الموضوع: نيوزلندا بين زيارتين شاهدوا الفرق

بسم الله الرحمن الرحيم

السلام عليكم ورحمة الله وبركاته

في صيف عام 2000 كانت البداية !!

ماهي نيوزلندا ، ومن يعرفها في السعودية والأكيد اننا لا نعرف الا الحليب وجاعد السياره وقتها فلم تكن هناك احداث سبتمبر ولا ارهاب ولا غيره وكان السعودي مرحب به في كل دوله وكأنه برميل بترول متحرك

كانت البداية رحلة الى اندنوسيا في صيف عام 2000 وهناك تعرفنا على رجل نيوزلندي وتحدثنا معه حول نيوزلندا واقنعنا بإنها بلد السحاب والماء والقنص

طبعاً دخلت مزاجنا فكرة القنص !!

لا سودان ولا مصر ولا حتى كينيا وزائر وطقتها !!

رجعنا من اندنوسيا بعد ان اتفقت مع صاحبي على الرحيل الى نيوزلند بعد ان يأخذ اجازة استثنائية من عمله أما أنا فلم اكن موظف حكومي وكنت ملك نفسي وقتها !!

واسبوع واحد فقط والاجازة لمدة ستة اشهر في يديه بعد ان تكفلت بدفع راتب الست شهور له وبما أن المده طويله قررنا الدراسه والاستزاده من الانجليزية ومنها نحقق مبغانا من التمشية والقنص !!

كان الحجز عن طريق الانترنت وعن طريق معهد اسمه آسبكت في مدينه كرايستشيرج ومنها للخطوط السنقافوريه !!

الرياض - سنقافور - كرايش تشيرج

كانت المعلومات خلال اسبوعين من قدومنا من اندونسيا كامله وحتى العائلة اتصلنا بها من الرياض وتعرفنا على افرادها وطالبناهم بغرفه لشخصين او غرفتين في البيت ووافقوا ...


يوم الرحيل !!

كان الجو صيفاً في الرياض والقيض ماخذ راحته وأخذنا ملابسنا العادية للسفر في الصيف ولم نعلم أن نيوزلند في آخر الدنيا وعندهم شتاء ...

قبل السفر ذهبت لقريب لي يعمل طبيباً في أحد المستشفيات وطلبته كم حبه منومه لزوووم السفر وطول الرحله

انطلقنا من الرياض في رحلة ولا أروع حتى سنقافور وكنت قد زرتها من قبل كم مره واعرفها جيداً !! وفي المطار تسوقنا ودخلنا الانترنت وبالصدفه دخلت على موقع لمدينة كرايس تشيرج ووجدنا رابطاً للاحوال الجوية في كرايس تشيرج وتفاجأنا بإن درجة الحرارة هي 4 درجات في يوم وصولنا

يمه !!

4 درجات وفي الرياض 45 درجه وش هالمصيبه والله لو كنت داري كاتن طلعت الملابس الشتويه من المخزن

المهم تسوقنا وشرينا جاكيتات وملابس شتويه من المطار !!

وركبنا الطائرة

كنت في مقعد وصاحبي في مقعد !!

كان بجواري عجوز نيوزلنديه طيبه للغايه دردشت معها قليلاً وبعد الاكل وثبوت الطائرة في مسارها اخرجت حبة منومه من اللي يحبها قلبك وعطيت جارتي العجوز وحده ونمنا في سبات عميق استمر لمدة 9 ساعات متواصلة حتى ايقضونا لتعبئة استمارات الوصول !!

باقي على الرحله فقط ساعه ونصف او اكثر قليلاً بدأت كتابة استمارة الدخول لنيوزلندا وفهمت اغلب مافيها ولكن كان هناك بندين لم استطع قراءتهما

الاول ساعدتني جارتي العجوز فيه والآن نسيت عن ماذا يتكلم والثاني حاولت ان تفهمني ولكن لم افهم وكانت تأشر على احد الخانتين أي اذا كنت كذا ضع صح واذا كنت غير ذالك ضع لا

قلت ماراح يضرني هالبند وحطيت صح وتوكلت على الله !!

الوصول لكرايش تشيرج !!

وصلنا للمطار وبسلاسة تامة جداً دخلنا الصالة وكان مرحباً بنا للغاية وخلال دقائق خلصنا التفتيش الجمركي بدون اي تعقيدات وليس كما هو الآن !!

وذهبت للجوازات واعطيتهم الجواز ونموذج الدخول ثم طالعتني الموضة شزراً وأشرت على النموذج وعلى البند اللي ماعرفته :112:

يابنت الحلال فيه الف بند خليتيهم كلهم ولا لقيتي الا هذا ؟

واستدعت موظف اخر وبدأ يفهمنا لكن هيهات الراس جيّم خلاص والله لو تقولونها بالعربي مافهمت عليكم !! :109:

ونزلت الموظفه اسفل المكتب وبدأت تبحث في الادراج حتى أخرجت لي نفس النموذج ولكن باللغه العربيه

حي ذا العين !! ايه هذي اللغه :24:

وتفاجأت بإن البند يقول هل حكم عليك بالسجن خلال العشر سنوات الماضيه

لا إله الا الله

سجن ؟؟؟؟؟؟

لا والله ولا عمري شفته الا في مسلسل زمن الاسكافي حق حسين عبدالرضا !!

وشافوا شكل وجهي وانا اقول لالالالالا وقعدوا يضحكون

يازمان العجايب وش بقى مامضى !! صرنا ملطشة ومضحكة ياساتر !!

المهم ...

خرجنا من الجوازات وإذا بذاك الرجل يحمل أسمي وأسم صاحبي في ورقة وقلنا له وصلت خير هذا حنّأ جيناكم

وركبنا لمنزل العائلة في يوم الثلاثاء وباقي على الدراسة اسبوع كامل !!

---------

العائلة + رحلة من الطعوس للتزلج في ثاني يوم + مواقف مضحة للغاية في الحقلة الثانية

تشاو

مواضيع عشوائيه ممكن تكون تعجبك اخترناها لك:

• تدرون وش معجبنيبساللي اشوفه غيرأقول ادخل وقول ليه
• قصة دراسه وضياع في شوارع كرايستشيرش لم يكتمل
• لك خبرة بنيوزلانداتعال دقيقة
• طالع طالع مافيها كلام
• الأن موضوع متجدد كل من سافر الى نيوزيلاندا يعطينا لمحه عن تجربته ليستفيد الاخرون
• ماهي اجواء نيوزلندا في شهر نوفمبر
• تصويت عاجل تصويت ضد النقـاب بـ نيوزلندا ؟
• مساعدة عن أوكلاند و معهد الله يدخلكم الجنة
• ´ هوكس بيه نيوزيلاند
• اول مره اسافر خارج السعودية ومتجه إلى دونيدن لدراسه ياااااليت تفيدوني
• اول مرة اشارك هناياليت تورونيمشكورين
• أصحاب الخبرة في نيوزيلندا تكفون ضروري
• ما هي نيوزلندا
• عاااااااجل افيدوني بلييييييز بسرعه
• استفسار
• ماحدث في اوكلاند
• أنافي نيوزلاندا ومحتاج لكم ياأعضاء
• أسماء المقبولين المبدئي لنيوزيلاندا
• بحث جامعي عن نيوزيلندا بليز ساعدوني
• ارجوا الدخول عندي استفسار ؟؟؟

يعطيك العافية اخوي .........

بانتظار بقية التفاصيل .....



كــــــــل الــــــــود....

يا سلاااااااااااااااااااااام
وأخيراً صرت من أول القراء
سجلني معك من أوائل المتابعين لتقريرك اللي باين عليه راح يكون شيق ومفيد....
بس سؤال غاص بحلقي : ليش توك تكتب عن رحلتك قبل 7سنييييييييييييييييييييين؟؟

المشاركة الأصلية كتبت بواسطة امير نفسي
http://www.arabtravelersforum.com/tr...7/#post1764247

يعطيك العافية اخوي .........

بانتظار بقية التفاصيل .....



