الموضوع: رحلتي

مساء صباح الخير على الناس جميعا
قبل ما ابتدي اتمنى محد يضع ارقام شوفيريه عشان ما اخذ مخالفه ثانيه .....
كانت اساس الرحلة سياحه ولكن تحولت الى رحله استكشافيه وتعرف على مذاهب و اديان وحضارات ...
طبعا الرحله من تصميم محب الخير وهي عباره عن يومين بدمشق يومين مشتى الحلو اربع ايام بكسب واخر يومين نرجع دمشق ...
تنفيذ الشوفير (.......) عشان مايقولون اني اسوي دعايه واخذ مخالفه ثالثه ....
لااستطيع ان اكتب عن دمشق دون ان يعرش الياسمين اصابعي ....الكل يعرف ان دمشق اقدم عاصمة تاريخيه وعراقة اهل الشام .اطلق عليها في العصور الاسلاميه الفيحاء تمتاز دمشق بابوابها السبعه .

بداية الرحله انطلقنا من مطار الدوحه وحجزنا على طيران الاماراتيه لاول مره.. انصدمت بالخدمه يعني لا تقارن بالقطريه ابدا المهم وحلقنا بالجو الي ان وصلنا مطار دمشق ...استقبلنا الشوفير (............. )الساعه 7 مساء تقريبا ورحنا فندق بلو تور تكلمت من قبل عن هذا الفندق ..اول ما قعدت بالغرفه وشفت الوضع كانت افكر وبقوه ان ارجع الدوحه بس الكل قال قعدي توج ما شفتي شي ...المهم طلعنا تمشينا شوي وتعشينا ورجعنا الفندق ....
اليوم الثاني :
رحنا فرفرنا في زبداني وشربنا من اليانبيع والفواكه طعم ثاني ....



وبعدين ريحنا في بستان ام زياد في سهل مضايا واكلنا انجاص ( كمثرى ) من الشجره على طول وقعدت الحجه تتكلم عن زمان اول وشلون كانوا البنات يشتغلون ويزرعون الحين نسوا كل شي


وبعدين طلعنا من عندها ورحنا بلودان تغدينا في مطعم جنة بلودان ..الي يشتغلون فيه كانوا بعد شوي بطعمونا بيدهم ..جابوا الفواكه ومحد يحب البطيخ حلف الا يقطع لنا بصحونا وناكله غصب (طبعا انتوا تدرون ليش يسون هالحركات )
وبعدين بعد ما عبينا طاقه كملنا الرحله ومرينا على قبر هابيل ومن هنا ابتدت رحلة التعرف على المذاهب ...
كان زحمه لان اعتقد ان الشيعة يعتبرونه شي مهم بالنسبه لهم كانوا يصلون ويدعون ...المشرفين على القبر الدروز .


بعد المشوار الطويل والحر مرينا على سوق الميدان...

وكان خاطرنا بشي بارد اقترح الشوفير ان ناكل البوظه وكانت طيبي كتير ....

(هذا الي بقى عشان اصور )
احلى شي واحنا ننتظر البوظه تجينا.. كان في بنت صغيره تشرب شي بكيس بلاستك ومستمتعه ومتلذذه .صار عندي فضول اعرف شتشرب لقافه .تخيلوا شطلع ؟؟؟

سفن اب يصبونه بالكيس وتشربه بالعود ...
اخر اليوم رحنا جبل قاسيون وما كنت اتوقع ان صج تشوف الشام كلها لدرجه انك تشوف البلوتور والله ...حتى المسجد الاموي كلي شي تشوفه ...

(ابحث عن البلو تور ) الي يحصله له ليله مجانا ..
وفي النهايه رجعنا الى قواعدنا البلو تور وقلنا نطلب عشاء بس رقدنا قبل مايوصلنا (والله مو من التعب بس من طول الانتظار )



اليوم الثالث:
كان هذا اليوم طويل والاكشن فيه كثيره ...رحنا على مدينة صيدنايا هي منطقه مسيحيه ..ورحنا كنيسة صيدنايا ...بس اول بقول لكم ليش سميت صيدنايا ؟؟؟؟؟على ذمة الراوي يقول ان في واحد من احبار اليهود كان يريد قتل مبشر مسيحي في يوم من الايام كان اليهودي (مسوي نفسه روبن هود )يريد ان يصطاد نايا (نايا معناه غزال ) وهو يلاحق ويلاحق واستمر يلاحقه فجاه تحول الغزال الى ملاك ...فما كان من اليهودي الا انه انصدم ولم يعد قادر على الكلام ..وقالوله الناس اذا تريد ترجع تتكلم روح الى المبشر المسيحي(الذي كان يريد قتله ) عشان يشفيه (يامحاسن الصدف ) والله الدنيا دواره وفعلا شفاه ودخل اليهودي المسيحيه ..ولهذا السبب سميت صيدنايا ...وتوته توته خلصت الحتوته ...
نرجع للكنيسه اول شي في درج واحنا نركب شفت قفص قلت يمكن فيه ارنب ولا ثعلب ....بس طلع لا فيه بقعة زيت يقولون ان الزيت يطلع من البلاط وان البلاط تشكل على هيئة انسان .....(انا اعتقد ان في بئر بترول بس ما علمتهم )

(مدافن عند الكنيسه )



ودخلنا الكنيسه واول شي رحنا المذبح مشتطين وطلعت الكاميرا و اول ماطلع الفلاش ما نشوف الا طلعت راهبه معصبه تقول ممنوع الكلام ممنوع العلك هدوء الصلاه بالروح ...

....بعدين رحنا على مكان الي يتجمعون ويغنون كانوا ينظفون فالكل يصور.. لما انا صورت ما اشوف الا بشاشة الكاميرا وحده تصارخ علي تقول انت مابتعرفي ان التصوير ممنوع بالكنائس (لان مسلمين ) ...طبعا انا نو كومنت ...للعلم والاطلاع الزلاغيط ممنوعه ويجب غطاء الراس ولبس لباس محتشم ...
(شوفوا الي اطالع الكاميرا كانت تصارخ وقتها )
بعدين طلعنا معلوله .....ومعلوله منطقه مسيحيه وحده من ثلاث ضيع يتكلمون اللغه الارمانية ومدينة جبعادين والصرخه دخلوا بالاسلام.
رحنا على كنيسة معلولا ....

