السلام عليكم ورحمة الله وبركاته ,,
زرت الدوله العزيزه والغاليه على قلبي قطر وبالتحديد دوحه الخير وهذي انطباعاتي عنها ..
اولا انا مشيت من القصيم يوم الخميس الصباح ووصلت الحدود بعد الظهر وكانت الاجرائات بالجانب القطري بطيئه نوعا ما وتفع تامين 105 ريال,,
لما وصلنا الدوحه كانت فيه انشائات وهذي مسببه زحمه بالشوارع بس بشكل عام الدوحه مرتبه ومنظمه ولا تضيع فيها كل شي واضح وفيه لوحات ترشدك للي تبيه ,,
اول يوم زرنا سوق واقف هذا السوق العجيب الي ياخذك لبعيد لزمان الاجداد والأباء طبعا الدخول للموقف ب3 ريال وبعدين كل ساعه تدفع ريال زياده وكان السوق زحمه وهيصه ووناسه وفيه حريم يسوون اكلات شعبيه وملابس قديمه ومطاعم الصراحه ماتبي تطلع من هذا السوق وكان معي اختي وهي كبيره بالعمر الصراحه قالت شي عجيب ذكرنا بزمان اول زمن الطفوله بس يعيب السوق المطاعم الي تقدم الشيشه الصراحه ريحتها فايحه والغريب الحريم الي متحجبين ويشيشون نسال الله السلامه وتعشينا في المطاعم الي هناك واسعارها الصراخه مره مرتفعه’’’
بعد ماطلعنا من السوق زنا الكورنيش الي قدام سوق واقف وكان خياااال ونظيف مره مره ياليت لو ربعنا يقلدونهم وتمشينا هناك وركبنا سفينه الشخص الواحد ب20 ريال وبعدهها رجعنا للفندق عشان نرتاح بعد الطريق ,,,
يوم الجمعه صلينا الجمعه مع الجماعه وبعدها رحنا لمجمع فيلاجو وكان خياااااال وروعه تحس انك بفينيسيا وفيها نهر بوسط المول وتقدر تركب قارب في وسط النهر يمشي فيك بالمول وانا حضرت فيلم بالسينما والاهل ماقصرو بالتسوق وبعدها رحت اصلي المغرب فيه مسجد داخل المول ومره جزاهم الله خير مهتمين فيه وفيه ملاهي جنان وكان فيه كرنفال لشخصيات كرتونيه مره فله انبسطنا عليها وصورنا معها ,,
بعد ماطلعنا من المول رحنا لحديقه اسباير زون هالحديقه الي ما ادري وشلون اوصفها لكم نظيفه ووسيع صدره وفيها بحيره ونافوره تمشي من تحتها واصوات طيور وفبها اكشاك لبيع المياه والبوب كورن والعصاير وغيرها ,,
وبعدها رجعنا للفندق للنوم ,,
يوم السبت كان الجو حلو وغيوم رحنا بعد الظهر لسوق واقف علشان الاهل يبون اغراض من هناك وشرو جلابيات واقمشه وبخور وانا رحت لسوق الطيور مره حلوه وماتمل منها ابد ..
وبعدها رحنا لسيتي سنتر وهو مول كبير وفيه كارفور وسينما تمشو الاهل وتسوقنا وحضرنا فيلم بق ماما3 وبعدها طلعنا نفر بالسياره بشوارع الدوحه الجميله ونشوف الابراج الطويله والغريبه ,,
يوم الاحد رحنا لحديقة الحيوان وهي قريبه من فيلاجو مول هي حديقه صغيره بس حلوه ومرتبه وفيها قطار
بعد ماطلعنا من الحديقه زرنا مشروع اللؤلؤه الصراحه حلوه ومتعوب عليها وفخمه وفيها محلات وكفيات وتمشينا فيها وجلسنا في كفي نتقهوى ونشوف الناس الرايحه والجايه ..
يوم الاثنين رحنا لمجمع اللاندمارك حلو ومرتب وفيه ماركات بس فيلاجو اكبر وازحم منه ,,
وبعدين رجعنا الفندق علشان نجهز اغراضنا استعداد للسفر غدا ..
انطباعي عن قطر ...
الديره حلوه ونظيفه مره مره مره الصراحه تستحي انك ترمي شي من شدة نظافتها ..
اهلها مره طيبين وخلوقين ومحترمين ويحبون يساعدون الغير وفيهم فزعه ونخوه .
مازل القطريين متمسكين بعاداتهم وتقاليدهم مثل لبس الثوب والغتره والعقال القطري الي فيه حبل من ورا
وبنات قطر مره ملتزمات بالعبايه والشيله والنقاب ولا تجد اي قطريه غير منقبه الا ماندر
القطريين يحبون سيارة الجيب اتوقع كل قطري لازم معاه جيب
اسعاره مو مره مرتفعه يعني ارخص من دبي
اتوقع بعد ثلاث سنوات راح تكون وجهه سياحيه وتكون زحمه
الفتره الي انا رحت فيها كانو السعوديين بكثره بسبب الاجازه
زوجتي ازعجتني تقول ترا بالاجازه الجايه لازم نزور قطر مره ثانيه
تعتبر قطر وجهه سياحيه عائليه من الدرجه الأولى ولا تجد فيها شي يخدش الحياء او مناظر غير لائقه ..
تسمع الاذان بكل الصلوات والمساجد مليانه بالمصلين بعكس بعض الدول الخليجيه لاتسمع الاان ابدا نسأل الله السلامه .
دورات المياه بالأسواق والكورنيش مره نظيفه وريحتها حلوه الصراحه مجهود يشكرون عليه ..
وخاتمه نشكر اهل قطر على حسن استقبالهم وحسن تعاملهم ..
وأسف على الاطاله ..مواضيع عشوائيه ممكن تكون تعجبك اخترناها لك:
- بجب لقطر بالعيد واول مره ازورها بيضوا وجهي مع زوجي
- تقاريري عن مطاعم ومقاهي قطر
- اقتراحات للزياره الثانيه لقطر
- الفزعه ياخواني جايكم بعون الله من القصيم
- اهالي قطر الاعزاء رحلتي اليكم حانت ولكم اسئلتي مالت
- رايح لقطر و أبي مساعدتكم
- ضررررروري
- طلب لاهنتوا عن إحداثية فندق
- تذاكر مباراة البرازيل والارجنتين وش خبرها ؟
- يَا اهْل قَطَر تِكْفُون تَرَى تِكْفُون تَهُز دِيَار
- القطرية تسير رحلات الى واشنطن
- ار ض الشحوح محافظة مسندم بالصور
- مرحبا
- افضل فندق على البحر
- نويت السكن في رايكم عندي سؤال بعد لوسمحتوا
- ابقعد ليله في الدوحه سؤال
- عطوني معلومات عن الحبيبة قطر جايك ياقطر
- استفسار عن سكن
- الاستاذ يبي مساعدة اهل قطر ؟؟
- سؤال لأهل قطر
المفضلات