كــــــــل الــــــــود....



امير نفسي

حياك الله

ان شاء الله فقط انتظر

تحيتي

المشاركة الأصلية كتبت بواسطة نوووووف
http://www.arabtravelersforum.com/tr...5/#post1764335

يا سلاااااااااااااااااااااام
وأخيراً صرت من أول القراء
سجلني معك من أوائل المتابعين لتقريرك اللي باين عليه راح يكون شيق ومفيد....
بس سؤال غاص بحلقي : ليش توك تكتب عن رحلتك قبل 7سنييييييييييييييييييييين؟؟



نوف

حياك الله

لا يغص ولا شي

السالفه اني مارجعت الا قبل امس من رحلتي الثانية لنيوزلند وشفت الفرق بعيني بين نيوزلند قديماً قبل كثرة الطلاب السعوديين وبين الآن

يوم أروح ماكان في المدينة الا اربعه طلاب سعوديين يدرسون الانجليزي انا وخويي واثنين تعرفنا عليهم في المسجد يوم الجمعه وباقي السعوديين يدرسون طيران تبع شركة ارامكو وكان كل السعوديين في المدينة الكبيرة فقط 35 شخص

ويوم رحت لها ثانية لقيت نص المحلات مكتوب اسمها بالعربي :109:

بسم الله الرحمن الرحيم

كان الوقت يشارف على المغرب والبرد قارص للغاية ، والفتى العربي يرتجف برداً من شدة البرد !!

ركبنا مع السائق لنذهب للعائلة وقد كانوا في انتظارنا !!

نزلنا وبقي السائق في السياره ولا ندري لماذا !!

استقبلنا الأب وكان شخصاً نموذجياً يعمل محامياً ( خليناه يحط سكسوكه من ثاني يوم :109: ) وزوجته تعمل مدرسه وعندهم ولد وبنت في سن التاسعه والعاشرة !!

بدأ الاب يشرح لنا البيت واركان والغرف وفجأة لم نجد الا غرفة واحده صغيره لا تكفي الا لسرير واحد وقال لنا انه بعد مكالمتنا بحث لصاحبي عن سكن قريب من هنا يبعد فقط 50 متر !!

كانت مفاجأه فنحن لا نريد ان نفترق ولكن هذا ماحصل والحقيقة أنه كان مناسباً فقد تعرفنا على العائلتين وصادقناهم !!

ذهب صاحبي للسياره ونزل اغراضنا ومشى بشنطته للبيت المجاور للسكن ولا ادري ماذا قابل هناك

أما أنا استأذن اب العائلة لإن عنده عمل وبقيت مع المدام ( مسميها زوجة بّباي :24: فقد كانت تشبهها كثيراً )

بدأت تتمتم لي وتشرح وقالت لي اكيد انك متعب تعال خذ لك حمام ساخن واخذتني الى حوض له غطاء من الفوق يضعون درجة الحرارة قبل الدخول وبعدها يغلقون على انفسهم ورحت لبست الشورت وقلت مابدهاااااش خلنا نشوف هالآله الجديده علي !!

ودخلت في الحوض وسكرت علي الغطاء ولا اخفيكم اني انكتمت وبغيت افطس ( جاي من ديرتي عشان اختنق في حوض ) :surf

وبعد دقيقتين جاءتني زوجة بباي وهي لابسه المايوه ودخلت معي في الحوض اللي يالله يشيل واحد

افا من اولها !! :110:

مااتفقنا على كذا !!

وانا اقول الله يفكني بس لا يجي زوجها وهي معي ويذبحني في هالحوض !!

وبالفعل جاء ستيف وفتح الغطاء وحنقتني العبرة ودي اقول له ترى هي اللي جايه ماقلت لها شي

وسكر علينا وراح وشوي الا وهو لابس الشورت ابو الشباب وجاي يجلس معنا ( من وسع المكان بيشاركنا )

الحقيقة قعدت اضحك من الهستيريا :115:

كل هالخوف وطلع حبيب ولا قال لي شي !!

طلعت ولبست وجابوا لي العشاء ونمت بعد تعب المسافه !!

وفي الغد بدأ ستيف يشرح لي على الخريطه عن المدينه والغريب اني وجده حاط علامه على المسجد وقال لي كم تروح له في الاسبوع وخفت اقول له كل يوم خمس مرات وينصرع :106:

قلت له الواجب خمس مرات في اليوم بس المسجد بعيد انا باصلي في البيت والجمعه باروح له وانبسط

مر النهار وانا منطق في البيت وخويي مادري وينه ولا ادري وين بيته حتى والعائله في العمل وكل ماطلعت عند الجيران كلب كبر البقره قعد ينابح وارجع ادخل حتى جاء الليل ونمت من المغرب !!:icon_scra

ويوم الخميس اشوا :101: جاني خويي وطلعنا لوسط المدينه مع خرايطنا على رجولنا لين وصلناها والمسافة تقريباً 5 كيلو والعجيب اننا استمرينا طوال اسبوعين نروح للمدرسه ونرجع على رجولنا ولا درينا ان فيه باصات ولا احد قال لنا شي

بس الحقيقة اني نحفت في اول شهر 13 كيلو من المشي !!

المهم ...

يوم الجمعه ذهبنا للمسجد على رجولنا وكان بعييييييد مرررررره ، مشينا الساعه 9 ولا وصلنا المسجد الا وهو يخطب الساعه 12 وبعد الصلاة تعرفنا على الشباب السعوديين وطلاب ارامكوا واخذنا واحد منهم بسيارته ودانا للبيت وقال بارجع لكم بعد العصر عشان نلعب كوره لانهم كل جمعه يعلبون مع فريق ويشاركهم بعض العرب ن الفلسطينيين وغيرهم وكانو يبون سعوديين معهم وبالفعل رجعنا وتجهزنا ومرنا خوينا العصر ورحنا لعبنا كوره وانبسطنا ورحنا معهم لبيتهم وتعشينا !! ورجعنا للبيوت ونمنا

يوم السبت قومونا بدري العائلة وقالوا فيه تزلج ماودكم تخاوونا ، قلت الا بالله بنروح نشوف الثلج وليتني ماقلته !!

كانت الرحله السبت والنوم والعوده الاحد بعد العصر في هالبرد اللي يكسر العظام والنوم في فندق مخصص للمتزلجين وحنا ماعمرنا لبسنا زليجات ولا نعرف شي

رحنا معهم وقعدوا يتزلجون وخلونا مع المبتدأين وابشركم بغت رجليني تخالف :biggrin: سويت سبرنق مابعد سويته في حياتي !! وتكسرنا وكل شوي طايحين وذبحنا البرد !! وكل شوي يقول لنا المدرب حطو رجلينكم زي قطع البيتزا على شكل مثلث وتوقفون ولا عرفنا !!

وسلمانهم ادوات التزلج ورحت انا وخويي في قاعة ( زاوية ) جدار المحل وجلسنا نرتجف من البرد ماناقص الا يتصدق علينا اللي يمر كننا شحاذين !!

المهم قلت لخويي والله مافينا خير شف الناس تتزلج وحنا لا ليش مانتعلم

قال لي والله رح انت انا لو اقوم انفصلت ركبي !!

ورحت وخذيت الادوات ورحت للتلفريك ( بايعها ) ورقيت لين اعلى شي وتوكلت على الله ونزلت ، شوي والا اخوكم في الله فاقد السيطره والناس كلها تطالعني !! ولا ذكرت الا ابو القاسم ( هندي يشتغل عندنا ) مادري وش جابه في بالي

وعلى سرعتي طاير ولا فيه ساتر لو ماوقفت باطيح مع الجبل !!

موقف لا احسد عليها وابن الكلب المدرب شافني ويقول لي من بعيد بيتزا بيتزا كنه اللي في الدعاية

أي بيتزا الله ياخذك والله لو اجيب سطل كنتاكي ماوقفت :11ight:

ويوم اقتربت من حافة الجبل قلت مابدهااااااش واياك نعبد واياك نستعين واطرح نفسي واقعد اتقلب لي ربع ساعة قدام الله وخلقه وخويي من زين وجهه طايح من الضحك ولا قدر يقوم :112:

يوم وقفت باقي على الحافة يمكن شوي !! وتجمعوا علي وقعدو يهاوشوني

الله لا يوفقكم !! وانا وش دراني !! حدي طعس التحدي وتخب علي !!

