الموضوع: أول مره أزور الكويت وهذا إنطباعي عن الكويت وأهلها بدون مجامله

منذ مده طويله وأنا أفكر انا وزوجتي في زيارة دولة الكويت والهدف من هذه

الزياره عندنا شوق اننا نشوف دوله خليجيه نسمع عنها بس ما زرناها قبل,

والسبب الثاني والمهم بالنسبه لي أنا الأطلاع على محلات الأزياء والملابس

النسائيه في الكويت وخصوصا بعض المحلات المتخصصه في الأسبورات

النسائيه - صنع الكويت - وذلك بحكم طبيعة عملي ( املك عدد من محلات

الأزياء في السعوديه ) ... لأني كنت أشوف العوائل الكويتيه برى يكشخون

ويتميزون بأناقه واضحه ...وعرفت ان هناك عدد من المحلات ( الماركات)

وتصنع في الكويت بموديلات إيطاليه واقمشه فرنسي وإيطالي !!!


وفعلا وصلت الكويت عن طريق الخطوط السعوديه..وكانت الرحله مليانه (( شغالات ))

لأنه كان آخر اسبوع امتحانات في السعوديه وبداية إجازه في الكويت..

وفي مطار الكويت تفاجأت أنا وزوجتي بمعامله مميزه جدا حتى اني

كنت أستغرب !!! لا يكون انا أشبه أحد مشهور عندهم :101: ؟؟ أقسم بالله

قمة الأخلاق في التعامل خصوصا من ظابط الجوازات الي شافنا واقفين

بسرى (( خطأ مو حق الخليجيين )) وجانا بكل أدب وابتسامه عريضه وطلب منا

أننا نجي عند شباك فاضي وفعلا رحت وختمت وألتفت عليه أشكره وكان رده

الي ماراح انساه أبد (( يوبا إحنا ما نعتبركم إلا أهلنا ونخدمكم بعيونا !!!))

فقلت في نفسي (( هذا أول الخير ويبشر بخير))..


بعده توجهت إلى فندق كنت قد حجزت فيه وهو فندق مارينا و يقابله

سوق مارينا من الجهه الأخرى ويربط الجهتين جسر خاص بالمشاه ويقع

على البحر في منطقة السالميه ( منطقه تجاريه وحيويه في الكويت ..

وعند وصولي للفندق أخبرني موضف الأستقبال بأن السعر تم تخفيضه

إلى75دينار بعد ان كنت قد حجزت بالفيزا بسعر 88دينار ( سعر صرف

الدينار حوالي 13.25 ريال) وذكر لي ان هذه أسعار الصيف الجديده

المخفضه ... فشكرته وقلت في نفسي (( هذه الثانيه ))



* أتوقف عند هذه النقطه وأكمل زيارتي لدولة الكويت لاحقا وإنطباعي

وزوجتي عن الكويت وأهلها...

مواضيع عشوائيه ممكن تكون تعجبك اخترناها لك:

• ممكن اسعار التذاكر للسعوديه وبانكوك
• صور مجمع سوق المطار الجديد
• تقرير مصور عن مدينة الألعاب المائيه اكوابارك
• هاميس من مصر
• مطلوب شقة بالفراونية او خيطان
• لبنات الكويت
• أحلى موضوع إلى أهالي الكويت الحبيبة ،،
• شقق الجهراء؟
• أول مشاركاتي مطعم زمان أول
• دلوني وين القاها
• تكفون يا أهل الكويت أسعفوني بمطاعمكم
• اريد معرفه شروط دخول اليمنيين للكويت ضروري ياخوان ويا اخوات مساعدتك
• استفسار تكفووون لا تردوووني
• ممكن مساعدة يا اهل الكويت
• بسافر الإمارت وأبي شوركم
• افيدوني مأجورين
• طلب من اهل الكويت الغالين
• الفزعه يا اهل الكويت
• دليل هواتف كويت لووك
• غريبة ياالخطوط الكويتية

البلد حلوه باهلها

و يعطيك العافيه و متابع معاك

ياهلا اخوي حياكم الله في بلدكم الثاني وانشاء الله تكون البلد اعجبتكم ومحد قصر معاكم

الكويت واهلها يقولون لك ولكافه أهل الخليج

ياهلا ومرحبا فيكم والبلد بلدكم كلكم


ومافيه فرق ...... خليجنا واحد

حياكم الله
وناطرين باجي التقرير

حياج الله بالكويت

بانتظار باقي انطباعاتك...

حياك الله بالكويت

ناطرين باقي التقربر

حياكم الله ببيتكم وخليجنا واحد دوم يا رب

هذي الساعه المباركه وانتظار القرير

مشكورين كلكم

نكمل

فندق مارينا في الكويت حسب ما قيل لي من الفنادق الحديثه , ويتميز الفندق

الذي يتكون من طابقين أو ثلاثه فقط ... يتميز بالخدمه :113: بصراحه خدمات

الفندق :24: وهو بالمناسبه ليس فخم لكنه مريح وموقعه ممتاز للسائح وموضفيه

عسل وله إطلاله جميله على خليجنا الغالي ..

بمناسبه الراحه قالت لي زوجتي قبل نوصل الفندق :- ماتلاحظ ان الكويت مريحه

للنفس ؟؟؟ فقلت لها على طول (( فعلا كان عندي هذا الشعور لكني ماعرفت

أعبر عنه !!!))

عموما لكي أكون أكثر شفافيه وصدق (( هناك خلفيه سلبيه في ذهني عن

أهل الكويت بسبب بعض المواقف الرياضيه القديمه وبسبب بعض وسائل الأعلام

والمنتديات ... ولكي أكون أكثر جرأه كنت احس ان معظم الكويتيين بهم غرور

وعجرفه _ وأعتذر عن هذا التعبير - ))

لكن ما لبثت هذه الصوره ان تلاشت من أول خطوه خطوتها في أرض الكويت..

كانت الساعه حوالي التاسعه مساءا عندما قررنا ان نخرج لنرى الكويت وأن لا

نضيع أي دقيقه بسبب ان مدة بقاءنا فقط يومين بسبب إرتباطي بعدها

بسفره خارجيه ..

نزلنا للبهو وسألت موظف الأستقبال عن أفضل وسيله للتنقل وماهي الأماكن

التي تستحق الزياره ...مع التركيز طبعا على الأسوااااااااق لقصر المده ولطبيعية

الجو في هذه الفتره ... فأعطاني مجله ( أضن انها خاصه بالفنادق) وفيها دعايات

للمحلات المشهوره في الكويت والأسواق والمطاعم ........ألخ كما دلني على

طريقه جيده للتكاسي (( أفضل من عندنا )) وهي تاكسي بالطلب ..يعني قبل

تنزل تدق عليه 5 دقايق وهو قبال الفندق أو السوق او المطعم أو اي مكان انت

موجود فيه (( على فكره الكويت تتميز بسهولة التنقل بين المناطق.. وأعتبرها

انا من أقل العواصم الخليجيه إزدحام )) والسبب كما ذكر لي فيما بعد أن رخصة

القياده والسماح بالسياقه في الكويت ليست متاحه لكل من هب ودب زي ربعنا :112:

يعني ما تلقى في الكويت سباك معه مازدا موديل 76وشايل سلالم وعده فوق

سيارته ويزاحم خلق الله في الشارع !!! ومستحيل تشوف وانيت مكسر يسوقه

واحد كان بديرتهم ما يعرف شكل السياره !!! ويملى الوانيت عمال ويالله انه

يشوف طريقه !!! واسهل شيء عنده انه يصدم سيارتك لأن عنده تأمين !!!


طبعا هذي ماتشوفها بالكويت ...

بصراحه شعب رااااقي جدا جدا في القياده لدرجه إنك قليل تشوف حوادث مروريه

أو قطع إشاره أو تجاوز بسرعات عاليه من اليمين أو أو ......لا بكل أمانه هذي نادر

تشوفها بالكويت وإن صارت فهي لشاب مراهق وفي نطاق ضيق ...

المهم نرجع لموضوعنا

طلعنا من الفندق في التاسعه والربع مساءا تقريبا وتوجهنا إلى مركز كبير للتسوق

قال لنا سائق التكسي بأنه أشهر سوق بالكويت وهو (( سوق شرق)) ويبدو أن

إسمه مأخوذ من المنطقه التي يقع فيها السوق ( وليصحح الأخوه الكويتيين معلومتي)

ولم يستغرق المشوار أكثر من 7دقائق حتى كنا عند بوابة السوق الذي يتكون من

طابقين وبه عدد كبير من المطاعم ومحلات التسويق المختلفه وهايبر ماركت وبه

أيضا صاله للسينما ...

وقد أخبرنا سائق التكسي أن المحلات التجاريه تغلق عن العاشره مساءا !!! يعني

يقصد إذا تبون تتعشون خلوا الأكل بعدين ..... وفعلا توجهنا إلى المحلات المهمه

وهي (محلات الملابس) والماركات

وكان لي موقف ظريف في السوق .... تعبت من الكتابه أكمل بعدين

.

