الموضوع: مساعدة عااااجلة يا أهل الكويت

مرحبا بأهل الكويت ...

أحنا عيلة من الشرقية جايين يوم الاربعاء في رحلة قصيرة لمدة يومين من مغرب الاربعاء الى مغرب الجمعة بإذن الله

و عندي بعض الاستفسارات ياليت تجاوبوني
أهم شي عندنا اننا ننبسط و نروح الاماكن اللي تستحق الزيارة و ما ودنا بشي يعطلنا أو يأخرنا لأن رحلتنا قصيرة و ودنا نستمتع بكل لحظة فيها

أنا سويت بحث و عندي بعض المعلومات ... بس ودي أحد فيكم يسوي لي جدول لهاليومين لأننا خايفين يفوتنا شي أو يغلبنا الوقت خصوصا ان معنا أطفال و جايين بسيارتنا ..

و هاذي الاماكن اللي ودنا نزورها .. و لو عندكم أي ملاحظة على أي مكان أو بديل ثاني قولوا .. ..

حاولنا نحجز في مارينا علشان المول يكون جنبنا أريح و أوفر للوقت بعد ما سمعت هنا انه رخيص بــ30 دينار .. بس تفاجأنا بالاسعار 250 دينار لسويت غرفة وحدة ؟؟؟؟
حجزنا مبدئيا فندق ثاني شامل الفطور و الغدا و السعر جدااااا رائع 90 دينار سويت غرفتين .. هل فيه عروض في فنادق أخرى أفضل ؟ أم هذا العرض يعتبر رخيص ؟

ما ودنا نلف و ندور بالسيارة و يضيع الوقت في المشاوير ودنا السكن و كل شي يكون قريب من منطقة السالمية أو الواجهة البحرية

المجمعات اللي ودنا نزورها : مارينا – شرق – الكوت .. بس الكوت عرفت انه بعيد و شطبته من اللستة
المدينة الترفيهية ... كم تبعد عن الفندق ؟؟ و هل هي الافضل في الملاهي ؟؟

المركز العلمي ... متى أوقات عروض الافلام و الدوام حقهم و كم اسعار الدخول للكبار و الصغار ؟؟ اذا ممكن رقمهم أو اذا عندهم موقع الكتروني

مسرحية طارق العلي .. أوقات العرض و اسعار التذاكر و هل يدخلون أطفال صغار تحت السنة ؟؟ و مين الممثلين اللي معاه ؟؟ و هل المسرحية اساسا تسوى الواحد يروح لها ؟؟

مطعم ميس الغانم ... وين مكانه بالضبط و كم أسعاره ؟؟ هل لازم حجز قبل ؟؟

فريج صويلح ...اللي أعرف انه شعبي بس كيف أكله تمام ولاّ ؟؟ وين مكانه و كيف اسعاره ؟؟ و هل قعدته مفتوحة أو داخلية ؟؟

سوق المباركية وينه بالضبط... أبغى المحلات العادية اللي فيه مو الشعبية , فيه محل سمعت عنه اسمه شكيرا ودي أروحه ... وين الاقيه و هل السوق كبير و يضيّع ؟؟

و أخيرا من وين أجيب البقصم الكويتي ؟؟

ألحين عرفتوا الأماكن و أنتظر منكم الجدول في أسرع وقت السفر بعد بكرة... و اعرف أهل الكويت ما يقصروا ان شاءالله ...

مواضيع عشوائيه ممكن تكون تعجبك اخترناها لك:

• طلب للكويتين فقط ممكن ؟
• الإخوة أعضاء منتدى المسافرون العرب الكرام أرجو المساعدة
• هل هناك فندقين الكويت؟
• كيفية سفر الخادمات للامارات
• جوانزو بعيون عائلة إماراتيه
• مريديان تاور العاصمة مريديان الخليج العربي أسعار تبدأ من دينار
• المطاعم المجرّبة في الكويت
• إلى جميع الأعضاء بالمنتدى وضيوفه
• للبنات بس والشباب ليش لأ
• فزعتكم يا اهل الكويت او من زارها
• زيــارتــي الــى الــبيـــرق
• استفسار عن هذي الاماكن الله يجزاكم خير
• ايهما افضل مارينا مول او رويال ان
• أهل الكويت ممكن مساعدة ممكلة البحرين
• استفسار عن مواعيد العمل في عيد الفطر جعلنا وإياكم ممن يشهده
• دليل الفنادق في الكويت
• اخواني كيف الوصول الى بر الجليعه بسرعه
• استفسار عن شقق بودل الفندقيه
• استفسار مهم الله يجزاكم خير
• موقع مسجد مشاري العفاسي؟

