الموضوع: خطة السفر لماليزيا انوضعت و حاب اعرف رايكم فيها ؟

السلام عليكم و رحمة الله و بركاته

في البداية حاب اقدم شكر خاص و خالص من اعماق القلب لكل شخص يشارك في هالمنتدى المعطاء و الله ما قصرتوا كلكم جزاكم الله الف خير


ابشركم خلصت اختباري السنوي و نجحت و لله الحمد و احسن مكافأة لنفسي هي السفر و الترويح عن النفس و لأول مرة في حياتي افكر ازور شرق اسيا و اكيد ماليــزيا اللي هي مقصد لالاف السواح و الشهرة الواااسعة و الكبيرة و الممتازة لماليزيا بيننا احنا يالسعوديين تحديدا خلتني افكر ازورها و اقول ( انا لازم اشوف هالماليزيا اللي كلن راحها )) .. و كمان فكرة انها ما تحتاج فيزا عززت الحماس اكثر


سفرتي بإذن الله بعد اسبوع عن طريق الخطوط الاماراتية ، ترانزيت لدبي في الذهاب و الاياب .. بسعر 2700 ريال للشخص
المسافرون / انا و اختي و ابن اختي


الخطة انوضعت بعد اسبوع كامل من البحث و التقصي في المنتدى الجميل هذا :


المدة : 14 يوم تماما


راح نبدأها بـ سلانجور : يومين و القصد زيارة الـ Sun way lagoon اللي انبهرنا بتقريرها و شدنا الحماس لزيارتها .


الفندق المرشح : البيراميد


بعدين بناخذ طيارة ( Asia Air ) الى جزيرة الاحلام و المتعة جزيرة لنكاوي
المدة المقررة 3 ليالي
الفندق المرشح : منتجع الويستون من بعد التقرير المبهر لاخونا عاشق الخالد و من بعد توصية احد الاصدقاء .


بعدها بناخذ الفييري الى جزيرة بينانغ
المدة : كمان 3 ليالي


الفنادق المرشحة : كنت مرشح بارك رويال ، بس شفت ناس ذمته و ترددت ! فابغى منكم ترشيحاتكم .


بعدها بالباص ( الايرولاين ) الى العاصمة كوالالمبور و اللي بيكون لها النصيب الاكبر من الاقامة
6 ليالي
بما اننا من محبين العواصم و المدن المكتظة و لنا قصد لزيارة الاسواق و التسوق


الفنادق المرشحة : التريدرز 3 ليالي ،، مندرين 3 ليالي .
راح يتخلل الاقامة في كوالالمبور زيارة يوم كامل لمرتفعات جنتنق .


....


انا من الناس اللي ما احب التنقل الكثيييير و اتوتر و هدفي من السفر دايم الاستقرار و الاستجمام و احب اني امخمخ عالمكان كويس و اكرر زيارة الاماكن اللي حبيتها
لكن لما شفت تقاريركم و شفت سهولة التنقل بين المدن ، قلت بجرب اغامر و اسويها


مبدئيا يا اعزائي ودي اعرف منكم رايكم بالخطة ، رايكم بالفنادق اللي اخترتها .


الحجوزات ان شاء الله كلها راح تتم اونلاين و ببطاقة الماستر كارد .


و تساؤلاتي هي بما ان هذي اول سفرة لي لماليزيا :


1- انا جوالي الايفون مسوي له ( جل بريك ) و تذكرت خطورة مثل هالشيء في بعض الدول مثل امريكا ، فلما شفت صورة غرامة و عقاب نسخ السي ديات ، خفت انهم من النوع اللي يفتشون الاجهزة ؟؟ بالله طمنوني من هالناحية .


2- راح استخدم شريحة ماليزية و باخذها من المطار ان شاء الله لجوالي الثاني عشان التواصل مع التكاسي و الاهل عن طريق الواتزاب . ايش رايكم من اي شركة اخذ الشريحة ؟


3- في موضوع قرأته لاحد الاخوان جزاهم الله خير و كان يحذر كثير فيه من الاوراق الرسمية و انك لازم تصور منها نسخ و انك لازم تحطها بصندوق امانات الفندق و تروح السفارة تسجلهم !!!! صراحة تكدرت و قلت وشلنا بهالغثا كله ، انا تعودت اني اذا سافرت اوروبا اخلي كل شيء في صندوق الامانات بغرفة الفندق
و بالنسبة للفلوس انا بصرف كاش كامل من هنا و بروح فيه و بيكون معي بطاقة ماستركارد و ATM صراف عادية ،، و فكرتي اني اخلي الفلوس في صندوق الامانات بغرفة الفندق و البطاقات تصير معي بجيبي تحسبا لاي ظرف ، لكن ممكن لو بروح مكان مزحوم ما اخذهم و اخليهم بالصندوق .
ايش رايكم بهالخصوص ؟؟ وش احسن طريقة لحفظ الفلوس و البطاقات و الجوازات بأمان ؟؟؟؟


