:: مرحبا الساع بالاخوة والخوات كلهم ::
دام الاخت الهنا كله طرت لنا هونج كونج بندردش وياكم عن رحلتي لي كانت
هاي السنة في شهر 1-2010
طرت من دبي لين بانكوك بيت في بانكوك ليلة
وماقصر دريول السفارة بالروحه والعوده
حجزت التذاكر متاخر على الطيران التايلندي.....وياليتني رحت على الكاثي باسيفك
والسبب ان محل السفريات خوفني من سالفة الوزن لان الطيران اهناك يعطون 20 كيلو
على السياحية....وطرنا على التايلندية....بس الخدمة ماعيبتني موليه
بسبت الاكل كله كان خنزير..يدوب حصلنا دياي...الحجز متاخر ولا جان طلبت مسلم ميل
على العموم وصلنا مطار هونج كونج
بعد استلام الشنط توجهة لكاونتر القطار اكسبرس
مايحضرني بكم التذاكر...على العموم ركبنا القطار وكان وايد حلو
ذكرني بقطار الاكسبرس لي في كوالالمبور
من المطار لين محطة كولون بتوقف واحد فقط
اول ماوصلنا سألوني وين بتسكن قلتلهم فندق ريسانس كولون
وحظنا ان هذا الفندق الشتل باص الخدمة المجانية يمر على فندقنا
بس طبعا فيه فنادق قبل لازم يمر عليها
المفاجاة الكبيرة.........اشوووف الشعب كان كله لابس جاكيتات ثقيلة
وانا ياي صيفي لبس تايلند لاه......!!!!
اول مانزلنا يم الفندق قرصت برد...بس عادي كان عندي...احب هالجو
اول ماوصلت الفندق...ترا الفندق ملاصق الانتركونتينتال وملاصق فيه سنتر
قالولي بتزيد 1000 دولار هونج كونج بنرقيك كلوب
وافقنا...عاده شو الكلب غرفة صغيرة....والانترنت ماشي لك في اليوم
20 دقيقة في غرفة رجال الاعمال..والدسكتوب بطيء بشكل
وصالة الضيافة الخاص بالكلوب زينه بس الخنزير وراك وراك هههههههههه
اول ماوصلت على طول ركبت قطار الاندرجراوند ورحت سوق ليدز ماركت
وشبكت معاه تمبل ستريت....شفته سوق عادي
وانا اتمشى الناس كلهم يطالعونا لانا مب لابسين شتوي....خخخخخخ
شارع ناثان عيفونا الهنود..من كلمة كوبي باج كوبي واتش
اليوم الثاني....زرت اغلب السناتر اللي في كولون
بدء من HARBOUR CITY CENTER وحواليه
بعد العصر ركبت القطار وسرت منطقة بعيده
عشان اشتري جهاز رادار امريكي...لانه اقرب دولة لنا هونج كونج
ولما وصلت المكان كان خلج شويه دخلت البناية وهوه شقته في
الطابق ال 11 وانا سرت 13
ودشيت على صيني ويلس يرطن عليه عطيته رقمم ماقصر وتصلهم
ونزلت تحت...والمحل بابه مخفي بالابيض ههههه يبيعون بدس
قالي 4200 دولار هونج كونج..قلتله زين فيزا قالي ماشي
افا والحين شو الحل...نزلت تحت بنك صيني وتوكلت على الله وسحبت
لاكن المفاجاه ان في السحب الوحده تعطيك 2000 مالهم
رجعت له وخذت الجهاز ورجعت
في اليوم التالي...من احلى الرحلات
خذنا تاكسي ووصلنا الفيري وركبنا الفيري ونزلنا جزيرة هونج كونج
ومن هناك خذنا الباص لي يوديك لين محطة الترام لي يوديك قمة فكتوريا
كان طابور وزحمة لاكن اول ماوصلنا فووووق كان الجو وايد حلو خصه انه
احنا في فصل الشتاء...المنظر حلو وايد
طبعا اصغيرونه مدثرينا عدل الا احنا عادي عندنا
لما رجعنا من هاي الرحلة قلت بسوي استكشاف في جزيرة هونج كونج
رحنا سنتر تايم سكوير والمحلات لي يمه
