السلام عليكم
بمانسبه قرب الصيف والسفر حبت اطرح موضوعي هذا علشان تعيشون التجربه او المغامره الحلوه اللي قمت فيها الصيف اللي طاف
ملاحظه: بعض الصور أستخدام بعض الصور من المواقع وبعض الصور من تصويري
بالبدايه معلومات عامه عن الرحله اللي قمت فيها
نقطه الوصول هي فرانكفورت قادما من لندن العاصمه البريطانيه
زياره داخل المانيا شتوتغارت وميونخ
ومن بعدها زياره الى فينا 7 ايام في فندق الماريوت وبعدها المعشوقه زل ام سي والسكن في شقق في منطقه الكابرون
ومن ثم التوجه الى سويسرا أنترلاكن وجنيف والمحطه الاخيره باريس والعوده الى لندن
تم تأجير السيارات من شركه يوروب كار لمده شهر سعر السياره الواحده 2500 يورو مع عداد مفتوح
نوع السياره S 350
كنا 5 اشخاص ونحتاج سيارتين
السكن في سويسرا
كان في فندق جراند هوتيل قس باخ
وهذا موقعهم على النت
http://www.giessbach.ch/en/the_grandhotel/about.php
وهذي صور الفندق من مواقع الانترنت
وهي منطقه مشهوره تبعد عن أنترلاكن بحوالي 15 كيلو متر طبعا مايهمنا اذا عندك سياره ماراح تفرق
الفندق 4 نجوم ومن السلسه الفنادق المشهوره جراند هوتيل الفندق كان في وسط جبل الطريق المؤدي الى الفندق خطر شوي بس الراحه شي موطبيعي
أنت مخير باختيار غرفه مطله على البحيره البحيره اللي تتطل عى انترلاكن ولا الغرفه المطله على الشلال او الغرفه المطله على الغابه
أوريكم الصوره وبعدين افصلكم زياده
هذي صوره اخوكم ياحلو يا أنا من الغرفه المطله على الشلال أنا اخترتها
وهذي صوره للغرفه المطله على البحيره
بيني وبينكم اذا فتحت الدريشه او الشباك ازعاج الشلال مايخليك تسولف ولا تقدر تنام الا والدريشه مسكره من ازعاج هدير الشلال
فأنا أفضلكم الغرف المطله على البحيره
سعر الغرفه كان 200 فرنك سويسري مايعادل 120 يورو طبعا السعر الغرفه باليوم مع افطار
الافطار بوفيه مفتوح كونتنتال بوفيه مع شغلات صناعه محليه من المزارع القريبه من أنترلاكن كالحليب والمربى والجبن والعسل
والصراحه اخوكم ياحلو يا أنا طاح بالعسل شي موطبيعي وا الكرواسون
اللوبي ذو طابع أوربي من القرون الوسطى وكان كل ليله يجبون واحد يعزف على البيانو والصراحه عزفه حلو
جو الفندق حيييل حلو مع ملاحظه اني الوحيد عربي واغلب سكان الفندق من الالمان من كبار السن
يعني بالعربي كلهم شيبان وعجايز كنت أنا أصغر واحد بالفندق كاني ناشئ تحت 12 سنه يلعب مع منتخب البرازيل الأول :109:
بس كانوا فرندلي حيل والرسيبشن كانوا من سني فاكانوا يعرضون خدماتهم علي ويطقونها سوالف وياي سوالف خاصه وعامه
أمام الفندق الشلال الكبير اسمه قس باخ وهو شلال كما مبين من الغرفه يمكنك الصعود من خلاله ( يعني تمر من ورى الشلال وبين اشلال يحوشك شوي ماي) الى أن توصل الى القمه وهناك مطعم ومقهى في اعلى الجبل او القمه
الفندق رائع وهادئ يصلح للعرسان او الاشخاص اللي يبون يبحثون عن الهدوء
وتلقى السياح يجون الفندق ويصورنه خلال ذهابهم الى الشلال واغلب السياح يجون عن طريق البواخر او القوراب ويسفطون تحت الفندق ومن تحت الفندق ياخذون قطار جبلي صغير
طبعا اي سؤال حاظر عن الفندق
اللحين نجي سالفه البراشوت
السالفه أكشن شوي
كنت أتمشى أنا ورفيجي بسنتر حق أنترلاكن ونشوف البراشوتات تنزل بالحديقه
ويحومون فوق انترلاكن تقولون كأنهم غربان ههههههههههه
قررت ان وصاحبي نخوض غمار هالتجربه لقيت اعلانهم بالشارع واتصلت عليهم قالولي تعال عند وين مايطبون اهل البراشوتات بالحديقه اللي بسنتر أنترلاكن تلقى باص ابيض كلمهم
رحت حق راعي الباص وكلمته واتفقت وياه على السعر وكان سعر المغامره 100 يورو لكل واحد
والله وخذانا بالباص لجبل يطل على انترلاكن ونزلنا ولبسنا المعدات وقام يشرحلنا
وهذي صوره المغامر ياحلو يا انا قبل الاقلاع من البراشوت وصور المعدات على ظهري
والله انا والمدرب لبسنا المعدات وحطينا القفل لاني راح اطير ويا المدرب في براشوت واحد
انا اتفرج واشم هوا واهو يقضب زمام الامور
والله وصارت السالفه صج وركضت وقطيت نفسي ولا طرنا ياناس صج
صارت السالفه صج مو غشمره والله وارتفعنا بالسما وقمنا واخذنا لفه فوق البحيره وفوق انترلاكن السنتر وطرنا بمحاذاه الجبال
وهذي صوره رجولي اعزكم الله صورتها ابي اقارن لكم شكثر بعد مسافتي عن الارض فوق البحيره
المهم خذت مده الطيران 45 دقيقه مع المدرب وانا طاقها سوالف ويا المدرب وندردش ونشم نسمه هوا نظيف
وطبينا في حديقه السنتر بانترلاكن والكل منكم يعرف الحديقه المشهور
وفي موقف طريف صارلي اول ماطبيت بالبراشوت
شافني احد الاخوه الخليجين قالي والصراحه ما اعرفه قالي انت صاحي تدفع فلوس علشان تخرع عمرك
هههههههههههههههههههههههههههههههههههههههههههههههههه ههههههههههههه
فا أنصح الجميع بتجربه المغامره الحلوه وترى مافيها خوف ابد بالعكس كأنك ماخذ جوله
وقمت في جولات عديده مثل التزلج في قمه JUNGFRAU او يسمونها على ما اعتقد مسمى ثانوي
TOP OF EUROP
وقمت بزياره قريه قرين ورلد وهي قريه حلوه حيل وفيها فنادق كثيره وسياح كثير بعد من جميع الجنسيات
وهذي صوره اخوكم ياحلو يا أنا من على قمه مطله على قريه قرين ولد مندج وماخذ راحتي وداش جو ثاني
وكانت قس باخ انطلاقه لرحلات كثيره الى زيورخ ولوزين والمناطق المحيطه بانترلاكن
وأرجو أني افدتكم وياي كثر ما أفادني المنتدى الحلو هذا
وتقبلوا تحيات أخوكم ياحلو يا أنا
رد مع اقتباس
المشاركة الأصلية كتبت بواسطة متواضع
المشاركة الأصلية كتبت بواسطة the revier
المفضلات