3- بالنسبة للتسوق ، سمعت من بعض الاعضاء ان الاسعار غالية و استغربت هالشيء ، معقول .؟ و ايش رايكم بفكرة التسوق من ماليزيا و تحديدا العاصمة ؟؟


4- التكااااااااااسي و ما ادراك ما التكاسي ،، فهمت منكم ان التكاسي الحمراء هي الامينة و راح استفيد من موضوع ارقام التكاسي ان شاء الله ..عندكم اي مرئيات بهالخصوص ؟؟


بالنسبة لموضوع السلبيات قريته اليوم و تكدرت صراحة
معقول الكلام اللي انقال ، استغربت والله ما كنت متوقع اني ممكن اسمع عن هالمساويء في ماليزيا ،، خصوصا ان كثير من اقاربي راحوها مرة و مرتين و مية مرة و الكل يمدحها و يحلم بزيارتها مرات .. ودي اعرف رايكم الله يجزاكم خير . ترا والله رايحين ودنا ننبسط و نوسع صدورنا بعد سنة من الغثا و التعب !


و اسف لو طولت عليكم لكن تدرون اول مرة اسافر لماليزيا و ابي السفرة تكون مرتبة تمام التمام بمساعدتكم الله يجزاكم خير و اوعدكم بإذن الله باحلى تقرير لو توفقنا على خير .

مواضيع عشوائيه ممكن تكون تعجبك اخترناها لك:

• طلبتكم لاتردوني بخصوص السكن
• ساعدوني بمعلومات حجزي للفندق رفقت لكم صورة للفاوتشر
• محتار بين فندقين في لانكاوي
• انتهيت من برنامجي بس ابستشيركم بحاجه
• استفسار بخصوص طيران
• شو تنصحوني ياخوان سفري بعد ايام
• ارغب في الاستفادة من خبرتكم في تخطيط جدول لزيارة كوالالمبور وبينانج
• جدول سياحي مميز 11 يوم في ماليزيا لزوجين وطفلين
• ترشيح فنادق
• باقي خمسه ايام لسفري وعندي كم استفسار ارجوكم احبتي بالله
• لأهل الخبره
• وش سالفة الفيزا ؟
• عريس وابغا جدول للسفر الله يرحم والديكم
• بسوي تقرير وماعرف افيدوني
• بقي تقريبا شهر ع الرحله وباقي مارتبنا اي شي
• هل العباره تستحق التجربة ؟
• اول مشاركة اتمنى لكم الفائدة منها
• طلب برنامج سياحي
• أتمنى الأفاده الجميع للسفر إلى ماليزيا
• استفسار من اخواني الاعضاء

هلابك اخوي اولا الله يوفقك وتروح وترجع بالسلامه انت واهلك حقيقة انا لي اسبوع في المنتدى بالضبط ولاعمري زرت ماليزيا ولكن سافرت دول ثانيه وكثيره وصارت عندي خبره وتجارب في الاشياء

اول تساؤل لك بخصوص الفنادق في بينانغ
يالغالي عندك خيارات كثيره في بينانغ
الخبراء ينصحون
بـ القولدن ساندس
البـاي فيو
الفلانمجو
هوليدي إن

