الموضوع: أستفسار لاهل الخبرة كيفية الوصول للدومو

مساء الخير ... اعزائي ...في هذا المنتدى الرائع

وددت الاستفسار منكم عن كيفية الانتقال من الفندق الذي سأقيم به في ميلانو ....

حيث سأقيم في فندق ستار هوتيل ريتز ...في ميلان

ما اردت الاستفسار عنه ان اردت الوصول الي ساحة الدومو في ميلان فما هي افضل وسيلة لذلك ؟

عبر الباص او القطار ؟؟ او يمكن ان اصل مشيا على الاقدام .؟؟

وماذا عن التاكسي هل تعتبر اجرته مرتفعه ؟؟

وشكرا جزيلا للجميع مقدما...

مواضيع عشوائيه ممكن تكون تعجبك اخترناها لك:

• رايكم في هالمخطط
• استفسار بخصوص الابلكيش حق السفاره الايطاليه
• ياريت مساعدة ضرورية جدا
• اعضاء المنتدى الكرام اريد مساعدتكم
• روما ام مدريد
• سؤال مهم
• لـ خبرآء السفر إلى أوروبا
• وش رايكم بها الاوتيل في فينيسيا عاجل
• مسافر وأبغى فزعتكم ببرنامج ومكان آمن وترفيه
• بعد انقطاع عن المنتدى تهانى الي الاخوان بالبوابة الايطالية بعيد الفطر المبارك
• ابي جدول سياحي لمدة اسبوع في ايطاليا
• السكن في فندق الميرديان Hotel Le Meridien Gallia - Milan في ميلان
• اريد فنادق وبرنامج للسياحه في ميلانوفينيسيازيلامسيانترلاكنباريس
• استفسار عن المسافه
• البحث عن السكن في فيرونا وفلورانس
• بطاقة الإنترنت في ايطاليا
• أخوي العريس في حاجتكم
• اول مرهلايطاليا
• فنااااادق فلـورانس ؟؟؟؟
• يوم ونصف في منتصف إيطاليا بماذا تنصحوني

عطيني رابط الفندق من البوكينق او اسم الفندق بالانجليزي وابشري

وانا أشوف روما وميلان حرام الواحد يركب فيها تكسي لعدة اسباب
الأجرة مرتفعه جداً
الشوارع مزدحمة
مو كل مكان يدخله التكسي

الميترو اسهل واسرع وارخص طريقة

ماعليك الا انك تعرفين وش المحطة القريبة من المكان الي بتروحين له وخلاص

والمحطة الي عند الدومو اسمها دومو

انتظر المزيد من الاستفسارات


تحياتي لك

هلا اختي ترا الموضوع سهل فوق ماتتخيلين ، انتي ساكنه قريب حيل من شارع بيونس ايرس ، وعلى فكره فندقكم حلو وحوله مطعم ايطالي تمام غير كذا انتوا موقع فندقكم بين محطتين ليما وبورت فينيسيا . واظاهر ان بورت فينيسيا اقربلكم اذا ركبتيها ابد ثالث محطه هي الدوامو . لاتنسين تمرين لاري ناشينته اول ماتطلعين من المترو بتحصلينه يسار الدوامو واكو ايضا محلات زي اللي عندنا h&m zara قدام المجمع واذا خاطرك بالماركات العالميه مثل بولغري وديور وهالطقه بتحصلينهم بشارع مونتينابوليونه هذا تدرين وين تحصلينه ورا اللاري ناتشينته من الصوب الثاني . اقول خليني اسكت شكلي اقرقتك وايد فمان الله

المشاركة الأصلية كتبت بواسطة llvlloto
http://www.arabtravelersforum.com/tr...8/#post5522608

عطيني رابط الفندق من البوكينق او اسم الفندق بالانجليزي وابشري

وانا أشوف روما وميلان حرام الواحد يركب فيها تكسي لعدة اسباب
الأجرة مرتفعه جداً
الشوارع مزدحمة
مو كل مكان يدخله التكسي

الميترو اسهل واسرع وارخص طريقة

ماعليك الا انك تعرفين وش المحطة القريبة من المكان الي بتروحين له وخلاص

والمحطة الي عند الدومو اسمها دومو

انتظر المزيد من الاستفسارات


تحياتي لك

مشكور وايد وايد وايد

والله يجزاك خييير على النصيحة .....

هذا اهو رابط الفندق في بوكينغ


انا حجزته من بوكينغ ....
http://www.booking.com/hotel/it/hote...ml?aid=1329869


ومشكور للمرة الثانية

المشاركة الأصلية كتبت بواسطة فوّاز
http://www.arabtravelersforum.com/tr...2/#post5523982

هلا اختي ترا الموضوع سهل فوق ماتتخيلين ،

هلا والله فواااز انا من زمان ادور احد يرد علي جذي ...مشكور وااايد

انتي ساكنه قريب حيل من شارع بيونس ايرس ،

اي سمعت ان هالشارع حلو وكله محلات ؟؟صح جذي ...