ماكملنا فيه كم مول حذال الفيري لي ع جهة هونج كونج
انشاء الله في الجزء الثاني 2-2011
رجعنا بالقطار الي محطة تسيم شا تسوي
اليوم لي بعده ايضا من احلى الرحلات
خذنا قطار الاندرجراوند سايرين للبوذا الكبير المووجود فوق الجبل
بس انا غلطت بالسيرة خذت القطار الاحمر المفروض البنفسجي
او ماتوصويلن اهناك فيه مول اوت ليت..بس مادشيناه لانه وقتنا ضيق
حجزنا تلفريك بانوراما...اول ماركبنا ولا ثرا قاعة التلفريك شفافه
من الرهبه انا ريلي ماتحركت...ههههه
الرحلة استغرقت 25 دقيقة تقريبا
الجو كان بارد وايد فووووق....والمكان احلى واحلى
بس خفنا على صغيرونه..وبعدين وقتنا ضيق كان
لان في هذا اليوم رحلت العودة لبانكوك
رجعنا للفندق واختصرنا بسرعه لانه رجعنا بالخط البنفسجي
شطبنا شنطنا وانتظرنا باص قطار الاكسبرس ووصلنا لين محطة كولون
وكانت التذكرة ملتي من الاول
وصلنا مطار وخلصنا الاجراءات وتغدينا وترينا الطيارة وطرنا
باختصار.......!
- البلاد حلوة وراقية صحيح التسوق فيها غالي..وتذكرني بسنغافورة
- عجبني الامن منتشر في كل مكان وهذا الشي ممتاز اذا انوجد
- دخول محطار القطار مب شي لانك ماتقدر تدخل الترولي مال اليهال
لان الدخول شخص شخص عكس تايلند لي يفتحون لك الباب
عشان تدخل الترولي
- مارحت لدزني ولا لحديقة فكتوريا والسبب المطر لي هطل في هاذاك اليوم
لانه خرب البرنامج ماليه..وتاجل للجزء الثاني 2-2011
- كورنيش كولون وايد حلو...وحصل موقف ان استلمنا جروب سياحة بالتصوير
حتا الحرمه ماسلمت من حريمهم
موقف طريف....!
كنت اسال عن النغر او الحبار بالانجليزي مب موجود..وانا اتمشى في كورنيش
كولون روحت ريحته يوم ييت اشوف اسمه ثرا اسمه طلع كتل فيش
سلبيات....!
المطاعم العربية عديمة والمطاعم الهندية والباكستانية دون المستوى في
شارع ناثان
كنت اتمنى اشوووف المطبخ التايلندي موجود في تسيم شا تسوي
لانه افضل من المطابخ الثانية...وحضي اني تغديت بمطار هونج كونج
بمطعم تاينلدي
^^^ هاي كانت باختصار شديد رحلتي لهونج كونج 1-2010 ^^^مواضيع عشوائيه ممكن تكون تعجبك اخترناها لك:
- ذاهب الى هونغ كونغ والمطلوب فيزا للصين
- استفشار بخصوص استخراج فيزا هونج كونج
- احتاااااااااااااج مساعه ضروري
- أستفسار بخصوص
- استفسار عاجل عن هونج كونج والصين ارجو الافادة
- شريحة جوال عالمية تتيح إجراء مكالمات دولية دون رسوم تجوال
- مسافر لجوانجو وأطلب منك مساعدتي رجاءً
- أفيدوني يااهل الخير
- استفسار ساذهب في مارس قوانزوا السكن المحلات بخبرتكم
- عاد أبوسليمان التميمي مرحبا به لكن وين راح اخونا ابو ضرار ؟؟؟
- اريد موقع على الانترنت لشراء منتجات صينية
- استفسار عن فندق
- استفسار عن فنادق في كوانزو فندق Parkview Square Hotel
- ابغى رايكم بتخطيطي لاول زيارة للصين
- ساستورد واتنوع ببضائعي من الصين ما هو رايكم
- مخطط رحلة لهنج كونج لمدة اسبوع
- جايتكم من البعد عانية ، وبفزعتكم شاكرة
- استفسارات عن هونغ كونغ
- ارجو المساعده ضروري
- تشغيل خدمة بلاك بيري عن طريق واي فاي الفندق وايضا خط هاتف الصين وهونج
رد مع اقتباس
المفضلات