ملاحظات اضافية
بعد ان عرضت لكم الاماكن اللى زرتها في رحلتي الى المانيا والنمسا ، احب ان اضيف بعض الملاحظات البسيطة واللى ممكن ان تكون مفيده لبعض المسافرين وهي كالتالي :
1- بطاقة الائتمان مسبقة الدفع: من خلال قرايتي لبعض التقارير ، وجدت بعض الاعضاء بيسأل هل البطاقة الائتمانية مسبقة الدفع هي مقبوله في التعاملات ، واعتقد ان كثير من الاعضاء ماقصروا واجابوا عن الاسئلة المتعلقة بهذاالموضوع ، لكن للاضافه والتاكيد احب ان اوضح ان البطاقة الائتمانية مسبقة الدفع واللى تكون الاحرف والارقام بارزة تقدر تستخدمها في كل شي زي أي بطاقة ائتمانية اخرى ، وانا استخدمتها في اكثر من سفره وكنت استأجر سيارة واتسوق بيها بدون مايكون فيه أي مشكلة ولا قد احد قالي انها مرفوضه ، لكن فيه نوع من البطاقات مسبقة الدفع لكن ما اعرف اذا موجوده عندنا في الخليج او لا . هذي البطاقة كانت عندي ايام ماكنت بادرس في استراليا وطلعتهامن احد البنوك الاسترالية وكانت بطاقة ائتمانية مسبقة الدفع وحروفها بارزه بس كانت مكتوب عليها Debit وكنت لما احاول استخدمها في ايجار السيارات يرفضوا ، لانهم بيعرفوا انها مسبقة الدفع بسبب كلمة ديبت الموجوده على البطاقة ، لكن البطاقة مسبقة الدفع اللى مطلعها من السعودية مهي مكتوب عليها شي ، عشن كدهما يقدروا يعرفوا اذا هي مسبقة الدفع او لا وعشن كده مقبوله في كل مكان اهم شي تشحنهابالمبلغ اللى تحتاجة .
2- استئجار سيارة ديزل : طبعامعروف لكل الاعضاء ان استئجار سيارة بنزين مكلف ، والجميع يعرف ان الديزل اوفر من البنزين ، وانا هنا احب اوضح ان استئجاري لسيارة ديزل وفر عليا 200 يورو خلال رحلتي ، لاني مشيت بالسيارة 2400 كيلو وعبيت السيارة خلال رحلتي مرتين بس كل مره كان 95 يورو تقريبا بس كنت اخلها لغايه ما تنشف ، يعني التانكي كان يمشيني 1200كيلو ، بعكس البنزين اللى يمشيك 600 كيلو فقط ، والبنزين مو بس يمشيك اقل كيلوات وكمان اغلى بالسعر ، يعني الفتره اللى انا كنت فيها كان سعر اللتر للديزل 1.5 يورو اما البنزين فكان 1.7 يورو ، فنصيحة حاول تستاجر سيارة ديزل لانك راح توفر كثيرخصوصا لو كنت حتقطع مسافات طويلة.
3- التفاوض على الاسعار في السكن : من المعروف ان اكثر الاعضاء بيستخدم موقع بوكينق لحجز الفنادق لسهولته ولمصداقيته ، وانا من الناس اللى احب استخدم البوكينق واكثر حجوزاتي بتكون منه ، لكن خلال فتره عمل الحجوزات للفنادق اكتشفت ان بعض الفنادق لما تتعامل معاها مباشره يعطوك سعر اقل من سعر بوكينق ، وافتكر اني راسلت فندق في مدينه هايدلبرغ وتفاوضت معاه على السعر واعطاني سعر اقل من بوكينق ، وقالي ان بوكينق بتأخذ منهم عموله على كل حجز عن طريقهم ، عشن كده راح نحسملك المبلغ اللى راح نعطيه لبوكينق ، ونفس الشي حصل معايا لما كنت ادور حجز في كابرون ، بس هذا مو معناته ان كل الفنادق بتفرق الاسعار عن بوكينق ، لان كثير من الفنادق كلمتهم عشن يعطوني سعر غير اللى في بوكينق ورفضوا وقالوا اسعارنا موحده ، خصوصا لما تكون من سلسلة الفنادق العالمية اللى ممكن لو حجزت عن طريق موقعهم يعطوك انترنت مجانا لو فرضا كان بفلوس في بوكينق او مشروب اول ما توصل او ممكن يكون عرضهم نفس اللى في بوكينق ، اللى اقصده انك حاول تعمل حجوزاتك بدري عشن تقدر تراسل الفندق وتشوف هل الاسعار بتفرق او زي بوكينق .
