مرحبا أخوي ...
اسمح لي ما جاوبتك في آخر مرة على أسئلتك ...
1- أين أجد خرائط تفيدني في الرحلة؟ أذك في رحلتي إلى صلالة كانوا يوزعون الخرايط بالمطار وكانت واضحة جدا جدا. أتمنى أجد مثل ذلك في البحرين
والله لحد الىن ما شفت خرائط مفصلة للبحرين ... لكن زيادة للتأكد .. أول ما توصل بالسلامة .. مر على محل السوق الحرة بعد منطقة الجوازات في المطار ... واسألهم إذا كان يوجد عندهم خارطة للبحرين ..
2- كيف أصل من فندق اليت سويتس المنامة إلى مستشفى الشافعي الواقع في مدينة عيسى؟ ( أريد وصف الطريق )
راح أوصف لك الطريق بالتفصيل .. الطريق شوي بعيد ...والأفضل انك تعمل للوصف print وتاخذه معك ...
بعد ما تطلع من الفندق .. على الشارع العام ... توصل للدوار اللي جنب مجمع الدانة وترجع لنفس الشارع .. بيكون فندكم
(اليت سويتس) على يدكم اليسار ... تواصلون سيده مع الشارع ... لحد ما تطوفون على مجمع البحرين (جيان) بيكون على يمينكم .. تبتدون تمسكون أقصى اليسار في مسارات الشارع ...
بتوقفون عند إشارة ضوئية ... في تقاطع كبير ... طبعا انتوا ماسكين يسار ... تلفون يسار ... وتطلعون على الشارع العام السريع highway .. أوك ... تروحون سيده وتمسكون المسار الأوسط ...
طبعا الشارع طويل ... بتصادفكم .. عدة مخارج عاليمين ... انتوا لازم تاخذون المخرج اللي مكتوب عليه (مدينة عيسى) ... بينزل فيكم الشارع .. وتواصلون سيده بعد ما تنزلون ...
تظلون ماسكين المسار الأيمن ... لحدا ما تشوفون المخرج اللي مكتوب عليه مدينة عيسى وهو بيكون ثاني مخرج ... بتشوفون هنا على يدكم اليسار نافورة كبيرة ... وتواصلون سيدة .. بتشوفون بعد محلات أثاث على يدكم اليسار (بيت العاصمة و معرض سيارات المرسيدس)...
بتصادفكم إشارة ضوئية ... تمسكون عندها المسار الأيمن ... وتواصون سيدة بعد ... بتوصلون دوار فيه أعمال إصلاح للطرق وحفريات ... تلفون يسار على الدوار وتروحون سيده ... بتشوفون مباني جامعة البحرين على يدكم اليمين ... وبعدها بتشوفون مبنى تلفزيون البحرين ... .. لو التفتوا يسار بتشوفون مبنى أبيض مكتوب عليه مركز الشافعي ...
اللي عليكم انكم توصلون للدوار وترجعون للمبنى ...
أتمنى أكون وضحت لكم الطريق .. وأي استفسار حاضرة لكم ..
4- أريد مكان للتمشي أو شارع يكون على البحر وعنده مقاهي في المنامة؟ وكيف الوصول إليه من فندق اليت سويتس؟
ممكن تروحون مقهى الشراع ... بس عشان توصلون له يبي له لفة طويلة شي ... هو موقعه على البحر ... مقابل منطقة السوق المركزي ومحلات رامز ... يعني لازم توصلون لفندق الشيراتون ..تلفون يمين وتواصلون للإشارة الضوئية وتلفون U turn وتردون ترجعون للشارع الرئيسي وتواصولن لحد ما تصادفون اللفة اللي تدخلكم لمقهى الشراع ..
الأخت الماسة السوداء حلطة عنه صور في موضوعها الرائع ...
-----------------------------
أتمنى أكون أفدتك أخوي ... وبليز لا تتردد في أي سؤال آخر ..
المفضلات