الموضوع: الأوروبـــــــــي

[ALIGN=CENTER]
بسم الله الرحمن الرحيم

40 يوماً في رحاب الدول الأوروبية
------------------------------------

راح أستعرض معكم رحلتنا الأوروبية اللتي قمنا بها نحن 4 شباب (زكرتية) حول 8 دول / 9 مدن من أوروبا الغربية ومنها شرقية …
[/ALIGN]

بدايةً راح أطلعكم على بداية التخطيط لهذه الرحلة وفكرت مين من الشباب الأربعة ، طبعاً محاكيكم بس يتفنقس ويهاوش (هذا اللي أنا فالح فيه ) قلنا ياولد وين بنصيف هذي السنة … قلت أنا وش رايكم بدول شرق آسيا نط خوينا بالله ابو عزيز وعينك ماتشوف ألاالنور مايبي شرق أسيا خير شر (مادري وش فيه عليهم ) قال كله ولا الشرق .. مع أن ابوناصر وده بالشرق وأبوريم لأي مكان معنا .. قلنا أمرك مطاع يامعلم … قال بنروح لأوروبا قلنا خير بس شلون وطق صدره … قلنا بسم الله ..

أخذنا تذكرة طيران على الأولمبيك الرياض – أثينا – باريس ذهاب ، والعودة بودابست – أثينا – الرياض بـ 2500 ريال ، والباقي قلنا بندبر أعمارنا … شباب وماراح نتورط لو نمنا بالمطارات

زبطنا وضعنا من ملابس وشنط واللزي منه … وتوكلنا على الله طبعاً ولا واحد منا سبق أن زار أوروبا الغربية على قولت القايل (طقها وألحقها) …

ونبتدي بأول دولة ومدينة ....

[ALIGN=CENTER]-----------------------------[/ALIGN]

[SIZE=2.5]
[ALIGN=CENTER]
{- أثيــــــــــــــــــــــنا -}
[/ALIGN]

رحلتنا الساعه 2 الفجر وتمر دبي ووصلنا أثينا حوالي الساعه 6 الفجر … نزلنا المطار وقلنا وين بنسكن وش عندنا من معلومات عنها ولا شي الا شارع الخراف ولا مريناه خوفنا راعي التكسي من المشاكل اللي تصير قلنا بلاها موب لازم … طلعنا من المطار وصرنا ندور من فندق لفندق لحد ما طفشنا وقلنا نبي ننام علشان الدوران ، ومرينا ذاك الفندق وقلنابس هذا هو وقفونا … أخذنا الفندق وياليتنا ما أخذناه بس خلوها على ربكم تساهيل تساهيل ، بكم بـ 45 دولار قلنا يالله … ريحنا واللي علينا وقبل كنا مآخذين بعض التعليمات من راعي التكسي وأماكن ماينصحنا أننا نروحلهن وفعلاً عملنا بنصيحته راعي البلد اللي حب يعمل خير معنا وهذا أحسن مافي ديرتهم ..

