الموضوع: أنا رايح للكويت وأتمنى أجد إجابة للأسئلة

السلام عليكم ورحمة الله وبركاته

أيها الأحبة من أهل الكويت أو من أهل السعوية أو كل من لديه خبرة بالكويت

أتمنى أن أجد إجابة لكل سؤال وأبتعبكم معاي لكن تحملونا ويعطبكم العافية

أنا إن شاء الله رايح للكويت أنا و3 من الزملاء الأسبوع القادم :

1- أريد توصيف الطريق الذي يبدى من الرياض ثم رماح والرمحيه إلخ وهل الطريق مناسب علما أننا كلنا شباب وراح نمشي معه بالنهار إن شاء الله وهل تتوفر فيه المحطات ..؟؟

2 - عندما بحثت عن الشقق والفنادق حصلت أن سعرها غالي جداً يعني من 25 دينار وفوق تقريبا عندنا يساوي 330 ريال والذي أريده هو سكن لا يتجاوز 25 دينار لأن أغلب الوقت خارج السكن وأن تقع أفضل الشقق بالكويت ..؟؟

3 - أتمنى وضع وصف لجميع الأسواق الشعبية اللي بالكويت لأن أساس زيارتنا للكويت هي الأطلاع على الأسواق الشعبية ولسنا من هواة المجمعات التجارية الكبيرة ..؟؟

4 - ماهي المناطق المجاورة لسالمية التي تستحق الزيارة حتى ولو لشيء واحد ..؟؟

5 - كيف الجو هالوقت هل هو برد وأمطار ولا حر ..؟؟

6 - أريد كورنيش يمكنك أخذ راحتك فيه يعني تقدر تشب الضو وتشوي وتاخذ راحتك فيه مو زي الكورنيش اللي عند الأبراج ماتقدر تاخذ راحتك فيه ..؟؟

7 - ماهي الأماكن التي تنصحون الشباب بزيارتها مثلا متحف أو أماكن علمية أو غيرها ..؟؟

كم يساوي الدينار بالريال الأن بالضبط ؟؟

هذا كل ما أجهله عن الكويت فأتمنى من أي عضو يتوفر عنده أجابة لأي سؤال أو حتى أي معلومة ممكن تفيدني ولكم جزيل الشكر والأمتنان ..

مواضيع عشوائيه ممكن تكون تعجبك اخترناها لك:

• الفنادق المجرّبة في الكويت
• بوتيك ايف سان لوران ب
• جولـــــــــــــــــــــة فى ربوع الكويت
• اررررررررررررررررررجوكم؟؟
• وش رايكم بفندق ايباس السالميه او ميراج سويت
• ‏ تجربتي معـ
• سؤال عن صالة مشرف للمعارض
• بخصوص هلا فبراير
• سي شيل وبعض الشاليهات مطلوب المساعده
• فندق لزوجيين
• سؤال عن سكن العزاب ؟
• هلا با هلي وعزوتي أهل الكويت الحبيبه
• بغيت فندق بسعر 30 دينار بحريني وياريت يكون مع الفطور لثالث ايام العيد
• اعلان رائع لـــ
• أين تخرج مع عائلتك؟ موضوع للنقاش
• انا عضوة جديدة من محبي الكويت
• استفسار صيدلية الغانم
• استفسار قبل زيارتي الي الكويت
• استفسار مهم
• مقيم بالسعوديه، جنسيتي وجوازي يمني

روح سوق المباركية ، ولا تنس تتعشى في مطعم دلق سهيل ، راح تدعيلي ، جماله وحلاوته في بساطته ، وبالليل يمكن تلقى فيه بعض الشخصيات الكويتية المرمقة ، ومر عل القهاوي القديمة مثل قهوة الدلالين ، جرب عندهم الشاي بالطريقة الكويتية - على الفحم - .
نصيحتي لا تروح السالمية إلا الصبح ، أما بالليل فما تصلح ، وهي ما تمثل حقيقة المجتمع الكويتي ، تراها حوسة وأغلبها مو كويتيين .
بالنسبة للجو ، كل يوم شيء ، بس الغالب برد .
لا يفوتك المركز العلمي ، عند راس السالمية ، يعتبر واجهة حضارية للبلد .
مر عى بعض المطاعم الجيدة مثل الطربوش في الشيراتون والنوخذة في كراون بلازا ، وكباب الحجة في بنيد القار .