وافضليتها بالترتيب كذا

----
1_ بخصوص جوالك الآي فون فماحولك احد ولايدققون واجد على الشغله هذي ممكن دوله مثل سنغافوره تحصل تدقيق اما ماليزيا فلا
2_شرائح الاتصال والانترنت هناك كلها حلوه واسعارها رخيصه وماتفرق كثير
3_شوف اخوي ماليزيا من الدول الآمنه جدا جدا ويخصوص وثائقك الكلام هنا عن الجواز واوراقك الثانيه حقت حجوزاتك فيعني الموضوع هذا عادي ولاتشيل في بالك بس نقطة السفاره مع انه الوضع عادي جدا في ماليزيا ولكن انا شخص تعودت أي دوله اروح لها مهما كانت اسجل في السفاره أكثر امان لي واهلي حتى لو لا سمح الله وحصل أي ظرف طارئ اكون مسوي احتياطاتي وصدقني موضوع السفاره ما يأخذ منك ساعه تجيهم وتسجل عندهم كل بياناتك وسكنك وعناوينك لأن لو حدث اي مكروه (بعيد الشر) تحصل السفاره معك ومسانده لك وتذلل لك كل صغيره وكبيره
مع العلم اني اعرف كل الناس اللي راحوا ورجعوا من ماليزيا ما مروا السفاره ولا يدرون عنها اساساً
بخصوص الكاش اخوي نصيحه لك أخذ معك مبلغ كاش معين مثلا 5000 ألاف او 6000 آلالاف واصرفها رنجت وخليها معك والباقي خليه في صرافتك العاديه والفيزا مع العلم ان هناك صرافات وتصرف منها عادي جدا يأخذون عليك في العلميه تقريبا 25 ريال وهذا الحل أحسن حل لك حتى تتفادى اي شي
بخصوص حفظ الجوازات والفلوس والبطاقات فيالغالي هذا حسب الفندق اللي راح تنزل فيه والسيفي بوكس حقهم تأكد منهم وانه مضبوط ومحكم ونصيحتي لك خذ معاك شنطه اللي تتعلق على الجنب بالحزام راح تحفظ اوراقك فيها وتنفعك ايضا للجوالات وخلافه
وتطمن ياخوي لاتشيل هم هذي الامور خليك صاحي ومنتبه لوضعك ومايجيك شي بإذن الله
4_لا يالغالي التسوق في ماليزيا موب غالي لذيك الدرجه وعندك اسواق معينه اسعارها ممتازه مثل التايمز سكوير ومجمعات كثيره وكذلك السوق الصيني وخلافه اسعارها رخيصه
5_بخصوص التاكس عندك نوعين واحد احمر وواحد ازرق والافضل فيه موضوع مثبت للأخوان فيه ارقام تاكسي موثوق فيها ومجربه من قبل اعضاء وحاطين فيها ارقامهم

----
بالنسبه لموضوع السلبيات فهنا لي كلمه خاصه فيني صدقني مئات الألوف من الناس تسافر ماليزيا وهي دوله سياحيه بالدرجه الاولى والناس تعامل الناس بما يلقونه من تعامل منهم يعني لو انت محترم راح تلقى الاحترام ولو انت العكس وتدور الخرابيط فأكيد راح تتعامل مع أخبث فئه في المجتمع وبالتالي تحمل اللي يجيك منهم
بالعكس الشعب الماليزي شعب مسلم ومحترم وخصوصا الماليزي الماليزي لان هناك هنود وصينيين كثير بتوع اشياء مش كويسه فهذولاء جنبهم
الشي المهم انت ابعد نفسك عن كل شي مشبوه تنبسط وتستانس

---
تروح وترجع بالسلامه واتمنى اني أفدتك بما كتبته وانوه لك اني مابعد جيت ماليزيا

ما تقصر يا عبدالهادي فيك الخير والله

حتى لو انك ما سبق و زرت ماليزيا بس عالاقل افدتني .. و عقبال تزور ماليزيا ) ..


انا غيرت خطتي تماما و الله يستر باقي على الرحلة اسبوع و للان ما استقريت
و التغييرات اتت كالاتي بعد نقاش حاد مع احد الاصدقاء اللي سبق و زاروا ماليزيا


1- راح اكنسل الاقامة في سلانجور و بروح لها بتكسي عنوه يوم كامل اصرف و احسن


2- لنكاوي عاجبتني جدا جدا يمكن ازود يوم لها


و راح تكون اقامتي في كوالالمبور موزعة بين ايام البداية و ايام الختام كذا اظن احسن و اريح لنا .


قاعد اقرأ عن فنادق كثيرة و انفك راسي والله ودي اقتراحات لفنادق كوالالمبور تحديدا .


و بالنسبة للسلبيات ، والله اوافقك في كل كلمة قلتها يا عبدالهادي
و كمان الناس اللي تبي تسافر و تنبسط لازم شويتين ترخي جيبهااا ما اشوف فيها شيء .... و الهواش و الزعرنة في المطاعم و الشراء من المحلات ما يفيد الا ينكد .
وبالنسبة للاستغلال ما اتوقع ماليزيا مهما كان فيها من استغلال تصف مصاف سووووء و رداااااءة الدول العربية اللي تعتبر اكبر مستغلة للسياح السعوديين .
و انا هذا اللي يهمني بصراحة .