طبعاً تفاجئنا بالحر وأحنا أصلاً منحاشين منه ولقيناه هناك وكانت درجة الحرارة تقريباً 39 (صلخ) … اول يوم لنا أطلقنا رجلينا وصرنا نتمشى من شارع لشارع ومن منطقة لمنطقة لحد ماهلكنا ، يوم رجعنا للفندق حبينا نشوف وش عندهم من رحلات بحرية وشو هي الجزر وتستحق ولا لا .. عطونا معلومات كامله وكذا رحله بس خبرونا اننا لازم نعطيهم الأوكيه خلال ساعه بالكثير لأن المكاتب راح تسكر … قعدنا نقلب الوضع بروسنا وحطينا عيننا على رحلة لجزر 3 من الفجر الساعه 6 لحد المساء الساعه 6 (12ساعه) وبتكلفة حوالي 70دولار للشخص شامله الغداء والتنقلات من إلى … مرنا الباص وركبنا وأحنا مسفهلين على بالنا (رحاله) وصلنا ذيك الباخره اللي مايحبها قلبكم كنا متخيلين بنركب البواخر العملاقه وأثر الدعوه على دورين وبس … اللي في الباخره كلهم أوروبيين ويابانيين … وكلهم متسدحين ومتقبلين هالشمس (مستانسين) وأحنا متغبين داخل الكبينه ندور البراد .. مالنا ومال الشغلات .. المهم ونفرفر في هالباخرة ونتمايل اللي جاه دوار البحر واللي متصروع من الحر (موب أنا) لحد ماوصلنا أول الجزر الثلاث قلنا خير يالله نزلنا ومعنا ساعتين نتمشى ونرجع قبل علشان الباخره راح تكمل خط سيرها .. والله وأحنا ندربي روسنا مع هالعالم وين مايروحون .. اللي شايل شنطه على ظهره وحاط مستلزماته وحنا ايدينا فاضيه مغير نقلب روسنا (دلوخ) لا وابو الشباب خوينا (ابوناصر) مسويلي فيها أوروبي فاصخ التي شيرت وجالس يتشمس .. مادرا وش بيصير له بعدين .. المهم خذينا فره بهالجزيره ومترناه شبر شبر وماخلينا بيت ماطلطلنا فيه خبركم عربووووش بلوغين .. وجاء وقت الرجعه للباخره وركبنا.. وجلسنا ننتظر الجزيرة اللي بعدها وش بنشوف قالو يالله هذي الجزيرة الثانية أنزلو ولكم ساعتين فيها بس نزلنا ونفس الجزيرة اللي قبل بس اللي فيها أختلاف محلات الأيسكريم أكثر ولا نسخه كربونيه من اللي قبل .. درنا وبيني وبينكم ولا أحد يدري ملينا .. عرب مانعرف شلون نستانس … بس أفطرنا فطور على كيفنا (موب أنا) جاء وقت الرجعة للباخره .. قالو يالله بنحطكم قسمين علشان الغداء مايصير فيه زحمه .. قلنا طيب وين المفاطيح والمشاوي واللزي منه . يوم جاء الغداء وش نشوف نقلب الصحون نبي ندور شي نآكله مالقينا الا قطيعة لحمه وشكلها (خنزير) صوتناله قلنا وش هذا قال ماعليكم كلو وحطو في بطنكم بطيخ صيفي ( ألا على فكره شلون الجح مدهر الحين ) وصار اللحم خراف وشوية سلطة وزبده كالعاده واللي تبي من المشروبات الغازية .. طقطنا ابو الصحن وطلعنا نبي نتشمس (أوروبيين) وصلنا الجزيرة الثالثة وقربت رجعتنا للفندق نزلنا لهالجزيرة وأثرها شغل عدل أحسن من اللي قبل .. ايه هذي الجزر اللي يحبها قلبكم .. قعدنا نفرفر فيها ومادرينا الا الوقت وصل حده ولا ودنا نرجع بس شنسوي مجبورين .. ويم ركبنا قالو فيه حفله مسوينها لكم واللي يحب يروح للصالة .. قلنا ممتاز منها نتبرد ومنها نتسلى لحد ما نآصل .. قلنا أكيد فيها سامري وشغل عدل يوم بدة الحفله ويجيك هالخبل ويقعد يسوي عروض سحرية ومن هالخرابيط ويقعدون يغنون أغانيهم وحنا ندربي روسنا ماندري وش يقولون .. لحد ماقلنا بس الفكه .. واثر الشمس بادية تنزل شوي وتبرد .. وصلنا أثينا ورجعونا للفندق .. وقلنا وينك يالفراش نبي النوم .. يوم جت الساعه 10 وبدينا نغطرش بالنوم يوم انه تسكر التكييف .. ياهوووه شسالفه .. والله واجيك وآخذ شرشفي والمخده وأطلع بالبلكونه ابي البراد وأصكها نومه لحد الصبح (غرابيل) وخويي ولا همه نايم بالغرفه وبعد منغطي .. مقلب هذا الفندق بجد ..
صحينا الصبح وشلنا عفشنا وعلى المطار انطلقنا .. للسفر لباريس ونطقطق في المطار شوي ونتمشى لين جاء وقت الرحله ركبنا الطياره وشوي توقف المحركات قالو فيه حاله عندنا مريضه ولازم نجيب لها الأسعاف .. ياهووووه شغلو المكيفات كتمه مافيه امل يردون عليك .. ويقوم هالكواحد واللي هو يرطن عليهم بالفرنسي وشيل وحط معهم لين جاء وقت الرحله .. يوم جاء وجلس بجنبا وبدى يقرق علينا عربي طلع فرنسي عايش بالأسكندرية ويتقن العربية .. وقاعد يتهزء بالأخوان المصريين ونطقهم للدجاجه (دقاقه) يقول وش هاللغه عندهم .. وقرق لحد ماوصلنا لباريس ..