سعر الصرف 13.69هذا الخميس الماضي

السلام عليكم

طبعا الاخ محمد عود ماقصر بس احب اضيف بالنسبه للاسواق الشعبيه عندك سوق رامز بالشويخ اسعاره رخيصه وكل شي فيه بمنطقة الشويخ الصناعيه وسوق المعلم والمحاميد بحولي كلها اسواق شعبيه وسيتي سنتر بالسالميه وسوق المباركيه وبعد مدام انت من محبي الاسواق الشعبيه لاتنسى تمر سوق الجمعه

بالنسبه للسالميه اسواقها وايد وكلها مجمعات تجاريه ومولات كبيره وعلى امتداد الشارع المحلات بس السالميه القديمه مافيها شي يسوى وكلها وافدين في اماكن احلى منهاوايد

المطاعم في مستويات اذا تحب اكلات شعبيه واجواء حلوه بسيطه دلق سهيل فريج صويلح كباب الحجه

مطاعم اسعارها متوسطه وزينه قيصر مطعم هندي بس لذيذ ميس الغانم لبناني برج الحمام لبناني مغل محل هندي

اما اللي ذكرها الاخ محمد عود غاليه تعتبر فنادق

كورنيش المركز العلمي هادي جدا بس ممنوع الشوي بس ادخل شوف المتحف يستحق الزياره عن الاحياء البحريه والبريه

عندك شاطئ الشويخ ممكن تشوي وتقعد بس الحين برد محد يقعد هناك وزور يوم البحار الكويتي مقاهي شعبيه واكلات حلوه ورخيصه ادري اطلت عليك وسامحنا وبالنسبه لسعر صرف الريال نازل عندنا الريال مقابل الدينار

واذا تبي اسواق شعبيه بعد عندك الاسواق القريبه من المباركيه مثل سوق الحريم وسوق السلاح
وبعد عندك سوق السالميه ( سيتي سنتر ) القريب من دوار الجوازات
واذا تبي مقاهي شعبيه عندك القهوه الشعبيه بجانب سوق شرق او عندك القهوه الشعبيه اللي في السالميه
هناك تلقى الاكل الشعبي مثل النخي والباجيلا والكبده المشويه
واذا كنت تبي تشوي على البحر عندك اي واجهه بحريه بس انزل على الرمل وحط دوتك واشوي لان وايد اشوف ناس وقت الويكند يشوون على البحر
اما عن الجو هالايام الصبح حر والعصر دفى والليل برد
اما الاماكن اللي تستحق الزياره عندك المركز العلمي ..... متحف الكويت الوطني....ابراج الكويت.... المدينه الترفيهيه....
واجازه سعيده

أعتقد هالطريق يناسب..:\
طريق الرياض - القصيم 128كلم مخرج المجمعه ثم الى حفر الباطن منفذ الرقعي

و أضيف بعض المطاعم اللي على الطراز القديم من ديكور وملابس العاملين والطبخات والحلو والقهوة مثل :

مطعم فريج صويلح ..... بالسالمية بالقرب من مارينا


مطعم شاطىء الوطية عالبحر خلف الشيراتون بالقرب من يوم البحار وفرصة تمر على يوم البحار وتشوفونه


وإذا أنتم من هواة المكشات ( على حد علمي غالبية القصمان يحبون المكاشيت ) ترى السنيدي فتح له فرع بالكويت طبعا المعرض الكبير الرئيسي عندكم.


ويوجد اسواق شعبية في أنحاء كثيرة من محافظات الكويت واسعار مهاودة


نتمنى لكم إقامة سعيدة في بلدكم.

1- أريد توصيف الطريق الذي يبدى من الرياض ثم رماح والرمحيه إلخ وهل الطريق مناسب علما أننا كلنا شباب وراح نمشي معه بالنهار إن شاء الله وهل تتوفر فيه المحطات ..؟؟

ما أنصحك بهالطريق .. صحيح هو مختصر لكن اغلبه مقطوع وموحش وكله نياق .. وما تحصل استراحات بسهولة
أنصحك بطريق الرياض المجمعة حتى الوصول لحفر الباطن ومن ثم تتجهون لمنفذ الرقعي دخولا للكويت ..

