الموضوع: تـقـريـر رحـلتي إلى لنـدنـ

الحلقة السادسة ....

ألف تحية للجميع ... ألف تحية للحلوين كلهم ...

اليوم كان الجو مشمس وجميل ... والهوا بارد وعليل ... اليوم راح تكون رحلتنا لمتحف الشمع ... وهو عباره عن متحف يضم فيه شخصيات عالميه معروفة ... مصنوعة بالشمع .. وتشبه الى حد كبير الشخصيات الحقيقية .... أول ما وصلت كان هناك صف طوووووويل ... أول ما شفته اخترعت صراحه ... لكن توني بصف مع العالم .. يوم جتني وحده من اللي يشتغلون في المتحف ... قالت سعر الدخول 25 باوند ... لكن عندنا عرض وهو فاست تيكت ... وهو انك تزودها 2 باوند ... ولا تمسك السرى هذا ... يعني تدفع 27 ....وندخلك من باب ثاني قبلهم ... قلت ما بدهاش ... سمي ... هذه 27 باوند ....




أول ما دخلت ... دخلت على صاله صغيره شوي .. فيه مجسمات لبعض الممثلين ... طبعا أنا صورت كل التماثيل المعروضه .. بس راح احط البعض منها ... عشان ما تثقل الصور الموضوع ...












وهذه مدري وش يشرب ...



وذا الخبل ضايقن صدره ... مدري وش فيه ...




وهذا صدام طلعوه من السجن .. يوم دروا اني بجي ... عشان اصور معه ... أو بالأصح يصور معي



وهذا القذافي



وهذا صراحه ما انساه ... سوا فيني مقلب :110: ... انا اول ما شفته ما عرفته .. قلت من ذا الحين .. واشوف العالم تصور عنده ... ومعه ... المهم العالم كلها تظن أنه من هالتماثيل الشمع ... عاد يوم جيت اصوره ويطلع لي لسانه ... وأبعد الكاميرا .. واطالعه .. ما تغير واقف ... واطالع صدره قلت بشوف يتنفس ... ابدا ما تحرك ... وارفع الكاميرا اصوره ... ويطلع لسانه :109:




واجلس اضححححححك .. مدري ضحكه خوف ... مدري هيستيريه ... المهم أني جلست اضحك بقوه ... واللي جنبي كلهم انهبلوا ... يقولون شوفوه تحرك تحرك :109: ... ابوك يالتقنيه

بعد ما طلعنا من هالقاعات ... رحنا لقاعة رعب ... رعب .. رعب ... مثل الدهاليز ... ظلالالالام .. وقوه اصوات تخوف .. وناس تتعذب ... واللي هبل فيني ... جيت بدخل مع مدخل .. يوم شفت واحد واقف في زاويه .. وكل ثيابه دم في دم ... ووجه انواع الشوارع ... كلهم يظنون انه تمثال ... يوم لمحته ان عينه رمشت ... واقرب يمه ... يوم مد يده قال ( كان آي هيلب يو ؟؟ ) ... هو مد يده يمي ... صرخوا اللي وراي :109: واذكر عجوز منتهيه كانت تمشي وراي ... الظاهر عمرها 63468 سنه قبل الميلاد ... المهم الظاهر انها يوم كبرت نست شي اسمه صراخ :109: ... فطيرت عيونها وبس ... قلت في نفسي .. عزالله ماتت !!....
والله كان ودي مصور كل شي جوا ... لكن ممنوع التصوير هناك ... لكن ذكرت ان جوالي فيه كاميرا ... فصورت صوره وحده بس ...



( الصوره السابقة تصوير جوال سوني اريكسون )

صراحه روعني الله يروعه ... بعد ما عديته بدا يطلع لي ناس تتحرك .. وتجي تروعك في ظلالالالام دامس ... طبعا ما يلمسونك .. ولا تلمسهم ...

بعد هالدهاليز المروعه ... طلعونا على قاعة ... تركب فيها تكسي اسود صغير مره .. كل اثنين يركبون فيه ... والتاكسي هذا فيه سماعات ... يدور بك التاكسي على مثل القريه تبين لك مراحل تطور لندن من زمااااان إلى الان ... والتطور اللي صار فيها ... والسماعات هذه يطلع منها صوت واحد يشرح لك كل مرحله ... صراحه كانت ممتعه مره ...

صراحه كان المكان روعه .. من أروع الأماكن اللي زرتها في لندن ... بعد كذا طلعنا على محل يبيع اشياء تذكاريه مطبوع عليها اسم المتحف ... شريت بعض الاشياء وطلعت من هناك ...

بكذا تكون حلقتنا اليوم انتهت .... أشوفكم في الحلقة الجاية ...

ودمتم في أمان الله وحفظه ...

المشاركة الأصلية كتبت بواسطة لا تلوح للمسافر


سلام عليكم
وها انذا اعود للوقوف بعتبة رحلتكم
من الأوجه التي احببتها للندن ان أرى العديد من المهرجين في بعض الميادين العامة وخاصة في منطقة " كوفنت غاردن".
طبعاً هذا الانتشار كنت اشاهده لهم ايام دراستي 95-96
ولكن يبدو ان هذا الوجه قد
بدأ يختفي عندهم ولهذا كان من الغريب ان اشاهد هذه المجموعة الهندية تعزف
وجه كم اود ان يعود الى لندن
وسؤالي هل وجدته في شارع اكسفورد تحديداً؟
لقد ذكرت هنا نقطة مهمة. فعلاً نحن ننجر وراء الأسم ونترك الخدمة ومستواها اللي يقدمها لنا المنتج.
يا اخي ما ادري متى نتخلص من هذه النمطية التي نعيشها. نندفع وراء اسم الماركة في كل شيئ . طبعاً أنا جزء من هذه التهمة.
وخذ مثال اذا تتذكر حب الناس للجمس. ما يخلى بيت منه ثم الكابرس . واللحين منتجات سوني.
تصدق بعد ما شفت صورك ندمت اني شريت كمرة سوني.
على العموم يعيطك العافية.
والظاهر متحف الشمع تغير كثيراً كم كان سعر تذكرة الدخول؟
الى الملتقى



أسعد الله صباحك ...

بخصوص هالهنود ... لقيتهم في شارع الاكسفورد ... امام Next بالضبط :101:

بخصوص الانجرار وراء الاسم ... فعلا كلامك صحيح ... عندك الكاميرات .. والجوالات ... وغيرها الكثير ... يعني اعطيك مثال .. شف وش مسوي جوال نوكيا عندنا هنا بالسعوديه .. لو تقول لواحد اشتر سوني اريكسون قال لالالا وييييييييين ... بس لو تقارن مميزات تلاقي سوني اريسكون افضل ... ولو تسافر برى تشوف الناس وش تشتري اكثر ..

بخصوص المتحف ... كان سعر التذكر 25 باوند

تحياتي لك :24:

عزيزي المايسترو

صور وتقرير روعه وخياليه
عندي صور وتقرير لزيارتي الاخيره للندن لكن بعد ما شفت
تقريرك شكلي غيرت رايي

تحيه لك

عجبتني جداً الحلقه السادسه والصور كانت روووعه
لكن عندي سؤال كل هذا والمكان المرعب والجوله اللي بالتاكسي كلها بسعر 27 باوند بس؟

المشاركة الأصلية كتبت بواسطة Pink_girl


عجبتني جداً الحلقه السادسه والصور كانت روووعه
لكن عندي سؤال كل هذا والمكان المرعب والجوله اللي بالتاكسي كلها بسعر 27 باوند بس؟



مرحبا والله ...

بخصوص الحوله بالتاكسي ... مو تكسي حقيقي كبيررررررر ... لا مثل سياره الاطفال لكن على شكل تاكسي اسود :101:

وطبعا كل هذا سعره ب 25 باوند ... :24:

تحياتي لك

:113: :113:

تقرير رائع

تأخرت في متابعته عشان أدخل الاقيه مكتمل .. الصور روعة

أنا بانتظار اكتماله ،

:114: لو كنت بتنصح البريطانيين في الهايد بارك ايش كنت بتقولهم ؟ الناس هناك أطيب؟؟

من الأوجه التي احببتها للندن ان أرى العديد من المهرجين في بعض الميادين العامة وخاصة في منطقة " كوفنت غاردن".
طبعاً هذا الانتشار كنت اشاهده لهم ايام دراستي 95-96
ولكن يبدو ان هذا الوجه قد
بدأ يختفي عندهم ولهذا كان من الغريب ان اشاهد هذه المجموعة الهندية تعزف



منطقة الكوفنت جاردن ما زلت مثل ما قلت ...شتاء أو صيفا .....

أخي الماستروا.... شاكرة لك هذه الجولة فى مدام توسوا ...

المشاركة الأصلية كتبت بواسطة مهاجرة



منطقة الكوفنت جاردن ما زلت مثل ما قلت ...شتاء أو صيفا .....
أخي الماستروا.... شاكرة لك هذه الجولة فى مدام توسوا ...





الله يخليك يا غاليه :24:

[frame="4 80"]صباحك ورد بإنتظار الحلقة الجديدة على أحر من الجمر[/frame]

الحلقة السابعة ...

أسعد الله صباح الجميع ...
راح أكمل معاكم حلقات سفرتي القصيرة إلى لندن ... اليوم كانت النيه لحديقة الريجنت ... وكانت حديقة الحيوان جنبها ... قلنا نسير عليها ...
الجو كان حلو جدا ... مع انه كان بارد ... بعكس الايام اللي راحت ... بس ما فيه مطر ... أول ما وصلت قلت بدخل حديقة الريجنت .... كانت حديقة حلوه ومنظمة ومرتبة ... تحس أنها ملمومه على بعضها ... بيني وبينكم أعجبتني أكثر من حديقة الهايدبارك ... ومن هنا كانت البدايه



وهنا من جهة أخرى



وهنا مساحة كبيره خضراااااااء



وهنا أعجبني إلتقاء السحاب والشجر ...




بعد كذا طلعت من الجهه الثانيه على حديقة الحيوان ... من أكبر حدائق الحيوان ... يوجد بها 2000 نوع على ما اذكر ...



وهذه أسعار الدخول ...



صراحة الحديقة حلوة إلى حد ما ... كان يعيبها اللخبطة شوي ... يعني مو مثل حدائق الحيوان المعروفة .. يعني تمسك لك طريق وتمر على كل الحيوانات ... لالالا ... يعني هذا طريق للحيوانات اللي كذا .. اذا خلصت ترجع وتروح مع طريق ثاني عشان تشوف حيوانات نوع ثاني ... غير كذا مافيه مرشدين منتشرين ... فيه مثل المكتب ... بس ما أحد يروح يسأل على طول ... وهذا الشي لاحظته في الزوار ... تلاقيهم يتهاوشون يقولون شفنا هذا مره ثانيه ... جينا من هنا مره ثانيه ... بس كانت بشكل عام حلوه ...
في البدايه دخلت لمكان الزواحف ... لقيت ثعابين انواع واشكال ... وضببه ... ( جمع ضب + ضبه ) :109: ... لكن أعجبني هذا ... لا أحد يسألني وش أسمه ...:114:







طبعا في بعض الزواحف داخله بيوتها ولا طلعت ... ننتظر .. ننتظر .. ننتظر ... ما أحد طلع ... لكن ... لكن .. لكن ... فيه واحد قصته معي قصه ... بوريكم اياه ... صراحه يمكن وقفت عنده ولا 3 دقايق ... بس أبي آخذ وضعيه حلوه لتصويره .... ليــــن ركبت معي الصوره صح



عاد يوم طولت عنده ... إلتفت علي ... قال ما ودك تخلص يابو الشباب ؟؟؟ :109:




بعد كذا طلعت برى أصور الحيوانات الثانيه ... واعجبتني حركه واحد مدري وشو ... يا هو حصان صغير ... والا حمار يستهبل صابغ نفسه :109: .... المهم ... شوفو كيف مطلع راسه



بعدين مريت على رافع الراس دايم ... جيت يم الزرافه ... تشوف العالم تحتها ... ما احد قدها ... تبي تشوفني أرفع راسك الله لا يهينك :106: وإلا جب لك سلم وقف جنبي ...



بعدها طلعت للحيوانات المائيه ... وصورت كثير .. وأعجبني منها هذه



وقفت تأمل ...



بعد كذا جيت بطلع من البوابه ... حصلت أن فيه مثل السفينه الصغيره .. ممكن تركب فيها .. وتاخذ لك لفه ...



بعد كذا طلعت من الحديقة ... ورجعت لحديقة الريجنت ... وتغديت فيها ... بعدين طلعت ورجعت للفندق عشان نريح شوي ...


كذا نكون خلصنا تقرير اليوم ... وقبل ما أختم معاكم هذه الحلقة ... أهديكم هالوردة ... أهديها لكل اللي يتابعون الحلقات .... ( الوردة من ورد الريجنت بارك ) ...





الله يعطيكم الصحة ... دمتم بألف عافية .. وأراكم في الحلقة القادمة ...:101:

في كل يوم جديد تشرق الشمس .. ويشرق لنا ابداع جديد اسمه المايسترو


ومازال للابداع بقية :114:

المشاركة الأصلية كتبت بواسطة صعـب المنـا ل


في كل يوم جديد تشرق الشمس .. ويشرق لنا ابداع جديد اسمه المايسترو
ومازال للابداع بقية :114:



اهداء لك

عزيزي المايسترو

اضافه في غايه الروعه وصور ما عليها كلام






وضببه ... ( جمع ضب + ضبه ) ... لكن أعجبني هذا ... لا أحد يسألني وش أسمه ...



