 وانا احووط لين الليل لان احنا رايحين اجازه يعني بنعوض بنام اكثر بنرتاح لان في بلادنا احنا عايشين في ضغط وصراع مع الوقت نوم متاخر انقوم الصبح ركيض على الدوام طول اليوم مشغولين نبي هدوء مانبي نفس الجو يكون في السفر ..وتغيرت في شي مب مثل قبل اسوي جدول كانها رحله مدرسيه يكفيني اشوف التقارير واخذ فكره عن الاماكن وهناك نروح على كيفنا مانضغط على نفسنا علشان الوقت وحلو تسالون مال السياحه في الفندق لان يعرفون اماكن احلى من اللي تنكتب في المنتدى عن تجربه هالكلام

السفر صار ريلاكس وراحه واستجمام مب ضروري انشوف كل داعوس المهم نستانس والسوق يهمني اكيد لان سوقنا تعيس جدا جدا جدا بس مب من اول يوم نفس قبل لا في اخر الايام .. حبيت الشوبنق في لكسمبورغ حلووو والاحلى ان ماتسون تاكس فري نصيحه لمحبين الشوبنق حبيت اضيفها

ولحد يروح بروحه والله ماتدرون بالدنيا نصيحه من اختكم .. واحد من اهلنا كان مسافر بروحه تعب وجاته سكته قلبيه ومات ولاحد درا عنه الا عقب توفى في غرفته في الفندق الخوي مهم ماتدرون لاسمح الله تمرضون يصير اي شي الواحد لازم يحسب حساب هالامور

زيارة القصور من الاشيا اللي احبها في السفر استمتع فيها واحب زيارة القرى والمدن الصغيره اكثر من الكبيره واشوف المناظر الطبيعيه هالشي بالنسبه لي السياحه الحقيقيه اكثر من التنقل بين الاسواق والقعده في القهاوي طول اليوم مثل مايسون عشاق لندن وباريس


استمتعت كثير بردي في هالموضوع شكرا على الطرح الجميل مشرفنا

يا ترى أي نوع من السياح أنتم ؟
- انا من السياح اللى يحب الاماكن الطبيعية + السوق ( اكيد في نهاية الرحلة ) يعني مب معقولة من ثاني يوم اسير السوق + الرحلات السياحية ...
وأي نوع من السياحة هي الأفضل ؟؟
- السياحة العائلية بالدرجة الاولى = جربت سافرت مره وحده بدون اليهال بس حسيت السفرة كان ناقصنها شي و الحمد الله ما طولت ...
ومع من تكون السياحة أحلى وأجمل وأفضل ؟؟؟
- اكيد مع العائلة لان وناستهم من وناستنا ..
وهل ياترى في أنواع أخرى من السياحة ما تم ذكرها بالموضوع ؟؟؟
- ما اتوقع ؟

حلو الموضوع و لازم الكل يشارك فيه ؟!

الله يعطيك العافية عالموضوع الحلو ما عندي مشكل ولا فرق مع مين اسافر اقدر اسافر مع الاهل وممكن مع الاصحاب عادي لاني بعدني عزابية
وممكن ازور اي بلد حلو الواحد يتعرف على عادات وتقاليد دول جديدة
بالنسبة للفنادق من 4 نجوم
والطيران افضله المباشر

من ناحية أفضل سياحة المطر والمناظر الطبيعيه الخلابة

اعتبر نفسي جديد في عالم السفر لاني ماسافرت الا دول الخليج ومصر (الله يديم عليهم الامن) والاردن بحكم ظروفي الدراسية بس ولله الحمد تخرجت
مع ذلك انا شخص محب للسفر وان شاءالله راح اسافر واسافر واسافر
وبحكم اني توني حديث الزواج ف بتكون السفرة الاولى الى استراليا طبعا بمساعدة وتخطيط المبدع دائما بوسعود الله يحفظ له عياله
انا عندي نص السفرة فندق..طبعي احب الفندق يكون نظيف ومرتب وفخم وهذا اللي يستدعيني احجز فنادق خمس نجوم
واحب تجربة اشياء ماجرتها اشياء جديدة علي
اعتبر نفسي Doer وليس Watcher
لذلك تعجبني الرحلات ذات الطابع المغامر والاكتشاف والترفيه
ومستقبلاً بإذن الله راح اعطيكم تفاصيل رحلاتي
اسوة بخيرة اعضاء المنتدى
تحياتي للجميع
بوسعود حفظك ربي

احب الاماكن ذات المناظر الطبيعيه الخلابه معتدلة البروده .. افضل انا وزوجي فقط من غير اطفال بس ماحرتاح واشيل بنتي ..
وان شاءالله سفرتنا بتكون السنه الجايه بس من الآن جالسه اقرأ واكون فكره ..صح بدري ,, بس احب التخطيط المسبق والمدروس لأن حمل التخطيط والتجهيز يقع على عاتقي ..

