أنا احمد عمري عشر سنين، قال لي والدي يالله نروح جبل الشمس في عمان قلت له ما أبغي.
كان ينش و يبطل السوني مالييه من التلفزيون. كان أقول له انزين بروح وياك.
نحن طبعا عائلة مكونة من ستة أنفار – أم و أبو و ثلاث بنات و أنا أصغر واحد. عندنا بعد واحد بلوشي من عائلة بلوشية يالس عندنا طول الوقت و ساعات يرجع عند عائلته البلوشية ييلس يلعب وياهم سوني 3. طبعا نحنا ما عندنا سوني 3 عندنا بس سوني 2 و جهاز وي.
طلعنا اليوم الصبح من البيت و شلينا ويانا كل واحد كوب شاهي حليب كرك و خبزتين باراتا. طبعا انا الحين مب قادر احط لكم الصور لاني ابغي حد يعلمني شقايل.
طلعنا من بيتنا و مرينا على منطقة مزيد اللي فيها فاتحين الكارفور اليديد. وايد عود. اشترينا انا و ابوييه كباب ني متبل و فحم و اشيا غير وبعدين ركبنا السيارة و نهينا ......
عند الحدود دخل ابوييه و اشترى انشورانس من الحدود. و بعدين وقعوا لنا جوازاتنا وقالوا لابوييه خل ولدك يطلع الاول كان يقول ان شاء الله. الطريق عادي وخالي وووسيع وصلنا بلاد اسمها السنينة وجان نصلي فيها صلاة الجمعة كان يصلي فيهم واحد باكستاني او بلوشي لكنه يقول الخطبة ويقرا بالعربي.
بعد ما صلينا الجمعه قال لييه ابوييه صل العصر قصر و جمع جان اصلي عدال ابويييه. بعدين وقفن نصب بترول و اشترينا حليب كاكا و ابوييه اشترى لبن مال العمانيين. انا دورت حليب مال الامارات م حصلت جان اشتري مال العين.
بعدين تمينا نسولف انا و ابوييه لين وصلنا بلاد اسمها عبري تقريبا طلعنا الصبح الساعه تسع وصلنا عبري الساعه هنتين. بعدين تمينا نمشي في عبري وتحول الطريق الى طريق ضيق ويلس ابوييه يتجاوز سيارات الناس من اليسار و يشرد على اليمين قبل ما يدعمونه وانا كنت زايغ ومرة كانت عنز واقفة عدال الطريق.
طبعا انا اسمي احمد بن سعيد بن علي و اسم ابوييه سعيد بن علي.
المهم.
الطريق لين بهلة تقريبا ساعة ونص بعدين ابوييه قال دور الحمرا. يوم حصلنا الحمرا جان نلف صوبها وايلاها بلاد عودة يالسة عند ريول اليبل يعني الجبل, والجبل عود.
يوم صعدنا الجبل بدات الصعدات تستوي قوية و اللفات اقوى و اقوى بعدين خفت نطيح و قعدت اقول حق ابوييه ابوييه خوز عن طرف الييبل. وسيارتنا دبة يعني سبربان من الكبار و مسكينة تمشي بصعوبة. تذكرت يوم كنت امس مع امييه و خواتييه و سيلانيتنا الاثيوبية. يعني اول مرة اركب الدائرة العودة المستديرة اللي تصعد فوق وتحت اللي فالقريه العالميه و اتذكر اني خفت مثل ما خفت اليوم. طبعا القرية العالمية وايد حلوة هاي الايام و فيها اليرادة وركبت كريزي ماوس و بات مات والقارب المائي.
صرخ علييه ابوييه قال شوف شوف هكييه سيارات واقفة في فتحه في اليبل. جان نلف و نوقف حصلنا واحد عماني راكب كروزر و سلمنا عليه و رد علينا السلام و نزل
قال انا اشتغل مرشد سياحي و اغلب السياح المان اوديهم قريتنا وجان يراوينا قريتهم كانت مثل الواحد في وسط وادي عميق. خذ ابوييه رقمه و اسمه و قال بحطه في تقريري عشان يتصلون بك الناس. وشكله ريال طيب و نفعنا ببعض النصائح.
بعدين كملنا و فجاة استوى الشارع قرقرة و يلست لسيارة العودة تختض وانا يلست اقول حق ابوييه ابوييه خفف ويتنا سيارة نازلة بسرعة كبيرة و كان الشارع وايد ضيق ويلسنا نصور كل شوي.
فجأة يت لفة على اليمين و حصلنا حريم و بنات واقفات على لفة الشارع وهن يبغن يبيعن أشياء حق الاجانب. سلمنا عليهم و لفينا و استوى الشارع قار مرة ثانية و شوية جدام كان مقطع و المنظر جدا جميل.