تصدق انه من الوجبات المفضله في الصين لكن انا بعد ما اعرف اسمه


تحياتي لك

المشاركة الأصلية كتبت بواسطة Boo3lam


عزيزي المايسترو
اضافه في غايه الروعه وصور ما عليها كلام
تصدق انه من الوجبات المفضله في الصين لكن انا بعد ما اعرف اسمه
تحياتي لك



الحين ياكلون هذا ...



:114: ...هالصينين غريبين في كل شي


تحياتي لك

رائــــ ع ..!


واصل يا مبدعنا ..

بيني وبينكم أعجبتني أكثر من حديقة الهايدبارك



أنا معك فى هذه النقطة ...وأحلي ما فيها حديقة الملكة حيث الزهور والورود ..مسجد لندن الشهير ....
وبالقرب منها تقع كامدون تاون ...وهي منطقة غريبة ..بس ممتعة ......فيها مطاعم عربية ومطاعم غربية أمثال ننادونس البرتغالي الشهير ......ومحلات.... ويمر فيها قنال ....بس ما تشوف العرب فيها ...
ممتعة هذه الجولات ....تسلم يدك ...

ما شاء الله عليك يالمايسترو

كل حلقة اروع من الثانيه من جد مبدع

ربي يعطيك العافيه امتعتنا يالغالي

تحياتي

العاب لندن

العاب باربي لندن

الحـلقة الثامنه ...

أسعد الله صبح الحلوين ... كيفكم إن شاء الله بصحة وعافية ...

اليوم وصلنا للحلقة رقم 8 ... اليوم حلقتنا غيررررر ... يومنا راح يكون غيرررررر ... حتى صورنا غيرررر ...

أمس جاني اتصال من شخص عزيز علي جدا جدا ... يدرس في مدينة جلاسكو ... في اسكوتلاندا ... شمال لندن ... المدينه هذه تبعد عن لندن 5 ساعات بالقطار ... وساعة ونص بالطائرة ... المهم عزمني على الغدا عندهم ... قال لازم تجي تتغدا عندنا ...ويحلف علي ... وشوي إلا يطلق ... قلت لالالا ما توصل هنا ... ( اشوى اني وافقت أول ما قالها ) ... قلت خلاص مافيه اي مشكله ... رحلتنا هذه كلها مغامرات أصلا ... خلينا نروح لجلاسكو ...
قبل الرحله بيوم لفيت مكاتب الطيران في لندن ... كنت ابي اروح بالطياره ... بعض المكاتب مالقيت حجز عندهم ... والبعض فيه بس متأخر بالليل .. وووو ... المهم دخلت مكتب طيران .. والاقي فيه واحد حبيب مره ... شرواكم ... ( شرواي الطيب :109: ) .... المهم قلت له ابي حجز لجلاسكو بكره .. قال لي تبيني اقترح عليك اقتراح ... قلت سم ... ( طبعا ( سم ) بالانجليزي ) ... لا أحد يقول لي وش معناها ... المهم .. قال ليش ما تروح بالقطار ؟؟ انت الان لو تبي تروح بالطياره ... يبي لك تروح لمطار قبل الرحله بساعة ونص ... ومن وسط لندن للمطار ساعة ... هذه ساعتين ونص ... وفي الجو تبي تجلس ساعة ونص ... هذه 3 ساعات ونص ... وساعة من مطار جلاسكو لوسط المدينه ... هذه 4 ساعات ونص ... ليش ما تاخذ لك قطار من هنا 5 ساعات الا انت في وسط جلاسكو ... وارخص لك .. واحسن لك تبي تشوف مناظر حلوه بالطريق ... قلت له والله هذا الشور الطيب ... وانقز من عنده واطير لمحطة القطارات .. واحجز من عندهم على رحلة بكره الفجر ... يوم جا بكره ( ابوك يالسواليف ):101: ... عاد يوم جا بكره الفجر ... واطلع لمحطة القطار بعد ما اخذت بريكفاستي :109: ... واركب هالقطار ... كنت ناوي آخذ القطار في الذهاب ... وارجع بالطياره ... قلت لموظف الحجز ... بكم سعر الذهاب فقط .. وبكم سعر الذهاب والعوده ... قال لي سعر الذهاب 93 باوند ... وسعر الذهاب والعوده 94 باوند :114: .... يعني فرق 1 باوند ... شوفو السياسه ... عشان ترجع معهم .... قلت قص لي ذهاب وعوده ... لو ما ارجع يا شيخ ههههههه

طبعا الطريق كان روووووووعه ... أول شي اعجبني أن القطار بالدقيقه يمشي ... يعني قال الساعه 6 و13 دقيقه .. يعني 6 و13 ... ثاني شي اعجبني .. انه هادي ... ما تسمع له صوت وهو يتحرك .... ثاني شي كان جوا محل يبيع كوفي ... يارررربيه .. كوفي يجنن ...ثالث شي فيه في القطار انترنت وايرلس ... وجنبك فيش كهرب .. انت بس هات لابتوبك .. واغمزه في هالفيش ... وافتح النت .. تلاقي مكتوب كم تبي ساعه ... اختر عدد الساعات ... بعدين يقول سعر التكلفه كذا ... اذا تبي دخل رقم بطاقه الفيزا ... وسدد لهم ... وخلاص .. تصفح مثل ما بدك ...

المهم أنا بترككم مع الصور ... ترى بعضها مهزوز شوي .. لأن كل الصور صورتها وانا امشي بالقطار ... حاولت ألعب واضبط بإعدادات الكاميرا عشان تأخذ صور حلوه ... اترككم مع الصور .. راح تلاحظون أن بعضها غامق .. وبعضها فاتح .. لأن الشمس كانت مره تطلع ... ومره تغيب ورا السحب ... واستحملونا شوي .. لأنها كثيره ... وتراني احترت كثير وش اختار لكم ... لأني كنت مصور ولا 60 صوره ... وعلى فكره دقتها عندي عاليه .. كل وحده حجمها تقريبا 3 ميق في جهازي .. يعني اللي يبي وحده خلفيه جهازه والا شي .. لا يرده الا طرف لسانه ... الله مير يصلحه :101:





آآآآآه بس .. لوني أمون على سواق القطار .. كان قلت له وقف شوي هنا .. خلني انزل البساط ... ونجلس نتقهوى ...






تصدقون بعد شفت هالمناظر ... اكتشفت شي خطيرررررررررر ... ما ادري وش لون اكتشفته ... يا أنه عشاني رايحن لحالي وصرت اسولف مع نفسي ... حتى أني يوم لاحظته جلست اضحك مع نفسي في القطار :109: اكتشفت من وين يجيب ( بيل قيتس ) ...راعي ويندوز ... اكتشفت وين يجيب صور الخلفيات حقات الويندوز هههههههههههه ... مالها دخل صح ؟؟ ... خلونا نكمل احسن :101:



شوفوا كيف ظل السحب على الأرض ... يالله الجنــــــــه ...