...لاحظت شي بالكنائس ان البوابات الدخول صغيره واجباري طبعا ان لما تدخلها لازم تنحني عشان تدخل .. . دخلنا الاشفت ثنتين قاعدين قلت لها تشرحين لنا (لان الاماكن هذي احلى شي يكون في احد يشرحلك عشان تفهم) المهم بدت تشرح باسلوب يشدك وقعدت تشرح ..في الكنيسه هذي اقدم مذبح ومستحيل يكون في نفسه بالعالم كله ...ليش؟؟؟؟ لان قبل 225 م كانوا يذبحون حيوان المهم اي شي يطلع دم وكان في حواف للمذبح عشان مايطلع الدم بره (نفس المغسله )ولكن بعد 225 اجتمع جميع الباباوات على ان الذبح حرام والغوا جميع الحواف من المذابح تاكيد حرمته وجعلوا الذبح عباره عن قطعة خبز من جسد المسيح وخمر من دم المسيح عليه السلام ..لهذا السبب هي فيها اقدم مذبح لان فيه حواف ..(على كلام المرشده )
طبعا ممنوع التصوير لان الفلاش ياثر على الايقونات (اللوحات ) فما قدرت اصور ...في النهايه كان في علب زيت وبخور حاطينهم على طاوله وحذاهم جمع تبرعات ..ان ماخذت لان قلت لازم اتبرع ..بس هي طلعت كريمه وعطتني
قالت اخذيهم وتباركي ...

طلعنا من الكنيسة ورحنا جبل فج معلوله ..هذا الجبل مشقوق من النص لان واحد من الانبياء كان يلحق وراه عدوا وعشان ربنا ينقذه شق الجبل من النص هذا الكلام الي انقال لنا ...ولما تدخل بين الجبلين تلاقي مدافن وتمثال العذراء .
ومدخله نفق تحت الارض ..



في طريقنا مرينا على ضيعة يبرود وهذي الضيعه اغلب اهلها مغتربين خارج سوريا ومنهم رئيس الارجنتين كارلوس منعم ..
بعدين كملنا الطريق لين وصلنا حمص طبعا حمص رابع اكبر محافظه بسوريا ...زوجة الرئيس من هالمحافظه ..
في حمص مسجد خالد بن الوليد ..دخلنا وشفنا قبره ...


(هذا القبر )
رحنا بعدين على قلعة الحصن درنا فيها والله لو تشوفون برج بنت الملك ما قدرت اطلع الدرج من صعوبته وطوله مادري شلون كانت تطلع وتنزل كل يوم ...



(كانوا من هالفتحه بصبون الزيت على العدو )


(من يعرف شنو مكتوب )...
واخر شي تغدينا في مطعم الطاوله المستديره مطل على القلعه ...عنده فروج لذيذ لدرجه ان بعدها كل مارحت مطعم اطلب فروج مايكون بنفس الطعم ...



وبعدها كملنا طريقنا لمشتى الحلو ووصلنا للمنتجع .....وبهذا انتهى اليوم الثالث ....


(هذا شاليهنا ) وللقصه بقيه ....

مواضيع عشوائيه ممكن تكون تعجبك اخترناها لك:

• خبرتكم عن مراكش
• هل مغامره السفر بمفردك
• ممكن سؤال لأهل الخبره في الرباط
• المغرب الساحر
• من المخطا و المصيب بريطانيا ، السعودية ، المغرب
• أستفسار بشأن البشت المغربي
• النجدة يا مزاعيط المغرب
• هل ممكن ادخل اذا كنت خبير المغرب
• استفسار لوتكرمتم
• مدينة الــــربـــاط
• أفضل خريطة للمغرب
• ما هي اسعار الغرف السويت والمفردة فندق اتلانتس لاكوط في الكورنيش كازابلانكا
• ارجو المساعدة طيارتي يوم الاثنين للمغرب
• استفسار بخصوص شحن السيارات و بيعها بالمغرب الحبيب
• استفسار ممكن
• نداءالمشرفين وجميع الأخوةاستفسار لو سمحتم
• ارجواا الرد من اهل الخبرة
• اول رحلة لي إلى المغرب ومحتارةأرجوا المساعدة
• هل ولي العهد السعودي سيحل بأكادير في شهر ديسمبر؟
• منتجع روتانا بالصور

ماشاء الله لا قوة إلا بالله بداية قوية والله زودتي شوقنا لسوريا وللشوفير ...اللي معبي مية النبع

ههههههههه لاتكلم عن الشوفير
وان شاء الله الجزء الثاني بنزله قريبا ....
والله شجعتوني انزله ...(لايكون تجاملون)

تسلم الأيادي وبالتوفيق

تسلم الايادي

وبالنتظار التحديث

تحياتي

تقرير حلو من البدايه
انا طالعه سوريا الاسبوع الياي وكان ودي اكمل تقريرك حتى اروح نفس الاماكن اللي رحتيها بس شكلي ما بلحق على باقي التقرير

الله يعطيك العافية amna25


بداية موفقة لتقرير في القمة


ملحوظة / يسمح بوضع رقم السائق الذي تم التعامل معه في تقرير العضو فقط

ولا يسمح بوضعه خارج التقرير .. بمعنى يمكنك الان وضعه في تقريرك



متابعين معك

ثانكس الذيب العربي ......

والله خايفه اضعه.... الي يبي رقم الشوفير يقول ...

اختي تحية طيبة والحمد لله على السلامة
بداية موافقة أكملي .......... معك حتى نهاية التقرير

مرة ثانية خلي ..

اي والله شلون راحت عن بالي ....

أختي ألف تحية ومتابعه ...... تسلمين

عدنا بحله جديده (تلفزيون قطر)

الي ماشاف الجزء الاول يشوفه .....بعدين يشوف الجزء الثاني ...تابع تسلسل الاحداث

في طريقنا لمشتى الحلو الطبيعة وااااااااااااااااو لا توصف فرق بين الشام ومشتى الحلو (فرق بين السماء و الارض )

وصلنا المنتجع استقبال و تعامل راقي .....شاليه نظيف ...




اليوم الرابع :في مشتى الحلو
كان يوم بسيط و ممتع رحنا مغارة الضوايات كانت حلوه ...والله سبحان الله شي عجيب ..


في هذي المغاره واحد يبي يستعبط يقولي انتبهي انتبهي صخره راح توئع وقعد يركض (والله لو تشوفونه شلون يركض و المغاره ضيقه ) وانا كنت بسويها وبركض وراه (بس من الصدمه وقفت بمكاني ) الي يقول الكاميرا الخفيه (ينكت ) ..
طلعنا بعدين من المغاره وقريب المغاره في جبل اسمه جبل السيده هذا الجبل يولعون عليه شموع في يوم من ايام السنه ..


(لازم وايرات الكهربا تعطيك ديكور للصوره )
بعدها لفينا شوي بالمنطقه ورحنا قلعة مصياف (وتبقى قلعة الحصن الاجمل ).

هذي القلعه فيها غرفه كامله كلها عظام بشريه ...مو دافنينها ومايبون يدفنونها ...ادري مو مصدقين الصوره سوف تثبت لكم ....



طلعنا من القلعه ورحنا على كفرون ورحنا على نبع الشيخ حسن...

وتغدينا في المطعم نبع السيخ حسن ... الي يضحك ان في المطعم هذا الرقص بس للعائلات راحت عليكم يالعزاب ...


في ممرات يمر فيها النبع (هذا احلى شي بالمطعم )

ورجعنا المنتجع لان القعده فيه بصراحه ماتتفوت ...
نسيت شي مهم جدا ...
هذا فرنسي ليقناه عند بداية مشتى الحلو ولفينا ولفينا واحنا راجعين لقينا بنص الطريق ...


