بسم الله الرحمن الرحيم
السلام عليكم ورحمة الله وبركاته
---------------------
خازوق ما راح أنساه طول عمري وكل ما تذكره أحقد على نفسي وأحس أني مغفل كبير القصة طوال الله عمركم
سافرت سوريا معي صديقي وحبيب عمري دب قريش قصدي محمد تراه الحين سوى رجيم وأبشركم صار تقول عود بس مازلت أقوله دب قريش ، والهدف من سفري ابغي ازبط ضروسي المسوسة واللي بصراحة صرت استحي اضحك بسبب كمية الخراب الموجود في الداخل طبعا مو من أكل الحلاوة تراني متهلس والحلويات نجيبها بس في العيد حق الفطر يعني على قولة فيروز زوروني كل سنة مره حرام تنسوني بالمرة بس من شرب الشاي بكثرة وتدخين الروثمن الله يفكني ويفك المسلمين من شره وتعرفون حبيبنا حمد المانع وزير صحتنا خرب الصحة وجلس على تلها والمستوصفات الأهلية تسلخ ما ترحم وكمان مواعيد يعني قلق قالوا ترى سوريا أرخص قلت للدب مشينا قال تم ما عنده وقت يحب السفريات إن شاء الله تقوله جزر الواق واق يمشي ما يتردد عزوبي ما خش دنيا أخذنا إجازة أسبوعين وصلنا الشام وسكنا في برزة قريب من الكشك الفرنسي عند الشغالة أم عماد هذي كويسة وبنت حلال دريوشة، رحت للدكتور وليد وهذا بعد كويس معي توصية من واحد من الشباب حفر لي سنين في الجلسة الأولى من المسوسات وسوى حشوه لليوم سنعة نسيت أقول الشقة حجزناه من السعودية وتراني والدب خري مري يوم كنت عزوبي زيه بس من تزوجت صرت أطالع في البومات الصور وأتسمع للشباب وش شافوا وش سوو في سفرياتهم يوه مغطت الموضوع أكثر من اللزوم القصة تبدأ ثالث يوم راح الدب لحمامات المقدم يبغي يترو ش ويسوي سونا الله من زود النظافة وتركني في الشقة لحالي كان عندي موعد عند الدكتور راحت من عندي أم عماد بعد ما سوت الشاي لي فجاءة الباب يدق غريبة من هذا أكيد من ها الشواحيد واللي يقرون الكف طالعت مع العين السحرية شفت اثنين عسكر صراحة خفت قلت الدب مسوي شئ الله يستر فتحت الباب خير يا جماعة وش فيه قالوا ما فيه شيء بس حنا نحب نتطمن على السواح يحتاجون شيء ارتحت دخلوا وغلطتي تركت الباب مفتوح وهنا عرفت أني حمار كبير وسيده على الصالة استحيت منهم وقهويتهم شاي يا عله سم يهري وجلسنا نسولف وبدأ ت الأسئلة التقليدية من وين أنت ومن أي قبيلة وين تشتغل وربع ساعة سوالف بصراحة كنت ابغي أصرفهم بس هذولا شرطة المهم فجأة سمعنا صوت داخل الشقة سألوني عندك أحد قلت لا قالوا أيش هذا الصوت قلت مادري وتكرر الصوت المهم قالوا أنت متأكد قلت نعم قالوا ممكن نتأكد قلت تفضلوا ورحت معهم الشقة كلها غرفتين وصالة ودورتين مية أعزكم الله ومطبخ دخلنا المطبخ ما فيه شيء دورات المياة ما فيه شيء غرفة النوم الأولى فاضية المفاجاءة كانت الغرفة الثانية لقينا فيها وحده .............. أنا أنصدمت بالموقف هذي من وين جت وكيف دخلت الحين ركب الفلم علي قالوا شو أبو سعود بتكزب علينا وجلست أحلف إيمان أني أول مرة أشوفها قالوا العب غيرها واللي قهرني لما شافتهم قامت تبكي وتترجاهم بصراحة أنعقد لساني قالوا كم عمرك للبنت قالت عمري 16 سنة قالوا كمان قاصر الله لا يوفقك جاي هون تعربد والله لنأدب السعودية فيك قلت لحظة أنت مصدقينها قالوا هاي هي بغرفة النوم تبعك زلط ملط قلت طيب لحظة أخذت العسكر بعيد وسويت نفسي ذكي قلت إذا هي صادقة تعرف أسمي قالوا طيب نسألها أدامك سألوها قلت أسمي صح البنت جالسة تتسمع قبل لاتدخل غرفة النوم قالوا لها خلاص البسي نوديكم للقسم وقامت تولول وتقول الله يلعن ابو المصاري وقال العسكري أبو شنب أشقر والله غير تختخ في الحبوس يا كلب يا أبن الستة والستين