تجربتى مع مصر للطيران خلال عشر سنوات تقريبا
بدأت السفر خارج مصر بعد انتهاء دراستى الجامعيه مع بدايات الالفيه منذ اكثر من عشر سنوات و بالطبع كانت مصر للطيران هى الشركه الاولى فى اختياراتى للسفر باعتبارها الشركه الوطنية... بالطبع سافرت على خطوط اخرى غير مصريه وقتها لم تكن فروق الاسعار كبيرة و ايضا سعر التذاكر عموما كان اقل بكثير من الان ... ازدات سفرياتى و الاسرة مع انتقال شقيقاتى و اسرهم للاقامه فى الامارات و اصبحت سفرياتنا متكررة بشكل دائم... وقتها لم يكن لمصر للطيران موقع اليكترونى او غيره .. وقتها فكرنا بالاشتراك فى برنامج المسافر الدائم اعتقادا بانه يمنحك مميزات فى سفرك و كما رأيت مع الشركات الاخرى... قمت بنفسى بملأ استمارة الاشتراك فى حوال عام 2002 كاشتراك عائلى لخمسه افراد .. عضو رئيسى و اربعه اعضاء تابعين له يحصل على نقاطهم
من 2002 لم نحصل على اى كارت عضويه حتى عام 2006 و كل مرة نسأل فيها يكون الرد فى الطريق او سنرسل بهم على مكتب مصر للطيران القريب من عنوانكم , خلال هذه الفتره كنا نسافر كثيرا على خطوط مصر للطيران باعتبار اننا نجمع نقاط لاستخدامها فى الحصول على مميزاتها او الحصول على وزن اضافى ...مع استمرار السوال تبين ضياع استمارة العضويه و عدم العثور عليها و كان الرد بسيط اوى اعملوا استمارة اخرى و تم عمل استمارة اخرى ... يفترض انها عائليه لخمسه افراد و اخيرا عام 2006 حصل الوالده على كارت العضويه من مكتب مصر للطيران الرئيسى فى مطار القاهرة
و لم يتم تسجيل نقاط التذاكر المستخدمه طوال هذه الفترة حوالى ما يزيد عن 50 تذكرة بحجه انها استخدمت قبل صدور الكرت مع ان كنا نعطيها للمكتب لتسجيلها و كانوا يقولوا كله تمام و تمت التسجيل و استمر السفر على مصر للطيران و تقديم التذاكر للمكتب للتسجيل و تسجيلها على الكاونتر فى المطار و فى النهايه اكتشفنا ان العضويه الصادرة باسم الوالده فقط و ان التذاكر الاخرى لم تكن تسجل نقاطها و بالتالى ضياع عدد اخر من النقاط لم يسجل و اخيرا حصلت على كارت عضويه المسافر الدائم لمصر للطيران فى 2009 بعد ذهابى ايضا للمبنى الرئيسى بجوار مطار القاهرة
عذرا للمقدمه بس احكيلكوا بقى على مواقف مصر للطيران على سبيل المثال اشتريت 3 تذاكر القاهره - دبى - القاهرة وقتها كانت التذاكر الورقيه و حصلت وقتها على التذاكر مفتوحه اى غير محدده تاريخ العوده , المكتب هنا فى مصر لصق عليها استيكر ابيض مكتوب عليه (اوبن ) و عندما ذهبت للمكتب فى الشارقه لتحديد ميعاد الرجوع تعامل معنا الموظف بشكل فج و انه لابد من دفع رسوم لتحديد ميعاد العودة ... بالطبع رفضت لانى حصلت على التذاكر من مصر من مكتبهم هكذا و لم يقل لى انى سادفع اى مبالغ للحجز ... وقتها شرحت له انه من المقبول ان ادفع لو هغيير ميعاد محجوز فعلا و لكن دى مفتوحه و بالتالى ليست غلطتى او مشكلتى ان تحمل خطأ غيرى و بعد شد و جذب و مشادات وتصميم لم ادفع اى مبلغ و حجزت التذكرة
المشكله عندهم ان مصر للطيران تعمل بنظام ( التارجت ) اى على كل مكتب تحقيق دخل معين شهريا او سنويا لكى يحصل موظفيه على نسبه حوافز او عموله أى كان اسمها .. ربما يكون هذا المبدا معمول به فى اماكن اخرى او شركات طيران تانيه لكن المشكله نفسها تكمن فى طريقه تطبيقها .. مصر للطيران بمجرد دخولك المكتب يبقى هتدفع يعنى هتدفع ...و السؤال هنا لو الداخل ده قريب او صديق هذا الموظف هل سيدفع .. الاجابه لا و بالتالى العمليه ماشيه بالبركه و محاوله الحصول على اى نقود دون النظر لطريقه المعامله