طولت عليكم مافيه شي صح ... طيب ...
http://www.conferenceathens.com/info.htm
http://www.greecebyclick.com/
http://www.greekhotel.com/athens/london/home.htm
[ALIGN=CENTER]غرفة الفندق

[/ALIGN]الى اللقاء في حلقة باريس
بمان الله الكريم[/SIZE]

مواضيع عشوائيه ممكن تكون تعجبك اخترناها لك:

• بلجيكا ابي مساعده لو تكرمتوا
• من أغلى؟
• افضل الفنادق في هولندا
• مسافر ل دول اوربية
• امستردام وماحولها
• استفسار لخبراء امستردام
• شوفوا ان تشردت وتصعلكت في بولندا ترا بحملكم المسؤوليه كامله افزعوا
• مساعده من الاخوه الاعضاء والمشرفين الخبراء فيزا الشنغن
• هل فيزا الشنغن تشمل بولندا
• رأيكم في هولندا وبلجيكا في ديسمبر
• سؤاااااااال
• روسيا؟؟؟
• مساعدة في ترتيب رحلتي لهولندا وكيفية التنقل
• تقرير رحلتي الى بلجيكا و هولندا
• المصــــــحات التشـــــيكية للعـــــلاج الطبــيـــــعى
• اوروبا استفسار
• اجمل الرحلات الى اوكرانيا
• دول اوربا
• رايح لجورجيا وابي فزعتكم يالمطانيخ
• تأشيرة بلغاريا

اقول ترى ننتظر رحلتكم الى باريس...

تصدق انى حسيت بالحر... اجل تقول حر باثينا...\

ان شاء الله تلقون البرد بباريس

تحياتى لك وننتظر رحلتكم لباريس..


اخوك
الخواطـر

خوش رحلة . وأسلوب مشوق ياماس .. أبدعت حقاً في وصفك للرحلة . حسيت أني معاكم ههههههههه وعلى قوله أخوي الخواطر .. حسيت بالحر هههههههههه ..

تحياتي لك أخي العزيز .. وننتظر رحلتك إلى باريس ..

بس عندي ملاحظة . يمكن بعض الأعضاء مايعرفون عواصم المدن . ومايعرفونها إلا بأسمها .. وأنا باوضحلهم ..
- أثينا = عاصمـة (اليونــان) .
- باريس = عاصمـة (فرنسـا) .
- بودابست = عاصمة (هنغاريا أو المجـر) .

تحياتي لكم
بومحمد

ههههههههههه اي والله حر وموت بعد ....

عافاك الله مشرفنا الرائع على تشجيعك لنا ... وشاكر لك أخوي بومحمد على التوضيح والتشجيع ...

وأن شاءالله بكمل الباقي بس عاد بيجينا البرد شوي شوي جهزو الملابس الشتوية ..والله يعينكم على امستردام ...

تحياتي للجميع

في أنتظار التكملة بأحر من جمــر ..

بومحمد

تحية لمشرفنا الموقر وشاكر لك مرورك ...

ياليت معي صورة ظهره كان وريتكم اياها ... طبعاً ماقدر لا يلبس فنيلة ولا يتغطى من الحراره اللي في جسمه ... جلده تحمر وصابتة الحساسية ثم اسود وبعده تقشر .. فصل جداً حلو بس ياليت الصوره والله لا اطلعها ...

وأن شاءالله راح اكلمها اليوم ولا بكرا ان شاءالله

أبدعت أبدعت ياماس .. ننتظر البقيـة

بومحمد

هلا وغلا فيك خيو ابومحمد وشاكر لك إطلاعك ...

حبيت ابين شغلة فاوتشر القطار ... فاوتشر القطار محدد بحيث لا يقل عن 5 أيام ويصل إلى 15 يوم .. مامعنى هذا ... الخمسة أيام في الشهر تعني .. انه لك الحق في ركوب القطار لمدة خمسة أيام بما لا يزيد عن شهر وبعدة مرات ... فلنقل أننا ركبنا القطار من باريس إلى أمستردام ونزلنا فيها وانتهى اليوم الذي ركبنا فيه القطار .. فيعتبر أنه نقص لدينا يوم .. فلو ركبنا القطار من باريس إلى امستردام .. ومن ثم ركبنا قطار آخر من أمستردام إلى فرانكفورت .. ومن ثم إلى جنيف بنفس اليوم فهو يحسب (يوم واحد ) وليس ثلاثة لأنه لم ينتهي هذا اليوم ...