وهنا فيه نهر .. مهوب نهر .. مدري وش اللي اصغر من النهر .. المهم انه مويتن تمشي ...








المهم ... بعد هالطريق الممتع ... وصلت الى وسط جلاسكو ... على طول رحت للفندق المحجوزه فيه غرفتي .. دخلت وبدلت ملابسي ... وأخذت لكم هالصوره من نافذة الغرفه .. ( اموت انا على كلمه نافذه ... هذه مشكله اللي يعيش برى وينسى العربي )



بعدين طلعت لحديقة جنب الفندق ... وصورت لكم هالورده ...




على ريحة هالورده الحلوه ... نكون وصلنا لنهاية حلقتنا اليوم ...أترككم الحين ... ونكمل في الحلقة الجايه ... وأعلمك وش صار معي في جلاسكو ... !!

تحياتي لكم ... ودمتم في ألف صحة وعافية ...

يا قلبي قلبََأأأأه
صور كنها هـ سيف :11ight: كل وحده احسن من الثانية

لكن ابشرك حنا هنا في الرياض عاصمة الثقافة الحرارة 6000 ولو تطلع في القايلة وتجلس في الشمس
نص ساعة نقلناك لشميسي :109: :109:

(الشميسي) اسم مستشفى في الرياض الله يكفينا وياكم من الشر

المشاركة الأصلية كتبت بواسطة صعـب المنـا ل


يا قلبي قلبََأأأأه
صور كنها هـ سيف :11ight: كل وحده احسن من الثانية
لكن ابشرك حنا هنا في الرياض عاصمة الثقافة الحرارة 6000 ولو تطلع في القايلة وتجلس في الشمس
نص ساعة نقلناك لشميسي :109: :109:
(الشميسي) اسم مستشفى في الرياض الله يكفينا وياكم من الشر



يسعد لي هالصبااااااااااح ...

زين يمديك على الشميسي ...

امس طلعت في بريك الدوام بروح اتغدا ... وصلت سيارتي رجعت على طول مكتبي ... قلت خلاص شبعت ما ابي غدا ... والله شمس تذبح ...

اخوى / المايسترو
بما انى في المكتب ولا عندي شغل ودي اطرح عليك كم سؤال اذا امكن ؟

كم كان سعر التذكرة ؟
وهل هي المره الاولى تزور فيها لندن ؟
وما هو افضل شي اعجبك فيها ؟
وما هو اسؤا شي ازعجك ؟

تحياتي لك

المشاركة الأصلية كتبت بواسطة صعـب المنـا ل


اخوى / المايسترو
بما انى في المكتب ولا عندي شغل ودي اطرح عليك كم سؤال اذا امكن ؟
كم كان سعر التذكرة ؟
وهل هي المره الاولى تزور فيها لندن ؟
وما هو افضل شي اعجبك فيها ؟
وما هو اسؤا شي ازعجك ؟
تحياتي لك



بما انى في المكتب ولا عندي شغل ودي اجاوب عليك ؟ :101:

- سعر التذكره 19600 لأنها حكوميه درجه أولى
- ايه المره الأولى
- امممممممم كثير اشياء اعجبتني ... الجو ... تمجع اكثر الجنسيات في مكان واحد ... الاسواق ...
- اسوء شي ازعجني ... هي ان الشعب البريطاني نفسه في خشمه

بداية أنا مستمتع جداً بالرحلة معك وأنتظر كل حلقة بفارغ الصبر وعلى أحر من الجمر

وبما أني أنا في المكتب بعد وعندي كورس في بداية August في لندن عندي كم سؤال عالطاير

أنت رايح لحالك...كيف وجدت التجربة ؟
هل من نصائح قبل السفر يعني شئ نسيته وتمنيت إنه كان معك ذاك الوقت ؟
كم عدد ساعات الكورس في بريطانيا أو بالأصح Workshop يعني من الساعه كم إلى كم ؟
كم أخذت كاش معك ((بالباوند)) من السعودية ؟ وهل إحتجت تسحب من هناك كاش ؟

ولو جاء في بالي سؤال برجع لك

شكراً لك مقدماً على الإجابة على أسئلتي وإستفساراتي

المشاركة الأصلية كتبت بواسطة صالات المغادرة


بداية أنا مستمتع جداً بالرحلة معك وأنتظر كل حلقة بفارغ الصبر وعلى أحر من الجمر
وبما أني أنا في المكتب بعد وعندي كورس في بداية August في لندن عندي كم سؤال عالطاير
أنت رايح لحالك...كيف وجدت التجربة ؟
هل من نصائح قبل السفر يعني شئ نسيته وتمنيت إنه كان معك ذاك الوقت ؟
كم عدد ساعات الكورس في بريطانيا أو بالأصح Workshop يعني من الساعه كم إلى كم ؟
كم أخذت كاش معك ((بالباوند)) من السعودية ؟ وهل إحتجت تسحب من هناك كاش ؟
ولو جاء في بالي سؤال برجع لك
شكراً لك مقدماً على الإجابة على أسئلتي وإستفساراتي



هلا اخوي

انا متعود لحالي .. يعني ما عندي مشكله ... ما ادري عن طبيعتك انت ... يمكن ما تحب تجلس او تسافر لحالك :101:

بخصوص نصائح السفر ... امممممممممم .. اهم شي الفندق ... احجز فيه من هنا .. لا تقول بروح واجلس ادور ... هذا شي الشي الاخر تأكد من موعد دخول الغرف في الفندق .. لاساعه 12 او 2 ... وهل تناسب موعد وصولك هناك في لندن والا لا ... احيانا توصل 6 الفجر ... وموعد الدخول 2 .. وش راح تسوي ؟؟؟ هذولي عندهم النظام نظام ... فيه اذا تقدر تشوف لك الفندق يستقبلك من المطار يكون احسن .. لأن التاكسي 50 باوند ...

بخصوص ساعات الكورس ... كانت من 9 الى 3 ونص .. وفيه بريكات وبريك غدا

انا اخذت معي من هنا 300 باوند .. ومعي بطاقه الفيزا استخدمها كثيررررر هناك ...

هـلا أخوي المايسترو ..
أنـا في شهـر أغسطس إن شاء الله راح أكون في لندن [ سيـاحة ] ,
وعندي إستفسـار : أنـا متوسط المستوى في اللغة الأنجليزية ؟
هل راح أواجـه مشكلات في هذا الجانب ؟
وإذا تعرف أمـاكن ملاعب أندية كرة القدم , فلا تبخل علينا بهـا ؟
وما هي الأمـاكن إلى تنصحنـا في الذهاب لهـا ؟
+ - - وآسف ع الإطـــالة , وأتمنـى أني ما أكون ثقلت عليـك - - +
تحيـاتي : أخوك / عبدالهادي

هـلا أخوي المايسترو ..