ياهلا اختي حياكم الله

بالنسبة لمجمعات التسوق فتح قبل فتره الأفنيوز مول وهو الأكبر حاليا بالكويت ارجو ان تضيفونه الي القائمة وهوفي منطقة الري على الدائري الخامس ويبعد عن السالمية ربع ساعه بالسيارة


المدينة الترفيهية يفضل ان تكون بعد الساعه 5 المغرب علشان تكون الاجواء رائعه وهي ممتعه جدا والشي الحلو التذكرة المفتوحة يعني عند الدخول كل العاب بالمجان عدا اللعاب الخطيرة اللي فيها مغامرة

بالنسبة للسكن بالسالمية الافضل ريتز السالمية وبودل سويت وسارة بلازا

بالنسبة لمطعم ميس الغانم فهو على شارع الخليج العربي بجانب السفارة السعودية بالقرب من ابراج الكويت بس المطعم زحمة على طول ولكنة يستحق

وهذا موقع المطعم الأكتروني
http://www.maisalghanim.com/News&EventsA.asp

شكرا للأخ رحال ما قصرت
بانتظار الاجابة على باقي الاسئلة

الأخ eggghead
مشكور على المعلومات و النصايح و أكيد الكويت بلدنا الثاني و ان شاءالله ننبسط فيها

بس ياليت تجاوبوني على باقي الأسئلة لو سمحتوا
المسرحية
المباركية
المركز العلمي
فريج صويلح

و مشكورين مقدما

هلا اختي حياكم الله بالكويت وانشالله تقضون وقت حلو وممتع

انا انصحكم بحديقة الشعب لانها اقرب لكم من المدينه الترفيهيه

ويوجد بالمركز العلمي 3 اقسام الاول الاكواريوم انصحج فيه والاي ماكس ماعندي فكره عن اوقاتهم وفي قسم للاطفال واايد حلو

وافضل لكم تاخذون التذكره الشامله لل 3 اقسام اعتقد 7 للكبار و3 ونص للصغار (مو متأكده من الاسعار)

وهذا موقعهم : http://www.tsck.org.kw

بالنسبه لمسرحية البيت بيتك الصراحه مارحتلها بس مسرحيات طارق العلي دايما حلوه وتضحك واهو عرض واحد يوم الاربعا والخميس بس مو عارفه الوقت بالضبط

ولا تحاتين عادي يدخلون اطفال صغار تحت السنه اما اسعار التذاكر 10 اول شي و 7 بالوسط و5 اخر شي

فريج صويلح مطعم شعبي يوجد بشارع سالم المبارك بجانب المارينا وماركس سبنسر وقعدته كبائن وكل الاعضاء اللي راحو للمطعم يمدحونه

سوق المباركيه سوق كبير فيه 3 اقسام سوق السمج وسوق الخضرا والاسواق الشعبيه اتوقع محلج تحصلينه مع المحلات اللي بين الاسواق الشعبيه او اللي عند القهاوي والمطاعم

البقصم الكويتي تحصلينه بمحل الشمالي او محل الوطن بسوق المباركيه

اتمنى اني فدتج واي خدمه احنا حااضرين لاتترددين ؟

حياك الله اخوي بالكويت ...احب الكويت ....حبتك العافيه و الله ما قصرت
بششرنا عننك .. المفروض ان اتكون عندنا !!!
شلون الاحوال ان شاء الله مستانسين ؟؟
اتمنى لكم اقامه سعيده

مشكورين كل اللي ردوا

والله انبسطنا كثيييييييير و الكويت حبيناها أكثر و أكثر و قررنا نروح كل فترة ...
و هذا تقرير مختصر و بسيط ودي أكتب أكثر بس للأسف ما عندي وقت