وعلى فكره فندقكم حلو وحوله مطعم ايطالي تمام

الحمدلله والله طمنتني انا كنت احاتي سالفة الفندق ...انت جربته شخصيا ؟؟؟
وشسمه المطعم ؟؟ وشنو احسن طبق جربته عندهم ؟؟ جنيم ا انعطى ويه

غير كذا انتوا موقع فندقكم بين محطتين ليما وبورت فينيسيا . واظاهر ان بورت فينيسيا اقربلكم اذا ركبتيها ابد ثالث محطه هي الدوامو .

حلو يعني اللي فهمته اركب من المحطة اللي انت ذكرتها و ثالث محطة انزلها عدل جذي ؟

لاتنسين تمرين لاري ناشينته اول ماتطلعين من المترو بتحصلينه يسار الدوامو

معلش اعذر جهلي؟؟؟ بس شنو لاري ناشيته ؟؟؟ محل وشنو يبيع بالضبط ..قلت لك ما انعطى ويه واسئلتي وايد

واكو ايضا محلات زي اللي عندنا h&m zara قدام المجمع واذا خاطرك بالماركات العالميه مثل بولغري وديور وهالطقه بتحصلينهم بشارع مونتينابوليونه هذا تدرين وين تحصلينه ورا اللاري ناتشينته من الصوب الثاني . اقول خليني اسكت شكلي اقرقتك وايد فمان الله

بالعكس ان وايد وايد وايد مستمتعه بسوالفك ومعلوماتك القيمة جدا والمفيدة جدا جدا جدا


ياريت ما تبخل علي ...بانتظار اضافاتك لو سمحت ....

تدري بالنسبة لي انت لقيا من السما....مشكور وااااايد

جاوبك اخوي فواز

الله يعطيه العافية

تحياتي لك

شكرا لكم على الاهتمام والردود

هلا فيج اختي وصباح الخير ، امري وتدللي وانا تحت امرج .الفندق جربته شخصياً اهو زين بس ترا مو تحطين في بالج انه حيل فخم يعني على قولتهم يأدي الغرض وزياده . شارع بيونس ايرس ماركات بس مو حيل قويه من طقت زارا وتجذي في محل لاكوست اخر شي بس هاه ترا الشارع حيل جبير اخاف تتعبين من كثر ماتتمشين فيه . بعدين ذكرت لج محل حلو حق جواتي مكرم السامع وهو اوت ليت يعني جواتيه فن بس مو ماركات قويه وسعره حيل حلو تقريبا 30 40 يورو هذا زي ماقلنا حق جواتي ايطاليه رخيصه حلوه بس مو ماركات هذا الله يعافيج بتحصلينه بعد مطعم برجر كنق على اليمين . طيب نجي لشغلات الماركات العالميه ديور وبرادا وبولغري ....... الخ الشارع اللي قلتلك عليه اسمه مونتينابوليونه اسعاره اللاسعار الرسميه يعني مو اوت ليت اما لاري ناشينته ممكن تحصلين شوي ارخص ... شنو بعد اسئليني وانا حاضر ، ها ذكرت شغله حلوه. فيها توفير اذا تبون تروحون للاوت ليت اكو شركة في منطقة كاريولي تروحون لها مثل طريق الروحه للدواموبس ماتنزلون للدوامو تنزلون للمحطة اسمه كاريولي ابد اول ماتطلعون من محطة المترو بتحصلينه يسارج اسمه Zani يدونج ب 20 يورو للشخص للسيرفاللي وفوكس تاون طبعاً انا ماعجبوني حيل الاوتلتين بس السيرفاللي ملابس الاطفال حلوه فيه وممكن برادا اوت ليت تحصلين فيه شغلات حلوه اللي باللسيرفاللي
شنو بعد بقا ماقلناه ها انتي سألتي عن اللاري ناشينته هذا جنب الدوامو يسار اول ماتطلعين من محطة المترو من الدرج بتحصلينه جدامج يسار على. شارع اسمه قاليريا فيتوريو اميانويل اظاهر جذي اسم الشارع طبعا هالمجمع فيه طوابق يمكن سته وكل طابق مخصصينه لشي ، شي للاطفال وشي للحريم وشي للرجال طبعا الارضي كله عطورات ومكياج . اخر شي اذا انتوا تبون الاوتليت ترا فلورانس اوتليتاتها تينن .
الحين انا بوقف وانطرج تسأليني وابشري انا تحت امرج واتمنى اكون ساعدتج اختي

اخي فواز ممكن تشوف لي الفندق هل فيه مواقف للسيارة وهل هو مجاني او بفلوس وكم في اليوم الاجرة معليش اختي ماصدقت فيه احد يرد ودخلت معك في الموضوع اعذريني هاه اخي الله يرضى عليك خبرني

المشاركة الأصلية كتبت بواسطة فوّاز
http://www.arabtravelersforum.com/tr...0/#post5535930

هلا فيج اختي وصباح الخير ، ا

مساء الخير فواز .... وهلا فيك ...