بإذن الله أنـا في شهر أغسطس راح أكون بلندن للسيـاحة
وأنـا متوسط في مستوى اللغة الأنجليزية وعندي كم إستفسار :
هل راح أواجه مشاكل في هالجانب ؟
أين أجد ملاعب أندية كرة القدم في إنجلترا ؟
وما هي الأمـاكن التي تنصحني بالذهـاب إليهـا ؟

وآسف ع الإطـالة , وأتمنى أني ما أكون قد ثقلت عليـك ,, .

شكراً أخي المايسترو ..

بإذن الله أنـا بشهر أغسطس راح أكون في لندن
وانـا مستواي متوسط باللغة الأنجليزية ..

هل راح أواجه مشكلات في هذا الجانب ؟
وأين توجد ملاعب أندية كرة القدم في لندن ؟
وما هي الأمـاكن التي تنصحني بالذهـاب إليهـا ؟
وكم أخذ معـي كـاش .. كم كلفتك الرحلة .. تقريبـا ؟

وأتمنـى أني ما أكون قد ثقلت عليك .

مشكوور اخوي على التقرير و الصور الرووعة

و لا تتأخر علينا بحلقة غلاسكو

أخي المايسترو

بما أنك كنت






لأنها حكوميه درجه أولى



المفروض ما توقف ..






بعد كذا وقفنا في طابور طويل



لان ركاب الدرجتين الاولي والبزنس...يعطون بطاقات Fast pass ....ولهم كونتر خاص ...وكلها 5 دقائق ..بس ..

المشاركة الأصلية كتبت بواسطة عاشق الترحــال


شكراً أخي المايسترو ..
بإذن الله أنـا بشهر أغسطس راح أكون في لندن
وانـا مستواي متوسط باللغة الأنجليزية ..
هل راح أواجه مشكلات في هذا الجانب ؟
وأين توجد ملاعب أندية كرة القدم في لندن ؟
وما هي الأمـاكن التي تنصحني بالذهـاب إليهـا ؟
وكم أخذ معـي كـاش .. كم كلفتك الرحلة .. تقريبـا ؟
وأتمنـى أني ما أكون قد ثقلت عليك .



- اممممم ما ادري انت رايح دوره والا سياحه والا ايش ... اذا سياحه اللغه مهمه لكن ما دامها متوسطه راح تمشيك

- بخصوص الملاعب مافيه شي مخصص ... فيه الحدايق تقدر تلعب فيها .. اما انديه ما ادري والله

- الاماكن شف الحلقات هذه الاماكن اللي رحت لها لعلك تستفيد منها

- انا معي فيزا .. واستخدمها هناك على طول

المشاركة الأصلية كتبت بواسطة مهاجرة


أخي المايسترو
بما أنك كنت
المفروض ما توقف ..
لان ركاب الدرجتين الاولي والبزنس...يعطون بطاقات Fast pass ....ولهم كونتر خاص ...وكلها 5 دقائق ..بس ..



هههههههههههه هذا اذا كنتي في مطار يحترم المسافرين ... اقول لك موقفينا في طابور ... رحت قلت له كذا وكذا ... قال لي يارجال كلكم 20 واحد ما راح تطول :114:

بصراحة

الصورررررررررر تحطم :24:

تحططططططططططططم من قلب:110: وتعور القلب بعد :106:

روووووووعه تسلم الاصابع :109: اللي صورت

ماشاء الله صور غاية في الدقة والوضوح والزويا واللقطات :24:

بالعربي إنت :24: كذا في التصوير وحده تموووت على التصوير :106:


نرجع لمحور حديثنا :101: اللي اهوه التقرير

التقرير كلمة رائع قليله بحقه

استمتعنا بزيارة لندن من خلال تقريرك

تسلم الأيادي


تحياتي

المشاركة الأصلية كتبت بواسطة بنت البحرين


بصراحة
الصورررررررررر تحطم :24:
تحططططططططططططم من قلب:110: وتعور القلب بعد :106:
روووووووعه تسلم الاصابع :109: اللي صورت
ماشاء الله صور غاية في الدقة والوضوح والزويا واللقطات :24:
بالعربي إنت :24: كذا في التصوير وحده تموووت على التصوير :106:
نرجع لمحور حديثنا :101: اللي اهوه التقرير
التقرير كلمة رائع قليله بحقه
استمتعنا بزيارة لندن من خلال تقريرك
تسلم الأيادي
تحياتي



هلا والله وغلا ... والله يعافيك يارب

تدرين شي ... اول مره في حياتي اصور .. واول مره استخدم كاميرا ... كان عندي كاميرا من زمااااان عاديه جدا .. واصور بها طلعات روحات ... لكن قررت مع هالرحله اني اشتري شي كويس وابدا اصور فيه ... والحمد لله طلع اللي طلع :101:

[color="Navy"]

الحلقة التاسعة ...

هلا وغلا ... وش أخباركم .. إن شاء الله بصحه وعافية ...

اليوم أكمل لكم باقي حلقات الرحلة ... كانت الحلقة الماضية تكلمنا فيها عن جلاسكو ... أو بالأصح الطريق لجلاسكو ... جلاسكو الحلوووووه ... جلاسكو الرائعه ... جلاسكو التي تمنيت أن رحلتي كانت كلها لجلاسكو وبس ....

بعد ما وصلت للفندق وريحت شوي ... كلمني اللي عازمني للغدا ... وقال بمرك ونروح للمطعم ... انا بيني وبينكم ظنيت أنه مطعم يعني عادي هنا أو هنا ... لكن طلع مطعم في مكان بعيد شوي عن وسط جلاسكو ... بعد ما طلعنا أنا وياه ركبنا في قطار صغير يوصل للمنطقه اللي فيها المطعم ... لأن المنطقة تبعد تقريبا 15 دقيقه بالقطار ... طبعا ممكن تروح لها بالسياره وبيكون أسرع ... لكن حبينا نروح بالقطار ... بعد ما وصلنا للمطعم ... كان في منطقه جميله جدا ... وصورت لكم بعض الصور ... لكن كان الجو مغيم ... وانتظر في أي لحظه ينزل مطر ... وكان هوا بارد ... وطلعت بهالصور من أمام المطعم مباشرة ...













وكانت فيه هالجلسة الحلوه قدام المطعم ...




وهذه صورة المطعم من برى ... وتلاحظون فيه جلسات برى ... لكن كان الجو بارد ... فكل الناس جالسين جوا ...




