الموضوع: كيف اصل الى فندق النوفيتيل ؟؟

صباح الورد

شلون اوصل لفندق النوفتيل من الجسر ؟

انا شفته عالخريطه وشفته يقع على الجسر الي بين المنامه والمحرق

بس صراحه باين على الخريطه مشوار وانواع اللفات

ممكن توصفوني دربه من الجسر لاهنتو ؟

شاكر ومقدر

مواضيع عشوائيه ممكن تكون تعجبك اخترناها لك:

• جسر ثاني جديد يربط البحرين والسعوديه
• عيديتي لكم تقريري الحصري لممكلة االبحرين
• ارجو المساعده
• رمضان في البحرين
• موقع ملخبطنى تكفون الحقونى؟
• وين موقع مطعم زعفران بالضبط ؟؟؟
• نداء للأخ بحريني غير
• بخصوص وسيلة النقل من الجسر الى البحرين والعكس
• شوية أسئلة ،،، بعد بكرا جايينكم
• استفسار عاجل عن فروع محل Bershka بيرشكا في البحرين ومتى تفتح المولات وتقفل
• ابي فندق رخيص ونظيف لعائلتي
• عاجل ياأهل البحرين
• حابه احجز عن طريق موقع وشرايكم فيه هل سبق حجزتو فيه ؟؟؟
• إلى أهل البحرين مع التحية
• بسافر البحرين ساعدونـــــي
• فندق خدعوني بالاسعار وش اسوي فيهم
• مجمع الستي سنتر يوم الجمعه ياأهل البحرين
• متى تبدا التخفيضات ؟؟
• ابحث عن موقع مستكشف البحرين
• استفسارات عن الجزر الموجودة بالبحرين

هذي الخرايط توضح المسار من جسر الملك فهد إلى الفندق .. وأتمنى أنهم يكونون واضحين ومفهومين .. وبعد الخرايط راح أشرح لك من بداية جسر الملك فهد إلى باب الفندق ..

http://www.0zz0.com


http://www.0zz0.com


الحين الشرح :

أول ما تطلعون من الجسر وتخلصون كل الإجراءات وتمشون لين نهاية الجسر نهاية الجسر أهي التأمين مال السيارات البحرينية في دخول السعودية على تجوفونه على اليسار .. هذي نهاية الجسر .. وبعدها تمشون سيده وراح تمرون على كوبري اتركوه وامشوا بعد سيدة وراح يجيكم كوبري ثاني وبعد اتركوه وروحوا سيده وبعد راح يجيكم كوبري ثالث وبعد اتركوه وروحوا سيده وانتوا رايحين سيده راح تمرون على أنصار جاليري راح يكون على يمينكم ومجابل أنصار جاليري راح تجوفون منتزة عين عذاري .. وبعد روحوا سيده وراح اييكم جسر ركبوا الجسر وروحوا سيده لين ما اييكم نفق وبعد روحوا سيده وبعد ما تطلعون من النفق بشويه راح تجيكم إشارة .. هذي الإشارة أخذوها يسار .. وإذا ليفتوا يسار روحوا سيده راح تجيكم أول إشارة أتركوها وروحوا سيده وراح تجيكم ثاني إشارة اللي تدخلكم على الجفير وجنبها مسجد الفاتح بعد أتركوها وروحوا سيدة وراح تجيكم ثالث إشارة اللي تدخلكم على شارع المعارض بعد أتركوها .. راح تجوفون على يمينكم النادي البحري وأرض المرح ..لين ما تجيكم الإشارة الرابعة .. عاد أهني يبيله اتحطون بالكم .. لأن الحين في تحويلات .. حطوا بالكم قبل الإشارة بشويه يعني تقريباً 200 متر أو 300 متر راح تجوفون لفة تاخذكم يمين وراح تجوفون سيارات وايد تلف هذي اللفة وانتوا لوفوها وراح تاخذكم على جسر الشيخ حمد وبس تمشون شويه بتجوفون لفه على اليمين لفوها وراح تجوفون الفندق مقابلكم ..