نفس الطريقه تجدها فى معامله موظف الكاونتر فى المطار كما لو كنت انت اللى بتشتغل عنده مش العكس و انت وحظك لو شكلك عجبه او كنت ظريف معاه او واحده حلوه ممكن يعديها بوزن زايد او لو عندك معرفه او واسطه غير كده ممكن يرجعك او تدفع فلوس
مرة اخرى وكان حجزى على مصر للطيران بتذكره حكوميه تابعه لعملى الى فيينا , بعد اصدارها بساعات ذهبت لتغيير ميعاد السفر مستعدا لدفع رسوم لاصدار التذكرة البديله وقتها نظر لى الموظف و سأل بفضول عن جهه عملى و عندما افصحت له بها سالته عن السبب قال بالحرف الواحد ( ابدا اصل التذكره دى بسعر غالى و تقدر تعمل فيها اللى انت عايزه وتغيرها 100 مرة زى ما تحب ) المهم غيرتها للسفر و عند العودة دخلت فى وصله مشادات و مفاوضات مع مكتب مصر للطيران فى فيينا ... طالبين ادفع 300 يورو عشان ارجع فيينا-القاهره مباشره بدلا من الرجوع فيينا-امستردام ترانزيت 6 ساعات - القاهرة و بعد شد و جذب تانى مع مدير المكتب هناك وافق على شرط انه ياخد كوبون السفر فيينا-امستردام اللى كان على الطيران النمساوى ... هو طلب كده عشان مسترجعش اى مبالغ فرق و قالها صراحه بعد طوال جدال و تصميم منى المهم وافقت و يشاء الله ان الطياره تتعطل اثناء الاقلاع و ننتظر يومها فى داخل الطيارة اكتر من 3 ساعات و فى المطار 3 ساعات اخرى و لا احد يعرف اى حل اذا كنا سنبيت ليلتنا فى فيينا او نطير للقاهره و اختفى كل مسئولى مصر للطيران من امامنا ...المهم رجعنا المطار و اخدنا الشنط و على الاوتيل بس طبعا على عينهم لانها خساره مبيت و عشا و كده .. فى الفجر جاءت طيارة اخرى لتقلنا و كانت طياره صغيره بالكاد تكفى العدد و بها كراسى مكسورة الظهر و الوجبات غير معده بشكل جيد .... عند العوده سألت عن موقف تذكرتى و تبين لى حقى فى الحصول على فرق السعر ولكن لم اهتم و تناسيت الموضوع.
حجزت شقيقتى و اطفالها عى مصر للطيران من الامارت و كانت تذاكر محدده المقاعد على رحلتى الذهاب و العودة ...طبعا الحجز لا يضمن توافر هذه المقاعد بنسبه 100 % , فى رحله العوده قام الموظف (الغبى ) اقل ما يوصف به باعطائها البوردينج باربعه اماكن مختلفه لاختى و الاطفال اعمارهم 7-6-4 سنوات للاسف لم تلحظ هذا حتى وصلت الطائره ظنا منها ان المقاعد محدده من قبل او على الاقل باعتبارهم اطفال و فى الطيارة لم يهتم بها احد من المضيفين و اقلعت الطيارة و هم لم يجلسوا بعد و ظلوا واقفين فى ممر الطيارة حتى تطوع بعض الركاب لترك اماكنهم لهم بجوار بعضهم البعض.
مؤخرا فى مطار الشارقه ذهب والدى و معه وزن زائد .. من حق الموظف ان يرفض الوزن او ان يطالبه بدفع رسوم زياده للوزن ده شىء مقبول ...المهم اضطر الوالد و هو رجل كبير فى السبعين ان يعيد بعض الاشياء مفيش مشكله لكن المشكله فى قله ادب موظف مصر للطيران عندما قال له لسه كمان كيلو زياده رجعه.. و عندما رد عليه الوالد كيلو ايه ده كان رد الموظف المحترم طيب هترجع 3 كيلو مش كيلو واحد.... الوالد رد عليه بما يكفيه ... بس بصراحه كنت اتمنى اكون موجود فى هذا الموقف لان الرد لم يرضينى .