كلب بلعتها وسكت قلت يا جماعة الخير والله ما اعرف البنت ولا عمري شفتها قالوا اخرس يا نوري تغرر بقاصر عشان مصاري قلت ياجماعة الخير تراني ابن ناس وعيلة محترمة وأنا السوالف هذي ما اعرفها قالوا والله راح نأدبك هات الجواز قلت ياجماعة نتفاهم قالوا على شو بدك نتفاهم قلت اللي تشوفونه قال واحد بدك تعطينا رشوة قلت لا مو رشوة هذه قهوة لك وصديقك قال طيب والبنت المسكينة اللي ما احد بيرضى يتجوزها قلت نرضيكم كلكم قالوا شوف البنت كم بدكي قالت أنا مادفعلي شيء وخلص مني قلت الله المستعان كم تبغين قلت 10000 ورأه يعني ( 10000ليرة) قلت خلاص نعطيها عشرة قالوا وحنا قلت كل واحد عشرة قالوا سعرنا بسعر العرصة الله لايوفقك قلت لا نزيد كل واحد خمسة قالوا أبو سعود ماتحس المبلغ مو محرز قلت والله هذا اللي عندي قالوا خلاص بس لا تعودها قلت بقلبي هو أنا سويت شيء الله يلعن أبوكم وأبوها يا عيال الحرام هزيت رأسي دفعت لهم المبلغ وأنا مو مقهور والله مطرطع بس خفت ما راح يصدقني أحد يقولون وش مطلعك الشام ولو قلت السفارة تفزع معي تخبرون ما حولك احد قلت ندفع ونفتك من الفضيحة اللي قهرني البنت لما سألوها كم عمرك قالت 16 سنة يا جماعة الخير تصدقون لو قلت لكم يمكن عمرها الحقيقي أكبر من الشحرورة .
المهم بعد ما طلعوا من الشقة قلت مابدها الجماعة جلسوني على الخازوق ضبيت عفشي وعفش الدب وقلت راحت القريشات اللي كنت مصمدهم ابي ازبط فيها ضريساتي ولما جاء الدب علمته بالسالفة قال نروح نشتكي ونسوي زحمة قلت اليوم بإذن الله وأنا في السعودية قال موعد الدكتور قلت أتصل عليه واشرح له الوضع ماني بجالس في ذي الديرة بعد النصبة يارجال هذولا مافيا فلم كامل عشان يبتزوني، لا وأنا من كثر فرفرتي بالشام كني من أهلهاو أدل كني بوسط الرياض ومقطع أربع ولكيع ينضحك علي يخسيء بشار وأبوه وقلت للدب تكفى واللي يرحم والديك لا تعلم أحد أنهم ضحكوا علي ترى بصير مسخرة ويشرشحون فيني وإن سألنا أحد نكذب نقول ماتوفقنا هناك والأسعار زي بعض يوه يا حمد المانع ذنبي في رقبتك لو حسنت من وضع المراكز مو أحسن من المرمطة لنا توبة ما عاد أسافر لسوريا وحرمتني من طريق التل والحبايب هناك ما عاد فيه فطورات بعد السهرة خير شر .
الحين أفكر لو عسلقت معهم كنت ابي أنفضح ينخرب بيتي وأنمنع من السفر ويتشمت فيني اللي يسوى واللي مايسوى بس جت سلامات وهذي نصيحة أخوكم انتبهوا من النصابين ولا تسوي فيها واثق من نفسك ترى نصبهم فن وشغل عصابات
---------------------------------
للتنبيه وما يمنع الشخص يستفيد من هيك حكايات
-------- أسكن في فندق وريح بالكمواضيع عشوائيه ممكن تكون تعجبك اخترناها لك:
- سؤال عن مطار سوريا
- رحلة الى جنة بلاد الشام
- صور من قرية حلبون
- ليلة وليلة بين بلاد الشام وتركيا والامارات كــتـاب
- فضل الشام فى الاســــــــــــــــــــــــلام
- استفسار بسيط
- مشرفي بوابة سوريا الصراحة المفروض إدارة المنتدى تصرف لهم بدل خطر
- اختبار عجبني كتيررررر
- لقد عدنا اليكم
- عدت من سوريا بـأسوأ وأحسن إنطباع
- دمشق عاصمه الثقافه العربيه لعام
- كيف الاسعار في سوريا؟
- مساعدة ضرورية من اهل سوريه
- بخصوص الاتصالات في سوريا
- لاول مرة سوريااااااا ،،، ارجوكم استفسار هام
- إستفسار عن البطاقة مسبقة الدفع
- الأسعار بالشام خلال العيد وكل عام وأنتم بخير
- أفيدوني
- عين ديوار طبيعة ساحرة و آثار خالدة
- اين اجد خريطة السرافيس لدمشق
رد مع اقتباس
المشاركة الأصلية كتبت بواسطة tahaniS
المشاركة الأصلية كتبت بواسطة بديع الشامي
المفضلات