بسم الله الرحمن الرحيم
وبعد
صباح الخير لجميع الاعضاء والزوار الكرام
ملاحظة (التقرير طويل نوعا ما , ينصح بقطع الاتصال بعد أكتمال الموضوع)
:smile127:
كانت عقارب الساعه تدور بطئية وكنت أعتقد انها تتاخر أكثر وأكثر كلما اقتربت من الثالثة عصراً يوم الاثنين 14/6/1427هـ لانها كانت ساعه الحسم او بالاصح ساعه الانطلاق , وبكل صراحة يوم السفر عندي احسب له الف حساب ففيه من الشوق واللهفه مالله به عليم , فتمتزج مشاعر وداع الاهل والخلان بمشاعر فرحة السفر وأكتشاف الدنيا وفالحال يتسارع الى ذهني الشاعر الشعبي:
لاسقاك الله يايوم السفر
هلت العبرات ساعه الوداع
لاأريد ان أطيل عليكم بمقدمة ولكن يجب أن اوضح لكم معنى عبارة (يافرحة ماتمت) التي في العنوان وذلك بسببين وهي :
1-
الحرب الاسرائيلية على لبنان الشقيق , مما أدى بكثير من السياح بالرجعه لديارهم وانا منهم .
2-
كاميرا التصوير سود الله وجهها سوت فينا مقلب وخيانه لاتغتفر ومن زود النذالة مابينت ان العدسة محروقة الا في اخر يوم , وأخذت على نفسي عهد اني أكسرها وحنا راجعين فالخط من عند (ساموده) عشان تموت فالخلا لكن للأسف كنت راقد يوم مرينا ساموده :icon_smur
تفاصيل الرحلة:
1- الاعضاء :
محدثكم الشيخ حمود :36_1_39:
(أنسان برئ سواق من الطراز الاول فالسفريات اتمتع ولله الحمد بروح الديموقراطية:biggrin: يعيب علي فقط كثرة الكلام واحيان الاوامر البسيطة ولذلك لقبت من قبل الاعضاء بــ
حمود اندبني)
والشيخ سعد:36_1_35:
(معقل الديكتاتورية ومؤسسها فالرحلة انسان يتميز بخفة الدم كثير النوم مسيطر على المقعد الامامي باليمين في اي سفرية سلس التعامل مع الباعه بشكل ررررهيب مافيه أمل يسوق ولو متر واحد يعشق جبال صافيتا
محتكر أشرطة وسيديات الكمر على مزاجه ولذلك لقب من قبل الاعضاء بـ
سعد سمعني)
والشيخ سلمان:36_1_21:
(قمة في الاخلاق سواق من الطراز النادر داخل الاراضي السعودية فقط انسان محنك وصاحب مواقف حكيمة في أستئجار الشقق وجدول الرحلة , يملك من الديموقراطية الكثير مما يجعله المنافس الوحيد لي يعشق نبع بلودان اكثر مايميزة هو اللباس الجنتل
ولذلك لقب من قبل الاعضاء بـ
سلمان جنتلي)
2-السيارة:كامري 2006 Gli اللون بحري:36_7_15: يملكها : الشيخ سلمان الله يبارك له فيها انشالله
3-المدة والوجهة :
12 يوم 10 منها في سورية الحبيبة:36_3_16: ويومان في لبنان الشقيق:36_3_15:
(أسال الله ان يجنب اخواننا المسلمين شر الحروب )
4- مصاريف الرحلة :
3200ريال سعودي على كل شخص اي المجموع : 9600 ريال سعودي
********
اليوم الاول: الاثنين
وأبتدى المشوار
********
كان التحرك من منزلي الساعه 3.12 عصراً بالظبط من يوم الاثنين وتوقفنا لصلاة العصر في محطة على طريق القصيم اسمها (استراحة خط القصيم) وصلينا فالمسجد ومرينا عالسوبر ماركت نستفتح القطة ونشتري مانحتاج من ماء وعصيرات ومكسرات وشاحن جوال , عبينا الكمر بنزين (طبعاً الكمر اختصار لكلمة كامري او بالاصح تدليعه:36_7_14: ) ونمر بها على عيار الهواء للحفاظ على الاطارات وقمت انا والشيخ سلمان برش ودهن صابون سائل (فيري ليمون) على