هنا موقع اليورو باص ( http://www.europass-uk.co.uk/ )

فهمتو هذه النقطه ولا أنا لخبطة الوضع

ننتظر التكملة ياماس

[align=center]حياك الله اخيو بومحمد وشاكر لك متابعتك .... وأعذرني على الإطالة ..

بالنسبة للتحذيرات اللي خبرونا عنها وهي تنصب دائكاً بالمخدرات ومروجيها ... لأنه بالعمل أتضح ان أمستردام مدينة لمتعاطي المخدرات وهي مسموح بها بشكل فضيع ... والمشكله كما قلت انه المروجين هم من الصل أفريقي أما عرب أو أفارقة سود .. فالحذر الحذر منهم ..

والله المستعان[/align]

[SIZE=2.5]
[ALIGN=CENTER]
{- فــرانكــفــورت -}
[/ALIGN]
وصلنا بحمد الله ورعايته محطة قطارات فرانكفورت ولا وش تشوف .. محطة ولا أروع أحسن من مطارات بعض الدول اللي في بالي ونسيت أقولكم أننا لقينا بالقطار بروشتات عن فنادق أيبيس وعليهن عروض سياحية .. قلنا يالله وبكم 130 مارك ألماني وقلنا كانة مثل فندق أمستردام بيكون حلو .. طبعاً كعابي نظراً لقربه للمحطة .. وهذا هو وبجنبه صار عندنا بقالة عربية واللي يبيع فيها عراقي طبعاً صار صديقنا وصرنا كل شوي نمسي ونصبح عليه (لزقات) وبرضه مكتب سياحي عربي ... السكن صاير في منطقة يغلب عليها الأتراك والعرب .. لكن هادئة بشكل عام ... صار فندقنا يطل على نهر الريفيرا ...

الشي الوحيد الجميل فيها أنه فيه شارع طويل مرصوف (شارع روبماركت RoBmarkt ويتقاطع مع طريق زيل Zeil ) في هذا الشارعين راح تلاقون كل شي ... فرق متجولة غنائية وراقصة ... اسواق ومراكز تجارية .. مطاعم ... مقاهي ... ساحة لعروض الأزياء مباشر ...يعني شارع ماتمله .. طويل وكل شي فيه ...

بشكل عام فرانكفورت مافيها غير البنيان والعمارة الحديثة ... مراكز تجارية وبس .. مشكلتنا انه مانعرف فيها شي ولا أخذنا معلومات تفيدنا ... لأنه بالأخير أتضح أن القرى والمناطق الخارجية من المدن الكبيرة أفضل بكثير .. بكن خيره فيما أختاره الله ...

جلسنا في فرانكفورت ليلتين .. اليلة الثانية يوم رجعنا للفندق بعد ما أخذنا التوقيت حق القطار والجدول كامل لأوروبا ... جلسنا نمخمخ وين وجهتنا التالية راح تكون ... صار فيها مطاق اللي يقول خلو نروح لبرشلونه واللي يقول خلو نروح لجنيف قبل ... طاخ طيخ طاخ .. لحد ما قررنا جنيف ...

صحينا الصبح بدري كالعادة وتوجهنا لمحطة القطار لنستقل أقرب رحلة متوجهة لجنيف ... ولنا عودة في جنيف البلد الجميل الساحر ..

http://www.germany-tourism.de/index.html
http://www.alltravelgermany.com
http://www.frankfurt-tourismus.de/default.htm
http://www.ibishotel.com/ibis/ficheh...he_hotel.shtml
[ALIGN=CENTER]خارطة الفندق


[/ALIGN]


الى اللقاء في حلقة جنيف وهي الأجمل
بمان الله الكريم
[/SIZE]

هلا والله بالرحاله ابن بطوطة...

اقول ماكنكم استعجلتو بالروحة من المانيا.... وراكم طايرين...

تسلم على الابداع في الطرح....

وننتظر جنيف... لايكون نسيتو تشتروا ساعات منها....

تحياتى...

ترى أنا اول واحد ينتظر حلقه جنييييييييف
اخلص علي

حيا الله مديرنا ... والله يا حبيبي المشكلة تكمن اننا أصلاً ماكان عندنا نية نروحلها بس جت بالطريق وقلنا نشوف وش عندها ... والثانية أننا ماعرفنا وين نروح له .. ولا المفروض رحنا لميونخ أحسن ... لكن الخيره فيما أختاره الله ..

