اهلا وسهلا بكم مجددا في كانت كالحلم واصبحت حقيقة.... بيسوي دعاية هههههـ
وصلنا سابقا الى سالفة التذاكر ومالتذاكر عاد اخوكم حجز عالماليزية ترانزيت كولالمبور 9ساعات.
قبل السفر بيومين اكملت اغراضي والاغلبية ملابس شتوية وبعض الادوية التي احتاجها من خافض حرارة الى مضادات حيوية الى بعض الفيتامينات. وعدة الحلاقة.
ماقبل السفر بيوم واحد ودعت الاهل ودموع الحزن بأعينهم واغلب الشباب عارفين الوضع مايحتاج اذكره.
ذهبت الى جده مع اثنين من اعز الاصدقاء اخذنا فندق وكانت الساعه تشير الى 1 ليلا ورحلتي مغرب يوم الغد . جلسنا انا والشباب الى قبل الفجر وصلينا ونامو اما انا مانمت لاني حسيت بجسمي بدا يتعب والحرارة بدت ترتفع.
مريت على حلاق زبطت عمري ومريت لي مستوصف اخذت لي ابرة فولترين خافضة للحرارة. ورجعت جلست عالنت الى الساعه 1ظهرا صحيت الشلة ونزلنا تغدينا احلى غدوة وانا النفسية عندي ززززفت. عالساعه 4 العصر طلعت المطار بشوف وضع الشنط قبل الزحمة ولقيت كونتر الماليزية شغالين جيت عطيته التذكرة ونظر فيني قال حياك الله اخوي الاسير قلت هلابك قال فلان قريبك قلت ولد خالي جلس يسئلني عنه وعن اموروه طلع زميل دراسه سابق معه.
انا الحين حطيت ايدي بمويا باردة لان عارف الوزن بمشيه يوم حطيت الشنط على الميزان طلع الوزن 38كـ
قلت ابي الهاند باق والباقي لاوكلاند لاهنت. ومشاها.
رحت ودعت الشباب وقلت عاد يالله اسرو وراكم عرس الليلة وقدامكم خط انا كلها ساعتين وماشي.
اي بدأت السخونة تشوف شغلها بجسمي وانا انهديت خلاص والرحلة مادونها الا ساعه ونص.
دخلت غرفة المدخنين الله يفكنا منه اخذت لي سجارة مع كوب موكا. شوي فتحو بوابة الرحلة اواصق سرا واغلبهم عوايل سعوديين. ادور التذكرة والجواز ماني لاقي شئ ياهوووووه مو وقته ابد.
وانا احوس ادور من هنا هنا مافيه لاتذكرة ولاجواز ولاجوال ولا بوك. عرفت اني ودعت مافيها كلام.
الا ويشوفني هاك الشايب معه عائلته طالعن ماليزيا قال ياولدي مضيع شئ قلت اي ياعم جوازي وبوكي والجوال والتركت.
قال اهم شئ لايدرون جوازت المطار والا الشرطة بيحسونك ويمكن تروح عليك الرحلة.
واجلس الف الا يناديني الفلبيني اللي كان شغلا بالكافي قال مضيع شئ قلت اي جوال وبوك وجواز وتركت.
عطاني اياها بعد معاناة ساعه الا ربع والاقلاع ماباقي الا اقل من 20 دقيقة
حمدت ربي وطيران على البوابة يوم جيت مسكرينها من هنا والاقي الولد اللي كان عالكونتر ويكلم المشرف حقهم ويطلبون لي باص ويودوني للطيارة.
طلعت للطيارة وانا في حالة مزرية خلاص تعبان حدي. مانمت وسخونة وارهاق كلها اجتمعت بيوم السفر.
اقلعت الطائرة وهي من نوع :Boeing777-200 وتقيمي للطيران والطاقم 10 من 10 وشاشات وحركات عاد انا ماطولت ماجلست حتى 20دقيقة من اقعلت سحبتها نومة على طووول.
اعلن الكابتن الاستعداد للاقلاع بعد رحلة دامت حوالي 10ساعات ونصف وكلن شد حزامة وصلنا لكوالالمبور وكانت الساعه عندهم الظاهر 11 عاد انا تعبااان حدي وانزل واروح اختم الجواز وعطوني 30يوم واطلع للفندق والفندق بنفس المطار اسمه pan pacific وهذا موقعهم http://www.panpacific.com/ وسويت التشيك ان وعلى الغرفة دايركت. ونووم وطلبت منهم يصحوني قبل الرحلة بساعتين. فعلا صحوني واخذت لي شاور وبدلت ملابسي واخذت لي مضاد حيوي.
ونزلت وطلعت للمطار واروح للبوابة ودخلنا الطائرة قبل الرحلة بنصف ساعه وهي نفس الطائرة السابقة بس الفرق من بالكراسي فقط.
اقلعت واخوكم ينام مجددا
نمت ويمكن على مابقي عالوصول لاوكلاند 5ساعات لان مدة الرحلة 11 ساعه صحيت جداااااااا تعباااااان
ولا ويطلع على نفس الطائرة 4 شباب سعودين احدهم طبيب واثنين مبتعثين وواحد مثلي رايح لغة.
وافز لواحد جالس بالبزنس ويجي عندي ويروح يكلم السعوديين الباقين ويجي الدكتور ومعه شنطة اسعافات اولية يوم جاب مقياس الحرارة ويقيس الرجال وتطلع الحرارة 41 واخذ مضاد اقوى من اللي ماخذه بالفندق والحمد لله خفيت ورجعت ثاني نمت. الى ان وصلنا بالسلامة لأوكلاند التي لطالما انتظرت وصولي لها والاجواء امطار وخضار يفتح النفس يالبييييه بس .
عاد في راح اذكر لكم في الحلقة الجايه اجراءت المطار وكيف عديت منهم بـ 10 دقايق.
انتظروني وسامحوني النت هلايام مخلبط بالبيت اكلمكم من الكافي الحين بسبب انقطاعات التلفون بالحي عندنا بسبب المطر الحمد لله.
وجايكم بالصور .....
تحياتي للجميع
المفضلات