وجه الكمر حفاظا عليها من الاتربة والغبار مسكنا الخط وقرأنا دعاء السفر وكان الجو فيه نوع من العج بس على خفيف لين وصلنا المجمعه لفينا يمين مع طريق حفر الباطن الكويت حتى وصلنا قرية الارطاوية وانقطع العج بحمد الله وعلى ام الجماجم وام رقيبة حتى وصلنا مفرق رفحاء من عند محطة (البطيحانية) قبل قاعدة الملك خالد العسكرية بحفر الباطن بـ 25 كلم تقريبا وحل الظلام:11ld: واصبح الخط سيد واحد مما جعلنا نمشي بسرعه 140 كلم/س , كان الجو هادئ والقمر 15 والنجوم متناثرة حوله يعني ماشالله جو خط صراااحة مما حدى بالشيخ سعد سمعني على أطفاء المسجل وسرد حكاياته لنا ومغامراته عن رحلتة الاولى لبلاد الشام 1422هـ:gathering وبالذات عن دمشق التاريخ وصافيتا الساحرة ولبنان الراقية وانا والشيخ سلمان:icon_chee يحدونا الشوق والوله مما نسمع سواء كان صدق او هراء لانها الزيارة الاولى لنا لبلاد الشام ,, مرينا العديد من القرى والهجر الصغير (سامودة - لينة - زبالا ) واتوقع انها مناطق ربيعيه لان فالليل مانقدر نشوف ولكن من كثر اهل الماشية :m9: اللي نشوفهم فالمحطات وعلى الطريق , واصلنا المسير حتى دقت الساعه 10.45 ونحن على بعد 3 كلم من مدينة رفحاء ,هذة المدينة الجميلة التي لم أكن اتوقع انها بهذا الجمال واكثر ما شدني أنها مدينة مسافرين لكثرة المحطات والمطاعم والفنادق والشقق المفروشة كذلك لا انسى اقول انها ملتقى طريق البطيحانية رفحاء وطريق الحفر رفحاء , توقفنا في اول محطة عاليسار (محطة المطلق) وتوضينا وصلينا المغرب والعشاء جمع تاخير وعبينا البنزين ودخلنا رفحاء حتى أستوقفنا مطعم باليمين على شكل كوخ ديكوراته جذابه وتعشينا (نص حبة مندي ونص حبة مظبي) أرضاءً لجميع الاذواق ودحرأ للفتنة:11ight: عينا وهالوجيه خير ونركب السيارة ونقزت انا مثل الذيب خلف المقود :king: لان الشيخ سلمان هو السواق من الرياض , بعد مأخذت لي كأس شاي على ماقال (مخدر) يصحصح الرأس لان اللوحة تقول : عرعر 300 وحنا اللي ندعس 160كلم/س واحيان صراحة نوصلها 180كلم/س لان الخط أصبح سايدين مع كثافة سيارات (سعودية وكويتية وقطرية واماراتية) اغلبهم عوائل ونمشي في هالجو ونمر هجر وقرى مثل (العويقيلة -طلعة التمياط:wink: ) لين وصلنا عرعر الساعه 2.15 صباحا توقفنا في محطة نعبئ البنزين والشيخ سعد سمعني اصر على اصطحاب شريط من التسجيلات وهو للشاعر ياسر التويجري عشان قصيدته في سوريا :
اربع جوازات طبع وسطها اختام *** مرماهم دمشق على هيك ينوون
تابعنا المسير واذا باللوحة تشير ان طريف 280كلم وانا اعتقد والله العالم انها اكثر من ذلك: , مشينا وبدأ التعب والارهاق يدب فينا قليلا الواحد تلو الآخر حتى أشارت الساعه الى 3.30 وأذن الفجر وقفنا في احدى المحطات قبل طريف بـ 100 كلم تقريبا وصلينا الفجر وأثناء الوضوء لاحظنا برودة الماء ودرجة الحرارة كانت في اقصى نزول لها 19‘ْ وجدنا فالمحطة شباب جايين من الخرج يعانون من طول المسافة مثلنا :frown: ,
********
اليوم الثاني: الثلاثاء
نهاية المشوار ودمشق
