الموضوع: استفسار تكفووون لا تردوني

السلام عليكم ورحمة الله وبركاته

اخواني و اخواتي كنت مقرره السفر لماليزيا في العيد ولكن قدر الله الحمل وانا انتظره من سنتين

اسأل الله ان يثبته ويتممه بالعافيه والصحه ويرزقني وكل محرومه الذرية الصالحة السليمة البارة المعافاة

قولوا اميييييييييييييييييييين

وبما انه اول حمل لي نصحتني الدكتوره بعدم السفر لأن الرحلة لماليزيا طويله متعبه

ولذلك قررت أن أسأل مساعدتكم في اختيار المكان القريب المناسب للسعودية من الدول الخليجية
لأن جدا محتاااااجة لتغيير جو بما إني مازلت اداوم وبداوم في رمضان لازم اغير جو في العيد ومتحسفه على روحة
لكن الله يعوضنا خير

فزعتكم واقتراحاتكم





لا تبطون علي وترى المدة اسبوع ونص او بالكثير اسبوعين في فترة العيد ومابعده

مواضيع عشوائيه ممكن تكون تعجبك اخترناها لك:

• استشارة لأهل السفر للبحرين والزوار
• يااخوان بخصوص الفيزا
• ملايين سائح زاروا البحرين العام الماضي
• أفضل صالون حلاقــة
• افتتاح المعرض الدولي للسياحة العلاجية بالبحرين
• اول مره في البحرين وابي مساعدتكم
• أعجب و ألذ هامبرجر يفتح في البحرين قبل أي دولة خليجية يممممم
• سؤوواال ؟وانا محرجة منكم؟
• منتجع وسبا قصر العرين
• نداء الى اهل الخليج انشالله بروح البحرين وبقعد فيها أيام ارجوكم ساعدوني
• يومان ومجهولان
• الى كل ام بحرينيه
• ساعدوني يا اهل البحرين
• ما ابي اتورط ارجو المساعده البيسان تاور
• من يساعدني برنامج لمده يومين بالبحرين انا وزوجتي
• مسجد الفاتح
• ابي شليهات
• يااهل الخبره والتجربه من الافضل والارقى منتجع البندر او نوفيتيل الدانه ؟
• ابي فزعتكم يا شباب
• فندق او شقق فندقية للعوايل في منطقة السيف

ههههههههههه اي والله الرحله الى مالزيا وايد تعب

انه طالب هناك ودايم اعاني في روحتي وجيتي خخخخخ

والله اختي مادري شاقولج ان قلت البحرين بتقولين مغرور

وان قلت الامارات بتقولين محايد فـ احسن شي جوفي بعينج الاقسام والصور

وسالي للي راح البحرين او اي مكان غير شوفي شنو يقول

بما انج سالتي عن البحرين

انه بالنسبه لي البحرين احلى من ماليزيا بمليون مره لانها ديرتي وانا بعيد عنها

و البحرين حلوه فيها مناطق سياحيه كثيره والاهم من كل هااي امان وشعبها طيب

والربع بهلمنتدى ماراح يقصرون معاج بشي

تحياتي

هلا فيك يالغاليه ,,,
الله يرزقك بولد قمر او عروسه صغيرونه (في النهايه كل شي نصيب )
البحرين يالغاليه فيها منتجعات كثير حلوه بس الصراحه غاليه
والبحرين من وجه نظري حقت يومين وبالكثير ثلاثه ايام
ماهي حقت اسبوع او اكثر

السلام عليكم ورحمة الله وبركاته

الف شكر على ردودكم ماقصرتوا

بس اتمنى القى تفاعل وتوضيح اكثر او خطه مدتها اسبوع موزعه بالمولات والاماكن والمطاعم


ومشكووووورين ماقصرتوااا

مرحبا فيج أختي ... والله يتمم لج على خير .. ويقومج بالسلامة...

طبعا البحرين فيها العديدي من الأنشطة والأماكن اللي ممكن تزورينها ... والدليل السياحي فيه كم هاااائل من الأماكن والمطاعم والأنشطة السياحية العديدة .... ممكن تتطلعين على الدليل وتستفيدين منه ...

وهذي برنامج عالسريع .. قديم ومعدل تم اقتراحه لإحدى الأخوات من فترة ... ممكن تستفيدين منه بعد ..


نبتدي بسم الله الرحمن الرحيم....
اليوم الأول : بيكون إن شاء الله وصولكم بالسلامة من الكويت .. أنا افترضت انكم بتوصلون العصر ... يعني على بال ما تاخذون السيارة من المطار وتوصلون شققكم في الجفير ... بيكون الوقت عقب المغرب ...
طبعا تصلون وترتاحون شوي .. بعدها ... تطلعون في شارع المطاعم في الجفير ... وفيه سوبر ماركت كبير اسمه (ميغا مارت) .. اكيد محتاجين شوية أغراض للشقة ... تختارون لكم مطعم حلو من هالمطاعم وتتعشون فيه .. أو تاخذونه البيت ..
لو حبيتوا مطاعم ثانية .. عندكم منطقة العدليه ... غاصة بالمطاعم طبوا وتخيروا ... أو ممكن تروحون كورنيش شارع الملك فيصل .. اللي جنب جامع الفاتح .. فيه هناك مطعم اسمه CORAL BEACH .. قعدته حلوه وأكله حلو ... يطل على البحر .. ممكن تقضون سهرتكم هناك ... وفيه في هالمنطقة بعد مكان ألعاب للأطفال .. بيفرحون فيها ....
بعدها الرجوع للبيت .. والنوم ...

اليوم الثاني: بعد ما تصبحون بالخير ان شاء الله ... تتريقون ... وأقترح عليكم تزورون متحف البحرين الوطني ... فيه شغلات حلوه .. ومفيده تاريخيا ... بعد المتحف .. تروحون تتغدون في مطعم الصواني اللي جنب المتحف ... هو مطعم يقدم اكلات شعبية بحرينية .. بس أسعاره شوي غالية .... لكن اكله حلو ..
العصر ..أقترح تروحون مجمع اللؤلؤ في وسط المنامة ... بتلقون فيه جلابيات وشيلات .. واكسسوارات .. هو مجمع نوعا ما شعبي ...
وعقب ما تخلصون منه ... جنبه فيه محلات رامز .. أشوف أهل الكويت يحبونه وايد ... انا عن نفسي احب اروح له واتمشى .. مواعين ودلال وفناجين واستكانات .. أشكال والوان .. وكله بدينار! ... يعني تسوق على خفيف ...
ممكن بعد ما تخلصون .. إذا ما تعبتوا ...تروحون المارينا مول .. وهذا جنبهم على طول ... هذا فيه HOME CENTRE . وسبلاش وشوية محلات ثياب لكل الأعمار ...
بعدها تاخذون لكم عشا خفيف مثل: شاورما من شاورما اكسبرس .. موجوده في الجفير ... وترحون تتعشون بالبيت وتريحون ... وحرية الاختيار متروكة لكم ..

اليوم الثالث: بعد ما تتريقون ... تتوكلون على الله وتروحون محمية العرين ... مثل ما انتوا مخططين ... تقضون الصبح هناك ...
بعد ما تخلصون من العرين ... تنزلون الرفاع ... فيه مجمع اسمه THE CENTRE مجمع حلو وهادي ... ممكن تتغدون هناك .. تتسوقن لو حبيتوا ... فيه محلات مثل كمايو .. ألدو الاكسسوارات .. الخ ... يعني بتلقونهم بعد في السيف هالمحلات ..
لو حبيتوا بعد ما تخلصون من المجمع تروحون سوق الرفاع ... أو شارع البوكوارة .. دامكم في الرفاع ... بعد حلو .. سوق الرفاع شعبي .. مثل سوق المحرق ... بس المحرق فيه خيارات أكثر .. وأسعاره احلى ...
بعدها الرجوع للبيت ... والعشا مثل ما تحبون ..

اليوم الرابع : اشرايكم تتريقون برا اليوم (للتغيير) ... مثلا ستاربكس .. أو عندكم محلات الفاست فود اللي حواليكم عندهم ريوق ... حتى chilis اللي هناك عنده ريوق ...
بعد الريوق ... أقترح عليكم تروحون معرض الأسر المنتجة ... هذي الله يسلمج موجود في منطقة كرباباد (منطقة مقابلة التوسعة الجديدة لمجمع السيف) .. مبنى كبير لون بيج ... ومحطوطه اللافته عليه ... هذا بتلقون عنده الأشيا اللي تسويها بعض الأسر البحرينية ...مثال: ( بخور – بهارات – مخللات – بعض الملابس للأطفال – مصنوعات خشبية ... الخ) .. أشياء وايد حلوة ...
بعد ما تطلعون ... روحوا مجمع البحرين (جيان هايبر ماركت) ... تغدوا هناك ... وفيه شوية محلات لو حبيتوا ... وممكن تتمشون في جيان (هايبر ماركت) عشان بكرة ...
أو ممكن تروحون مجمع الدانة .. قريب عليه .. هناك فيه ألعاب شاكازولو لليهال ...وفيه (لولو هايبر ماركت) .. مثل جيان .. بس أجدد ... ممكن تتقضون منه الأغراض... وفيه ساحة للمطاعم ...
وهني ...تركت لكم فترة المغرب مفتوحة .. ممكن تروحون أي مكان .. تفترون .. أو تتعشون ... أو ممكن تتمشون في سوق المنامة لو حبيتوا ... يعني على راحتكم ..

اليوم الخامس واليوم السادس: بافتراض انهم الأيام الأخيرة قبل السفر... تروحون المجمعات: السيف . الستي سنتر .. مودامول ... هناك عاد ما يحتاج أقول لج ... تقضون يومكم هناك .. غدا .. تسوق .. سينما .. ألعاب أطفال ... قهاوي ... واقترح عليكم تتغدون او تتعشون في المطعم الايطالي اللي جنب الحواج .. البيتزا جدا لذيذة .. على طريقة إيطاليا ..
وممكن بعدها تروحون العالي ... هناك بعد شوية محلات (أرقى) خاصة في التوسعة الجديدة ... وفي الطابق الأخير .. فيه ألعاب للأطفال Mariam Land .. وممكن تتعشون في المطعم الايراني اللي هناك ... اكلوا من عنده تكة .. وشربوا شاي بالنعناع ...

اليوم السابع : لو كان سفركم في الليل .. أقترح عليكم تروحون سوق المحرق ... وتتسوقون هناك على كيفكم ... وطبعا ما تنسون الحلوى البحرينية .. والسمبوسة الحلوة ... لاااازم ... وبعدها تتوكلون على الله ... وتسافرون بالسلامة ان شاء الله ....
لو ما كفاكم الوقت .. وكان سفركم الصبح ... ممكن تروحون في اليوم الرابع ...
سامحيني أختي على أي تقصير .... بس حاولت أغطي لج أكثر المناطق ... وأنوع لكم ...

وأي مساعدة ثانية حنا حاضرين لج .

روحي مكه وجده
او البحرين