مري وتدللي وانا تحت امرج

ما يامر عليك عدو ...وماتقصر كلك ذوق ....واتمنى تتحمل كثر أسئلتي وكثر استفساراتي اللي بتشوف بنفسك شكثرها...

.الفندق جربته شخصياً اهو زين بس ترا مو تحطين في بالج انه حيل فخم يعني على قولتهم يأدي الغرض وزياده .

انا مو مهم عندي الكشخة والفخامة المهم والاساسي النظافة ....طمني من هالناحية الله يعافيك و ثانيا الموقع وانت الحمدلله الله يجزاك خير طمنتني من هالناحية ...

شارع بيونس ايرس ماركات بس مو حيل قويه من طقت زارا وتجذي في محل لاكوست اخر شي بس هاه ترا الشارع حيل جبير اخاف تتعبين من كثر ماتتمشين فيه .

الحمدلله ونستني دامه يمنا ابشر بالخير شكلي بنام فيه بعدين خبرك حزة السوق مانتعب ... بس سؤال لي متى السوق فاتح ؟؟ بهالشارع يعني ؟

بعدين ذكرت لج محل حلو حق جواتي مكرم السامع وهو اوت ليت يعني جواتيه فن بس مو ماركات قويه وسعره حيل حلو تقريبا 30 40 يورو هذا زي ماقلنا حق جواتي ايطاليه رخيصه حلوه بس مو ماركات هذا الله يعافيج بتحصلينه بعد مطعم برجر كنق على اليمين . طيب نجي لشغلات الماركات العالميه ديور وبرادا وبولغري ....... الخ الشارع اللي قلتلك عليه اسمه مونتينابوليونه اسعاره اللاسعار الرسميه يعني مو اوت ليت

هالشارع وين صاير بالضبط يم شارع بونيس ايرس قريب عليه يعني ؟؟
عفوا بس شنو اسم المطعم اللي مدحت لي اكله ؟
وشنو جربت عنده ؟
وفي كافيهات وسوبر ماركة ومطاعم قريبة على الفندق ؟

اما لاري ناشينته ممكن تحصلين شوي ارخص ... شنو بعد اسئليني وانا حاضر ، ها ذكرت شغله حلوه. فيها توفير اذا تبون تروحون للاوت ليت اكو شركة في منطقة كاريولي تروحون لها مثل طريق الروحه للدواموبس ماتنزلون للدوامو تنزلون للمحطة اسمه كاريولي ابد اول ماتطلعون من محطة المترو بتحصلينه يسارج اسمه Zani يدونج ب 20 يورو للشخص للسيرفاللي وفوكس تاون طبعاً انا ماعجبوني حيل الاوتلتين بس السيرفاللي ملابس الاطفال حلوه فيه وممكن برادا اوت ليت تحصلين فيه شغلات حلوه اللي باللسيرفاللي

مشككوووووووووووووووور وايد على هالايضاح المهم ... كنت سامعة ان في رحلات توصل للاوت ليت عن طريق الباص والحين انت اكدت ل الموضوع الله يجزاك خير يااارب

بس عندي استفسار ...ألحين اذا ركبت المترو من المحطة اللي يم الفندق ....حسب ماذذكرت لي سابقا ان ثالث محطة انزل فيها القة نفسي بالدومو ....اذا بروح مكتب الشركة اللي توصل الاوت ليت جم محطة ياخذ ؟؟

وايد ناس سمعت منهم ان الاوت ليت مالقوا فيهم شغلات حلوة وانا عشان وقتي ضيج ...( بوريك عقب نسخة من برنامجي المقترح وابيك تعطيني عليه ملاحظاتك لوسمحت ) ماقلت لك ما انعطى ويه
الله يعينك علي ... وعلى كثر اسئلتي ....

فعشان جذي قررت اكتفي بزيارة ....فوكس تاون....

شنو بعد بقا ماقلناه ها انتي سألتي عن اللاري ناشينته هذا جنب الدوامو يسار اول ماتطلعين من محطة المترو من الدرج بتحصلينه جدامج يسار على. شارع اسمه قاليريا فيتوريو اميانويل اظاهر جذي اسم الشارع طبعا هالمجمع فيه طوابق يمكن سته وكل طابق مخصصينه لشي ، شي للاطفال وشي للحريم وشي للرجال طبعا الارضي كله عطورات ومكياج . اخر شي اذا انتوا تبون الاوتليت ترا فلورانس اوتليتاتها تينن .
الحين انا بوقف وانطرج تسأليني وابشري انا تحت امرج واتمنى اكون ساعدتج اختي

ماتقصر والله يجزااااك الجنة ياااااااارب عندي استفسار عن السفر بالقطار من ميلان للمدن الثانية ...
مثل انترلاكن السويسرية وفينسيا و غاردا ... وغيرها محطة القطار الرئيسية قريبة على الفندق ؟

ولا تحتاج تاكسي او امشي طويل ؟

ثانيا شنو الفرق بين الدرجة الاولى والدرجة لثانية بالقطار واي الدرجتين انت تفضل ؟؟

وجم تكلف التذاكر انا اسفة ادري ثقلت عليك بالاسئلة بس اتمنى ما ازعجك ومشكور مقدما سواء تكرمت بالاجابة ام لم تفعل

مودتي

حيااااج الله النور والبلور ...الموضوع موضوعج ...