*******
مشينا بعد ماصلينا الفجر في المحطة مرورا بــ(وادي الخر) و(حزم الجلاميد) حتى وصلنا طريف وعلى قولة العامية خلينا طريف مطب , من بعد الصلاة طبعا انتقلت الطارة للشيخ سلمان , لانني احسست ببعض التعب والارهاق وفضلت أخذ لي غطة نوم لو نص ساعة فقط ,, بعد طريف القريات تقريبا 150 كلم وصلناها الساعة 6.30 صباحا بالظبط (مداخلة): مشينا من الرياض 3 العصر الاثنين وصباح الثلاثاء 6.30 فالقريات يعني الخط أخذ منا 13.30 ساعه بالتمام والكمال علما بان المسافة من الرياض للقريات 1450 كلم متى على الله يخلص طريق الجوف حائل بس:whistling و دخلنا القريات واذا بها مدينة جميلة حضارية واتجهنا مباشرة لاقرب بوفية للأفطار بعد أرشادنا من قبل شباب القريات وكلمة حق (ان اهل القريات أجاويد وناس حبوبين ويتسارعون في خدمة المسافرين) من قصور في باقي مناطق المملكة , بعد الفطور تشاورنا نرقد فالقريات أو نواصل ونتحمل التعب شوي عشان ندخل سوريا بالنهار , واتفقنا نواصل لان اذا رقدنا فالقريات اكيد بنصحى فالليل وبنتعرض خطوط الاردن وسوريا فالليل وهذا أمر خطير , اتكلنا على وتوجهنا للمنفذ الحديثة 3كلم عن القريات وعبينا بنزين وكملنا ماينقص من اغراض وتموينات وغيرنا زيت وسيفون للكمر ودخلنا الجوازات السعودية ونحصل زحمة قعدنا تقريبا 45 دقيقة , بعدها دخلنا حدود المملكة الاردنية الهاشمية منفذ(العمري) ونفس الزحمة كانت معنا وقعدنا مايقارب 45 دقيقة فالجوازات و15 دقيقة فالجمارك قريبا , وكلمة حق لابد أن تقال (الجوازات والجمارك الاردنية من أفضل مأريت تنظيم:1279: صالات مكيفة خدمات تموينية خدمات صحية ممتازة رجال أمن نظاميين :24: )دخلنا الاردن 9.15 صباحا واللوحة تشير الى ان الحدود السورية 180 كلم ولكن للأسف الطريق سئ بكل ماتعنيه كلمة سئ
وقفنا بعد 20 كلم في مدينة اسمها (الازرق) وتوقفنا عند مطاعم مشويات معلقين الخرفان النعيم وتختار اللحم اللي تبيه ويشويه قدامك لذيذ جداً طلبنا 3 ساندوتش كباب مع الشاي يعدل المزاج واصلنا المسير طبعاً انا استلمت طارة القيادة من القريات وحتى رحلة العودة مشينا وشفنا البدو حقين الاردن على جنبات الطريق مثل البدو عندنا (بيت شعر وايت وغنم نعيم ) منظرهم صراحة يشرح الخاطر يذكروني بمسلسل (وضحى وابن عجلان) واصلنا المسير حتى الحدود الاردنية السورية (منفذ جابر) وقعدنا تقريبا فالحد الاردني ساعة لان الزحمة زادت كثير عن السابق دخلنا الحدود السورية (منفذ نصيب) وكانت الساعه تشير 11.30 ظهرا والزحمة في أشد ذروتها وكان النظيم صراحة تحت المستوى المأمول وقعدنا فالحد السوري اكثر من ساعه ونص مابين جوازات وجمارك وتأمين دخلنا سوريا الساعه 1 ظهر بالظبط ودمشق 90 كلم عن الحد والطريق ممتاز سيدين ومناظر طبيعيه ودرجة الحرارة 22 لكن حنا مواصلين يعني تعب وأرهاق:36_1_47: (الله يعين) دخلنا دمشق واتجهنا لمزة الجبل شفنا المنطقة قديمة وقررنا الاتجاه لمساكن برزة وجدناها حلوة وممتازة سياحية وأستاجرنا شقة على شارع حاميش الدور الثاني (غرفتين وصالة وحمام ومطبخ بالخادمة) بــ 3000 ليرة بالسعودي 214 ريال وطلبنا غداء من (مندي حضرموت) ويالينا ماطلبناه :112: كان طبخهم سئ للغاية بس وش نسوي مواصلين وميتين من الجوع أكلنا غصب كانت الساعه تقريبا 3 العصر يعني كملنا أكثر من 24 ساعه مواصلين , انا على طول حطيت رأسي نوم فالصالة:36_1_50: والله ياجماعه اني بملابسي من التعب والشيخ سعد سمعني راح في غرفة لحاله ورقد , الحين تعالوا أقولكم على مقلب زي العسل للشيخ سلمان جنتلي:36_1_13: : الرجال بحكم أنه يحب الجنتل ويحرص عالشخصية طلع بعد الغداء يحلق :36_2_66: ونسى ياخذ مفتاح الشقة معه :36_1_19: راح الرجال وحلق ورجع للشقة بعد نص ساعه تقريبا طق الباب طق طق طق ماحد فتح , محدثكم (حمود اندبني) في سبات عميق ومستحيل يقوم لو تقوم الحرب العالمية و(سعد سمعني) فآخر غرفه ونفس الكلام نومه ثقيل , الشيخ سلمان طق الباب وتعب وراح للحلاق وشرب عنده شاي وراح وصرف فلوس معه ورجع وطق وطق وطق لين سمع اهل العمارة كلهم وأخيرا الساعه 6 قام الشيخ سعد وفتح له الباب وحصل الرجال في حاله يرثى لها :36_1_17: رجعنا وكملنا النوم ويوم جت الساعه 10 بالظبط الا الشباب يصحوني على العشاء (فاكهة مشكلة: توت-خوخ-عنب-كمثرى)تعشينا وكلمنا الاهل نطمنهم ورقدنا على طول من شدة التعب أيضا الساعه تقريبا 10 مساءً.
******
اليوم الثالث: الاربعاء
الفلة والزبداني ونبع بلودان
******
صحيت انا الساعه 8 صباحا والحمد لله نشيط وأخذت راحتي من النوم بعد الطريق المهلوس أخذت دش بارد وياعيني عالموية الباردة عالصبح قمة الانتعاش وصحى الشيخ سعد ونزلت انا وياه نجيب فطور (حمص-فول-فلافل-خبز تنور) وصرفنا من القطة تقريبا 2000 ريال سعودي وبحكم أن النظام في سوريا يمنع استيراد المشروبات والمأكولات المعلبة من الخارج تشجيعا للصناعه السورية . وجدت كشك صغير لديه (عصير سيزر وتسالي ليز وكيت كات) قالي ان هذى مدخلة لسوريا تهريب عشان يبيعون عالسياح الخليجين , رجعنا للشقة وافطرنا وشغلنا التلفزيون وشفنا اللي يضيق الصدر :36_13_3: وبداية الشرارة فالحرب الاسرائيلية , والساعه 11 وحنا طالعين من الشقة لانو متفقين مع وسيط نغير الشقة لفلة , ومشينا يمكن كيلو نص مع شارع حاميش بالقرب من كشك اللورد واستأجرنا فلة مقابل محطة طوارئ كهرباء مساكن برزة (3 غرف تكييف سبيلت + صالة+ حمام+ مطبخ+TV 29 بوصة+حوش بحديقة صغيرة+خادمة) بــ 4000 ليرة :x1: وكان صاحب الفلة أنسان ونعم الرجل انسان صدوق نظيف خدوم زي العسل ويمكن أحلى (ابو وسيم) نزلنا أغراضنا فالفلة بعد ماشربنا الشاي مع ابو وسيم واتفقنا على يومين مبدئياً والنية كان على أسبوع عالاقل , مشينا على آذان الظهر للزبداني وتغدينا فيه (مشويات ومقبلات) على الكيف وتجولنا في بلودان عاليا ووقفنا عن النبع اللي عنده مسجد قديم وشربنا وتوضينا منه وعبينا (جيك) معنا عشان القهوة والشاي لانه بصراحة خيالي تجولنا داخل الزبداني وتوقفنا في احدى المزارع للاطلاع وحجزها بعد اسبوع تقريبا وجدنا شي ررررررهيب صراحة (مزرعه بفلة رخام ومسبح) بــ 6500 ليرة , مشينا مع اذان المغرب ورجعنا لدمشق صلينا المغرب والعشاء وتابعنا الاخبار اللي تضيق الصدر بقووة والخوف ينتابنا شي فشيئاً ورقدنا على أمل شمس تجلى الغمام :114: .
