انا واحد من أعضاء المنتدى الأكثر من رائع ومن المتابعين له مرررره :106: ولا عمري سافرت حتى اشيك على المنتدى المهم قررت الدراسة في بلفاست هذا الصيف 2006 انجليزي وبلفاست تقع في شمال إيرلندا وهي تتبع للحكومة البريطانية واوافيك بمعلومات عن الدراسة والبلد ان شاء الله لاحقا
تعرفون طبعا في بلفاست
مشكلة 12 جولاي ما ادري وش قصتهم تاريخ تحرير أو ما ادري وشو بالضبط بن الانجليز والآيرش المهم قالوا المعهد إننا نبغى نسكر المعهد إلى الجمعة لين تخلص المشاكل الموجوده داخل الديره قلت لازم نستغل هالفرصة قلت لخويي مشينا لندن قال والله فكره بس ما أقدر اروح حاولت فيه ماش موب مشتهي الروحة قلت أروح أنا وأغامر المهم دورنا حجز بالنت على الطائرة ولقينا حجز رخيص وحليل المهم حجزنا عليها من بلفاست قلنا بلا كسافه !!! خل نحجز فندق دورنا على فنادق لندن لقينا فندق على كيف كيفك ورخيييص مع الفطور 30 باوند يابلاش !!! المهم قلت: قدام احجز فيه حجزنا ...معنا عطية الله هالفيزه ... هذا الكلام حوالي الساعة 10 على آذان المغرب ...المهم الحجز الساعة التاسعة صباحا بعد ما خلصنا من النت ناظرني خويي قال : مانتب جوعان قلت : إلا بلى والله ميت من الجوع ؟؟ قال مشينا للمطبخ نمطرس لنا شي ؟؟؟ المهم رحنا واكلنا واخذتنا السواليف انا وخويي بالسكن لكن سواليف يحبها قلبك مغامرات وقصص من صمييم الحياة ما درينا الا الساعة ست الفجر ( ساعة المحبوب قصيره ) !! قلنا ما فيه نوم عشان ما تفوتنا الطياره المهم من هنا ومن هناك رحنا لمحطة الباص عشان نروح للمطار وصلنا المطار وانا دايخ ابي النومه بأي طريقة.... افطرنا بالمطار وودعت خويي ودخلت صالة المطار!!! وصلنا مطار لوتو ( وشي لوتون ما أدري ) المهم رحت للباصات عاملني فاهم دخت قلت مالك ومال الغثى ... رحت لراعي التاكسي قلت : هذا العنوان ودني للفندق والسواق باكستاني قال : أوكي وداني للفندق ودخلت الساعة 12 قالوا الدخول الساعة 1:30 قلت ايام كمنق فروم اربورت ناو ما ادري وش قالوا قلت سوري ايام نوت قود اسبيك انجليش ...قالوا: ايه هذا يبي يغثا ما فيه فايده دخلوه اللحين عطوني مفتاح الغرفه ودخلت واصلي الظهر والعصر وحط راسك إلى الساعة 11 بالليل ناظرت مع الدريشه واذا الدعوى خرمس!! وهدوء!! قلت غريبه لندن هاديه!!!!!!!!!!!! وين اللي يقولون العالم مليانه رايحه جايه؟؟؟؟ المهم غسلت وصليت المغرب والعشاء ونزلت تحت اشوف اذا فيه نت والا أي شي .. نزلت ومعي لاب توبي واتكي بالمطعم وافتح النت وشغال ويرلس ببلاش !!!!! إلى حد الحين مبسوط ؟؟!! قعدت اطقطق بالنت واسأل حق المطعم هاو فارستي سنتر قال اباوت فايف تن منت قعدت افكر وشلون تجي فايف تن ؟؟؟؟؟ واثره يقول : من خمس إلى عشر دقائق قلت مضبوط هذي الوناسة انواع الرخص !!!... والله ياهو سعر على كيف كيفك فطور وبس 30 باوند وعشر دقايق عن السنتر ياسلام ............ اييييه المهم أخذت كولا وشكولاته ورقيت للغرفة مبسوط نمت قمت حوالي 9 الصباح لبست وطلعت للباصات وقفت لين جاء الباص.... ركبت قلتله ستي سنتر قال أوكي ون باوند قلت ارخص!!!!... رحلة موفقة ما فيش خساير من محطة لمحطة لين وصلنا للستي .... قلت هذي لندن قعدت ادور الحدايق ادور ساعة لندن ادور عماير ادور شي معروف بلندن ما لقيت كلها محلات باكستانيين وهنود وش ذا لوحات المحلات أردو!!! هاه حنا بلندن والا في اسلام اباد المهم وقف وانزلو الناس نزلت معهم قدعت ماسك راسي وين اروح اللحين وش أسوي ما فيه احد عربي ؟؟ والانجليزية ما هيب اللي انت تبي ؟؟ المهم قلت ما فيه الا تاكسي اسأله وقفت تاكس باكستاني قلتله : آي ونت قو هايد بارك قال هايد بارك ان لندن قلت وانا وين... هاه انا وين ؟؟؟ انا منيب بلندن ؟؟؟؟؟؟؟ بقى شوي واصيح وشر راسي وتفقعت كل الفيوزات !!!!!! قال بس ما فيه مشكله اوديك قلت هاو فار يعني كم تبعد قال 60 كيلوا قلت وشوا ؟؟!! قال اكيد تبي اوديك اركب الطريق نصف ساعة قلت اييييييييييييه ...... هذا اللي خلى التذكره والفندق رخيصات !!!! الشكوى لله اركب هي اول الخساير مشينا رحنا صدق لندن بعيييده قال ابنزلك بشارع ممتاز شارع العرب نهاية الشارع حديقة الهايدبارك قلت اوكيه المهم نزلني هناك وقال اذا خلصت اتصل علي واجي لمك ارجعك ....