هذا الكويت وصل على النبى

حياك الله بديرتك الثانيه

فعلا انا كان عندي انطباع عن اخواننا الكويتيين بس ببعض سفرياتي للخارج تعرفت على مجموعه اقل مايقال عنها انهم رجال بمعنى الكلمه وماحد يعرفهم الا اذا احتك فيهم وتكونت صداقه بيني وبينهم لدرجة تبادل الزيارات بينا اروح الكويت لهم خاصه ويجون لي الشرقيه خاصه وبينا مواقف كثير

فعلا ادام الله علينا المحبه ومن عقبها مااداني احد يتكلم عن الكويت والكويتيين وادخل معه في مهاترات


ادامكم الله من شعب طيب ومضياف وراااااقي

الحمدلله على السلامه



وحياكم الله عندنا



وانشالله تكونون قضيتو وقت حلو وممتع



مشكور اخوي على التقرير وبانظار البقيه لاتطول

اخوي انا جايه لسوق شرق بس مايقفل الساعه 10 مساء تقريبا 11 مساء


وشكرا على الموضوع الرائع

مرحبا بكم مره ثالثه

نكمل

دخلنا سوق شرق وتوجهنا إلى المحلات الخاصه بالألبسه وكنت أركز على

أسماء المحلات الي ماهي موجوده عندنا وفعلا حصلت محلين أو ثلاثه ..

وفي أحد هذه المحلات وإحنا قاعدين نتفرج على البلايز والفساتين ...دخل

صاحب المحل- ابوعماد - ( تاجر ملابس سوري ) سبق ان تعرفت عليه في

تركيا عن طريق مكتب الشحن في اسطنبول وقد تقابلت معه عدة مرات

وكنت أعرف انه يملك عدد من المحلات في الكويت والأمارات .....

المهم الرجال عرفني وبدأ يسولف... وينكت ويسألني عن سوقنا في

السعوديه ....الخ وكانت المدام في جهه أخرى من المحل ..بس طبعا

تعرفون طبع الحريم (( موجهه اللاقط جهتنا ...وتتسمع )) المهم الأخ

أخذ راحته في السوالف وسألني :- هادي ياللي معك مرتك الأولى

وإلا التانيه :112: ( يعني على باله ينكت !!!)

وطبعا المره أول ما سمعت هالجمله جات منطلقه بسرعه 180..وقالت

وش يقول هالشايب !!! قلت يابنت الحلال يمزح

والأخ ولا على باله ( قاعد يضحك) !!!

التفتت علي زوجتي وقالت والله ما أدري عنك أنت وسفراتك ... لكن من

اليوم ورايح رجلي على رجلك ..

وجا ابو عماد يقال لك بيلطف الجو وعزمنا على العشا !!!

قلت (في نفسي) إيه هين ...يكون خير !!! ماعاد عقب كلامك عشا ولا غدا ..

أعتذرت منه وطلعنا .. (( نرجع للموضوع شكلي أبعدت شوي))


المهم بعد ما خلصنا جولة التسوق وما شريناشيء بس نتفرج وكانت خيره(( لأننا

ثاني يوم إكتشفنا أن سوق شرق لاشيء في الملابس بعدما زرنا سوق آخر))

توجهنا الى جهة المطاعم وكان هناك فرع لمطعم شيلز العالمي بس للأسف

دورنا طاوله للجلوس وما حصلنا من الزحمه (( قلت لكم كانت بداية العطله

الدراسيه في الكويت )) ويوم لفينا لفتين وما لقينا مكان أقترحت علي المدام اننا

نروح السينما ونخلي العشاء بعد الفيلم ...بس أنا بصراحه ترددت ...

وقلت أشوف نوعية الحظور أول ونوعية الأفلام (لأن الساعه كانت متأخره)

وبصراحه ما ودي أشوف نفس المنظر الي شفته بأحد المجمعات التجاريه

في البحرين-مجمع السيف-قبل سنتين بسبب ذهابنا للسينما في مثل هالوقت

بس أول ما دخلت البهو حق السينما ...تفاجأت ان معظم الحظور عائلات كويتيه

وشباب أيضا لكن محترمين انفسهم ومحترمين الي حواليهم ..

وبصراحه لاحظت ثلاث ملاحظات لفتو انتباهي من اليوم الأول في سوق الشرق:-

1- الكويتيين يشكلون غالبيه وليس مثل بعض دول الخليج ( تدخل السوق

وتطلع منه ما تشوف المواطن ).

2- شباب الكويت ( رغم كثرة وجود الي لبسهم وقصات شعرهم ما تتناسب

مع مجتمعنا الخليج )لكن كلمة الحق أنهم محترمين الي حولهم من الناس وكل

واحد في حاله وربعه الي معه ... يعني بالعربي ما منهم أذى .

3- كثافة التواجد الأمني في السوق ( بلباس مدني ) وقد لا حظت ذلك وعرفت

أنهم أمن من بطاقاتهم الي يعلقونها على الثوب والجهاز الي معه .

المهم ما أطول عليكم فعلا أخترنا أحد الأفلام الأجنبيه ودخلنا نتفرج على الفيلم

وما طلعنا الى متأخرين ( حوالي الساعه وحده بعد منتصف الليل ) وقد كنت قد

أتصلت على التكسي قبل خروجنا بحوالي 10 دقائق وفعلا لمن خرجنا وجدنا

السياره في انتظارنا ...ركبنا السياره وطلبنا من السائق يمر على الطريق بمطعم

ناخذ منه عشى ( تيك واي ) لأننا ميتين من الجوع !!

فأقترح علينا سائق التاكسي ان يذهب بنا الى منطقة المطاعم في السالميه

وذكر لنا ان هناك المطاعم كلها فاتحه هالوقت والأكل أشكال وأنواع ...وبدأ يتكلم

عن المشاوي والشاورما و.... و .... فقاطعته وقلت له ترى إن ما سكت باكلك من

الجوع الي فيني ... يا خوي خلاص سألتك عن مكان المطاعم بس :112: يقولون

الأولين ( الجوع يخرب الطبوع ) !!

وفي الطريق لمطاعم السالميه ويوم صلنا عند سوق المارينا الي قبال فندقنا

واشوف لك مجموعه من المطاعم على اليمين قبل السوق .....قلت له بس

يا الأخو ...بس وقف هنا ... قال لسى ما وصلنا وبعدين ميصلح ادخل من هنا!!!!

قلت ليش .. قال هذا الشارع خروج بس لازم اروح له من خلف السوق ...

عشان ما آخذ مخالفه ...قلت طيب ودنا له

وفعلا لف من خلف السوق ووقفنا عند مطعم ومقهى .... نسيت اسمه

وكانت قعداته روووووعه وحاطين بخاخات مويه زي الي في مقهى الشلال

عندنا ... وكان الجو فعلا حلو ( برغم ما سمعته عن جو الكويت ) بس فعلا

كان الجو ذاك اليوم رااائع راااائع ومريح والهواء لطيف ونسمات الخليج العربي

الحالم لا تزال في ذاكرتي ...

طلبت من سائق التكسي ان يذهب لأننا نوينا ناخذها مشي للفندق عقب

ما نتعشى( يميز الكويت الأمان المطلق الي تحس فيه وكأنك في حارةبيتكم

وبين أهلك يعني الساعه وحده بالليل زي 9 الناس سهرانه والحياة طبيعيه)

وفعلا دخلنا المقهى(المطعم ) وطلبنا الأكل ( كان المكان أطيب من الأكل

بس غنه مقبول برغم اني كنت اتمنى يهتمون بالمطعم اكثر من المقهى )

...وبعد ما تعشينا ... أقنعني المصري الي كان يخدم اني آخذ راس معسل !!

((مخصوص على قولته)) وذكر لي انه تم منع الشيشه في هالأماكن والبلديه

قاعدة تشدد على هالموضوع ...بس إحنا بالدس ...

ومن هالكلام عشان يغريني :114: وفعلا وافقت

( رغم أني غير مدخن ولا معسل ) بس الجو كان يشجع على الدشره !!!

جلسنا إلى مابعد الثانيه فجرا ثم توجهنا الى الفندق مشيا على الأقدام

وكان الجو جيد ذلك اليوم ويساعد على المشي ..

ff0000

حياك اخوي بديرتك وبيتك واهلك باي وقت والديره ترحب فيكم كلكم ياهل الخليج وانتو اهلنا وخليجنا واحد انا كل ماسافر اي دولة خليجيه ماحس اني مغترب بالعكس احس اني دايما اكون بين اهلي وناسي اهل الخليج الطيبين والله يديم المحبه بينه وحنا نرحب فيكم وانتو اهلنا ومنا وفينا وليه ماخبرتونه على شان نقوم بالواجب وحياكم الله مره ثانيه

أخوي المحترم أول شي إنت بين أهلك وبسط ديرتك ولا يقدر أحد يقلل من قدرك والمتكبر على نفسه والمتعجرف عجرفته عليها ....وكل بلد فيه الطيب والردي .....ولأنكم أهل طيب وكرم تشوفون الناس بنفس أطباعكم ومن عين رضاكم وكرم قلوبك الكبيره ....والله يا خوي إن أي واحد قصد في سفره خير ....ومتعة أهله ونفسه بالمعروف .... ترى الله يبي يوفقه للخير وأهل الخير ويوسع صدره ....ويبعده عن كل شر ...حتى لو يروح أقاصي البلدان

ثانيا : إذا جيت مره ثانيه الكويت وحبيت أي استفسار فأنا بالشوفه وعندك مشاركاتي القليله فيها توضيح عن بعض الأماكن والشباب ما يقصرون .