********
اليوم الرابع: الخميس
ملاهي الارض السعيدة********
اصبحنا يوم الخميس الساعه 11 وراح الشيخ سلمان يجيب لنا فطور خفيف لانو احنا عازمين ناس عالغداء 2 شباب من أملج تعرفنا عليهم فالجمرك واعطونا رقم (ابو وسيم) صاحب الفلة جزاهم الله عنا الف خير صلينا الظهر وجونا المعازيم حقين املج شباب عليهم خفة دم مو طبيعية:36_11_6: وابو وسيم صاحب الشقة , وشربنا القهوة والشاي وتغدينا من مطعم حضرموت (فرع ثاني غير سئ الذكر) لحم نعيمي هرفي , وقعدنا نتابع الاخبار اللي كل يوم والثاني تضيق الصدر أكثر وأكثر بدأ القصف الاسرائيلي على لبنان , صلينا العصر ومشيوا المعازيم وطلعنا بعدها لمدينة (الارض السعيدة) الترفيهية على طريق المطار ودخلنا بتذاكر الشخص بــ 40 ليرة اقل من 3 ريال سعودي وحصلنا مدينة خيالية من حيث الجمال والالعاب ومسرح , في نفس اليوم كان فيه حفلة للفنان (جورج وسوف) والجمعه(نانسي عجرم) والسبت(راغب علامة) والاحد(عيظة المنهالي) ,, بس الحمد لله كنا مبعدين فكرة حضورها نهائياً لاننا ناس جاين ندور السياحة والتمشية مانبي الهز والوز ,أشترينا دفتر تذاكر كامل للألعاب وماخلينا لعبة (الصحن الدور-السيارات التصادمية-الطبق الطائر-قطار الموت-رالي سيارات-) وصلينا المغرب والعشاء وطلعنا تقريبا الساعه 9.30 , وصلنا الفلة كنا مكسرين من كثر اللعب ورقدنا على صوت قناة الجزيرة ×× خبر عاجل××:ranting2: قصف وقتل وضرب وهدم والله يخارجنا .
********
اليوم الخامس : الجمعه
ياروحي يا صافيتا
********
اصبحنا الجمعه وافطرنا وشفنا الاوضاع متردية وكل يوم أسوأ من الثاني وطرح الشيخ سعد اقتراح وقال : ياشباب الوضع خطير للغاية والجلوس هنا كسياح غير مطمئن فالجدول لازم نعدل عليه ,, اولاً: تلغى زيارة لبنان من الجدول , ثانيا: نكتفى بيومين الماضية في دمشق ثالثاً : نمشي اليوم لصافيتا ونجلس فيها يومين مع مراقبة الاوضاع .وتغيير مايطري من مستجدات . لفينا أغراضنا وحزمنا الحقائب وكلمنا ابو وسيم لتسليم الفلة ومشينا لصافيتا مع طريق (دمشق - حمص) 250 كلم طريق ممتاز سيدين ومناظره روووعه ومحطات نظيفة لين بقى على حمص تقريبا 20 كلم جانا باليمين مخرج لصافيتا لكنه سيد واحد وفيه ميزة (مناظر خيالة جنة الله في أرضة) مشينا مع الطريق وتعال تفرج يمن ويسار وفوق وتحت غابات وسحاب وقرى وبيوت ودك تسكن في بقية حياتك من جمالها , ماشالله تبارك الله , لين دخلنا في قرية صغيرة اسمها (مشتى الحلو) وحصلنا فيها كثير عوائل خليجية واخذنا غدانا منها وتغدينا على جانب الطريق في جو ماينوصف وتابعنا المسير حتى وصلن صافيتا تقريبا 4 العصر , ,اخذنا جناح سويت في شقق النديم (3غرف تكييف سبيلت+صالة+حمامين+مطبخ+شرفة مطل على جبال لكل غرفة+سراميك) بـ 1500 ليرة اليوم الواحد :36_1_25: نزلنا الاغراض وريحنا شوي واتسبحنا طبعا بالسخان الحار لان درجة الحرارة اقل من 18 والجو غيوم وسحب باااارد , ونزلنا للشارع طبعا مدينة صافيتا تتبع لمحافظة طرطوس ويعتنق معظم سكانها الديانه المسيحية , ولكن والله العظيم اننا وجدنا في أهلها حسن تعامل وبشاشة ودماثة أخلاق وصدق فالتعامل وراحة بال لم اجدها حتى في بلدي السعودية . مشينا فالشارع لنتطلع عالمدينة رجعنا للشقة وفتحنا التلفاز :11_horror وعلى طول اغلقناه عشان ماتضيق صدورنا , طلعنا نتعشى في مطعم يقولون أنه اغلى مطعم في صافيتا :114: وجلساته مطل على الجبال وانوار البيوت والقرى وتعشينا (سمك ومشويات ومقبلات وعصيرات) بــ 420 ليرة يعني 30 ريال سعودي ,, طلعنا من المطعم وتمشينا على رجولنا في شارع سياحي يسمونه (الشانزليه) وقفنا في كوفي شوب وشربنا الشاي , وكلنا مندهشين من أهالي صافيتا وطريقة تعاملهم مع السياح لان بصراحة تسحرك سحر , رجعنا للشقة ورقدنا عالساعه 1 تقريبا .