و ياليت نشوف اراء بعض الخبراء و المجربين في الخطة و تغييرها و شكرا مرة اخرى اخوي عبدالهادي

نقاش حلو وجميل
اولا بالنسبه لسنجور ما اعرف ليش كنسلتوها مع انه نفس الشي بدل ما تاخذ ليله في كوالالمبور تكون ليله في سلانجور مثلا بس عادي اللي تشوفه اريح لك مع انه الفندق اللي بتحجزه قريب من الالعاب و الماينز و البوتراجايا الرائعه
بالنسبه لفنادق كوالالمبور ارشح لك رويال شولان او التريدرز او دورست ريجنسي

الايفون ما عليك مافي خوف انا جهازي ايفون مجلربك جلبره ما يعلمها إلا الله يا شيخ ولا حد يتفرج عليك

التسوق في اماكن غاليه وفي اماكن رخيصه وانت حر وين تحب تتسوق وانصحك بالتايم سكوير و اللوت تن

التكاسي لا تعتمد عليهم كثير وخليك على المونوريل في كوالالمبور رخيص وسريع وسهل جدا وموضوع وافي بيساعدك كثير عن المونوريل لو طلبته اجيب لك اللنك

الشرائح كثيره ومتعدده ورخيييصه 20 رنجت تتقريبا ومره شفت رد لماجد الفهد يقول انه بخمسين رنجت انترنت غير محدود لمدة اسبوع ( بلاااااااش والله )

السلبيات موجوده في اي دوله ولكن ايجابيات ماليزيا تطغى على ذلك والحمد الله والناس هنا تسافر عليها مرتين ثلاث

اي سؤال حاضرين

ياهلا وغلا ...

والله ماقصر الغالي ( عبدالهادي ) ... رد مممتع ... ورااااااائع والله

وأنا عندي بعض الأضافات لو ( سمحت ) لي

بصراحة ( سلانجور ) هي أجمل بداية لزائر ماليزيا ....

منطقة ( راقية ) ... وجذابة ... وتحبها من أول نظرة والله

وأما إذا سكنت في ( الصن واي لاقون ) ... فأنت في عناية الجمال والخيال والروعة

بأختصار ... جدولك الأول هو الأروع

يومين سلنجور - ثلاثة لنكاوي - ثلاثة بينانغ - ستة كوالا

وأما الفنادق ... فهذه الفنادق الأجمل

سلانجور ( صن واي لاقون ) لنكاوي ( الويستن ) بينانغ ( قولدن ساندس ) كوالا ( جراند ملينيوم )

http://img827.imageshack.us/i/93424623.png/

هلا و الله و غلا بالعدني و وافي

بالنسبة لسلانجور فشكلي والله برجع احطها في القائمة :d ،، دام المشوار نص ساعة ما احس انه بيفرق كثير و الا بيسوى و خلنا نجازف و نغامر وش ورانا ، انا بس اللي خلاني اتردد ان رحلتي فيها ترانزيت 8 ساعات لدبي و قلت شكلي بنزل من الطيارة و انا رايح فيها من التعب و ابي بس ارتاح ..


فان شاء الله بنرجع نحطها و نتوكل على الله و كلمة وافي ( أجمل بداية ) تحمّس كثير صراحة


بالنسبة للفنادق فشكلي غيرت رايي عن التريدرز ، امس دخلت احد المواقع اللي فيها ريفيو الزوار لتريدرز و في ناس ذموه لسبب واحد ان العمال اللي فيه صينيين و انهم سيئين جدا في التعامل و فضلوا عليه رويال شولان لأنه فخم و موظفينه ماليزيين اصليين مسلمين .. فايش رايكم في هالكلام


انا والله ما تهمني الفلوس و لا يهمني الغلاء زي ما يهمني المعاملة و الذوق و الاحترام . هذا اهم شيء عندي في اي سفرة و اي مكان و انا اللي اسمعه ان الماليزيين عيال حلال و طيبين فأفضل اني اتعامل معهم .


بالنسبة لحجز الفييري من لنكاوي لبينانغ : ضروري اسويه اونلاين و الا اقدر احجزه من لنكاوي لما اروح ؟؟ و نفس الشيء للباص اللي بيودينا لكوالالمبور ( الايرولاين اتوقع ) ؟؟؟


اخوي العدني ياليت تسدح لي اللينك والله انا اشتري الفكة من التكاسي





الفندق اللي مستقر عليه حاليا الف بالمئة هو الويستن في لنكاوي يازينه زيناه هالفندق
و الحين باخذ لي لفة على ترشيحاتكم اللي اكيد تعني لي و تهمني و ما قصرتوا