نقطة ثانية وهي ان اوقات تكون تبغى تحجز في فندق وتدخل على موقع بوكينق وتلاقية كله محجوز ، فتقوم تدور على فندق ثاني ، وانا انصحك انك لا تعتمد على موقع بوكينق فقط، لاني لما جيت احجز في شقق SSG في كابرون ولقيت كل الشقق محجوزة ، فقمت راسلت مباشرة المسئولة عن الشقق ، وقالت لي فيه شقق متوفره ، ومو معناته ان في بوكينق محجوزه يعني كل الشقق انتهت ، لا هما بيعطوا البوكينق عدد معين من الشقق عشن يعرضوها ، واستئجرت عن طريقها بنفس السعر المعروض في بوكينق ، وكمان فيه مواقع ثانيه ممتازه وانا جربتها زي هوتيل دوت كوم و اكسبيديا ، واوقات بيكون فيها عروض افضل من بوكينق.
4- تكاليف السفر : كثيرين يحبوا يعرفوا قد ايش كلفت السفر حتى يقدروا يعملوا ميزانيه تقديرية ، وطبعا التكاليف بتختلف من شخص لشخص ويعتمد حسب الاماكن اللى تزورها والفنادق اللى تسكن فيها ، لكن بالنسبة ليا كانت كالتالي :
تذاكر سفر 5500 ريال ( طريقة الدفع بالبطاقة الائتمانية )
فنادق 8600 ريال ( طريقة الدفع بالبطاقة الائتمانية )
استجار سيارة 3400 ريال ( طريقة الدفع بالبطاقة الائتمانية )
مصاريف نثرية 5500 ريال ( طريقة الدفع نقدا )
هدايا 1500ريال ( طريقة الدفع نقدا )
الاجمالي 24500 ريال
وزي ماهو واضح ان كانت هناك طريقتين للصرف وهي البطاقة الائتمانية والنقد ( كاش ) ، وانا اخذت معايا1600 يورو واللى تساوي تقريبا 7000 ريال سعودي وهي كمصاريف نثرية والمقصود بيها المصاريف اليوميه اللى تحتاجها في سفرك كقيمه التذاكر للاماكن اللى تزورها ومصاريف الاكل والشرب وقيمة تعبئة البنزين والهدايا ، والحمد لله كانت كافيه والباقي كان بالبطاقة الائتمانية زي ماهو واضح فوق.
5- مخطط الرحلة : انا من الاشخاص اللى ما احب اطول في منطقه معينه ، يعني يومين او ثلاثه بالكثير واحب انتقل لمكان ثاني ، عشن كده حسيت بالمتعه الكبيرة في رحلتي هذي ، لكن انا في رايي ان مخطط زي المخطط اللى انا مشيت عليه وبنفس مدته غير مناسب للعوائل اللى معاهم اطفال لانه حيكون متعب عليهم جدا لانه فيه تنقلات كثير واليوم الواحد يتضمن من نشاطين الى ثلاثه ، لكن للشباب او لشخص هو وزوجته فما اعتقد فيه مشكلة .
6- الافياش الكهرباء : بعض الاعضاءاللى بيخططوا للسفر الى المانيا والنمسا بيسألوا كيف شكل الافياش الكهربائية هناك ، وعشن يكون واضح ليهم هذا شكل الافياش
ويحتاجلها قسام عادي من الموجود في كل المحلات ، وهذا شكلة
7- جدول الاحداثيات : الجدول اللى راح انزله هو الجدول اللى انا استخدمته في سفرتي واللى جمعته من اكثر من موضوع ، وانا انصح الجميع ان يكون معاهم اكثر من جدول للاحداثيات وحتلاقي الجداول في مواضيع الاعضاء ، يعني خلي معك اكثر من جدول احداثيات تكون مجمعهم من اكثر من موضوع وخليها مساعده للاحداثيات اللى انا منزلها ، وطبعا لازم تنتبه لصيغه الاحداثية لانها مو كلها بنفس الصيغة .
هذا تقريبا كل اللى عندي واتمني انكم تكونوا استمتعتوا بالرحلة ، وشكرا للجميع على مشاركتكم وتعليقاتكم ، وانا حاولت قد ما اقدر اني ابعد عن التطويل الممل واخلي تقريري مختصر على الاشياء اللى اشوفها ضروريه ، وقدرت اني اشاركم اكثر من 850 صوره من رحلتي ، واتمني ان تكون رحلتى اضافت ولوشي بسيط للمنتدي .
الى اللقاء وتحياتي للجميع
المفضلات