الموضوع: مشاهدات من رحلة العمره ليوم واحد رمضان هجري

السلام عليكم
بعد مرور خمسة ايام من رمضان 1432 هجري فكرت نحجز لاداء العمره في رمضان قبل العشر الاواخر وحاولت مرارا وتكرار لايتوفر حجز على الخطوط السعوديه لشخصين ابدا ..

والحملات كل برامجهم يومين ورغبتي هي اداء العمره والعوده مباشره بسبب بقاء الاطفال هنا بالرياض عند اقارب لنا ولانريد التثقيل عليهم وقت طويل بسبب اطفالنا ..

المهم بعد ان فقدت الامل بعد مرور عشرة ايام على رمضان قلت نجرب نحجز في بداية العشر الاواخر ولقيت حجز مؤكد ليوم الاثنين والعوده الثلاثاء

وحجزنا على رحلة الرابعه عصر يوم الاثنين 22 رمضان والعوده السابعه صباح يوم الثلاثاء 23 رمضان ..
وحجزت المواصلات من المطار الى الحرم وبالعكس عند شركة ذيب الي كانت من اسوأ شي في الرحله بسبب تعاملهم السيئ ..

قصيت بوردينق الذهاب مساء الاحد لاستغلال الوقت
وحركنا من البيت الساعه 2:15 ووصلنا المطار الساعه 2:45 ظهرا
واتجهت للمواقف مباشره لايقاف سيارتي هناك
وصعدنا لصالة المغادره ويازينهم مطار الرياض كل شي ماشي بالبركه
وركبنا الطائره الساعه 3:30 العصر وانتظرنا وصارت الساعه اربع موعد الاقلاع المفترض
وكالعاده ابتدأت مسرحية مقاعد العوائل وكل واحد حاجز بالوقت الضايع ويبي يجلس جنب عائلته على حساب الاخرين الي حاجزين اماكنهم المفضله من اسبوع واكثر
ورفض احد الركاب الاجانب تغيير مكانه وسمعته يتكلم بالانجليزي ويقول لهم كل مره تقولون غير مكانك وانا احب هالمكان وكان مختار اخر كرسي بالخلف وقال لهم خلاص لاتحطون بوردينق اجعلوا الركوب بدون بوردينق مثل الباصات وركبوا العوائل قبل والعزاب بعدهم يعبون الاماكن الفارغه

المهم تاخرنا بالاقلاع الى الساعه 4:30 بدلا من الموعد 4:00 عصرا
وكنت افكر في حجزي عند شركة ذيب للسيارات وارسلت لهم رساله اني بتاخر نصف ساعه
المهم وصلنا والحمدلله الساعه 6 مساء واتجهت فورا لمكتب شركة ذيب بالمطار الي كلمته وحجزت عنده اضافه لتاكيد حجزي من الفرع الرئيسي
وصلت المكتب والمفاجأه رد الموظف مالكش حجز يابيه
مين الي حجز لك
قلت له الوقت قال معرفش دا واحد تاني غيري مش انا
ومفيش ولاسياره عندنا الحين
كلمت الجوال الخاص بمنسق الحجوزات مايرد علي ابد
من هنا وهناك ومحاولات نصف ساعه خلاص اقتنعت ان الدعوه نصب والي دفع لهم اكثر طلعوه على حجزي انا