رحنا المسبح نستكشف ...عندهم قوانين ان المتحجبات لازم يدخلون بفلوس لان اكيد ماراح يسبحون وبنكون عاله عليهم ( المسبح طلع مكس ) المهم دخلنا ..كل الي يسبحون اغلبهم بنات واطفال ... ممنوع الدخول بالملابس القطنيه وصارت هوشه بين مدير المسبح واب لان مدخل عياله بملابس الداخليه وقعد يألف ان القطن يتفاعل مع الماي وياثر على الجلد (هم يبون يلبسونهم ميوهات عشان يكونوا بمنظر سياحي )..
المهم شربنا كابتشينو وطلعنا ...

(قعدت لين الناس طلعوا عشان اصور لكم)

كنا حاجزين ملعب التنس لعبنا وخلصنا ...


رحنا تمشينا بالشارع الا حصلنا محل حيوانات حتى محل الحيوانات تدخله بفلوس ..معلومه خطيره واول مره يمكن تسمعونا طلع تمثال الحريه الي بامريكا مزور!!!!!!!!!!!! والاصلي عند هذا المحل ....

( تمثال الحريه )
ونحن نمتشى شرينا عشاء .....ورجعنا المنتجع ....

اليوم الخامس : من مشتى الحلو الى كسب ...
مرينا على صافيتا وفيها برج صافيتا الي يطل على 400 قريه هو موجود على ايام الرومان ..
بعدين مرينا على طرطوس ورحنا بحرها وركبنا القارب وابحرنا الى جزيرة ارواد الموج كان قوي قوي (حسيت ان قاعدين انهرب مخدرات نفس افلام ) طول محنا مبحرين بالبحر البحار قعد يسولف وطلعوا اهله بالدوحه وحبيبت ولده بعد عندنا (الحلو هناك ان اي احد يعرف ان احنا من الدوحه يقول انا اختي ولا جد ابوي يشتغل عندكم )

جزيرة ارواد واحده من اربع جزر كانت عباره عن معتقل ...بس بعدين العثمانين بنوا فيها بيوت وسكنوها ...وبيوتهم مبنيه فوق البيوت القديمه ...

الحين هي ماهوله بالسكان.... ومهنتهم صناعة السفن ....

وفيها مدارس ومستشفيات الخدمات وصلتها الا البلديه ليش ؟؟؟؟؟؟؟ البحر وسخ بسبتهم ...

رجعنا الى الشاطئ ومرينا على مدينة طرطوس القديمه هي مقابل البحر ....

وفي شخص يدعى ابو محمد يسوي عصير الخروب عصير لذيذ طعمه ما ينوصف ...الشوفير اقنعني اشربه ...والعصير هذا محد يسويه الا هذا الشخص ...


وكملنا طريقنا الى كسب واحنا بالطريق اشتهينا المناقيش وقفنا عند جماعه طيبين شرواكم ...هي ام احمد وسلفتها ام ماهر وانا كنت المتدربه عندهم ...وسويت المناقيش واكلناهم ومشينا ...


(هي تعدل من وراي )


وطبعا لا تخلو الرحله من اكل الفواكه الطيبي ..والله طعمه مو نفس الي توصلنا ونخب اول بعد (يقصون علينا )

بعدين وصلنا الي الفندق وهو فندق رزوق ...فندق جميل رائع تعاملهم يحسسونك انك واحد من الاهل اطلالته حلوه ...حتى هم الي علموني ارميني ....ريحنا شوي ورحنا بعدين نتفتل بالسوق وطلعوا اهل كسب مشهورين بصابون الغار مرينا على محل صوابين وشرينا من الصابون....

واخر شي رجعنا الفندق ... وللقصه بقيه ...

ياهلا بك اختي

آمنة

الحمدلله على السلامة

بصراحة صور رائعة خاصةً مشتى الحلو

بس ليش ماخليتي الرحلة كلها بموضوع واحد

عموماً واصلي و سجليني من المتابعين حتى النهاية....

كثري من الصور

صور جميلة جداً وإن شاء الله طلع مضبوط المناقيش اللي صلحتيها

صور جميلة ورائعة
ومبين التقرير اروع
ننتظر تكملة التقرير سواء بهالموضوع او بالجزء الاول او بأي مكان راح نتابعه

( اعجبتني صورة مغارة الضوايات وموقف الكاميرا الخفية ههههههه )


تقبلي تحياتي

ماشاء الله حلو

منتظرين

تابعي

تحياتي

ماشاء الله عليكي اختي آمنة

وكلبالنا ونحنا نكلم رجال طلعت بنت

على العموم ماشاء الله عليكي سرد حلو

وصور حلوة

وأماكن متعددة ومتنوعة

شكرا لأنك سمحتي لنا بالسفر معك وأخذنا الى تلك البلاد الجميلة

تحياتي لك ومتابعين معك باقي التقرير الجميل ....

شكرا على هذا التقرير الجميل

متابعين معاك
تقرير جميل
ولكن سؤال محيــــــــــــــــــــرني
متى كانت هذه الرحله !!!!!
لايوجد تواريخ !!!!!!!!!!!

إختي كبري الخط والصور وخلي بين الصور مسافة كافية علشان تطلع الأجزاء الباقية بشكل أحلى ولا تستعجلين بالسرد نبي التفاصيل

الرحله كانت من تاريخ 11-7 2010 الى 21-7-2010

ان شاء الله محب الخير تامر امر ....

المشاركة الأصلية كتبت بواسطة amna25
http://www.arabtravelersforum.com/tr...9/#post4077539

الرحله كانت من تاريخ 11-7 2010 الى 21-7-2010

ان شاء الله محب الخير تامر امر ....




ما يامر عليج عدو ولا ظالم

الحمدلله على سلامتكم

[

SIZE="6"]ونستمر معكم ونعتذر عن التاخير ..
اليوم السادس :
غابات الفرلق : طبيعة خلابه رهيبه عجيبه خياليه ............اي شي يخطر على بالك .
رحنا قعدنا بقعده عند التنور



وحده تسويه مارضت اساعدها مو واثقه في قدراتي (هي الخسرانه ) قعدت ساعه اقنع فيها خليني اساعدج ..وهي راسه والف سيف ماتخليني امسك شي حتى اني اوقف اشوفها ماتبي تقول روحي ارتاحي .....بس ماخليتها بخاطري رحت بعدين عند ام ماهر وخلتني اساعدها وبعنا كميه والله ...بقول لكم سالفه خطيره حصلت لنا بعدين ....
نكمل عن الغابات كلنا من زعترها...


واحنا ناكل في نحله الا تبي تشاركنا بالاكل المهم كلت وشربت بيبسي وعدلة المزاج وراحت ...