النور والبلور احسن شي دق عليهم 00390229404004 انا اذكر انه مجاني وحاضرين يالغالي .
اختي شهرزاد انا حاضر بالخدمه ، شوفي الفندق نظيف واعرفكم يالبنات اهم شي نظافة دورة المياه مكرم السامع من هالناحيه تطمني ، شارع بيونس ايرس مو سوق يعني مو مول هو شارع وفيه محلات يفتحون من الصبح الى الساعه 8 تقريبا والمحل اللي اقصده بنفس الشارع وزي ماوصفتلج يم برجر كنق ، والله المطعم مااذكر شسمه بس بميلانو ماراح تضيعين من ناحية تعدد المطاعم ، اذا بتروحين للمحطة حقت الشركة اسمها كاريولي اظاهر جذي تنكتب جذي Cairoli يعني يمكن ثلاث محطات بعد الدوامو ، شوفي موضوع ان الاوت ليت ماراح تعجبج هذي وانا اخوج وجهات نظر الناس بس مو معناته ماتروحين اسم انج جيتي لميلان ليش ماتزورينها ؟ ، الترين تاخذونه من ميلانو الى سبيز السويسريه ومنها الى انترلاكن انا اذكر جربت هالخط وكان جيد يمكن خلال خمس ساعات وصلنا لانترلاكن واسالي الخبراء هني يمكن يفيدونك بهالخصوص اكثر مني وبخصوص الدرجه اكيد الاولى اريح بالجلسه واوسع شنو بعد بقا ماجاوبنا .... افا عليج لاتستحين خذي راحتج وانا حاضر بالخدمه بأي وقت

مشكور ووووايد فواز والله يجزاك خير وعافية يارب ....

حسافة سوقهم يسكر مبجر

في سوبر ماركت او كافيها قريبة من الفندق ؟؟ وشلون صاير ريوقهم ؟؟؟ حلو ينوكل يعني ؟؟؟


سؤال ثاني يعني المحطة اللي تودي المدن الايطالية مثل فيرونا و غاردا و فينسيا ...قريبة من الفندق صح ؟ مو بعيدة عنها عدل ؟


سؤال جربت تسافر من ميلان لفينيسا لمدة يوم واحد وترجع ؟ تعتبر متعبة ولا طبيعية وجم مدة الرحلة وجم تكلفة التذكرة على الدرجة الاولى ؟؟

ونفس لشي بالنسبة لرحلات غاردا و فيرونا وغيرها ؟؟

مشكور والله يجزاك خير للمرة الالف

وادري اني مزعجة حدي واسئلتي ماتخلص واسفه وايد على هالشي

هلا. الله اختي ومساج الله بالخير ، ماسوينا شي افا عليج ترا سوق مثل اللاري ناتشينته مايسكر مبجر حيل يعني يمكن بالعشر ، ريوق الفندق حلو ونظيف ، المحطة قريبه منكم ، والله اختي جربتها وتقولج انها حلوه بس ماعليج منها لانها تكره فينيسيا عشان جذي تقولج روحي وردي بنفس اليوم ، مدة رحلة ثلاث ساعات وتكلفتها للدرجة الاولى بحدود 50 يورو اختي خذي راحتج على الاخر افا عليج بس

مشكور وايد فواز عسى ماشر ليش كرهت اختك فينسيا ؟؟ يقولون رومانسية وماتنفع الا للمتزوجين .. بس اتوقع لها عمارة مميزة و طابع خاص من هني لازم انشوفها ان شاء الله ... بس انا خايفه انها تضيع ومتعبه بالتمشي ... عقب بيزفني ابوي اذا جذي

انا سألت لاني فكرت 3 ساعة وشي روحه 3 وشي رده اتوقع تعب مو جذي ؟؟

الحمدلله طمنتني دام السوق ما يسكر مبجر هذا اهم شي ... مشكووور وايد

وخبرك بما ان اسئلتي ما تخلص ابد

اولا :
عندي

سؤال بالنسبة لاستخدام الفيزا في المحلات التجارية ومحطات القطار معمول فيه ؟؟
ثانيا :

وبالنسبة للسحب من atm عادي نقدر نسحب بالبطاقات الخاصة بالبنوك الخليجية من هناك ؟؟

ثالثا :
فكرت باول يوم اخذ الباص السياحي في ميلان للتعرف على كافة المعالم الرئيسية للمدينة بدل من التجول الحر لاني اخاف يصيع الوقت و يحتاج مجهود ... انت شرايك ؟؟