موضوع جميل ي ابو سعودانا عن نفسي احب السفر دايماً يكون دايركت او ترانزيت بسيط ..
واحب التنوع الطبيعة السهر الجو التسوق المطاعم
احب اسافر مع زوجي بسسس
وافضل ان الاطفال تحت خمس سنوات يجلسون عند اهلهم
ومااغث نفسي بلشيل والحط لان الاجازة ماراح احصلها بكل وقت
ومع ذلك لازم ان للاطفال نصيب لهم بلطلعات ..

ماشاءالله عليك يابوسعود

استمتع انا باسلوب طرحك للمواضيع والتقارير


انا افضل والاهم شئ هو الطبيعة


الطبيعة عندي اهم شئ .. والسوق لا اهتم فيه ابدا .. لان عندنا بالخليج اسواق وايد ومتنوعة




واحب الاثار وتاريخ البلد اللي بروح له وعادات وتقاليد الشعب


احب اسكن في الارياف اكثر من المدن طبعا


لا اهتم بالفندق .. لكن يجب ان يكون نظيف ومرتب ومحترم




ايام كنت عزوبي احب اسافر مع اصدقائي .. وماحب اسافر لوحدي لاني اتملل


لكن بعد ماتزوجت اسافر مع زوجتي ..

بالظبط اخي الفاضل

انت اجزت كل انواع السفر و انماط الشخصية

طبقا لحياتى العائلية و نوعية التربية فى مجتمعى فسفرى يجب ان يكون مع الاسرة اما ما أتمناه هو السفى مع صديقاتى و هو ما لل يُتوقع تنفيذه

حلووووووووووووووووووووووووووووووووووو

مشكووووووووووووووررررررر

طبعاً السفر مع العائلة اكثر متعة وراحة

بالنسبة لي حسب ظروفي العامة واذا اخترت السفر .. لا ارضى بفنادق اقل من 4 الى 5 نجوم .. لانه بالنسبة لي قليل الاسفار ولكني احب السفر في النهاية ... احب الابتعاد عن المدن والصخب .. والاستقرار في المناطق الهادئة او شبه القروية لان المتعة في التغيير والهدوء مع النشاطات اليومية طبعا
من استكشاف وزيارات أماكن جديدة .. والخروج ,,,
أحب السفر مع العائلة .. رغم عناء الاطفال أحيانا ولكن المتعة لا تكتمل الا بالأسرة .. لان أيام العزوبية انتهت .. وأصبحنا والحمد لله من أجل الاسرة ..
السفر دايركت أفضل بالنسبة لي من عناء الانتظار وتبديل الطائرات حتى لو الثمن اغلى ,,,


أحب ان اكرر زياراتي لدول زرناها سابقا واستكشاف الجديد حسب مايبهر وطبعا حسب والأهم الميزانية ..
وان شاء الله ربنا يكتب لنا في الخير والحفظ واستكشاف ارض الله في كل سفراتنا ..
والاجمل درة المواقع السياحية العرب المسافرون ماشاء الله ..


نسافر عبره مرات ومرات عبر أثير الانترنت ..
شكرا لك أخوى طارح الموضوع الجميل ..

كل سفره ولها ظروفها بس في أساسيات عندي مثل الفنادق اهم شي النظافة وما تقل عن 5 نجوم في الخليج والوطن العربي و 4 نجوم في اوروبا
الجو ما احب الحر والرطوبة نهائي افضل الجو البارد
المسافه في الطائرة لها دور في اختيار الوجهه فعلى قد ما احب السفر بس فيني فوبيا من الطيران احاول قد ما اقدر ما تتخطى الرحله 6-7 ساعات هذا المكسمم الي قدرت عليه حاليا
حتى الأكل له دور عندي لاني ما أتقبل كل النكهات وخصوصا الشرق اسيويه

نجي مع مين أسافر سفراتي كلها عائليه يا مع زوجي واعيالي يا مع زوجي بس قبل لما كانوا اصغر اترك الصغير وأخذ البنت بس الحين يا اثنينهم معاي يا بدونهم
قبل ما أتزوج كنت أسافر مع أهلي بس من تزوجت ما ارتاح الا مع زوجي