حلقة 2
الحين تعبان و خلص الشحن بكمل لكم القصة بعدين.
الحينه وصلنا عند المخيم تحت اليبل فيه بيوت صغار مصنوعة من حصا مال اليبل .... و مكتبهم مال اللي يدفعون الفلوس صغير و فيه قصص أطفال و محطين ليتات على الشوارع الصغيرة بين البوت....
نزلنا من السيارة و ماكان فيه حد ما عدا كم سيارة يالسين يغادرون الفندق بعدين عرفنا السبب ...
يلس ابوييه يكلم الريال اللي في الفندق كان يقول له – كم بتعطونا الليلة قال الريال علشان انتو خليجيين مثلنا بنعطيكم سعر خاص و انا نسيت كم قال يمكن 27 أو 37 ريال مع العشاء و الفطور لمدة ليلة وحدة يعني هيه تذكرت نحنا اشترينا 10 ريال ب 94 ربية اماراتية همممم ....ز يعني ما أدري كم ... عقب نظفولنا الحجرة و ارتاحينا شوي و ينش ابوييه و يفتح الدبة و يطلع الأغراض و ...
كنا مشترين فحم مال استعمال مرة وحدة و يعقونه كان يطلعه ابوييه و قال ليييه يا داني تعال ساعدنييه .... و ولعنا الضو و شوينا الكباب
بعد كان فيه فواكه و عصير و خبز و كيك
بعدين رحنا نمشي ويا الطباخ وودانا الوادي عدال المخيم وكان بيتوي المغرب و رجعنا و صلينا .....
في الليل اكن وايد برد بس تلحفنا بالبرانيص الضخمة
أصبح الصبح قمنا من الفجر و صلينا و عقب طلعنا بالسيارة شوي قريب عند شيء يسمونه القراند كانيوون يعني الفج العميق ......
كان المنظر وايد حلو و الغيوم كانت تحتنا أكننا في طيارة ....وصورنا صور
بعدين رجعنا تريقنا
شافينا ناس فرنسيين ثنينه ريال شيبة و حرمته العيوز وكانوا يعرفون انقليزي و باباتي يعرف بعد و انا بعد جريء و ما أخيل (يعني أخجل بالفصيح) و كان أرمس وياهم بالانقليزي و يلسوا يتعجبون منييه ويسولفون وياييه ... عقب ما استووا اصدقاءنا قلنا لهم نحنا نبغي نطلع اليبل اشرايكم تروحون ويانا ؟
قالوا أوكيه و كان نروح وياهم
يلسوا يصورونا بكيمرتنا و و بكيمرتهم و نحنا بعد صورناهم
بعدين ابوييه الدب تعب و قال يالله نرجع كان نرجع
بعدين رحنا الفندق الجبلي و ضبينا اغراضنا و سلمنا عليهم و رجعنا العين
وإذا عندكم أي سؤال أنا مستعد بس لازم تسألون و تقولون يا داني يا بطل و بعدين بجاوبكممواضيع عشوائيه ممكن تكون تعجبك اخترناها لك:
- الذهاب الى صلاله برا من ابوظبى
- بسافر من الاحساء الى صلالة بس عندي اكسنت 2014 تنفع ولا
- مساعدة ضروووووورية
- لا زلت في صلاله اي استفسار حاضرين
- افيدوني ياهل الخبرة بخصوص صلالـــة
- ساعدتكم والان اطلبكم تساعدوني
- سؤال مهم لاهل الخبرة بصلالة خصوصا السعوديين
- الطيران العماني يدرس افتتاح خط مباشر بين السلطنة والصين
- لأهل صلالة ومحبيها مهم جداً جداً جداً
- ارجوا المساعده من لديه الخبر اليقين عاجل؟؟
- كيف العيد في صلاله
- السنة هذي ناوين على صلالةوش تنصحونا فيه؟؟؟
- طريق عبري المختصر و المجازفة العائلية الى صلالة
- كيف الامطار
- يومان فقط في مسقط ، ماذا أفعل ؟؟؟
- اهل صلاله الكرام وعشاق صلاله خبرتكم ياهل الفزعه
- الجـــــــــــــولان معلومة وصور ؟
- لكل من سافر الى صلاله بالطائره؟
- معدات ومستلزمات الكشته والطلعه
- مساعدةمن اولاد بلادي
رد مع اقتباس
المشاركة الأصلية كتبت بواسطة OMAN44
المشاركة الأصلية كتبت بواسطة عبدالله الوسنان
المفضلات