بــســم اللــه الرحــمــن الرحــيم
إخواني وأخواتي أعضاء المنتدى الكرام
حبيت اعرض عليكم بعض الصور اللي خذتها من منطقة الجبل الأخضر
في عمان، المنطقه البارده اللي زرتها يوم الجمعه الموافق
1 / 9 / 2006
أعضاء الرحلة كانت مكونه من 7 اشخاص معاي انا بما أن اول مرة نخطط لها المكان فما كنا نعرف شو نظام السكن في الجبل الاخضر ،وما كانت عندنا فكرة عن السكن والشقق المفروووشه ، ففكرنا نحجز في مسقط ونخصص يوم نطلع فيه للجبل الاخضر واستكشاف المكان
هذا هو المكان اللي حجزنا فيه ، عبارة عن 3 غرف وصاله ومطبخ والغرف مريحه ، والمكان هذا سكنت فيه قبل 4 سنوات تقريبا وانا راجع من صلاله مع الربع ،كنا حابين نغير هاي المرة ولكن وصلنا مسقط الساعه 11 ليلا وكل الشقق مافيها مكان ، وخاصة يوم يعرفون عددنا
وهذه السيارة اللي استأجرناها عشان تشلنا كلنا فيها ولان الشرطه ما تسمح بدخول ، الصالون اصلا فوق الجبال لانها ما تستحمل الصعدات والنزلات، باثفايندر 2006
وهنا ترسنا بترول قبل دخولنا الجبل بـ 20 كيلو تقريبا لان ماشي محطه بترول فوق الجبل ، تلعوزنا شوي لين حصلنا سيارة 4WD الصراااحه ، والمشكله انا موتري صالون ، وربيعي موتره يديد وغمضنا ان نوديه فوق الجبال رغم انه 4WD ، واحد جزاه الله خير ما قصر ركب معانا ودلانا المحل وقعد يكاسر الريال لين نزل السعر ، من 70 ريال عماني الى 53 ريال عماني على استأجار الموتر يومين
( 1 ريال = 10 دراهم )
ونظام عمان بالكيلو !! يعني ليومين يعطيك 400 كيلو ، واذا زدت عن كل كيلو 100 بيسه للـ 4 ويل ، و 50 بيسه لسيارات الصالون
( 100 بيسه = 1 درهم )
ادري وايد تفلسفت ولكن حبيت اني اعطيكم المعلومات عشان اذا حد فكر ، يروح المكان تسهل الامور عليه وما يتلعوز مثلنااااااااااا
واجهنا صعوبات في البداية بسبب الصعدات والزحمة اللي في الموتر ما شاء الله ، ولكن عقب تعودنا ، انا اللي تلعوزت لاني كنت اسوووق الموتر ، ولازم نستخدم الغيار الثقيل ، والـ 4 ويل
وهذه المنطقه اللي في الصووورة فوق الجبل الاخضر يعني حوالي
3000 مثر فوق سطح البحر واللي يعادل 3 كيلومتر تقريبااااااا ، ومن المكان ، هذا تقدرون تشوفون القريه في المنطقه المقابله والمزارع والمدرجات الجبليه الموجوده هنااااااااااك
وهذه صورة القريه مقربه واوضح ، ومثل ما تلاحظون المواتر اللي نازله ، صوب القريه اكثر المواتر ارقام الامارات ، والقريه فيها عين وبرك سباحه
ومزارع الرمان
وهاي صورة المنطقه اللي خلفنا لما نشوف القريه ، وعورة جبليه حلوة والله
هنا كنا في القريه اللي شفتوها ، وعجبتني الالوان ، الاخضر والبني والازرق
ادخلوها بسلامٍ آمنين
ودخلنا القريه اللي فعلا تراثيه وناسها تراثيين ، على فكرة المنطقه ، مب مستويه يعني المكان اللي انا مصورنه على نزله
يا سلام على الجو الطبيعي اللي عندهم الصراحه ، تحس انك تتنفس نظافه ، وهذا الممر حصلناه بين بعض البيووووت
صووورة تراثيه حلوة الصراحه
وصلنا العين وشفنا الماء العذب الطبيعي ، وحصلنا يهال من القريه يتغسلون ، غسل الجمعه في نفس المكان هذااااا ودقينا سوالف معاهم ، رمستهم حلوة ياخي
هذه القناة اللي توصل المياه من العين الى المزارع والبيوت بعد ، تصدقون ، شفنا بنت صغيره قاعده تغسل المواعين في هذا الممر ، والماي واااااااااايد بارد
حد يصدق اللي أشوفه !!!!
اول مرة في حياتي اشوف شجر الرمان ع الطبيعه ، وما شاء الله حبات كبيرة
تفضلو
اكيد كلكم تفكرون كم حبه سرقها ولـ الإمارات ـد
ههههههههههههههههههه
لا لا ما سرقت ولا شي ، لانها كلها أملاك خاصه للناس ومعظمها للسلطان قابوس الله يحفظه ، وفي مزارع عليها لوحات مكتوب عليها ملك خاص ممنوع الدخول
واكيد الحين كلكم متحمسين وخاطركم تروحون الجبل الاخضر وفي اقرب اجازة ،وبهذا خلصت الجزء الاول من الجبل الاخضر ، وإن شاء الله عيبكم الموضوع ، واتمنى إني قدرت اوصل لكم المعلومات اللي حبيتوا تعرفونها من خلال الجوله هذه وانا حاضر لاستفساراتكم
وترقبوا الجزء القادم واللي راح يحتوي على صور للطرق والطبيعه وعودتنا لبلادنا الحبيبه
المفضلات