بعد غدا ... كان أروع غدا تغديته .... طلعنا لمقهى جنب هالمطعم ... كان على شكل سفينه




بعدها طلعنا لحديقة خلف المطعم مباشرة ... وجلسنا فيها ... واحنا جالسين ... صار فيه زواج في نفس المطعم اللي تغدينا فيه .... والعروس جايبه لها مصور يصورها في العصر :109: ... وأخذت لها هاللقطه بس كنت بعيييد مره ... يا عيني على هيك زواجات ... مو مثل زواجاتنا ... من الساعه 9 الصبح وهي في المشغل عشان عرسها ... ويحطون على وجهها 4513 نوع من المكياج .. وسبحان الله العظيم سبحان الله العظيم شعرها الكشششششششه ... بقدرت قادر يتحول الى حرير ... وتدفع مبلغ وقدره ...واذا جت الساعه 11 إلا ربع راحت للقصر ... وتترزز قدام هالعالم لنص ساعه ... بعدين تروح لبيت زوجها ... وخمس دقايق قدام المغسله ... تغسل كل شي ... ويبان المستور ... هعهع ... وينخرع الزوج :101: ... ما تلاحظون مسكت خط ثاني ..:101: المهم .... مع هالعرس ... بدينا نغني ... ( ألف الصلاه والسلام على نبي الله محمد .... ولولولولوولولولولييي )

المشاركة الأصلية كتبت بواسطة صعـب المنـا ل


اعجبتني اول صوره :110:
يعطيك العافية..



بس أول صوره :114:

صور خياااااااااليه ..!






حتى أني يوم لاحظته جلست اضحك مع نفسي في القطار اكتشفت من وين يجيب ( بيل قيتس ) ...راعي ويندوز ... اكتشفت وين يجيب صور الخلفيات حقات الويندوز هههههههههههه ...



خخخخخخخخخخ

إي والله .. يقصون علينا :d ..
.
.
.
.
عن اذنك .. تراني لطشت كمـّ (ن) صوره ..!

إي صح .. نسيت .. لاتـطـوّل .. نبي نعرف وش صار لك بعد كذاااا !!

:d

رائع يامايسترو في كل حلقه تبهرنا بالمناظر الجميله واللقطات الاجمل اللي تنقلها لنا في تقريرك المميز بحق لا اخفي عليك انك في كل حلقه تشوقنا اكثر لزيارة الاماكن اللي تنقلها لنا وتصورها بموهبتك الرائعه في نقل كل ماتراه جميل اشكرك على المعلومات والصور الرائعه

التقرير رائع والصور رائعه وانت اروع مشكووور اخوي

اخي الكريم... وش رايك من ناحية السكن وش تنصحني به من ناحية الفنادق الزينة والنظيفة واسعارها معقولة بحدود 500 ريال .... وش رايك في اي المناطق تنصح.. اكسفور والا كوينز وي والا ايش ؟؟؟

انتظر ردك وانا محتاس جدا سفرتي باقي لها اسبوعين...

وسلامتك

*نوار

هلا والله وغلا ... ابد .. كل الصور تحت امرك ... خذ اللي تبي ...

فجر الاندلس

اللهم آمين يارب ... تسلم لي طلتك يا غالي .. تحياتي لك

Pink_girl

هلا والله بالمتااااابعه .. قد تكون الصوره حلوه ... لكن الأحلى متابعتك لنا يا غاليه ... تحياتي لك ..

s034

تسلم يا غالي ... ماقصرت

الظفيري

هلا والله اخوي

تبي فندق حلو ... وزين ... وسعره معقول .. وقبل كل هذا وهذا .. عليه موقع موووو صاحي ... هو فندق موستين .. شفني حطيت صوره له في أول حلقه .. اذا تبي تروح بعد اسبوعين احجز فيه الان راح تحصله رخيص .. كل ما حجزت قبل ترخص لك الاسعار ... هذا موقعه حلو مره ... بس 3 نجوم . بس نظيف ..

المشاركة الأصلية كتبت بواسطة المايسترو


هههههههههههه هذا اذا كنتي في مطار يحترم المسافرين ... اقول لك موقفينا في طابور ... رحت قلت له كذا وكذا ... قال لي يارجال كلكم 20 واحد ما راح تطول :114:



أخي المايسترو .. القصد كان مطار هيثرو ....

و شكرا على الجولة فى جلاسكوا الرائعة .....

بس






مو مثل زواجاتنا ...



الحمد لله .... زواجتنا مو مثل زواجاتكم ......:109:

شكرا لك يا أخي
تقريرك روعه
اختك
فجر الاندلس

المشاركة الأصلية كتبت بواسطة فجر الاندلس


شكرا لك يا أخي
تقريرك روعه
اختك
فجر الاندلس



هلا وغلا بأختي فجر الأندلس .... تشرفت بزيارتك ... وبإضافتك ... دمتي بصحه وعافيه :101:

وش الخضار وش الجمال وش طبيعة وووو .. ووش فن تصوير
مشاء الله عليك وعلى الكاميرة


والاحلى تعليقاتك على كل صوره زاد الجمال حلى

واصل تألقك .. وإبداع

تحياتي


ماأضيف شي على تعليق الاخ صعب المنال

الحـلقة الأخيرة ...


صباح الورد للجميع ...

اليوم وصلنا للحلقه الأخيــــــرة ... ( توهي توهي ) :110: .... راح أتوقف هنا ... بسبب ضيق الوقت خاصة بعد ما بدا الكورس في المعهد ... لأنه الكورس يبدء من الساعه 9 الى الساعه 3 ونص ... يعني مافيه مجال الواحد يروح ويبعد ...
اليوم كان مشمس جدا ... صراحه لندن هذه ما ينعرف لجوها ... ممكن تشوف أربع فصول في يوم واحد ... اليوم كان مشمس وحر ... معظم اللي طالعين في الشوارع لابسين ثياب بيض ... قصدي لابسين صيفي ... :109:
اليوم مسكت معي أروح لمحلات الهارودز




هذا سوق كبير ... من 5 أداور تقريبا ... فيه كلش ... هذا صاحبة الفايد المصري .... اللي ولده مات مع ديانا في حادث السياره ... المهم أول ما وصلت للمحل هذا ... دخلت مع البوابه رقم 7 ... فيه شي صار لي ... يمكن البعض ما يصدقه ... أول ما جيت بدخل مع الباب ... فيه حارس عند كل باب ... يفتحه اذا جا الزوار ... المهم أول ما جيت بدخل .. ألاقي الناس تبعد عن هالباب ما دخلت معه ... قلت أنا بدخل من هنا .. مالي شغل .. المهم أول ما جيت بدخل لقيت الحارس يتكلم ويحرك يديه لنا ... انا كنت حاط MP3 البلير في اذني ... ولا أسمع شي ... ولا عطيته بال اصلا ... اثاري الرجال كان يقول أبعدوا عن الباب بيدخل شخصيه مهمه ... انا ما سمعته لأني حاط السماعات ... بعد ما دخلت دخل من وراي واحد كبير ... كتله بشرية تتحرك ... بودي قار ... وبعده دخل الفايد المصري .. بعده دخل واحد ثاني كبير .. كتله غير الكتله اللي قبل :101: ... انا دخلت بينهم من غير ما ادري .. ويمر بسرعه واطالعه .. الا والله هو ... ويرقى مع الدرج ويروح ... انا الى الان ماني مستوعب ... والاقي العالم لحقته فوق ... ويوقفهم الحارس ... واوقف مكاني ... واطالع الباب اللي دخل منه من برى .. والاقي سيارة الماي باخ .. سوداااااا ... داخلي بيج ... وأسال الحارس قلت من هالدخل ... قال لي أنه الفايد ... قلت اييييييه ... هالحين استوعبت ... :101: .. آآآه يالكاميرا بس لوها جاهزه كان لقطته ...