وكنت محرم مابغيت اخرب عمرتي واستخرت وطلعت ولقيت ليموزين خذته ب200 ريال
طلعنا من المطار الساعه 6:30 مساء ووصلنا الساعه الثامنه تماما والطريق سالك تماما ماعدا اخر كيلو قرب الحرم زحام غير طبيعي وجلسنا فيه نصف ساعه تقريبا ونزلنا تحت احد الانفاق بالقرب من دار التوحيد وباب الملك فهد
ذهبت مباشره لصندوق الامانات معي شنظه صغيره بخليها عندهم لين اخلص من العمره
لقيته مليان وصرفونا رحنا لرقم 1 عند باب الملك عبدالعزيز تحت الابراج الجديده مباشره لقيت الناس صافين سرا وصفيت معهم ووصل دوري وحطيت الشنطه .. بعشره ريال للساعه وكل ساعه بعدها بريالين ..
الحين بدينا بالفوضى حاولنا ندخل الحرم مافيه مجال كل واحد منسدح على كيفه والي ياكل والي يشرب والي يسولف وبعد جهد جهيد استطعنا الدخول من باب الملك عبدالعزيز
مالقينا مكان بالدور الاول طلعنا الى الدور الثاني وبالكاد حصلنا مكان نصلي فيه ..
الوضى فوضوي بشكل ملفت وبعض المعتمرين مسكرين الممرات وحتى الدرج مليان ناس بشنطهم واكلهم وشربهم
خلصنا صلاة العشاء وبعدها حاولنا الوصول للصحن للطواف ونزلنا للدور الارضي وجلسنا نصف ساعه للوصول الى صحن الكعبه من الفوضى واصفاف الناس للصلاة في الممرات تحت انظار الجنود والظباط للاسف وحصل تزاحم كبير جدا من جهة باب الملك عبدالعزيز بسبب اقفال هالممرات
بدينا بالطواف الساعه 9:30 مساء وانتهينا الساعه 10:35 وايضا الفوضى سمه مستمره داخل الحرم الناس تصلي بمكان الطواف والي يعكس خط سير الطائفين وتحت نظر الجهات المنظمه الي تفرغ بعضهم للفرجه فقط وفي عيونهم الملل من العمل في اشرف بقاع الارض ...
واتجهنا بعد الطواف للسعي وانتهينا الساعه 11:45 مساء ..
جلسنا للراحه وقراءة القرآن والصلاة النافله الى الساعه الواحده
وبعدها ذهبنا للعشاء والسحور بنفس الوقت في ابراج وقف الملك عبدالعزيز وفيه اسواق ومساحات كبيره للصلاة واخرى في الدور الخامس والرابع للمطاعم ..
عدنا الى الحرم الساعه 2 صباح الثلاثاء وانضمينا الى صلاة التهجد الى نهايتها الساعه 2:50 تقريبا
وبعدها ذهبنا لصندوق الامانات وخذت اغراضي وذهبت للنفق الي نزلنا فيه اول ماوصلنا ولقيت احد الشباب السعوديين واتفقت معه للتوصيل للمطارعلى 250 ريال واتجهنا الى المطار الساعه 3:15 صباح الثلاثاء ووصلنا بعد زحام شديد جدا حول الحرم الساعه 4:45 صباحا
صلينا الفجر بالمطار واقصينا البوردينق واقلعت رحلتنا في وقتها السابعه صباحا ووصلت 8:20 دقيقه والحمدلله ..

ملاحظات ومشاهدات حول الرحله : :
** تقصير واضح جدا جدا في التنظيم في منطقة ماحول الحرم وداخله وعدم الاخلاص والخبره في العمل لدى بعض العاملين هناك من القطاعات العسكريه ,,
** لايوجد احد في الحرم من الجهات العامله يعمل بجهد يستحق الذكر الا عمال النظافه فقط وقليل من القطاعات الاخرى ..
** الي معه نساء لايحاول العمره بهالوقت حتى لو اخذ سكن مطل على الكعبه الا ان كان بيصلي في غرفته لان الوصول والدخول للحرم صعب جدا جدا بسبب فوضة التنظيم ..
** الي يحب اطفاله لايفكر يجيبهم معه ابد في هالوقت بالذات ..
** السيارات يتم حجزها في النقطه الي قبل الدخول لمكه ورايت حافلات كثيره تقف هناك لنقل المعتمرين بعد ايقاف سياراتهم وسالت التاكسي الي جابنا معه للمطار كم توصلون من هالمواقف الى الحرم قال في هالفتره نوصل بمبلغ من 50-80 ريال للي بياخذ السياره خاصه به ..
** طبعا كالعاده انسرقت النعال اعزكم الله وبعيني رايت احد السيدات من دوله شقيقه لايسه نعالها ومعها كيس والله انها تتنقى وتعبي على مرأى من حراس الامن في الحرم للاسف ومحد سالها ليش ..
** اتمنى من خطباء الحرم التنبيه بشكل مستمر على اداب العمره والمساجد عموما والحرم خصوصا من ناحية الاكل والشرب والنوم فيه ومضايقة المسلمين وسرقة الاحذيه وايضا التنبيه على من انهى طوافه وسعيه ان لايزاحم المسلمين وان يطوف في غير اوقاتى الذروه..
** نتمنى من الجهات المنظمه الدقه والحرص في عملها لوجه الله ومراقبة العاملين على الارض وليتذكروا ان خدمة الحجيج شرف قاتلت عليه قبائل مكه في الجاهليه وقدمته بالمجان فكيف وهم الان مسلمون وياخذون اجر مادي على ذلك ..
** يفترض حصر الطواف في اوقات صلاتي التهجد والقيام خصوصا على من يرتدون الاحرام فقط لاتاحة الفرصه لهم لانهاء نسكهم والي ماعليه احرام الاحرى به او يوفر تعبه لاداء الصلاة من الامام والطواف في وقت مافيه زحام ..
** يفضل توفير ماصلات من والى المطار تكون باستغلال وقت الاجازه وتشغيل الشباب ولو بسيارتهم الخاصه ويكونون مسجلين بياناتهم كمتعاونين فترة رمضان ومن لاتسجل عليه اي ملاحظات يستدعي العام القادم وهكذا وتسجل اسماءهم في مكان بارز بالسياره ..
** لاتعتمد بشكل مؤكد على اي خدمة توصيل من شركات في اوقات الزحمه فالامور تتغير مع العرض والطلب وتلاقي نفسك في موقف محرج وامامكم ماحصل لي مع شركة ذيب لتاجير السيارات
** وجبات السحور في الفنادق المحيطه بالحرم غاليه والشخص الواحد وجدته في ابراج مكه الهيلتون ب275 ريال والباقي من 250 ريال وطالع
وحصت مطعم في وقف الملك عبدالعزيز الدور الخامس قريب من كنتاكي سعر الفرد 120 ريال ويبدون انه فخم لاني يوم امرهم كان مقفل لتجديد حافظات الاكل وقال تعال بعد نصف ساعه