ثالثا : أتمنى منك إذا عزمت على زيارة الكويت مره ثانيه تراسلني على الخاص لكي أتشرف بالتعرف عليك وتزورني في بيتي فما قلته في حق بلدي..... أقله أن تكون في وسط عيني ......

وشكرا :106:

حياك الله اخوي ببلدك الثاني
وشكرا على الكلام الجميل اللي قلته بحق الكويت
وانشالله الزيارة تتكرر ولو محتاج اي استفسار فانا واخواني بالابواب بخدمتكم جميعا.
واعذرنا اذا بدر منا اي قصور

وحياكم الله

كرام وابناء ناس كرام ياأهل الكويت :101:

حفظ الله لنا خليجينا وحكامنا وشعبنا :113:

اثلجت الردود صدري فعلى قدر اهل العزم تأتي العزائم وماهو مستغرب منكم
:24:
كفو كفو :24:

بصراحه اسلوبك مشوق ورائع

كلمة حق في أهل الكويت

كانت لي زيارة خاطفة لمدة يومين وللاسف انها صادفت مباراة السعوية والكويت في كاس الخليج ما دريت عن المبارة الا على الحدود يوم وصلت بسياراتي جوزات السعودية قلت للي معي غريبه جوازات السعودية فاضية قال وعلى باله فاهم بتلقى الزحمة قدام عند جوازات الكويت يوم وصلنا لا لقينا زحمه ولا شيء حتى الموظفين ما لقيناهم :109: قال اللي معي شكلنا غلطانين :109: المهم لقيناهم في غرفة مجتمعين و متحمسين وانا مدري وش السالفة يوم شافوني رحبوا فيني وقام واحد وقال تفضل ( بصراحه انا قلت لا يكون في وقت للدوام وانا مادري) قالي: لا بس المباراة باديه :11ight: وانا اقول اي مباراة :109:

بصراحه كان الاستقبال حار ممزوج بحسن الخلق والدعابه ( يقولون ياليت تفوزون وانا اقول ياليت انتم تفوزون) ايه هين :109:

المهم دخلنا وسبحان الله صار خويي مشجع رياضي يبي يشوف المباراه يابن الحلال وش جاك المهم وقفنا في محطة وسالنا واحد كويتي الله يجزاه خير رحب فينا وعزمنا على بيته لكن اعتذرنا ووصف لنا مقهى نسيت اسمه وقال انتبهوا من المتعصبين (يقصد في الكوره) المهم أول ما دخلنا المقهى ويجي هدف للسعودية ويقوم ابو الشباب يصفق متحمس وانا ميت عليه ضحك :109: سالني واحد ليه تضحك قلت لانه ما يعرف ولا لاعب :109: وبعدين جا هدف الكويت التعادل وخذ ياتصفيق وتشجيع وبصراحه ما سمعت الا كلمة وحده ( طبعا سبه ) لكن الله يحللهم لو انها عندنا كان شفتوا عقل ونعال وانتم بكرامه :109:

خلصت المباراة وطلعنا طبعا ما ندل ولا شيء و ما درينا الا حنا في الشارع الرئيس قدام الملعب انواع الزحمه قال اللي معي قفل البيبان وصك الداريش و تلطم

حياكم الله



والكويت والسعوديه اهل




متابعين معاك لاتطول علينا

اسلوبك جدا رائع في سرد القصة

يوجد بعض الملاحظات احتفظها بنفسي

على العموم يعطيك العافية

هلا والله اخوي وهذي الساعه المباركه اسمحلي ارد على تقريرك من الاول

اولا اللي بينا نحن شعب الخليج وخصوصا الممكله العربيه السعوديه اكبر من مباره لاراحت ولاجت


وارجوا من كل المتعصبين ان لاتؤثر المباريات على حسن الجوار بينا لاننا اخوان في الدين والنسب والدم والجيره وكل شي


بالنسبه للرخص عندنا وعندكم خير والحوادث الله لايجيبها الكويت من اكثر دول العالم بالحوادث وخصوصا الحوادث المؤسف اللتي توؤدي الى الوفاه وذلك بحسب فله الشعب واذدياد المراهقين الشوارعالمفتوحه والسيارات السريعه اللهم احفظ شبابنا من شر الحوادث


تقريرك حلو ومبسط ومتوني من الظحك على صاحبك السوري اللي حطك في مأزق حرج جداااااا

وانت سكنت في فندق رائع جدا وهو المارينا من اجمل الفنادق في الكويت وكل شي بالقرب منك

متابعين معاك للاخر وياليت تذكر السلبيات وصدقني راح تشوف صدرنا وسيع جدا لاي انتقاد لاننا نحاول ان نكو ن الافضل وذلك باخذ السلبيات وتدراسها وتداركها


متابعين معاك للاخر

حياكم الله جميعا من جديد في الجزء الأخير (( أقول ان شاء الله))

لأني بأحاول أختصر قدر الأمكان...

وقبل لا أبدأ أشكر جميع الأخوه الي تواصلوا معي بهالموضوع وأسمحوا

لي أخص بالشكر الجزيل

يعقوب 2005 و kow80 ومسافره كويتيه والأخ ناصر الكويتي وأقول

للأخ ناصر الي طلب ذكر السلبيات (( أخاف ينقلب مدحكم لي ذم :110)

عموما انا مخطط اكتب بعض السلبيات البسيطه في آخر الموضوع

بس هاه لا تزعلون علي :108:

نرجع للموضوع

طلعنا من المطعم وفي طريقنا للفندق تفاجأت بمجموعه كبيره من

من المطاعم والجلسات والمقاهي على الجانب الآخر من سوق

المارينا وعند مرسى القوارب وكان المكان لايزال به حركه وقعدات

وناس رايحه وجايه رغم ان الساعه كانت بعد الثالثه فجرا !!!

فالتفتت الي زوجتي وقالت هالمكان بكره ماراح نفوت الجلسه فيه

بس خلنا نخطط في اي مطعم رايحين نتعشى :114:

ضحكت عليها وقلت نعنبو بليسك تونا شبعانين وقاعدين نهضم

وانتي تخططين على العشى بكره !!!

وإحنا قاعدين نمشي في الممر لاحظنا لوحة (( كرسبي دونات))!!

:11ight: دونات كرسبي !!! طالعتني مرتي وقعدت تضحك ..والسبب

انها تعرف اني أحب هالنوع كنت كل ما دخلت محل دونات عندنا أقول

لهم ليش ما تفتحون فرع لكرسبي دونات زي الي بلندن !!

وتفاجأت بوجود فرع لهم بالكويت !! ( طبعا يوم جيت إمشي للرياض

حملت معي كراتين كرسبي والناس بالمطار قاعدين يطالعوني

ويقولون هذا وين رايح !!! وش هالقروي !!! ما قد شاف خير !!

وطبعا مرتي رفضت تشيل معي تقول والله فشيله !! بس وش

أسوي أحبها -قصدي الكرسبي- !!!) للمعلوميه عقابا لها على

موقفها وزعت كل الكميه على اخواني وخواتي وخليت لي شويه

وطبعا حرمتها من متعة التلذذ بمزمزة الدونات مع فنجال القهوه .

(نعود لموضوعنا - ياكثر شطحاتي)

دخلنا الفندق وصلينا الفجر ونمنا على أمل اننا نقوم بجولة اليوم

الكامل إبتداءا من الساعه 12.5 ظهرا وفعلا اول ما قمنا وغسلنا

وجيهنا وصلينا الظهر طلعنا علىطول الى سوق مارينا مول ودخلناه

حوالي الساعه 1 الظهر وتوجهنا الى مقهى ستار بكس وخذنا لنا فنجالين

قهوه مع كعكه تقاسمناها بالنص ( فكة ريق يعني)..

وبعد ماتقهوينا وريحنا حوالي ساعه , بدينا نلف في المجمع وهو يتكون من

طابقين كمراكز ومحلات تجاريه بالأضافه الى طابق مطاعم وقعدات ويوجد

بالسوق أيضا صالة سينما :24:

عموما بدأنا بلف السوق محل محل وممر ممر وكان التركيز زي ما قلت قبل

على الهدوم وفعلا حصلنا كذا محل يبيعون الي نبي بس برضه (ماشرينا شيء)

وبعد الدوران في السوق حجزنا على فيلم عربي يبدأ حوالي الساعه 11 ونص

ويخلص قبل وحده بالليل..

ثم بعد ذلك توجهنا للمر الي يودي للجهه المقابله (المطاعم والمقاهي ) بس في

الممر حصلنا معرض لوحات عن التراث الكويتي والبيوت القديمه والسفن الشراعيه

و طبعا انا حطيت يدي على محفظتي لأني أعرف مرتي ممكن تسوي حركه خطافيه

وتسحب المحفظه لا إراديا بسبب حبها الشديد للوحات والتحف ( أنا ما أدري وش

سر تعلق الحريم بها باللوحات والتحف والمفارش :112 المهم قالت لي وقف شوي

خلنا نتفرج على اللوحات!! قلت اوكي تفرجي براحتك وأنا باشوف المطاعم اللي هنا

وبرجع لك ....