وعذرا مجددا وشكرا جزيلااااا من جديد

هلا والله اختي صبحج الله بالخير ، عادي خذي راحتج لاني حاس فيج شايله هم وايد ، ماعليج من اختي لانها ماعندها هوايه بحياتها الا الشوبنق شاطره بالخساير ، انا قلتلج راح تعجبج توكلي على الله وروحوا لها ، انا اشوفها متعبه خصوصا معا الوالدين الله يحفظهم ، الفيزا بكل مكان حتى بالسينما لاتحاتين هالنقطه ، وبطاقة الصراف اذا انتوا بطاقتكم على حساب بيت التمويل الكويتي الافضل تسحبون من بنك اسمه UniCredit هذا عمولته ارخص من غيره لانه معاه عقد مع بنك بيت التمويل ، شكوا تاخذون الباص السياحي اختي ذبي الخوف وراج واطلعي وخلي الخريطة وياج صدقيني ديره سهله جداً واذا اشكل عليج شي انا موجود لخدمتج بأي وقت

صباح النور فواز ...والله اختك ماتنلام منو ما يحب السوق ... انا ما احاتي غير الجناط وثقلهم حزة السفر بسبة التشري والسوق

بمناسبة الجناط بما انك مجرب الفندق اللي في ميلان ...عندهم خدمة تخرين الامتعة يعني ممكن يشيلون جناطي الكبار لمدة 3 او 4 ايام ...لما اسافر سويسرا وارجع ؟؟هالخدمة موجودة في فنادق اليابان مثلا ... ماعندي فكرة عن اوربا ... ياريت تفيدني اذا عندك علم

والله يجزاك خير وعافية يارب ...انا رديت كالعادة مع القرقه والاسئلة ...
بالنسبة للسحب من atm
اذا بنوك اخرى غير بيت التمويل عادي نسحب من اي بنك هناك صح ؟

...
وبالنسبة للباص السياحي ...معناها حتى في روما ما احتاجها ولا تتوقع في روما الوضع بيكون اصعب ...ويضيع اكثر ..


بالنسبة لفينسيا ... انا احس انها متعبة خصوصا مع الوالد والوالدة الله يحفظهم ... بس انا اخترت تكون ميلان منطقة استقرار ومنها ننتقل للمناطق الثانية فينسيا و غاردا وفيرونا و انترلاكن عشان نخفف من التنقلات الثقيلة بمعنى ...عشان ما نضطر نتنقل .... بجناطنا الكبار من منطقة لمنقطة فرحلة ليوم واحد اسهل واخف ... ولا شرايك ؟

انا هذي كانت فكرتي ..


اي بمناسبة المناطق الثانية... شرايك بغاردا وفيرونا .... انا شخصيا ضحيت بالاوت لت لان جدولي مزحوم واستبدلته بفيرونا ... لاني حبيت نزور بيت روميو وجولييت ..وغاردا قلت للموفي لاند ...شرايك بالمنطقتين ؟


مثل ماقلت لك من قبل ولاني ما انعطى ويه ... بحطلك جدول رحلتي مال السفرة ككل وباخذ رايك بالمناطق ......( ممكن يعني ؟ ). وسوري على الازعاج بس صج انا حنانه لاني احب يطلع كل شي مرتب

اخر شي عندي استفسار ... جم تتوقع مبلغ يومي يكفي للشخص الواحد من غير الشوبينغ ...ادري هالموضوع خاضع للشخص نفسه ... بس تقديريا يعني جم اهو المبلغ اليومي ؟؟

اسفه للمرة مليون ومشكووووور وايد والله يوفقك و ييسر امورك يارب

صبحج الله بالخير اختي ، هلا فيج واستمتع بخدمتج ، والله الجناط ماجربتهم من هالناحيه بس تقدرين تدقين عليهم وتتاكدين ، البنوك الاخرى عادي اسحبي من اي بنك اهم شي تحصلين الشعار اللي موجود بالبطاقة موجود بالجهاز ، الباص السياحي اكرهه واحسه كلام فاضي ومحد يزعل مني بس هذي وجهة نظري ، فكرتج حقت ميلان تكون هي منطقة الاستقرار اعجبتني خصوصا حولها مدن كثيره تنزار وايضا اذا الفندق قبل يحفظ جناطم بتصير فكره ممتازه ،غاردا وفيرونا حلوه حيل وخبرتي فيهم ضعيفه لان زيارتي لهم من زمان بس غاردا حبوها البنات حيل ، اختي خذي راحتج واذا ماعرفت الجواب بقولج هذا السؤال ماعرفه ، وبعدين انتي مو حنانه انتي مرتبه وليت اخواتي يطلعون زيج ماشاءالله عليج بس هم شاطرات برصد اماكن التسوق غيرها يقولون هذي شغلتي ، المبلغ اليومي للشخص البالغ اعتقد انه مايتجاوز 70 يورو غداء + تمشيات طبعا التنقل بالمترو . تشرفنا اولا بمعرفتج اختي وحاضر بأي وقت لخدمتج

مساء الخير فواز ... والله يجزاك عنا كل خييير يارب ...شهادتك اعتز فيها ومشكور وماقصرت ...اكيد اهم تاركين مهمة ترتيب الرحلة عليك شكلك حيل دقيق ومرتب ياريت احد بالعايله الكريمة عندي يصير جذي لو شوية بس

مثل ماذكرت لك من قبل بحط برنامج الرحلة لما يتضبط بمساعدتك ان شاء الله عشان تعطيني ملاحظاتك و تعليقاتك عليه...