مواقف المطار



وهنا ننتظر النداء لرحلتنا في مطار الرياض




وهنا بعد وصولنا لمطار جده والاستعداد للنزول




وهنا وقفنا راعي التاكسي الي جابنا من جده في نفق قريب من باب الملك فهد ودار التوحيد




وهنا صعدنا السلالم الكهربائيه الى الحرم الشريف




وبعدها انسدت نفسي عن التصوير وانشغلت اخلص عمري من الفوضى وعدم التنظيم الطاغي هناك

الى ان وصلت مطار جدا وصورت هالصوره لصفة الطائرات بالانتظار

مواضيع عشوائيه ممكن تكون تعجبك اخترناها لك:

• الفزعة
• استفسار لخبراء جدة
• مكه والمدينه زحمه؟
• أسواق المدينة المنورة
• هذي الأسعار وعطوني رايكم وش اختار؟؟
• احوال فندق دلة
• ايش تختارون لو كنتم مكاني في المدينة الرجاء الدخوول
• اقرب فندق للحرم بسعر معقول
• فندق بالقرب من الحرم
• لو سمحتوا وين فيهمواقف مجانيه قريب من فندق رافلز وفيرمونت
• إرتفاع اسعار الشقق بالطائف أفيدونا حقيقة أم إشاعة؟؟؟
• بنات جدة طلبتكم لاتردوني فزعتكم ياهل الرخاء والشدة
• استفساااار
• استفسار عن فنادق في المدينه المنوره جزاكم الله خيرا
• قررت ان أذهب الى الهدا الطائف لمدة ايام فأفيدونا بارك الله فيكم
• مطلوب شقة في مكة في رمضان
• راح أدعيلهم اللي يردون علي سؤالي ؟؟؟؟
• رحلة الى المدينة المنورة فندق الخزامي
• إستفسار يا أهل الطائف ؟؟؟
• استفسار عن مطار جده

