شوفت السرير . . يا الله لا تتخيلوا كإنى أول مرة أشوف سرير . . الملايات ناعمة . . والمخدات تغطس فيها . .
مع إن عندي زيها بالبيت . . بس بعد المشوار والسقعة دي حاجة تانية خالص . .
وبدأت عيناي في التحول إلى اللون البنفسجي . .وأنا مش شايف قدامي ولقيت نفسي بضحك مش عارف ليه . . تقريباً عملت دماغ من التعب وقلة النوم . . وخاصة إني بالليل قعدت سهران أعد العدة عشان أرتب لبرنامج الرحلة وما نمتش
وبكلم مراتي حبيبتي أوصفلها مشاعري الجياشة في هذه اللحظة الرومانسية الحالمة وإحنا لأول مرة من غير دوشة الأولاد . .
:36_3_3:
شوفتي الشمس الذهبية التي تتلألأ في سماء شرم الشيـ . . خخخخخخخخخخخخ ززززززززززز
ايه الصوت ده يا ربي . . حبيبتي . . إنتي سامعه اللي أنا سامعــ . . .
بلف ظهري لقيت مراتي الرومانسية الحالمة تحت اللحاف بهدومها . . بتاكل رز بلبن مع الملايكة
ولسة حتهور وأغير هدومي عشان أنام . . قولت لو نمت مش حصحى غير على العصر أنا عارف نفسي . . واليوم الأول حيضيع مننا . .
أنا أنزل دلوقتي أروح أحجز برنامج كل الأيام . . لتحقيق أقصى استفادة ممكنة
ونزلت توجهت لشاطئ الفندق . . الذي يقع خلف المبنى اللي غرفتي فيه مباشرةً . . وفي الطريق
ووصلت لمكتب Sun 'n Fun اللي موجود على شاطئ ماريوت
وهو من أفضل المكاتب من حيث جودة الرحلات والبرامج المقدمة . . هو أغلاهم بس شطارتك تتفاوض معاهم وتاخد أسعار زي أسعار المكاتب التانية
وده نتيجة رحلة بحث طويلة علي النت لمعرفة الأماكن قبل الأسعار . . ومواقع المكاتب التي تنظم الرحلات في شرم الشيخ . . حتى الـ Yellow Pages بتاع شرم الشيخ طلعت منه مكاتب ومواقع
ويمكنكم الإطلاع على أسعار موقع صن آند فن من موقعهم على النت على الرابط التالي
وده كمان Scan لقائمة أسعارهم . . عشان تعرفوا إنه عمل معايا واجب جامد جداً
قولتله بص يا سيدي من قبل ما نبدأ . . أنا ححجز برنامج كامل لخمسة أيام . . وأنا عندي قائمة بكل مكاتب السياحة المحترمة في شرم . . وأسعار رحلاتهم . . وعارف كل رحلة سعرها كام . . وإنت أول مكتب أروحه . . حتبقي حلو معايا من الأول وتديني أسعار كويسة ححجز معاك دلوقتي حالاً كل حاجة
:36_1_12:
قالي إنت تؤمر يا باشمهندس . . مش حتمشي من هنا غير وإنت مبسوط على الآخر . . وفرجني على الكتالوج اللي فيه صور الرحلات عشان أختار
وتم الاستقرار على التالي:
اليوم الأول: غواصة "حاجة خفيفة مراعاة لظروف النوم". . السعر 150 جنيه للفرد + كباية بيبسي
في في شرم غواصات كثيرة كويسة وأخرى سيئة . . أحدثها وأكبرها غواصة اسمها "تشالنجر"
اليوم الثاني: رحلة سفاري بالموتوسيكلات . . السعر 100 جنيه للموتوسيكل الفردي أو 150 جنيه للزوجي . . "اكتشفت بعد كدة إن النوعين حاجة واحدة وكان ممكن آخد الزوجي بـ 100 جنيه أيضاً زي الفردي"
. . زمن الرحلة ذهاب وإياب ساعتين وتبدأمن الساعة 4 عصراً حتي غروب الشمس . .