وكل مرة اقول خلاص ببطل أسئلة ... بس للأسف أسئلتي ماتخلص ... بالعكس تزيد ... وسامحني كلك ذوق ...

.. لما امس قعدت افكر بسالفة زيارة فينسيا والرجعة بنفس اليوم لقيتها صعبة .. خصوصا مع امي وابوي الله يحفظهم ...

وعشان جذي قلت نأجر فندق في فينسيا ... لمدة ليلة وحدة فقط للمبيت ونغادر صباحا باتجاه ميلان ...

الحين السؤال...يا كثر أسئلتي ادري ... ترشحلي فندق .. للاقامة لليلة واحدة .. او تقولي شنو الاحسن اسكن في السان ماركو ولا قرب جسر ريتالو ..وانا ادور فندق ... من بوكينغ . ؟؟ ادري حدي اتفلسف وادقق ؟؟؟

السؤال الثاني ...في طريق العودة من فينيسيا بالقطار ... وصولا الي ميلانو هل تنصحني اتوقف بمدينة معينه قبل ميلان يعني فيرونا تصير قبل ؟ ولا بعيدة عنها ؟ ولا اوت لت سيرفالي مثلا ؟؟ على الطريج

ادري حدي اتشرط ميخالف تحملني حدي احب التفاصيل ...مشكور

مساج الله بالخير اختي ، اول شي اختي تعبت وانا اقولج عادي خذي راحتج وانتي مو مقتنعه ، وبما اني معصب الحين بنتفق اتفاق اذا تاسفتي مستقبلاً من اي استفسار بترك موضوعج وماراح ارد عليه اتفقنا ؟ مو تقولين لي ماعلمتني
احسن شي حطي البرنامج على شان اشوف اذا فيه اشياء يبيلها تعديل بقولج ، فنادق فينيسيا وايد وماحب انصح احد بالفنادق بس بقولج انا بعد اسبوعين بسكن بفندق يعجبني حيل اسمه سان كلمينته حيل فخم وسعره غالي شوي،ممكن تروحون لفيرونا لانها على دربكم بالرجعه ، بالنسبه لسيرفالي لو معكم سياره اكيد يمديكم تمرون عليه بس ماعرف اذا في محطة تراين توقف يمه يمديكم منها تروحون له . حاضرين بالخدمه اختي

مساء الخير فواز .. خلاص ماراح اعتذر مرة ثانية وعد ...كل شي ولا تعصب يامعودلاني بصراحة مالقيت احد يجاوبني على اسئلتي بالتفصيل غيرك عشان جذ ماعندي استعداد اضحي بهالشي ...بس اتوقع اني اشكرك عادي صح ؟؟فهمت من ردك الاخير انك حاليا في ايطاليا او انك ...بتروح ايطاليا قريب صح جذي؟

اليوم الاول :
الوصول الي ميلانو صباحا :
الساعة 9 صباحا :
التجول بالمنطقة المحيطة بالفندق
مساء :
- زيارة منطقة الدومو وماحولها ...ومركز غاليريا ( شراء خط هاتف من محل تيم في غاليريا ) في الدومو GALLERIA VITTORIO

اليوم الثاني :
صباحا :
زيارة
1- زيارة لاسكالا ( دار الاوبرا ) Teatro alla Scala –
2- قصروقلعة Castello Sforzesco زيارة متحف الالات الموسيقة ومتحف الفن التابع للقلعة .
3- زيارة بشارع Dante والغداء هناك الاطلاع على منحوتة مايكل انجلوا Rondadini Pietà
العودة للفندق للاستراحة
عصرا:
حجز التذاكر السفر لانترلاكن من محطة القطارات ثم الذهاب
مساء :
زيارة الاماكن التالية :
ساحه اسمها plazza lima هي عباره عن ساحه يبيعون فيها الملابس الجلديه والاكسسورات وتقع على شارع ( بوينس ايرس ) طبعا الشارع لازم لزيارته .
زياره المجمع التجاري (la Rinascente) عبارة عن مركز 7 ادوار يجع الماركات كلها وفيه مكتب للتاكس فري بس معليكم منه لان شروطهم انهم يرجعون الفلوس لك بالدولار يعني المطار افضل ..وموقعه بالدومو وانتي رايحه للجالريا قلبلها على اليمين..
شوارع التسوق في ميلانو وما أكثرها فتعتبرالشرايين النابضة بالسياح والمتسوقين ومنها على سبيل المثال Via dante وشارع Montenapoleone وشارع Vittorio Emanuele II وشارع Corso Como 10 حيث منطقة التسوقفي ميلان شارع سان فيدل
مونتي نابوليون ، يعتبره البعض الأشهر من بينشوارع ميلان حيث وجود العلامات التجارية الشهيرة والبضاعةالفاخرة



