23/7/2011
تم الوصول بحمد الله تعالى الى مطار اوكلاند قادمين من جولد كوست
في الطيارة وزعوا علينا فورم الدخول الى نيوزيلاند وكان من ضمن الاسئلة هل ذهبت الى غابة في استراليا
طبعا انا حطيت نعم
وشوفوا النعم شو سوت فينا
خذونا على جنب وسئلونا مرة ثانية رحتوا لغابة في استراليا
انا حسيت اننا ارتكبنا جريمة
قلت نعم
قالوا طيب وين( الله يكرمكم ) الجواتي او الجزم اللي كنتوا لابسينها في الغابة
ياهي مصيبة الحين افتح الشنط كلها ادور على الجواتي يا هي سالفة
قلت لهم نفس الجزم اللي لابسينها
قالوا طيب ارفعوا رجولكم عشان نشيك على نظافة الجزم
والحمد لله طلعت جزمنا نظيفة ميه ميه والا كنا خذنا مخالفة
وعدت السالفة على خير
بس شوفوا مدى الحرص عندهم وطبعا نيوزيلاند نفس استراليا ممنوع تدخل الاكل عندهم فاحرصوا على هذي النقطة
وبعد ما اخذنا الشنط وخلصنا من التفتيش توجهنا لمكتب ايفس لاستلام السيارة
ومثل ما خبرتكم كنت حاجزة سيارة راف 4 بس ابو الشباب غير السيارة في هذا اللحظة واخذ سيارة ثانية اوسع وتمشي على الديزل وطبعا جهاز القارمن لابد منه
طبعا السيارة لما تستلمها يكون الوقود فيها فل ولازم ترجعها فل انتبهوا لازم ترجعها فل لان صارت معانا سالفة راح تعرفونها بعدين
وهذي السيارة اللي اخذناها
ركبنا السيارة وشغلنا القارمن وعلى طول حطينا عنوان الفندق
توكلنا على الله
وصلنا عند الفندق مثل ما يقول جهاز القارمن لكن مب شايفين الفندق
تقريبا خذنا ساعة احنا نلف حوالين الفندق وما خلينا احد ما سألناه
واخيرا حصلنا الفندق وطلع في نفس المكان بس في عمارة كانت مغطية عليه
وهذي صورة الفندق
المشكلة الثانية انه مافي مكان توقف فيه عند الفندق فقال لي زوجي انزلي انت وسوي التشك ان وانا بقعد في السيارة
الصدمة الاولي في الفندق الريسبشن تحت مستوى الارض يعني لازم تنزل له بالدرج. اكثر من عشر درجات تحت الارض
سويت التشك ان وخبرتهم ان عندنا سيارة فعطوني كارت للسيارة عشان نقدر نحطيها في السرداب
وما في احد يشيل الشنط شيل شنطتك بنفسك
والمهم شلنا الشنط ودخلنا الشقة وكانت الصدمة
زوجي والاولاد انهدوا علي شوا هذا الفندق مستحيل نقعد فيه الحين نطلع ونغيره
وفعلا معاهم حق
الشقة ضيقة جدا جدا لدرجة انه لما نمشي نضرب في بعض
ما كان لي نفس اصور بس جبت لكم صور من النت
ريحنا شوي بعدها نزلنا الريسبشن وخبرناهم انه احتمال نغير الفندق والحمد لله تفهموا الوضع قالوا ما راح يخصمون غير لليلة وحده
طلعنا نتمشا بالسيارة وعلى شارع فكتوريا
رحنا لفندق كراون بلازا وسألناهم اذا في حجز
للاسف اعتذروا وقالوا بس من بكره الفندق راح يكون فاضي
قلنا نبات الليلة في فندقنا والصباح رباح
وبهذا انقضى اول يوم في نيوزيلاند وكان الانطباع غير جيد
بس بكره غيييييييييير
المفضلات