المهم بعد هالصدمه ... قلت ياعيني هذه وأنا ما بديت ألف في المكان ... بعدها بدت التمشيه ...



صراحة المكان رائع .. روعه من جد ... وتحس أنك داخل قريه كل شي فيها ... وكل شي مرتب ... قسم المأكولات وقسم النساء والعطور والرياضه وووو ... كل شي .... المهم في قسم جلست فيه ثلاث أرباع وقتي ... تدرون وشو !! .. قسم الــشــوكــولاتــــــه .... يالله وش هالقسم ... ياربيه ... شريت منه بلاوي ... تبي تخرب شغل 6 شهور في النادي في نص ساعه ... :105: صراحه شوكولاته من كل نوع ... ومن كل شكل ... كل ما شريت شي تحس ان اللي بعده احسن ... انتم شوفوا الصور ... وقولوا لي تلموني والا لا ؟؟!!




والا هذه




شوفوا الصفه هذه .... ما تبي تاخذ لك كم حبه مع فنجال قهوه ...




وإلا هذه ... كل قطعه تقول الزين عندي ...




وهذه صوره القسم من بعيد ...




وهنا صوره ... ياربييييييه ... صوره ودي بس ادخل يدي فيها ... والا وجهي .. والا اي شي ... هذا صحن مدري قدر مدري وشو ... المهم انه كله شوكولاته تتحرك .... يمين ويسار .... طالعوا




بعد ما طلعت من هالقسم ... حسيت أني ثقيل وأنا اتحرك ... الظاهر أن الوزن زاد ... المهم ... طلعت من هنا ... وخذيت لفه في كل مكان ... بعدها رحت لقسم الرياضه ...






القسم هذا فيه معدات واجهزه ... اللي لفت انتباهي في القسم هذا ...هي فيه فنايل لللاعبين مثل ماردونا ... وبيليه .. ورونالدو ... وغيرهم .. الفنايل هذه عليها تواقيعهم الشخصيه ... أغلى شي سعر فنيله مارودونا وبيليه ... سعر الفنيله الوحده بـ 500 باوند ... يعني 3500 ريال ... قلت تبطي اشتريها .... والله لوها توقيع المنتشري على غفله :109: .... وبرضو كانو مهتمين بمشاركة أنجلترا في كأس العالم ... وحاطين لها قسم خاص ...




طلعت من هنا .. ورحت لقسم خاص لمصر ... مسوين قسم خاص لمصر ...




و أول ما تتعدى هالقسم تلاقي حاطين صوره لديانا ولولده الفايد .. وكاتبين بعض الاشياء تحتها




بعدها طلعت من هالمكان الكبير ... والشي العجيب العجيب .. إني طلعت من المكان اللي دخلت منه هههههههه مع أن فيه كثير قالوا لي مستحيل تطلع مع الباب اللي دخلت منه .. انا سويتها وطلعت من نفس الباب ... لكن والله العظيم صدفه :109: ... وهذه صوره للسوق من برى




ورجعت للفندق ... وبديت أطلع الاغراض اللي شريتها ... ومن ضمنها ...




على كذا يا شباب وصلنا للحلقة الأخيره من رحلتي للندن ... حبيت أنكم تشاركوني فيها .. وإن شاء الله استمتعتوا فيها ... مثل ما انبسطت في هالرحله كثير ... صحيح أني أول مره اسافر لحالي ... وللمده هذه ... لكن كانت رحلة غير ... وفيها أشياء غير ...


كلمة أخيرة ...

أحيانا نجد للسعادة طرق نصل إليها ... ونجد للاستمتاع دروب نسلكها ... ونجد لجمال الكون مناظر نفرح بها ... ونجد لرائحة تلك الزهور هواء نتنفس به ... ولكن قد يأتي يوم وتنتهي تلك الأيام ... وتنتهي تلك اللحظات ... وتنتهي تلك السعادة ... وتنتهي تلك المناظر من أمامنا ... ونرجع لديارنا ... نرجع لسكون الصمت ... نرجع لهدوء العاطفة ... نرجع لما كنا عليه ... وبين فتره وأخرى ... نتذكر تلك المناظر ... نتذكر تلك المشاهد .. نتذكر تلك اللحظات ... قد تسأل نفسك هل هي حلم من أحلامك البارحه ؟؟!! ... أم أنها قصة قصيرة قصصتها على طفلة قبل نومها ... أم كانت كهواء عليل مر على أنفاسك في لحظات ضيق تنفس .. في لحظات وصلت لها العاطفة إلى ذروتها ... في لحظات تمنيت أن الساعة تقف في مكانها .. في لحظات تمنيت أنك تعيشها كل ثانيه .. وكل دقيقه .. وكل لحظه ... وأنت تشعر أنك تستمتع بهذه الثانية .. وتتلذذ بتلك الدقائق ... ولكن هذه حالك يا دنيا ... قد نرى منك لحظات من المتعة والسعادة ... نفرح بها أيام ... ولكن تردنا إلى ما كنا عليه ... إلى ما كنا عليه من حزن وسكووووونـــ ...

أحبكمـ ....

المايسترو ....

دمتم بصحة وعافية ...

رائــــــع ... رائـــــــع .. رائــــــــع ..
بالفعل استمتعت بكل جزء وبكل فقرة من اليوميات ومن ردود الاخوة والاخوات الاعضاء ...
شوقتنا يا اخي ل لندن ...