الله يتقبل منك عمرتك

عمره مقبولة

ذهبت في نفس يومك 22/9 من الرياض جده على رحلة 7.30ورجعت اليوم 24/9 والحمد لله كان اهلي معي والوضع صحيح مزدحم بس كان فيه تنظيم بجد رجال الامن ماقصروا والله من يستحمل الي يسونه فيهم المعتمرين ونزلت مطار جده وعلى طول رحت لذيب لتأجير السيارات وبالعكس كان تعاملهم معي كويس وعندي عضويه معهم ولاحجزت مسبق ولا شي وصلت الساعة 9 مساء وعلى طول حصلت الكدادة ب400 ريال للحرم عسى ماشر استخفاف بعقولنا واستأجرت سيارة يارس 84 ريال لمدة يومين ودخلت فيها وانا محرم الى ان وقفت في مواقف فندقي الي سكنت فيه مكارم ام القرى وانصح الي بيروح مكة يسلك طريق بحره مكة فيه نقطة الشميسي للمرور ولكن مايقولون شي ولا لهم شغل في حجز السيارات وكانت العمره مره موفقه والوضع حلو مرره وربي بصراحه لو لا الله ثم العسكر وتنظيمهم كان صارت مذابح ومجازر في الحرم بالعكس منظم الوضع وطفت في الصحن في وقت صلاة التهجد وسعيت في الدور الاول وبالعكس الوضع ميسر والله يتقبل عمرتنا ان شاء الله

اولا الله يتقبل عمرتك
والحمد لله على السلامة

الزحام اكيد وانت تدري عنه قبل لا تجي لذلك لازم تتكيف مع الوضع

ثانيا الحرم المكي منقووووول على الهواء مباشرة 24 ساعة وما شفنا الي شفته

اعتقد انك تشربت قبل السفر أو أثناءه أمورا زادتك توترا لذلك بدت مشاهداتك منعكسة على ما كتبته

انت برحلتك هذه ارهقت نفسك وارهقت زوجك لذلك فأنا أنصحك بقراءة قاعدة 90 / 10

الخطوط وحجزهم وبعدها ترك الأولاد وبعدها تأخر الإقلاع وبعدها مشكلة الكراسي وبعدها ذيب وحجز السيارة وزحام

كل هذه جعلك تنقل لنا صورا سلبية لان نفسيتك صارت سيئة

تقبل ما قلت لك فعلي أن أكون مصيبا



عبادي تقبل الله عمرتكم

والحمد لله على السلامة

لرجال الأمن جهود جبارة نسأل الله لهم الأجر والمثوبة وأن يعينهم في كل أمورهم

اخوي تقبل الله عمرتك ,,,

بالعكس رجال الامن والمطوفين يحاولون تنظيم الوضع قد الامكان لكن عندمآ يكون اكثر من 2 ميلون

في مكان واحد ومن جنسيات مختلفة اي تنظيم سيكون يااخي ...

العمره في العشر الاواخر صعبة جدآ جدآ ,,,

وبعدين على موقف سرقة الاحذية يعني بالله كل واحد ياخذ اكثر من نعال يجي الامن يسأل

نعالك ولا لا ... ؟؟ كان ما خلصنا ...

عمومآ اهم شئ انها تيسرت امورك والحمدلله اعتمرت بها الشهر الفضيل

ومن الافضل الاعوام القادمه تحجز من بدري وقبل العشر الوسطى من الاواخر ...

يعطيك الف عاااااافيه على التقرير اخوي

المشاركة الأصلية كتبت بواسطة عبادي2009
http://www.arabtravelersforum.com/tr...8/#post6030168

واستأجرت سيارة يارس 84 ريال لمدة يومين ودخلت فيها وانا محرم الى ان وقفت في مواقف فندقي الي سكنت فيه مكارم ام القرى وانصح الي بيروح مكة يسلك طريق بحره مكة فيه نقطة الشميسي للمرور ولكن مايقولون شي ولا لهم شغل في حجز السيارات

ياليت اخوي توصف لي الطريق بدقه الله يجزاك خير

تقبل الله منا ومنكم صالح الاعمال

لما تطلع من المطار تسلك طريق جدة مكة واعتقد انه الدائري وبيجيك فيه مخارج كثيرة واخرها جامعة الملك عبدالعزيز وبعد ماتعديه تقريبا تكون طلعت من جدة وتجيك محطة الرحيلي كبيرة فيه اسواق ومطاعم وبعدها تجيك لوحة مكتوب بحرة يمين تدخل معها وتذهب يسار وبعدين تجيك اشارة وتدخل يمين وعلى طول سيده مرررره وبتلاحظ ان طريقك بيكون موازي لطريق جدة مكة الرئيسي حتى تنزل في مكة وانتبه الطريق فيه تحويلات وقديم واتمنى ان اكون وصفت لك بشكل صحيح

رحلة سعيدة

حياك الله أخوي ..

ما ادري ليش فيه تشاابه كثيير بين عمرتي وعمرتك ..

