الموضوع: عاجل ما رايكم بفندق

حنا جايين لقطر ان شاء الله يوم الثلاثاء
وابي اسالكم عن فندق

Holiday Villa Hotel & Residence City Centre Doha
من ناحية النظافة والخدمه والفطور الصباحي والموقع ( ناوين نزور سوق واقف وفيلاجيو والكورنيش والسيتي سنتر )

لقيت سعره بموقع بوكينغ 490 تقريبا غير شامل الضرايب



ابي افادتكم حوله بشكل عاجل
مع امنيتي انكم تفيدوني اذا فيه فنادق افضل منه بنفس السعر

ختاما

كل عا وانتم بخير

مواضيع عشوائيه ممكن تكون تعجبك اخترناها لك:

• أيهما أفضل جراند حياة او فريج شرق ؟
• بروح قطر في عيد الفطر القادم أستفسار
• اول زيارة لقطر
• السفارة البريطانية تفرض إجراءات قاسية للحصول علي التأشيرة
• تكفون يااهل يااهل قطر يااهل الفزعة ابي اقرب طريق الدمام قطر
• اخيراً بزور قطر بس ماعرف شي
• كيف أصل لقطر ؟؟؟؟
• سؤال عن مساجد قطر ؟
• أول زيارة للدوحة استفسار عن فندق أو شقة فندقية غرف لـ أشخاص الدوحة
• محتاج مساعده في الاختيار
• تكفوون يا اهل قطر
• وين اروح ؟
• ابي اروح للقطر أريد الاستفسار عن الشقق
• حبايبي اهل قطر افيدوني بخصوص مواقف سيارات مطار الدوحة
• هل من مرحب ؟ قريبآ بزور قطر مع عائلتي ما هي نصائحكم و تجاربكم
• هل يوجد فندق داخل مطار الدوحة ؟ اش اسوي بالترانزيت الطويل
• احرجتمونا يا اهل قطر
• جراند حياة الدوحه
• فندق لاسيجال احدث فنادق قطر افتتح الان ،،
• بالنسبه لإيجار السيارة من مطار الدوحه

حياك الله في بلادك قطر


وزياره سعيده أن شاء الله


انصحك فيه فندق مميز وجديد وفي قلب الدوحه وقريب من المطار


وهاذي مجموعة تقارير عن الاماكن السياحيه والفنادق و المطاعم راح تفيدك أن شاء الله


http://www.arabtravelersforum.com/travel283370/



واي خدمه احنا حاضرين

qatar333

الله يعطيك العافيه ويسعدك يابعدي

صراحه انا ناوي امر قطر لمدة 24 ساعه كامله وحطيت لي البرنامج التالي

وصول قطر الساعه 1 ظهرا تقريبا

انهاء اجراءات الفندق والاستعداد لخروج الساعه 3 عصرا

هناك ثلاث اماكن وهي

سوق فيلاجيو

سوق واقف ( مساء )

كورنيش الدوحه

والعوده الى الفندق

اليوم الثاني املك وقت من الساعه 11 تقريبا حتى الثالثه لا اعلم اين اذهب بالضبط

لاني بعدها ابمشي للسعوديه


شفت الملفات مرررررررررره حلوه بس محيره مادري وش ابدي ووش اخلي ؟


نوعا ما اخترت مطعم اشار او اشاز الهندي
و اذا شفت مطعم رايق بسوق واقف احتمال اتعشى فيه


لم اجد اي تقارير عن مدن ترفيهيه ( ملاهي ) في قطر واذا وجد فهل هي تسوى ؟


ادري اشغلتك بس نمون عليك ياعيال عمنا




انتظر ردك بفارغ الصبر

تمون ونص طال عمر ولا يهمك وبشر بسعدك


بنسبه الي مطاعم سوق واقف الصراحه كلها مميزه يعني كل مطعم يمتاز بشي


وماقدر احددلك مطعم معين بس لحضه في مطعم رومنسي والصراحه يحسسك انت مش في سوق واقف


بس ناسي اسمه هو مطعم يطالي باوصفلك موقعه بضبط عشان تعرفه مايتوه أن شاء الله


موقعه بجنب قهوة لوجيرما بضبط يعني يذا لوجيرما على يمينك المطعم المقصود بيكون على يمينك من بعد ماتعدي


قهوة لوجيرما مطعم مميز وراقي الصراحه ونصحك فيه


وبنسبه الي الاماكن لازم تزور ستي سنتر الدوحه انت ماضفته الي البرنامج وهو قريب من كورنيش الدوحه


وعلى طاري الكورنيش عيل لازم تزور مطعم بلهمبار وهو الوحيد في الكورنيش وجلساته على البحر وراقي جدا


وهاذا تقرير عنه


http://www.arabtravelersforum.com/travel321065/


وبنسبه الي المدينه الترفهيا في مدينة الجنقل زون في مجمع الحياة بلازا وهو ملاصق في مجمع فيلاجيو


وبعدين لاتفوت الفرصه عليك بدون ماتروح جزيرة الؤللؤه في منطقة الخليج الغربي مكان يستحق الزياره