حجزت والدتى تذكرة عن طريق النقاط فى برنامج المسافر الدائم ... التذكره ب30 الف نقطه و تمنها فى العادى 2400 جنيه مصرى تقريبا ... دفعت ما يقرب من 1200 نيه مصرى ضرايب و رسوم يعنى التذكرة مش مجانيه تماما و اذا ارادت ان تغيير ميعاد عودتها هتدفع مبلغ 300 دولار على حسب كلام موظف مكتب مصر للطيران اى ما يعادل تمن التذكرة كاملا
طبعا والله كل ده باختصار و مش كل حاجه بس نيجى بقى للحجز الاليكترونى عن طريق النت عشان تفهموا كويس اللى ممكن يحصلكوا
حجزت زوجتى تذكرة من فيينا للقاهره عن طريق الانترنت و قبل العوده اردنا تغيير الميعاد ...المفترض بما انك حجزت عن طريق الانترنت ان تكون كل الاجراءات بنفس الوسيلة .. ارسلنا ايميل لمكتب مصر للطيران فى فيينا عاوزين نغير التذكرة و كان الرد تعالوا مكتب مصر للطيران فى فيينا ( والله الايميل موجود بهذا الرد ) و بالرد عليهم ردا قاسيا اجابوا اذهبوا الى اقرب فرع لمصر للطيران ( طيب ما كان من الاول )
ذهبنا الى اقرب فرع... التذكرة مش مكتوب عليها اى شروط ... المفروض ان الشروط على الموقع و الصفحه الخاصه بالشروط مش بتفتح ....المهم فى المكتب نفس الاسلوب تانى عايزين فلوس للتغيير ... و مع الموافقه على الدفع كانت مشكله تانيه ... هاتوا كرت الفيزا اللى دفعتوا بيه .... ليه يا جماعه ... عشان نتأكد من الرقم ... كل شويه يقولوا لا مش هو ده الكرت الى تم بيه الدفع.. و لازم يبعتوا لمصر للطيران فى فيينا و ننتظر الرد .. و اكتر من مره نفس الكلام لا مش هوده الكرت ...المهم بعد 3 ساعات تقريبا هيغيروا التذكرة بس لازم الدفع بالكرت ... و كان السوال هنا طيب لو الكرت مفيهوش رصيد دلوقت ايه الحل
.. و الاجابه انه لازم الدفع بالكرت طيب يا جماعه الفلوس فى جيبى هدفع كاش بالمصرى ...لا لازم بالكرت و باليورو .. طبعا ده كان بعد مشادات مرهقه مع المكتب و وقتها قلت للمدير و انا ايه اللى عليا بكده لما كل معامله فى مصر للطيران بتكون بالشكل ده ومع التهديد بارسال شكوى لتحالف ستار اللى هم فرحانين بيه اوى ... بدأ يعتذر و يتأسف و عشان خاطرى لا و حصلنا وقتها على تخفيض فى دفع الرسوم لتغيير التذكرة
اخر موقف و اللى بجد قررت بعده عدم الطيران على هذه الشركه مرة اخرى قبل الثورة و فى يناير قررت حجز تذكرة لفيينا و حاولت احجزها من خلال نظام النقط ( ده قبل ما اعرف حقيقه نظام النقاط ) قالوا لا رصيدك غير كافى اتصلت بخدمه العملاء و سالت هحجز التذكرة عادى بفلوس و ارفع الدرجه من حجز عادى للبزنس و بكده اخد وزن زياده لان معايا وزن كتير للسفر ... قالوا ممكن سالت تانى ينفع احجز من النت و ارفع الدرجه من المكتب قالو ينفع بس افضل تحجزها من المكتب قلت ماشى و رحت المكتب قلت للموظف عايز تذكرة يوم كذا و الرجوع كذا و هدفع فلوس و الكرت المسافر الدائم اهو و بعد الحجز هرفع الدرجه عشان الوزن قالى هحجزلك و رفع الدرجه من عند لاستاذ فلان ( جنبه فى المكتب ) على بعد اقل من 3 متر والله المهم حجزت و اخر تمام و لفيت للمكتب التانى عايز ارفع الدرجه ... قعد يبص شويه على الجهاز و قالى لا مينفعش لان دى على الدرجه ( سى ) و عشان ترفعها هتدفع فلوس تانى حوالى 600 جنيه .. طبعا انت كعميل لا تعرف الفرق بين c ,k , l ,m , n