الله يعطيك العافية موضوع متكامل ورائع

ولو قدرت (في حال إستطعت) تحط كل الصور اللي صورتها في ملف مضغوط بحيث نقدر نشوف كل الصور حتى لو كان حجمه كبير مافيش مشاكل تصويرك ما يقاوم

وألف شكر لك

صعـب المنـا ل

تسلم والله يا غالي ... تشرف بتعليقات ... وكنت دائما السباق في زياره الموضوع ... تحياتي لك

أمينة مكتبة

يا هلا وغلا بك معنا في المنتدى ... وتشرفت بزيارتك وطلتك .... تحياتي لك

ترتوب

الله يعافيك اخوي .. ويالله في انتظار موضوعك .. وتروح وترجع بالسلامه يارب

صالات المغادرة

هلا وغلا اخوي ... والله الصور كثيرررررررره ... وانا وضعت المتميز منها ... الا اذا تبي وحده بحجم كبير ... انت بس اختر الي تبي وانا تحت أمرك

أخي ..المايسترو






اثاري الرجال كان يقول أبعدوا عن الباب بيدخل شخصيه مهمه



الفايد..أعتبره شخصية عادية ...لما يطلع فى وجهك ..شيخ شاعر ومعه ستة بودي جاردي... أو تمر جنبك أميره ومعصبة لما ما لقت الشنطة الي بغتها ..أو تشوف ولد عز معه ثلاثة موابيالات واحد فاترون والباقي كروم ....هاذيك الساعة ...أعرف أني فى هاودرز ...

وبما أنك مدمن حلو مثلي ...خذ هذه الحلى هدية ....



تقرير رائع لمدينة رائعة أحبها فى كل الفصول

شكرا ..

:113:

المشاركة الأصلية كتبت بواسطة مهاجرة



أخي ..المايسترو
الفايد..أعتبره شخصية عادية ...لما يطلع فى وجهك ..شيخ شاعر ومعه ستة بودي جاردي... أو تمر جنبك أميره ومعصبة لما ما لقت الشنطة الي بغتها ..أو تشوف ولد عز معه ثلاثة موابيالات واحد فاترون والباقي كروم ....هاذيك الساعة ...أعرف أني فى هاودرز ...
وبما أنك مدمن حلو مثلي ...خذ هذه الحلى هدية ....

تقرير رائع لمدينة رائعة أحبها فى كل الفصول
شكرا ..
:113:




الله ... وش هالحلا ... وش هالزين ... طيب وين الملعقه :114: ... ( ناوي يسمي ) هههههههههه

تسلمين يا غاليه ... وتشرفت صراحه بزيارتك وتعليقك على حلقات الرحله ...

تحياتي لك ... ودمتي بكامل صحتك وعافيتك ...

:x1: :x1: :x1: رائـــــــــــــــــــــــع اخــــــي المــــــــايستـــــــــرو :x1: :x1: :x1:

تقرير جميل من بدايته الى نهايته تجولنا معك في لندن الجميله في كل الحلقات لم تبخل علينا بشي رايته واعجبك الا ونقلته لنا لا يسعني الا ان اشكرك اخي الكريم وهذا قليل بحقك اما بخصوص الخاتمه كلمات جداً مؤثره ومعبره وكانك تترجم مشاعر كلاً منا عندما يبحر في الذكريات الجميله بعد العوده من السفر

المشاركة الأصلية كتبت بواسطة Pink_girl


:x1: :x1: :x1: رائـــــــــــــــــــــــع اخــــــي المــــــــايستـــــــــرو :x1: :x1: :x1:
تقرير جميل من بدايته الى نهايته تجولنا معك في لندن الجميله في كل الحلقات لم تبخل علينا بشي رايته واعجبك الا ونقلته لنا لا يسعني الا ان اشكرك اخي الكريم وهذا قليل بحقك اما بخصوص الخاتمه كلمات جداً مؤثره ومعبره وكانك تترجم مشاعر كلاً منا عندما يبحر في الذكريات الجميله بعد العوده من السفر



يا هلا والله وغلا Pink_girl .... الله يخليك على كلماتك الرائعه ... وبخصوص الخاتمه .. كانت مجرد كلمات في قلبي .. وحبيت أني اكتبها

تحياتي لك ... ودمتي بصحه وعافيه :101:

أخي المايسترو
أقف إجلالا وتعضيما لك
مشكور على هالموضوع اللي ماقدر أوصفه الا انه من أروع ماقريت وشاهدت في هالمنتدى الرائع.
تحياتي يالغالي
اخوك ملقوف :113:

المشاركة الأصلية كتبت بواسطة mlgoof


أخي المايسترو
أقف إجلالا وتعضيما لك
مشكور على هالموضوع اللي ماقدر أوصفه الا انه من أروع ماقريت وشاهدت في هالمنتدى الرائع.
تحياتي يالغالي
اخوك ملقوف :113:



هلا والله اخوي ... تشرفت بزيارتك وقراءتك للموضوع ...

تحياتي لك

أخي المايسترو.
ما شاء الله .
تقرير راااااااائع ،
غني بالصور الجميلة جدا.
ومثلما ذكرت فإن الكاميرا مجرد عامل مساعد فقط ، المهم نظرة الشخص الذي يقوم بعملية التصوير.
شكرا لك أخي فقد اخذتنا لأماكن كان بها الكثير من الذكريات الجميلة.
وخاصة التاكسي اللي في مدام توسو ( إنه أحد أجمل الأشياء في لندن ، أحببت المؤثرات الصوتية الخاصة بكل عصر).
أما جلاسكو فالصور خيالية .
من الصعب التعبير عنها بكلمات مدح وثناء.
كل الشكر لك على التقرير الذي أمتعتنا فيه كثيرا.
ولا يفوتني أن ابدي إعجابي أيضا بالكلمات الشاعرية التي جاءت في نهاية التقرير.
تحياتي لك ، وألف شكر.

المشاركة الأصلية كتبت بواسطة السيدة درجة أولى


أخي المايسترو.
ما شاء الله .
تقرير راااااااائع ،
غني بالصور الجميلة جدا.
ومثلما ذكرت فإن الكاميرا مجرد عامل مساعد فقط ، المهم نظرة الشخص الذي يقوم بعملية التصوير.
شكرا لك أخي فقد اخذتنا لأماكن كان بها الكثير من الذكريات الجميلة.
وخاصة التاكسي اللي في مدام توسو ( إنه أحد أجمل الأشياء في لندن ، أحببت المؤثرات الصوتية الخاصة بكل عصر).
أما جلاسكو فالصور خيالية .
من الصعب التعبير عنها بكلمات مدح وثناء.
كل الشكر لك على التقرير الذي أمتعتنا فيه كثيرا.
ولا يفوتني أن ابدي إعجابي أيضا بالكلمات الشاعرية التي جاءت في نهاية التقرير.
تحياتي لك ، وألف شكر.



مرحبا السيدة درجة أولى

تشرفت بداية بقراءتك للموضوع ... وزادني شرفا ما سطرته كلماتك ... تحياتي لك يا غاليه ... ودمتي بكامل صحتك وعافيتك بعونه تعالى ...

حبيبي موستن...

بالنسبة للموستن هوتيل..

سالت عن اسعارهم؟؟

وبعدين هل هو مكيف؟؟

وين موقعه بالضبط..


وش رايك في فندق كورس هايد باركزز Corus Hyde Park?



اسف بازعجك لكن تحملني