يمكن يكون الموضوع طويل شوي بس حبيت اسردة لكم كما حصل معي ببعض التفاصيل لاني باختصار معرف اختصر (:
موضوعي عبارة عن قصتي المأساوية عن ماكاو وبنفس الوقت عشان تستفيدون وماتطيحون بالموقف البايخ اللي طحت فيه
بسبب استعجالي نسيت امور عده
البطاقة الإتمانية ونسيت اصرف الى هونج كونج دولار،،كان في جيبي تقريبا٢٥٠ دولار هونج كونجي و ١٠٠٠ ريال فقط( قلت اصرفها اذا وصلت ماكاو)
نبدا
طلعت من الفندق(محل اقامتي بهونج كونج) الى محطة شونج وان عن طريق المترو بعد وصول المترو للمحطة اتبعت حرف d الين وصلت للصالة قص تذاكر الفيري سعر التذكرة ١٥١
دفعتها وختمت خروج من هونج كونج واتجهت لصالة الانتضار نص ساعة وركبنا الفيري وطلع كرسيي مو على الشباك وانا ودي اجلس ع الشباك عشان التصوير وذي الحركات..وجلست جنب الشباك متجاهلا الرقم اللي بالتكت هع وجا صاحب الكرسي وقالي قوم قلت له مافرقت اجلس هنا جلس يرطن على راسي ومارضى قمت من مكاني ولسان حالي يقول عز الله ماصورنا زين،، اللي قهرني بعد خمس دقايق نام،،توقعته يوم اصر انه يجلس بمكانه قلت يمكن وده يصور او يشوف المناضر بس تاكدت انهم مستحيل يخالفون اللي مكتوب بالتذكرة مكتوب اجلس هنا خلاص اجلس هنا، المهم ماعلينا منه نام في ستين داهيه خخخخخ
اخذت الرحله ساعه بالضبط وصلنا ماكاو ياكثر الطوابير اللي لقيتها قلت بنفسي مستحيل اوقف معهم واشوف لوحه مكتوب عليها للمقيمين او شي زي كذا طلع هالطابور خاص بالمقيمين يعني الزوار مالهم دخل بالطابور
وادور لوحة الزائريين مالقيتها سالت مسؤول قال اشوف جوازك وقالي روح ذاك المكتب وطلع الفيزا لدخول ماكاو رحت لقيت اثنين بالمكتب يهشوون ذبان من الفضاوة دفعت له ١٠٠ دولار هونج كونج وختم لي دخوليه لماكاو
طبعا الحين في جيبي كم دولار هونج كونج و١٠٠٠ ريال
وهنا تبدا قصة المأساه مع الريال السعودي حاولت اصرفه بالمطار محد صرفه والله البلشة قالو لي روح البنوك جوا البلد يمقن يصرفونها ويمقن لا هع
قلت يالله مين بيرضا يفرفربي البنوك ومافي شي بجيبي وقبل انزل من المطار جاني واحد قال باخذك فرة على ماكاو ب ٨٠٠ دولار هونج كونجي قلت لا وخليته لحقني وقال ٧٠٠ ومارضا ينزل اكثر يقول انه تبع شركة وهذا اخر شي عاد انا قلت له لقيت ب ٥٠٠ اقل منك قالي انتبه بيسرقون فلوسك ذولا ناس نصابه قلت بنفسي والله ماغيرك النصاب خليته ومشيت ولقيت واحد ثاني واتفقت معه ٣ ساعات ونص ب ٥٠٠ ويرجعني للمطار وقلت له اول شي ودني لبنك عشان اصرف قال اوكي قبل البنك وداني اول معلم سياحي قريب من المطار اسمه مدينة الصيادين بعدها بديت رحلة صرف الريال السعودي اول شي وقفني عند صرافين بالشارع ومارضو يصرفونها بعدين رحت بنك هونج كونج وبرضو مارضو يصرفونها بعدها حسيت ان فيه مأساه بتصير هنا وجلست اتخيل ان محد صرفها بجد وضعي بيصير مأساوي لا انا اللي بقدر اشوف البلد ولا حتى اقدر اقص تذكرة عوده لهونج كونج،، قلت لموضف البنك نادي مديرك قالي ياخي حنا مانعرف هالعمله ولانتعامل بها يعني حتى المدير ماراح يفيدك بس اصريت على موقفي شوي وجت عجوز وقالت بلييز افهم هالعمله مانتعامل معها قلت لها وين اقدر اصرفها قالت مدي شوف البنوك،، المهم من بنك لبنك ومحد رضى يصرفها والسواق بدت اخلاقه تخرب وقالي خلاص انزل.. اويلي ويلاه عز الله النكبه قلت له خلاص روح اخر بنك وبعدها ذبني وافق ورحم بحالي ورحنا بنك الصين على كبره ومدري كمن دور قالو لي نفس الكلام يارجل وش السوات قلت له يعني ايش اجلس طول حياتي هنا لازم يكون فيه حل قالي اسف هذا النظام حاولت احسسه بمأساتي وقلت له ياخي حط نفسك بمكاني وحاول تساعدني بأي طريقة انت مسؤول في البنك وتقدر تساعدني قالي المشكلة ان الكود حق العملة اللي عندك مانتعامل معه في البنك على هالاساس مقدر احولها لك عشانها غير معروفه عندنا قلت بنفسي الله اكبر يعني الحين عملة السعودية اللي اكبر من جزيرتكم بالف مرة ماتعرفونها،، قالي شوف ماعندك الا حل واحد تفتح حساب وواحد يحول عليه فلوس وتسحبها قلت حلو وش تنتضر افتحلي حساب قال اوكي قلت الحمد لله فرجت بعدين قالي انت سائح هنا ولا موظف مقيم قلت لا سائح قال اسف ماتقدر تفتح حساب لازم تكون مواطن او موظف مقيم ورجعنا ع الطير ياللي وحاولت يمين وشمال قلت له طيب قدم لي خدمه وافتح الحساب باسمك ومجرد ماارسل الفلوس بسحبها وسكر الحساب ضحك وحسيت لو يقدر يتكلم عربي كان قال وين يابو الشباب في السعودية انت،،المهم ماجت معي قلت مافي الا السواق لازم اقردنه عشان يوافق يفتح حساب باسمه نزلت للسواق قالي صرفتها ؟ قلت لا وانا ابتسم(: وعصب قال مستحيل اذا هالبنك ماصرفها خلاص ماراح تنصرف قلت له في حل عندي البنك قالي اذا تعرف احد مواطن خله يفتح حساب باسمه وحول عليه فلوس وبعدين سكرة وش رايك افتح الحساب باسمك وبعدين اسكره .. طالع في بنضرة مدري وشلون اوصفها وقال مستحيل حاولت اغريه بزيادة الفلوس بس مافي فايدة قالي خلاص مقدر اوديك مكان وسكت ومشى بالسيارة وخلاص تقفلت الابواب بوجهي.. قالي اسمع انا بحطك عند الكزينو شوي وقف عند كزينو وقال حاول يمكن يصرفون لك واذا ماصرفوها شوف هذا الجسر يوديك لمكان الفيري هناك ،، حطني ومشى بصراحة مرمطة معي وماقصر خدمني وزيادة،، ودخلت الكزينو اول مرة بحياتي ادخل كزينو وعشان ايش عشان اصرف كلن على نيته ناس تدخل تقامر وناس عشان تصرف هع ،، الناس حولي انواع المقامرة ومساحة الكزينو مرة كبيرة وين اروح وين اروح بآخر الصاله لقيت مكان لتحويل العملات عطيت الموضف ٥٠٠ ريال قلبها يمين شمال ونادى خويه وانا من قلبي ادعي يارب يقبلها.. ماامداني اكمل الدعاوي الا ويقولي الموضف اسف لااستطيع ان اصرف لك هذة العملة..وكالعادة ادخل معه بنقاش وترجي انه يصرفها او يسال اي احد اكبر منه مسؤوليه عشان يصرفها وكالعادة ايضا ينتهي الكلام بكلمة اسف مقدر اخدمك باي طريقه،، شكرته واخذت الفلوس ونزلت خارج الكزينو وانا احمل بيدي الخمسمائة وعلى عاتقي مأساتي التي تحولت الى حقيقة اراها بين عيناي،،