قعدنا بعدين نسولف وقعد الشوفير يقول لنا عن قصص صارت له مع بعض المسافرين ....واحنا انسولف الا مانشوف الا راعي العلك يجينا ...والله الفرحه ماكانتش سيعاني ..لان طول القعده وانا احن ابيه مللتهم افكر فيه لدرجه اني حلمت فيه (كله بسبت محب الخير هو الي قالي عنه )....





بعدين قال لنا الشوفير انروح نتمشى ...رحنا بعدين تمشينا بين الاشجار الخضراء ...وعلى صوت زقزقة العصافير (طول الفتره وانا على بالي عصافير طلع الله يسلمك عايلة صراصير تغني )











واحنا نتمشى الا تتوقعون شحصلنا ؟؟؟



(مين ياكلني ؟؟؟؟؟)

ولعبنا مع السناجب (صاروخ ارض ارض ) ركز بالصوره



بعدها رجعنا الفندق لان كان عندنا حالة تسمم بالفندق .....طلبنا من الفندق استدعاء الطبيب طلع التشخيص تسمم بسبب ان لما كنا في مشتى الحلو طلبنا فطاير ومن ضمنها فطاير جبن ...محد كل منها الا هي ...وطلعت الجبن ما يسلقونها على كلام الدكتور فيكون فيها بكتيريا المهم خذت العلاج وتشافت ... (الله يسلمكم ) لاحد يطلب جبن ...
رحت قعدت على البلاكونه اشوف الجبال الخضراء الا اشوف مطعم على الجبل المقابل (زرقاء اليمامه ) قلت لازم اروحه ... الا ما اشوف سياره عرس تمر ...

(ادعولهم الله يبارك لهم )
اتصلت على الشوفير ورحنا المطعم اسمه الصخره ..وتوهم مفتتحين شقق مفروشه وقعد يقنعنا نسكن بشقه عندهم ..اكله مو ذاك الزود ماعجبني بس عنده الشبس منفوخ ....


بعدين رحنا تمشينا بالسوق ...رجعنا عند محل الصابون ...كان في واحد شيبه بالمحل ..يسال يقول انتوا من البحرين قلنا لا .. من قطر ..انصدم بين عليه حتى احنا خفنا..المهم سكتنا واحنا تختار قال انتوا ماقلتوا ليش سالتكم قلنا ليش قال انتوا شيعه قلنا لا.. قال لان انتوا مو ..(ترى هم عندهم الطائفيه و ويميزون وكل كلامهم اصلا عن المذاهب ) المهم الا قال بعدين انتوا اكيد بتكفرونا ...(قلت ايوه والله مو فاضيتلك) ..وقعد يخربط ويقول الوهابين وانتوا مبين عليكم مو متشددين...والي بكفرونا هم الوهابين ..طنشته وطلعت ..
ورجعنا الفندق ...
اقول لكم القصه الخطيره واحنا عند ام ماهر شريكتي بالتنور ....
كنت واقفه اشتغل الا ما اشوف الا سياره قطريه وقفت طبعا اول مره اشوف سياره قطريه بسوريا (كانت قديمه لدرجه اني انصدمت شلون وصل كسب فيها )...دريت ان الي فيها مو قطرين ..راح سال العم ابو ماهر من وين احنا ..لما درى انا احنا من قطر قال ناديهم ابي اكلمهم ..قلت له خليه هو يجي ..المهم طلع باكستاني بعد مايعرف يتكلم عربي ..يقول سبيك انجلش ..قلت يس ...بدء شغل النصب قال انا من باكستان واعيش بقطر وانقطعت فيني السبل ..انسرقت وماعندي الحين حتى اللقمه اكلها والبترول خلص ..(عاد الباكستاني يسرق ماينسرق )..واحلى شي ان مرته حذاه تصيح من قلب ....والله انكسر خاطري عليهم ...قلت حتى لو بنساعدهم ماراح يكفيهم ...قلت له اتصل على السفاره الباكستانيه قال مافي سفاره باكستانيه بدمشق ..( الشوفير قال لنا فيه سفاره طلع كذاب )....انكسر خاطري بزياده ..قلت اتصل على السفاره القطريه عالطول بساعدونك ...والله اذكر مره كنا مسافرين لندن وضاعت جوزاتنا بنفس اليوم طلعولنا جوازات وخدمونا ...ياكثر قصصنا مع السفاره ...قال شلون اختي احنا بكسب كيف اروح دمشق وانا ماعندي بترول قلت له وانا مشتتطه اني حصلت له حل السفاره تجيك وتحجزلك تذكره وتسفرك قطر وعطيته الرقم الا قال صعبه السفاره توصلنا ...من اهني عرفت ان في حركة نصب بالموضوع ...قلت له اكل الحين ويصير خير بعدين ...قلت ل ام ماهر سويله مناقيش ورحت اكل ..الا ما اشوفه الا راح وهو ماكل الي جاتني ام ماهر تقول يبي لحم وما عجبه الاكل وراح ...الا بعدين واحنا بالطريق مانشوفه الا وهو وجماعته كلهم بالسياره قاعدين يتصورون ...ومستانسين ..انا عاد انقهرت بزياده لان قاعد يشوه صورة القطرين بصراحه .. لان الشيخ على باله قاعد بمكه يشتغل طراره ..وانتهت القصه يلا ناموا ...

في مشكله الحين ما اقدر احمل صور شنو الحل ؟؟؟؟[/SIZE]

ماشاء الله عليك صور جدا رائعة وتفاصيل جميلة


* اذا لم يمكنك تحميل الصور في الالبوم اعرضي المشكلة على الادارة في واحة الاقتراحات والحلول والدعم الفني وان شاء الله يفيدونك


بالتوفيق

الله ينور عليكي اختي شي جميل

ماشاء الله حلوة التمشية

الله يسعدك

تحياتي

يعطيك العافية اختيamna25 عالتقرير الرائع

والباكستاني مشهد متكرر في جميع الدول الهدف منه النصب والكذب ويشاهده الجميع فيجب الحذر منه

ومنتظرين تكملة التقرير

تقبلي تحياتي

المشاركة الأصلية كتبت بواسطة amna25
http://www.arabtravelersforum.com/tr...1/#post4085461

موضوع العلك .....يعني طريقة التصنيع ؟؟؟؟؟
مافهمت قصدك (ترى استيعابي بطئ )

بعدين انا دورت على الواحه الي ذكرها الذيب العربي ماحصلتها ...اذا في احد يدلني عليها ..

ابي اكمل الموضوع قبل ما اغيب ....