المهم رحت ادور على مطعم واشوف انواع المأكولات الموجوده ووالله يا جماعة الخير

ما كملت 10 دقايق وجيت راجع لمرتي ولا هي مقابلتني تضحك !!!

قلت انا ما شاء الله غريبه ما شريتي ...ما شاء الله

وش هالعقل والثقل الي نزل عليك غريبه ما شريتي ؟؟... قالت:- لا أبشرك شريت

لوحه عن البحر والغوص واللولو !!!! قلت وحنا وش دخلنا في الغوص ؟؟ حنا نعرف

في نجد النخل والتمر والبر والرمال الحمر مالنا علاقه بالغوص والبحر !!

قلت لها طيب وين اللوحه ؟؟؟ قالت عطيتهم عربون50 دينار وبيرسلون لي اللوحه

بعد العصر على الفندق!! وانت بعدين حاسبهم !!

قلت يابنت الناس 50 دينار عربون !! أجل بكم اللوحه :112: قلت الظاهر إنتي

تحسبين الدينار بريال ماتدرين ان 50 دينار يعني 650ريال !!! قالت لا عارفه

بس انت لا تستعجل الين تشوف اللوحه انا مخليتها لك مفاجأه !!قلت (في

نفسي طبعا ) أمحق مفاجأه ..

المهم رحنا لمطعم هندي تحت بالدور الرضي من جهة المطاعم أضن اسم المطعم

شايه او شاله .... والله نسيت بس في اسمه شين وها بس ...الصراحه أكلهم

مسكت وفعلا تحس انك تاكل في مطعم هندي صحيح

يعني طعم الأكل والبهارات والفلفل والتندوري وخبز النان حقهم والا البرياني السمك

حقهم :x1: صراحه وبدون منازع (( أفضل مطعم هندي كلت فيه بحياتي كلها )) رغم

اني من محبي زيارة المطاعم الهنديه في اي دوله اروح لها,لكن هالمطعم شي ثاني .

خلصنا غدانا حوالي الساعه 4 وتوجهنا للفندق لأخذ غرض وإستلام اللوحه

حقت فان جوخ :109:...

ويوم وصلنا الفندق وجدنا طاولة الكوي والمكوى الي طلبناها قبل نطلع و لقينا

إدارة الفندق حاطين لنا هديه سلة فوكه على كيف كيفكم ...قالت لي مرتي

الظاهر يحسبونا معاريس !!! قلت لا والله الا ناس تفهم السنع مهوب مثل

فنادق بعض الدول العربيه ندفع لهم على الغرفه 170 دولار وإذا طلبنا خدمه

من حقنا قعدو يزربونا تقل يتصدقون علينا !!! ( مثل هالحركات البسيطه الي

ماتكلف الفندق أكثر من 10 ريال لها وقع جميل في النفس تجعل النزيل يحس

بمقدار احترام وتقدير ادارة الفندق له )

نرجع مره ثانيه لجولتنا المسائيه

وقبل لا اتكلم عن الجوله المسائيه رايح اعلق في بعض النقاط على منطقة

المارينا ( السوق والمطاعم وحتى الفندق ) وهي بصراحه للي مازار الكويت

ممتعه جدا رغم صغر المساحه المخصصه ... بس تتميز هالمنطقه بإنها

منطقة حركه ووناسه وعالم رايحه وجايه وقعدات وقهاوي والبحر قبالك

والناس مالهم دعوى فيك وكلن يبتسم لك (يمكن لاني فاتح كشرتي وأبتسم

لكل الي يقابلني :115 والصراحه انا عجبتني هالمنطقه وخصوصا القعدات

الخارجيه والمرسى وحتى السوق والسينما ... وأيضا يميز هالمنطقه قربها

من شارع السالميه (( أعتقد إذا ما خانتني الذاكره اسمه شارع مبارك ))

وهو خلف سوق المارينا وفيه مطعم شكله حلو وشعبي اسمه فريج صويلح

على اسم التمثيليه الكويتيه الشعبيه (( بصراحه ما دخلته بس ناوي في

الزياره الثانيه للكويت أدخله))

وشارع السالميه هذا شارع طويل كله محلات تجاريه مختلفه (( يشبه

شارع الثميري عندنا في الرياض))بس انه اطول واكثر تنوع..والكلام يطول

حول منطقة السالميه ستكتشفونها اثناء زيارتكم للكويت ان شاء الله ..

نعود للجوله المسائيه والتي بدأت حوالي خمس بالتوجه الى سوق رائع

رائع من وجهة نظري كتاجر ملابس نسائيه وفيه تنوع جميل لمحلات الأزياء

كما وجدنا فيه بغيتنا (( الماركات الكويتيه )) وهو سوق # المهلب#:11ight:

والسوق يتكون من دورين إضافه للدور الأرضي وهو على شكل سفينه

ويتميز بسهولة التنقل بين المحلات وتنوع محلات الألبسه فيه ....و .....



*والله اني مستحي منكم بس اني صدق تعبت من الكتابه ( يازين القص

واللصق مايتعب ) بس شكلي بخل بوعدي وأعذروني لكن عشان يكون

الموضوع جميل أكمل لكم بعدين

أهلا وسهلا بالجميع

الكويت بيتكم وبلدكم الثاني

شوفوا صراحة وبدون زعل وأنا أقولها وأنا كويتي نحن فعلا فينا غرور !!!!!


لكن غرور في حب الكويت وفي هويتنا ككويتين غيره لا


حتى إننا في قبائل وأحزاب ومذاهب وقد تسود بيننا مشاكل أو فرقة لكم عندما تكون الكويت نصبح يد واحدة دون منازع لا يفرقنا شيء فنحن نعتز ونفخر بكويتيتنا لذلك أخذ العموم فكرة أننا متعجرفين (لا اخفيكم سرا أنني مستغرب من مسألة تماسكنا اللهم لا حسد أمام الظروف القاسية الله يبعدا عنا .


عندما قرأت ما كتبتم وقد كنت أم في الأفنيوز (أنصح بزيارته) وقبله كنت في المارينا وقبله بثلاث أيام كنت في سوق شرق إلا أنني وبعد ما قرأت ما كتبتم اشتقت للذهاب مرة أخرى


الكويت دائما للعوائل حتى أن الشباب يشتكون .


شباب الكويت يركضون خلف الموضة لكن لايؤذون إلا من يريد .


المطاعم والتكاسي في الكويت خدمة على مدار الساعة ، والمحتار يدق على خدمة المطاعم أو خدمة التكاسي .


مع العلم أنني كويتي ودائم الذهاب إلى كل مجمعات الكويت شرقا وغربا إلا أنني لم أحصي ما أحصيتم من إيجابيات كويتية أشكركم وحياكم الله في بلدكم الأول والثاني والثالث الكويت



أي استفسار رجال أو نسائي عن الكويت أسواقها أو مجمعاتها أنا حاضر وإن كنت قليل المشاركة




وحياكم الله
الكويت لكم وبكم

الأخ ناصر الكويتي أنا معاك 100% الله يكفينا شر الحوادث وبلاويها







ومـــحـــــروســـــــة يـــــــا كــــــويـــــــت

تقرير رائع واشكرك علي الكلام الجميل وبنتظار القرير

السلام عليكم

جزاك الله خير اخوي على هالكلام الجميل بوصف الكويت وشعبها

قريت الموضوع كله ماشاءالله وبدون ملل ..مو عشان في مدح عن الكويت بس ماشاءالله اسلوبك عجيب ومشوق :24:



مشكور وماقصرت واهل السعوديه اهلنا وتوني راده من العمره وشفت احسن المعامله والله


واستغرب ليش في ناس يقولون عنه مغرورين لا فينا غرور ولا شي واحنا ضد هالشي لا يدخل الجنه من فيه ذره من الكبر بالعكس احنا متواضعين ونتصرف على طبيعتنا بس الناس تحكم على الشكل واللبس المظهر الخارجي وهذا غلط


وعلى طاري الأزياء في الكويت عندنا مثل صالات عرض ازياء وايد تنفعك ياجرونها مصممات كويتيات بالاسابيع يعرضون فيها وماشاءالله شغاله على طول واحلى من ملابس المحلات

مثل كاريزما وبيت ديفا وبيت شرق,, هذيله يم المستشفى الي مقابل سوق شرق

وبيت 32 في منطقة العديليه

وبيت لوذان,,وكثير ان شاءالله المره اليايه

تقرير رائع:24::24:

يعطيك العافيه اخوي




ناطرين السلبيات ترى بالعكس احنا مانزعل ونتقبل النقد بصدر رحب والصراحه اسلوبك مشوق حيل بانتظار البقيه اخذ راحتك

موضوع رائع ..


وتقرير فعلا ممتع وشيق ..

والله حمستني لفندق المرينا ... بكره ان شاء الله بروح له ...

وفعلا للي جاي الكويت انصحه بفندق المرينا ...

وخصوصا قعدة مرينا كرسنت اللي على المرسى امام اليخووووووووت آآآآآه فعلا شي رااااااااائع يرد الروح ...