اليوم الثالث :
الي انترلاكن عبر القطار اليورب ستار ( ثلاث ساعات )

( برنامج انترلاكن )

اليوم الرابع :

( برنامج انترلاكن )

اليوم الخامس :

( برنامج انترلاكن )

اليوم السادس :

مغادرة انترلاكن صباحا متوجهين الي لوغانو

مساء :
استقلال الباص من مدينة ميلانو الي لوغانو
وزيارة اوت لت فوكس تاون -لوغانو فترة العمل من 11 صباحا – 7 مساء
الطريق عبر الحافلة ( ساعة )
مساء :
استكشاف المدينه عن طريق القطار ( لوقانو تور ) او على الرجلين ..
فيه رحلات تقوم بها سفن تزورون قريه melide وممكن تزورون قريه سويسرا المصغره ..
جولة سياحية في لوغانو حول البحيرة جولة لمدة ساعة = 60 فرنك = 19 دينار
العودة الي ميلان الساعة 8 مساء
العودة ليلا الي ميلانو

اليوم السابع :
بعد الافطار في الصباح التوجه لمحطة القطار وكان مخصص لزيارة فينيسا (البندقيه) بالقطار
السعر:100 يورو لشخص
الزمن:ثلاث ساعات
الذهاب:8:30 الصبح والوصول 10:55
العوده:7.55 والوصول10:25
زيارة ساحة السان
ماركو في فينيس
وزيارة جسر الريتالو الشهير في فينيس
رحلة في الجندولا .


اليوم الثامن :
صباحا الساعة 8 صباحا ...التوجه الي سيرموني – غاردا ....
( تبعد عن ميلانو بالقطار 45 دقيقة وصولا لفيرونا نذهب لزيارة منزل روميو وجوليت
الساعة 12 او 1 الظهر :
ومن فيرونا ناخذ سيارة الي غاردا )
زيارة غاردا – زيارة موفي لاند مواعيد العمل في يوليو ( 10 صباحا – حتى 6 مساء )
والعشاء هناك ( ميدفيل / العرض ) داخل موفي لاند ( العرض الاول الساعة 7 مساء العرض الثاني الساعة 9 ونص )
العودة الى ميلان ليلا ...تحضير الحقائب للسفر الي روما

اليوم التاسع :
مغادرة ميلانو الي روما عبر الطائرة ( ساعة ) الطائرة الساعة 11 صباحا ..
الوصول الي روما الساعة 12 ظهرا و الوصول للفندق
والتجول بالمنطقة المحيطة في الفندق


اليوم العاشر :
صباحا :
زيارة ( الكولسيوم الدخول له - ساحة كابيتول هيل ( هضبة العاصمة ) PIAZZA CAMPIDOGLIO التجول فيها لاخذ اطلالة كاملة على معالم المنتدى دون الحاجة لزيارته– منتدى تراجان وما حوله التجول في الاسواق الموجودة في منطقة ماحول المنتدى التجول فيه -بانثيون PANTHEONالتجول فيه-معبد ادريانو TEMPIO ADRIANO التجول فيه-ساحة ميجنانيلي التجول فيها -السلالم ( الخطوات ) الإسبانية وزيارة نافورة ديلا باركاتشا Fontana della Barcaccia فيها التجول فيها وصولا الي
- فونتا دى تريفي FONTANA DI TREVIوالغداء هناك-)


مساء :
زيارة نهر التيبر والسوق الليلي ومشاهدة العروض المسائية والعشاء هناك ( يبقى مفتوحا مع حلول الظلام حتى الساعة 1 صباحا )

اليوم الحادي عشر :
صباحا:
زيارة ( الفاتيكان زيارته والتجول فيه- قلعة سانت انجليو castel Sant'Angeloوصلت الى القلعة مشيا من الفاتيكان ولا تحتاج الا لخمس دقائق فقط لتصل الى اليها من الفاتيكان في الطريق سوف تشاهد هذه البوابة-مبنى العدل والمحاميين tribunal تصويره من الخارج فقط- ساحة نافونا التجول فيها PIZZA NAVONA- بلاتسو شيجي PALAZZO CHIGIالتجول فيها -كاتدرائية سانتا ماريا Santa Maria Maggiore زيارتها-قصر الفنون Palazzo delle Esposizioni( عدم الدخول لها الاكتفاء بمشاهدتها من الخارج) -زيارة ساحة فينيسيا تجاور هذه الساحة الصغيرة منتدى تراجان وقصر فيتوريو امانويل سميت بهذا الاسم لمجاورتها لقصر فينيسيا زيارتها فقط مرورا- زيارة نصب فيتوريو إمانويل الثاني Monumento a VittorioEmanuele-مسرح مارسيلو دي Teatro di Marcello-حديقة فيلا بورقيزي Villa Borghese( غير ضروري زيارتها فقط مشاهدتها من برا )-بورتا دل بوبلو ( ساحة الشعب ) Piazza del Popolo-ساحة قصر كويرينال Palazzo del Quirinale