شاكر لك مشرفنا أول حبيب وجنيف جاية ويازينه بعد ,,,,

هلا والله وغلا فيك ترافلير ... متعودين منك الأطراء الحلو زي أفعالك أخوي ...

الاوربي مشاء الله عليكم
لفة اوربية ممتازة ان شاء الله نلف لفة مثلها لكن بعد حين...

عجل علينا برحلتكم الى فينا..

تحياتى لك

الله عليك ياماس بجد جوله ولا اروع والوصف ما في احلى من كذا والله انى اتمنيت انى اكون معاكم في هل الرحله الاكثر من رائعه
يعطيك الف عافيه ولا تحرمنا من رحلاتك المميزه
تقبل تقديري واحترامي

ياماس الحقيقة ما أدري وش أقول لكن رحلة بجد ممتعة وكل ما استانس معك في سردك تعطينا مبلغ دسم تخليني أغير رأيي في أوروبا فندق 3 نجوم 150 دولار يعني اسبوع 1000 هذا بس السكن .
ننتظر منك التتمة تحياتي .

ماشاء الله ياماس ...
الرحله باين عليها رائعه .. لكن أعتقد أنها متعبه جداا ...
إحنا في إنتظار تكملة الرحله ... ولا تتأخر علينا ..
أخوك
ماجد

ياماس

رحله رائعه اخوي اكيد انك انبسطت فيها بس عندي سؤال لك بدياليت تجاوب عليه بصراحه

وين ارتحت اكثر في اوربا والا شرق اسيا ؟؟وليش؟؟

تحياتي لك

حياك الله اخوي wakree .... وشاكر لك مرورك ...

اخوي من بعد ماطحت بشرق أسيا وانا ماعمري فكرت بأوروبا الا يمكن الحين ... لكن صراحةً فيه فرق في أشياء لصالح أوروبا وأشياء لصالح أسيا ...

بس يكفيني في أسيا أني مرتاح فيها اكثر وبدون أي خوف من أي شي يحصل وغير أنها أرخص بكثير من أوروبا ... ولا نقدر نقول اوروبا افضل بالتنظيم ولكن هناك كامليزيا وسنغافوره تشاطران الدول الأوروبية تنظيمياً ....

وبكل سهوله اقولك اسيا افضل لي أنا ومن وجهة نظري ...

تحياتي لك يالغالي

شكرا اخي ياماس على هذا الطرح الممتاز لهذه الرحلة الطويلة ,,,,,
وانا اوافقك بأن لأسيا جاذبية عجيبة ,,,,
تحياتي

[ALIGN=CENTER]فعلاً كانت الرحله ممتعه لكن متعبه شوي ... كما سبق وقلت .. كنا نتمنى أننا نعيدها لبلدان اخرى لكن ما الله كتب لنا ... رفقه حلوه وفيها شيل وحط بينات بعض خاصه بيني وبين ابوعزيز (الله يهديه زعول شوي) لكن على طول يسامح ( حبيب وعسل والله ) ابو ناصر أكثر واحد مل ويبي يرتاح بس بما انه يخاف من ابوعزيز فهو حاط حيله علي وكل شي يبيه يقولي علشان اتوسط ( وانا ما ادري انه يوهقني معه ) .. ابو ريم مادري وش يبي ماعمره اعترض ابد الا يوم نآخذ سكن غالي ... يقوم ينافخ علينا ويصايح .... انا والعياذ بالله من كلمة انا ... دائماً أتهاوش مع الشباب مره مع ابوناصر يوم في أمستردام .. ومره مع ابوعزيز يوم الحجز للعوده ... يقولي اني انا لكن مدري ليش حاطه بظهري .. المشكله ابو ريم عارف بس بما انه يخاف منه فهو ضدي .... ابو ناصر يضحك من تحت لتحت ... يالله عسى الله يجمعنا مره ثانيه بس المشكله كلهم اعرسو ألا أنا ... توهقة بالحياة ....

معاليه حبايبي طولة عليكم .. وقرقي صار كثير ... وهذه هي الرحله كما أحببت ان أوصفها لكم جميعاً بأمل أنكم لم تملوها مني وعلى إطالتي ووقفاتي الطويله الخارجة عن الإراده ... طبعاً فيه ناس ماعجبهم أسلوبي وناس عاجبهم .. والعذر والسموحه من الجميع ...