واي خدمه احنا حاضريلك

يامال العافيه
كفيت ووفيت والله

شاكر لك تواصلك السريع والرائع
عسى الله يسعدك يابعدي

بنسبة للفندق فهو حلو وايد وعائلي وعلى فكره هو خمس نجوم والصراحه فندق خمس نجوم وبهسعر فهذي فرصه

وهو جديد واثاثهم حلو وانا شخصيا رحت له وشفته ومكانه قريب من كل شي

وانا بعد انصحك بلمطعم الي بلكورنيش بس هو اسمه المرجان وهو لبناني وانا جربته بس اشوي اسعارهم غالية

وعندك مجمع الاندمارك حلو وايد

ودامك بتزور فيلاجيو فزور مجمع الحياة بلازا لانه ملاصق له

بنسبة للملاهي فللاسف مافي الا ملاهي صغيره اسمها ملاهي سناء ومادري اذا لحين مفتوحه ولا لا

وكان في مملكة علاء الدين بس للاسف تصكرت

بس عندك جزيرة اللولوة وعندك متحف الفن الاسلامي وعندك حديقة الحيوان

ومن غير المجمعات التجارية


________________________________________________

همسة لخوي قطر 3333

مطعم بنهمبار تغير اسمه ونظامه من زمان وصار مطعم لبناني واسمه المرجان

وتحياتي للجميع

حلو ومدلع

انا اشهد انك ماقصرت
كفيت ووفيت يابعدي


شاكر لك اضافتك الرائعه

انا البارح وصلت قطر ودرت الين لقيته بالصدفه وسكنت فيه، الفندق اربع نجوم لكن فخم ونظيف وعائلي

يامرحبا فيك اخوي فوق وتحت

نتشرف بوجودكم عندنا في قطر , وماقصروا الشباب بيض الله وجيهم , وأي خدمة ابشر بها .

عيد عليك مبارك ...

المشاركة الأصلية كتبت بواسطة writer
http://www.arabtravelersforum.com/tr...7/#post3474357

انا البارح وصلت قطر ودرت الين لقيته بالصدفه وسكنت فيه، الفندق اربع نجوم لكن فخم ونظيف وعائلي




مرحبا اخوي

والحمدالله على سلامتك

بس من قالك الفندق 4 نجوم لان الفندق 5 نجوم وانا مجربه وهو جديد وكبير وفيه اقسام لحين مافتحت

فمادري هل هو نفسه الي سكنته ولا انت تقصد فندق ثاني


وبنسبة لخوي فوق تحت

اقولك ماسويت الا الواجب

واهلا وسهلا بضيوف قطر

تحياتي

مشكور مشرفنا العزيز بوعزيز على الصور الرااائعة ( هذي لوحدها موضوع )

يعطيك العافيه Aboaziz على الصور الاحترافيه


عيل شكلنا في نتضار تقرير دسم


وبتوفيق أن شاء الله

ماقصرت يا مشرفنا على الصوور الرووووووووعه

ويعطيك الف عافية

وانا اقول ليش الدوحه منوره طلع النور منك

تحياتي لك

ياريت صور عن الفندق لان اول مرة اسمع عنه , ليش ماتشوف فيلا جراند حياة ؟ وايد حلوه وواسعة .

عدنا والعود احمد
ولله الحمد رجعنا بالسلامه

في البدايه اشكرر الجميع على الاضافات والردود
والي هي والله الي محليه المنتدى بحرص الجميع للافاده

ومن بب رد الجميل

فانا فيدكم الان

ان الفندق رووووووعه
نظيف
راقي
موقعه حلو
5 نجوم بالراحه ياخذها

انصح فيه وبعنف للعوايل خصوصا



الصراحه كان برنامجي كالتالي

اليوم الاول
سوق سيتي سنتر
الكورنيش
سوق واقف ( ررررررررررووووووووووووووووووووععععععععععهههههههههه هههههه )
لايفوتكم العروض والجلسات الصراحه جنان مره

اليوم الثاني
جزيرة اللولوة ( تبي تشوف العالم بعدعشر سنوات رح هناك )
سوق فيلاجيو ( خطير والله )

السفر للسعوديه





انصح وبعنف الاماكن الي زرتها

الكورنيش بالليل وعلى البواخر الي تتمشى فيك
كلااااااااااااااااااااااااام ثاني



استودعكم الله يا هل الدوحه
واكرمكم الله على حسن الضيافه
ونراكم على خير

الحمدالله على السلامه


والحمدالله انك استمتعت في بلادك قطر


ويعطيك الف عافيه


وحنا في خدمة اهلنا واخوانا في مجلس التعاون

الحمدلله على السلامه
واهم شي انكم أستمتعتوا بالزيارة
وان شاء الله تردها بزيارة ثانية وتكون اطول ونشوف معها صور حلوة

تحياتي لك اخوي فوق وتحت

ماشاء الله عليكم بالعافيه
ومشكور مشرفنا ابوعزير على الصور الحلوه