ما لقيت نهائياً حجز في وسط رمضان ولقيت بالصعوبه في 19 رمضان والعودة 20 ..

والنعال انسرقت ولقيت عجوز عربية أو تركية ما ادري معها كيسة تجمع فيها النعال وأمام العالم بدون ما يقولها أحد شيء !!!!! قدام باب الفتح ..

وشريت زنوبة وقطعها باكستاني بدون اعتذار وبدون شيء !!!!

نحاااسة

وفعلا بوفيهات السحور والفطور غاااالية جدا تقريبا ما بين 200 - 350 ريال . !!!

انا تسحرت في الفندق حقنا (3 نجوم) بسعر 40 ريال !!

وعمرة مقبولة ونصيحة اذا تبي تصلي التراويح او تسعى رح للدور الثالث آآخر دور ..

والله العظيم كان فيه عيال من مكة قاعدين يتشقلبون من شدة انه فاااضي خصوصاً وقت التراويح ..

تقبل الله ..

ونسيت أقول بعد ..

الشارع الي قبل دار التتوحيد الي قعدتوا فيه نصف ساعة ..

حنا قعدنا فيه حوالي ساعتين ..!!

لأنه كنا في يوم الجمعة ..

تقبل الله منك عمرتك وسائر الأعمال الصالحات وتجاوز عن السيئات

عمرة مقبولة
أفضل وقت الان للعمرة الصباح
تطلع على رحلة الصباح وترجع على رحلة المساء
ولاما يلزم تصوم اليوم اذا حسيت بالتعب

أخوي تقبل الله عمرتكم.
أولا .ً لايسمح لك بدخول مكة وأنت محرم فموضوع تأجير السيارة من الأساس ماله داعي الا أذا أنت عندك تخطيط أخر .
ثانيا ً ذكرتني بموضوع النعال ( تكرمون جميعا ً ) الاولى أنسرقت أول ماوصلت الحرم و أخذت العمرة وطلعت مالقيتها . وشريت نعال من بن داوود ب58 ريال الساعة 6 الفجر كان شكلها حلو عجبتني الصراحة وبنفس اليوم دخلت للحرم الساعة 4 العصر طلعت الساعة 11المساء لقيتها مسروقة ومعها جزمة زوجتي خخخخخخ قعدنا نضحك أنا وزوجتي ونقول لا حول لنا ولاقوة يالله مشينا وشريت أخرى ب10 ريال من محل الهرم داخل وقف الملك عبدالعزيزبالدور الارضي تصدقون رجعنا فيها للبيت لأنها ب10 محد يسرقها هههههه .
ثالثاً بالعكس رجال الامن والمطوفين يحاولون تنظيم الوضع قد الامكان لكن عندمآ يكون اكثر من 2 ميلون

في مكان واحد ومن جنسيات مختلفة اي تنظيم سيكون يااخي ... 100% كلام سليم .
رابعاً نصيحة اذا تبي تصلي التراويح رح للدور الثالث آآخر دور 100% كلام سليم و أحسن شي مافيه حريم وأطفال ..

ياسيدي أسال رب العباد أن يتقبل عمرتنا جميعا وباقي الامور تتسهل بأذن الله تبقى هي مواقف سوف تنساها مع الوقت ..

طريق بحره مكه يدخلني لمكه من اي جهه؟
الحين ابي العزيزيه من وين اروح

طريق بحرة مكة ..يدخلك مكة من جهة بداية الطريق الدائري .........
بتلاقي رابطة العالم الاسلامي على الجهة اليسرى .....بعدها بتشوف اشارة ..... خذ يمين من الاشارة انت الان في الطريق الدائري مع اللوحات الى ان تصل الى العزيزية

اتمنى من خطباء الحرم التنبيه بشكل مستمر على اداب العمره والمساجد عموما والحرم خصوصا من ناحية الاكل والشرب والنوم فيه ومضايقة المسلمين وسرقة الاحذيه وايضا التنبيه على من انهى طوافه وسعيه ان لايزاحم المسلمين وان يطوف في غير اوقاتى الذروه.



ياليت احد يتبنى هذا الكلام ويوصله للمسؤلين لاان الخطباءورئاسه الحرمين مالهم شغل باللى حاصل كان الامر مايعنيهم مباشره

متيم احسنت