ربكم ستّار ، نجاني من الهلاك !!

ورحت للقرنه اللي نجلس تحتها انا وخويي وانا قاعد اون من الرضوض اللي في جسمي والعائلة مادرو عنّا قاعدين يتزلجون !!

انتهت النهار ورحنا للفندق المعد !!

فندق عبارة عن طوخ فيه اربع غرف وصاله ، كل غرفه فيها 9 اسره كل ثلاث اسرة فوق بعض ويطيح حضي في اعلى واحد وخويي في الوسط !!

قلت لخويي والله ماقدر سرير نصي طالع برى وانا نايم عليه وفي اعلى الغرفه وانا رجال اتقلب وانا نايم !!

هذا اسمه انتحار ، والله لو اسهر مانمت فوق

وبعد محاولات كلمنا العائلة وقعدو يصحون التزلجين لين دبرو لنا سريرين في الارض !!

ونمنا نوم مايعلمه الا الله من شدة البرد !!

-----------------------------------------

العائلة + المعهد + اول يوم دراسي + اول رحلة قنص في الحلقة القادمة !!:x1:

تقرير ممتع وشيييييييييييق
أتخيلك وأنت تدربى بالثلج ومتقصعر من البرد أنت وخويك:109:
لا وإلا يوم يصحَون الأوادم عشان تنامون بالسرير اللي تحت
بصراحــــــــــــــة :
تقرير يونس ويوسع الصدر ويحمل في طياته معلومات هامه عن المسافات وتقاليد أهل البلد
تابع ونحن معك

حياك ياغالي


متأكد
انه بيطلع تقرير
يضرب على كل التقارير

اسلوبك رائع استاذي

اتمنى لك كل خير

لا تبطي علينا

فعلا مثل ما قال أخوي حساس

أراك داخل وبقوه

وعليكم السلاااااااااام والرحمه

هلا والله وغلا amassi


يا عيني على الاسلوب ..


تمنيت فيه صور ... لكن هذا ما يقلل من ابداعكـ



في الانتظار



تحياتي

المشاركة الأصلية كتبت بواسطة نوووووف
http://www.arabtravelersforum.com/tr...4/#post1764784

تقرير ممتع وشيييييييييييق
أتخيلك وأنت تدربى بالثلج ومتقصعر من البرد أنت وخويك:109:
لا وإلا يوم يصحَون الأوادم عشان تنامون بالسرير اللي تحت
بصراحــــــــــــــة :
تقرير يونس ويوسع الصدر ويحمل في طياته معلومات هامه عن المسافات وتقاليد أهل البلد
تابع ونحن معك



هلا اختي نووووف

الله يوسع صدرك دوم ماهوو يوووم

انتظري فقط وستجدي العجاب العجاب

تحيتي لك

المشاركة الأصلية كتبت بواسطة حسّاس
http://www.arabtravelersforum.com/tr...5/#post1764855

حياك ياغالي


متأكد
انه بيطلع تقرير
يضرب على كل التقارير

اسلوبك رائع استاذي

اتمنى لك كل خير

لا تبطي علينا



هلا بحساس

الرائع هو متابعتك وحضورك سيدي

ابشر ماراح ابطي فقط تابع

المشاركة الأصلية كتبت بواسطة أبو نادر
http://www.arabtravelersforum.com/tr...9/#post1765099

فعلا مثل ما قال أخوي حساس

أراك داخل وبقوه



ابو نادر حياك الله

تسلم يالغالي

خلنا نشوفك في هالمتصفح ونشوف متابعتك

تحيتي لك

المشاركة الأصلية كتبت بواسطة المايسترو
http://www.arabtravelersforum.com/tr...5/#post1765225

وعليكم السلاااااااااام والرحمه

هلا والله وغلا amassi

يا عيني على الاسلوب ..

تمنيت فيه صور ... لكن هذا ما يقلل من ابداعكـ

في الانتظار

تحياتي






هلا بالمايستر

ماطلب شي يابعدي

باحمل الصور وبانزلها ان شاء الله ابشر باللي يسرك

بس تبي الحقيقة الظاهر اني اعرفك :114:

تحيتي

السلام عليكم !!

بعد تلك النومه التعيسه استيقنا مبكراً حوالي الساعه 6 ونص صباحاً والناس نايمه وطلعنا مثل البساس انا وخويي ورحنا توضينا ورجعنا للغرفه اللي يشاركنا فيها 7 غيرنا !!

ودنا نصلي بس مافيه مكان !! الا يكون واحد أمام والثاني مأموم ( قال صفو صفين قالوا حنا اثنين ) :icon_shak

والمشكلة صلاة الفجر جهرية والناس نايمة ولا يدرون من وين طلعوا لهم هالعرب قلت لخويي صلّ بي قال لا صلّ انت !!

ياوالله البلشه وش اسوي !!

توكلت على الله وكبرت وغمضت :24: وبديت اقرأ واصلي وانا مغمض لين خلصت والا الشباب السبعه كلهم قايمين ويطالعوننا :ranting2: الله يستر

قمت وانسدحت على السرير وتغطيت وقعدوا يسألون خويي وش تسوون وابو الشباب يشرح لهم !!

الحقيقة كانوا لطفاء جداً وسألونا عن الصلاة والإسلام !! ويوم شفت الوضع كذا قمت وجلسنا شوي وبعدها طلعنا عند باب الكوخ وشفنا مالا يخطر على الباب !!

حوض نحاسي والناس مشعلينها تحته والماء يغلي وناس عريانه وجالسه في الحوض !!

اول شي برد لو اشيل الجاكيت طلعت مثل ابو الهول
وثاني شي الماء يغلي
وثالث شي الناس مستمتعه !!

اول مره اشوف هالمنظر !!

دخلت ودورت ستيفوووه حبيبي ابو العائلة بسأله وش السالفه لا يجي خبل منهم ويسلقنا في هالقدر ، وحنّا مسلوقين خلقه

قعد يفسر لي ولا فهمت شي بس بعدين قعدت اسأل لين عرفت ان درجة الحرارة في الارتفاع تغلي عند درجة 60 مئويه او اقل يعني ماعليهم الا العافيه اللي في وسط القدر :1076:

المهم !!

ركبنا السياره وطلعنا للتزلج مره ثانية وقعدوا يتزلجون وانا وخويي كالعادة في القرنه حقت الشحاذين لين جاء بعد الظهر ورجعنا لكرايس تشيرج !!

لا أخفيكم أن هذه الأحداث كانت تعيسه وقتها ولكن الآن ذكراها من اروع الذكريات وخصوصاً أنها شيئ غريب عليّ وعلى كثر سفراتي إلا اني لم اواجه ماواجهت !! :113:

في يوم الآحد خرجت مع صاحبي على رجولنا كالعاده للستي سنتر وجلسنا تمشينا وتعرفنا على علي اللبناني ( مشهور كل السعوديين يعرفونه ) :36_11_4: وقعد يتكلم معنا عن المدينة وقال لنا انه اول مره يقابل سعوديين ( هالحين روحوا اسألوه تلقون رزقه على الله ثم السعوديين )

وقعدت لي ساعة ادور لي حلاق للدقن ولا لقيت كلهم يقولون ممنوع الحلاقه بالموس واشتريت اغراضي من الستي سنتر وبعدها عدنا للمنازل ثم النوم استعداداً لإول يوم دراسي !!

:: اليوم الدراسي الأول ::

ذهبنا في الصباح للمعهد بالسيارة مع ستيف عشان يورينا المعهد ودخلنا ولقينا كل المعهد قاعد ينتظرنا !!
اول مره يجيهم سعوديين ويبون يشوفون هالتجار السعوديين يحسبونا بنجيهم بالثياب والمشالح !!
ويوم شافونا قعدو يتساسرووون كنهم مستغربين وخذونا لقاعة تحديد المستوى !!

