[align=center]بسم الله الرحمن الرحيم[/align]
بحمد الله تم وصولنا الى ارض الوطن انا والعضو عبادي سالمين غانمين واليكم تفاصيل الرحله الممتعه
الرحله كانت عائليه ( يوكون 2005 ) و ( مازدا 2006 ) بعد اخذ دفتر التربتك من جده بـ 520 ريال للسيارة الواحده من مؤسسة اتحاد السيارات السعودي من المكاتب المقابله لميناء جده توكلت على الله وغادرت جدة .
اولاً : سأبدأ بخط سيري لأني تقدمت في السفر على عبادي بـ7 ايام :
جدة – المدينه المنورة- تيماء- تبوك- (حالة عمار- المدوره ) – معان – عمان – ( الرمثا – درعا ) – دمشق , المسافه كلها = ( 1800 كم )
الأقامه في المدينه المنوره 4 ايام للزيارة بعد ذلك توجهنا الى خيبر ثم الى تيماء الخط من خيبر الى تيماء سيء جداً مكسر تقريباً 200 كم بعد تيماء الخط يبغاله انتباه فيه تصليحات كثيره لكن جيد الى تبوك الأقامه في تبوك 3 ايام , تم وصول العضو عبادي مع عائلته الكريمه وبدأ مشوار الشام لحالة عمار كان الخروج سهل وميسر من الحدود السعوديه والشباب في لمنفذ محترمين وخدومين , دخلنا الأردن من منفذ المدوره الشباب في الأردن مكشرين وغير متعاونين اخذنا 35 دقيقه للدخول بعد اخذ 53 ريال تامين على السياره وختم التربتك توجهنا الى معان الخط جيد الى معان ومافيه زحمه .
بعد معان توجهنا الى عمان الخط مزدوج و فيه مطبات غير واضحه اكلنا منها لما شبعنا ولوحاتهم تتوه يبغالك تسئل قبل ماتغادر المكان عشان ماتضيع وصلنا عمان وعكينا في الطريق شوي الى منفذ الرمثا الأردني كان الخروج زي الدخول شويت مرمطه ثم الى المنفذ السوري درعا هنا بدأت الأكراميات
( مافيه شي إلنا ) حطينا عشرين ريال في الجوازات ومشت الأموربعد ختم الجوازات والتربتك والكرت الأزرق ( احتفظ به لحين الرجعه ) أخذوا رسوم 150 ريال للسيارة الواحده ثم توجهنا الى دمشق في خط جيد ومزدوج ,
دمشق زحمه ماعجبتنا كلمنا قريب لعبادي في الزبداني حجز لنا شقه في مضايا ليوم واحد للراحه بـ1500 ليره , اليوم التالي لقينا شقتين في مضايا فوق بعض بـ 3000 ليره ذات اطلاله على السهل والوادي ممتازة , بعد مشاهدتي للمنطقه وجدنا ان السكن في مضايا افضل من الزبداني لأن الزبداني غاليه وزحمه ومافيه مواقف للسيارات وعموما مضايا وبلودان والزبداني كلها في سفح جبل واحد مافيه فرق المسافه بينهم 5 دقائق . جلسنا فيها مدة 4 ايام :
زرنا فيها منتزه عين بردي و بحيرة زرزر و واخذنا مزرعه لأم أنس مقابل مضايا بـ2500 ليره يوم واحد بمسبح وزرنا ملاهي الكرمه فيها سرك الطاوله بـ2500 ليره وما يسوى وزرنا المحطه في الزبداني وخذ من هذا الأستعراض الخليجي المخجل مقضين وقتهم على الخط رايحين جايين وزرنا مهرجان الزبداني في اسفل المحطه الي مايسوى ليرتين . ملاحظات على المنطقه : جميع المحلات والمطاعم على الشارع الرئيسي أسفل الجبل نصابين وغاليين الأسعار في اعلى الجبل رخيصه . الباعه المتجولين واصحاب الخيول والشحاذين والدجالين في كل مكان,العصريه عندهم طويله طلعنا ثاني يوم العصر الساعه 4 غربت الشمس الساعه 8 , الجوب شوب شوي في النهار وبارد نسبياً في الليل .