الكويت جميله كل شي فيها يستاهل انك تزوره ...

وبانتظار تكملة التقرير

موضوع روعة واسلوب اروع

اول شي الف هلا ومرحبا فيك اخوي الكويت ديرتك ومكانك واحنا وانتوا ديرة وحده
لا انتوا غريبين عنا ولا احنا غريبين عنكم

احنا بإنتظار باقي رحلتك في الكويت واي استفسار احنا بالشوفة

مرحبا بالجميع من جديد ,, وشكرا جزيلا لكل من علق او عقب على الموضوع

الصراحه أخجلتوني بأخلاقكم العاليه ,,, وآسف جدا على التأخير

نكمل


كما سبق وذكرت ان مجمع المهلب بصراحه عجبني جدا بسبب سهولة التسوق

وكذلك تنوع محلات الأزياء وخصوصا كما ذكرت (( الماركات الكويتيه )) وفعلا أخذنا

في التجول داخل المجمع ودخول هذه المحلات واحد واحد دون كلل او ملل !!

و زوجتي طبعا مستانسه وفي قمة السعاده :11ight: ولو تبينا نقعد ثلاثة ايام

في السوق أضن ماعندها مانع (( ترى أسعد لحظات المره أنها تقعد تدور في

سوق أول مره تدخله )) وطبعا يتخلل الدوران مو أقل من ثلاث اربع بلايز وتنورتين

وكم بنطلون على كم بدي .... وطبعا انا ما أقدر أعارض لأني قايل لها في الرياض

اننا رايحين نشوف الموديلات بالكويت والي يعجبك هناك خذيه لك (( عينه )) واذا

صار حلو في اللبس طبقنا موديله للمحلات !!

وطبعا هي ...ترددت بالموافقه :115: ( إيه هين تتردد) !!

وبعدين قالت لي ...يا كثر طلباتك ...

خلاص موافقه !!! عشان العشره الي بينا بوافق!!!


المهم مع الدوران وسعة الصدر بها السوق مادرينا عن الوقت الا الساعه 7مساءا

عند آخر محل وقفنا عنده وكان حواري مع البائع في المحل عن الأسعار المبالغ

فيها لبعض الملابس (( خصوصا ان تكلفتها قليله قياسا على الأسعار)) فكان جوابه

ان هذه مستوى اسعار الماركات وانهم لو نزلوا بالسعر فقدت ماركتهم

تقدير المستهلك لها !!!!!!

تبون الصراحه كانت إجابته مقنعه نوعا ما لي ..

على العموم تركنا المهلب في السابعه والنصف وتوجهنا لسوق آخر في منطقة

حولي وهو مجمع (( العثمان )) والمجمع هذا ليس بالفخامه التي تتميز بها الأسواق

التي مريت عليها قبل ... بس فيه ميزه انه اقل سعرا من سابقيه.. والسوق

لا يحتاج لأكثر من نصف ساعه دوران ... شرينا منه ايضا كم بلوزه (( شغل الكويت ))

وطلعنا من المجمع ثمان ونص بإتجاه شارع السالميه ...بس طلبنا من التكسي نمر

الفندق 5دقايق ننزل اكياسنا الي معنى ( الي يشوفنا يقول هذولي قاعدين يجهزون

عروس ))

على فكره قلت لمرتي هالجمله... قعدت تميلح علي (كذبت كذبه وصدقتها) وقامت

تسوي نفسها عروس !!منزله راسها بالأرض وما ترد علي اذا ناديتها من الحيا :106:!!!

وعشان تضبط الدور عطت العامل الي طلع الأكياس فوق 5 دنانير اكراميه !!!!!

بصراحه انا ولعت :112:...مو بخل والله بس 5 دنانير صراحه كثير ... انا كنت مجهز

نص دينار بجيبي عشان اعطيه إذا نزل ... والله وتسبقني له بنت حاتم الطائي وتعطيه

الفلوس.... قلت لها خير ان شاء الله ...وش سوى هو عشان تعطينه هالمبلغ ؟؟؟

قالت لي انا بصراحه نسيت ان الدينار بأكثر من 13 ريال !! قلت طيب لا تلقفين

وتحاسبين أحد مره ثانيه !!!

رحنا بعد ذلك لشارع السالميه الي هو خلف سوق المارينا ...وبدينا فيه من اوله

طبعا مشي و من فضل الله علينا اننا مانمل من المشي ونعتبره احد فوائد

السفر ( احيانا ينزل وزني من 2- 3كيلو بعد اي سفره)

فائده مهمه للمساعده على المشي وعدم التعب (( يجب ان تختار وتختارين نوعيه

حذاء رياضيه مناسبه للمشي وستلاحظون الفرق))

المهم استانسنا بها الشارع وقعدنا نتمشى ونطالع بها المحلات(بدون شراء)!!

وأستغرق ذلك حوالي ساعه ونص احسسنا بعدها بحاجتنا لأستراحه !!!

توجهنا فيها الى مجمع مطاعم مرسى المارينا وتحديدا الى الفرايديز (يقع في الدور

الثاني وهو مقابلالبحر وله اطلاله جميله على المرسى),حيث أكلنا وتقهوينا و ريحنا

لمدة حوالي ساعه كامله توجهنا بعدها الى سينما المارينا :101: ( أقدر شيء

اسمه سينما ) وذلك لحظور الفيلم الي حجزنا عليه ...وطبعا ما خلص الفيلم الى

الساعه وحده ... بعده قالت لي مرتي وش رايك ناخذ لنا راسين معسل عند خويك

المصري :109:!!! قالت أقول أها بس انثبري يا مره ..أشوفك تأثرتي بأجواء الحريه

والديموقراطيه وحقوق المرأه في الكويت !!! وشكلك ناويه تسوين تمرد وأضراب !!

لكن أعقلي وأبلعي العافيه :105:!! بلا شيشه بلا معسل بلا خرابيط

وفعلا رحنا للمقهى الي كنا فيه امس ... وأول ما شافني صاحبي المصري قال

لي مش قلت لك حترجع تاني !!!

بصراحه انا خفت لا يكون حاط لي شيء في المعسل الي البارح :114:...


عشان كذا طلبنا بس شاهي ومويه :109:

جلسنا في المقهى لين الساعه ثنتين وبعدها توجهنا للفندق للنوم بعد ما انهكنا

الدوران بها السوقه طول اليوم

قمنا اليوم الثاني (آخر يوم لنابالكويت )وسوينا تشيك اوت من الهوتيل الي للأسف

اننا ما استمتعنا بمرافقه وحتى ما دخلنا المسبح حقه ( رغم شكله الجميل من

خلف القزاز !!!) وذلك بسبب قصر المده !!! المهم حطينا اغراضنا وشنطنا عند

الأستقبال حق الفندق و توجهنا مباشره الى مدينة الألعاب المائيه المسماه

(اكوا بارك ) وهي تقع بجانب ابراج الكويت ويوجد بها عدد من الألعاب

المائيه والمسابح وكذلك يوجد بها عدد من المطاعم والبوفيهات كما ان لها شاطيء

رملي على الخليج العربي ( انصح بزيارتها خصوصا الي معهم اطفال ) كما انصحهم

بزيارة ( المدينه الترفيهيه ) - رغم اني لم ازرها بس حسب ما سمعت انها ممتعه

لكن لضيق الوقت مارحت ..

المهم طلعنا من الأكوا بارك الى الفندق وقبلها الى ( كرسبي دوناااااات:24: )

وحملنا اغراضنا وعلى طول للمطار عشان نلحق على رحلتنا للرياض ..

وفعلا توجهنا للمطار وفي طريقنا كنا ننظر بشغف ووله الى شوارع الكويت

وأحياء الكويت وعماير الكويت ونردد في داخلنا ( راجعين لك الله لا يعوقنا بشر)

وفعلا وصلنا المطار وتوجهنا للبوابه وكنا انا وزوجتي نطالع بعض وعلامات الحزن

والحسافه على وجيهنا...ما ادري ليش ؟؟؟

يمكن عشان قصر المده ؟؟؟

يمكن عشان الراحه الي حسينا فيها بالكويت ؟؟

بصراحه مالقيت اجابه لسؤالي ....

...................


ختاما وكما وعدت الأخوه بذكر الأيجابيات والسلبيات (( وهي تمثل وجهة نظري أنا

ووجهة نظر زوجتي فقط ))

# الأيجابيات في الكويت بإختصار

1- الشعب .... الشعب .... الشعب .. بصراحه الغالبيه ناس راقين ومثقفين...

وتحس فيهم طيبة المعشر وحبهم لنا كخليجيين وقد تسمع عبارات الثناء للسعوديه

ولحكامها وأهلها في اي موقف يعرف فيه الكويتي هويتك...

تقول لي مرتي يوم درت اني اكتب الموضوع اكتب يتميز اهل الكويت بالذرابه .

2- كما سبق وذكرت ( تتميز الكويت بقلة الأزدحام مقارنه بدول الخليج الأخرى) وأعتقد

ان السبب الرئيسي ... النظام الصارم المطبق في الكويت .