كانت القاعة تضم 12 طالب جديد كلهم من شرق آسيا ماعدا انا وصاحبي وسويسريه وعطونا الاوراق وقعدنا نخبص فيها !! وبعدها كل من خلص فيه مدرسه تقابله وتتكلم معه عشان تشوف لغته !!

الحمد لله كلغة ومحادثه انا ماعندي مشكله لكن ككتابه الله يخلف حتى اسمي اغلط فيه !!:101:

المهم بعدها اخذونا في جوله داخل المدينه وبدأو يشرحون لنا الاماكن والمرافق المهمه !! واللي تقوم بالرحله بنت مزيونه اسمها هذر بس ياحبها للفلوس :36_1_10: لو اعطس قالت كم بتعطيني واقول لك يرحمك الله فاهم غلط :biggrin:

بعد مارجعنا من الجولة كانو حاطيني في المتوسط والمتوسط ثلاث مستويات كنت انا في الثاني وصاحبي في الاول !!

ياعجم روووقونا ترى راشد الماجد قد قالها قبلكم ( اما هيّ تطلع له والا هو لها ينزل ) يارقوا صاحبي معي والا نزلوني معه قالوا الا انزل معه !! قلت ابركها من ساعه !!

كنّا من زود الثقافه ماخذين فل تايم !! الى اربع العصر والله في ديرتنا ماسويناها واول يوم ملينا بصراحه وقلنا حولنا بير تايم ورانا رحلات وقنص ماجينا نقضي كل اليوم في الدراسه !!

وحولنا ورحنا للبنك وفتحت حساب وكنت صارف 50 الف ريال سعودي دولارات من شافني قال بيهاجر !!
وكان الدولار النيوزلندي يساوي 1.6 ريال ايام عز الريال والحين تعدى الدولار النيوزلندي 3 ريال !!

ومر الاسبوع بسرعه وجاء الويكند !! :1224:

قلنا للمعهد نبي ناخذ اجازه الاسبوع الجاي كله :36_1_14:

مالهم الا اسبوع وبياخذون اجازه ، استغربوا وقالوا ليش قلنا بنروح نترزق الله ووافقت مدام سوزان !!

بحثنا عن مكتب متخصص في القنص لكن مافيه وقالوا لنا ماراح تلقون الا في مدينة كوينز تاون تبعد كم ساعه عن كرايس تشيرج وبالفعل سألنا عن الطيران قالوا احسن لكم بالباص والا سياره !!

قلت لخويي وش رايك نستأجر سيارة وناخذ راحتنا ونشوف الاماكن !! ونتمشى !! ووافقني صاحبي جعله يسلم !!

رحنا لمكاتب التأجير ولقينا انواع السيارات والاجار رخيص مره واستأجرنا اودي موديل 2000 بـ 300 دولار في اليوم وركبنا ومشينا بعد مااخذنا الخرائط !!

كان الطريق في غاية الروعة وحقيقة نيوزلند كطبيعه لا يعلى عليها ابداً !! وضعنا شوي في الطريق وغلطنا في أسم المدينه

المهم مالكم بالطويله وصلنا لكوينز تاون من بكره الصبح بعد مانمنا في الطريق !!

ورحنا للمكتب المخصص للقنص والسفاري !! وكان عنوانهم ماخذينه من كرايستشرج وصبحناهم وقلنا ودنا بالغزلان جعلكم تسلمون ورحبوا بنا وقالوا وش تبغون من الاسلحه وكم العدد اللي بتصيدونه ووش تبغون وسيلة التنقل !!

خابر عندنا مافيه الا الجيوب !! قال لا فيه طيران اذا تبغون بس مكلف شوي !! قلنا له كم قال بكذا والله نسيت كم كان بس تقريباً حوالي 4000 ريال سعودي وتشاورت مع خويي وقلت له وش رايك قال والله انا اخاف بس خلهم يورونا الطياره عشان نتشجع !!:36_1_31:

والله فله !! غزلان وطياره !!

المهم ركبنا مع راعي المكتب وودانا لكراش صغير وورانا الطياره !! :36_1_41:
كانت صغيره مره ويالله تاخذ راكبين بالعافيه ومالها الا مقعد واحد السواق ومقعد جنبة صراحة حاولت ادور صورة لها في الانترنت ولكن مالقيت لكن اقرب شي لحجمها زي اللي بالصورة



المهم رفضنا !!

صراحه العمر مش بعزءه:36_1_26:

رجعنا للمكتب وفي الطريق قعدت احاول في صاحبي نجربها !! ماراح نخسر شي !! والموت واحد في طيارة والا على السرير ومن هالكلام وخويي مسوي مثل الحيان مايرد علي الا مااابي ماااابي وكنه عروس بيزوجونها شايب !!

المهم أقنعته في الأخير وقلنا لصاحب المكتب خلاص تبغى الطيارة !! والحقيقة انه نقد علينا شوي ! مالنا راي محدد ورجعنا للطياره واتفقنا معه واعطيناهم الفلوس !! ورجعنا للمكتب

واخترنا السلاح واخترنا الملابس واخترنا اسرة النوم والخيمة وكل شي وقال لنا خوينا خلاص روحوا للطيارة والانطلاق بعد ساعتين وانا باطلع بالاغرض للمخيم اللي بتنامون فيه !! والوعد في الليل !!

الله يبلشه نخاف تروح بفلوسنا وتخلينا في هالطيارة !!

صراحة كنا خايفين وخصوصاً انهم أخذوا المبلغ كامل !!

المهم رحنا للطيارة وقعد الكابتن ساعة يقرق علينا عن نواحي السلامة ومدة الطيران المسموح بها وكيفية الصيد والاخلاء والنزول وطريقه الحديث معه وبالصور ابو الشباب قاعد يشرح لنا كننا مابعد ركبنا طيارة من قبل

الله يقويك
وش هذا؟؟؟؟
رحلات صيد وقنص في نيو زيلاند لا وبالطيارة بعد
صدق إنك خطيييير
وشي جميل إنك دلعت روحك أيام الرخص وصرت تقل ولد ملوك
وإلا لو إنك صابر إلى سفرتك الأخيرة كان ما سويت ربع اللي سويته قبل 7 سنين
يالله عاد لا تطول علينا ترانا إندمجنا مررررة مع تقريرك الخرافي من ناحية السياحة
(وإلاَ شكله من الناحية التعليمية مهب بنفس القوة!!!)

ما شاء الله عليكم

رحلة صيد أكيد كانت جميله

المشاركة الأصلية كتبت بواسطة حسّاس
http://www.arabtravelersforum.com/tr...8/#post1766578

الله الله عليك

ماشاء الله رائع

ونستحي نقول قدامك اننا رحنا نيوزلندا

لانه بالفعل
انت تتكلم بواقع خبره

بارك الله فيك عزيزي

بالانتظار



أهلا بك حساس

الله يرفع قدرك

وكل واحد منا يحمل الكثير من القصص والأكيد أنها تختلف

الليله سأكمل الحلقة فقط انتظرني

المشاركة الأصلية كتبت بواسطة نوووووف
http://www.arabtravelersforum.com/tr...1/#post1766631

الله يقويك
وش هذا؟؟؟؟
رحلات صيد وقنص في نيو زيلاند لا وبالطيارة بعد
صدق إنك خطيييير
وشي جميل إنك دلعت روحك أيام الرخص وصرت تقل ولد ملوك
وإلا لو إنك صابر إلى سفرتك الأخيرة كان ما سويت ربع اللي سويته قبل 7 سنين
يالله عاد لا تطول علينا ترانا إندمجنا مررررة مع تقريرك الخرافي من ناحية السياحة
(وإلاَ شكله من الناحية التعليمية مهب بنفس القوة!!!)



هلا بك اختي نوف وبمتابعتك

والحمد لله اذا مادلعنا انفسنا وقت الشباب متى ندلعها !!