ويتخللها وقفتين الأولى قصيرة للراحة والتصوير مع الجمال وسط الجبال . . والثانية لمدة 20 دقيقة فيها شاي وتطلع جبل لمشاهدة غروب الشمس من الأعلى
وبعدها حفلة عشاء في خيمة بدوية فى الصحراء . . السعر 100 جنيه للفرد يشمل بوفيه عشاء مفتوح . . وهى من غروب الشمس ولمدة 3 ساعات تقريباً أو أكثر وفيها عروض رقص وفنون شعبية
"لا معنى لكلمة بوفيه هنا . . بعدين حتعرفوا . . مشي حالك"
والبرنامجين في هذا اليوم لا يمكن أن يجتمعوا إلا في يوم الجمعة "عشان كدة إخترته فى اليوم الثاني" . . بعد ما بتخلص رحلة الموتوسيكلات . . بتطلعوا جماعياً وإنتوا سايقنها إلى مكان الخيمة البدوية داخل الصحراء
وفيما عدا ذلك من أيام حتعمل برنامج السفاري وتروح الفندق بالباص وترجع تعمل البرنامج التاني لو عايز في نفس اليوم أو يوم تاني
اليوم الثالث: الباراشوت أو الباراسيلينج . . السعر للطلعة الفردية 130 جنيه للفرد . . وقت الرحلة فى السماء 8 دقائق
والسعر للطلعة الزوجية "الإتنين مع بعض" 100 جنيه للفرد . . 200 جنيه للطلعة . . ويجب أن لا يزيد وزن الإتنين مجتمعين أكثر من 150 كيلو
ألف ليلة وليلة . . تشمل عرض الصوت والضوء . . عروض الأحصنة . . عروض رقص شرقي "خليعة جداً . . ممكن تحضروا كل العروض وتروحوا بعد كدة أو تتمشوا وترجعوا تاني" . . عروض فنون شعبية لذيذة
السعر من عندهم حوالي 80 جنيه للفرد مش متأكد . . لكن أيضاً نصحني بالذهاب لوحدي إلى هناك وأدفع عند البوابة 20 جنيه للفرد
لازم تكون هناك الساعة 8:45 مساءً لإن العرض بيبدأ التاسعة تماماً
اليوم الرابع: جزيرة تيران أو رأس محمد . . نصف يوم . . القفز للبحر 3 مرات مشاهدة الشعب المرجانية والأسماك عن طريق عمل سنوركلينج بالنظارة . . ووجبة غداء على سطح المركب . . السعر 120 جنيه للفرد بالغداء "أكثر من رائعة"
الذهاب الساعة التاسعة للتجمع والعودة عند غروب الشمس
عندهم (2 يخت + مركب) شراعي للإبحار في هذه الرحلات
المركب الشراعي اسمه "سينا دريم" . . وهو مركب خشبي واسع بس بطيئ وتجهيزاته ضعيفة "بلاش منه" . . وصورته فى البورشور في الصورة اللي فوق "تحت على اليمين"
يخت اسمه "دهب" وده أحسن يخت في شرم تقريباً بحكم ناس أعرفهم هناك وجديد . . . . وصورته فى البورشور في الصورة اللي فوق "تحت على الشمال"
يخت اسمه "المبروكة" وده تاني أحسن يخت بعد دهب وده اللي أنا ركبته لإن دهب كان مشغول اليوم ده
اليوم الخامس: ملاهي أكوا بارك المائية . . السعر من عندهم 140 جنيه للفرد شامل الدخول والألعاب فقط . . وممتازة لأى أسرة معاها أطفال
ونصحني بعدم الحجز من عندهم وأروح هناك علطول وأدفع عند البوابة 40 جنيه للفرد . . وعرض عليا كمان إنه حياخدنا مع الباص بتاعهم الصبح يوصلنا لغاية هناك ونرجه معاهم مجاناً "بس محدش يفضح الراجل"
وفي الآخر ما رحنهاش "يا خسارة" . . الأسباب حنعرفها في التقرير
حجزت وأخدت إيصالات بكل رحلة عليها اليوم ومكان وزمان التجمع
ملحوظة:
الشخص اللى فى الصورة واللي حجزلي أكد عليا إن الأسعار دي مش ممكن ألاقيها برة وإني ما أقولش عليها لحد أبداً
وأنا مش بخون الأمانة . . لكن دي أسعار ممكن الناس تاخد بيها من مكاتب برة بشوية فصال بسيط . .
لكن صن آند فن يتميزوا بإنهم متواجدين بمكاتب على كل شواطئ الفنادق تقريباً وجودة رحلاتهم ومواعيدهم الدقيقة
فـ ياريت اللي يروح يا إما يكلمه على التيلفون عشان يقابله مباشرة ويحجز معاه "لإنه متعاون جداً" وأنا معايا اسمه ورقمه . . بس لاحترام قوانين المنتدي مش حقدر أنزلهم "ممكن تراسلوني على الخاص"
يا إما يروح مباشرة على مكتبهم على شاطئ ماريوت ويدور عليه من صورته اللي فوق . . ويتفادي إنه يسأل عليه حد باسمه "حتي لا نضعه موضع إحراج أمام مديره "اللي أول ما عرف إني مقيم في دبي كان عايز يغلي الأسعار عليا تاني بعد ما دفعت"
والصور دي من أمام المكتب علي الشاطئ قبل ما الناس تصحى
أرجع الغرفة بقى عشان أنام
:36_1_38:
طريق العودة
وأخيراً حنام
أشوفكم جميعاً علي خير بكرة
.
.
.
وإنتوا من أهله
:36_1_50:
المفضلات