3- تتميز اسواق الكويت ( بالنوع ) وليس الكم !! بمعنى آخر ان الأسواق ليست كبيره

بس عندهم بضايع مميزه .. ويتضح فيها الذوق العالي لنوعية المتسوقين .

بصراحه المده القصيره ما خلتنا نشوف الكويت كلها بس اوعدكم في الزياره القادمه

إن شاء الله ( ايام عيد الأضحى القادم ) سوف اكتب موضوع آخر عن الزياره .


# السلبيات :110:

1- بصراحه مطار الكويت الدولي حلو ... بس مهوب على مستوى الكويت.. ويفترض

انه يكون أفخم وأفضل من هذا خصوصا اذا علمنا ان الكويت لديها امكانيات كبيره

ومطار واحد ( يعني هالمطار الوحيد لازم يكون قمه وتحفه لأنه واجهة البلد ).

2-احس فيه تقصير من تجار الكويت في بناء الأماكن الترفيهيه والمجمعات السكنيه

خصوصا إذا علمنا ان معظم اسواق وعماير دبي ( يساهم فيها بنسب كبيره

تجار كويتيين ) ..


بس هذا الي عندي وأتمنى اني أكون نقلت صوره مبسطه عن جولة يومين في

الكويت ... وأعذروني على القصور

.

يعطيك العاااااااااااااااااافيه
تقرير مميز
بانتظار تقاريرك الجديده...و زيارتك لنا مره ثانيه

صح متاخر

ولكن ايضا حياك الله في بلدك الثاني الكويت .. وعموما كل الكويتين ما ينسون وقفه اهلهم بالسعوديه
ايام الغزو العراقي للكويت وطيب ضيافتم وحسن معشرهم ..


بس فاتك تزور :

- مجمعات:
1. مجمع الافنيوز: مجمع كبير تقريبا بحجم ستي سنتر بالامارات ( الى الان لم يفتتح منه الا المرحلة الاولى )
2. مجمع الكوت + مجمع المنشر ( في منطقة الفحيحيل ) وهم لا يقلون جمالا عن المرينا وفيهم فندق روتانا

- مرافق سياحية:
1. المركز العلمي : من اجمل المرافق السياحية بالكويت يحتوي على ( سينما اي ماكس - الاكواريوم المائي )
2. حديقة الشعب الترفيهية.
3. جلسات واستراحات وقهاوي البدع ( مجموعه كبيرة ووميزة من المطاعم والمقاهي )


هذا ما يحضر الان بالبال .. ويمكن ان تذهب اليهم بزيارتك القادمه ان شاء الله

يعطيك العافية اخوي عالتكملة والله شرفتنا بالكويت وباسلوبك الرائع جذبتنا للموضوع.

بالنسبة للمطار هناك خطة لتوسعته تتكون من 3 مراحل وسبق انه كتبوا عنها الاخوان بالمنتدى .

وانشالله تشرفنا بالكويت عن قريب وتزور الاماكن اللي ماشفتها.

واهم شي انكم استانستوا وارتحتوا بالبلد وهذي غايتنا.

ويعطيك العافية مرة اخرى

استمتع بقراءة تقريرك بصراحة وكنت متابع له والحين مافضلت اني اطلع منه بدون رد

تسلم والله وهذا من ذوقك وطيب اصلك

واحنا والسعودية واحد هالجملة دارجة وهي بالقلب قبل لاننطقها

عالعموم إن شاء الله ماتكون آخر جية لك للكويت وإذا نورت مرة ثانية ففي اماكن بعد ننصحك تزورها مثل اللي ذكرها اخوي فارس الكويت

ماشاء الله تقرير رائع واسلوب مشوق العموم الحمدالله على السلامة وفعلا عدم زيارة مجمع الأفنيوز خسارة لآنه مع اكبر واجمل المجمعات في منطقة الخليج وكذلك مجمع الكوت في منطقة الفحيحيل وايضا المركز العلمي والذي هو قريب جدا من مقر اقامتكم في فندق مارينـا

هذه صورتين لمجمع الكوت في الفحيحيل




وبالنسبة لملاحظتك بخصوص المطار الدولي فهو فعلا لايليق بمستوى الكويت الأقتصادي والأقليمي والسبب طبعا هو السياسة التي تعطل المشاريع التنموية في البلد ولكن يتم حاليا تطوير المطار الحالي حيث يتم تجديدة بالكامل واضافة بوبات جديدة واضافة مدرجات جديدة لأستقبال الطائرات وزيادة اسطول الخطوط الكويتية وطيران الجزيرة ومن المتوقع ان تبدأ شركة طيران ثالثة قريبا

الله يحيك بديرتك وقريتك وبين أهلك وجماعتك

وأتمنى منك مره ثانيه تخبرنا بوصولك عشان عندي عرض مجاني لك .....

أسلوبك رائع بسرد رحلتك حتى لو ما كان فيه صور بس كان إسلوبك المتسق وتسلسل عبارتك السهله الممتنعه .... تحسس القاريئ إللي شاف الأماكن إللي زرتها كأنها مرسومه أمامه

ما شالله عليك

وبودي يا أهل نجد تعرفون إن كثير من الكويتيين الأصليين من نجد ولا يهون باقي أهل الكويت الغالين .....وأظن هذا من أسباب عدم إحساسك بالغربه بالكويت ......


على فكره حبيبنا الغالي ترى في منطقه إسمها الفروانيه يوجد فيها شارع كامل فيه مجمعات للجلابيات مثل مجمع الحمرا مول والدبوس

كما يوجد مجمع بمنطقة شرق إسمه الأوقاف صحيح إنها مجمعات بنيانها متواضع بس فيها جلابيات حلوه وسعرها مناسب وصناعه كويتيه ...

وكما توجد منطقه حلوه بالكويت إسمها الأحمدي يوجد فيها عدة مجمعات ومنطقة الفحاحيل يوجد فيها مجمع الكوت الشهير ومجمع المنشر وفندق حلو لصيق فيهم إسمه روتانا بس منطقة الفحاحيل تبعد عن العاصحه أو السالميه ما يقارب النصف ساعه ولا يوجد فيها .....ربشة = صخب السالميه لأن معظم ساكنيها من العوائل الكويتيه البدويه المحافظه ،،،، أما في النهار وحتى العاشره مساءا فهناك المجتمع الكويتي كله يتسوق .

وعساك من عواده ......

المشاركة الأصلية كتبت بواسطة hs99
http://www.arabtravelersforum.com/tr...1/#post1369101

ختاما وكما وعدت الأخوه بذكر الأيجابيات والسلبيات (( وهي تمثل وجهة نظري أنا

ووجهة نظر زوجتي فقط ))

# الأيجابيات في الكويت بإختصار

1- الشعب .... الشعب .... الشعب .. بصراحه الغالبيه ناس راقين ومثقفين...

وتحس فيهم طيبة المعشر وحبهم لنا كخليجيين وقد تسمع عبارات الثناء للسعوديه

ولحكامها وأهلها في اي موقف يعرف فيه الكويتي هويتك...

تقول لي مرتي يوم درت اني اكتب الموضوع اكتب يتميز اهل الكويت بالذرابه .

2- كما سبق وذكرت ( تتميز الكويت بقلة الأزدحام مقارنه بدول الخليج الأخرى) وأعتقد

ان السبب الرئيسي ... النظام الصارم المطبق في الكويت .

3- تتميز اسواق الكويت ( بالنوع ) وليس الكم !! بمعنى آخر ان الأسواق ليست كبيره

بس عندهم بضايع مميزه .. ويتضح فيها الذوق العالي لنوعية المتسوقين .

بصراحه المده القصيره ما خلتنا نشوف الكويت كلها بس اوعدكم في الزياره القادمه

إن شاء الله ( ايام عيد الأضحى القادم ) سوف اكتب موضوع آخر عن الزياره .


# السلبيات :110:

1- بصراحه مطار الكويت الدولي حلو ... بس مهوب على مستوى الكويت.. ويفترض

انه يكون أفخم وأفضل من هذا خصوصا اذا علمنا ان الكويت لديها امكانيات كبيره

ومطار واحد ( يعني هالمطار الوحيد لازم يكون قمه وتحفه لأنه واجهة البلد ).

2-احس فيه تقصير من تجار الكويت في بناء الأماكن الترفيهيه والمجمعات السكنيه

خصوصا إذا علمنا ان معظم اسواق وعماير دبي ( يساهم فيها بنسب كبيره

تجار كويتيين ) ..


بس هذا الي عندي وأتمنى اني أكون نقلت صوره مبسطه عن جولة يومين في

الكويت ... وأعذروني على القصور

.