الخطوط مسفلته بس سواقتهم يالطيف بدك تنتبه ما يعترفوا بالفرامل مافيه الا مطامره على بعض , يوم الجمعه الجبل زحمه مره الزم البيت احسن اهل دمشق يطلعوا كلهم للجبل .
بعدذلك توجهنا الى حمص وصلنا الساعه 11 صباحاً لفينا في المدينه وصدعنا من الزحمه سئلنا عن بحيرة قطينا دلنا واحد الله يسامحه على طريق مكسر وطويل وصلنا البحيره عليها منتزه صغيرو مسور دخول السيارة بـ200 ليرة طلبنا غداء سمك من البحيرة يالله لك الحمد معفن تقول انك تاكل سمن مو لحم اخذنا لفه كعابي على البحيرة بعدذلك خرجنا على الأسترادا من طريق قصير وحلو ثم توجهنا على
طرطوس من طريق سريع ومزدوج وصلنا الساعه 4 العصر في الطريق شفت لوحات على مشتى الحلو والكفرون وصافيتا سئلنا عن الشاليهات سعرها غالي غرفه بمنافعها بـ2000 ليره ماعجبتنا لأن مافيها خصوصيه سكنا على شاطيء طرطوس في الفندق الكبير الغرفه بـ1700 ليرة الفندق حلو اعطيه نجمه واحده ليوم واحد تمشينا كعابي على الشاطي نسائهم متبرجات بالحيل ,على طول الشاطي والحرمه
تقولي ( بوص قدامك ) والظاهر ان اغلبهم مسيحين . نظام المدينه الساعه 9 المساء تقفل كل المحلات , جوها هادي مافيه ازعاج شاطيها حلو للسباحه , الناس كل واحد في حاله ,
اليوم التالي الساعه 8 صباحاً توجهنا على مرفأ جزيرة اروادا
اخذنا شختورة ( يخت ) خصوصي بـ700 ليرة رايح جاي ثلث ساعه واحنا في الجزيره , زرنا القلعه الدخول للشخص بـ75ليرة وماتسوى زرنا السوق الشعبي فيه شغلات حلوه من الصدف وتحف اخذنا ماتيسر منها , لفينا شوي في الجزيره ذبحنا الحر والرطوبه رجعنا على طرطوس .
ثم على اللاذقيه عكينا في الزحمه شوي ماعجبتنا اتفقنا انا وخويي على شاطيء ام الطيور 20كم شمال اللاذقيه , شاطيء جميل وهادي اغلبه من الخليجين دخلنا الشاطي من اعلى الجبال منظره رائع من الأعلى تتعانق فيه الجبال الخضراء مع البحر اخذنا شاليهين مرتبه بـ4000 ليره ليوم واحد جميع الخدمات موجوده على الشاطي وفيه قوارب سياحيه الساعه بـ1500 ليره تودي على راس البسيط .
اليوم التالي ذهبنا الى صلنفه شرق اللاذقيه الطريق مره ممتع وسط الأشجار والغابات طول الطريق فيه لوحات لفلل للإيجار
والسماسرة على الخطوط بالمئات يأشرون لنا بحثنا عن السكن لقيناه من 2500 وانت طالع مع ان الفلل اغلبها فاضيه لفينا
ولقينا في حي يسمى جب سليمان شقتين متجاوره بـ 3500 ليره لليوم الواحد سكنا يومين :
زرنا المحطه ( السوق ) في المنطقه وكالعاده اخواننا الخليجين استعراض طول الطريق . زرنا السرك الروسي بالقرب من السوق حلو دخول الشخص بـ200 ليره مدة العرض 3 ساعات ,
زرنا شلالات حزيرين تبعد عن صلنفه 10كم طريقها نزول شديد لقيناها ناشفه لكن عليها جلسات حلوه داخل مغارات دخول الشخص بـ100 ليره مع مشروب وفيها عين عذبه وبارده .
وفيها عين الكرز بس مازرناها وزرنا اعلى مكان في صلنفه رائع جداً قمة بارده تطل على وادي زراعي في القمه يتجمع اصحاب الأغنام لبيعها من 3500 الى 4300ليرة للراس , واخواننا الخليجين مافيه الا ذبح وسلخ في الشجر .
بعد ذلك زرنا اروع مكان في صلنفه ( قلعة صلاح الدين ) طريقها نزول شديد وخطير دخلنا القلعه بـ150ليرة للشخص
اخذنا لفه طويله في القلعه وشربنا من نبع اسفل القلعه بارد وحلو , من اعلى القلعه شاهدنا سد الثورة كبير جداً .