هذه الواحة


http://www.arabtravelersforum.com/travelarab33/

شكلك ما حضرت الدرس عدل

انا اول كنت اقول نفس الكلام ...بس سالت الي يبيع العلك من اي شجره تاخذونه قال ...من شجرة السرو ...الاشجار الي تكون بالغابات ...(قلت الحين اشتري منه وموجود قدامي على الشجره )رحت ابي اكسر غصن ...الا قالي شو مفكري حتلائي بالغصن كان كل الناس اشتغلوا الشغلي هاي ....الا قالي احنا بالربيع الاغصان تكون طريه نفضيها من الداخل ...والعلك يضلعونه من جذع الشجره اللحاء ..وبعدين يغلونه على النار ويصبونه داخل الاغصان ....وبس

فزت عليك واحد: صفر

المشاركة الأصلية كتبت بواسطة amna25
http://www.arabtravelersforum.com/tr...6/#post4087586

شكلك ما حضرت الدرس عدل

انا اول كنت اقول نفس الكلام ...بس سالت الي يبيع العلك من اي شجره تاخذونه قال ...من شجرة السرو ...الاشجار الي تكون بالغابات ...(قلت الحين اشتري منه وموجود قدامي على الشجره )رحت ابي اكسر غصن ...الا قالي شو مفكري حتلائي بالغصن كان كل الناس اشتغلوا الشغلي هاي ....الا قالي احنا بالربيع الاغصان تكون طريه نفضيها من الداخل ...والعلك يضلعونه من جذع الشجره اللحاء ..وبعدين يغلونه على النار ويصبونه داخل الاغصان ....وبس

فزت عليك واحد: صفر



بصراحة غلبتيني 10 صفر !!!!

اليوم السابع :

طلعنا من كسب على منطقة البدروسيه ...الجو بارد الى غائم جزئيا .....كنت انتظر ينزل مطر لان الجو جو مطر (نفس جو الدوحه لما ينزل المطر)...وبالفعل توقعاتي كانت صحيحه ..نزلت امطار خفيفه ..وقفت بسرعه ..








مرينا بعدين على بحر البدروسيه ... وصلنا البحر ...



اول ماوصلنا الشاطئ قلنا للشوفير يدخل يوصلنا قريب الصخور ...ولكن حدث مالم يكن بالحسبان السياره غرزت ..وكانت الوهقه الكبيره ماذا نفعل ..نزلنا من السياره الا كان في شب نشمي وساعد الشوفير وطلعنا السياره ...(قلنا مره ثانيه لا نتفلسف )

..ماذا اقول عن الشاطئ سبحان الله ...ماشفت مثله طول حياتي ..(الا استغفر الله في حوض سمكنا )..وسبحان الله تحس كانه قطع جرانيت ورخام ..







قعدنا شوي بعدين حركنا .....الى البحيرات السبع ....

بحيرات السبع موجوده في مشقيتا ...وهي عباره عن تجمع مياه امطار ... (الصور ملتقطه بواسطة هليكوبتر )











وصلنا البحيره عند الشاطئ ...





خذنا قارب ..



ابحرنا في البحيره ..على انغام مطرب صدع راسي منه ..سكرناه لان احلى شي تسمع صوت الموج .....بعدين كملنا الرحله براحه وسعاده ...





في البحيرات تم تصوير مسلسل الكواسر والجوارح والفوارس ... حتى بعدين وقفنا عند سهل وتصورنا مع بقياهم من رماح وسيوف ....





وقيل مانوصل الشاطئ قلت للقبطان معلش اسوق مكانك ...والله وافق ما توقعت ...(لاتخافون ما تجاوزت 180 ).. حلوه حلوه كانت الرحله ...رجعنا الى الشاطئ ..كانوا يبون ياكلون شي في مطعم هناك ...طبعا انا رفضت رفض تام لان الاكل لازم يكون عند ام ماهر حبيبت الشعب ...
واحنا ماشين حصلنا حمارين (الله يكرمكم ) شكلهم يكسر الخاطر وقفنا عندهم بالسياره ..(تذكرت قصة صبار الحمار الثرثار ) ..



يحليله واحد منهم اجتماعي اقوله مرحبا ماشوف الا قرب عندي ...



قلت خلني اضيفه شوكلت توه مسكين بيفتح حلجه وياكل الا صاحبه جاي ..والله انا هني خفت خوف (كان عندي امتحان ) قلت اكيد بهاوشني اني اطعميه شوكلت ...بسرعه رجعت يدي ..الا طلع جاي يسلم قعد يسولف مع الشوفير ..



قلته يا حج ممكن اطعميه حلاوه ..قال شو ..قلته شوكلت ..قال شو ..الا يقول للشوفير شو بتقول هادي والله مو فاهم عليها (اهني حسيت باحساس غريب شكيت اني اتكلم هندي ) الا قال بتئولك بدها اطعمي الحمار بسكوتي (تعلموا بسكوتي )..الا قال لشو طعميه الله لايردوا انا باكلها ... قلت شوف انت خذ الجديده وانا اطعميه هذي ( حلو التفاوض )..المهم والله الحمار اكلها بنهم متلذذ وشربنها ماي ورحنا ...(الله يخليه ل مامتوا وبابتوا )



...لفينا شوي بالمنطقه








(حلوين صح )

وبعدها رجعنا الفندق وقعدت على النت اشوف اخر اخبار المنتدى ... ودمتم بحفظ الله

ماشاءلله خوش تقرير والله وخاصة الحمار ( اكرمكم الله)

ما شاء الله لا قوة إلا بالله .. أحييتي الذكريات الحلوة وخاصة الإبحار باليخت الملكي ال vip ... واصلي التألق فقلبنا في التقرير تعلق ..

تقرير رائع رائع رائع


صور تجعلنا في قلب الحدث ونعيش الاجواء


شكرا لك

الحمد لله على السلامة
ما شاء الله تقرير مميز

تقرير رائع الله يعطيج العافيه

الحمدلله على السلامة
نقرير رائع بكل ماتعنيه الكلمة

لشو تطعميه بسكوتي الله لايردوا أنا باكلها


عبيط هالشايب

بسم الله ماشاء الله

الله يسلم ايديكي عزيزتي امنة خووووووش تقرير

وعليك سرد وقصص غير شكل تصلحين تسوين مسلسلات وسيناريوهات خطيرة

اعجبتني قصة البسكوتيـيــــــــــــــــــــــــه ههههه والكلام الهندي خخخخخ

بمثل هذا الوقت السنة الماضية كنت بسوريا ايييييه

بس السنة هذي راحت علي للأسف

شكرا لج عزيزتي رجعتيني سنة لورا واحلى ذكريات

واصلي تألقك وان شاء الله اتابع معاكي رحلتكم الروعة

مبروك النجوم الخمس

يعطيكي الف الف عافية

تقرير فريد من نوعه

اللوحة مكتوب عليها ،، كل يعمل على شاكلته.

مسكين الشايب (الختيــار) شكله جوعــان .






النجوم الـ 5 تصنيف لتقريرك ..

ننتظر الاجزاء الجاية

تسلمي على هالتقرير الحلو

المشاركة الأصلية كتبت بواسطة سعيد الحمادي
http://www.arabtravelersforum.com/tr...1/#post4096451

تقرير فريد من نوعه

اللوحة مكتوب عليها ،، كل يعمل على شاكلته.

وانت صح ....ماشاء الله نظرك 6على 6 .... برسلك سلت بسكوتات ..