الأربعاء : وصلنا الكويت على 2 الظهر ... دخلنا الفندق "منتجع النخيل" و ريحنا شوي ..تغدينا في الفندق و كان الأكل رووووعة ..بوفيه متنوع و لذيذ ... بعدها ارتحنا في السويت لبعد صلاة المغرب ... بعدها خذنا فرة في الشوارع و قلنا ندور ميدان حولي عشان المسرحية , بعدبن شفنا السالفة مطولة قلنا بلاش منها , و رحنا مارينا مول و كان حلو بس زحمة موووت و صغير أنا تخيلته أكبر ... و رحنا المطاعم اللي على البحر بس ما قعدنا فيها ... طلعنا و رحنا سوق شرق عجبني أكثر من مارينا بس نفس الشي توقعته أكبر ... و تعشينا هناك ... بعدين فرفرنا في شوارع الكويت و رحنا عند الابراج بس ما دخلناها ... بعدبن رجعنا الفندق ...

الخميس : بعد الفطور رحنا المركز العلمي و انبسطنا فيه عجبني كثير و ولدي انبسط على السمك في الاكواريوم خصوصا سمكة clown fish قام يصارخ نيمو نيمو ...و شفنا فيلم ant pully ثلاثي الابعاد .. بعدين رحنا سوق المباركية و اشترينا بقصم الشمالي ... بس كنت أدور محل و لا حصلته ... بعدين رجعنا الفندق و صلينا المغرب و تعشينا في الفندق , كلمت مسرح نقابة العمال بميدان حولي قالوا لي المسرحية موقفة ... قلنا نروح المدينة الترفيهية ... رحنا و وصلنا بصعوبة لأنها بعييييييييدة في آخر الدنيا و مافي لافتات تدل عليها اللهم الا وحدة بس قبلها يمكن بـ عشرة كيلو أو أكثر !! لكن لما رحنا و لعبنا و انبسطنا قلنا والله حلووووة تسوى المشوار , انبسطنا هناك كثيييير خصوصا الجندول الاسترالي و القارب الافريقي , و كان ودي أركب اللرولركوستر"قطارالموت" بس انتهى الوقت ... وصلنا هناك 10 و نص و طلعنا مع أغنية "ياربنا ياربنا " يعني على نهاية الوقت الساعة وحدة ... رجعناالفندق و نمنا ..
الجمعة : بعد الفطور رتبنا أغراضنا و طلعنا من الفندق الظهر ... رحت صالون ديسانج كان عندي موعد سويت المقص الحراري ... بعدها نزلنا على الفحيحيل و رحنا مجمع الكوت و تغدينا فيه ... عجبني كثير خصوصا النافورة اللي فيه و قعدات البحر روووووعة أحلى من مارينا و شرق بمليون مرة .... لكن ما فهمنا كيف صاير المجمع ما رحنا غير قسم واحد و ما صار فيه وقت نكتشف ... طلعنا من هناك على 6 و وصلنا 10 و الحمدلله ...

كان ودي أتسوق و أرجع محملة ... لكن للأسف ما كان فيه وقت و لاحظت ان المحلات أغلى من الشرقية فهونت و رجعنا و سيارتنا كأنها تريلة بقصم "كل من سمع اننا رايحين الكويت وصانا على بقصم""
و كانت الرحلة ممتعة و الحمدلله الجو كان حلووو خصوصا بالليل ... و ان شاءالله نكررها مرة ثانية في الشتاء ...

الحمد لله على سلامتك أختي أحب الكويت ..

(( وأنا بعد أحبها )) :106: :24: :106:

بس بغيت أسألك على (( المقص الحراري )) عباره عن إيش ؟؟

والمركز العلمي هل يشبه سايتك اللي بالخبر على الكورنيش ؟؟

وشاكرة لك مقدماً .

الحمدلله على السلامه اختي احب الكويت


نورتينا

الحمد لله على السلامة اختي أحب الكويت
المرة القادمة ضروري تزورين مجمع الأفنيوز لأنه أكبر واحد بالكويت..
هذي الساعة المباركة أختي وزورونا مرة ثانية ما دام انبسطتوا

الحمد لله عالسلامه
و ان شاء الله تتكرر الزيارات الحلوه

حمدالله علي سلامه وساعه المباركه

سحابه
الله يسلمك اختي
بالنسبة للمقص الحراري .. هو مقص ليزر يقص أطراف الشعر و يمنع تقصف الاطراف ..سعره 25 دينار .و موجود بس بصالونات ديسانج الكويت و دبي .. بس ديسانج اللي في البحرين ما عندهم ...