دى درجات عندهم و اصلا ممكن يكون اتنين على طيارة واحده و فى كرسيين جنب بعض و سعرين مختلفين تماما ... طبعا حصل شد و جذب لانهم غير واضحين ازاى انا اتصلت بخدمه العملاء و كلامى من البدايه واضح على الاقل لو مش هينفع قولو لى من البدايه الموضوع بوضوح ... خرجت من المكتب بجد متنرفز و قررت اكلم خدمه العملاء تانى و شرحتلهم الموقف ... للاسف الموظفه اللى ردت عليا سالت على رقم الكرت و بعد ما ظهرت قدامها البيانات بتاعتى كان ردها بكل صفاقه و برود انت ازاى الكارت بتاعك صادر فى 2009 السنه اللى فاتت و جاى تتكلم و تطلب و تعترض .... طبعا طحت فيها انا كمان ( طبعا لو واخدين بالكو ان الكرت اللى صدر 2009 كان غلطتهم اصلا و تسبب فى ضياع تذاكر كتير علينا ) المهم كان ردها انه مينفعش كلام التليفون و لو انا عايز ابعتلهم ايميل بالشكوى و وقتها يبقوا يردوا عليا ..
بصراحه مكونتش عارف هعمل ايه هبعت شكوى لحد من المديرين الكبار فى الشركه ولا لتحالف ستار ولا هروح بنفسى للمكتب اشوف اللى كلمتنى بالشكل ده عشان اعرف ارد عليها كويس.... الكلام ده كان تقريبا يوم 18 يناير و السفر 5 فبراير ...و قامت الثورة و اتقطع الانترنت فى مصر و بالتالى مفيش او وسيله لاى شىء حتى السفر نفسه محدش عارف هيسافر امتى بسبب حظر التجول و شلل تام للبلد ... ده ظرف عام على الجميع و للاسف لما فكروا يعملوا رقم خاص للاتصال عشان مواعيد السفر رقم منهم كان للموبيل بسعر دقيقه غالى ووقتها اصلا مفيش حد كان لاقى كروت لشحن الموبيلات و الرقم التانى يبدأ برقم 0900 و هى خدمه اتصال من التليفون الثابت غير متاحه فى كل التليفونات و ايضا مرتفعه السعر عن المكلمات العادية ( انا لاغيها فى التليفون الارضى من زمان لعدم الحاجه ليها و بياخدوا عليها رسوم بدون داعى ).... حتى مع الاتصال يقولولك لسه منعرفش حاجه
فى نفس يوم رجوع الانترنت ذهبت لمكتب و كان شغال و قمت بتغيير ميعاد التذكرة من يوم 5 فبراير ليوم 20 فبراير و طبعا كانوا بيتكلموا فى موضوع فلوس للتغيير و ان لسه مفيش تعليمات من الاداره للتغيير بدون رسوم و هم كرم من عندهم هيعملوها بدون رسوم ..ز قلت له لا ده مش كرم ده واجب عليكو و شغلكوا لانه ظرف طارىء على الجميع ... قال بس لو غيرت تانى هتدفع فلوس قلتله لو حصل و مسافرتش بسبب مليش ذنب فيه مش هدفع ولا مليم و خلاص قررت السفر يوم 20 فبراير
قبل السفر ب 5 ايام فوجئت بتليفون من المكتب واحد بيقولى انت مسافر يوم الجمعه 20 على فيينا ردت ايوه قالى طيب الرحله اتاجلت ليوم السبت 21 ... مفهوم طبعا ان فى ظروف طارئه خارجه عن الاارده و لكن كمان فى حاجه اسمها ذوق و حسن معامله
انا تذكرتى كان سموح بوزن 20 كجم مع هاند باج 7 كجم و كرت المسافر الدائم 5كجم يعنى مجموع 32 كجم... المهم قلتله انا جاى المكتب اشوف الحكايه لانى كنت حجزت بناء على ميعاد وصلى لفيينا تذكرة اتوبيس للسفر من فيينا الى مكان تانى و مرتبط بمواعيد