مسكين الشايب (الختيــار) شكله جوعــان .






النجوم الـ 5 تصنيف لتقريرك ..

والله فديتني دايما متفوقه (مصدقه نفسي )....

شرايك اهديك مخالفتي ؟؟؟

الحمدلله على السلامه ،،

ورحلة موفقة وابداع في طرحك للرحله ،،

الله يعطيك العافية

اليوم الثامن :وتستمر المغامرات ....طلعنا من كسب الى السمراء..



بحر السمراء وهو جزء من البحر الابيض المتوسط ( كاني قلت معلومه جديده ) .... البحر بين سوريا وتركيا ( اكيد محد يعرف هالمعلومه )....على اليسار وانت رايح صوب البحر ...وعلى يمينك وانت راجع من البحر (الدقه مطلوبه )....جبال تركيه هي الي فاصله تركيه عن سوريا ....(الحين بقول معلومه قويه يمكن كتب التاريخ ماتعرفها ) انا الجبال هذي سوريه ولكن اهديت لتركيا على ايام الاسكندر (شفتوا الكرم ).. طبعا انا غير صلنفه ماراح اقبل اي هديه .....
المهم شفنا البحر بس ماقعدنا فيه لان نزلته صعبه .... (الصور هذه المره ملتقطه عبر الاقمار الصناعيه )





وبعدين حركنا ...




مرينا على الحفه الي فيها قلعة صلاح الدين (وتبقى قلعة الحصن الاجمل )...



(بوابة القلعة )



اول شي عشان نوصل القلعه لازم نطلع درج ...انا شفت بداية الدرج قلت يالله درج البيت ...

(نهاية الدرج الاول )
ولكن سمعت وليتني ماسمعت ان الدرج عباره عن 740 درجه وقفت ماقدرت اكمل تعبت وانا توني مابديت ...لا والي زاد الطين بله ..ان وحده وهي نازله ..تقولي توج ماشفتي شي .... بس لالالالا مب انا الي استسلم واتوقف عند الصعاب (معكم سوبر مان سوري ويمن )..تحديت الصعاب وطلعت الدرج كامل (لا تسالون عن الوقت ) ...المهم وصلت ...دفعنا التذاكر ..ودخلنا الى القلعه ..تمشينا فيها ..









(خزان الماي )
هالمكان فيه جنانوه ..كنت انادي بابا ماما (فليم هندي ) اسمع صوتي مره ثانيه ..قاعدين يقلدوني .


احلى شي هالمكان ..مصيف الاميرات ..كانوا بالصيف يقعدون فيه ..(يعني الشاليه )..شفوا الدلع مدلعينهم.. بالصيف برج والشتاء برج ثاني ...


(ولكن للاسف تحول الى استراحه )



(سور القلعة )

واحنا نتمشى الا المسئول عنها ...بالمناسبه ترى الي مسئول عن القلعه انولد فيها لان بالاساس ابوه كان مسئول عنها وعايش فيها ...الحكم وراثي ..نرجع واحنا نتمشى جزء تعب الا يقول بتعرفوا شو وصية صلاح الدين قبل مايموت ..قلنا لا ...قال صلاح الدين قبل مايموت وصى وقال اي امراه بتمشي بالقلعه وبتتعب بتزوجوا زوجها امراه سوريه ...(لحقوا ياشباب العرض ساري الي ناوي ياخذله سوريه بدل مايدفعله شي وشويات يروح القلعه وياخذ وياه جدته (الله يطول بعمرها ) لانها بتتعب من اول ثلاث درجات وبزوجونه على طول ..بس مو تنسى وتناديها ياجدتي . بتروح عليك بعدين) ...ولاتنسوا حلواني ....
نزلت الدرج مره ثانيه ....وتوجهنا الى صلنفه ...حلووووووووه هالمنطقه اعجبتني وناسه وناسه واحلى شي تروحها مع الاهل كلهم ...المهم الجو كان رهيب غيم وجو نقي خالي من الشوائب وبااااارد ابرد من كسب ...توقعت ينزل مطر بس عاد مو كل مره اجيبها ...



(شوفوا ساعة بج بن ...تشتغل بعد )






رحنا النبع البارد.... الماي بااااااااااااااااااااااااااااااارد ابرد من الماي الي بثلاجاتكم ...شربنا ..واول مره نروح نبع ونعبي بغرشة ماي (بتعرفون شصار بالغرشه )...



.لفلفنا بصلنفه وااااو الخليجين لاعبين لعبتهم قعدات وذباح وااااااااااو .
(غمضوا عيونكم )



...طبعا اول مادخلنا صلنفه قلت للشوفير يودينا المطعم الي يسوي بيض بالفخار (محب الخير الي قالي عنه) ....وصلنا المطعم اسمه عذراء الجبل ...وهو مطل على سهل الغاب وجبل الاخضر ..المنظر كانه وانت قاعد بالطياره ...





طلبنا البيض ..ومشاوي ..ومقبلات ( 7 ايام وانا اكلي بس مقبلات ) ..وقلتله اول ماتبتدي بالبيض نادين ابي اشوفك وانت تسويه (في اكل ماحب اكله الا بالبيت عشان نوعيته ونظافته )....



المره هذي سويت اكسبشن وباكله من كثر ما محب الخير مدحلي فيه... المهم اشرفت على البيض كان بيض بلدي من مزرعتهم وسمن بعد من مزرعتهم ...كانوا انظاف (مادري لان قدامي او لا )..... تعرفت على طاقم الطباخين ...



(جاهز للتقديم )

بعدين جابه على الطاوله ...وبديت اكل اول لقمه ..وااااااااااااااااااااااااااااااااااااااااااااو ...يمي يمي يمي لذيذ ...طعم ولا بالاحلام ...اول مره اكل بشهيه من اول ماوصلت سوريا ...



ترى الي مسوي دايت لا يطلبه انا متنت 4 كيلو منه (تخيلوا!!!!!!!)...

طلعنا بعدين ورحنا اعلى جبل ...برد برد برد تك تك تك ...الغيوم تسلم علينا وتكمل طريقها ...







اخر شي ختمنا الرحله ورحنا ساحة الفرسان (على كيفي مسميتها )ساحه فيها خيول وحمير ...واول ماوقفت السياره الخيول والحمير حاصرتنا (كان اسرى بمعركه ) ...وبالغلط في بنت صغيره مسويه نفسها عرافه ...قلنا مانبي نركب عشان بس يفك الحصار ونقدر ننزل من السياره ..