خطرت ببالي فكرة ادق على اخوي بالسعودية واخلية يحول لي عن طريق وسترن يونين واستلمها بالحال بس تذكرت ان الشريحة اللي معي بالجوال حق هونج كونج وماتشتغل في ماكاو واذا فكرت اطلع شريحة جديدة ماعندي قيمتها ،، يعني كل الحلول قفلت في وجهي،، تذكرت المقولة: ضاقت فلما استحكمت حلقاتها فرجت وكنت اضنها لاتفرجوا،، دام اني مؤمن وثقتي بالله كبيرة فلن يضيعني الله.. توجهت للجسر المؤدي للفيري وصلت الفيري وقلت بنفسي ماعندي الا اني اشوف المسافرين لهونج كونج واشرح له وضعي ممكن يتجاوب ويسلفني حق تذكرة العودة وبعد مانوصل هونج كونج اصرف له وارجع له المبلغ،، بالفعل توجهت لشباك التذاكر وبديت اشوف معالم وجيهه المسافرين اللي احس انه طيب وفي امل انه يتفهم موقفي اروح له واشرح له وضعي،، كانت المصيبة والطامه انهم حتى مايوقفون يسمعون وش ابغى ،،تقول لكل واحد لو سمحت ممكن اخذ دقيقة من وقتك يطنشون كنهم مايسمعونك وبعضهم يوقف لك ويأشر على اذنه ويشرح لي انه مايسمع يعني انه اصم واكثر من واحد سوى هالحركة معي يعني تمثيل عيني عينك،، صدق شعب كلن يفكر في نفسة ومستحيل يخدم غيرة،،قررت اني مااسال احد الاسيويين قلت لازم اغير الخطة واشوف احد من الاجانب طبعا يندر جدا جدا انك تشوف اجانب بهالمكان كل اللي حولي صينيين ومواطنين ماكاو..طولت لين شفت واحد على شباك التذاكر ملامحة غير قلت بنفسي يمكن يطلع ايراني وقررت اذب وجهي علية بعد مايقص التذكرة يمكن يرأف بحالي ويساعدني على الاقل الايراني مسلم واحسن من هالكفار ،، رحت له وقلت لو سمحت ممكن اخذ من وقتك شوي قال تفضل قلت بنفسي بداية زينه دام قال تفضل موب مثل هالكفار يمثلون انهم صم وبكم عليهم من الله مايستحقون،، سالته انت مسافر على هونج كونج قال ايوه وشرحت له وضعي ومعاناتي مع الصرف هنا وانهم مايتعاملون مع الريال السعودي وطلبت منه انه يصرف لي الريال السعودي او يعطيني قيمة التذكرة ونرجع سوا وفي هونج كونج اصرف له واعطيه قيمة التذكرة،،
تدرون وش قالي انصدمت صدمة وعقلي كاد ان يقف:
قالي ليه تتكلم بالغة الانجليزية ترى كلنا عرب!!!
طلع الاخ من تونس الخضراء وتجاوب معي وصرف لي عن طريق بطاقتة الائتمانية وتبادلنا العملات وانحلت المشكلة،
انك تشوف عربي بهالمكان معجزة سبحان الله كأنة نزل علي من السماء اللهم لك الحمد حتى ترضى ولك الحمد اذا رضيت ولك الحمد بعد الرضى،،
اتمنى من كل قلبي انك تنتبهون لهالنقطة وماتفكرون تاخذون معكم الريال لمكاو اضعف الايمان خذو بطاقة الصراف..
خلاصة التجربة: بجد حسيت بلحظة من اللحظات اني تايه بصحراء على رغم كثرة الناس حولي وبدأت افقد الامل بل بالفعل فقد الامل لين تذكرت انه في اله يعلم كل شي وهو بصير بحالي ويراني الان فأيقنت انه لن يضيعني وانا اشهد انه حق وهو القائل انا عند حسن ضن عبدي بي فاليضن بي عبدي مايشاء، "" حسن علاقتك مع الله وتعرف علية بالرخاء يعرفك بالشدة ويأتيك الفرج وان ايقنت بالهلاك""
مواضيع عشوائيه ممكن تكون تعجبك اخترناها لك:
رد مع اقتباس
المشاركة الأصلية كتبت بواسطة ميزر
المشاركة الأصلية كتبت بواسطة Usas
المشاركة الأصلية كتبت بواسطة kenken
المشاركة الأصلية كتبت بواسطة kenken
المشاركة الأصلية كتبت بواسطة المؤلف
المشاركة الأصلية كتبت بواسطة فــيـصـل
المشاركة الأصلية كتبت بواسطة ابن اسكندرية
المفضلات