فى المكتب كانت المعامله كالاتى ... الميعاد المتاح يوم السبت على مصر للطيران فى اليوم التالى لسفرى الاصلى .. قلت الميعاد لا يناسبنى عايز اسافر فى نفس اليوم قالى هسفرك على الطيران النمساوى بس الطياره بتطلع العصر و بتوصل باليل ... طبعا بعد ميعاد الاتوبيس بتاعى .. سالتوه طيب و مين مسئول عن تعويضى عن الاتوبيس اللى هيفوتنى قالى معرفش مش شغلى قلتله ماشى هل هسافر بنفس الوزن 32 كيلو قالى لا الكرت بتاع مصر للطيران مش شغال عندهم يعنى 20 + 7 كجم بس قلتلو طيب و مين المسئول عن دى كمان قالى هم طيرانهم كده قلت بس انا حجزت تذكرتى و دفعت على الشروط دى و مش ذنبى و قابلت المدير و قالها بصراحه ان حاليا عدد المسافرين على الرحلات قليل فيحصل تجميع للمسافرين عل طياره واحده توفيرا للنفقات ..ز رديت يعنى انتو توفروا و انا اخسر وزن و اخسر تذكره اتوبيس و اوصل متاخر ولا انتو مش مهم عندكو الناس ومصالحهم ,
طبعا مكنش عارف يرد و عمال يلف و يدور فى الكلام و طالبته بصراحه ا موافق اخسر تذكرة الاتوبيس و اسافر تانى يوم على مصر للطيران على شرط ادينى وزن زياده و دى حاجه مش هتخسر الشركه حاجه ان اخد 10 كيلو زياده و انتو هتكسبوا ... رفض بصراحه العناد معاه خلانى اقوله انا اسف لو مفيش حل انا مش موافق على تغيير التذكره و شوفلى حل من هنا لبكرة... تانى يوم المدير مش موجود و الموظف معندوش حل غير مصر للطيران تانى يوم او طيران النمسا مساء و بوزن اقل و ده اللى عندنا و رفض اعطائى اى ورقه بعدم وجود بديل مناسب و رفضى للحل المعروض
طبعا باقى على السفر يويمن و انا معرفش هسافر ولا و عدم اهتام و لامبالاة من المكتب .... دخلت على موقع مصر للطيران و قرات شروط الغاء الحجز جيدا و تغيير الرحلات و شروطها و رجعت المكتب تانى للمدير و بدات اتكلم معاه طبقا للبنود الخاصه بمصر للطيران طبعا للاسف مكنش فاهم اى حاجه ولا عارف انه من حق المسافر فى حالات الغاء الرحلات انه يوفر البديل المناسب بنفس الشروط و اللى يقبلها العميل او انه مصر للطيران بتتحمل تعويضك طبقا للشروط.. كل همه انه يوفر للشركه و خلاص و مش مهم العميل ولا حتى طريقه المعاملة... طلبت الغاء التذكرة و استرجاع الفلوس بزهق مع وعد منى بشكوى لتحالف ستار و مصر للطيران كمان ... كنت دافع بفيزا وقت استرجاع المبلغ المحاسب المسئول بصراحه كان شاب لذيذ و حسن المعاملة و طلب يعرف الحكايه تانى و فى الاخر قالى بس ماشى بس الفلوس هترجع لحسابك فى البنك مش كاش و هيكون فى خصم مبلغ 36 جنيه نسبه العموله بتاعت الفيزا .. كان ردى حاسم قاطع ان ولا حتى جنيه واحد هيتم خصمه و مش مشكلتى ومع تصميمى اضطر ياخد موافقه من المدير بارجعاء كامل المبلغ و مع طلبى بخطاب رسمى من المكتب ان الاسترجاع حصل لعدم وجود البديل المناسب للعميل و رفضى للحل المطروح كان الرد مفيش حاجه زى كده و مع زياده تصميمى كان رد المدير انه ممكن اخد صورة من ورقه التذكره اللى هترجع و اللى موقع عليها بالاسترجاع بدون خصم لعدم وجود البديل المناسب...