2 - عندما بحثت عن الشقق والفنادق حصلت أن سعرها غالي جداً يعني من 25 دينار وفوق تقريبا عندنا يساوي 330 ريال والذي أريده هو سكن لا يتجاوز 25 دينار لأن أغلب الوقت خارج السكن وأن تقع أفضل الشقق بالكويت ..؟؟
كراون سويتس .. بمنطقة السالمية وسعر الشقة غرفة وصالة ومطبخ وحمام حوالي 30 وممكن يعملون لكم خصم لغاية 25 ..
رقم التلفون : 9655730400+

3 - أتمنى وضع وصف لجميع الأسواق الشعبية اللي بالكويت لأن أساس زيارتنا للكويت هي الأطلاع على الأسواق الشعبية ولسنا من هواة المجمعات التجارية الكبيرة ..؟؟

اسواق بالديرة ( مدينة الكويت) :
سوق الغربللي للجملة وغير الجملة
سوق الدعيج
سوق المباركية
سوق الوطية
سوق الوطينة سوق الحريم
السوق الكبير
سوق الاقمشة ( لبلوكات )

اسواق بالسالمية :
سوق السالمية القديم
سوق السالمية ( سيتي سنتر)
قيصريات سوق السالمية القديم

اسواق الفروانية :
مجمع العربيد
ممع الدبوس
المناور (قرب فندق كراون بلازا بالفروانية - طريق المطار )

اسواق في خيطان :
اسواق الرجعان
*يوجد اسواق اخرى ولكن لا تحضرني اسمائهم

اسواق حولي:
شارع بن خلدون فيه اسواق شعبية
مجمع النقرة الشمالي والجنوبي ( بالنقرة )

اسواق فحيحيل :
شارع مكة فيه الاسواق الشعبية

4 - ماهي المناطق المجاورة لسالمية التي تستحق الزيارة حتى ولو لشيء واحد ..؟؟

منطقة حولي والنقرة ( فيها اسواق متفرقة ) وفيها ملاهي اسمها ( حولي بارك )
منطقة الجابرية فيها محل اسمه ( هيل وزعفران ) يبيع الحلويات الكويتية الشعبية ( سعره متوسط )
رقم تلفون هيل وزعفران : 5329232
منطقة الشعب حديقة الشعب الترفيهية

5 - كيف الجو هالوقت هل هو برد وأمطار ولا حر ..؟؟

دافئ بالنهار .. وبارد بالليل .. توصل درجة الحرارة بالليل 10 والايام القادمة ممكن توصل بين 8 الى 6 على حسب الأرصاد الجوية .. هناك فرصة لتساقط الأمطار

6 - أريد كورنيش يمكنك أخذ راحتك فيه يعني تقدر تشب الضو وتشوي وتاخذ راحتك فيه مو زي الكورنيش اللي عند الأبراج ماتقدر تاخذ راحتك فيه ..؟؟

شاطئ انجفة بشارع التعاون ..
شاطئ الشويخ ..
وعموما شارع الخليج كله شواطئ تسمح بالشواء ..

7 - ماهي الأماكن التي تنصحون الشباب بزيارتها مثلا متحف أو أماكن علمية أو غيرها ..؟؟

المركز العلمي جميل .. وانصح فيه ..

يوم البحار .. راح يعجبكم اذا تحبون الاشياء الشعبية والتراثية ..

في منطقة الديرة بنهاية شارع الغربللي في مجموعة مطاعم واشهرها دلق سهيل تجدون المأكولات الشعبية ..

فريج صويلح يتميز بالطابع الكويتي من حيث الأكل ..

القهوه الشعبية قريبة من مارينا مول على البحر ..

كما ذكرت بالسابق .. حديقة الشعب ( ملاهي ) ..

المدينة الترفيهية ( ملاهي ) بعيدة عن السالمية ..

مرح لاند ( ملاهي في منطقة الصباحية ) بعيدة عن السالمية ..

المتحف العلمي ..

مع تمنياتنا لكم بقضاء اوقات طيبة .. وحياكم الله ..

المشاركة الأصلية كتبت بواسطة المنسي830
http://www.arabtravelersforum.com/tr...5/#post1723765

3 - أتمنى وضع وصف لجميع الأسواق الشعبية اللي بالكويت لأن أساس زيارتنا للكويت هي الأطلاع على الأسواق الشعبية ولسنا من هواة المجمعات التجارية الكبيرة ..؟؟

4 - ماهي المناطق المجاورة لسالمية التي تستحق الزيارة حتى ولو لشيء واحد ..؟؟

5 - كيف الجو هالوقت هل هو برد وأمطار ولا حر ..؟؟

6 - أريد كورنيش يمكنك أخذ راحتك فيه يعني تقدر تشب الضو وتشوي وتاخذ راحتك فيه مو زي الكورنيش اللي عند الأبراج ماتقدر تاخذ راحتك فيه ..؟؟

7 - ماهي الأماكن التي تنصحون الشباب بزيارتها مثلا متحف أو أماكن علمية أو غيرها ..؟؟

كم يساوي الدينار بالريال الأن بالضبط ؟؟

هذا كل ما أجهله عن الكويت فأتمنى من أي عضو يتوفر عنده أجابة لأي سؤال أو حتى أي معلومة ممكن تفيدني ولكم جزيل الشكر والأمتنان ..