لعيونك

موضوع الرجل الوافي


http://www.arabtravelersforum.com/travel534952

هلابك ياخوي
العفو وماسوينا إلا الواااجب ويكفينا دعوااتكم

بخصوص حجوزاتك وطباعتها فعاادي يالغالي تقدر تسوي الحجوزات من الحين وبأي وقت تسوي لها طبااعه
لانك اذا كانت بخصوص تذاكر الطيران فراح يوصلك رقم الحجز على إيميل ومن خلال رقم الحجز بإمكانك الدخول على حجزك بأي وقت وتطبعه
حتى البوردنق تقدر تطبعه
اما حجوزات الفنادق وخلافه فراح تسجل في موقع الفنادق وبعدين تسوي الحجوزات ومن بعدها تقدر تدخل بعضويتك على الموقع وتشوف حجوزاتك وتعدلها
وحتى تحذفها لو كانت مسترده وتقدر تطبع الفوتشرات حقت حجوزات الفنااادق

وسلامتك

تسلم والله يا عبدالهادي انا متعود ما قد طبعت شيء من بوكينق بس قلت دولة جديدة لازم اسأل :d


بسأل سؤال
بينانغ تسوى و الا ما تسوى ؟؟؟ اشوف كثير ندمانين انهم زاروها و خويي بعد يذمها و يقول لا جديد فيهاا

شباب ياليت اشوف رايكم ناوي اكنسل رحلة بينانج لأن اللي معي يدوخون من العبارات و بيني و بينكم احس السفرة بتصير مشورة ودي ازود يوم في لنكاوي عاجبني الويستن خيالي فوق الوصف

لو زودت يوم في لنكاوي وكنسلت بينانج بيكون عندك يومين فاضين لازم تختار مكان اكيد مش كوالالمبور لانه كثير بيكون ايام في كوالا

قاعد اخلص حجز العبّارة و فجأة و انا بروح لاخررررر شيء اللي هو تثبيت الدفع عن طريق البطاقة اكتشفت خطأ في اسمي ( مكان حامل البطاقة ) و رجعت و كنسلت لاني خفت يقولون البطاقة مو لك يا نصاب يا حرامي ..

و الحين رجعت من جديد و مو راضي يضبط مع اني غيرت الايميل و كتبت ايميل جديد


رايكم خيرة عشان احجز طيارة

الحمد لله ابشركم ضبط حجز الفييري

هلابك ياغالي ...

الميزانية كافيه بأذن الله ...

10 ألآف كافية للفنادق ... وراح تزود بأذن الله ...

أما المصروف اليومي ( 500 ريال * 14 يوم ) = 7000 ريال

http://img849.imageshack.us/i/25299755.png/

شباب الله لا يهينكم ادري كثرت الاسئلة

قاعد اقرأ عن القولدن ساندس / في ناس كثير مدحوه بس الاغلبية اذا مو الكل حاطين العيب ان السعر مبالغ فيه ، ايش رايكم ؟ اخذت لفة عالباي فيو و الصراحة في فرق كبير في الاسعار .

خلاص تم الحجز و لله الحمد

شباب انا عاجبني فندق الـ مندرين ، و الـ برنس انبهرت فيه بعد تقرير اخوي وافي

نصحتوني بالـ رويال شولان بس من الصور حسيته كئيب شوي ، احب الفندق اللي في كوالالمبور يكون يطل على ابراج و شوارع عامة كبيرة


باقي من ميزانية الفنادق 4000 ريال تقريبا و باقي لي 6 ليالي في كوالا


ايش رايكم و ترشيحاتكم ؟ من جديد :d

شباب الله يخليكم ترشيحاتكم لفنادق كوالالمبور

اهم شيء عاد، بجلس 6 ليالي فيها

وانقضت اول ليلة في ماليزيا و لله الحمد كل الامور طيبة وو على ما يرام

لكني تفاجات بسعر الرنقت
100 ريال صرفوها لنا ب 78 رنقت ((

بس اكيد ما بخلي هالشيء ينكد علي

جاني عرض اول ما نزلت من الطيارة
تكسي للتنقل 7 مشاوير و 4 رحلات جولات في لنكاوي بينانغ كوالا جنتنغ
يبتدي ب 1980 رنقت باصغر سيارة و يوصل ل 4500 رنقت اذا بالليموزين
المهم اني ما اقتنعت و ما عجبني اني ادفع كااااامل المبلغ و بس اتصل عليهم يجون
قلت له انا عندي ارقام تكاسي و ابي اخذ راحتي في التنقل و يمكن تحصل لي عروض غير فاسمحلي مابي اتقيد فيكم و تراني مو متوهق فقالي بكيفك و عطاني رقمه لو بغيت و توكل من الموبايل