********
اليوم السادس : السبت
غداء طرطوس وتدهور الاوضاع ورحلة العودة********
اصبحنا يوم السبت بنشاط غير مسبوق ولم نستطيع لمس الماء الا لغسيل اليدين او الوجة فقط لبرودة الماء , طلعنا عالساعه 10 لمطعم نفطر فيه (شايب وزوجته وبنت وولد) حاطين بيتهم قسمين الدور الارضي مطعم جلسات ومطل والدور العلوي مطبخ:1076: وسكن خاص فيهم , ويوم عرف ان حنا من السعودية حطنا فوق السحاب من كثر الترحيب والاستقبال وافطرنا (جبن بلدي-بيض مقلي-زيتون-مربي) شاي وطلبنا منه زيت زيتون بكمية كبيرة 10 ليتر عشان هدايا للاهل والاصدقاء , وقال مستعد اعطيكم من مزرعتي الخاصة واتفقنا نمره بكرة الصباح ويجهز الكمية ,, طلعنا من عنده للسوق القديم في صافيتا وتمشينا على رجلينا وهناك أكتشتفت ان الكاميرا محروقة وبغينا نموت من القهر يابلفيت أشترينا بعض الهدايا من السوق و(جراكل) لتعبئة الزيت زيتون , وطلعنا من السوق وقال الشيخ سلمان ليش مانروح نتغدى في طرطوس مدام ان المسافة 50 كلم , قلنا وش ورانا مشينا وسط هالطرق اللي تشرح النفس لين وصلنا طرطوس وماخفيكم كانت دون المستوى المأمول :27: مدينة عالبحر مافيها شي مميز أو يستاهل حتى الشواطئ فيها لقيناها مغلقة ليش مدري والجو رطووووبة وقفنا في مطعم عالشاطئ راقي جدا وتغدينا فيه , وبصراحة كنا نأكل مثل المغصوبين نبي نرجع لصافتا وبس :115: , بس لابد ان امدح لو شي بسيط لطرطوس أعجبنا مواقف رجال المرور وخدمتهم لنا عشان عرفوا حنا سياح وغضوا الطرف عن اشياء بسيطة :101: ورجعنا على طول لــ(صافيتا:36_3_13: ) دخلنا الشقة الساعه تقريبا 4 عصراً واذا بالاتصالات تنهمر من الاهل : ارجعوا ارجعوا اسرائيل بتذبحكم امريكة بتوديكم لقوانتامو انحاشوا ,,, ومن هالكلام لين ضاقت صدورنا صدق وكثروا علينا الشيبان صراااحة ولولاهم كان ما رجعنا ,,, عالفور عقدنا جلسة مغلقة طارئة في غرفة الشيخ سعد مسمعني وتشاورنا :gathering واتفقنا ان الاهل خايفين علينا ولعنبوا لايمهم صراحة . ولا لو جينا للحقيقة كان صافيتا تستاهل شهر كامل مو يومين , خرجنا من الاجتماع بما يلي : 1-نحزم حقائبنا فوراً 2-نتحرك فورا وسريعا عائدين لبلادنا نظرا للظغوطات الخارجية 3-الله يخلف عالزيت زيتون شكل الشايب بيحقد علينا . ,,, حزمنا الحقائب ومرينا الرسبشن نسلم الغرفة (هنا وش تتوقعون حصل) :114: مسكنا راعي الشقق وقال اذا انتم طالعين نهائي استلموا نص الايجار لانو حرام تدفعون ايجار يوم ولاتكملونه !!!!! عندها وقفت شعرات راسي وقلت في خاطري : ياسبحان الله هذا مسيحي وهذى اخلاقة وحنا كمسلمين أولى أن نكون مثله .... اييه الله المستعان لو بتكلم بعد زيادة عن صافيتا ببكي من حبي لها , مشينا مع طريق حمص -دمشق والخط زحمة عوائل