عايز اقول ان الموظفيين فى المكتب بجد جهلة لا يعرفوا اى شىء غير انهم ياخدوا فلوس و خلاص لان بالبحث على الطيران النمساوى كان السعر ارخص و الوزن 30 كجم + 8 هاند باج يعنى 38 كجم اجمالى يعنى اكتر من مصر للطيران بالكارت و سعر ارخص وكمان بيتم تسجيل اميال الكارت عندهم واحيانا يمكن الحصول على وزن اضافى للكرت باعتبارهم فى تحالف واحد .. لو كان الموظف بيفهم كان عرف ده ووفر على نفسه و على شركته خسارة عميل
على موقع طيران النمسا سعر التذكرة واضح و الوزن المتاح للمسافر و ايضا و بشكل واضح جدا فى نفس الصفحه المبلغ اللى هتدفعه فى حاله تغيير تذكرتك 75 يورو بوضوح .
للاسف مصر للطيران سعرها غالى و بالاخص وقت الازمه اللى فاتت فى مصر ومع عدم وجود مسافرين كان المفروض السعر يقل و لكن للاسف السعر بيعلى مع خدمه سيئه فى الاكل و الخدمه ... مثلا مش دايما تلاقى بطانيه لكل مقعد و ساعات الطيارة تكون بارده جدا من المكيف و ردهم والله للاسف البطانيات خلصت او المخدة
السعر على الانترنت مختلف عن سعر المكتب لما تروح تسال يقولك لا اصل النت عشان نوفر الضغط على المكتب .. طيب ما التوفير ده يستلزم كمان لو هتغيير تذكرة يبقى من النت و فى المكتب يقولك لا اصل ممكن يكون واحد شارى تذكرة قبل كده بسعر رخيص و بعدين رجعها و انت لقيت السعر ده
مينفعش تحجز تذكرة من الانترنت بفيزا خاصه بك لمسافر تانى زى زوجتك مثلا او ابنك الا لو كنت هتسافرمعاه او تعطيه صورة من الفيزا الخاصه بيك موقعه منك معاه فى المطار ... فى شركات صحيح اخرى بتعمل كده بس كمان بيكون الكلام ده واضح وقت الحجز او انه بيطلب منك وسيله تاكيد هتكون مع المسافر اللى انت حجزت له ... لكن مصر للطيران مفيش حاجه زى كده واضحه و المفروض ان لو هتغيير تذكره فى الرجوع بتدفع المبلغ بقيمه من عمله بلد السفر يعنى حجزت من مصر و سافرت الامارات و هتغيير ميعاد العوده يبقى هتدفع مبلع ما يعادل 70 جنيه مثلا و المفروض بتكون عارف المبلغ ده قبل السفر ... تروح مكتب مصر للطيران فى الامارات يقولك 70 درهم او 100 درهم.تقوله ازاى المفروض 70جنيه او ما يعادلهم بالدرهم لان الفلوس دى فى حساب المكتب الاصلى يقولك لا دى عملة البلد هنا الدرهم... و هنا فى مصر لما تغيير تذكرة محجوزة من بره يقولك لا باليورو او ما يعادلها بالمصرى طيب ازاى
عموما اكثر ما يزعج فى مصر للطيران احساس الموظف ان انت الى بتشتغل عنده و هو صاحب الحق و ان ممكن يكون مسافر بجوارك بسعر مختلف تماما عنك و كمان لو ليك واسطه هتعدى بأى وزن انت عايزه او حسب هوى الموظف
اتمنى ان يحصل تغيير فى نظامهم قريبا و خصوصا طريقه حصول الموظفيين على نسبه ارباح او عموله تحقيق التارجت المطلوب او يعلموهم انه مش عيب يحقق التارجت ده بس بادب و احترام مع العميل لان الفلوس مش كل حاجه و يعرفوا ازاى يتعاملوا كويس مع العملاء و لغايه ما ده يحصل بصراحه قررت مسافرش عليها تانى و كمان قررت اكتب الموضوع هنا عشان اللى يحب يسافر على مصر للطيران يبقى فاهم حقه كويس و ميغلطش و يحجز تذكرة على الانترنت لو كان عنده شك فى احتمال تغييرها لو هو فى مكان بعيد عن مكتب مصر للطيران
شىء أخير و للأمانه من افضل طيارى العالم هم طياريين مصر للطيران خصوصا فى الاقلاع و الهبوط يتم بسلاسه و ثقه ماشاء الله
مواضيع عشوائيه ممكن تكون تعجبك اخترناها لك:
رد مع اقتباس
المشاركة الأصلية كتبت بواسطة عسل2020
المفضلات