نزلنا الا العرافه مافكت عنا ..وتقولي تعالي اشوفلك نصيبك...انا مو مركزه وياها اكلم تلفون ..اقول لها بيدي مابي ..وهي ابد لزقه ماتبي تفك ..سمعتني وانا اتكلم والقطت كلمة جامعه .. ..سكرت التلفون ..وفضيت لها اقول لها مابي ياحلوه ياعسل ...تقول بقولك انتي بالجامعه ....قلت لها انا بكمل لاتعبين نفسج قلت لها كل الي قلته على التلفون ...قصرت المسافه عليج ...اذا تبين انا اقرالج وقولج نصيبج ...اهني عصبت وتقولي عطيني شي تبي تاخذ من كل وحده ..قلت له ماعندي شي ..تقول عطيني اكل ماي اي شي (تبي اطلع مني شي )رحت عطيتها غرشت الماي (تذكرتوها ) واحنا بالطريق ادور عليها تذكرت اني عطيتها ...
بما اني فارسه ما استحملت ما اركب الخيل ....بس كان بطئ ... (السلحفاه اسرع منه ...صدقوني )
جيت ابي اركب السياره الا واحد يقولي يااميرة الاميرات تعالي ذوقي مكسراتي ..(طالعت نفسي قلت يمكن العرافه حولتني سندريلا )...وقف وقعد يذوقنا مكسراته ..ويقنعنا نشتري ...ولهجته بدويه ..اقوله انت من وين ..يقولي انا شمري من دير الزور ...قلت دام انك شمري بشتري... الشمر ربعنا (ليش الحميه جاتني مادري )المهم شريت وصورته الا يقولي اكتبي ابو شهاب الشمري ..وانا مصدقه لين ماركبنا السياره الا الشوفير يقولي هذا لا شمري ولا شي (يعني بالعربي انقص علي ) ...



اخر شي رجعنا الفندق ..



قعدنا على البلاكونه ...




وبعدين نزلت السوق لان كان اخر يوم بكسب ...

تقرير حلو

واصلى

متابع

تقرير اكثر من رائع

واصلي الله يحفظك

يعطيك العافيه على التقرير

إدماااان

تراني متابع من بعد صلاة الصبح ولا حسنت نام لين خلصت الحلقات اللي فاتت علي

بارك الله فيكي

يا فارسة

وش قصتك تصورين الحمير كتير ههههه

عزكم الله


متابع

مـــــــــتــــــــــــابــــــــــــــع



واصــــــــــــلـــــــــــــــــــي

المشاركة الأصلية كتبت بواسطة mwjahead
http://www.arabtravelersforum.com/tr...7/#post4103007

إدماااان

تراني متابع من بعد صلاة الصبح ولا حسنت نام لين خلصت الحلقات اللي فاتت علي

بارك الله فيكي

يا فارسة

ليكون بس مو صدق يعني ؟؟؟؟

وش قصتك تصورين الحمير كتير ههههه

عزكم الله

توني الاحظ

متابع



ثااااااااانكس على المتابعه ..

اليوم التاسع :ودعنا كسب وماودنا نودعها ...تصدقون احس رحلتنا اهني خلصت ....





(والله سؤال ابي جواب ..هم شنو يصيدون في البحيره ؟؟؟؟؟)

رجعنا دمشق ....فرق جبال خضراء وجبال صفراء ..

مرينا على منطقة اوغاريت في راس الشمر ..وهي المنطقه الى وجد فيها اول ابجديه في العالم ....



وبعدين رحنا على بحر اللاذقيه ...



بحر عادي نفس اي بحر مافيه مميزات ....الا شي واحد ..تدرون شنو ؟؟؟؟
ان شركة الديار القطريه عندها مشاريع شاليهات وفنادق على البحر .....(احم احم )







(ولد عم تمثال الحريه الي شفتوه بالجزء الثالث او الرابع .بس متكبر علينا )

لفينا بالمنطقه وشفنا الفنادق الي كنا ناوين نحجز فيها ...بس الحمد الله ماحجزنا لان موقعها مو حلو وماتصلح للمحجبات ..اصلا المنطقه كلها على بعضها مو حلوه (وجهة نظري لحد يعصب )....

طلعنا ورحنا مرينا على طرطوس القديمه ....ليش ؟؟؟؟ (الي كان متابع من البدايه بعرف )


(عشان نشرب عصير الخربوب ....)
وبعدها كملنا على دمشق على طوووووووووووووووووول ....



وصلنا فندق الشام بالاس ...فندق محترم راقي فرق بينه وبين البلو تور ...
نزلنا الشنط ورحنا بعدين على مطعم قريب من الفندق اسمه ست الشام ...



اتفقت مع الشله قبل ماندخل مشاوي لالالالالالا كرهت ريحتها ...نطلب اكل سوري وبس ...الشوفير كان قايل لنا ان عنده فتة حمص حلوه جربوها ...طلبنا الي بالزيت والسمن الذ شي الي بالسمن ...حلو طعهما يمي يمي ...


رجعنا مشي (قلنا للشوفير يروح بيته من6 ايام ماشاف اهله )..الله لايوريكم ..مادلينا الطريق ماخلينا احد ماسالناه ...في النهايه وصلنا ...
قعدنا بالفندق نستكشف ...كنا ناوين نروح السينما بس تسكر الساعه 9 او 10 ..(قعدت افكر سوق سينما ..قررت ) رحنا سوق الشعلان تمشينا ورجعنا الفندق ....وتعشينا بالمطعم الدوار ...بس انتبهوا لان السكاكين والشوك مصنوعه من الفضه
اطلبوا يغيرونها (اللهم اني بلغت )...






اليوم العاشر :رحنا سوق الحميديه ... طلع كبير ومتفرع ...تمشينا فيه تمشينا فيه ....زززززززززحمه وحر موت (ماقدرت استحمل واااي فديت كسب ) ..



كنت متحمسه اروح السوق لسبب واحد ..(سبب عبيط )لما رحنا كنسية معلولا ..راسمين العذرا بفستان ..وقالت ان قطعة الفستان قطعه غاليه من خيوط الذهب واسمها البوكار ..قلت لها موجوده بسوريا ..قالت موجوده بسوق الحميديه بس هي كتير غاليه ... انا خلاص ابي القطعه ..رسمت احلامي عليها ...رحت سوق القماش وقلت له ابي البوكار وطلعلي البوكار ...سررررررررررررررحت بالقطعه ....من الصدمه طبعا ..(شوفوا واحكموا 3 قطع كلها بوكار ) ..واغلى وحده الزرقاء..



وفي نهاية سوق الحميديه (قصدي ممر من ممرات السوق ).. الجامع الاموي ...



مقابل الجامع في ساحه فيها حمام ..تشتري اكل وطعميهم ..(الاكل لا تكته فمكان واحد نثره حركة نذاله عشان مايلمونه مره ثانيه )



وقبل مانروح الجامع رحنا قبر صلاح الدين الايوبي .. في قبرين له واحد من القبور المانيا مسويته في عهد العثمانين عبدالحميد..تعبير عن محبتهم له ...


وفي قبور للاتراك في ساحه قبل قبر صلاح ...



وبعدين دخلنا المسجد الاموي ...كان زحمه كثير كثير ... والناس قاعدين بالممرات ياكلون والاكل على الارض ...شي يحزن والله ينكسر خاطرك شلون مسلمين واساس النظافه ..مو مهتمين (والله كانهم قاعدين بالشبره )..