بالنسبة للناحية التعليمية الحمد لله انا كنت مخطط في رحلتي أن اجلس 6 شهور ولكن مع الوقت مددت الى 9 شهور حتى حصلت على التوفل بالعافية بعد اكثر من 7 اختبارات :24:

الليلة سأكمل لا تبتعدي

تحيتي لك المتابعين

المشاركة الأصلية كتبت بواسطة amassi
http://www.arabtravelersforum.com/tr...6/#post1766376

هلا بالمايستر

ماطلب شي يابعدي

باحمل الصور وبانزلها ان شاء الله ابشر باللي يسرك

بس تبي الحقيقة الظاهر اني اعرفك :114:

تحيتي




كيف طيب :114:

بيننا الخاص :101:

سلموووو على الموضوووع

سجلني أخي العزيز من المتبعين

إبداع وقصة في قمة الروعة والتشويق

وأشكرك على طرح التقرير والله يكثر من أمثالك

ومشكور والله يحفظك

ماشاء الله موضوع شيق فارق كبير عندما تتكلم عن نيوزلندا عام ال2000 وعند عام ال 2007..

لكن متابعين وودي اعرف الفوارق مو بس الفارق التاريخي..

وتحياتي لك اخووي ومتابع.............

المشاركة الأصلية كتبت بواسطة المايسترو
http://www.arabtravelersforum.com/tr...9/#post1766969

كيف طيب :114:

بيننا الخاص :101:



المايسترو

ابشر

بس ترى مو أكيد لإني فهنت هذا من خلال ردودك ومواضيعك

تحيتي لك

المشاركة الأصلية كتبت بواسطة busharaf
http://www.arabtravelersforum.com/tr...8/#post1766998

ما إن انتهينا من تقرير " حساس " الرائع إلا وما شاء الله عليك ، تقرير مشوق وأتوقعه مليء بالمغامرات وذكرنا بأيام عز الريال:110:



Busharaf

الرائع هي عينيك التي ترى كل شي جميلاً

والله يعز مقدارك

لا تغيب كثيراً فالردود مشجعة للكتابه وعدم المتابعة تصيب الانسان بالإحباط

تحيتي لك

المشاركة الأصلية كتبت بواسطة غربة الايام
http://www.arabtravelersforum.com/tr...8/#post1767238

سلموووو على الموضوووع



الله يسلمك غربة الأيام

المشاركة الأصلية كتبت بواسطة دلة رسلان
http://www.arabtravelersforum.com/tr...8/#post1767538

سجلني أخي العزيز من المتبعين

إبداع وقصة في قمة الروعة والتشويق

وأشكرك على طرح التقرير والله يكثر من أمثالك

ومشكور والله يحفظك



دلة رسلام

حي الله راعي الكيف

الشكر لك انت على المتابعه

لا تغب كثيراً

تحيتي لك

المشاركة الأصلية كتبت بواسطة ahmad
http://www.arabtravelersforum.com/tr...2/#post1767972

ماشاء الله موضوع شيق فارق كبير عندما تتكلم عن نيوزلندا عام ال2000 وعند عام ال 2007..

لكن متابعين وودي اعرف الفوارق مو بس الفارق التاريخي..

وتحياتي لك اخووي ومتابع.............



أحمد

اهلا بك

والفارق كبير جداً جداً وهذا ماسأتحدث عنه لاحقاً عند الحديث عن رحلتي الثانية واما الآولى فتابع وستجد الفرق ان كنت ذهبت لنيوزلند من قبل

فقط تابع وستجد مايشفي غليلك

تحيتي لك

بسم الله الرحمن الرحيم

عدنا والعود أحمد !!

:: مدخل ::

القنص في نيوزلندا مجهول بالنسبة لكثير من سكان نيوزلندا وغالب سكان العالم وخصوصاً العالم العربي !!
وهم لا يطلقون عليه قنص وانما رحلة سفاري للمتعة فقط !! ( يعني انسى يعرفون القدر الكاتم ):36_3_9:

بالنسبة للغزلان فلم نرى الا الغزلال الافريقي الصغير ، ونوع آخر كالماعز الجبلي بحجم حمار الوحش ولكن طعمه مش ولا بد !!

وبالنسبة للطيور فيوجد بها كم هائل من الانواع وتفرد نيوزلندا بطائر الكيوي عن بقية بلدان العالم ( ممنوع صيده منعاً باتاً ) وأما البط والوز بإنواعه فحدث ولا حرج من حيث الكثرة والتنوع وسهولة صيده وأن كان ممنوعاً صيده وخصوصاً ماكان في الانهار منه ولكن ليس بذالك التشديد ولكن المهم ان لا يروك وان تصطاده !!

أما بنادق الصيد فمتوفره جداً ( قديما ولا ادري حالياً ) ولكن ماكان مفرداً منها ويمنع الآلي !! والطلقات متوفره وبإنواعها ولكن كل هذا يجب ان يكون بتصريح من المكتب المخصص لرحلات السفاري !!

وسمعت فيما لاحق من شخص شمري اصله من الكويت ومولده نيوزلندا حيث جاء جده لنيوزلندا قديماً على خلاف قضية قتل واقام في بريطانيا ومنها رحل لنيوزلندا وله مركز اجتماعي الآن في العاصمة ولنتون وابناءه غالبه دكاتره جراحة قلب !! سمعت منه أنه قديماً ايام شبابه كان مسموحاً بحمل السلاح داخل ارجاء نيوزلندا وبدون تصريح !!

-------------------------------

:: اليوم الأول ::

بعد الإفطار ركبنا بالتدافع داخل الطائرة وانطلقنا !!

كان الجو وقتها يميل للبروده والطائرة مفتوحه الجوانب والبرد بغى يقطّع قلوبنا وكانت المسافة لإقرب مكان للصيد المسموح به تبعد حوالي ربع ساعه بالطائرة !! وبين تلك الجبال الخضراء هبوطاً وارتفاعاً ورؤية الانهار من علو وصلنا للمكان وكنت اتوقع ان ارى غزلاء شارداً ونصطاده ولكن تفاجأت بوجودها على شكل مجموعات كثيرة جداً قد تصل للـ 200 راس في المجموعة ( يعني مافيه امل تبلش )

انا اصابني الذهول !! وصاحبي يقول خله يوقع يبي الحمام :36_6_3: صراحه منظر الغزلان وهي تفر من صوت الطائرة كان مفزعاً وجميلاً !!

كان الصيد كالتالي !!

نختار الطريده !! ثم يبدأ الطيار يفصلها عن المجموعة حتى تبقى لوحدها ثم نبدأ نلحق بها حتى تتعب ثم يقترب منها حتى نستطيع ضربها بإي شيئ ثم ننزل ونذبحها !! وكان مصرحاً لنا في اليوم كحد اعلى بـ 4 رؤوس سواء اكلناها ام لا فالمسألة عندهم متعه فقد فلا تستغرب حينما يمسك بها ثم تطلق او تقتل ويرحلون عنها !!

توكلنا على الله واختراً ذيك الجفيّر ( الجفيّر = الانثى الصغيره ) وبدأنا بمطاردتها وخوينا من كثر الشهوه قال بيطب عليها ووافق صاحبنا الطيار وبعد ماتعبت قفز عليها صاحبنا وكسر ظهرها الله يهديه !! وذبحناها ووضعناها في المكان المخصص داخل الطائرة ثم تابعنا السير !! بدون صيد فقط نتعجب من كثرتها ونلاحقها ولكن لم نكن نريد صيد اخرى والوقت باقي عليه كثير ونحن اثنين فقط !!

وبعد ساعه طلبنا من الطيار التوقف للراحه وهبطنا في منتصف جبل واطلقنا كم طلقة من السلاح الذي نحمل وبعدها اكملنا للصيد ولكن لم نصطد شيئاً لعدم رغبتنا في قتلها بدون فائدة ثم عدنا للمخيم الساعه الحادية عشر ...