و بخصوص سايتك .. ما رحته ولا مرة , كل مرة نعزّم نروح نغير راينا و نروح مكان ثاني ... بس ما أتوقع مثله لأن هذا فيه سينما ثلاثية الابعاد +أكواريوم و هم الاكبر في الشرق الاوسط .. و فيه صالة تجارب و استكشاف و يمكن هاذي مثل سايتك ...
ان شاء الله أكون أفدتك

روان بنت الكويت
1 فاهم
زعطوطة
eghead
old man

مشكورين اخواني على ردودكم و ترحبيكم و الكويت منورة بأهلها و ان شاءالله نزورها مرة و مرتين و ثلاث و نروح كل الاماكن اللي ما رحناها والله يعطيكم العافية و يحفظ لكم الكويت الغالية
و على فكرة أنا عيد ميلادي 25 فبراير

المشاركة الأصلية كتبت بواسطة أحب الكويت
http://www.arabtravelersforum.com/tr...9/#post1253249


و على فكرة أنا عيد ميلادي 25 فبراير




واااو ونااسه ... ما شاء الله
تبادلين بشهادة الميلاد

يا حليلك يا زعطوطة
تصدقين قلت لزوجي خلنا نروح في هلا فبراير بشهادة الميلاد يمكن يعطونا هدية ! لأني سمعت ان المولودين في عيد الاستقلال او التحرير يعطونهم ... قال لي لا يكون انتي كويتية و أنا مادري ؟؟ وش جابك لهم يعطونك هدية ؟؟ :108:
بس أنا فعلا سبحان الله أحب الكويت من صغري رغم اني لفيت العالم بس مدري ليه أموووت في الكويت شكل تاريخ ميلادي مأثر علي ,لأن أمي تقول اني كنت أترقص و أنا عمري ثمان شهور على النشيد الوطني اذا انتهى الارسال من تلفزيون الكويت ... يعني أستاهل الهدية !! بس الهدية وصلت خصوصا لما شفت الابراج قدام عيوني ... و بعد ما مشينا من قدام الابراج قلت لزوجي : ترى عادي لو أموت الحين :109: !! بعد ما تحقق حلمي و شفت الكويت
. الله يحفظ الكويت من كل شر

هههههههههههههههههههه حبتج العافيه اختي احب الكويت



حياج عندنا بعطلة العيد الوطني وعيد الاستقلال



احنا نحتفل فيج ولاتحاتين بنعطيج هديه

و الله انج تستاهليين هدية لا و هدية منني
نكج حلو و كلامج احلا
تستاهلين كل خير اختي
و ليش تبين تموتين الله اطول بعمرج و ان شاء الله تشوفين الكويت مره ثانية
حلم الكويت ما ينتهي
تعالي و شرفيها كل وقت بيتج و مكانج
و الهدية تنطرج بالمطاار

اختي احب الكويت اولا سلامه عمرج من الموت وان شاء الله الله يطول في عمرج وتشوفين عيال عيالج

رحلتكم سريعه جداااااااااااا وحلوه واختياركم للاماكن جميل جدا بس الترفيهيه توصلونها الساعه 10 بالليل هذا اللي خربط الموازين لانها بالفعل يبيلها من العصر لليل وبعيده بعد شوي
لكن تفاجات بان المارينا صغير وسوق شرق صغير معقوله صغار ؟؟؟ يمكن مالفيتيه عدل وماشفتيه


ان شاء الله المره الجايه تشوفين الكويت عدل وتروحين الافنيوز عاد لاتقولين انه صغير لانه يطيح الحيل من كثر المشي

وحياج الله في الكويت والهديه نقدمها لج عربون محبه تقديرا لحبج للكويت
وحياكم الله في الكويت وان شاء الله ماتكون المره الاخيره في زيارتكم لنا

حمدلله على السلامة احب الكويت واحنا نحبكم بعد وانتي ببلدج وبين اهلج
وتسلمين عالتقرير