خليجية جايين من لبنان منحاشين مثلنا لين وصلنا دمشق أذان المغرب , وقفنا في محطة وعبينا بنزين دخلنا دمشق وضيعنا شوي ماندل الطريق واشترينا بوظة لاني تذكرت ان احد الاعضاء هنا نزل صور بوظة الظاهر انه (جاسم) وطقتني الغيرة وعلى طول عالحلق (زكام ورشح) الله يهديك ياجاسم بس طلعنا من دمشق وانا السواق طبعا لين وصلنا الحدودة الاردنية تقريبا الساعه 9 وعينك ماتشوف الا الزحمة عالم بشر ناس ماتدري ووين تروح عوائل لها ايام ماذاقت النوم جايين من لبنان وخلها على ربك , نزلت انا والشيخ سلمان وقعدنا تقريبا ساعتين فالطوابير لين خلصنا من الحد السوري . دخلنا حد الاردن وقعدنا ممكن ساعه وحده بس , دخلنا الاردن انا خلاااااااص أنتت صلاحيتي (حرارة+رشح+ أرهاق) ركبت وراء وحطيت راسي طبعا بعد ما تعشينا في مدينة اسمها (المفرق) عشان 3 همبرجر دجاج و3 بيبسي قعدنا 45 دقيقة
مشينا والسائق الشيخ سلمان وانا وشيخ الغفر سعد سمعني راقدين وحذرت سلمان قلت تكفى ياعزوتي انتبه الخط سيد واحد وتعبان وحنا مرهقين اذا ماتقدر تسوق وقف لو في اقرب برحة نرقد , والحمد لله وصلنا للحد الاردني السعودي وحصلناه شبة فاضي (لان أغلب العائلات توجهو لعمان عشان يرتاحون) قعدنا تقريبا ساعه ونص فالحد ودخلنا القريات على أول محطة في فندق اسمه (لقاء) ممتاز جدا ونظيف ورقدنا الساعه تقريبا 2.30 قبل الفجر .
********
اليوم السابع: الاحـــد
رحلة العودة
********
أسمحوا لي هذا آخر يوم وتعبت من الكتابة وبختصر : قمنا تغدينا الساعه 1.30 ظهرا مشينا وعلى (طريف-- عرعر- -رفحاء - - البطيحانية - -المجمعة - - الرياض) 3.30 فجراً :109: جبناها في 12 ساعه طفشانين من اللي صار .
*************************
مايستفــــــاد من الرحلــة/
1- اللهم العن اليهود وزلزل الارض تحت اقدامهم .
2-اللهم أرحم أخواننا المستضعفين في لبنان وفلسطين.
3-اللهم أحفظ سائر بلاد المسلمين من شر الحروب والمحن.
4-ماصرفنا من الميزانية الا قرابة الـ 3000 ريال سعودي واغلبها راح في الحدود والبنزين والتامين والتربتيك.
5-الخط من الرياض للقريات خدمات زي العسل , ولكن المسافة تقص الظهر , لأخفيكم عندما خرجنا من القريات وقرأنا اللوحة (الرياض 1450 كلم) بغينا نبكي :m12:
6-سورية في نظري أفضل بلد عربي يزوره السائح الخليجي (أمن داخلي 100%- جو طبيعة- أسعار- تعامل وأخلاق) الله يحفظ اهلها .
7-صافيتا حب من أول نظرة ولآخــــــــر قطرة .(واللي مو مصدق يجرب)
وختاماً : أعتذر عن الاطالة وعن الصور , وأن أخطأت فمن نفسي والشيطان , وأن أصبت فمن الله
والسلام عليكم ورحمه الله وبركاته .
أخوكم
سلم الطائرة
24/يوليو/2006
11.58صباحاً
رد مع اقتباس
المشاركة الأصلية كتبت بواسطة سنترال بارك
المفضلات