صراحة مليان عريبيا ومحلات عربية وعالم قلت ايه هذي لندن المليانه .... المهم طلعت الجوال ابدق على خويي فجأة اشوف الجوال طافي قلت وش مطفيه ناظرت لجوالي لقيت ما فيه بطارية جوالي أي ميت جام قلت بسيطه اشتر شاحن ... دورت بالشارع كله ما لقيت شاحن يا ناس ياعالم ما فيه شاحن قالوا لا تدور اصلا ما فيه احد يستخدم هذا الجوال !!!! المشكله كل الأرقام ورقم خويي بالشريحة ولا نقطة شحن بس عشان اطلع الرقم المهم دخلت على محل وشرحت له وضعي قلت الجوال مافيه بطارية وابغى رقم من الشريحة ممكن تساعدني قال ما فيه مشكله المهم طلعت الرقم وشكرته... رحت على الكبينة اتصل طلع الرقم ناقص قلت حسبنا الله ونعم الوكيل وش انا مسوي استغفر الله ....؟؟ المهم من الطفش قلت اشتري جوال ولا منت الناس رحت ودخلت محل جوالات واخذت جوال متورلا في 30 بـ 99 باوند المهم يوم شريت وركب الشريحة قالي مايشتغل على شريحك قلت اجل وش الفايده رجعه ما ابغاه قلت عطني أي جوال يشتغل على أي شريحة قال ما عندي قلت اييييييييييييه ..... وش السوات اللحين بس ابي الرقم حق خويي
المهم قعدت بالكبينة اتصل على المدام هاه معك رقم خويي يوم ادق عليك منه قالت لا ليش وينك اللحين قلت ما فيه شي بس جوالي ما فيه بطارية المهم اتصلت على واحد ثاني من الشباب قالي ايه معي ويعطيني رقم البيت اللي كنا ساكنين فيه أول ما جينا اقولكم طفشت وتنكدت الساعة اللحين 7 .... ما ادري وش اسوي
رحت اجدع وجهي مريت واحد مسلم بالشارع يبيع كتب قلتله كذا وكذا قال وشي شريحك قلت أو تو قال ما تشتغل على الجوال قلت اييييييه بس الشكوى لله
قلت بس خلني أصور كم صورة بكاميرتي الديجتال طلعة الكميرا ولقيتها......؟؟؟؟؟؟؟ ما فيها بطارية مره ما تشتغل قلتلها تكفين يا كميرتي الحبيبة لو صوره لكن ؟؟؟؟؟ما فيش فايده !!!.. قلت خل اتمشى فجأة لقيت محل انترنت قلت ادخل لعل وعسى تلقى خوييك دخلت ماسنجر ولقيته قعدت ارقص من الوناسة وينك اخبارك اعلومك الله يقلعك انواع القصص حصلت لي المهم هذا رقم الباكستاني حق التاكس اتصل عليه جوالي ما فيه بطارية المهم اتصل عليه مايرد ثم مقفل جواله قلت والله البلشه مين يوديك للفندق الملكي القريب حقك قالي خويي اسأل أي واحد سألت حق النت واحد عراقي قلت وش فيه مواصلات توديني لوتون قال وش وديك هناك قلت القراده وشين الحظ بس خلها على ربك يوم قلت كذا شكله رحمني وقال انا أوديك بغيت احب راسه قال بس بعيد قلت اييييييه عارف انه بعيد لكن كل طقة بتعليمه قال بكم جيت قلت 40 باوند نزلت السعر عشان ما يطمع قال بس الروحه مو مثل الجييه قلت كم ؟؟؟ اوه الله يعين قال 60 باوند قلت هاه قال 60 باوند بدك نمشي اللحين قلت وان اهز راسي الشكوى لله أي والله بدي لو بمية باوند بس امش يلله وتوبه ما تروح مكان إلا عارف وين بالضبط ؟؟وكل شي 100%
لكن كذا يتعلم الانسان من المشاكل
اللي تحصل له في الحياة
إلى اللقاء في الحلقة القادمةمواضيع عشوائيه ممكن تكون تعجبك اخترناها لك:
- ايش رايكم في هالفندق
- ما هو اجمل ريف قريب من لندن ؟
- منطقة البحيرات او هونيتون
- بخصوص البصمة
- هاام وعااجل ارجو المساعده رحلتي الاسبوع القادم الى لندن
- استفسار ضروري وعاااااااااااااااجل جدا
- افضل شركة اتصالات ،، استفسار
- اريد الذهاب الى غلاسكوو
- هل يعطونه فيزا ؟
- لكم جزيل الشكر وامتناني مقدما
- تنزيلات لندن
- كيف الجو بلندن في نهاية اكتوبر لنوفمبر
- إستفسار ضروري بخصوص فيزة بريطانيا
- ابي مساعده ضروريه من اهل الخبره
- الفيزا و تاريخ الانتهاء
- احتاج مساعده
- رحله الي جلاسكو
- الي سافر من بريطانيا الى فرنسا بالقطار او السيارة
- استفسار عن تكاليف السفر الى ايرلندا
- حجوزات السكن للرحلة المرتقبة دعوة لخبراء مانشستر للاستفادة من اقتراحاتهم
رد مع اقتباس
المشاركة الأصلية كتبت بواسطة aido
المشاركة الأصلية كتبت بواسطة تميمو
المشاركة الأصلية كتبت بواسطة تميمو
المشاركة الأصلية كتبت بواسطة تميمو
المشاركة الأصلية كتبت بواسطة تميمو
المشاركة الأصلية كتبت بواسطة تميمو
المفضلات