وطبخنا اول غداء صيد !! واكلنا وأكل معنا الحاضرين والطيار ذهب للبلده وواعدنا غداً كالعادة الساعه 8 صباحاً

وبعد العصر ذهبنا على رجولنا وصدنا بطتين باليد :36_6_10: والحقيقة ان بطهم حبيب ولا تعود احد يصيده ورجعنا للمخيم وطبخنا عشانا على البط !!

وفي الغد جاءت الطائرة وذهبنا واصطدنا غزلاً واحداً وعدنا للمخيم والعصر صدنا بطه واحده

وفي اليوم الأخير للرحله طلبنا ان نصطاد النوع الآخ من الغزلان الذي يشبه الماعز الجبلي وبحثنا عنه حوالي ساعه ولم نجد الا قطيع مكون من اربع غزلان منها اثنين صغار وصدنا واحد من الصغار وعندنا وطبخنا غدانا عليها ولم يكن طعمها كطعم سابقاتها ، والعصر بقينا في المخيم !!

وفي اليوم الثالث ركبنا الطائرة وعدنا للمدينة !! بعد رحلة صيد ممتعه للغايه وللاسف لم اكن احمل وقتها كاميراً وندمت اشد الندم على عدم تصوير المنطقه من اعلى !!

واقمنا تلك الليله في كوينز تاون وفي الصباح ذهبنا لكرايس تشيرج مروراً بمدينة دنيدن الجامعيه ووجدنا طلاب سعوديين يدرسون الطب هناك ( مازالت صداقاتنا مستمره الى الآن ) ومنها لكرايس تشيرج !!

--------------------------

أيام دراسية متتاليه !!

عشان مانطول عليكم في القصص كامله فقد استمرت الدراسه تقريباً شهرين متواصله بدون انقطاع !! تعرفنا خلالها على طلاب من جميع الجنسيات وصادقت انا طلاب من البرازيل وخرجت معهم خلال الدراسه للمناطق القريبه من كرايس تشيرج !!

وفي يوم مبارك كان يوم عيد ميلاد اب العائلة ستيف وكان يرغب في السفر لمدينة اكرو بالسيكل :110: كأحتفال بعيد ميلاده ووافقته على الذهاب معه وليتني عقلت ولا رحت معه !!

استمرت الرحلة ذهاباً يوم ونص بغيت افطس فيها كم مره من التعب !! ورجعت انا بالباص ( ابد ماخلى خويه ورجع :24: )

:: مدخل ::

مدينة كرايس تشيرج قديماً

حقيقة وبدون مجاملة متى ماكثر العرب في بلده فقولوا عليها السلام !! فقد كانت المدينة هادئة للغايه لم نرى فيها العربي الا لحظات قليله كالمقيمين فيها من الفلسطينيين والعراقيين واللبنانيين والمصريين واليمنيين
وكانوا ارباب عمل ولا نجدهم كثيراً في المدينة !!

كانت هادئة بما تحمل الكلمة من معنى بالإضافه الى رخص المعيشه فيها فقد كانت العائله تأخذ حوالي 120 ريال في الاسبوع مع الاكل والاقامه والمعهد في الشهر تقريباً 1800ريال وكان المجموع الشهري تقريباً 3000 ريال او يزيد قليلاً

والأهم أنه كان مرحباً بنا للغايه ويتفاخرون في المعهد بإخبار كل زائر او مستفسر بوجود طلاب سعوديين عندهم ، أما الآن فهم يتهربون من اي سعودي بسبب الارهاب !!

في الباصات كان غالب السائقين يعرفوننا !! ويفرحون بركوبنا معهم !! حتى الجاليات المسلمه من الباكستانيين والافغان كل ماعلموا اننا من السعودية يطيرون من الفرح حتى اني اتذكر اني ركبت مع تكسي يسوقه باكستاني وقال لي انه بيجي له مولود ويبغاني اختار له اسم عربي اسلامي سهل اللفظ وقلت له ان شاء الله اذا جاك ابشر وكلمني بعدها بفتره واخترنا له اسم أنس وسماه أنس !!

---------------

في الحقله القادمه !! Amassi موظف داخل المعهد + الرحيل لمدينة ولنتون والدراسه فيها !!

تحيتي لكل المتابعين

[size="5"][color="DarkRed"]والله ياخوي مدري وش اقول وش اخلي


توي قريت تقريرك ( التهاويل ) دفعة وحدة :109:


اقسم لك بالله اني مالقيت كلمة احلا من تهاويل :109:

الله عليك ياغالي
بجد مبدع


عاد صدت بط بايدك
؟؟
هههههههههههههههههه
المشكله بطّهم مايهرب

انا لو مو عيب كان صدت نورس واكلته في السكوير

عموما انتظر التكمله عن ولنغتون
لانها وجهتي حاليا
لدراسة الماستر هناك
فحبيت لو تخصص جزء صغير عنها
عن المحاسن والعيوب
اكون شاكر لك

وأنا أبصم معك ((حقيقة وبدون مجاملة متى ماكثر العرب في بلده فقولوا عليها السلام !!))والله شي يقهر ويحز في النفس
ما أدري ليش وجود العرب يعطي المكان غوغائية
مع ان المفروض إننا نتخلق بأخلاق الإسلام السامية(صدق , أمانة في التعامل , هدوء , نظافة , .......)
بس اللي يصير العكس (ازعاج وعدم احترام للأنظمة وتفاخر و فشخرة ........)
لكن أسأل الكريم بمنه وفضله أن يهدينا ويهدي جميع المسلمين لما يحبه ويرضاه من القول والعمل
وان يجعلنا هداة لغيرنا( آمين)
ــــــــــــــــــــــــــــ
ماعليش ياعزيزي أثرك منت هين ومعاك (التوفل)بعد
واصل فنحن نترقب جديدك.

تقرير في غاية الروعة

ماشاء الله

متابعين ولا تتأخر علينا ..

وينك أخوي العزيز ترى منتظرين

وما تعودنا عليك الإطالة

في الحقله القادمه !! Amassi موظف داخل المعهد + الرحيل لمدينة ولنغتون والدراسه فيها !!

تحيتي لكل المتابعين
---------------------------------------------------------------------------------------------

وييييييييييييييييييييييين الناس يا أماسي؟؟؟؟؟

ترانا متابعيييين وكل يوم ندخل البوابة ندور جديدك
والله إنك منت سهل :موظف داخل المعهد!!!!
أقول : مهاراتك في التشويق :24::24::24::24::24:
الإثارة والتشويق واصلة حدها عندنا فالله يعافيك لا تتأخر علينا..

أخي العزيز أماسي نحن في أنتظار الحلقة القادمة ,,,,, وأتمنى أن لا يطول الإنتظار
أسلوب شيق ومميز ,,,,,,,, تمنياتي لك بالتوفيق

والله يوميا اشيك مرتين الي 3 مررات

احتريك تكمل

خلك نشيط واتلحلح شوي

يا جماعة : الظاهر أماسي يتغلى علينا
رددوا : يالييييييييييييييييل ما أطولك..:whistling

قصة جميلة وذكريات حلوة ، بس كيف تقارن الوضع الآن بالسابق.

عيــــــــــــــــــــــــــــــــــوني
حيـــــــــــــــــــــــــــــــــاتي

ابــــــــــــــــــــــــــــــــــــــــوس راســــــــــــــــــــــــــــــــــــــــــك

كمــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــل

إذا الدعوة فيها بوسة راس كلنا راح نبوس راس أماسي
بـــــــــــــــــــــــــــــــــــــــس يكمل

ألوووووووووووووووووووووو : أماسي ممكن تتعطف وتحن علينا وتكمل لنا التقرير
ويارب يكون المانع خير

السلام عليكم .......

مبدع ماشاء الله عليك .........

اسلووووبك مميز وشيق ............

الله يعطيك العافية على التقرير الرائع ...........

وفي انتظارك ............






تحياتي

الله يعطيك العافيه تقرير رائع ونا احد المتابعين و المستمتعين واصل واحنا معاك

الله يعطيك العافية

من جد تقرير جميل

يارجال مواقف من جد تفطس من الضحك


المهم انا بانتظارك خاصة اني اروز براسي فكرة السفر ل نيوزلندا هاليومين .