و عليكم السلام

اول سؤالين ماقدر افيدك للاسف

ال 3 : عندك 1- المباركيه (يشمل على سوق اللحم و السمج و الخضره + سوق الحريم + سوق السلاح + السوق الداخلي + سوق الزل + سوق البشوت + سوق الغربللي )
و في عدة مقاهي و مطاعم شعبيه فيه :
اشهرها "دلق سهيل"
و اذا بغيتوا حلو كويتي قديم "عندكم محل الوطن (الحلواجي) "
خوش رهش ودرابيل و بقصم عنده :24:

2- يوم البحار
على البحر مقابل مجلس الامه
(فيه مجموعه من المحلات الصغيره و العاب شعبيه للاطفال)
و قهوة شعبيه

3- الاسواق الرخيصه
في حولي (المعلم + المحاميد + طيور الجنه)


و مايمنع تزورون "الافينيوز" + "مارينا" :24:


---------------------------------------------------------

الجو بارد
يعني لبسوا دشاديش شتويه :109:

_________________________________

كورنيش للشوي
اللي اعرفه ممنوع الشوي عالشواطيء :114:
بس فيه شاطيء قبل مطعم كنتاكي و نينو
اسمه اظن
شاطئ 11 !! :106:

_________________________________

انصحك تزورن
المركز العلمي :24:
+
المدينه الترفيهيه
+
حديقة الشعب
+
السينمات (كل المجمعات فيهم سينما : المهلب , مارينا , افينيوز , شرق , الفنار , الكوت)

بامكانكم استئجار مخيم في البر
او
في احد المزارع اب منطقه الوفره (تروحون كشته لمزرعه كمال او ريحانه) :24:

محمد عود
ولد الديرة
شراع الهوى
الملك
Dhari
البدر

يعطيكم ألف ألف عافية على هالمعلومات الي صراحة أفادتني كثير وخلتني على بينه والصراحه أنكم قروم ماخاب ضني فيكم

sullmish

تشلم يمل السلم على هيك رد وعلى هيك فزعة يابعدي الصراحه ردك وافي وكافي وماقصرت والله يعطيك العافية

Hambka Q8

ألف ألف ألف شكر على ردك الكريم أخوي وماقصرت والله يعطيك العافية

صراحتن أنا قبل سنتين كنت بسافر لصلالة وقلت ليش ما أدخل وأسأل عنها وسألت وجتني المعلومات والأجابة مثل ماجتني الأن وأساتنست ودعيت للي ردو بالخير والله يكثر خيرهم على كثر ماساعدوني

وهالسنه بروح للكويت ونفس الكلام دخلت وسألت وماخاب ضني فيكم

شكلي لو أبطع عن الديرة 10 كيلو راح أسأل ولا وأكيد راح أحصل معلومه جديدة

على العموم أنا ماشي بكرى إنشالله لكن الطريق محتار هل أمشي مع الطريق اللي أنا مخطط له أول
الرياض رماح
أو مع الراض المجمعه الحفر الرقعي

وإنشاء الله أن الأمور متيسرة

حياك الله هذي الساعة المباركة


بشر عسى انبسطت وسفرتك متيسرة

المشاركة الأصلية كتبت بواسطة Dhari
http://www.arabtravelersforum.com/tr...4/#post1724654

أعتقد هالطريق يناسب..:
طريق الرياض - القصيم 128كلم مخرج المجمعه ثم الى حفر الباطن منفذ الرقعي



ماهو أفضل طريق للسفر بالسيارة من الرياض للكويت ؟....هل يكون عن طريق الرياض__ المجمعة
ام عن طريق الرياض _ الشرقيه ؟ علما بأنها المرة الاولى التي اسافر بها للكويت .. ارجو ذكر المسافه
لمن يعرف ذلك. مع جزيل شكري للجميع

اخوي تشرفنا بالديرة انصحك بسارة بلازا للشقق الفندقية في منطقة السالمية لتستفيد من عروض فبراير 55 دينار لليوم بالشقة الفاملي سويت ل6 افراد