وإذا في اي صعوبة ترى أنه حاضر لكم .. وإذا عندكم أي سؤال أو أي اسفسار ترى هم بعد حاضر ..

وتقبلوا مروري ..

يابعدهم انت

بعد كذا مافي وصف ياعسل

الجسر الرابع نطلعه لين النفق بعد النفق بشوي اول اشاره يسار

ونطول الين قبل الاشاره الرابعه ب200 متر ناخذ يمين لجسر الشيخ حمد

اول لفه يمين والفندق جمبي

يالبى قلبك بس

اخر سوال كم دقيقه ممكن يكون من الجسر ؟

ان صراحه خوفي اغلط غلطه شنيعه وادخل احياء الربع واتوهق

والف شكر لك

الوقت والله بضبط ما أقدر أفيدك لأنه على حسب الزحمة وعلى حسب الوقت اللي راح أتييون فيه .. بس يعني متوسط الوقت 30 دقيقة زايد قاصر ..

بخصوص الوصف مب الجسر الرابع .. في فرق بين الجسر وبين الكوبري .. أول ثلاثة كوبري يعني تمرون تحت جسر ويكون الجسر في الاتجاه المعاكس يعني + .. بس الرابع تركبون جسر ويكون سيده لا يمين ولا يسار وحتى إذا مريتوا تحت الكوبي لا يمين ولا يسر ..

أهو باختصار .. تطلعون من الجسر سيده لا يمين ولا يسار كله شارع سريع لمسافه تقريباً 10 او 12 كيلو .. لين ما تلاقون أول إشارة .. وهذي الإشارة تلفونها يسار وسيدة لين رابع إشارة قبلها تلفون يمين واللفة اليمين راح تكون بعد متحف البحرين الوطني .. وان شاء الله ما تضيعون .. بس خلكم على الوصف اللي وصفته لكم ..

باذن الله يالغالي

تدري عاد بستغلك واحللك بعد

اخر سؤال

في مجمع اهدى من الستي سنتر والسيف جمبنا ويكون مثلا فيه سينما ومطاعمه رايقه شوي ؟

والله شكلك تقول وش هاللبشله عطيناه وجه وابلشنا

ههههههههههههههههه

شدعوة عادي والله .. وهذي واجبنا .. وحاضرين لكم وحق اي سؤال ..
بخصوص المجمعات اللي فيها سينما مافي إلا مجمع الستي سنتر ومجمع السيف .. وفي سينما الجزيرة في المحرق لكنها صغيره ومافيها الا قاعتين .. وكلها هنود .. فأرقى سينما في البحرين سينما الستي سنتر .. وإذا اتحبون الهدوء خلو زيارة السينما والمجمعات الصبح الساعة 11 أو الظهر .. وبخصوص المطاعم الراقية في منطقة العدلية كلها مطاعم وكوفي شوبات راقية .. وفيه شارع أسمه الشيراوي .. هذي كله مطاعم وكوفي شوبات راقية .. قريب منكم أرض المرح فيها بولينغ وصاله تزلج على الجليد .. وجنبكم النادي البحري أهو ممشى وفيه مطاعم وقهاوي على البحر .. وهذي خريطة المكان :

http://www.0zz0.com

كل الي اقوله ياجعل عيون من جابوك مايكبونك ياغالي

امثالك مشرفين ياعزيزي والله يسعدك ويوفقك

الف شكر كفيت ووفيت

يسلمووووو والله على هالرد ..
ومن ذوقكم والله ..
ويوفق الجميع ان شاء الله ..
العفووووو .. وبصراحة وإذا في أي سؤال أو اي اسفسار ترى آنه حاضر .. ومافي مشكلة من كثرة الأسئلة ..
ترى هذا واجبنا أنا نساعدكم ونوقف وياكم أنتوا ضيوفنا ولازم نشيلكم ونساعدكم في كل صغيرة وكبيرة ..

اخي الغاالي


جرب سينما الدانه اهدى من السيتي والسيف ..... تحياااتي