ومارأيك باللي وده يسافر بالفترة الحالية؟


واسف على الاطالة

السلام عليكم ورحمة الله وبركاته

أول شيئ أعتذر منكم لإني سافرت لمصر ولا رجعت الا البارح

وثاني شي صبركم علي وان شاء الله اكمل الموضوع

فقط فاصل ونواصل

المشاركة الأصلية كتبت بواسطة واخاسيدي
http://www.arabtravelersforum.com/tr...1/#post1768131

[size="5"][color="DarkRed"]والله ياخوي مدري وش اقول وش اخلي
توي قريت تقريرك ( التهاويل ) دفعة وحدة :109:
اقسم لك بالله اني مالقيت كلمة احلا من تهاويل :109:



اخاف اني ولد عمك لان اسمي سعد :114:

شكراً لك على المتابعة

المشاركة الأصلية كتبت بواسطة نوووووف
http://www.arabtravelersforum.com/tr...4/#post1768524

وأنا أبصم معك ((حقيقة وبدون مجاملة متى ماكثر العرب في بلده فقولوا عليها السلام !!))والله شي يقهر ويحز في النفس
ما أدري ليش وجود العرب يعطي المكان غوغائية
مع ان المفروض إننا نتخلق بأخلاق الإسلام السامية(صدق , أمانة في التعامل , هدوء , نظافة , .......)
بس اللي يصير العكس (ازعاج وعدم احترام للأنظمة وتفاخر و فشخرة ........)
لكن أسأل الكريم بمنه وفضله أن يهدينا ويهدي جميع المسلمين لما يحبه ويرضاه من القول والعمل
وان يجعلنا هداة لغيرنا( آمين)
ــــــــــــــــــــــــــــ
ماعليش ياعزيزي أثرك منت هين ومعاك (التوفل)بعد
واصل فنحن نترقب جديدك.



نوووف

شكراً لهذا الحضور الجميل

وحتى لا نجحف فهناك عرب وسعوديين على وجه الخصوص يشرفون !!

تعرفت على الكثير منهم واشهد بالله انهم شرف لنا بإخلاقهم وتعامله ومصداقيتهم

ولكن الأمر لا يخلوا من بعض المراهقين وبعض الشاذين ولنعتبر ان غلطة الواحد تمسح محاسن الجميع

فقط تابعي

المشاركة الأصلية كتبت بواسطة تأبر تسبدي
http://www.arabtravelersforum.com/tr...8/#post1773118

تقرير في غاية الروعة

ماشاء الله

متابعين ولا تتأخر علينا ..



ابشر ياللبناني :109: خلك متابع وان شاء الله خير

الله يعطيك العافيه على الحضور الجميل

المشاركة الأصلية كتبت بواسطة دلة رسلان
http://www.arabtravelersforum.com/tr...7/#post1774057

وينك أخوي العزيز ترى منتظرين

وما تعودنا عليك الإطالة



اهلا دلة رسلان والمعذره على التأخير

كنت مسافر ولا رجعت الا البارح

شكراً لك ولمتابعتك

المشاركة الأصلية كتبت بواسطة نوووووف
http://www.arabtravelersforum.com/tr...3/#post1777503

في الحقله القادمه !! Amassi موظف داخل المعهد + الرحيل لمدينة ولنغتون والدراسه فيها !!

تحيتي لكل المتابعين
---------------------------------------------------------------------------------------------

وييييييييييييييييييييييين الناس يا أماسي؟؟؟؟؟

ترانا متابعيييين وكل يوم ندخل البوابة ندور جديدك
والله إنك منت سهل :موظف داخل المعهد!!!!
أقول : مهاراتك في التشويق :24::24::24::24::24:
الإثارة والتشويق واصلة حدها عندنا فالله يعافيك لا تتأخر علينا..



ختي نوووف

ابشري فقد عدنا وان شاء الله مانتأخر عليكم

المشاركة الأصلية كتبت بواسطة awad_77
http://www.arabtravelersforum.com/tr...5/#post1777815

أخي العزيز أماسي نحن في أنتظار الحلقة القادمة ,,,,, وأتمنى أن لا يطول الإنتظار
أسلوب شيق ومميز ,,,,,,,, تمنياتي لك بالتوفيق



اهلا بك عزيزي

والمعذره على التأخير

فقط تابع وستجد مايسرك

الجميع الآن سنكمل ان شاء الله دام فيه بوس روس معك للفجر

فقط تابعوا

في الحقله القادمه !! Amassi موظف داخل المعهد + الرحيل لمدينة ولنغتون والدراسه فيها !!

عدنا والعود شايب

بسم الله الرحمن الرحيم

مقدمة !!

كان المعهد الذي درسنا فيها في غاية الهدوء وقد كونت صداقات جميله للغايه مازال التواصل بيننا الى الآن !! :24:

قد عرفنا غالب الطلاب والطالبات والمدرسين والمدرسات ولا عجب ان رأيتنا نمشي في ممرات المعهد والكل يمازحنا ، فقد بنينا هذه الثقة وهذه الصداقات عبر المشاركة الفعالة في نشاطات المعهد الخارجية ( الا صفيّه ) فكل رحله تجدوننا الآوائل وبحكم أن اغلب الطلاب كانو دون العشرين وكان صاحبي هو اكبر الطلاب سننا وانا الذي يليه فقد نلنا اعجاب الادارة في المعهد حتى اننا كانوا يرسلوننا مع اي نشاط يخرج ونمسك زمام الامور هناك !! :115:

----------

الموضوع !!

استمر الحال قرابه ثلاثة اشهر تقريباً وخلال الفترة جاءنا ثلاث طلاب سعوديين ولا ادري عن السبب !!
فقد خلى المعهد من الطلاب السعوديين طيلة السنوات الماضية والظاهر انهم يراسلون المعاهد ويقول لهم المعهد أن عندنا طلاب سعوديين ويتشجعون !!

المهم كانوا ثلاثه

الأول اسمه عبدالعزيز وله قصة غريبة عجيبة !!

جاء مع والده وعمه لنيوزلندا والولد عمره صغير كان يدرس في ثاني متوسط يمكن 12 سنه او 13 سنه وسجلوا جميعاً في المعهد وبإتفاق مع المعهد كان تسجيل الاب والعم صوري ليخفوا على المسكين ماسيفعلون !!:112:

وفي صباح يوم من الايام خرج الابن المسكين للمعهد ليجد ابوه وعمه سافرا وتركوه وحيداً !!
انا لم اكن موجوداً وقتها ولا شفت ابوه وعمه !! لكن قالوا لي بعدين انهم سافروا وقتها تغيبت عن المعهد لمده ثلاث ايام بسبب التواء في القدم بعد لعب الكوره وبعد ماجيت للمعهد نادتني مدام سوزان ( مديرة المعهد ) وقالت لي فيه طالب سعودي جاي وهذي قصته والولد حالته النفسيه سيئة ومادرس ويبغى يرجع لبلده !!
وكانت ادارة المعهد ارسلت له مجموعه من المدرسين ليحاولوا فيه للدراسه ولكن الولد يبكي ويرفضض ويسب ويشتم والده !! :108:

اخبرتني سوزان وقلت لها يصير خير عطيني عنوانه وباروح له بعد الدراسه واشوف وش فيه !!
العصر ركبت الباص بعكازاتي ورحت لبيت عائلته ولقيت ابن الحلال جالس في غرفته وحاولت ربة المنزل ان تطلب منه ان يستقبلني ولكنه مايفهم وش يقولون مقفل على نفسه ورافض !!
قلت لها خليه علي مايعرف لعريبيا الا اهلها
ودخلت وناديته ويم سمع حس عربي طمر وفتح الباب !!
تكلمت معه كثيراً وقلت له انا ابوك هنا واي شيئ تحتاجه اطلبه مني وترى اهلك ماسوو معك كذا الا عشان مصلحتك لكن من جد استغربت حقده على والده لدرجة انه يلعنه قدامي !!