سفراتي مع زوجي ماليها حدود يعني عادي نطلع من الصبح ما نرد الا نص الليل وكلها مغامرات في الغالب بس اذا معاي اليهال تكون السفره مسميه لهم يعني امشي على شورهم وراحتهم

افضل السفر الى اوروبا نبا نشوف الخضار والشلالات
ومهما شفنا ما اعتقد اهل الخليج يشبعون
محرومين من المناظر الخلابة كل ما نفتح عينا ما نشوف غير الرمل
"امريكا حبيبة قلبي مب بس نفسي اسافر لها لو بايدي اهاجر لها"
" سبحانك يارب كل ما خططنا نسافر تضبط ويا الكل الا انا الا انا
قلت خلاص هالمرة ان شاء الله بسافر ويا عمتي المانيا هالكلام ع شهر يناير
وابوي محرمنا وبنقعد شهر
تكنسلت السفرة بعد ما عشمتني فيها كنت كل ما شفت شيء حلو اخذه واخشه لسفرة

الله يرزقنا جميعا بجنان الخلد " اذكر ابوي بعد اول سفرة له لبعض المناطق الاندونيسية والجزر
اول مارد من اول ليلة يقول شو هالبلاد شو هالجو استغفر الله بعد كل
اللي شفته رديت للصحراء

احب السياحة ويا ابوي الله يحفظه "اكيد لزم يسافر معاي ومستحيل افكر اسافر ويا خواني
" واختي الحبيبة احسن رفيقة ... بس الحين وبسبب زواجها احس صعبة نسافر
مع بعض خصوصا هالصيف بعدني ما تعودت ع زوجها
استحي منه خخخخخخخخخخ

بخصوص زيارة الاسواق وصرف 3/4 الميزانية..
ابصم بالمليون ان هذا هدف كل حرمة في اي سفرة
كل ما رحنا سوق نغرز فيه "حريم لزم"
اذكر اختي بسفرتها لـ "تايلاند والهند " قبل الزواج
كل شوي تتصل فيني تسألني لقيت الشيء الفلاني ها تبينه ها اللون ولا الون ثاني
بطرش الصورة ع الواتس اب شوفيه وقوليلي تبينه ولا لا بسرعة خخخخخخخ

تسلم اخو ابو سعود ع موضوعك الحلو "مع انه جديم بس حبيت ارد عليه"
والسموحة طولنا عليك بالرد
دمت بود

..

فيه اساسيات لكل سفره الشخص ما يتنازل عنها
مثل الفنادق الطيران وتفضيلاته له
اما الاشخاص والاماكن ونوعها من طبيعه ولاصخب
طبيعة البني ادم ملول حتى لو يحب يسافر لحاله بيجيه يوم يبي احد معه
ولو يحب طبيعه بيجيه يوم بيحب يشوف الصخب والاثار
عن نفسي احب التنويع طبيعه صخب مدن
وبما اني متزوجه ف اغلب السفرات مع زوجي طبعا
بس الحين صرت ارتب سفرات خليجيه مع اهلي مثلا لانا طفشنا نسافر لحالنا ولا مع اهله
وبيجي يوم يكثرون العيال ويكبرون وبنحب اكيد نسافر معهم
ولا من البدايه ما كنت احب اسافر الا لحالي عشان الهدوء والواحد ياخذ راحته بالطلعه والدخله

شكرا على طرح الموضوع يعطيك العافيه اخوي

اعذرنا ابو سعود تو نشوف الموضوع الشيق ونا اقرأ اقول في نفسي هذا مابقى شي
غطيت كل شي تقريبا بس عندي اضافه بسيطه لاختيار الوجهه

البعض يبحث عن الدولة الاسهل في اجراءات الدخول
يعطي اولويه للدوله اللي ما تطلب تأشيرة (فيزة)
مثلا حنا يالسعوديين طبينا مؤخرا في جورجيا لهذا السبب
واظن البانيا فتحت الباب مؤخرا
واكيد ماليزيا


بالدرجه الثانيه نفضل الدول اللي تقص فيزتها من المطار
مثل اندونيسيا او تركيا سابقا (قبل لايعتمدون الفيزة الالكترونيه)




بالنسبه لي
كل ماذكرته ينطبق علي
الا النوم في النهار
هذي من المحرمات عندي
انا اصحى بدري افطر وطلع اشوف الدنيا مايضيع يومي في السرير

انا من نوع اريد اطلع وحدي الى دول بعيدة الى دول شرق اسيا ذات الطبيعة الخلابة