بسم الله الرحمن الرحيم
كما وعدتكم بالتقرير قبل أسافر سويت شويت زحمة (ترقبوا تقرير مفصل عن بولندا):114:أدري و الله أن التقرير تأخر مره لكن حبيت أكتبه بكل تأني على شان ما تفوت كثير من الأشياء اللي قد يستفيد منها المسافر وكذا نكون وصلنا الفكرة للجميع ويكون ما خذ فكرة كافيه عن البلد وكيف تتستخرج الفيزا من مصاردها عندنا هنا في الرياض :106:
هذا سلمكم الله قررت أسافرللسياحة في بولندا في شهر 5تقريبا لكن من ما عزمت مره الا بعد رمضان بسبب ظروفي الخاصة:108:
وكان مدة الفيزا تقريبا أربعة أشهر وكانت الرحلة في آخر العشرين يوم الأخيرة بالنسبة للفيزا (يعني لو خلصت عليك الفيزا وأنت هناك يبيلك حانه ومانه على شان تطلع من الورطة)..:110:
أول شئ الفيزا وطريقتها :
لحسن الحظ كان عندي صديق في بولندا هو اللي أرسل لي الدعوة(يعني إذا ما عندك استعانه بصديق ويسوي لك دعوة وحركات مافيه روحه اقضب ارضك):11ccer: طبعا أول خطوة تدير سلف السيارة وتروح إلى أقرب مكتب سياحة فاهم وعارف بالشغلات هذي على شان ينجز أمورك بالنسبة لسعر الفيزا كلفت 545 ريال وجلست عند السفارة تقريبا 20 يوم وكان عندي رقمهم وكنت أتواصل معهم أول بأول يعني مرسلها عن طريق المكتب الله يسلمه..
متطلبات الفيزا الى بولندا :
يرسل جوازك إلى السفارة معه 4 صورة فيها خشتك المملوحة بخلفية بيضاء لا يلعب عليك الهندي ويحط لك لون فوشي:109: ترا يرفضونها مثل ما قلت المكتب عنده المعلومات الكافيه بأن تخرج الفيزا دون أيه عوائق-مو تروح لمكتب قبل أمس فاتح ما يدري وش السالفة يتعبك – :105:أذكر طلبوا بعد كشف حساب من البنك تكون مختومة و تأمين صحي أنت تتختار المدة اللي تبي:king: على الفكرة التأمين هي أول خطوة تقوم بها قبل كل شئ
# اللي راح يرسله لك المكتب للسفارة:
-جوازك الأصلي
-4صور لوجهك
-التأمين الصحي
-دعوة الصديق اللي راح يستقبلك هناك
-كشف الحساب من البنك
-قيمة الفيزا كما هو مذكر أعلاه
عقبها أمسك لك ورده وتنفها وقل لنفسك(يوافقون ...ما يوافقون ...يوافقون ):55654:
إذا وافقو زين على زين ما واذا ما وافقوا راحت عليك قيمة الفيزا والتأمين وخيرها في غيرها ..
يبدوا لي أنتهينا من الفيزا جاء دور الحجز وما أدراك ما الحجز سراحه تتعب بين الأسعار وأفضل الخطوط لكن وفقت بالخطوط النمساوية بقيمة 3700 ريال سعر التذكرة سعر مره زين ورخيص ماقارنة بغيره وغير كذا أحيانا تلقى شئ زين بس تكون تطلع من جدة مثل والعودة الرياض وهذا اللي ما أبغاه أما عيب الخطوط لو طرا لك طاري وتغير موعد الرحلة تدفع 100يورو هذا كلام مكتب السياحة اللي هنا بينما سألت نفس الخطوط و أنا جالس أنتظر الرحلة 6 ساعات في فيينا الى وارسوا قالوا لي تدقع 135 يورو يعني أمسك ال135 يورو وأضربها في عملة دولتك اذا كنت خليجي مثلا تطلع قيمة تغيير الموعد . على العموم الحمد لله ما أحتجت إلى تغيير الموعد وكانت الرحلة 22 يوما تماما من الرياض إلى فيينا –انتظار 6ساعات –ومن فيينا إلى وارسوا وما أدراك ما وارسوا وهي عاصمة بولندا أول ما تحط رجلك في وارسو قلهم ودوني إلى المدينة القديمة OLD CITY أتركونا الآن في طريقة (الفيزا والحجز) وتفاصيل الرحلة جاية إنشاء الله بالتقرير الجاي لأنه لو قلت لهم أولد ستي ماراح أحد يفهم كلامك لأنه لغتهم غير الا اذا وفقك الله بواحد يعرف english وكذلك العودة مثل وارسو فيينا فيينا الرياض بس الفرق أني ما انتظرت :114:واجد يعني من طيارة وارسو رحت مباشرة