وبعد محاولات اقتنع الرجال يطلع معي وطلعنا وتعشينا سوا ورجعته للبيت والصبح مريته وراح معي للمعهد !!
بعدها طلبت مني سوزان العمل في المعهد على حسب الحاجه والساعه بـ 20 دولار ووافقت !!:x1:

عزوز ماارتاح جلس شهر وشانت حالته النفسيه واتصلت بوالده وتكلمت معه ورجع ابن الحلال للسعوديه بعد حوالي شهر واسبوعين !!

هذا بالنسبة للاول

---

الثاني كان اكبر من عزيز شوي لكن مشكلته انه مريض ( عنده البنكرياس متعطل ) ويضرب ابر انسلوين كل يوم اكثر من 10 مرات وكل ويك اند يروح يبزوط في البارات وينصرع عليهم وبلشنا به كثير !! وبالفعل اتصلنا بوالده بمساعدة ادارة المعهد ورجع !!

---

الثالث كبير شوي وحاذف ترم من قسم اللغة الانجليزيه بجامعه الملك عبدالعزيز وجاي يقوي لغته وبالفعل رجال عاقل ومحترم جلس معنا ثلاث شهور ورجع الله يستر عليه

---

بعد أن استشربت حياة كرايس تشيرج وعرفت أهلها وطلابها رغبت في تغيير الوجهه لتكملة الدراسه وفكرت في كذا مدينه ... اوكلند - هميلتون - كوينز ... الخ ولم يخطر ببالي ولنتون العاصمة نظراً لكلام البعض عن افتقارها للسياحة التي تهمني اكثر من الدراسة ...

وفي يوم مبارك :106: لقيت عربي يمني من طلاب مواليد جده يسكن في ولنتون وسألته ومدحها لي وقررت الذهاب للدراسه فيها !! وحاولت مع صاحبي ولكنه رفض الذهاب وقرر البقاء في كرايستشيرج

وتكلمت مع المعهد بشأن رغبتي وكانت هناك معارضات من ادارة المعهد ولكني اصريت على الرحيل فقرروا ان يتم تسليمي شهادتي خلال دراستي السابقة عندهم في يوم الجمعه ( آخر يوم دراسي في الاسبوع )

ومن عادة المعهد أنه كل جمعه تسلم الشهادات على الطلاب وطلبوا مني كلمه كما يفعل كل من ينتهي من دراسته ووافقت !!

وفي يوم الجمعه ذهبت للصلاة بالثوب والغتره والعقال ومن المسجد للمعهد مباشرة !! لان الحفل يبدأ الساعه 2 ظهراً !!:105:

يوم شافوني بالثوب انهبلوا واستغربوا وصوروا معي !! وبدأ الحفل وحينما جاء دوري تكلمت عن بلادي الحبيبه وعن ديني الحنيف وعن المدة التي قضيتها معهم وعن اساتذتي وسلموني شهادتي وانتهى الحفل والغريب ان فيه طالب تايلاندي معرفتي معه سطحية فقط زمالة جاء يسلم علي وقعد يبكي !! :110:

والله يالربع مابيني وبينه اي شيئ الا اني اسلم عليه وامزح معه كل صبح !!

وبالفعل ذهبت للخطوط وحجزت على رحلة يوم الاحد لولنتون !! واقمت باقي المده اجهز اغراضي واودع احبابي !!

----------

كشكول !!

1 - كرايستشرج انا اعتبرها المدينة الافضل للراغبين في الهدوء والدراسه ، ففيها كل مايتمنى الباحث عن العلم من هدوء وطيبة وكل المستلزمات الضرورية للعيش بسكون !!

2 - بفضل الله ودعت كرايستشرج والجميع يرغب في بقاءي وذالك بالتعامل الجيد مع الجميع والصدق في المعاملة وأن يراقب الانسان ربه قبل ان يراقب الناس !! ولا انسى وداع العائلة لي وحتى اطفالهم مما حفزني على الاستمرار على هذا النهج الذي يرضي ربنا أولاً ثم يرضي خلقه والانسان تكون له نزوات وشهوات ولكن متى مافكر الإنسان أنه في ارض الله في السعودية او في نيوزلنداً وأنه واجهه لبلدة ودينه فقد يتنازل عن شهواته لتحقيق اهدافه !!

3 - خلال أقامتي مع العائله كانت تأتينا طالبه في الجامعه تدرس اطفال العائلة كل ثلاثاء كانت علاقتي معها جيدة جداً حتى علمت انها اسرائيليه جاءت للدراسة وتعمل حتى تستطيع اكمال دراستها فتغيرت علاقتي معها كثيراً وتكلمت معي ووضحت لي انه ليس كل اسرائيلي يعتبر شاروني ... ولكن مافي القلب صعب ان يتغير بكلمات !!

سياحيات !!

1 - كرايس تشسرج مدينه سياحية وهادئة والاجمل ان ضواحيها تضاهيها بالجمال !! فخصص وقتاً من رحلتك بالخروج للضواحي والحدائق القريبة من المدينة كحديقه سبانسر بارك ومدينة اكروا وغيرها ولا تنسى الصعود لمنطقة كشمير والجبال المحيطه بها .

2 - لا تنسى ان تركب المراكب للتجديف وقضاء يوم في الاسبوع فيها والتجول من خلال النهر على المدينه .

3 - لا تنسى ان تخصص من وقتك اياماً للذهاب لمنطقه نيوبرايتن والاستمتاع بالبحر وبالحصون القريبه على البحر .

4 - لا تنسى الذهاب للمدينه اللي يتكلم اهلها الفرنسيه ( نسيت اسمها ) وهي مستعمرة فرنسية داخل نيوزلنداً قبل الاستقلال من بريطانياً ولكن الى الآن اللغة الرسمية فيها الفرنسية !!

5 - لا تنسى ان تزور مدينه كوينز تاون ودنيدن والاستمتاع فيهما !!

هذا مايحضرني الآن

شكلي طولت عليكم !!

الحلقة القادمة هي المحك وفيها !!

الوصول لولنتون + اجمل رحلة قضيتها في حياتي وبالباخرة الى دولة فيجي

والمعذرة على الاخطاء الاملائية ان وجدت

فاصل ونواصل:x1:

أخيراً يا أماسي طليت علينا وعلمتنا كيف توظفت في المعهد
أشد على يدك من حيث تمسكك واعتزازك بدينك,, واستمتاعك بوقتك
بما يرضي الله ويرضيك وشمولك لمنطقتك من الناحية السياحية..
لكن تعال : وش سالفة عزوز الصغير ؟؟معقولة عمره 12 وأهله يخلونه؟؟
تكفى لا تطول علينا بجزء ولنغتون ترانا كل يوم ندخل الموضوع نبحث عن جديدك...

amassi اين انت يا اخي طولت علينا
حبيت اسالك عن ثقافة العائلة النيوزيلاندية في البيت
ما هي الاكلات المحلية عندهم ومتى يستيقضون من النوم
في الاجازة يعني هل هم مثل بعضنا يستيقضون الظهر
وكيف تعاملهم مع ابنائهم هل برفع الصوت والشتم مثل ما يفعله
بعضنا هنا انا اتوقع انهم ارقى بكثير مننا ارجو اني ما كثرت عليك
ولك مني المودة والاحترام .ولي عودة معك

بعد فترة طويلة عاد إلينا " أماسي " بتقرير وانطباع عن كراستشرش ، شكرا لك وبارك الله فيك.

[QUOTE][/في الحقله القادمه !! Amassi موظف داخل المعهد + الرحيل لمدينة ولنغتون والدراسه فيها !!
QUOTE]
amassi اين انت تأخرت علينا كثير عسى المانع خير

في الحقله القادمه !! Amassi موظف داخل المعهد + الرحيل لمدينة ولنغتون والدراسه فيها !!



amassi اين انت تأخرت علينا كثير عسى المانع خير

[QUOTE][في الحقله القادمه !! Amassi موظف داخل المعهد + الرحيل لمدينة ولنغتون والدراسه فيها !!
/QUOTE] اين انت amassi تأخرت كثير