مساء :
زيارة نافورة تريفي فونتا دى تريفي FONTANA DI TREVI والعشاء هناك


اليوم الثاني عشر :
بيزا وفلورنسا
الانطلاق بالقطار صباحا لزيارة بيزا وفلورنس من روما:
زيارة ساحة المعجزات وبرج بيزا والمنطقة والاكشاك التي حولها
العودة مساء

اليوم الثالث عشر :
رحلة لنصف يوم زيارة كابري ونابولي

اليوم الرابع عشر :
التسوفق النهائي في روما

اليوم الخامس عشر :
روما للتسوق النهائي وغيرها ...

اليوم السادس عشر :
مغادرة روما الي الكويت ان شاء الله


ملاحظة :

ستكون الاقامة ان شاء الله في روما في فندق IQ اذا عندك فكرة عنه ياريت تفيدني ... وياريت تخبرني طريقة الانتقال للدرجات الاسبانية وغيرها من هالفندق مشكوور وايد

هلا بج اختي وحياج الله ، ارفع القبعه على ترتيبج المتميز ، ليت بعض الناس يتعلمون شوي ، البرنامج بدون مجامله اشوفه متكامل وطبعا انتي عارفه مو من اول زيارة لج لهالدول لازم تلفين وتزورين كل شي بس اذا سويتي اللي راصدته اضمن انكم باذن الله بتستمتعون ان شاءالله ، الحين فلورانس جم بتقعدون فيها ؟ لان اذا بتروحون لها اوت ليتاتها احسن من سيرفالي خصوصا لبعض الماركات ، بعدين روما ما اشوفج مسجله شارع كوندوتي ؟! لانه مهم اكو خوش محلات هيرمز وبولغاري وهالطقه ، شنو بعد بقا ماجاوبناه ؟ انا ماشي الاسبوع الياي واذا تامرين بشي انا حاضر ياختي لاتترددين

مشكور وااايد فواز الله يجزاك خير

تروح وترد بالسلامة ..انت بتروح ايطاليا بس صح ؟؟

فلورنسا للاسف بقضي فيها يوم من الصباح للمساء ماراح ابات فيها للاسف عشان ماقلت لك من قبل فكرة الانتقال بالجناط الكباااار...

لا اكيد شارع كوندتي مهم جد حاطته في بالي ان شاء الله ...

ما عندك اضافات حول الجدول ؟؟

وماقلت لي شرايك بالفندق ؟

اي نسيت عندي سؤال اخوي مثل ما فهمت انت عندك خبرة بالسفر لسويسرا ..

تنصحني اخذ السويس باس عشان التنقلات بالمواصلات العامة عشان تصير مجانية ... والدخول للاماكن السياحية تصير منخفضه تكلفتها ..

شرايك ؟؟ ومشكور

هلا فيج اختي والله السنه هذي ناوين نلفلف اكثر من مكان بس خبرج ايطاليا مالنا غنات عنها . السويس باس مهم خصوصا اذا بتقعدون اكثر من اسبوع بسويسرا ، حنا بنروح لمنترو اذا بيصير عندكم وقت لاتطوفكم جنة الله بالارض ، بعدين ناوي اكتشف مدن يديده فان شاءالله ربي يوفقني ويسهل عليّ ، احب اروح بترتيب بسيط وهناك اتعلم على شان المعلومه اذا تعبت لين احصل عليها تثبت وهذي سياستي بالسفر ، رحت لجزيرة اسمها بورا بورا لحالي بس تجربه مستحيل انساها . المهم ما اطول عليج لاتترددين لاي سؤال

مساء الخير فواز انا للاسف رديت للحنة والازعاج ....

بغيت استفسر منك .... الطريق من لوغانو لي سيرموني ...

عن طريق الباص ولا القطار وجم يحتاج بالمسافة الزمنية ؟؟

وشرايك بسيرموني ؟؟

ومشكووور وايد مقدما

هلا بالغاليه جاوبتج بموضوعج ، سيرموني حلوه تستاهل بس ماقد سكنت فيها بس اروح لها وارجع بنفس اليوم من ميلانو ، حاضر لخدمتج

مشكور الله يجزاك خير ...

ادري اتذكر اجابتك عدل ...بس كنت استفسر عن الوصول لها ...:9
مشكور وااايد ....

هلا اختي انا اقصد اني جاوبتج بموضوعج اللي بالبوابه الرئيسيه