بعدذلك توجهنا الى حماة من طريق غابات الفرنلق على طريق كسب طريق سيء بالمره مكسر وحفر وطويل , قالوا لنا فيه طريق من بانياس يسمى طريق الغاب بس الي مايسمع الكلام يستاهل الطريق يمر بالمزارع الي شاهدناها من اعلى قمة صلنفه .
وصلنا حماة ( شوب بالمره ) في النهار والليل جلسنا في فندق الناعوره الغرفه بـ1350 ليره فندق حلو وقريب من نهرالعاصي والنواعير . تمشينا في المنتزه الي عليه النواعير وشدني الأولاد الي يتسلقوا الناعوره ويقفزوا في نصف متر مويه .
بعدذلك شدينا الرحال للعوده الى دمشق وجلسنا فيها يومين بعدلفه كبيره على الشقق المفروشه لقيناها غاليه من 3000 ليره الى 5000 ليره سكنا في البحصه على شارع الأتحاد فندق البتراء 3 نجوم ( خرطي ) نجمه كثيره عليه . بـ2000 ليره للغرفه
زرنا النصابين في سوق الحميديه الي مايسوى ليرتين والجامع الأموي وقصر العظم وباب توما وساحة المرجه اخذنا منها حلويات هدايا من محل صغير ( شهاب اخوان ) علبه زي شماغ البسام حلوه ومرتبه العلبه وزنها كيلو بـ250ليره الواحده .
بعدذلك مشينا على الأسترادا نبغى ملاهي الأرض التعيسه لقينا لوحه تشير على( المطار السيده زينب ) قلنا بس هذا طريقها طبينا في مدينة الصدر بالعراق باصات ايرانيه على مدى النظر شيعه يزوروا مسجد السيده زينب ماخرجنا الى بشق الأنفس وصلنا الملاهي لقيناها زحمه مره مادخلنا كملنا الطريق من المطاعم الشهيره ( بوابة دمشق – النبعه – الخ ) الى حي مسيحي يسمى جرمانا ومنه على جبل قاسيون المنظر من اعلى الجبل مره حلو دمشق كلها امامك.
بعد ذلك شدينا الرحال للعوده للديار :
دمشق – ( درعا – الرمثا ) – عمان – معان – (العقبه – حقل )– ضبا – الوجه – ينبع – جدة .
في مدخل العقبه واجهنا تفتيش من الجيش الأردني بسبب تفجرات شرم الشيخ بس الحمد لله عدينا بسلام قلبوا شوي في العفش وكم سؤال ودخلنا .
هذا وصل الله على نبينا محمد .
ملاحظه :
-كلفت الرحله للعائله الواحده تقريباً 5000 ريال سعودي .
-صرفنا مرتين من محطة الزبداني بـ 14.250 ليره للريال ومن دمشق المرجه بـ 14.300 ليره .
-سعر البنزين اللتر = 24 ليره تقريباً ريالين .مواضيع عشوائيه ممكن تكون تعجبك اخترناها لك:
- طريق جدة القريات سوريا
- جزر اخرى فى سوريا غير جزيرة ارواد
- برنامج سياحي في دمشق
- اين اجد مطعم العراد في سوريا
- معلومات عن بعض الفنادق الرخيصه في دمشق الحبيبه
- للأخ المشرف
- العلاقات السعودية والسورية الى اين؟؟؟؟تداعيات مؤتمر القمة العربية
- سوريا يوم نحتاج جدول ، وبغينا رد للإستفسارات ؟؟؟
- كيف استخدام الانترنت في الشقة في دمشق؟
- السفر الى سوري
- التنقل من الشام لحمص ؟
- التوقيت الصيفي
- ايهما اقرب لسوريا ؟ الجوف ام تبوك
- ممكن ترحبون فيني
- طلب عاجل من الخبراء في سوريا
- مسن سعودي يتعرض للسرقه في سوريا ويدخل السجن
- ملخص سفري الى سوريا لبنان تركيا
- السكن بدمشق
- إعادة تسيير رحلات قطار حلب مرسين
- عيد الاضحى في الشام ؟؟
رد مع اقتباس
المفضلات