السلام عليكم ورحمه الله وبركاته
اول شيء حابة اشكر المشرفين على بوابة الغربية على جهودهم و اقول لهم جزاكم الله خير.
طبعاً انا بكتب موضوعي هذا للحذر من بعض الفنادق وياريت مايحذف الموضوع
طبعاً مثل مابعضكم عارف انا حجزت في فندق "راديسون بلو للاجنحة الملكية" وكان سعر السويت الكبير 2400 "بدون خصم"
والحجز تمام ونكلمهم واحنا في المطار قالو تمام .
وصلنا الفندق انا صراحة اول مرة اعرف ان الفنادق تقفل ابوابها بمفاتيح !!
لا وفي عز الظهر !!! وننتظر خمس دقايق ويفتحو الباب ولما دخلنا قالو مافي حجز مسبق !!
اعطيناهم ورقة الحجز وإيصال تحويل المبلغ لمجموعة راديسون بلو
وبعد نص ساعة قالو هو مافي حجز لكن احنا بنعطيكم سويت بس عشان معكم إيصال التحويل ولا ورقة الحجز مو صادرة من الفندق ولا هذا ايميل الفندق.
اوكيه عديناها
واحنا طالعين المصاعد كلها تفتح وتقفل في ثانيه يعني وانت واقف كذا تفتح وتقفل تفتح وتقفل جا واحد قال معلقه "عدد المصاعد 3 واحد مايشتغل ابداً و اثنين معلقه !
كيف نطلع ؟
عاادي انتو في راديسون بلو لازم تطلعو من مصعد العمال اللي بدون باب يعني وانت طالع تشوف اسلاك و تشوف حاجات مررة حلوة صراحة
لمن وصلنا وشفنا الممرات شي يطمن صراحة نظافة وريحة عود قلت مع نفسي خلااص المصاعد بيصلحوها الحين الممرات حلوة ونظيفة واكيد الاجنحة كذا
وفتح لنا باب السويت كان مفاجأأأة اتعب وانا اقول مفاجأة

غرفة كبييييييييييييييرة في الوسط طاولة طعام بدون كراسي وفي اماكن الكراسي الكنب اختراع جديد صح ؟

اوك نمشي في الغرفة الكبيرة ونشوف

على اليسار بنحصل سرير كبيير تقريباً يكفي 4 اشخاص "السرير ارضي" كانهم حاطين مرتبة عالارض .

اوكيه وعلى جنب سريرين منفصلين " كلها بغرفة وحدة"
والـ Tv قدييمه لاتفكرو انكم بتشوفون ال سي دي او بتشوفون قناة واضحة او تسمعو صوت غير تشششششششششششش
فين الاجنحة الملكية ؟ وفين صورهم اللي بالموقع ؟؟ وعلى ايش 2400 .

ملاحظة / اثاث الأسرة والكنب والارض مو مستهلك ولا وسخ جداً تقريباً متوسط

لكن اول مررة احس اني طفله !

اتصل عالمطعم ابغى اطلب يقول لي الحين يامدام مافي اكل الساعة 4 في قلتله اوك و اتصل 4 يقول مافي لسه اتصلي 5 ونص و اتصل 5 ونص يقول اليوم في حفله مانوصل للاجنحة اي شيء الا قهوة و شاي وعصيرات !!!!!!!!!!!!!!!!!!!!!
كييييف وليييش ماتقول من الظهر وانا اتصصل ! طيب واللي يسكن في الصيفيه وكل يوم حفلة وش يسوي ؟
طبعا بعد تفكير وتفكير اننا نطلع من هالزفت بس خايفين مانحصل اي فندق فاضي
وفوق كل هذا مافي نت لا مجاني ولا برسوم
اختي دخلت بوابة الغربية وعطتني رقم الماريوت ورمادا و الهيلتون والمنزل وموفنبيك

وكلهم فل الا المنزل حصلنا فيه جناحين فاضيين غرفة وصالة وغرفة وصالة وتنفتح على بعض
سعر الجناحين 2800 شامل الانترنت والفطور
و اتعب وانا اقول فخامة على نظافة على تعامل بجد نسوني كل الذل اللي شفناه في راديسون بلو اللي حلفت اني ماادخل لهم فندق بعد هالمرة
فيه تقرير عن فندق المنزل مسويه الاخ عدنان اظن, نفس الصور ونفس الفخامة وعالطبيعة احلى واحلى صح سعرة مرتفع شوي لكن ممتاااااز ان شاء الله ماننزل الا فيه كل المرات
على فكرة فيه مربيات فري مع سعر الحجز وقت مابتطلعون تحطون اولادكم عندهم طبعا مع وجبتين كله فري
انصحكم فيه وآسفه عالإطالة والله من القهر

لكن مااعرف هل كل الاجنحة اللي في راديسون بنفس هالنظام او لا و يمكن هم حطونا في الجناح هذا عشان فل على كلامهم الله اعلم , انا حطيت تجربتي واللي يحب يجربه براحته واللي قد سكن فيه وكان بسويت احلى و انظف و ارتب وكانت المصاعد تمام اقول له من حسن حظك
طبعا احنا اخذنا سعر السويت في راديسون بـ 1700 عشان معنا خصم
وماكان فيه خصم في المنزل يعني السعر للسويت الواحد 1400 بدون خصم والسعر ثابت في المواسم وغير المواسم شامل إفطار و إنترنت و 15%

عكس راديسون قالو الافطار مجاني وبعدين قالو لا مش مجاني

واللي حابب يسالني عن اسعار "رمادا,الهيلتون,ماريوت,موفنبيك,البلاد," يتفضل وانا بعطيكم الاسعار الاخت مسويه تحقيق مع الموظفين
سلملم

برايفت : كيف العنوان بس

مواضيع عشوائيه ممكن تكون تعجبك اخترناها لك: