الموضوع: جولاتنا في صيف البحرين

السلام عليكم ..

هذا المنتدى جدا رائع وحبيته من كل قلبي لانه حسيت ان كل واحد يخدم الثاني من دون مقابل بروح اخوة ومحبة صافية للتعاون ..

وخلوني اول شئ اشكر كل المشرفين والاعضاء الفعالين في بوابة البحرين لانهم بكل صراحه عسل على القلب يخدمون بتفاني ويساعدون بكل طيبة لكل الاعضاء ..

ولاننا هالسنة ما قدرنا نسافر ... فكنت حابه اقدم شئ للمنتدى اللي استفدت منه الكثير .. ويمكن غيري يستفيد منه ..
المناسبة اللي صارت ان اهلي واهل زوجي كلهم سافرو مرة وحده خلال هالفترة وما تم احد منهم الا البعض .. فكنت احس بالملل والطفش وكل انواع الاحباط .. لان هالاجازة ظروفنا ما تسمح للسفر بسبب بناء والانتقال لبيت جديد ..

فقررت ان اضع برنامج لطول الفترة اللي اهم مسافرين فيها ... وهي مدة 20 يوم تقريبا .. بتسألوني اللحين البحرين كلها نفرها في يوم واحد او نص يوم وانتي مسويه رحلات وجولات لمدة 20 يوم ؟؟؟؟ تحسونها صعبه ؟ تعالو ويانا شوفو الرحلات والجولات اللي بنروحها ..

وهاالصورة تجربه :114: لان التحميل من المنتدى طفشني ومو عارفة الطريقة ؟:112:

مواضيع عشوائيه ممكن تكون تعجبك اخترناها لك:

• مطعم زعفران
• افضل فندق يملك حمام سباحه
• تأجير سيارات في البحرين
• الله على الطيبيين
• الخطوط الوطنية الكويتية تلغي رحلاتها الى المنامة
• رايكم في فندق انترناشونال البحرين
• مقهى انترنت
• الدشاديش المطرزة
• ابغى معلومات عن اسواق البحرين
• هل يوجد دايت سنتر في البحرين
• الدانة نوفوتيل أين يقع؟؟
• أسئلة عن البحرين ردوا عليها جميعا
• شقق وفنادق نظيفة للشباب في البحرين
• مساعدتكم باأهل البحرين
• المنامة عاصمة السياحة العربية لعام
• يا اهل البحرين اسعفوني
• منتجع العرين في الشتاء
• عااااااااجل جدااااااااا
• عاجل اين اجد المسابح الخاصه بالبحرين
• مساعدة

سين سؤال ؟
الصورة طالعه عندكم ولا عيوني يتهيأ لها ؟

الصورة واااضحة
منتظر البقية,,,,موفقة

اهلا بك الحامد 22 انت اول واحد يرد على موضوعي ويشجعني هههه لك هدية ..
شكرا لك و تابعنا ...

بنتظارك وانا لاتنسين هديتي :d

سعود .. اهلا بك بس انت جيت متأخر ما لك هدية بس اول واحد يرد على الموضوع .. كككك .. رد يحطم خخخ

انتظروووني قاعده احمل الصور .. والتحميل بطيئ ..

وعليكم السلام ورحمة الله وبركاته
ع قووولتج البحرين ما يبالها غييييييير فره وحده وانتي قاعدع 20 يوووووووم
بس شكله التقرير دسم والحمدالله لحقت علييييييييييه
ان شاء الله لحق ع الصور قبل ما اسير الدوووووام

بدايه موفقه الغالية

مـــلاك

الصوره طالعه وما يتهيأ لك
بس اشوفك متفننه وراسمه فيسات وسمايلات مثل الماسه :109:
منتظرين التقرير ..

ربووووش ..
ان شاء الله تلحق عليه للنهاية ؟... والله شكلي مع هالتحميل البطيء بكمل شهر وانا احمل الحلقات ؟ بيجينا العيد ولا كملنا مسلسل رمضان ؟؟
تابعنا وحياك الله .. وشوف وش سوينا بهالعشرين يوم ؟

كوكو .. يا هلا ويا مرحبا بك ..
اي اقلد عليها هههههه لا والله ابو الشباب حالف علي ما تنزلين صورنا الا وشخبطه على كل شي لا يد ولا حتى صبع واحد ؟ وامرنا لله طلعنا الفن المستخبي خخخخ

اعذروني اذا تأخرت عليكم لان هاذي اول مرة اسوي تقرير ومسلسل رمضاني يعني ببدع وياكم وبطلع الهاويل وتحملوووني :106: لان ما عندي خبرة في التحميل عن طريق المنتدى واحسه بطئ اشويه ..

نبدأ بسم الله ......

يوم الثلاثاء تاريخ 21-7-2009م ..

اول شئ الصبح قعدنا من الساعه 9 نوصل الاهل المطار ... وعقب الوداع والحسرة .... واحنا نشوف الطائرات تطير وناس جاية من السفر وناس بتسافر .... يعني المنظر عجيب واحنا نراقب الناس ونتفرج هههههههه ..
فطريق الرجعه وانا اشوف اعلانات الصيف والعروض وووالخ من هني جتني فكرة توثيق التقرير وكتابته في المنتدى ..

برنامجنا اليوم بدأ من الساعه 4:30 ... الى الساعه 11:30 ... مساءا..

هاذي صورة من الطريق .. السيارة تمشي بسرعه وما التقطها عدل ..


اول شئ قلنا بنروح بيت القران ..لان موعد اغلاقه عالساعه 6 ..
لقيناه مغلق للصيانه لمدة شهر كامل من 1-7 الى 1-8-2009 ..

طلعنا على متحف البحرين الوطني ..

واحنا داخلين المتحف نسمع صوت صفارات للشرطة وانا تخرعت طالعت وراي واشوف موتر سيكل المرور جاي بسرعه ووراه وفد انجليزي بودي قارد طول بعرض الا واحد عجيز انجليزي كلهم ملتمين عليه يصافحونه ؟هههه .. ومن لكنتهم بعدين عرفنا انهم من بريطانيا ..
وكان المتحف فيه ناس كثير سعوديين واجانب وبحرينين ..
اخذنا تذكرة للدخول الشخص ب 500 فلس .. والاطفال مجانا ..
والحلو في التذكرة ان فيها فيها صورة من المعروضات للمتحف للذكرى او تقدر ترسلها لاي احد ..


دخلنا وهاذي اول صورة لولدي جنب اعلان الفعاليات لمهرجان الصيف وهو مستانس بصورة بارني ..


مشينا وشفنا هالباب القديم الحلو وانا احب الاشياء القديمة .. صورتهم قدامه..


وجنبه اول سيارة لحاكم البحرين ..


شوفو هالتحفة العججيبة رووووووعه عالطبيعه احب انا التماثيل والتحف المنحوته .. ..


بعدها دخلنا الى قاعه دلمون ...
وفيها اكثر شئ الاختام الدلمونية القديمة و نماذج مصغرة للقلاع .. والاواني الفخارية .. وصورت لكم هاللقطات الحلوة ..








عجبتني هاللوحتين ..



وهاذي صورة تمثال في الممر .. روووعه .. ولدي قعد عليه علباله حصان ؟

يا زينهم بس عيال الانجليز يمشون جنب اهاليهم واذا بيسوي شطانه قام يأشر بصبعه ؟:110:

دخلنا الى المقابر والمدافن الدلمونية ..
طبعا زوجي كل ما وصل لشئ قعد يقرأه وانا ما لي بارض اصور وادور بسرعه وابي اطلع خخخخ ..
بس ولدي هالقاعه تولع واغرم فيها عدل تدرون ليش .... تعالو شوفو الصور ..


شوفو هالجرات من بره ..


وشوفو هالجرات من داخل .. هههههه



شوفوه واقف شنو يطالع يا تررررررررررررى ؟


شوفو داخل وش فيه .....؟


هاذي اكثر قاعه حبها لوجود الهياكل العظمية في القبور ؟ وهو يركض ويقول ابي اشوف الميتين ؟ وين بعد ميت ؟ هاذي عظمة وين ؟ وانا اشرح له هاذي عظمة الراس وهاذي عظمة الصبع ووووو ... والا شرطي من الوفد البريطاني يقولي راووويه فوق في تله تركب لها بدرج هههههه وهم يضحكون عليه .. رحنا فوق كم عتبه وشفنا هالتله .. وفيها...

شوفو صور المدافن عالحقيقة ...


وهالفترينه استانس عليها وهو يشوف عظام الميتين ؟ خخخخخخخ


عقب شد ولدي وجره من المدافن ههههههه رحنا فوق الطابق الثاني ..


وفي قاعه العصر الاسلامي واخذنا فيها هالصور ...







بعدين رحنا لقاعه العادات والتقاليد ..
وكانت من احلى القاعات ...عندي ..
وفيها مثل المجسمات لاشخاص يمثلون الحرف والعادات القديمة اللي اشتهرت بها البحرين .. وعلى شكل سوق قديم ..

اول صورة لنا مع الخباز .. وصوت القهوة الشعبية ورانا ..

بياع الحلوى

بياع البهارات ..

الحداد

الخياط

الحلاق

النجار

الصائغ

الخضار

القطان

التتان

وحريم يبيعون بالبسطه

ورجل يسف الخوص من سعف النخيل

بعدها وصلنا لقاعه فيها عن الغوص وصيد السمك ..

وهاذي الصور ..







ولما دخلنا كان ويانا الوفد البريطاني بس كان زحمه .. وولدي يركض في المكان شنو هذا وشنو هذا ؟ وانا عاد قلت لا يفشلنا قدام الانجليز قعدت اشرح له بهدوء هني شوف هالسفينة يغوصون فيها ويجمعون المحار ويطلعون اللؤلؤ .. ووووالخ يعني كأني اقوله قصة ..
وبالفعل استمتع جدا بالمكان وقام هو يسأل ويبحث فحسيت انها طريقة حلوة للتعامل مع الاطفال في مثل هالاماكن ..
وهاذي كانت صورنا .. في باقي القاعه....


يتبع مع مزيد من الصور ...:24:

باجر انتظروني اكمل لكم بقية اليوم صور المتحف وامسيتنا وين قضيناها ...

روووووعه

خبري بالمتحف من ايام المدرسه :109:

الشي الوحيد اللى تذكرته قسم العادات والتقاليد

منتظرين البقية ،

ويعطيج العافيه ..

[size="6"]يبلي اودي المدااام هالمتحف

اسف نسيت اقول يعطيك الف عافية

صور حلوووه وتقرير احلى عن البحرين

الله يعطيج العافيه ملاك صور جميله وجولات احلى

كوكو شانيل ..
انا بعد خبري فيه من ايام المدرسة لذلك جا في بالي اول مكان خاطري اشوفه ...

ما هقيت ..
واااااايد رومنسي انت ههههههههه .... بس لا تقول لها عرفت المكان من مين ؟

w
اهلا بك اخي الكريم .. تابع ويانا .. مشوارنا طويل خخخ ..

فارسة ..
يسعدني تواجدك .. شكرا للمتابعه ..

هني طريقة عمل الاواني الفخارية ...



بعدين رحنا قاعه المخطوطات الاسلامية وفيها وثائق قديمة وقرأن قديم بس ما قدرت اصور شئ .. من هالقاعه ..

نزلنا تحت ورحنا كافيتريا

زوجي كان متحمس لقاعه الحياة الطبيعية بحكم تخصصه .. عشان يشرح لولدي بس للاسف طلع انهم الغوها وبدالها قاعه محاضرات .. تحسفنا عليها لانها من اروع القاعات .. وحتى قاعه الفنون التشكيلية انا تحسفت عليها ..


طلعنا بره وكان الجو حلوو بس مع اشويه هبات من الحرارة والرطوبة ..
وكان الممنظر حول المتحف عجيييييييب البحر والانوار وصوت الاذان ..





الكاميرا ما اعرف لها ما ادري ليش الصور صارت مظلمة
وكان فيه مصورين الظاهر محترفين يصورون منظر الغروب ..



هاذي صورة القرية التراثية جدااااااا روووووعه احنا كنا نجيها كل يوم تقريبا لما سووها مع قروب الجامعه بس حسافة كانت مغلقة هالايام..


ودعنا المكان بعد ما شغلو انواره ..



ورحنا مسجد صلينا فيه ....
انتظروني ....:101:

عالساعه 8 اتجهنا لمنتجع الدولفين اللي جنب النادي البحري .. لقينا ان العرض يبدأ الساعه 9 .. يعني عندنا ساعه ..

رحنا تمشينا في النادي البحري .. وصورت جم صورة للمنظر الرائع النافورة كانت مشغله والانوار واشكال الطيارات من بعيد تقلع الللللللللللله روووعه ..



بس الجو ما كان حررررررررر لا زين هبات هواء تجي من نسيم البحر مع رطوبة خفيفة بس كان ريحة الشيشة مزعجة لي ولاولادي

دخلنا قاعه الفيديو قيم اللي جنب القاعه ولعبو اليهال اشويه بالالعاب ..


وانا وزوجي لعبنا الاير هوكي .. وصورتها لكم .. عجييييبة هاللعبة احبها وااايد مع ان زوجي على طول يغلبني فيها ..



ومع تصفيق ولدي اللي كان منحاز لي وتشجعيه لي .. غلبني زوجي 5-2 .. والهدفين بالغش بعد هههههه ..


بعدين حسيت ان الكاميرا بطاريتها بتموت ههههه وخلاص بتودع .. ادخرتها لصور عرض الدولفين ..
وما صورت في الالعاب اللي كانت بره وهي مفتوحه للجو العليل هههه ولعب فيها ولدي اشويه لان الوقت مر بسرعه ولازم نلحق على العرض


رحنا عرض الدولفين ..
والشخص البالغ ب4 دينار .. والاطفال من 2الى 12 سنة بدينارين ..
المجموع 10 دينار ..
والصغيراقل من سنتين مجانا ..

العرض حلوووووو واااااااااااايد وانصح كل من يروح البحرين يزوره ..لكن للاسف عندي بعض الملاحظات عليه .. وهي مقدمة البرنامج .. بارده جداااااااااا وما تعطي حماس للجمهور وغير مفهوم كلامها وتتكلم بسرعه ما نلحق وراها ههههه .. وتعاملها مع الجمهور بصراحه ما عجبني .. كل اشويه تقول قعدو الاطفال على انهم مو مسوين شئ بس من الحماس يوقفون مكانهم .. !!





لاني شفت العرض شبيه له في ماجيك ايلاند اللي في مصر جداااا روعه ما يقل عن هذا لكن الفرق ان هذا المكان مغلق .. وهناك المذيع عجيييييييب يغني ويرقص باستعباط يسوي حركات تضحك الجمهور ..

شوفو الصور هاذي اخذتها من موقع ثاني ..... لاني ما قدرت اصور اكثر الكاميرا خلصت بطاريتها ..

صورة المقدمه ظاهرة في زجاج الباب ..












يغني ويرقص ... ويرسم ... مو دلفين هذا متعدد المواهب ؟:109:




الجمهور كان نصه من السعودية مع ان يوم ثلاثاء .. :24:

طلعنا من العرض .. وولدي متحمس من العرض يبي دولفين وفقمه عشان يسبحون وياه في البيت هههههه ..
تابعوووني مع اخر جزء من المساء لهذا اليوم ...وين رحنا ؟!

تقرير ممتع جدا
واصلي في التقرير
والله يحفظ لك ابنائك وزوجك
وبالتوفيق لكي دوما وابدا

مسافر 99
تسلم على هالدعوة الحلوة شكرا لك ..
تابع ويانا باقي الكثيييير ..

حلوووووو عرض الدلافين ..
اللى في البحرين رحته مره من زماااان اول ما فتحوه
ورحت اللى بمصر بمدينة الانتاج الاعلامي (ماجك لاند) الصيف اللى فات وكان رووووووعه
واكيد شفتيه بتقريري

باقي جولتكم اكيد مطعم
يمكن تعشيتوا في النادي البحري او أي مطعم حولهم
وشكل الاثنين غلط :109:

كوكو
انا هاذي اول مرة اروحه كنت مو متشجعه اروحه بس يوم شفت اللي بمصر حبيت الدلافين وعروضهم .. وبعد ولدي موته الحيوانات بانواعها .. وتخمينك بمحله ..

طلعنا من عرض الدلافين عالساعه 10 واحنا جوعانين ..

الصور القادمه كلها من الجوال .. سوووري اذا مو واضحه ؟..
ورحنا لمطعم جسميز اللي جنب النادي الاهلي وهو مطعم فاست فود بحريني حلال طبعا.. ولدي يحب هذا المطعم لان فوق فيه هاللعبة اللي مثل المتاهة .. !!!

طلبنا وجبتي تشيكي شيكن سبايسي .. وكيذز ميل تشيكن نجتس .. مع هديه .. واخذنا ايسكريم ب300فلس حلو احبه وااايد نسيت مع الاكل ما صورته بس تطلع لك لعبه وياه بعد تعليقة تلفون من شخصيات ديزني




وحتى ولدي الصغيرابو سنة تحمس للالعاب وقام يجرب قدراته هههههااي

ولعبو في الفيديو قيم .. وهاذي حصيلتنا من هالالعاب تجمع هالبطاقات ويعطونك هدايا على كل نقطاك .. بس ولدي يرميهم .. ..

وانا قاعده احارسهم وهم يلعبون صورت تذاكر المتحف والدلافين ؟ للذكرى ..


وبعدها توجهنا للبيت ... عالساعه 11 وربع ..
اتمنى انكم تتابعوني عشان تعرفون وين رحنا ثاني يوم .. :101:.. لان الجاي احلى ان شاء الله ..:24:

واااااااااااااااااااااااااااو
جسميز
وحشني من زمان ماكلته
وبالنسبة لفرع النادي الاهلي عيال اخوي مايبون الا هو
ماادري شنو السر يمكن عشان اللعبه اللى يروح ولدج عشانها :109:

ومتابعه ..

ما شاء الله علييييييييييييييج رووووووووووعه
الجزء رووووووووعه عجبني عرض الدلافين و الفقمه
كملي خيتووووووو لا تبطين

كوكو ..
يحبونه اليهال عشان الهدايا لان كل وجبة اطفال وياها هدية ؟
وهداياهم حلوة بعد خخخخ
عاد احنا اللي ابتلشنا ..

ربوووش ..
تسعدني مشاركتك اخي الكريم .. تابع ويانا ..

ملاك وحلاووه




تقرير وايد حلو


عليكم بالعافيه الطلعاااااااااااااات


ها جهز البيت والا بعده؟؟؟؟؟؟؟؟الله يساعدكم على البناء

احنه اشوه افتكينه الله لايعودها من ايام خخخخخخخخخخخخ



بس احسن شي لمه الواحد يسكن في بيت ملك يحس انه سوه انجاز عظيم:24:


عالعموووووووووووووووووووووووووووووووووم

احلى شي جسميز انمووووووووووت عليه





لازم البنوتات كل سبوع يروحونه مرتين مره على غده ومره على عشا خخخخخخخ

ومايبون الا فرع عرااااااااااااااااااااااااااد



والدلافين اخوي راحه ويقول مايسوى التذاكر غاليه والعرض موب لهناك

والمتحف ولا مره رحته اتصدقين حتى ايام المدرسه ماودونه مادري ليش؟؟؟؟؟؟


بانتظاااااااااااااار باقي الرحلات:115:

روعة
حبيت المتحف كثير ان شالله اروح لة
دروبي

أختي الكريمة .. ملااك ...

كل الشكر لج على الموضوع الحلو ... والجديد والمنوع ... ومتشوقة أشوف التنوع في فترة 20 يوم ...

متابعة معاج إن شاء الله .... والموضوع للتثبيت فوراً

ملاك تقرير مميز .. الله يعطيج العافيه

ومبروك التثبيت ..

متابعين معاج @@

ام ملاك ..
اهلا حبيبتي .. البيت الحمد لله سكناه وقاعدين نجهزه ليلحين ما كملنا اثاث واجهزة .. الله يعين ..
واما جسميز ساحر قلوب الاطفال ههههههه .. فرع عراد رحناه كذا مرة وان شاء الله نجربه ..
المتحف حلوووو ويستحق التجربة بس وااايد قاعات الغوها وحتى القرية التراثية كانت معطية جو غير طبيعي ولكن للاسف مغلقة ..
واما عرض الدلافين انا حبيته وتجربة جديدة لعيالي .. بس لو فيه تشويق اكثر وحماس جان وااايد بيكون احلى ..
وحياج الله تابعينا يالغلا ..
دروبيا ..
اهلا فيج اختي .. زوري المتحف يستحق الزيارة .. وشكرا لك على المشاركة ..

الغالية ..
اهلا فيج مشرفتنا العزيزة .. مشكورة حبيبتي على التثبيت ... والموضوع ما صار الا بنصايحكم ومساعدتكم لنا .. وان شاء الله القادم يعجبكم اكثر ..

مزون ..
هلا يالغلا ... سعيدة بتواجدك .. تابعينا وان شاء الله يعجبك الجديد .. وشكرا لك على المشاركة ..

اليوم الثاني والثالث ....

يوم الاربعاء رحنا السينما فيلم هاري بوتر ..في السيف ... والفيلم عجييييييييب ورووووعه لكن فيه مجموعه صبيان ضحك وطناز خربو الفيلم من ازعاجهم .. وما قعدنا وااايد عقب الفيلم لان زوجي عنده شغلة يبي يسويها ..

يوم الخميس ...

الانطلاق الساعه 4 ونص ... توجهنا لمركز البحرين للمعارض عشان نشوف عرض بارني والسيرك .
توجهنا للقاعه 1 عرض بارني وما في تذاكر كلها مخلصه والحلو عارضين تي في كبييييييير فيه برنامج بارني
رحنا القاعه الثانية وفيها عرض السيرك .. اشترينا التذاكر ب 500فلس وكان باقي عن العرض مدة 20 دقيقة .. وزين ان احنا رحنا قبل لان الكراسي اللي مكانها قريب وزين مأخذينها ولحقنا على موقع حلو .. بدأت اصور واشيك الكاميرا قبل لا يبدأ العرض ..


وهذا الستيج قبل لا يبدأ العرض ..


اول ما بدأ .. بالدخان وبعدين دخلو وحده حامله صندوق وتمشي فيه ..



ووياها جماعه شايلين عصا فيها نار وتمو يسوون حركات ..



وبعدها دخلو اثنين لابسين برتقالي وتمو يناقزون يعني يقفزون ههه .. حركاتهم اشويه اتضحك ..


وبعدين دخلت وحده لابسه ابيض كامل واهي لاعبه جمباز نزلو لها حلق من فوق وتمت تتعلق فيه من رقبتها وساعه من يدها وساعه من رجلها ..

وبعد دخلو اشويه اشكال وياها اللي لابس خيمة بيضا مثل الشبح واللي لابس اسود في اسود ويسوق سيكل


و دخلو عقبها عندهم عصي فيها نار يلعبون فيها ويحطونها في فمهم .. يأكلونها يعني ..

عاد انا اول ما دخلنا قلت حق ولدي بتشوف نمر وحيوانات ....
وتم طول العرض متى بيخلون النمر متى يدخل متى متى متى ؟؟؟ لما عصبت عليه !!! حتى الصور مثل ما تلاحظون مو واضحة عدل من حنته ؟!!

وخلص العرض ولا دخل النمر هههههههه .... لان اصلا ما في حيوانات ؟ ولا في مهرج ؟ كنت متوقعه السيرك يكون غير ....مو بس حركات بهلوانية ..


هذا يوم طلعنا قاعد يستعرض ..
واحنا اكثر شئ صورنا فيديو ما صورت صور واايد ..
على العموم السيرك حلو عجبني تغيير عن المألوف بس نقدر نسميه استعراض ..
بعدين طلعنا وقلنا نتجه ل..........:114:......تابعوني ...:106:

اهديكم هالكلمات الحلوة ...

«®°•.¸.•°°•.¸¸.•°°•.¸.•°®»ياديرتي«®°•.¸.•°°•.¸¸.•° °•.¸.•°®»

ياديرتي لو ابتعد عنك في اسفاري
كل يوم للرجعه احن وانتي في افكاري
بالليل لي لاح القمر وتجمعوا العشاق
طيلي جلسات السمر ويا الربع واشتاق
ياديرتي ياديرتي ياديرتي ياديرتي

اشتاق لاحبابي واحن لترابك الغالي
يا بسمه في شفاف الحسن طرياك يحلالي
اسمك على قلبي انكتب هيهات انا انساك
ما القى في حبك عتب لو قلت انا بهواك
ياديرتي ياديرتي ياديرتي ياديرتي

نرجع نكمل .........يالله مع انكم ما خمنتو .. :114:
بعدين طلعنا وقلنا نتجه لخيمة نخول ..

وهالمرة اعوضكم صورت صور وااايد ..

رحنا قرية كرباباد ندورالخيمة وقالو لنا جنب قلعه البحرين وشفناها من بعيد .. رحنا القلعة ...
دخلناها وكانت الشمس تغيب يعني المكان ظلام ....


استرحنا اشويه في الكافتيريا اللي على البحر روووووعه الموقع .. والبحر نظيف ..


وقمنا اخذنا جولتنا يوم نزلنا قالي زوجي خلي عربة البيبي في السيارة يزعم قلعه واكيد طرقها وعرة وقديمة ...
قال لنا الحارس تروحون لها مشي .. لان اول ما دخلنا طلع هذا متحف القلعه ولا شفنا منه شئ ...
هذا المتحف من بعيد من فوق صوب القلعه ؟بس رجعنا له يوم ثاني لا تحاتون خخخ ...
شوفو المسافة اشكثر اللي مشيناها من المتحف للقلعه فووق ..؟!!!!



رحنا نمشي نمشي والا الطريق حلو ومبلط وعلى دار ما داره سلاسل وانشوف من بعيد القلعه منوووورة عجيييييييييب منظرها ما اقدر اوصف شكلها اكثر ..


شوفوها بالصور واحنا نمشي حولها ندور المدخل وبدل ما ندخلها من جهة اليسار دخلانها من جهة اليمين ..









الجو كان حلو فيه هواء بس ما يخلو من الرطوبة والمكان زراعي وريحة السماد كريهة اشويه بس عجييييييب حتى رجعتنا شفنا انجليزي يركض حول القلعه ...



وزوجي توهق بولدي الصغير يحمله ما يرضى يصيح يبي ينزل يمشيه يروح يأكل الحصى .. ونحيس ما يرضى احد يمسك يده ؟ طفش زوجي ؟..



وانا اقول في خاطري تستاهل ليش ما تطاوع وتجيب العربة ..



كل ما يناديني عشان اساعده بالولد اهرب وارككككككككض انا وولدي الكبير نسوي سباق عشان لا يلحقنا هههههههه نحاسه فيه ... واصور لكم كل جهة نلفها على القلعه ..




عقب ما فاز علي ولدي وصلنا للمدخل اخييييييييييرا بعد مشي طووويل حول القلعه ..

تفضلو حياكم هذا باب الدخول ...



والحلو في القلعه مع ان ظلام الا انها منورة من كل مكان داخل وخارج ..



اشويه خفت من الدواعيس اللي فيها والغرف النازلة والصاعده فيها .. لاني بروحي مع ولدي الكبير ..استاهل لاني هربت عن زوجي هههههههههه ..




وبعدها ركبنا سلم يطلعنا من فوق .. ما اقدر اوصف لكم اكثر المنظر اشلون حلووووو فيه المباني البعيده انوارها والبنايات والعمارات وانوار الشوارع والسيارات .. وصوت امواج البحر وشكله ....






عجبوني هالفتحات فيها اضواء حمراء يزعم نار من المدافع ..


الله يحفظ البحرين واهلها ..

بعدين نزلنا كلنا وانا توليت مهمة ولدي يأكل حصى كل ما نزلته وكل ما حملته قام يصيح اخذه زوجي وقلت له لو جايب العربة جان خليناها بره القلعه وحملناه بس داخل .. عاد طلعتنا اكتشفنا ان احنا لو دخلناها من جهى اليسار جان ما بنمشي هالمشي كلها لكن متعتها في هاذي وسوينا رياضة وسباق جري هههههه





القلعه راااااااااااااااااااااائعه جداااااااا ... وانا رحتها مرة يوم اني صغييييرة مع اهلي ... بس بوابة البحرين ما قصرو ذكروني فيها ..
وتجربة لا تنسى .. وعلى فكرة فيها دواعيس وغرف تحت الارض وتركب وتنزل يعني متاهة .. انصحكم تزورونها وخصوصا باليل رووعه وموعد اغلاقها 8 مساء ...

طلعنا سيده عالسيارة و زوجي خلاص يبي يرجع البيت من تعب المشي هههه بس قلنا موعد الصلاة تأخرنا عليه رحنا ندور مسجد ..

هل يا ترى رجعنا البيت لو كملنا جولتنا ..؟:114:

بصراحه من أجمل التقارير اللي شفتها
والله يسعدك دوما وأبدا

مشينا ندور مسجد نصلي فيه .. على اساس نروح مجمع الدانه ولا البحرين ..
وصلنا لمسجد صوب الحواج .. دوار السلمانية ..

يوم نزلت انا دخلت للوضوء وولدي الصغير تم بره مع اخوه الكبير وانا اقول لاخوه انتبه له .. طلعت الاقيه قاعد يشرب من الماي اللي على الارض منسدح وثيابه كلللللللللللها ماي :108:.. اتاريه مسكين عطشان يبي ماي... رجعت السيارة لان ما عنده ثياب غيرهم .:110:.. وقعدت وياهم نننتظر زوجي لما يرجع وصورت لكم كم صورة للمسجد







وهاذي كافتير رحت اشتريت لنا منها سندويشات ..


والا اصور الجهة الثانية اشوف ديري كوين حبيب القلب اشترينا منه طلعتنا لان السندويشات مو حلوة .. :105:


مع الجوع ما صورت شئ :109:
وبس رجعنا للبيت ...

تابعوووني ان شاء الله الحلقة اليايه احلى واحلى ..

مسافر 99 ..
الاحلى وجودك ومتابعتك وتشجيعك للمووضوع ..
تسلم ... وتابعنا القادم اجمل ..

باقي الاعضاء ما توقعتكم جذي ؟ ما في متابعه ؟!! ما عجبكم التقرير ؟ لازال عندي الكثير ..!!!!!!!!

رووعه يا ملاك ..
وما شاء الله ماسكين على الاماكن التراثية ..
وبعدين غلط كان لازم تاخذين ملابس احتياط للصغير تدرين فيه مو أمان
وهذا هو خرب عليكم جولتكم :109:
وتدرين حمستيني اسوي لي برنامج طلعات ... بس راح الوقت وما باقي شي على رمضان

ومتااااااابعه للآخر ...

كوكو ..
اهلا فيج يالغلا ..
الاماكن التراثية رايحينها من ايام المدرسة لذلك قررنا نروح اول الايام ونغير عن المجمعات والاماكن الترفيهية .. اللي نروحها كل ويك اند ..
بس عن جد لما تروحيها راح تحسي انها مكان جديد ويرجع لك ذكريات حلوة ..
وانا اعتمدت على الخدامه تحط له ملابس وهي اعتمدت علي ؟ خخخخ ..بس مقلب ما انساه هههه ..

ماشاء الله..
صورك جميلة جدا..ابدعتي فيها..
واصلي انا من المتابعين لك..

نسمات سفرية ..
تسعدني متابعتك للموضوع .. شكرا لتشجيعك .. حمستيني جدا

مع ان التشجيع والمتابعه قليلة ......:114::105:
الا اني بكمل لكم على وعسى احصل لو نجمه وحده ؟:11ight_li

رابع يوم ..
يوم الجمعه .. الانطلاق كان 5 ونص ..
ورحلتنا انطلقت لجزيرة المحرق اللي اعشقها ..
رحنا اول شئ جزر امواج زرتها قبل بالليل لكن هالمرة غير بالنهار ..واخذت لكم اشويه صور .. صديقتي بيتهم هناك ودايما تقولي روحي شوفي بيتنا في جزيرة مرجان ..بانين بيتهم في مثل الفترة ..


المنطقة رووووعه البحيرات والبحر .. وكل واحد راكب الجيتسكي .. ولا قاعد يسبح .. ولا في قوارب .. وقفنا عند شاطئ روووعه نظيف شفنا عائلة بكبرها يسبحون الام والجده وبناتهم وعيالهم خخخخخ بعباياتهم ..

ولما تبي تزور الجزر لازم تعطيهم البطاقة السكانية .. ويدخلونك ..

وشفنا جزيرة تالا واصداف والمرجان ..









طلعنا من الجزر ورحنا حديقة جنب المطار يوم الجمعه تلاقي حصان وبوني وحمار وولدي غرامه هالاشياء ههههه






باقي يوم يركب البوني والقطار ما صورتهم لهيت مع الطائرات خخ

يوم وصلنا الا طائرة من فوقنا بتنزل المطار رووووووووووووعه منظرها وهي نازلة وصورت لكم كم صورة ..
وكل اشويه تجي غيرها ما وقفو.... اكثر شركة طيران هي طيران الخليج .. وشفنا طائرة لطيران البحرين ..؟ واااخ تحسرت على السفر زياده ..:110:

في تحدي بيني وبين ابو الشباب مين يصور الطائرة صورة احلى ؟
وهاذي صورته ..


وهاذي صورتي ..


يالله انتو الحكم ؟ مين احلى ؟

********:108:وحده تكلم روحها ؟؟ :105:...........ما خلص اليوم :11ccer:

جهد تشكرين عليه اختي

ماقصرتي والله ومتابع معك ......... وطبيعي الصوره الثانيه ازين

الذين يشاهدون محتوى الموضوع الآن : 5 ( الأعضاء 5 والزوار 0) ‏http://www.arabtravelersforum.com/user263329/ , ‏http://www.arabtravelersforum.com/user148414/ , ‏http://www.arabtravelersforum.com/user187170/ , ‏http://www.arabtravelersforum.com/user116535/ , ‏http://www.arabtravelersforum.com/user155180/

جنون السفر ..
اخيرا احد رد علي هههههههه ..
شكرا لانك صوت لي ...
وشكرا لانك تتابع اول تقرير لي ..

رووعة
الله يعطيج العافية

حلووووه جزيرة امواج تصدقين ما عمري رحتها مع انها يمنا ..
والخيول هذي في قلالي اخوي احياناً يودي عياله يوم الجمعة ..
وبالنسبة لصورة الطياره بصراحه صورتج احلى
وطيران البحرين جربتها هالشهر صج صغيره كأنها باص على قولة وحده من البنات ههههههه بس حلوه
يعطيج العافيه حبيبتي
ولا تيأسين دايماً بداية التقرير هالحال وبعدين يصير تفاعل ،،
وعلى النجوم اعتقد هالخاصيه عند المشرفين بس لان مافيه تقييم !!

ملاك وحلاوووة:x1:
الله يعطيك عافية
صحيح البحرين حلوه............
فيها أمكان سياحية بس يفضل زيارتها في الشتاء

روعه حبيبتي ملاك
والف مبرووووووووك التثبيت
صراحه عيشتينا بجو الجولات
الله يعطيج العافيه وماقصرتي

يعطيج العافية أختي ...

صورتج أكيد أحلى ... وانا من عشاق جزر أمواج والمنطقة ذيك حوالين المطار ...

الأماكن والمناطق اللي رحتيها حلوة ...وايد حلوة ... وكل الشكر لج إنج ألقيتي الضوء عليها ...

متابعين معاج ... وعساج عالقوة حبيبتي ..

متابعين :24: ، انتي خلصي التقرير لاحقين علي المديح والاطراءات
انا افضل التقارير الطويلة تكون متصلة بدون تعليقات ممكن تفقد الموضوع ترابطة
انا لو كنت مشرف كان منعت التعليقات الي ان ينتهي اصحاب التقارير منها.
مشكلة العرب اذبحهم علي المديح والمجاملات :109:
تقرير ممتاز وعجيب ورائع وما فوقة فوق، ها كفاية ولا بعد :101:
تذكريني باحد الاعضاء يتحسس اذا سوي شيء وما حصل مديح :112: او اذا جاوب سؤال وما حصل شكر :110:
اوكي خلصنا المزح، واصلي ابداعك اختي ملاك و مشكورة
:x1::x1::x1::x1::113::113::113::113::x1::x1::x1::x 1:

ايل بامبينو ..
اهلا فيك اخي الكريم شكرا لك ..

كوكو شانيل ..
الخيول عند حديقة المطار بس احنا ما رحناها لان وااايد هنود فيها ... وزحمة ..
واقول لزوجي صورتي احلى يقولي ربعج اكيد بيختارونج ..؟
والتشجيع ........يعطيني دافع للاستمرار .. وعشان احس في احد متواصل وياي ..
شكرا على تواصلج يالغلا ..

حمد م التميمي ..
اتصدق ان احنا اغلب الاماكن اللي رحناها مفتوحه .. يمكن حر الجو اشويه ورطوبة .. بس المتعه دائما تكون بالمغامرة ...

فارسة ..
شاكرة لج تواصلك ومتابعتك ..

الغالية ..
اهلا فيج مشرفتنا والله يعافيج وشكرا على تواصلج ..
وانا بعد مثلج احب هالمنطقة جداااااااا ..

بلادي البحرين ..
اهلا وسهلا فيك اخي الكريم ..
وانا مو القصد من الموضوع الردود الكثيرة ولكن عشان احس ان في احد متابع وياي ؟؟ يعني مو اكلم نفسي ؟؟؟ كفاية كلمة طيبة منكم تحسسني بالفرحه ..
واكيد تشجيعكم لي يخليني اواصل ... ويزداد حماسي اكثر ..
خصوصا ان هذا اول تقرير مصور انزله في النت ...
والتقرير والله ودي اخليه متواصل لكن التحميل من المنتدى بطئ وممل عشان انزل جزء يبغالي جم ساعه عشان اخلصه وانا وراي اشغال غير النت مو فاضية .. هههههه ..
خلك متواصل ويانا وخل عنك الكسل .. هههههه ..
حياك الله ..

عقبها رحنا السيتي سنتر دخلنا رحنا للصلاة والحلو في المجمع عندهم غرفة لتبديل الاطفال .. وسحبنا فلوس عشان التسوق ..
وهذا اللي يعجبني في السيتي سنتر خدماته المتنوعه ..







ورحنا نتسوق وما قدرت اصور وااايد لان زحممممممممه مع ان المجمع كبير وكل مرة اروح له ما نشوف الناس واايد لانه وااسع ..بس هاليوم غير .. حتى الباركات كانت مليانه ..

واحنا راكبين شفنا فوضى وتجمع شفنا من فوق االمنظر صبيان يرقصون الهيب هوب .. واغاني انجليزية وعجبوني يوم اذن اذان العشاء وقفو العرض .. وهذا الحلو في المجمع انك تسمع الاذان داخل المجمع ..
لكن للاسف ما راحو يصلون ما ادري هم الظاهر مو عرب ولا شنو سالفتهم .. وكملو عرضهم بحركات هباله فيهم ؟







وبعدها رحنا المحلات اغلبها مسويه تخفيضات اقل شئ 20 % واكثرها 75% ...

شفنا معرض الحشرات وولدي غرامه هالاشياء مات من الوناسه يوم شافهم .. عاد انا كنت شايفته قبل مرة واقول بايخ حده .. يوم ويانا ولدي غير حسيت بالوناسة وانا اقوله واعلمه واصوره ..



















وشفنا نافورة جنبه عجيبة قعد صور جنبها .. والتفتنا الا هو مستانس بصورة بارني الا اتاريه حجز تذاكر للعرض وللاسف مخلصين ما عندهم ..
:112:وهذا اللي قهرني في عرض بارني ؟؟!!!



ورحنا فوق نتعشى في ساحه المطاعم .. واخذنا من كنتاكي وجبة مايتي زنجر سبايسي .. من الجوع ما صورتها هههه ... واحنا قاعدين نأكل والا اشوف جماعة لابسين غتر وثوب ويزعم رزه وكشخه .. ويطالعوني ويضحكون لي وواحد يأشر لي بالتلفون وانا هني من البرود اللي صادني اطالع فيهم باستغراب وش السالفه ؟؟؟ اتاريه يبغاني افتح البلوتوث ؟؟ ؟؟ لاحظو وزوجي قاعد على جنب بعد ؟؟ شفتو وقاحه اكثر من جذي ؟ وعقب ما استوعبت الموقف جان اقول حق زوجي شوف هاذيلا هناك يمكن يعرفونك طالعهم يوم شافوه الا كل واحد عيونه بالطاولة ؟ حسافة ما صورتهم ذيك اللحظة :109: انشر صورهم بالنت ؟


رحنا الالعاب وقعدنا نلعبهم ....







خلص يومنا ورجعنا البيت بس انا ما تسوقت واايد .. وانا اشوف المحلات تخفيضات عندها لابد ارجع يوم ثاني :114:...

تقرير مميز...وصور جميلة..
يعطيك العافية..وشاكرين لك مجهوداتك..

اليوم بنزل لكم جولة جديدة عشان بلادي البحرين لا يعصب:112: ويقول نقطع في التقرير مع اني مشغوولة وااايد بس تعودت على التحميل من المنتدى وعرفت استخدمه اخيراااااااااااا:106: ويالله عاد ابي اشوف تفاعل انجليزعلى قول بلادي !!:109:...مع هالجولة ..:113:
اليوم رحلتنا لمجمع الدانه ...

اول ما وصلنا تسوقنا اشويه في المحلات
ولما شاف ولدي العاب شاكازولو .. اصر انه يروح يلعب مع اني ما تسوقت عدل خخخخ ... :108:
كانت الالعاب هادئة جدا لاول مرة .. والحلو فيها ديكوراتها ..
بس لو يهتمون فيها اكثر لان بدأت بعض الالعاب تخترب وبركة الماء اللي فيها جفت ..
شوفو الالعاب ..
























بعدين اذن للصلاة وطلعنا ندور مكان الصلاة .. لقيناه بره المجمع اخر مكان في الباركات في الزاوية هلكنا واحنا ندوره .. بس الحمد لله المكان نظيف ..



توجهنا عقبها لمطعم ابل بيز عشان نتعشى .. اول ما وصلنا استقبلنا العامل وقعدنا في مكان الغير مدخنين .. وبعدين عطو اليهال اللوان وورق تلوين ..
شوفو الالوان ولدي الصغير شنو سوا فيها عضها واكلها زين لحقت عليه ؟ :109:



ولدي من وناسته بالالوان ما يدري عن لعبته المفضلة وقعدت انا ابدع وياه ..



وتفضلو المنيو ..








طلبنا كان ..
ولدي اخترت له من الكيدز ميل ميني برغر .. حلووة .. بس ما عجبه عصير البرتقال مر .. ب دينارين


وانا طلبت دجاج بالباستا والبروكولي وصلصة الفريدو ..4و500دينار
وزوجي طلب ..دجاج فيستا لايم 4 و900دينار



تقيممي للمطعم ..
الديكور .... 6من 10
الاكل .......8 من 10
الخدمه .....8 من 10
السعر ......6 من 10
وعلينا بالعافية ..
ما اتذكر بكم طلع الحساب ..مع المشروبات والخدمه :114:

انتظر رأيكم :gathering

نسمات سفرية ..
شكرا لتواصلك ..ومتابعتك ..
حياج الله بالبحرين زورينا ..
سعيدة ان الصور عجبتك ..

ترانا وصلنا لخامس يوم ..