المهم واحنا نمشي بالممرات اشوف ناس رافعين لوحات مكتوب عليها حملة(....... للحج والعمره ) ... قلت شنو الموضوع بمكه احنا ....صادني فضول قوي اعرف الموضوع ...وصرت بعدها اي تجمع لهم اقط اذني عندهم ابي اعرف الموضوع ....(بتعرفون بعدين لاتصيرون ملاقيف) .....
دخلنا غرفه الي فيها راس الحسين وهناك صيااااااااح ...وفي الغرفه في فتحه بالحائط مبروزه ..ويدخلون راسهم فيها ويحبون ...ويقولون ان فيه ريحة مسك ...(انا ماجربت ادخل خفت انخنق ..الي جرب يقول )..





(داخل الغرفه الصغيره موجود راس الحسين ...)



(راس الحسين )

.عرفت اهني ان الاخوان كلهم شيعه ....طبعا وانا اصور في وحده هاوشتني تقولي انت جاي تصورين ولا تتعبدين ...لم اتكلم ولا كلمه ...طلعت ..ورحنا المسجد ..الا طلع بالمسجد قبر النبي يحيى عليه السلام ...واهني عرفت الموضوع ...



وانا اشوف القبر وحده شيعيه تقولي صوريني ..(قلت حلو اصورها وبعدين اسالها ) ..وانا اصورها الا مرت وحده تعرفها وضحكت رحت صورت ...الا تقولي وي وي وي مايصير تصوريني وانا اضحك امسحي الصوره ..قلت اوكي (كنت بقولها ليش حبيبتي احنا بعزاء)...المهم راحت بالوقت هذا اتكلم الي ضحكتها وقلت لها خير شو الي جايبج ..الاقالت لها والله جايه عمره ...الا قالت لها عمره مقبوله ان شاء الله ..(واخيرا كونان اكتشف الحقيقه).. رجعت بعدين صورتها ورحت ...
في المسجد بعد في التعميد اثر من اثار المسيحين ...لان المسجد قبل كان كنيسه اصلا وبعدين حولوه المسلمين مسجد وخلو التعميد ..عشان يثبتون سماحة الاسلام ...العجيب بالموضوع والجهل ان الشيعه كانوا بعد يتمسحون فيه ويتباركون فيه وهم مايدرون شنو موضوعه ...



طلعنا من المسجد ورحنا دمشق القديمه ....كانت حلوه جميله نفس الي بالمسلسلات ...






تمشينا ومرينا على مطعم جبري ..








واااو القعده فيه عجيبه كان باب الحاره ..

بعدها رحنا على مكان فيه ثلاث قصور بس نسيت اسمه (لان نسيت دفتر السفر بالفندق ما كتبت اسمه ) ..الي يعرف اسمه يقوله ...










وبعدين رجعنا الفندق لان بصراحه ماقدرنا نكمل مشي ....


ريحنا وبعدين رحنا سوق الصالحيه ...تمشينا فيه ومشينا ومشينا وانا فرحانه ..وفجاه وفقت لم استطع ان اتحرك ...تدرون ليش ؟؟؟؟؟؟ مادري شلون وصلنا البلو تور ..والله ان عالطول لفينا حتى مانبي نعرف شنو المحلات ...لان جاتني حالة اكتئاب ...رجعنا بطريقنا الفندق ..الله يسلمكم ضيعنا الطريق الا شفت وحده بالطريق مقابلتني ..اقول لها لو سمحتي اطالعني من فوق لتحت خايفه انا اقرب وهي تبعد..تقول نعم (حسستني ان بعد شوي بطر منها )...والله لو تشفونها ..المهم بعدين اقول لها وين صار فندق الشام ..(.تغيرت اللهجه) سوري حبييتي (ادري على بالها اني بطر )قالتلي مكانه وختمتها والله يا اهلا وسهلا فيكم (من بعد ما كانت ناويه تحقرني) ...
وصلنا وعالطول رحنا انتعشى بالفندق ...وجهزنا الشنط ..بكره الصبح رجعتنا للدوحه

اول شي ابي اشكر كل من ساعدني بالمنتدى واولهم محب الخير ....لان ساعدني بامور كثيره واهم شي الشوفير ..واشكر كل الاعضاء الي كانوا متابعين موضوعي ...
ثاني شي استمتعت بالسفره كثير...كنا موفقين بختيار البلد (وكنا محظوظين ان احنا اول قروب في العايله نسافرها )....مع ان كان في اعتراض كبير من قبل الاهل ان سوريا مافيها شي وان مافيها الا مراقص وديسكوهات على السمعه ..وانصدموا بعدين بالصور ...
كان شعب طيب ..يحب الخير ..يحبون الخليجين .والله دايما كانوا يقولون انتوا خيركم علينا كبير ...ولما يعرفون ان من قطر ..يقعدون يرحبون بعد شوي بيخدمونا بعيونهم ...
في النهايه سامحوني على القصور واول شي على رداة الصور ..ترى والله اول مره اصور بسفراتي ..وماصورت الا عشان خاطر المنتدى لان منتدى راقي بمعنى الكلمه ...(تصدقون الكاميرا جاتني هديه واول مره استخدمها )..
المهم اتمنى انكم استمتعوا معاي ... واتمنى ان استمر في المنتدى على قدر المستطاع ..بس اذا غبت لاتنسوا موضوعي ....ترى فاز بـالـ 5 ستار ..

اخر شي خلاص ادري طولت عليكم الي عنده اي استفسار عن السفره او ملاحظه يتفضل بالسؤال ....

إختي أول شي لا شكر على واجب والحمد لله إنكم استمتعتم بالرحلة والشكر للأخ الذيب الشمالي اللي رجح كفة الشوفير الأخ أبو حامد الي كنت واثق بأنه راح يعطي رحلتكم طعم مميز ....وصارت عندج خبرة تفيدين فيها غيرج .. ودي أعلق على صلنفة لأني كنت مسافر الخمسة أيام اللي مضت وما تابعت التقرير آنا تعمدت إني أخليكم تسكنون بكسب لأنكم لو سكنتوا بصلنفة راح يتعكر مزاجكم بسبب مضايقات فئة منحلة أخلاقيا ما عندها مهنة غير معاكسة البنات وبوقاحة وللأسف يعتبرون خليجيين والا صلنفة أبرد وربما أجمل من كسب لكن الراحة النفسية بكسب ..

ينتهي تقريرج اللي استمتعنا بمتابعتة ولكن تظل الذكريات الطيبة عالقة في الوجدان وراح تحنين بعد كم يوم على البيض بالفخارة والمناقيش والمحمرة وشاي الخمير ..

أسأل الله العلي القدير أن يوفقج في دراستج ويرزقج بولد الحلال اللي تستعيدين معاه الذكريات والأيام الحلوة .. بس خلي روحتكم المرة الجاية بالشتا لأن الأكل بالشتا غييييير ..

مع تحيات إخوج العود .. بوعبد الله