إلى طيارة الرياض وكانت كبيرة وواسعة فيها ايرباق وجلنط وفتحه –صارت سيارة ذي- كان أنتظار بسيط مره ممكن أن المسافر يتحمله بس سراحة أنا قصرت في الكلام مع الخطوط المذكوره انفا سرحا جدا روعة من ناحية ترتيب الرحلات من القهر الأمي يدري متى رحلته لأنه طريقة المعلومه بشاشة المطار مرتبه ومنمقة ومرصعة بالأماس –الظاهر راضع مع صايغ ذا-:36_1_40: أنا ما لحقت على الرحلات مثل ما يقولون السايح قبل سنه وسنتين والله تبهذلنا في المطار و التفتيش الآن بسبب التكنلوجيا كل شئ سهل ما أذكر عاقني أي عائق لا في دخلت فيينا ولا وارسو أذكر في مطار وارسوا خذ شنطتك ورح حتى قلت لصديقي وشلون أدخل الدولة لا ختم ولا أي شئ-مواظب ما تلاحظون- ونظامي بعد رحنا سألنا قالوا لا هذا النظام الجديد قلت الله يسلم التكنلوجيا –ماله دخل- بس المشكلة الوحيدة اللي و اجهتني مع الخطوط في يوم الرجعة وأنا في وارسوا كان معي عفش زيادة –تخبرون الحقاق لمن يعز علي- وقفه مع كلمة الحقاق هي كلمة كانت تستخدم قبل العهد الأموي أو العباسي :baaa2:من قدمه وهي تعني (هدية ):101:وأذكر في فترة الطفولة أنه إذا جاءت فترة الحج و جاء الحجاج من الحج تحسب نقول لهم تقبل الله ولا يا زين صلعتك:109: لا على طول وين الحقاق ...بالله لا تخرج برا موضوعنا يا خي ورانا أهلنا وأشغال كثيرة .. بسراحة اللي كانت معي شوية أغراض وملابس أشتريتها من بولندا وصدموني قالوا العفش عندك كثير الظاهر طلع عندي 15 كليو زيادة وعلى شان نركبها تدفع 750 زلوتي اللي هي عملة بولندا يعني فوق 1000 ريال .
و عقبه الله لا يوريك أنخبصت خبصة في المطار ماتبي غيره حطيت الوزن المسموح فيه بالعفش والباقي قلت أبي أخليه بالمطار لما الله يفرجه ..أخذت الباقي جالس أنتظر الرحلة وأنا جالس أنتظر ما دريت الا جاء مجموعة من أخواننا المصريين الا معهم أكثر من اللي معي الظاهر صار لهم مثل ما صار لي السراحة فرحت قلت اللي يبي يسونه أبي أسويه والا الشكوى لله خل أغراضك عندهم ورب البيت كريم وبعد طول أنتظار جاء موعد الركوب اذا بالمصريين يدخلون أغراضهم والمظيفة نتاظر :36_1_27:–يعني ما جاز لها الوضع – جاء دوري وبكل بساطة أدخل ودون أيه لجة ولا صجة ولا مزابد ولا لبن وش لبن الظاهر من زمان ما شرب لبن:36_1_29: على فكرة أكثر شئ هناك البقر من القهر تدخلك محل تلقى الكاشير بقره من كثرهن أو بدال ما تروح تشتري قنينة من اللبن تلقى بقرة واقفة عند باب البقالة التر بـ 1زلوتي هذا اللي بنكهة الليمون أما اللي بالفراولة لا أغلى شوي :109::097: ... عساي ما نسيت شئ مهم لكن كل اللي أعرفه أنه أجراءت السفر والمطارات أسهل بكثير من أول وأهم شئ تحافظ على كل شئ معك عبارة عن ورق لأن الورق الآن هو المساعد الأول والأخير لك أيها المسافر والورق اللي أقصده ما بين جواز ودراهم وتذاكر حتى التذاكر صارت كم حروف وارقام بس حتى بأمكانك تحفظها وتكون معك على طول.. راحت قولت ضاعت تذكرتي ضاع حجزي أسمك بالجواز يكفي ورقم الحجز أيضا
أتمنى أنكم أستمتعتوا في التقرير الغثيث اللي دايم يطلع عن الجادة لكن هذا على شان ما تمل من القراءة
وإلى لقاء قريب في الجزء الثاني وراح أحاول يكون فيه صور لانه معي حوالي 600 صورة ومن الصعوبة بمكان أني اضعها كلها ...وراح أشرح لكم كيف كانت أقامتي في هذا البلد الجميل كيفية الصرف الفلوس وغيره ما سوف تجده مفيد وممتع:smile001:
رد مع اقتباس
المشاركة الأصلية كتبت بواسطة غلا الإمارات
المفضلات