الله يحييك اخوي بالكويت وصدقني ثلاث ايام ما تكفي انك تقول رايك كفايه وانت قلت رايك بحسب عملك وهو التجاره اما لو كنت سائح اكيد راح تختلف وجهه النظر

بالنسبه لمطار الكويت الحين طبعا احسن من قبل بواجد خصوصا بعد افتتاح مول المطار الجديد وفي بعد توسعه له وتوسعه للمدرجات اللي فيه وجهه نظر نتقبلها بصدر رحب وان شاء الله عن قريب تشوف مطار الكويت المجدد

تقول في تقصير من تجار الكويت يعني يمثلا المارينا مول ملك لتاجر كويتي واكثر المجمعات فيها ترفيه وسينما والعاب للاطفال
والمجمعات السكنيه يمكن انت ما شفتها بحكم المده القصيره ماشاء الله الحين الكويت بعد موافقه البلديه لبناء المجمعات السكنيه اكثر من 10 ادوار تشوف كل يوم مجمع سكني كبير

ان شاء الله جيتكك الثانيه تشوف الكويت عدل وبعد تزيد المده خصوصا ان موعدك راح يكون في عيد الاضحي يعني الجو اكيد يكون حلو


تقريرك رائع واسلوبك اروع والله يحفظك انت وزجتك وتشتري لها كل شي تستاهل بس لاتخربها على الشيشه خصوصا انت ما تشيش :109:

السلام عليكم ورحمة الله وبركاته

حياك الله اخي العزيز hs99 في بلدك الكويت

انا استمتعت جداً بطريقة سردك للأحداث وسجلت مخصوص علشان اشكرك

فعلاً ماكنت ابي يوقف السرد بس مدة بقائكم بالكويت كانت قصيره جداً

اخوي الخليج كلهم اخوان وعسى الله يديم هذا الترابط ولا يفرقنا

اتمنى لك زياره ثانيه لا تقل متعه عن الاولى

وسلامة عمرك مثل ما قلت بالبدايه استمتعت بسردك وسجلت مخصوص علشان اشكرك


بالتوفيق


***

حياااااااااك الله

وتقريرك أكثر من راااااااااااائع

يزاك الله خير على الكلام الطيب

وفي أماكن واايد ما زرتها بس بما أنك كنت ياي حق السوق فعلى قولتك مامداك بس ان شاء الله تزورها مره ثانيه وثالثه ورابعه

المشاركة الأصلية كتبت بواسطة A B D U L A Z I
http://www.arabtravelersforum.com/tr...5/#post1378815

السلام عليكم ورحمة الله وبركاته

حياك الله اخي العزيز hs99 في بلدك الكويت

انا استمتعت جداً بطريقة سردك للأحداث وسجلت مخصوص علشان اشكرك

فعلاً ماكنت ابي يوقف السرد بس مدة بقائكم بالكويت كانت قصيره جداً

اخوي الخليج كلهم اخوان وعسى الله يديم هذا الترابط ولا يفرقنا

اتمنى لك زياره ثانيه لا تقل متعه عن الاولى

وسلامة عمرك مثل ما قلت بالبدايه استمتعت بسردك وسجلت مخصوص علشان اشكرك


بالتوفيق***

يا ملا العافيه والله يا بوسعود والله يحييك في المنتدى بين أخوانك

وزي ماقلت انت كلنا بالخليج واحد (الله لا يغير علينا ) وبصراحه انا ماكنت

متوقع اني باستانس في الكويت هالوناسه رغم قصر المده ...وفغلا انا اذهلني وشدني

يا أخوان طبيعة اهل الكويت وذرابتهم وسنعهم أكثر من اعجابي في البلد نفسها رغم

انها حلوه وممتعه (خصوصا للعوائل ) ...عشان كذا طلعت الي بخاطر كتعبير عن حبي

وعشقي لها الديره الي صار من اول لقاء ... رغم اني ماخليت ديره مارحتها !!

حب غريب ... وأحساس عجيب !!!

( الحين بتجي هالمطفوقه تحسبني قاعد أتغزل في حريم الكويت :109: )

صراحه حسستوني اني أعرف اكتب صدق :101:

بس فعلا الرحله كانت قصيره عشان كذا المواقف الي فيها قليله .. لذلك

طلعت بسيطه وسهله وقريبه للقاريء

ومشكورين كلكم

أخ hs99 نشكرك على هذا الإسلوب الأكثر من رائع حيث انك استطعت ان تصف زيارتك القصيرة بكم كبير من المعاني والوصف الدقيق والشيق وباسلوب مختصر 00 واشهد ان لك اسلوب جيد فى الكتابة وكتابة التقارير وقد استمتعت بتقريرك0
وان كنت اتمنى قبل زيارتك للكويت في المرة القادمة ان تدخل المنتدى وتستفيد من تقارير الأخوة في المنتدى لتكون زيارتك اكثر فائدة0
واخيرا شكرا على هذا التقرير وبانتظار التقرير القادم ان شاء الله تعالى 0

اهليييين ومرحبتين كباار وصغار

صراحه موضوعك عجبني وخاصه سرد الأحداث من طأطأ ليه السلام عليكم

بالنسبه لشعب الكويت الحمدلله كوني كويتيه مو معناه اني متكبر ابد .. بالعكس للأسف ان الكثير ينظر هالنظره الخاطئه .. والحمدلله ان اثبت وشفت العكس بعينك ..

وبالنسبه لهدوء وراحة الكويت .. صدقت .. ان على الرغم من سفراتي لخارج بلدي الكويت لما ارجع لها احس بلهفه مو طبيعيه وانتظر اليوم اللي برجع فيه لها ...



بالنسبة لمطار الكويت طبعا كلامه صحيح وان المطار الحين في حالة تجديد وان شاءالله تشوف المطار اليديد


وبالنسبه لأسواق الكويت .. ففيها الكثير .. مثال :


منطقة السالمية
نبدي اول شي بمجمع مارينا مول , الواقع في منطقة السالميه على الشريط الساحلي (على البحر) فيه جميع انزاع الملابس والاكسسوارات , والمجمع الثاني الفنار ايضاا بالسالميه لكن يقع في شارع سالم المبارك , وجنبه مجمع البستان و مجمع ليلى غاليري ومجمع جاليريا2000 ومجمع بلازا (كللهن في نفس الشارع) .

منطقة الشرق (مدينة الكويت)
سوق شرق يقع على الشريط الساحلي لكن في منطقة شرق (قريب من قصر دسمان) ومجمع الثريا ايضا في منطقة شرق ومجمع سوق الذهب ويقع في قلب مدينة الكويت قريب من سوق الاوراق الماليه , وسوق المباركية وسوق الحريم , وشارع الاجهزه الالكترونيه .

منطقة حولي
ابرز المجمعات التجاريه في هذه المنطقة السكنيه التجاريه:
مجمع بيروت , مجمع النقره الشمالي والجنوبي , مجمع العدساني , مجمع المهلب , مجمع البحر سنتر .


منطقة الري
مجمع ذا افنيوز , ويقع في منطقة الري على الدائري الخامس .

منطقة الفروانيه
تكثر في هذه المنطقه الاسواق والمحلات الشعبيه , ومحلات الذهب ومحلات الخامات (حق العبي والدراريع والشيلات) وفيها مجمع الحمراء مول - المترو مول


منطقة الفحيحيل
مجمع الكوت , ويقع على الشريط الساحلي في نفس المنطقة , ويوجد الكثير من المجمعات في ميدان مجمع الكوت , وتكثر في هذه المنطقه الاسواق الشعبيه ومحلات الذهب.

منطقة الجهراء
مجمع المنشر و مجمع الخيمة موول .


وان شاءالله اكون وفقت في كتابه المولات الموجوده بالكويت ..

يعطيك الف عافيه على تقريرك .

وسلم على زوجتك ..

ورحله موفقه ..

اخي الحبيب مشكور على الكلام الطيب

انت وكل الاخوان والاخوات

وكلنا اهل لو تفرقنا الحدود وان شاء الله

الحدود بتنزال والعمله بتوحد وبتشوف

الكويتي لابس شماغ والسعودي غتره بيضاء

وطاقيه شخال هههههههه لكن بعد ما يقرها

مجلس التعاون سنة 2275 يالله تصبروا راح

الكثير ومابقى الا القليل هههههههههه


الله يوفقك اخوى ومشكور مره ثانيه

تصحيح لمشاركة للأخت أحلى كيميائية ( مجمع المنشر موجود بالفحيحيل بجانب مجمع الكوت وليس بالجهراء)
وشكرا للأخت أحلى كيميائية على مجهودها فى المشاركة

الاخ hs99 الكريم

تحية طيبة معطرة لك ولعائلتك الكريمة واهلا بكم دائما فى بلدكم الكويت .

اخى العزيز اشكرك كثيرا على تقريرك المتميز عن زيارتك الاخيرة للكويت وايضا اشكرك كثيرا على

مشاعرك الطيبة تجاة اشقائك اهل الكويت .

اخى العزيز لقد ذكرت فى تقريرك انك حسيت فى راحة نفسية لما تجولت فى البلد وانا اعتقد ان السبب

بسيط وهو انك لم تشعر انك قد خرجت من المملكة فالكويت والمملكة هم شعب واحد وبلد واحد ومصير

واحد الى يوم القيامة .

المشاركة الأصلية كتبت بواسطة عنود الرياض
http://www.arabtravelersforum.com/tr...6/#post1386766

[color="Red"]الكويـــــــت وبس .. ياحبيلها


على كثر الدول الأوروبيه والخليجيه اللي رحت لها .. بس مايكون لي شوق إلا للكويـــت


ديره راااائعه بمعنى الكلمه والسبب يرجع لأهلـــها والله بذوقهم وأخلاقهـــم


أنا رحت لها مره سياحه ومن بعدها وأنا كل أجازة عيد وأنا فيها





الاخت عنود الرياض

تحية طيبة لك ولاخلاقك الطيبة وذوقك الرفيع واشكرك كثيرا على مشاعرك الطيبة تجاه الكويت واهلها

واعلمى يا اختى ان اهل الكويت يشرفهم استضافتك ويقدرون لك تلك المشاعر واهلا وسهلا بك دائما فى

بلدك الكويت .

