السلام عليكم ورحمة الله وبركاته
راح اقولكم ياعيال ويابنات تفاصيل رحتلي الى نيوز لندا من طقطق الى السلام عليكم ...
في البدايه رشحوني عملي لدوره لمدة ثلاث شهور مدفوعة التكاليف اي يعني مدفوعة الرواتب لمدة ثلاث اشهر .. فا الحمدلله بعد الترشيح والخ الخ .. تم تحديد لي 3 دول نيوزلندا و وكندا وامريكا
فاتم الاختيار على نيوز لندا بعد تفكير طويل اخذ مني قرابت الشهر من مشاورات واستفسار والخ الخ
وبعد الاتفاق مع نفسي قررت السفر الى نيوز لندا
وبدت رحلة البحث عن التذاكر في المكاتب والقلق والي يقولك 6000 والي يقولك 5000
فا الزبده عشان مااغثكم وماابثركم تم اختيار طيران الكاثي باسفك
الي هو طبعاص الطيران الصيني .. طبعاً طيران محترم واخذت التذكره بحدود 5500 ريال
وتم ولله الحمد قص التذكره وتحديد موعد الرحله ...
وابتدى وقت شراء الملابس .. والروحات والجيات والاتصالات من قبل اشخاص في المنتدى راح اعددهم لكم وهم لهم الفضل الكبير في تسهل اموري في نيوز لندا
طبعاً اخوكم ماخلى ماكان ماطبه في اسواق الرياض ومافيه ملابس شتويه الا شريتها لان تخبرون نيوز لندا كان عندهم شتاء يعني مطر وثلج وبرد والي تبون
شرينا الملابس وشرينا العطور وغيرنا النظارات
ورحت لطيبه والعويس وتم شراء 8 بجائم داخليهعلى اساس امي القصيميه موصيتني اروح اشتريها من هناك
طبعاً كانت رحلتي مابقى عليها الا كم يوم واسافر .. وبعد هذا كله بدو الربع يتوافدون علي وعزايم والخ الخ على اساس اني انا يعني الي يجمع العيال دايم والتكيه دايم تكون عندي
المهم بعد مابقى على السفر يومين بديت ارتب اغراضي واضبط الشنطه
في هذا الوقت كانت الوالده تترقب الاوضاع وتناظرني وانا راحي وجاي وكنها حاقده علي بس مدري ليش فا تخبرون قلب الام شو بيعمل في هل الوقت
المهم رتبت الشنطه وجهزتها وصرت اشيك على اموري الماليه واموري المعنويه والنفسيه وبديت اشيك على المواقع الخاصه في السفر والنصايح والخ
وعشان ابراء الذمه موقع العرب المسافرون فادني كثيررر مره مره
وخاصتاً بوابة نيوز لندا ماقصرو في معلوماته وتقاريرهم وكلش جزاهم الله خير
قربت الرحله وباقي يوم على السفر
ونبضات قلبي تتسارع
وتتسارع
وتتسارع
وتتسارع
وتتسارع
وتوووووقفت
جاء موعد وداع الوالده
طبعاً انا من النوع الي ماعمري هلت الدمعه مني في مواقف زي كيذا لاكن هل المره حاولت اني ماابكي قدام الوالده لاني ماحب هل المواقف ابد
ودعت الوالده وكن واحد قاطع مني ضلع
طلعت من البيت وجاء اخوي خلووود يسمكني مع رجولي ويقولي وين بتروووح
انا هنا ماقدرت امسك نفسي وحضنته وبكيت شوي وانا مستغرب من نفسي كيف بكيت قدام طفل صغير عمره لايتعدى الـ 5 سنوات
لاكن عرفت انها البتاعه الي قسمت ضهر البعير
مشيت وقفيت وخليت كل العالم وراي .. المستقبل .. المستقبل .. ولقة العيش الكريمه
هي السبب هي السبب
ركبة مع العيال بسياره وكلهم يضحكون معي وسواليف وذب وانا معاهم ومو معاهم مومصدق اني ببعد عن اهلي فتره طووويلــه ..كيف كيذا
هل انا صح الي سويته ولا خطأ .. ماعمري ترددت بشي او اعدت التفكير في موضوع الا هل الموضوووع ..
عموماً وصلت مطار الملك خالد الدولي .. والعيال ينزلون عني الشنطه
وانا واقف اناظرهم وعارف اني بشتاق لهم
حطو الشنطه ودخلو معاي جوى المطار ووصلنا الى الحد الممنوع فيه الدخول الاللمسافرين
وقتها قالي العسكري خلاص انت رح وهم يرجعون قلت له يبن الحلال خلهم يجوون معي تكفى عيا قال النظام نظام
واناظر العيال واشوف عيوننهم يعني مقدر اوصف او اعبر بس ناظرت في عيونهم وقالي واحد منهم خلاص يا ابو احمد بتخلينا
قلت لهم ياعيال ترى الي فيني يكفيني لاتزود جرحي ترى جرحي بليغ
جو كلهم فجأه وحضنوني وضمووني ودموعهم تسبقهم
وانا لاحول لي ولاقوه كانو اربعه وكلهم يبون اتكلم وانا اصلن على جرييف مابي اقول شي عشان ماابكي دفيتهم وقلت لهم خلاص روحو
ومشييييييييييييييت ومشييييييييييييييت ولا التفت
وبعد كيذا وانا ماشي جووو ناس ثانين اعرفهم ونادوني عشان ارجع اسلم عليهم
اقول في نفسي وش ذي السفره الي كلها صياح
رجعت وسلمت عليهم وانا دمووعي على خدي شلاللللللل
خلصت ورحت انتظر الرحله في صالة الانتظار
وطبعا وانا انتظر راح اوريكم معالم نيوز لندا ومعلومات عنها
هذي خريطة نيوز لندا وموضح فيها معالمها بي العربي
وهنا بوريكم معالم نيوز لندا وصور لها قبل مانتعمق
هذي الصوره الثانيه
هذي صور مقتطفات لنيوزيلند
راح اخليكم الحين وبكمل ردي بعض شوي لان عندي بريك الحين
وتابعو مووضعي من الردود لاهنتم
مواضيع عشوائيه ممكن تكون تعجبك اخترناها لك:
- ماهي المدن الاقل برودة هذا الشهر في نيوزيلاند
- كيف طريقة ركوب الباصات بنيوزلندا
- نصائحكم و خبراتكم تهمنا
- نيوزبلاند تحتاج ام لا
- طلب من ضيف لكم من البوابة الكندية ياهل نيوزلندا لاتردونه
- احلى صور صورتها في وانشالله فيه اكثر بحكم الدراسه هنا
- المســـــــــــاعدة ممن لدية الخبرة في نيوزيلاندا
- طـلـب مـسـاعدة في السـكـن مـع عـائـلـة فـي نـيـوزلانــدا
- أمل من كل الاخوان الذين درسوا اللغة الانجليزية في نيوزيلندا او في غيرها الدخول
- ممكن مساعدة لاهل الخبرة في نيوزلندى
- نوادي العاب القوي
- ابغاكم تردون بسرعة للي درسو بمعاهد اوكلاند اويعرفون عنها
- ساعدوني سفرتي بعد ايام ولا سويت شي
- خطوات البداية من السعودية الى نيوزلندا
- رحلتي إلى نابيير
- أيش أسوي ؟؟
- نيوزلندا ؟ للمحترفين العارفين
- الطبيعة الخلابه نيوزيلنـــــــــــــــــــــــــــدا
- مارأيكم بـ هذا الجدول السياحـي ؟
- َ
المفضلات