تحياتي للجميع وتمنياتي لكم بكل صحه وعافيه
أخوكم
Ya-mas[/ALIGN]

موضوع متعوب عليه .....
ويعطيك ألف عافية اخوي ياماس...
ماشالله عليك , رحالة زمانك ......
تحياتي .....

من جد الموضوع متعوب عليه لكن وراك موزى الموضوع خايف اعضاء اندونيسيا يدرون عنك

والله حرام طحت عليه بالصدفه

بس بقولك شى تعال لحالك ابيك بكلمة راس


































اول مره اشوف اوروبى اسمهya-mas

اخوي يمكن يكون تعليقي متاخر شوي لاني توني شايفة الموضوع وحبيت اعلق عن اثينا..مادري ليش ماعجبتك مع ان انا لما رحت لها في شهر العسل وكنت رايحة اكثر من دولة معاها ماعجبتنا الا اثينا وفينسيا..يمكن الفندق اللي قعدت فيه مب اوكي..
وبعدين اليونان فيها رحلات كثيرة كنا نروح في الجبال رحلات خيالية..ولازم تكون رحت الاكروبولس..وعندهم شارع يشبه خان الخليلي ((يمكن اسمه البالاكا))..وحتى سوق السمك والخضار حلو..والصراحة كان جوهم حلو في الفترة اللي رحت فيها..وكان 1-7..ولو كنت تشوف انها حارة شوبتقول عن رووووما اللي كانك رايح مصر؟؟؟؟؟؟؟؟؟
بصراحة شعبهم طيب(( اطيب شعب اوروبي)) واكلهم حلو وفيه نكهة لاني ولا دولة اوروبية ثانية عجبني عندهم الاكل دايما احس انه مافيه طعم...اتمنى لو سمحت لك الفرصة مرة ثانية تزور اليونان انك تروح جزيرة كريت لانها حلوة.. وتسكن في فندق الانتركونتينانتل في اثينا..وتروح المطاعم اللي على البحر..والعشا تروح المطاعم اللي يكون فيها رقص فلكلوري لانها تكون حلوة..

حياك الله اخوي معجب وأخوي ابومضاوي لو انها متأخره لكن والله ما انتبهت ...

ابومضاوي تجي وجبنها وسوينها وصار ياماس اوروبي ... راح يشتغل هناك وتمشى ...:d

أختي ام ياسمينا معك حق باللي تقوليه ... لكن بقولك شغله ذكرتها قبل .. وهي :-
- أحنا هربنا من الحر ولقينا حر عندهم .
- المده فقط 3 أيام وليست كافيه .
- المنطقة مانعرفها ولا سبق عرفنا احد راحلها علشان نآخذ منه معلومات .

ويمكن هالأسباب خلتنا ما ننبسط لكن بعدين عرفنا انها بلد جميل نوعاً ماء ..

شاكر لك مرورك وتعليقك ...

أخوي وخبيرنا الباتشينو ... تشكر اخوي وشرق غير ..

تحياتي للجميع

السلام عليكم ورحمة الله

أحيي المغامرين الاربعة وخاصة ياماس الصراحة موضوع متعوب عليه وحلو ومتسلسل فى الاحداث والله يجمعكم مرة ثانية في رحلات اخرى مشكور اخوى ما قصرت حسيت اني معاكم خطوة بخطوة من حلات سردك للموضوع بدقه

[align=center]
الله يعطيك العافيه اخوي ya-mas الصراحة جهد
رااائع رااائع رااائع رااائع رااائع
رااائع رااائع رااائع رااائع
رااائع رااائع رااائع
رااائع رااائع
رااائع
وشكرا على المعلومات القيمة اللي في التقرير وعلى السرد الشيق للرحلة الممتعة بكل ما فيها [/align]

[align=center]
وعليكم السلام ورحمة الله وبركاتة

حياك الله اخوي راعي سويسرا وشاكر لك مرورك وتعليقك المهم لي وذلك لخبرتك الواسعه الجميلة الممتعة ....

والله يجمعنا مع كل من نحب في جناة النعيم ....

أخوي النمساوي يجملي حالك على هالأطراء وهذا من ذوقك أخوي ...

تحية وتقدير للجميع
[/align]

للرفع . لأنه فعلاً موضوع رائع