مهيب غريبه على الكويت واهلها

الله يحفظكم جميعا

يعطيك العافيه على التقرير الحلو

ونتمنى انك تعود الزياره قريبا

السلام عيكم
حياك حبيبي بالكويت وهذا بلدك الثاني
وعلى فكره هذي اول مشاركه لي بالمنتدى
وتستاهل اخوي على موضوع الحلووة

يعطيك العافية يا اخوي وبصراحه كلامك كان كله ذوق
وهذا ان دل فانما يدل على طيب اصلك يا الغالي

انا اوافقك الراي بان مطار الكويت يعتبر نوعاً ما فيه تقصير من حيث الحجم والخدمات والاسواق بس لا ننسى ان توهم خلصو التوسعه الي فيه والحمد لله اهو الحين اكبر واحلى من قبل بس للحين ناقصه وايد اشياء .

والنقطه الثانية الي ذكرتها ما اختلف معاك ان اغلب المستثمرين الكويتيين تلاقيهم يستثمرون بالامارات بدل الكويت صحيح لان الفترة السابقة ما كان في استقرار للمنطقة بسبب النظام المخلوع لصدام .
اعتقد ان هذا الشيئ اثر تاثير كبير على الدولة من ناحية النهضة في هذا المجال ، بس الحين بلشووو بالابراج الكبيرة والمشاريع الضخمه واعتقد ان الكويت خلال السنوات القريبة راح تتغير للافضل من هذه الناحية .

شكرا على تقريرك الحلو وكلامك و الاحلى عن شعب الكويت وانتمنى ان تزورنا مرة اخرى في بلد الثاني وتستانس اكثر واكثر واكثر في كل مرافق الكويت .

مو بس جذي اتمنى ان يكون هذا الانطباع عند جميع زوار الكويت
وهم انتمنى لهم طيب الاقامه .

مع تحياتي ،،،

أبدعت في كتابتك للتقرير,,,,والحقيقة تقال بأنك خالفت (مقولة خير الكلام ماقل ودل) من خلال موضوعك

المسهب الممتع ليتحول المثل إلى (خير الكلام ما يتحف ويلطف)

عندما يوصف الشعب الكويتي بالغرور والكبرياء والعجرفة أو أي مفرده تنتمي إلى ذلك المسمى أعتقد بأنها واقع وستلاحظها لدى الناس في لحظة الغضب !!! لكن جميعنا كخليج عربي(جزيرة العرب) نعاني من هذه الصفة المذمومة والسبب يعود إلى بيئتنا التى ترعرعنا به للأسف البيئة تؤثر بشكل كبير على تكوين شخصية الفرد...وهي قاعدة عامة( لكل شعب أو عرق بيئته الخاصة به )ونعلم هذا جيدا من خلال تاريخنا وأدبنا (الشعر).....

بالمناسبة الشعب الكويتي أحيانا ينظر إليه بأنه شعب يحب التهكم والسخرية على الأخرين ربما نقوم بذلك لكن هذا مايمنعنا أحيانا بالتهكم والسخرية من أنفسنا وإطلاق الدعابات والنكت على حالنا بإختصار شعب لديه روح الدعابه والفكاهة وسعة صدورهم لا تقاس بأي مكيال ربما أسهبت بالمدح والثناء أرجو بأن لا ألام من قبل البعض... ماذا عساني أن أفعل إنها بلدي !!!! وهذا غيض من فيض,,,(ولاقصور بأهلي أهل الخليج العربي والشام ومصر وبلدان المغرب العربي والسودان وتواليها)

أتفق معك في خصوص السلبيات لأن سياستنا وحكومتنا تولي إهتماماً إلى الخارج أكثر من الداخل...نعم مثلما ذكر الأخوة الأعضاء بأن هناك خطة مدروسة بعد تفكير عميق أدركوا بأن المطار يمثل واجهة للبلد فهاهي الخطة بدأنا نرى نورها ونقطف ثمارها على أرض الواقع وهاهم يقومون بإجراء تعديلات وإصلاحات في المطار الدولي مشرفة على الإنتهاء...

نعم أصبت كبد الحقيقة...ويبدوا لي إنك مطلع على الشأن الكويتي خصوصا عندما ذكرت كلمة التجار!!! لأن أغلب إستثمارتهم في الخارج ويعيبهم أيضا الحسد فيما بينهم.....

(بس خمس دنانير واااااااااااااجد كبقشيش...أعتقد العامل اللي أخذ الخمس دنانير حول تقاعد كككككك خمسة دنانير فيها تعبئة كرت تقدر إتسولف فيه أكثر من ساعتين كمكالمة محلية ).....

تحياتي للجميع وأأسف على الإطالة....سلام ياكرام

الله يعطيك العافيه على التقرير المميز
صراحه اسلوبك في الكتابه وايد حلو
وحبيت اشكرك وايد على الكلام الطيب عن الكويت والكويتيين وهذا من ذوقك
وحياك الله في دريتك الثانيه الكويت الحبيبه

:113: :24: :24: :113:


جياك الله أخي الكريم hs99 أنت وكل (( أهلنا أهل خليج الخير )))
في بيتكم الثاني
وكم تمنيت وأنا أسمع كلماتك الجميلة في وصف درة الخليج
لو أتيحت لـــــي الفرصة بالتلاقي مع شخصكم الكريم
لأن المثل يقول


@ معرفة الناس تجارة @


والجايات أكثر وأنا جاهز لأي شيء على الخاص

أدام الله على خليجنا الأمن والأمان
وسائر بلاد المسلمين

ونعم بأهل الكويت ولكن لاننس الكثير من السلبيات وهي:

1- الزحام الرهيب عندالمارينا مول الأربعاء والخميس والجمعة والتجمعات الشبابية والتسكع بالقمصان والبنطولانات الزاهية الألوان وكل واحد يتوقع هذه البنت أو تلك صيد ثمين. وين الهيئة عنكم !

2- اللوحات ومسميات الطرق والمحافظات فيها من الأرباك والتوهان لأي زائر (( أنت في الطريق الدائري الخامس وتريد طريق خادم الحرمين ((الملك فهد)) باتجاه النويصيب اللوحات الموضوعة مربكة لأي سائق غريب فهناك لوحات مخصصة لمستخدمي طريق الخدمة وأخرى للطريق الرئيس الدائري وفجأة تجدك أتجهت إلى طريق آخر في حلقة من التوهان بلا نهاية.
3- ظاهرة التفحيط والاستهتار من بعض الشباب.

في الختام وكلمة حق تقال عند أهل الكويت أشياء رائعة مثل:

1- احترامهم للمشاة عند عبور الطريق وعندنا ممكن يدهسك بالسيارة.
2- الأكل عندهم غاية اللذة والمتعة وعندنا تلوع كبدك في كثير من المطاعم.
آمل عدم الزعل ياأهل الكويت ونتمنى للجميع التوفبق

المشاركة الأصلية كتبت بواسطة سائح بلا أجنحة
http://www.arabtravelersforum.com/tr...8/#post1422158

ونعم بأهل الكويت ولكن لاننس الكثير من السلبيات وهي:

1- الزحام الرهيب عندالمارينا مول الأربعاء والخميس والجمعة والتجمعات الشبابية والتسكع بالقمصان والبنطولانات الزاهية الألوان وكل واحد يتوقع هذه البنت أو تلك صيد ثمين. وين الهيئة عنكم !

2- اللوحات ومسميات الطرق والمحافظات فيها من الأرباك والتوهان لأي زائر (( أنت في الطريق الدائري الخامس وتريد طريق خادم الحرمين ((الملك فهد)) باتجاه النويصيب اللوحات الموضوعة مربكة لأي سائق غريب فهناك لوحات مخصصة لمستخدمي طريق الخدمة وأخرى للطريق الرئيس الدائري وفجأة تجدك أتجهت إلى طريق آخر في حلقة من التوهان بلا نهاية.
3- ظاهرة التفحيط والاستهتار من بعض الشباب.

في الختام وكلمة حق تقال عند أهل الكويت أشياء رائعة مثل:

1- احترامهم للمشاة عند عبور الطريق وعندنا ممكن يدهسك بالسيارة.
2- الأكل عندهم غاية اللذة والمتعة وعندنا تلوع كبدك في كثير من المطاعم.
آمل عدم الزعل ياأهل الكويت ونتمنى للجميع التوفبق



ملاحظاتك على الراس والعين بخصوص شوارع الكويت فهي تختلف عن الشوارع في كل دول الخليج حيث يتم توزيع شبكة الطرق بالكويت على 7 دوائر وهو نظام شبيه في ولاية كلفورنيا الآمريكية وبخصوص اللوحات الارشادية تم البدأ بتركيب لوحات جديدة تدل على الطريق للحدود السعودية او العراقية بالشمال